6. ஜாக³ரஸுத்தவண்ணனா

6. ஜாக³ரதந்தி அனாத³ரே ஸாமிவசனம். தேனாஹ ‘‘இந்த்³ரியேஸு ஜாக³ரந்தேஸூ’’தி. ‘‘விஸ்ஸஜ்ஜனகா³தா²யம் பனா’’தி இமஸ்ஸ பத³ஸ்ஸ ‘‘அயமத்தோ² வேதி³தப்³போ³’’தி இமினா ஸம்ப³ந்தோ⁴. புச்சா²கா³தா²ய பன அத்தோ² இமினாவ நயேன விஞ்ஞாயதீதி அதி⁴ப்பாயோ. பஞ்ச ஜாக³ரதம் ஸுத்தாதி ஏத்த² ‘‘ஸுத்தா’’தி பத³ம் அபேக்கி²த்வா பஞ்சாதி பச்சத்தவசனம் ‘‘ஜாக³ரத’’ந்தி பத³ம் அபேக்கி²த்வா ஸாமிவஸேன பரிணாமேதப்³ப³ம் ‘‘பஞ்சன்னம் ஜாக³ரத’’ந்தி. தேனாஹ – ‘‘பஞ்சஸு இந்த்³ரியேஸு ஜாக³ரந்தேஸூ’’தி, ஜாக³ரந்தேஸு ப³த்³தா⁴பா⁴வேன ஸகிச்சப்பஸுததாய ஸகிச்சஸமத்த²தாய சாதி அத்தோ². ஸோத்தம்வ ஸுத்தா பமாத³னித்³தா³பா⁴வதோ. தமேவ ஸுத்தபா⁴வம் புக்³க³லாதி⁴ட்டா²னாய கதா²ய த³ஸ்ஸேதும் ‘‘கஸ்மா’’திஆதி³ வுத்தம். பமஜ்ஜதி, பமாதோ³ வா ஏதஸ்ஸ அத்தீ²தி பமாதோ³, தஸ்ஸ பா⁴வோ பமாத³தா, தாய, பமத்தபா⁴வேனாதி அத்தோ².

ஏவம் கா³தா²ய பட²மஸ்ஸ பாத³ஸ்ஸ அத்த²ம் வத்வா து³தியஸ்ஸ வத்தும் ‘‘ஏவம் ஸுத்தேஸூ’’திஆதி³ வுத்தம். தஸ்ஸத்தோ² வுத்தனயேன வேதி³தப்³போ³. யஸ்மா அப்பஹீனஸுபனகிரியாவஸேன ஸனீவரணஸ்ஸ புக்³க³லஸ்ஸ அனுப்பன்னராக³ரஜாத³யோ உப்பஜ்ஜந்தி, உப்பன்னா பவட்³ட⁴ந்தி, தஸ்மா வுத்தம் ‘‘நீவரணேஹேவ கிலேஸரஜம் ஆதி³யதீ’’தி. தேனேவாஹ ‘‘புரிமா’’திஆதி³. புரிமானம் பச்சி²மானம் அபராபருப்பத்தியா பச்சயபா⁴வோ ஹேத்த² ஆதி³யனம். பஞ்சஹி இந்த்³ரியேஹி பரிஸுஜ்ஜ²தீதி மக்³க³பரியாபன்னேஹி ஸத்³தா⁴தீ³ஹி பஞ்சஹி இந்த்³ரியேஹி ஸகலஸம்கிலேஸதோ விஸுஜ்ஜ²தி. பஞ்ஞிந்த்³ரியமேவ ஹி அனஞ்ஞாதஞ்ஞஸ்ஸாமீதிந்த்³ரியாதீ³னி, இதரானி ச அன்வயானீதி.

ஜாக³ரஸுத்தவண்ணனா நிட்டி²தா.