6. நித்³தா³தந்தீ³ஸுத்தவண்ணனா

16. பச்சி²மே மாஸே பச்சா²ப⁴த்தம் பிண்ட³பாதப்படிக்கந்தோ சதுக்³கு³ணம் ஸங்கா⁴டிம் பஞ்ஞபேத்வா த³க்கி²ணேன பஸ்ஸேன ஸதோ ஸம்பஜானோதி ஏத்தகம் பாட²ம் ஸங்கி²பித்வா ‘‘நித்³த³ம் ஓக்கமிதா’’தி வுத்தம். கிரியாமயசித்தேஹி அவோமிஸ்ஸோ ப⁴வங்க³ஸோதோ அப்³யாகதனித்³தா³. ஸா ஹி கீ²ணாஸவானம் உப்பஜ்ஜனாரஹா, தஸ்ஸா புப்³ப³பா⁴கா³பரபா⁴கே³ஸு…பே… உப்பன்னம் தி²னமித்³த⁴ம் இதா⁴தி⁴ப்பேதா நித்³தா³, ஸா அகீ²ணாஸவானம் யேபு⁴ய்யேன அனியதகாலா, தப்³பி³து⁴ரனியதஸப்³பா⁴வம் த³ஸ்ஸேந்தோ ‘‘அதிச்சா²த…பே… ஆக³ந்துகம் ஆலஸிய’’ந்தி ஆஹ. காயாலஸியபச்சயா வீரியஸ்ஸ படிபக்க²பூ⁴தா சத்தாரோ அகுஸலக்க²ந்தா⁴ தந்தீ³ நாம. தந்தீ³தி ஸபா⁴வனித்³தே³ஸோ. தந்தி³யனாதி ஆகாரனிம்த்³தே³ஸோ. தந்தீ³மனதாதி தந்தீ³பூ⁴தசித்ததா. ஆலஸ்யந்தி அலஸபா⁴வாஹரணம். ஆலஸ்யாயிதத்தந்தி அலஸபா⁴வப்பத்தி. காயவிஜம்ப⁴னாதி காயஸ்ஸ வினாமனா. அகுஸலபக்கா² உக்கண்டி²ததாதி அகுஸலபக்கி²யா அனபி⁴ரதி. ப⁴த்தகிலமதோ²தி யதா²வுத்தஸ்ஸ ப⁴த்தவத்து²கஸ்ஸ ஆஹாரஸ்ஸ வஸேன ஸரீரே உப்பஜ்ஜனககே²தோ³. உபக்கிலிட்டோ²தி பஞ்ஞாய து³ப்³ப³லீகரணேன உபக்கிலிட்ட²சித்தோ. சித்தஸ்ஸ அஸமாஹிதத்தா நிவாரிதபாதுபா⁴வோ. அரியமக்³க³ஸ்ஸ ஜோதனம் நாம உப்பஜ்ஜனமேவாதி ஆஹ ‘‘ந ஜோததி, ந பாதுப⁴வதீதி அத்தோ²’’தி. ந ஹி அரியமக்³கோ³ ஜோதிஅஜோதினாமோ பவத்ததி.

மக்³க³ஸஹஜாதவீரியேனாதி லோகியலோகுத்தரமக்³க³ஸஹஜாதவீரியேன. மிஸ்ஸகமக்³கோ³ ஹி இத⁴ அதி⁴ப்பேதோ. நீஹரித்வாதி நீஹரணஹேது. ஹேதுஅத்தோ² ஹி அயம் த்வா-ஸத்³தோ³ ‘‘பஞ்ஞாய சஸ்ஸ தி³ஸ்வா’’திஆதீ³ஸு (ம. நி. 1.271) விய. தேன ‘‘மக்³கோ³ விஸுஜ்ஜ²தீ’’தி வசனம் ஸமத்தி²தம் ஹோதி. ‘‘அரியமக்³க³ம் விஸுஜ்ஜ²தீ’’தி கேசி பட²ந்தி.

நித்³தா³தந்தீ³ஸுத்தவண்ணனா நிட்டி²தா.