7. து³க்கரஸுத்தவண்ணனா

17. து³க்க²ம் திதிக்க²ந்தி து³த்திதிக்க²ம். தஞ்ச து³க்க²மம் து³ஸ்ஸஹனம் ஆரம்ப⁴வஸேன து³க்கரம், அனுயுஞ்ஜனவஸேன து³த்திதிக்க²ந்தி. அப்³யத்தேனாதி ஸாமஞ்ஞஸ்ஸ உபகாரானுபகாரே த⁴ம்மே ஜானனஸமத்தா²ய வேய்யத்தியஸங்கா²தாய பஞ்ஞாய அபா⁴வதோ ந ப்³யத்தேன. தேனாஹ ‘‘பா³லேனா’’தி. யஸ்மிம் த⁴ம்மே ஸதி ஸமணோதி வுச்சதி, தம் ஸாமஞ்ஞந்தி ஆஹ ‘‘ஸமணத⁴ம்மோ’’தி. இமினாதி ‘‘து³க்கரம் து³த்திதிக்க²ஞ்ச, அப்³யத்தேன ச ஸாமஞ்ஞ’’ந்தி இமினா கா³த²த்³தே⁴ன இத³ம் த³ஸ்ஸேதீதி இத³ம் இதா³னி வுச்சமானம் அத்த²ஜாதம் த³ஸ்ஸேதி. அபி⁴த³ந்தந்தி அபி⁴ப⁴வனத³ந்தம், உபரித³ந்தந்தி அத்தோ². ஸோ ஹி இதரம் முஸலம் விய உது³க்க²லம் விஸேஸதோ கஸ்ஸசி கா²த³னகாலே அபி⁴பு⁴ய்ய வத்ததி. ஆதா⁴யாதி நிப்பீளனவஸேனேவ ட²பேத்வா. தாலும் ஆஹச்சாதி தாலுபதே³ஸமாஹனித்வா விய. சேதஸாதி குஸலசித்தேன. சித்தந்தி அகுஸலசித்தம். அபி⁴னிக்³க³ண்ஹித்வாதி யதா² அதிஸமுதா³சாரோ ந ஹோதி, ஏவம் விபா³த⁴னவஸேன நிக்³க³ஹேத்வா. ஆபாணகோடிகந்தி பாணகோடிபரியோஸானம், பரிஜீவந்தி அத்தோ². ஸம்பா³தே⁴தீதி ஸம்பா³தோ⁴, அந்தராயிகோ. ப³ஹூ பரிஸ்ஸயாதி அயோனிஸோ காமவிதக்காதி³வஸேன.

பஜ்ஜதி சித்தமேத்தா²தி பத³ம், ஆரம்மணம். இரியாபத²ம் ஏவ பத³ம் இரியாபத²பத³ம்.

கீ³வா சத்தாரோ பாதா³தி கீ³வபஞ்சமானி. ஸமோத³ஹந்தி வா ஸமோதா⁴னஹேதூதி அயமேத்த² அத்தோ²தி ஆஹ – ‘‘ஸமோத³ஹித்வா வா’’தி, ஸம்மா ஓதா⁴ய அந்தோ பவேஸேத்வாதி அத்தோ². ஸகே ஆரம்மணகபாலேதி கோ³சரஜ்ஜ²த்தம் வத³தி. ஸமோத³ஹந்தி ஸமோத³ஹந்தோ. அனிஸ்ஸிதோதி தேபூ⁴மகத⁴ம்மேஸு கஞ்சிபி த⁴ம்மம் தண்ஹாதி³ட்டா²பி⁴னிவேஸவஸேன அனிஸ்ஸிதோ. அவிஹிம்ஸமானோ விஹிம்ஸானிமித்தானம் பஜஹனேன. உல்லும்பனஸபா⁴வஸண்டி²தேனாதி ஸீலப்³யஸனதோ உத்³த⁴ரணரூபே ஸண்டி²தேன, கருணாயுத்தேனாதி அத்தோ². தேனாஹ ‘‘காருஞ்ஞதம் படிச்சா’’தி.

து³க்கரஸுத்தவண்ணனா நிட்டி²தா.