6. ஸேனாஸனக்க²ந்த⁴கம்

விஹாரானுஜானனகதா²

294. ஸேனாஸனக்க²ந்த⁴கே அபஞ்ஞத்தம் ஹோதீதி ஏத்த² ந ஞபதா⁴து ஹோதி, அபிச ஞாதா⁴துயேவ, ஸோ ச கோ² அனுஜானனத்தோ²தி ஆஹ ‘‘அனனுஞ்ஞாதம் ஹோதீ’’தி. இமினா ஞாதா⁴துஸ்ஸ அவபோ³த⁴னாத³யோ அத்தே² நிவத்தேதி, அனுஜானனத்த²ம்யேவ த³ஸ்ஸேதி. அட்³ட⁴யோகா³தீ³னம் விஸும் க³ஹிதத்தா விஹாரஸத்³தே³ன பாரிஸேஸதோ அவஸேஸாவாஸோவ க³ஹேதப்³போ³தி ஆஹ ‘‘அட்³ட⁴யோகா³தி³முத்தகோ அவஸேஸாவாஸோ’’தி. ஸுவண்ணவங்ககே³ஹந்தி ஸுவண்ணவங்கச²த³னேன சா²தி³தம் கே³ஹம். இட்ட²காகு³ஹாதி இட்ட²காய கதா கு³ஹா. ஏஸேவ நயோ ஸேஸேஸுபி. ஆக³தஸ்ஸ ச அனாக³தஸ்ஸ சாதி ஏத்த² சஸத்³தே³ன த்³வந்த³வாக்யம் த³ஸ்ஸேதி. ஆக³ச்ச²தீதி ஆக³தோ, ந ஆக³தோ அனாக³தோ, ஸங்கோ⁴. ஆக³தோ ச அனாக³தோ ச ஆக³தானாக³தோ, ஸமாஹாரத்³வந்தோ³ பும்லிங்கோ³, தஸ்ஸ. ‘‘அப்படிஹதசாரஸ்ஸா’’தி இமினா சதூஸு தி³ஸாஸு அப்படிஹதசாரோ சாதுத்³தி³ஸோதி வசனத்த²ம் த³ஸ்ஸேதி.

295. அனுமோத³னகா³தா²ஸு ஏவம் வினிச்ச²யோ வேதி³தப்³போ³தி யோஜனா. உதுவிஸபா⁴க³வஸேனாதி ஸீதஉண்ஹானம் உதூனம் விஸபா⁴க³வஸேன. ஸம்பு²ஸிதகவாதோதி ஸஹ உத³கபி³ந்து³னா ஆக³தோ வாதோ. ஏத்த² ஹி ஸம்ஸத்³தோ³ ஸஹத்தோ², பு²ஸிதஸத்³தோ³ உத³கபி³ந்து³வாசகோ. உஜுகமேக⁴வுட்டி²யோ ஏவாதி வாதேன அபஹரிதத்தா உஜுகம் பதிதா மேக⁴வுட்டி²யோ ஏவ. பாளியம் ததோதி ஏத்த² தோபச்சயோ பச்சத்தத்தே² வத்ததி. ஸோ விஹாரோதி ஹி அத்தோ². வாளமிகா³னி சாதி வாளமிகே³ ச. லிங்க³விபல்லாஸோ ஹேஸ. ஏதானி ஸப்³பா³னீதி ‘‘ஸீத’’ந்திஆதீ³னி ஸப்³பா³னி ஸத்த பதா³னி. யோஜேதப்³பா³னீதி ஸோ விஹாரோ ஸீதம் படிஹனதி…பே… வுட்டி²யோ படிஹனதீதி யோஜேதப்³பா³னீதி அத்தோ².

‘‘விஹாரேனா’’தி இமினா பாளியம் ததோதி ஏத்த² தோபச்சயோ கத்துத்தே² ஹோதீதி த³ஸ்ஸேதி, தேன விஹாரேனாதி அத்தோ². படிஹஞ்ஞதீதி படிஹனீயதி. ஸுக²த்த²ந்தி ஏத்த² உத்தரபத³லோபோதி ஆஹ ‘‘ஸுக²விஹாரத்த²’’ந்தி. ‘‘லேணத்த²ஞ்ச ஸுக²த்த²ஞ்சா’’தி பத³த்³வயம் ‘‘ஹோதீ’’தி பாட²ஸேஸேன யோஜேதப்³ப³ம். விஹாரதா³னம் லேணத்த²ஞ்ச ஸுக²த்த²ஞ்ச ஹோதீதி ஹி அத்தோ². இத³ந்தி அயம் அதி⁴ப்பாயோ. வுத்தந்தி வுத்தோ. விஹாரதா³னம் ஸுக²த்த²ஞ்ச ஹோதீதி யோஜனா. ஜா²யிதும் விபஸ்ஸிதுஞ்ச யம் ஸுக²ம் அத்தீ²தி ஸம்ப³ந்தோ⁴. தத³த்த²ந்தி தஸ்ஸ ஸுக²ஸ்ஸ அத்தா²ய. பரபதே³னபீதி ‘‘ஜா²யிதுஞ்ச விபஸ்ஸிது’’ந்தி பத³த்³வயதோ பரம் டி²தேன ‘‘விஹாரதா³ன’’ந்தி பதே³னபி. இதா⁴தி இமஸ்மிம் விஹாரே. விஹாரதா³னந்தி விஹாரஸ்ஸ தா³னம், தா³தப்³ப³விஹாரம் வா, வண்ணிதந்தி ஸம்ப³ந்தோ⁴. வுத்தந்தி ஸம்யுத்தனிகாயே வுத்தம். ஸாத⁴கபாளியம் யோ உபஸ்ஸயம் த³தா³தி, ஸோ ச ஸப்³ப³த³தோ³ ஸப்³பே³ஸம் ப³லாதீ³னம் த³தோ³ ஹோதீதி யோஜனா. ஸோ சாதி ஏத்த² சஸத்³தோ³ அவதா⁴ரணத்தோ². ஸோ ஏவாதி ஹி அத்தோ².

‘‘விஹாரே’’தி இமினா வாஸயேத்தா²தி ஏத்த² ஏதஸத்³த³ஸ்ஸ விஸயம் த³ஸ்ஸேதி. வாஸயேதி வாஸேய்ய. தேஸம் அன்னஞ்சாதி ஏத்த² ‘‘தேஸ’’ந்தி பத³ம் ‘‘அனுச்ச²விய’’ந்தி பாட²ஸேஸேன யோஜேதப்³ப³ந்தி த³ஸ்ஸேந்தோ ஆஹ ‘‘தேஸம் அனுச்ச²விய’’ந்தி. தத்த² அனுச்ச²வியம் அன்னஞ்ச அனுச்ச²வியானி வத்தா²னி சாதி யோஜனா. அத² வா தேஸந்தி பு⁴ம்மத்தே² ஸம்பதா³னவசனந்தி த³ஸ்ஸேந்தோ ஆஹ ‘‘தேஸூ’’தி, பி⁴க்கூ²ஸூதி அத்தோ². உஜுபூ⁴தேஸூதி ஏத்த² ஸம்பதா³னத்தே² பு⁴ம்மவசனம் கத்வா உஜுபூ⁴தானம் தேஸம் பி⁴க்கூ²னம் த³தே³ய்யாதி அத்தோ²பி யுஜ்ஜதேவ. ‘‘அகுடிலசித்தேஸூ’’தி இமினா ‘‘உஜுபூ⁴தேஸூ’’தி ஏத்த² உஜுஸத்³த³ஸ்ஸ அகுடிலத்த²ஞ்ச பூ⁴தஸத்³தே³ன பா³ஹிரத்த²ஸமாஸஞ்ச த³ஸ்ஸேதி. உஜுபூ⁴தம் சித்தமேதேஸந்தி உஜுபூ⁴தாதி வசனத்தோ² காதப்³போ³. நித³ஹேய்யாதி நிக²ணித்வா ட²பேய்ய. ‘‘ந சித்தபஸாத³ம் விராதே⁴த்வா’’தி இமினா விப்பஸன்னேன சேதஸாதி ஏத்த² ஏவத்த²ப²லம் வா அஞ்ஞத்தா²போஹனம் வா த³ஸ்ஸேதி. ஹீதி ப²லஜோதகோ. ஏவம் விப்பஸன்னசித்தஸ்ஸ தஸ்ஸ விஹாரதா³யகஸ்ஸ தே பி⁴க்கூ² த⁴ம்மம் தே³ஸேந்தீதி யோஜனா.

296. ஆவிஞ்ச²னசி²த்³த³ந்தி அங்கு³லிம் அவ பவேஸேத்வா அஞ்ச²தி ஆகட்³ட⁴தி ஏத்த², ஏதேனாதி வா ஆவிஞ்ச²னம். அவபுப்³போ³ அசி²தா⁴து, உபஸக்³க³அகாரஸ்ஸ தீ³க⁴ம் கத்வா, தா⁴துஅகாரஸ்ஸ ச இகாரம் கத்வா ‘‘ஆவிஞ்ச²ன’’ந்தி வுத்தம், தமேவ சி²த்³த³ம் ஆவிஞ்ச²னசி²த்³த³ம். ஆவிஞ்ச²னரஜ்ஜுந்தி கவாடச்சி²த்³தே³ அவ பவேஸேத்வா அஞ்ச²தி ஆகட்³ட⁴தி இமாயாதி ஆவிஞ்ச²னா, ஸாயேவ ரஜ்ஜூதி ஆவிஞ்ச²னரஜ்ஜு. காசி ரஜ்ஜு ந ந வட்டதீதி யோஜனா. அத² வா ந வட்டதி ந ஹோதி, வட்டதியேவாதி யோஜனா. தீணி தாலானீதி ஏத்த² தாலஸத்³தோ³ குஞ்சிகாபரியாயோதி ஆஹ ‘‘திஸ்ஸோ குஞ்சிகாயோ’’தி. இமினா தாலஸத்³த³ஸ்ஸ ருக்க²தூரியவிஸேஸே நிவத்தேதி. யம் யந்தி உபகரணம். தஸ்ஸாதி யந்தகஸ்ஸ. வேதி³காவாதபானந்தி வாதம் பிவதி அனேனாதி வாதபானம், வேதி³காய கதம் வாதபானம் வேதி³காவாதபானம். சக்கலிகந்தி ஏத்த² சக்காகாரேன அலதி பவத்ததீதி சக்கலம், சோளகபாத³புஞ்ஜனம். தேன ப³ந்தி⁴தப்³ப³ந்தி சக்கலிகந்தி த³ஸ்ஸேந்தோ ஆஹ ‘‘சோளகபாத³புஞ்ஜனம் ப³ந்தி⁴து’’ந்தி. ‘‘வாதபானப்பமாணேன பி⁴ஸிம் கத்வா’’தி இமினா வாதபானபமாணேன கதா பி⁴ஸி வாதபானபி⁴ஸீதி வசனத்த²ம் த³ஸ்ஸேதி.

297. ‘‘உச்சகம்பி ஆஸந்தி³க’’ந்தி வசனதோ வட்டதீதி வேதி³தப்³போ³தி ஸம்ப³ந்தோ⁴. ஏகதோபா⁴கே³ன தீ³க⁴பீட²ம் அட்ட²ங்கு³லபாத³கமேவ வட்டதீதி யோஜனா. ததோ அதி⁴கம் ந வட்டதீதி அதி⁴ப்பாயோ. பமாணாதிக்கந்தோபீதி பிஸத்³தோ³ பமாணயுத்தோ பன பகே³வாதி த³ஸ்ஸேதி. ஸத்தங்கோ³தி தீஸு தி³ஸாஸு அபஸ்ஸயோ, சத்தாரோ பாதா³தி ஸத்த அங்கா³னி ஏதஸ்ஸாதி ஸத்தங்கோ³. அயம்பீதி பிஸத்³தோ³ ஆஸந்தி³கம் அபேக்க²தி. ஏளகபாத³பீட²ம் நாம வுச்சதீதி ஸம்ப³ந்தோ⁴. ஏளகஸ்ஸ பாதோ³ விய பாதோ³ ஏத்தா²தி ஏளகபாத³ம், தமேவ பீட²ம் ஏளகபாத³பீட²ம். ஆமலகவண்ணிகபீட²ந்தி ஆமலகாய வண்ணோ ஸண்டா²னோ ஆமலகவண்ணோ, தேன யோஜிதம் ஆமலகவண்ணிகம், ததே³வ பீட²ம் ஆமலகவண்ணிகபீட²ம். ‘‘ஆகாரேனா’’தி இமினா வண்ணஸத்³த³ஸ்ஸ ஸண்டா²னத்த²ம் த³ஸ்ஸேதி. இமானீதி பீடா²னி. ஏத்தா²தி பீடே². முஞ்சபப்³ப³ஜமயந்தி முஞ்ஜேன ச பப்³ப³ஜேன ச கதம்.

மனுஸ்ஸானந்தி வட்³ட⁴கீமனுஸ்ஸானம். ச²விஸம்ரக்க²னத்தா²யாதி ச²வியா வினாஸனதோ ஸுட்டு² ரக்க²னத்தா²ய. ஸிம்ப³லிருக்கா²தீ³னந்திஆதி³ஸத்³தே³ன தூலனிப்³ப³த்தகே ஸப்³ப³ருக்கே² ஸங்க³ண்ஹாதி. கீ²ரவல்லிஆதீ³னந்திஆதி³ஸத்³தே³ன தூலனிப்³ப³த்தகா ஸப்³பா³ லதாயோ ஸங்க³ண்ஹாதி. போடகீதிணாதீ³னந்திஆதி³ஸத்³தே³ன தூலனிப்³ப³த்தகா ஸப்³பா³ திணஜாதியோ ஸங்க³ண்ஹாதி. தீஹீதி ருக்க²லதாபோடகீஹி. நனு பூ⁴தகா³மானம் அனேகத்தா ஏதேஹி தீஹி முத்தோ பூ⁴தகா³மோ அத்தி², கஸ்மா பன ஸப்³ப³பூ⁴தகா³மா ஸங்க³ஹிதா ஹோந்தீதி ஆஹ ‘‘ருக்க²வல்லிதிணஜாதியோ ஹீ’’திஆதி³. தத்த² ஹி யஸ்மா நத்தி², தஸ்மா ஸங்க³ஹிதா ஹோந்தீதி யோஜனா. தஸ்மாதி யஸ்மா நத்தி², தஸ்மா. ஸப்³ப³ம்பி ஏதம் தூலந்தி யோஜனா. பி³ப்³போ³ஹனே லோமம்பி வட்டதீதி ஸம்ப³ந்தோ⁴. லோமம்பீதி பிஸத்³தே³ன தூலம் அபேக்க²தி. யம்கிஞ்சி புப்ப²ந்தி ஸப்³ப³ம் புப்ப²ம். பத்தம் பாபுணித்வா ஸுத்³த⁴ம் தமாலபத்தமேவ ந வட்டதி, அவஸேஸம் ஸப்³ப³ம் பத்தம் ஸுத்³த⁴ம்பி வட்டதீதி அதி⁴ப்பாயோ. பஞ்சவித⁴ந்தி உண்ணசோளவாகதிணபண்ணவஸேன பஞ்சபகாரம்.

‘‘உபட்³ட⁴காயபமாணானீ’’தி இமினா அத்³த⁴காயிகானீதி ஏத்த² அத்³த⁴ஸ்ஸ காயஸ்ஸ பமாணேன கதானி அத்³த⁴காயிகானீதி அத்த²ம் த³ஸ்ஸேதி. யேஸு பி³ப்³போ³ஹனேஸு கடிதோ பட்டா²ய யாவ ஸீஸம் உபத³ஹந்தி, தானி பி³ப்³போ³ஹனானி அத்³த⁴காயிகானி நாமாதி யோஜனா. யஸ்ஸாதி பி³ப்³போ³ஹனஸ்ஸ. வித்தா²ரதோ முட்டி²ரதனம் ஹோதீதி ஸம்ப³ந்தோ⁴. இமினா யத்த² ஸஹ கீ³வாய ஸகலம் ஸீஸம் ட²பேதும் ஸக்கா, தஸ்ஸ முட்டி²ரதனம் வித்தா²ரபமாணந்தி த³ஸ்ஸேதி. ‘‘தீஸு கண்ணேஸு த்³வின்னம் கண்ணான’’ந்தி இத³ம் பி³ப்³போ³ஹனஸ்ஸ உபோ⁴ஸு அந்தேஸு ட²பேதப்³ப³சோளபமாணம் ஸந்தா⁴ய வுத்தம். இத³ம் பன பி³ப்³போ³ஹனஸ்ஸ உபோ⁴ஸு அந்தேஸு ட²பிதசோளஸ்ஸ கோடியா கோடிம் ஆஹச்ச த்³விகு³ணம் கதம் திகண்ணம் ஹோதி, தேஸு தீஸு கண்ணேஸு த்³வின்னம் கண்ணானமந்தரம் வித³த்தி² சதுரங்கு³லம் ஹோதி, மஜ்ஜ²ட்டா²னம் கோடிதோ கோடிமாஹச்ச முட்டி²ரதனம் ஹோதி, இத³ம் பன பி³ப்³போ³ஹனம் திகண்ணம் ஹோதி. வட்டம் வா சதுரஸ்ஸாதி³ம் வா கத்வா ஸிப்³பி³தம் யதா² கோடிதோ கோடி வித்தா²ரதோ புது²லட்டா²னம் முட்டி²ரதனம் ஹோதி, ஏவம் ஸிப்³பி³தப்³ப³ம். இதோ அதி⁴கம் ந வட்டதி, ஊனம் பன வட்டதியேவ. ஸீஸூபதா⁴னந்தி ஸீஸம் உபத³ஹந்தி ட²பேந்தி ஏத்தா²தி ஸீஸூபதா⁴னம். பி³ப்³போ³ஹனானீதி விஸேஸேன, விஸேஸம் வா ஸுக²ம் வஹந்தீதி பி³ப்³போ³ஹனானி. உபரீதி பி³ப்³போ³ஹனானம் உபரி. யானி பன கப்பியதூலானி ஸந்தீதி யோஜனா. மஹந்தம்பீதி பிஸத்³தோ³ கு²த்³த³கம் பன பகே³வாதி த³ஸ்ஸேதி. வினயத⁴ரஉபதிஸ்ஸத்தே²ரோ பன ஆஹாதி ஸம்ப³ந்தோ⁴. ‘‘வினயத⁴ர’’ இதி பதே³ன பு²ஸ்ஸதே³வத்தே²ரதோ விஸேஸம் த³ஸ்ஸேதி. அகப்பியதூலம் வாதி பி⁴ஸியம் அகப்பியதூலம் வா. பி³ப்³போ³ஹனே ஹி அகப்பியதூலம் நாம நத்தி².

பஞ்சபி⁴ஸியோதி ஏத்த² வாக்யபா⁴வஞ்ச அஸமாஹாரதி³கு³பா⁴வஞ்ச படிக்கி²பந்தோ ஆஹ ‘‘பஞ்சஹி உண்ணாதீ³ஹி பூரிதா பி⁴ஸியோ’’தி. இமினா பஞ்சஹி உண்ணாதீ³ஹி பூரிதா பி⁴ஸியோ பஞ்சபி⁴ஸியோதி வசனத்த²ம் த³ஸ்ஸேதி. அத்த²தோ பன வாக்யம்பி அஸமாஹாரதி³கு³பி யுஜ்ஜதேவ. கஸ்மா பஞ்சக³ணனா ஹோதீதி ஆஹ ‘‘தூலக³ணனாய ஹீ’’திஆதி³. ஹி யஸ்மா தூலக³ணனாய ஏதாஸம் க³ணனா வுத்தா, தஸ்மா பஞ்சபி⁴ஸியோ ஹோந்தீதி யோஜனா. தத்தா²தி உண்ணாதீ³ஸு பஞ்சஸு. உண்ணக்³க³ஹணேன க³ஹிதந்தி ஸம்ப³ந்தோ⁴. கம்ப³லமேவாதி உண்ணாமயம் கம்ப³லமேவ. உண்ணாய, உண்ணம் வா பக்கி²பித்வா கதா பி⁴ஸி உண்ணாபி⁴ஸி. ஏஸேவ நயோ சோளபி⁴ஸிஆதீ³ஸு.

பமாணனியமோதி ஏத்தகா பமாணாதி பமாணஸ்ஸ நியமோ. மஞ்சே அத்த²ரிதப்³பா³ பி⁴ஸி மஞ்சபி⁴ஸி. ஏதாஸந்தி மஞ்சபி⁴ஸிஆதீ³னம். யம் ஏதம் தூலந்தி யோஜனா. ஸூரகேபீதி சம்மமயபி⁴ஸியம்பி. ஏதேனாதி குருந்தி³யம் வுத்தவசனேன ஸித்³த⁴ம் ஹோதீதி ஸம்ப³ந்தோ⁴.

மஞ்சபி⁴ஸிந்தி மஞ்சே அத்த²ரிதப்³ப³ம் பி⁴ஸிம். ‘‘அத்த²ரணத்தா²ய ஸம்ஹரந்தீதி யுஜ்ஜதீ’’தி இமினா ‘‘அத்த²ரந்தீ’’தி ஏத்த² காரியூபசாரேன அத்தோ² க³ஹேதப்³போ³தி த³ஸ்ஸேதி. அத்த²ரணாய ஹி ஸம்ஹரணம் காரணம் நாம, அத்த²ரணம் காரியம் நாம. உபரீதி பி⁴ஸிச²வியா உபரி. பு²ஸிதானீதி பி³ந்தூ³னி. பி⁴த்திகம்மந்தி பி⁴த்தியம் நானாவண்ணேஹி ராஜிகரணம் விய கத்தப்³ப³ம் கம்மம்.

298. ‘‘இக்காஸ’’ந்தி நாமம் நிய்யாஸஸிலேஸானம் நாமந்தி ஆஹ ‘‘ருக்க²னிய்யாஸம் வா ஸிலேஸம் வா’’தி. ‘‘குண்ட³கமிஸ்ஸகமத்திக’’ந்தி இமினா குண்ட³கேன மிஸ்ஸகா மத்திகா குண்ட³கமத்திகாதி வசனத்த²ம் த³ஸ்ஸேதி. ஸாஸபபிட்ட²ந்தி ஸாஸபசுண்ணம். ‘‘பி³ந்து³ பி³ந்து³ ஹுத்வா’’தி இமினா அச்சுஸ்ஸன்னம் ஹோதீதி ஏத்த² காரணூபசாரம் த³ஸ்ஸேதி. அச்சுஸ்ஸன்னஞ்ஹி காரணம் ஹோதி, ‘‘பி³ந்து³ பி³ந்து³ ஹுத்வா’’தி டா²னம் காரியம் ஹோதி. ‘‘புஞ்ஜிது’’ந்தி ஸோதே⁴தும். க³ண்டு³ப்பாத³கூ³த²மத்திகந்தி மஹிலதாய கூ³த²மயம் மத்திகம். இமினா லண்ட³மத்திகந்தி ஏத்த² லண்ட³ஸத்³தோ³ கூ³த²பரியாயோதி த³ஸ்ஸேதி.

299. ந பி⁴க்க²வே படிபா⁴னசித்தந்தி ஏத்த² ‘‘இத்தி²ரூபகம் புரிஸரூபக’’ந்தி பாளியம் வுத்தத்தா கிம் இத்தி²புரிஸரூபமேவ ந வட்டதீதி ஆஹ ‘‘ந கேவல’’ந்திஆதி³. திரச்சா²னரூபம்பி காதும் வா ‘‘கரோஹீ’’தி வத்தும் வா ந வட்டதீதி ஸம்ப³ந்தோ⁴. த்³வாரபாலந்தி த்³வாரபாலரூபம். பஸாத³னீயானீதி பஸாதே³தப்³பா³னி, பஸாதே³தும் அரஹானீதி அத்தோ².

300. ஏகங்க³ணாதி அவிஹாரட்டா²னேன ஸமானபூ⁴மிபா⁴கா³. முண்ட³ச்சே²த³னக³ப்³போ⁴தி முண்டே³ன சா²தே³தப்³போ³ க³ப்³போ⁴.

தத்தா²தி விஜ்ஜி²தப்³ப³ருக்கே². ‘‘கத’’ந்தி இமினா குலங்கபாத³கந்தி ஏத்த² ணிகபச்சயஸ்ஸ அத்த²ம் த³ஸ்ஸேதி. தம் ஆஹரிமம் பி⁴த்திபாத³ம் பதிட்டா²பேதுந்தி ஸம்ப³ந்தோ⁴. வஸ்ஸபரித்தாணத்த²ந்தி வஸ்ஸோத³கபரித்தாணத்த²ம். ‘‘மத்³தி³தமத்திக’’ந்தி இமினா உத்³த³ஸுத⁴ந்தி ஏத்த² ஸுதா⁴ஸத்³த³ஸ்ஸ லேபனஸுத⁴ம் த³ஸ்ஸேதி, போ⁴ஜனஸுத⁴ம் நிவத்தேதி.

பமுக²ந்தி விஹாரஸ்ஸ பமுக²ம். யந்தி பதே³ஸம், ஹனந்தீதி ஸம்ப³ந்தோ⁴. தஸ்ஸ கதபதே³ஸஸ்ஸாதி யோஜனா. ‘‘பகா⁴ன’’ந்திபி வுச்சதீதி தீ³க⁴வஸேன ‘‘பகா⁴ன’’ந்திபி வுச்சதி. இமினா புரிமபாடே² ரஸ்ஸபா⁴வம் தீ³பேதி. ‘‘பகுட்ட’’ந்திபி பாடோ²தி ஸஸம்யோக³வஸேன ‘‘பகுட்ட’’ந்திபி பாடோ². இமினா புரிமபாடே² நிஸம்யோக³பா⁴வம் த³ஸ்ஸேதி. வம்ஸந்தி வேளும். ததோதி வம்ஸதோ. ‘‘ஓஸாரேத்வா கத’’ந்தி இமினா ஓஸாரேத்வா கதம் ஓஸாரகந்தி வசனத்த²ம் த³ஸ்ஸேதி. ‘‘ச²த³னபமுக²’’ந்தி இமினா ணிகபச்சயஸ்ஸ ஸரூபம் த³ஸ்ஸேதி. சக்கலயுத்தோதி சக்கலேன யுத்தோ.

301. பானீயதா³னபா⁴ஜனந்தி பானீயம் தே³தி அனேனாதி பானீயதா³னம், தமேவ பா⁴ஜனம் பானீயதா³னபா⁴ஜனம். ‘‘உளுங்கோ ச தா²லகஞ்சா’’தி இமினா த்³வே பானீயஸங்க²ஸ்ஸ அனுலோமானீதி யோஜனா.

303. த்³வாரத²கனகந்தி த்³வாரம் த²கேதி அனேனாதி த்³வாரத²கனகம். கா³மத்³வாரேஸு த்³வாரத²கனகம் விய சக்கலயுத்தம் த்³வாரத²கனகந்தி யோஜனா.

305. அஸ்ஸதரிரதா²தி அஸ்ஸானம் விஸேஸேன, அதிஸயேன வாதி அஸ்ஸதரோ, அத² வா பகதிஅஸ்ஸே தரதி அதிக்கமதீதி அஸ்ஸதரோ, ஸோ ஏதேஸு ரதே²ஸு யுஜ்ஜிதப்³போ³தி அஸ்ஸதரீ, தேயேவ ரதா²தி அஸ்ஸதரிரதா²தி த³ஸ்ஸேந்தோ ஆஹ ‘‘அஸ்ஸதரயுத்தா ரதா² அஸ்ஸதரிரதா²’’தி. தத்த² ‘‘அஸ்ஸதரயுத்தா’’தி இமினா ‘‘அஸ்ஸதரீ’’தி பத³ஸ்ஸ அஸ்ஸத்தி²தத்³தி⁴தம் த³ஸ்ஸேதி. ஆமுத்தமணிகுண்ட³லாதி பத³ஸ்ஸ ‘‘ஸதம் கஞ்ஞா ஸஹஸ்ஸானீ’’தி பதே³ன ஸம்ப³ந்தி⁴தப்³ப³த்தா வுத்தம் ‘‘ஆமுத்தமணிகுண்ட³லானீ’’தி. இமினா நிகாரஸ்ஸ ஆகாரோ ஹோதீதி த³ஸ்ஸேதி. கண்ணேஸு ஆமுத்தம் மணிகுண்ட³லம் ஏதாஸந்தி ஆமுத்தமணிகுண்ட³லா கஞ்ஞாயோ.

க²ந்த⁴பரினிப்³பா³னேன பரினிப்³பு³தோதி அத்த²ம் படிக்கி²பந்தோ ஆஹ ‘‘கிலேஸபரினிப்³பா³னேன பரினிப்³பு³தோ’’தி. ஸீதிபூ⁴தோதி ஏத்த² கிலேஸாதபானம் அபா⁴வேனேவ ஸீதிபூ⁴தோ, ந அஞ்ஞேஸந்தி ஆஹ ‘‘கிலேஸாதபாபா⁴வேனா’’தி. ‘‘கிலேஸூபதி⁴அபா⁴வேனா’’தி இமினா நிருபதீ⁴தி ஏத்த² க²ந்தூ⁴பதி⁴அபி⁴ஸங்கா²ரூபதி⁴அபா⁴வேனாதி அத்த²ம் படிக்கி²பதி.

ஆஸத்தியோதி ஏத்த² புனப்புனம் விஸயேஸு, ப⁴வேஸு வா ஸஞ்ஜந்தீதி ஆஸத்தியோதி த³ஸ்ஸேந்தோ ஆஹ ‘‘ரூபாதீ³ஸூ’’திஆதி³. பத்த²னாயோதி தண்ஹாயோ. இமினா ஆஸத்தீனம் ஸரூபம் த³ஸ்ஸேதி. ‘‘சி²ந்தி³த்வா’’தி இமினா சே²த்வாதி ஏத்த² சே²தா⁴துயா சே²த³னத்த²ம் த³ஸ்ஸேதி. வினேய்யஹத³யே த³ரந்தி ஏத்த² ‘‘வினேய்யா’’தி பத³ஸ்ஸ த்வாபச்சயந்தபா⁴வஞ்ச ஹத³யஸத்³த³ஸ்ஸ சித்தவாசகபா⁴வஞ்ச த³ரத²ஸரூபஞ்ச த³ஸ்ஸேந்தோ ஆஹ ‘‘சித்தே கிலேஸத³ரத²ம் வினேத்வா’’தி. தத்த² ‘‘சித்தே’’தி இமினா ஹத³யஸத்³த³ஸ்ஸத்த²ம் த³ஸ்ஸேதி, ‘‘கிலேஸ’’ இதி பதே³ன த³ரத²ஸரூபம், ‘‘வினேத்வா’’தி இமினா த்வாபச்சயந்தபா⁴வம் த³ஸ்ஸேதி. வயகரணந்தி பரிப்³ப³யமூலம். தஞ்ஹி வயம் கரியதி அனேனாதி வயகரணந்தி வுச்சதி. இமினா வயஸ்ஸ கரணம் வயாயிகம், கரணத்தே² ஆயிகபச்சயோ, வயாயிகமேவ வேய்யாயிகந்தி அத்த²ம் த³ஸ்ஸேதி.

307. ஆதே³ய்யவாசோதி ஏத்த² ஆதி³யிதப்³பா³தி ஆதே³ய்யா, ஸா வாசா ஏதஸ்ஸாதி ஆதே³ய்யவாசோதி த³ஸ்ஸேந்தோ ஆஹ ‘‘தஸ்ஸ வசன’’ந்திஆதி³. தத்த² தஸ்ஸாதி அனாத²பிண்டி³கஸ்ஸ. ஸத⁴னாதி ஸம்விஜ்ஜமான த⁴னா, அத்தனோ வா த⁴னவந்தோ. மந்த³த⁴னாதி அப்பத⁴னா. அதா³ஸீதி அனாத²பிண்டி³கோ அதா³ஸி. இதீதி ஏவம், த³த்வா கத்வாதி ஸம்ப³ந்தோ⁴. ஸோதி அனாத²பிண்டி³கோ, அக³மாஸீதி ஸம்ப³ந்தோ⁴.

கஹாபணே ஸந்த²ரீதி ஸம்ப³ந்தோ⁴. கோடியா கரணபூ⁴தாய, ஆதா⁴ரபூ⁴தாய வா. படிபாதேத்வாதி படிஹனாபேத்வா. தத்த² தஸ்மிம் டா²னே யே ருக்கா² வா யா போக்க²ரணியோ வா திட்ட²ந்தீதி யோஜனா. தேஸந்தி தாஸம் ருக்க²போக்க²ரணீனம். ஸாமஞ்ஞஞ்ஹி அபேக்கி²த்வா புல்லிங்க³வஸேன வுத்தம். பரிக்கே²பபமாணந்தி பரிணாஹஸ்ஸ பமாணம். அஸ்ஸாதி அனாத²பிண்டி³கஸ்ஸ.

ஏவம் ப³ஹுத⁴னம் சஜந்தஸ்ஸாபி க³ஹபதினோதி யோஜனா. கோட்ட²கம் மாபேஸீதி ஏத்த² அஞ்ஞே கோட்ட²கே படிக்கி²பந்தோ ஆஹ ‘‘த்³வாரகோட்ட²கபாஸாத³’’ந்தி.

விஹாராத³யோதி ஏத்த² ஆதி³ஸத்³தே³ன பாளியம் ஆக³தே பரிவேணாத³யோ சுத்³த³ஸ உபகரணே ஸங்க³ண்ஹாதி. அம்ஹாகம் ப⁴க³வதோ விஹாரகாராபனபஸங்கே³ன ஸத்தன்னம்பி பு³த்³தா⁴னம் விஹாரகாராபனம் த³ஸ்ஸேந்தோ ஆஹ ‘‘விபஸ்ஸிஸ்ஸா’’திஆதி³. தத்த² விபஸ்ஸிஸ்ஸ ப⁴க³வதோ விஹாரம் (தீ³. நி. அட்ட². 2.12) காராபேஸீதி ஸம்ப³ந்தோ⁴. திகா³வுதப்பமாணம் பூ⁴மிம் ஸுவண்ணயட்டி²ஸந்த²ரேன கிணித்வா விஹாரம் காராபேஸீதி யோஜனா. ஏஸேவ நயோ பரதோபி. அட்ட²கரீஸப்பமாணா பூ⁴மி உஸபே⁴ன த³ஸஉஸப⁴ப்பமாணா யட்டி²யா த்³விஸதயட்டி²ப்பமாணா ஹோதீதி த³ட்ட²ப்³ப³ம். ‘‘ஏவம் அனுபுப்³பே³ன பரிஹாயந்தீ’’தி வத்வா ஸப்³ப³ஜனம் ஸம்வேஜேந்தோ ஆஹ ‘‘ஸம்பத்தியோ ஹீ’’திஆதி³. தத்த² யஸ்மா ஸம்பத்தியோ பரிஹாயந்தி, தஸ்மா அலமேவ ஸப்³ப³ஸம்பத்தீஸு விரஜ்ஜிதும், அலம் ஏவ ஸப்³ப³ஸம்பத்தீஹி விமுச்சிதுந்தி யோஜனா. ‘‘ஸப்³ப³ஸம்பத்தீஸூ’’தி பத³ஞ்ஹி ‘‘விமுச்சிது’’ந்தி பதே³ன விப⁴த்திபரிணாமம் கத்வா ஸம்ப³ந்தி⁴தப்³ப³ம்.

308. க²ண்ட³பு²ல்லஸத்³தா³னம் அதி⁴கரணபா⁴வம் த³ஸ்ஸேந்தோ ஆஹ ‘‘க²ண்ட³ந்தி சி²ன்னோகாஸோ. பு²ல்லந்தி ப²லிதோகாஸோ’’தி. தத்த² ‘‘சி²ன்னோகாஸோ’’தி இமினா க²ண்ட³தி சி²ஜ்ஜதி ஏத்தா²தி க²ண்ட³ந்தி வசனத்த²ம் த³ஸ்ஸேதி. ‘‘ப²லிதோகாஸோ’’தி இமினா பு²ல்லதி ப²லதி ஏத்தா²தி பு²ல்லந்தி வசனத்த²ம் த³ஸ்ஸேதி. படிஸங்க²ரிஸ்ஸதீதி ஏத்த² பாடிஸத்³த³ஸ்ஸ பாகதிகத்த²பா⁴வம், ஸங்க²ரிஸ்ஸதிஸத்³த³ஸ்ஸ ச கரதா⁴துயா நிப்ப²ன்னபா⁴வம் த³ஸ்ஸேதும் வுத்தம் ‘‘பாகதிகம் கரியதீ’’தி.

310. தே²ரோதி ஸாரிபுத்தத்தே²ரோ, ஆக³ச்ச²தீதி ஸம்ப³ந்தோ⁴. இத³ந்தி கி³லானபடிஜக்³க³னாதி³. அஸ்ஸாதி தே²ரஸ்ஸ. அக்³கா³ஸனந்திஆதீ³ஸு அக்³க³ஸத்³தோ³ பட²மத்தோ²பி உத்தமத்தோ²பி யுஜ்ஜதி. தேன வுத்தம் ‘‘தே²ராஸன’’ந்திஆதி³. அந்தரா ஸத்தீ²னந்தி ஏத்த² அந்தராதி பு⁴ம்மத்தே² நிஸ்ஸக்கவசனம். ஸத்தி²ஸத்³தோ³ ச ஊருஸங்கா²தோ பாத³வாசகோதி ஆஹ ‘‘சதுன்னம் பாதா³னம் அந்தரே’’தி.

315. பதிட்டா²பேஸீதி ஏத்த² கம் வயம் கத்வா பதிட்டா²பேஸீதி ஆஹ ‘‘அட்டா²ரஸகோடிபரிச்சாக³ம் கத்வா’’தி. ஏவந்திஆதி³ நிக³மனம்.

ஆஸனப்படிபா³ஹனாதி³கதா²

316. விப்பகதபோ⁴ஜனேனாதி ஏத்த² விப்பகதஸத்³தோ³ அனிட்டி²தபரியாயோதி ஆஹ ‘‘அனிட்டி²தே போ⁴ஜனே’’தி. பகிரியித்த², பகிரியிஸ்ஸதே வா பகதம், ந பகதம் விப்பகதந்தி விக்³க³ஹோ காதப்³போ³, அத்த²தோ பன ‘‘கரியமானோ அனிட்டி²தோ’’தி வுத்தம் ஹோதி. ஏத்தா²தி டா²னே. அதிஸமீபந்தி பு⁴ஞ்ஜமானஸ்ஸ பி⁴க்கு²ஸ்ஸ அதிஆஸன்னம். தஸ்ஸாதி பு⁴ஞ்ஜமானஸ்ஸ பி⁴க்கு²ஸ்ஸ. பிவித்வா வாதி யாகு³ம் பிவித்வா வா. கா²தி³த்வா வாதி க²ஜ்ஜகம் கா²தி³த்வா வா. ரித்தஹத்த²ம்பீதி துச்ச²ஹத்த²ம்பி. பிஸத்³தே³ன ஆமிஸஹத்த²ம் பன பகே³வாதி த³ஸ்ஸேதி. ஹீதி ஸச்சம், யஸ்மா வா. ஸோதி ரித்தஹத்தோ² பி⁴க்கு².

ஆபத்திந்தி து³க்கடாபத்திம். யந்தி விப்பகதபோ⁴ஜனம் பி⁴க்கு²ம். ஸோதி பச்சா² ஆக³தோ பி⁴க்கு². அயஞ்ச பி⁴க்கூ²தி விப்பகதபோ⁴ஜனோ அயஞ்ச பி⁴க்கு². தேனாதி விப்பகதபோ⁴ஜனேன நவகேன வா வுட்³ட⁴தரேன வா பி⁴க்கு²னா. கிம் நவகேன வுட்³ட⁴தரம் ஆணாபேதும் வட்டதீதி ஆஹ ‘‘வுட்³ட⁴தரம் ஹீ’’திஆதி³. ஹீதி ஸச்சம், யஸ்மா வா. ஸோதி வுட்³ட⁴தரோ பி⁴க்கு². ததோதி உத³கம் ஆஹராபேதும் ஆணத்திதோ. யந்தி கம்மம்.

யோதி பி⁴க்கு². ‘‘ஏவரூபஸ்ஸா’’தி பதே³ன தஸ்ஸ நியமனம் வேதி³தப்³ப³ம். காஸஸ்ஸ கே²ளமல்லகம் ட²பேதப்³ப³ம். ப⁴க³ந்த³ரஅதிஸாரானம் வச்சகபாலம் ட²பேதப்³ப³ம். அஞ்ஞேஸம் அஞ்ஞானி ட²பேதப்³பா³னி ஹோந்தி. தேன வுத்தம் ‘‘கே²ள…பே… ஹோந்தீ’’தி. யஸ்மிம்தி யஸ்மிம் கி³லானே. யோபி பே⁴ஸஜ்ஜம் கரோதீதி ஸம்ப³ந்தோ⁴. லேஸகப்பேனாதி ஏத்த² லேஸகப்பஸத்³தா³னம் அத்த²தோ ஏகத்தா வுத்தம் ‘‘அப்பகேன ஸீஸாபா³தா⁴தி³மத்தேனா’’தி. பி⁴க்கூ² க³ணேத்வாதி ஏத்த² க³ணம் ஞத்வாதி த³ஸ்ஸேந்தோ ஆஹ ‘‘பரிச்சே²த³ம் ஞத்வா’’தி. தத்த² ‘‘பரிச்சே²த³’’ந்தி இமினா க³ணஸத்³த³ஸ்ஸ அதி⁴ப்பாயத்த²ம் த³ஸ்ஸேதி. ‘‘ஞத்வா’’தி இமினா இதா⁴துயா அத்த²ம் த³ஸ்ஸேதி.

ஸேனாஸனக்³கா³ஹகதா²

318. ஸேய்யாதி காயபஸாரணஸங்கா²தம் ஸயனகிரியம் படிக்கி²பித்வா ஸேனாஸனஸங்கா²தம் ஸேய்யம் த³ஸ்ஸேந்தோ ஆஹ ‘‘மஞ்சட்டா²னானீ’’தி. ‘‘ஸேய்யாபரிச்சே²தே³னா’’தி இமினா ஸேய்யக்³கே⁴னாதி ஏத்த² அக்³க⁴ஸத்³த³ஸ்ஸ பூஜனத்த²ம் படிக்கி²பித்வா பரிச்சே²த³னத்த²ம் தீ³பேதி. ஏத்த² ச அக்³க⁴ஸத்³த³ஸ்ஸ சதுத்த²க்க²ரேன யுத்தபா⁴வோ ஹேட்டா² ஸமுச்சயக்க²ந்த⁴கவண்ணனா (சூளவ. அட்ட². 102) யோஜனாய வுத்தோயேவ. காலந்தி ஸேய்யாபடிக்³க³ஹணஸ்ஸ காலம். கா³ஹியமானாதி கா³ஹாபியமானா. ‘‘அதிரேகானி அஹேஸு’’ந்தி இமினா உஸ்ஸாரயிம்ஸூதி ஏத்த² உத்³த⁴ம் ஸாரயிம்ஸு க³ச்சி²ம்ஸு பவத்திம்ஸூதி அத்த²ம் த³ஸ்ஸேதி. அதிரேகானீதி ச பி⁴க்கு²பரிச்சே²த³தோ ஸேய்யாபரிச்சே²தா³னி அதிரேகானி. அனுபா⁴க³ந்தி ஏத்த² அனு பச்சா² தா³தப்³போ³ பா⁴கோ³ அனுபா⁴கோ³தி த³ஸ்ஸேந்தோ ஆஹ ‘‘புன அபரம்பி பா⁴க³ம் தா³து’’ந்தி. அதிமந்தே³ஸூதிஆதி³வசனேன கிஞ்சிமந்தே³ஸு பி⁴க்கூ²ஸு ஏகேகஸ்ஸ பி⁴க்கு²னோ த்³வே திஸ்ஸோ ஸேய்யா தா³தப்³பா³. யதோ கிஞ்சிமந்தே³ஸு பி⁴க்கூ²ஸு த்³வே தயோ விஹாரா தா³தப்³பா³தி அத்தோ²பி க³ஹேதப்³போ³. தத்தா²தி ‘‘ந அகாமா தா³தப்³போ³’’தி வசனே. அனுபா⁴கே³ க³ஹிதேதி யோஜனா. யேன அனுபா⁴கோ³ ச பட²மபா⁴கோ³ ச க³ஹிதோ, ஸோ பி⁴க்கூ²தி யோஜனா.

‘‘உபசாரஸீமதோ ப³ஹீ’’தி இமினா நிஸ்ஸீமேதி ஏத்த² ஸீமதோ ப³ஹி நிக்க²ந்தம், நிஸின்னம் வா நிஸ்ஸீமந்தி அத்த²ம் த³ஸ்ஸேதி. உபசாரஸீமாய ஆவாஸவட்³ட⁴னவஸேன அதிவித்தா²ரத்தா வுத்தம் ‘‘தூ³ரே டி²தஸ்ஸாபீ’’தி. உதுகாலேபீதி ஹேமந்தகி³ம்ஹகாலேபி. தஸ்மிஞ்ஹி காலே ஸீதஉண்ஹஉது திகி²ணோ ஹோதி, தஸ்மா தஸ்ஸேவ விஸேஸேன உதுகாலோதி நாமம் பாகடம் ஹோதி. தேன வுத்தம் ‘‘ஹேமந்தகி³ம்ஹகாலேபீ’’தி. பிஸத்³தே³ன வஸ்ஸகாலம் அபேக்க²தி. புரிமவஸ்ஸூபனாயிகதி³வஸே கா³ஹோ புரிமகோ, பச்சி²மவஸ்ஸூபனாயிகதி³வஸே கா³ஹோ பச்சி²மகோ.

அந்தரா த்³வீஹி வஸ்ஸூபனாயிகதி³வஸேஹி முத்தே காலே கா³ஹோ அந்தராமுத்தகோ. ஏகஸ்மிம் விஹாரேதி ஏகிஸ்ஸம் விஹாரஸீமாயம். ஸேனாஸனஸாமிகாதி ஸேனாஸனதா³யகா, தே³ந்தீதி ஸம்ப³ந்தோ⁴. தந்தி ஸேனாஸனம். ஆவாஸிகா ந ஓலோகேந்தீதி ஸம்ப³ந்தோ⁴. ஏத்தா²தி ஸேனாஸனே. பலுஜ்ஜந்தம்பீதி வினஸ்ஸந்தம்பி. ப⁴க³வா ஆஹாதி ஸம்ப³ந்தோ⁴. தஸ்ஸாதி ஸேனாஸனஸ்ஸ. அபரஜ்ஜூதி அபரஸ்மிம் அஹனி அபரஜ்ஜு. க³தாயாதி அதிக்கமிதாய. பவாரணாய க³தாய பவாரணதி³வஸே அதிக்கமிதே ஸதி அபரஜ்ஜு அந்தராமுத்தகோ கா³ஹேதப்³போ³தி யோஜனா.

தந்தி அந்தராமுத்தகம். கா³ஹேந்தேனாதி கா³ஹாபேந்தேன. தேனாதி க³ண்ஹந்தேன. அட்ட²மாஸேதி சத்தாரோ ஹேமந்தமாஸே, சத்தாரோ ச கி³ம்ஹமாஸேதி அட்ட²மாஸே. கதா³சி பஞ்ச கி³ம்ஹமாஸேதி நவமாஸே வா. க²ண்ட³ம் வாதி சி²ன்னட்டா²னம் வா. பு²ல்லம் வாதி ப²லிதட்டா²னம் வா. படிஸங்க²ரிதப்³ப³ந்தி பாகதிகம் காதப்³ப³ம். தி³வஸம் கே²பேத்வாதி பரிவேணே தி³வஸம் கே²பேத்வா. தத்தா²தி க³ஹிதஸேனாஸனே. ரத்திந்தி³வந்தி ரத்தி ச தி³வோ ச ரத்திந்தி³வம், ஸமாஹாரத்³வந்தோ³, அச்சந்தஸம்யோகே³ சேதம் உபயோக³வசனம். ந லப்³ப⁴தீதி ஸங்க⁴த்தே²ரேன ந லப்³ப⁴தி. இத³ந்தி ஸேனாஸனம்.

அந்தராமுத்தககா³ஹேன அக³ஹேதப்³ப³ஸேனாஸனம் த³ஸ்ஸேந்தோ ஆஹ ‘‘யஸ்மிம் பனா’’திஆதி³. தேமாஸச்சயேன தேமாஸச்சயேனாதி திண்ணம் மாஸானம் அதிக்கமேன திண்ணம் மாஸானம் அதிக்கமேன. ஹீதி ஸச்சம், யஸ்மா வா. யஸ்மிம் பனாதி ஸேனாஸனே பன. ஸகிதே³வாதி ஏகவாரமேவ. அயந்தி ஏஸா கதா².

தத்தா²தி து³விதே⁴ஸு ஸேனாஸனக்³கா³ஹேஸு. உதுகாலந்தி உதுகாலே ஆக³ச்ச²ந்தீதி ஸம்ப³ந்தோ⁴. தேஸம் ததா³வ தா³தப்³ப³ந்தி ஸம்ப³ந்தோ⁴. அகாலோ நாமாதி உட்டா²பனஸ்ஸ அகாலோ நாம நத்தி². ஏகம் வா மஞ்சட்டா²னம் வா ட²பேதப்³ப³ந்தி யோஜனா. ஏகோ வா தே²ரோ ஆக³ச்ச²தீதி யோஜனா. உப்³ப⁴ண்டி³காதி உக்கி²த்தப⁴ண்டி³கா.

ப³ஹூஸூதி தயோ ஆதி³ம் கத்வா ப³ஹூஸு பி⁴க்கூ²ஸு. பஹோதீதி ஏகேகஸ்ஸ பி⁴க்கு²ஸ்ஸ பஹோதி. தத்தா²தி பரிவேணே. தஸ்ஸேவாதி பரிவேணஸாமிகஸ்ஸேவ. ஏவம் அபஹோந்தேஸூதி ஏவம் பரிவேணக்³கே⁴ன அபஹோந்தேஸு. பாஸாத³க்³கே⁴னாதி விஹாரஸங்கா²தஸ்ஸ பாஸாத³ஸ்ஸ பரிச்சே²தே³ன. ஓவரகக்³கே⁴னாதி க³ப்³ப⁴ஸ்ஸ பரிச்சே²தே³ன. ஸேய்யக்³கே⁴னாதி சதுபஞ்சஹத்த²ப்பமாணாய ஸேய்யாய பரிச்சே²தே³ன. மஞ்சட்டா²னேனாதி த்³விஹத்த²வித்தா²ரஸ்ஸ சதுஹத்த²ஆயாமஸ்ஸ மஞ்சஸ்ஸ டா²னேன. ஏகமஞ்சட்டா²னஸ்ஸ த்³வின்னம் பீட²கானம் டா²னத்தா வுத்தம் ‘‘ஏகபீட²கட்டா²னவஸேனா’’தி. இத³ம் நிஸீதி³தும் ஸக்குணேய்யவஸேன வுத்தம். ஸசே ந ஸக்கா நிஸீதி³தும், ந தா³தப்³ப³ம். தேன வுத்தம் ‘‘பி⁴க்கு²னோ பன டி²தோகாஸமத்தம் ந கா³ஹேதப்³ப³’’ந்தி. ஏதந்தி டி²தோகாஸமத்தம். ஹீதி ஸச்சம், யஸ்மா வா. ஏகமஞ்சட்டா²னஸ்ஸ திண்ணம் ஜனானம் ஏகபீட²கட்டா²னபா⁴வேன அபஹோந்தத்தா வுத்தம் ‘‘ஏகம் மஞ்சட்டா²னம் வா திண்ணம் ஜனானம் தா³தப்³ப³’’ந்தி. ஹீதி ஸச்சம். ‘‘ஸீதஸமயே’’தி இமினா உண்ஹஸமயேபி ஸப்³ப³தி³வஸம் அஜ்ஜோ²காஸே வஸிதும் ந ஸக்காதி தீ³பேதி. பரிளாஹஸமயே பன ஸக்கா ஸப்³ப³ரத்திம் அஜ்ஜோ²காஸே வஸிதும். கிஞ்சாபி ஸக்கா, ஸீதுண்ஹகாலே பன ந தா³தப்³ப³த்தா பரிளாஹஸமயேபி ந தா³தப்³ப³ந்தி வேதி³தப்³ப³ம். ஏகமஞ்சட்டா²னே வா ஏகபீட²கட்டா²னே வா திண்ணம் ஜனானம் நிஸீத³னாகாரம் த³ஸ்ஸேந்தோ ஆஹ ‘‘மஹாதே²ரேனா’’திஆதி³. தத்த² மஹாதே²ரேன வத்தப்³ப³ந்தி ஸம்ப³ந்தோ⁴. நித்³தா³க³ருகோதி நித்³தா³ய க³ருகாரகோ. ஸீதம் அனுத³ஹதீதி ஸீதம் மம் பீளேதி. தேனாதி மஹாதே²ரேன. து³தியத்தே²ரேனாபீதி பிஸத்³தோ³ மஹாதே²ரம் அபேக்க²தி. வுத்தனயேனேவாதி ‘‘உக்காஸித்வா’’திஆதி³னா வுத்தனயேனேவ. ஏவந்திஆதி³ நிக³மனம். ஜம்பு³தீ³பே பன ஏகச்சே பி⁴க்கூ² கா³ஹேந்தீதி ஸம்ப³ந்தோ⁴. கிஞ்சிதே³வ மஞ்சட்டா²னம் வா பீட²ட்டா²னம் வாதி யோஜனா. அயந்திஆதி³ புரிமவசனஸ்ஸ நிக³மனவஸேன பச்சி²மவசனஸ்ஸ கத²னத்தா²ய வுத்தவசனம்.

வஸ்ஸாவாஸே ஸேனாஸனக்³கா³ஹோ ஏவம் வேதி³தப்³போ³தி யோஜனா. ஆக³ந்துகவத்தந்தி ஆக³ந்துகஸ்ஸ வத்தம். அஞ்ஞத்தா²தி அஞ்ஞஸ்மிம் டா²னே. க³ந்த்வா வஸிதுகாமேன ஆக³ந்துகேனாதி யோஜனா. வஸ்ஸூபனாயிகதி³வஸமேவாதி வஸ்ஸம் உபக³மனதி³வஸேயேவ. தத்தா²தி அஞ்ஞம் டா²னம். நக³ந்தப்³ப³காரணம் த³ஸ்ஸேந்தோ ஆஹ ‘‘வஸனட்டா²னம் வா ஹீ’’திஆதி³. ஹீதி யஸ்மா. தத்ராதி அஞ்ஞஸ்மிம் டா²னே. தேனாதி ஸம்பா³த⁴அஸம்பஜ்ஜனகாரணா. தஸ்மாதி யஸ்மா ந பா²ஸும் விஹரேய்ய, தஸ்மா. தம் விஹாரந்தி யஸ்மிம் வஸிதுகாமோ, தம் விஹாரம். தத்தா²தி விஹாரே, வஸந்தோ ஸுக²ம் வஸிஸ்ஸதீதி ஸம்ப³ந்தோ⁴. உத்³தே³ஸத்தி²கோதி உத்³தே³ஸம் அத்தி²கோ, உத்³தே³ஸேன வா. கம்மட்டா²னஸப்பாயதந்தி கம்மட்டா²னேன, கம்மட்டா²னஸ்ஸ வா ஸப்பாயபா⁴வம்.

தத்தா²தி அஞ்ஞவிஹாரம். க³ச்ச²ந்தேன க⁴ட்டேதப்³போ³தி ஸம்ப³ந்தோ⁴. க⁴ட்டேதப்³பா³காரம் த³ஸ்ஸேந்தோ ஆஹ ‘‘ந தத்தா²’’திஆதி³. தத்த² தத்தா²தி ஸகட்டா²னே. கிம் ந வத்தப்³பா³தி ஆஹ ‘‘தும்ஹே’’திஆதி³. ஸலாகப⁴த்தாதீ³னி வா யாகு³க²ஜ்ஜகாதீ³னி வா நத்தி² ந விஜ்ஜந்தீதி யோஜனா. உபோஸதா²கா³ரஸ்ஸ பரிக்கா²ரோதி ஸம்ப³ந்தோ⁴. தும்ஹாகம் விஹாரஸ்ஸ இத³ம் தாளஞ்சேவ இமம் ஸூசிஞ்ச ஸம்படிச்ச²தா²தி யோஜனா. க³மியவத்தந்தி க³மிகானம் பி⁴க்கூ²னம் வத்தம். ‘‘த³ஹரேஹீ’’தி பத³ம் ‘‘உக்கி²பாபேத்வா’’தி ச ‘‘கா³ஹாபேத்வா’’தி ச பத³த்³வயே காரிதகம்மம், ‘‘பத்தசீவரப⁴ண்டி³காயோ’’தி பத³ம் ‘‘உக்கி²பாபேத்வா’’தி பதே³ தா⁴துகம்மம், ‘‘தேலனாளிகத்தரத³ண்டா³தீ³னீ’’தி பத³ம் ‘‘கா³ஹாபேத்வா’’தி பதே³ தா⁴துகம்மமேவ. அத்தானம் த³ஸ்ஸேந்தேனாதி அத்தானம் மனுஸ்ஸானம் பகாஸேந்தேன. விதக்கந்தி பச்சயபா³ஹுல்லிகவிதக்கம். ‘‘ஸபரிவார’’ந்தி பத³ம் ‘‘க³ச்ச²ந்தஞ்சா’’தி பதே³ கிரியாவிஸேஸனம். ஏவஞ்ஹி ஸதி ஸபரிவாரம் க³ச்ச²ந்தஞ்சாதி ஸம்ப³ந்தோ⁴. ‘‘ந’’ந்தி பதே³ பன காரகவிஸேஸனம். ஏவஞ்ஹி ஸதி ஸபரிவாரம் நம் பி⁴க்கு²ந்தி ஸம்ப³ந்தோ⁴. ‘‘தி³ஸ்வா’’தி பதே³ ச கிரியாவிஸேஸனமேவ. ஏவஞ்ஹி ஸதி க³ச்ச²ந்தஞ்ச நம் பி⁴க்கு²ம் ஸபரிவாரம் தி³ஸ்வாதி ஸம்ப³ந்தோ⁴. மனுஸ்ஸா வத³ந்தீதி ஸம்ப³ந்தோ⁴. தேஸூதி மனுஸ்ஸேஸு. ஏகோ பண்டி³தமனுஸ்ஸோதி ஸம்ப³ந்தோ⁴. அயம் காலோ வஸ்ஸூபனாயிககாலோ நாமாதி யோஜனா. யத்தா²தி டா²னே. தஸ்ஸாதி ஏகஸ்ஸ பண்டி³தமனுஸ்ஸஸ்ஸ, வசனந்தி ஸம்ப³ந்தோ⁴. தே மனுஸ்ஸா யாசந்தீதி ஸம்ப³ந்தோ⁴. அஞ்ஞத்தா²தி அஞ்ஞம் டா²னம். மேஜ்ஜந்தி அஞ்ஞமஞ்ஞம் ஸினேஹந்தீதி மித்தா. ஸுக²து³க்கே²ஸு அமா ஸஹ வத்தந்தீதி அமச்சா. மித்தாயேவ அமச்சாதி மித்தாமச்சா, தே. ஸம்மந்தயித்வாதி ஸமம், ஸம்மா வா மந்தயித்வா. இதே⁴வாதி கா³மே ஏவ, விஹாரே ஏவ வா. கஸ்மா ஸாதி³தும் வட்டதி, நனு ஸப்³ப³மேதம் அகப்பியஞ்ச ஸாவஜ்ஜஞ்சாதி ஆஹ ‘‘ஸப்³ப³ஞ்ஹேதம் கப்பியஞ்சேவ அனவஜ்ஜஞ்சா’’தி. ஹி யஸ்மா ஏதம் ஸப்³ப³ம் கப்பியஞ்ச அனவஜ்ஜஞ்ச, தஸ்மா ஸப்³ப³ம் ஸாதி³தும் வட்டதீதி யோஜனா. குருந்தி³யம் பன வுத்தந்தி ஸம்ப³ந்தோ⁴. உப⁴யம்பீதி மஹாஅட்ட²கதா²குருந்தீ³ஸு வுத்தவசனவஸேன உப⁴யம்பி ஏதம் வசனந்தி ஸம்ப³ந்தோ⁴.

ஆவாஸிகவத்தம் வித்தா²ரேந்தோ ஆஹ ‘‘படிகச்சேவ ஹீ’’திஆதி³. தத்த² படிகச்சேவாதி ஆக³ந்துகானம் ஆக³ததோ பட²மமேவ. பதா⁴னக⁴ரவிஹாரமக்³கோ³தி பதா⁴னக⁴ரமக்³கோ³ ச விஹாரமக்³கோ³ ச. முத்³த³வேதி³காயாதி சேதியஸ்ஸ ஹம்மியவேதி³காய. கஸ்மா இத³ம்பி ஸப்³ப³ம் காதப்³ப³ந்தி ஆஹ ‘‘வஸ்ஸம் வஸிதுகாமா ஹீ’’திஆதி³. ஹீதி ஸச்சம், யஸ்மா வா. வஸ்ஸம் வஸிதுகாமா ஸுக²ம் வஸிஸ்ஸந்தீதி ஸம்ப³ந்தோ⁴. கதபரிகம்மேஹி ஆவாஸிகேஹீதி ஸம்ப³ந்தோ⁴. யதோ குலதோ பகதியா லப்³ப⁴தி, தஸ்மிம் குலே வஸ்ஸாவாஸிகம் புச்சி²தப்³ப³ந்தி யோஜனா. ந தி³ன்னபுப்³ப³ந்தி புப்³பே³ ந தி³ன்னம். ஹீதி யஸ்மா. உபத்³து³தாதி உபக³ந்த்வா, பு⁴ஸம் வா பீளிதா. தத்தா²தி மனுஸ்ஸேஸு. யேதி மனுஸ்ஸா. வஸ்ஸாவாஸிகே கா³ஹிதேதி வஸ்ஸாவாஸிகே ஸேனாஸனே கா³ஹாபியமானே. கா³ஹிதபி⁴க்கூ²னந்தி கா³ஹாபிதபி⁴க்கூ²னம். வஸ்ஸாவாஸிகந்தி வஸ்ஸம் ஆவஸந்தானம் தா³தப்³ப³ம் சீவரம். கா³ஹணகாலோதி கா³ஹாபனகாலோ. உபகட்டோ²தி ஆஸன்னோ. சா²தகாதீ³ஹீதி ஆதி³ஸத்³தே³ன ரோகா³த³யோ ஸங்க³ண்ஹாதி. யந்தி சீவரம். ததோதி சீவரதோ. தந்தி வசனம். தத³னுரூபேனாதி தேஸம் மனுஸ்ஸானம் வசனஸ்ஸானுரூபேன. தேஸம் தேஸந்தி மனுஸ்ஸானம், வஸ்ஸாவாஸிகம் சீவரந்தி ஸம்ப³ந்தோ⁴.

யஸ்ஸாதி பி⁴க்கு²னோ. ஸோதி பி⁴க்கு². இதி வத³ந்தீதி யோஜனா. தந்தி சீவரம். படிக்கம்மாதி படிக்கமித்வா. விஹாரதோ அபஸக்கித்வாதி அத்தோ². தத்ராதி கா³மே. உபனிக்கே²பம் ட²பேத்வாதி கப்பியவத்து²ம் வா அகப்பியவத்து²ம் வா ஆராமிகாதீ³னம் ஹத்தே² உபனிக்கே²பம் ட²பேத்வா. விஹாரேதி விஹாரஸ்ஸ, விஹாரே வஸ்ஸம் வஸந்தஸ்ஸ வா. அபுச்சி²த்வாபீதி பிஸத்³தே³ன ‘‘புச்சி²த்வாபீ’’தி அத்த²ம் த³ஸ்ஸேதி. தேஸந்திகுலானம். வத்தந்தி ஜக்³க³னாதி³வத்தம். தேஸந்தி குலானம். ஆக³தஞ்ச தந்தி தம் பம்ஸுகூலிகம் ஆக³தஞ்ச வத³ந்தீதி ஸம்ப³ந்தோ⁴. தேனாதி பம்ஸுகூலிகேன. தா³தும் ந இச்ச²ந்தீதி ஸங்க⁴ஸ்ஸ ஆசிக்க²ந்தேபி ஸங்க⁴ஸ்ஸ தா³தும் ந இச்ச²ந்தி. ஸபா⁴கோ³ பி⁴க்கூ²தி அத்தனா ஸபா⁴கோ³ பி⁴க்கு². ஏதந்தி வஸ்ஸாவாஸிகம். பம்ஸுகூலிகஸ்ஸ ந வட்டதி, கஸ்மா? க³ஹபதிசீவரத்தா. இதீதிஆதி³ நிக³மனம். ஸத்³தா⁴தே³ய்யேதி ஸத்³தா⁴ய தா³தப்³பே³ வஸ்ஸாவாஸிகலாப⁴விஸயே.

தத்ருப்பாதே³தி தஸ்மிம் விஹாரே உப்பஜ்ஜனகலாப⁴விஸயே. ப⁴ண்ட³படிச்சா²த³னந்தி படிச்சா²த³னசீவரப⁴ண்ட³ம். சீவரப⁴ண்ட³மேவ ஹி யஸ்மா அனேன ஸரீரம் படிச்சா²தி³யதி, தஸ்மா ப⁴ண்ட³படிச்சா²த³னந்தி வுச்சதி. கா³ஹேதா²தி பி⁴க்கூ²ஹி கா³ஹாபேத². கா³ஹேதப்³ப³ந்தி பி⁴க்கூ²ஹி கா³ஹாபேதப்³ப³ம். வத்து² பனாதி ஸாடகதோ அஞ்ஞம் கப்பியம் வா அகப்பியம் வா வத்து² பன. கஸ்மா வட்டதியேவ, நனு அகப்பியவத்து² ந வட்டதீதி ஆஹ ‘‘கப்பியகாரகானஞ்ஹி’’திஆதி³. தத்த² ஹி யஸ்மா அனுஞ்ஞாதம், தஸ்மா வட்டதியேவாதி யோஜனா. தி³ன்னவத்து²தோ உப்பன்னந்தி ஸம்ப³ந்தோ⁴.

யந்தி வத்து² தி³ன்னந்தி ஸம்ப³ந்தோ⁴. ஏத்தா²தி கப்பியகாரகானம் ஹத்தே² தி³ன்னவத்தூ²ஸு. தந்தி வத்து² உபனாமேந்தேஹீதி ஸம்ப³ந்தோ⁴. க³ருப⁴ண்ட³ம் ஹோதி, க³ருப⁴ண்ட³த்தா அஞ்ஞேஸு பச்சயேஸு ந உபனாமேதப்³ப³ந்தி அதி⁴ப்பாயோ. புக்³க³லவஸேனேவாதி ‘‘பி⁴க்கூ² சீவரேன கிலமந்தி, ஏத்தகம் நாம தண்டு³லபா⁴க³ம் பி⁴க்கூ²னம் சீவரம் காதும் ருச்சதி ஸங்க⁴ஸ்ஸா’’திஆதி³னா புக்³க³லம் பராமஸித்வா புக்³க³லவஸேனேவ. ஸங்க⁴வஸேனாதி ‘‘ஸங்கோ⁴ சீவரேன கிலமதீ’’திஆதி³னா ஸங்க⁴வஸேன ந காதப்³ப³ந்தி ஸம்ப³ந்தோ⁴. ஏவம் புக்³க³லவஸேன அபலோகனகம்மஸ்ஸ அகத்தப்³ப³தம் த³ஸ்ஸேத்வா இதா³னி வத்து²வஸேன தஸ்ஸேவ அகத்தப்³ப³தம் த³ஸ்ஸேந்தோ ஆஹ ‘‘ஜாதரூபரஜதவஸேனாபீ’’திஆதி³. கப்பியப⁴ண்ட³வஸேனாதி சீவரதண்டு³லேஹி அவஸேஸஸ்ஸ கப்பியப⁴ண்ட³ஸ்ஸ வஸேன. சீவரதண்டு³லானஞ்ஹி விஸும் க³ஹிதத்தா ‘‘கப்பியப⁴ண்ட³வஸேனா’’தி ஏத்த² தேஹி அவஸேஸோ கப்பியப⁴ண்டோ³வ க³ஹேதப்³போ³. தம் பனாதி அபலோகனகம்மம் பன. கத்தப்³பா³காரம் த³ஸ்ஸேந்தோ ஆஹ ‘‘இதா³னீ’’திஆதி³. ஸுபி⁴க்க²ந்தி ஸமித்³த⁴பி⁴க்க²ம். ஸுலப⁴பிண்ட³ந்தி ஸுகே²ன லப⁴பிண்ட³ம். த்³வீஹி பதே³ஹி அஞ்ஞமஞ்ஞஸ்ஸ காரணம் த³ஸ்ஸேதி, ஸுபி⁴க்க²த்தா ஸுலப⁴பிண்ட³ம், ஸுலப⁴பிண்ட³த்தா ஸுபி⁴க்க²ந்தி வுத்தம் ஹோதி.

ஏவம் சீவரபச்சயம் ஸல்லக்கே²த்வா ஸேனாஸனம் ஸல்லக்கே²தப்³ப³ந்தி ஸம்ப³ந்தோ⁴. காலேதி கா³ஹாபனஸ்ஸ காலே. வுத்தந்தி மஹாஅட்ட²கதா²ய வுத்தம். கஸ்மா த்³வே ஸம்மன்னிதப்³பா³, நனு ஏகம்பி ஸம்மன்னிதும் வட்டதீதி ஆஹ ‘‘ஏவஞ்ஹீ’’திஆதி³. தத்த² ஹி யஸ்மா கா³ஹேஸ்ஸதி, தஸ்மா த்³வே ஸம்மன்னிதப்³பா³தி யோஜனா. ஏகேன ஹி ஸம்முதிலத்³தே⁴ன ஸக்கா பரம் கா³ஹாபேதும், அத்தனா பன அத்தனோ பாபேதும் ந ஸக்கா, தஸ்மா த்³வீஸு ஸம்மதேஸு நவகோ வுட்³ட⁴ஸ்ஸ, வுட்³டோ⁴ ச நவகஸ்ஸாதி உபோ⁴ அஞ்ஞமஞ்ஞம் கா³ஹேஸ்ஸந்தீதி அதி⁴ப்பாயோ. ஸம்மன்னிதப்³பா³தி ஏகதோ ஸம்மன்னிதப்³பா³. அட்ட²பி ஸோளஸபீதி ஏத்த² பிஸத்³தே³ன ததோ அதி⁴கம்பி ஏகதோ ஸம்மன்னிதும் வட்டதீதி தீ³பேதி. ஸத்தஸதிகக்க²ந்த⁴கே உப்³பா³ஹிகஸம்முதியம் (சூளவ. 456) அட்ட²பி ஜனா ஏகதோவ ஸம்மதாதி வசனஞ்சேத்த² ஸாத⁴கம். நிக்³க³ஹகம்மமேவ ஹி ஸங்கோ⁴ ஸங்க⁴ஸ்ஸ ந கரோதீதி த³ட்ட²ப்³ப³ம். தேஸந்தி அட்ட²ஸோளஸஜனானம், ஸம்முதி வட்டதியேவாதி ஸம்ப³ந்தோ⁴. கிந்தி ஸல்லக்கே²தப்³ப³ந்தி ஆஹ ‘‘சேதியக⁴ர’’ந்திஆதி³.

ஆஸனக⁴ரந்தி படிமாக⁴ரம். மக்³க³போக்க²ரணீனம் ஸமீபே கதா ஸாலாயோ உபசாரவஸேன வுச்சந்தி ‘‘மக்³கோ³’’தி ச ‘‘போக்க²ரணீ’’தி ச. தா ஹி ஸாலாயோ உபசாரஸீமப்³ப⁴ந்தரக³தே கா³மாபி⁴முக²மக்³கே³ ச அந்தோஉபசாரஸீமாயம் க²ணிதா யத்த² கத்த²சி போக்க²ரணியோ ச கரீயந்தி, இதி ஸல்லக்கே²தப்³ப³ந்தி யோஜனா. அஸேனாஸனம் த³ஸ்ஸேத்வா ஸேனாஸனம் த³ஸ்ஸேந்தோ ஆஹ ‘‘விஹாரோ’’திஆதி³. ருக்க²மூலந்தி ச²ன்னகவாடப³த்³த⁴ருக்க²மூலம். ஏஸேவ நயோ வேளுகு³ம்பே³பி. கா³ஹேந்தேன ச கா³ஹேதப்³பா³னீதி ஸம்ப³ந்தோ⁴. ஸங்கி⁴கோதி தத்ருப்பாதோ³. தேஸூதி த்³வீஸு சீவரபச்சயேஸு. யந்தி சீவரபச்சயம். தஸ்ஸாதி சீவரபச்சயஸ்ஸ. டி²திகதோதி பப³ந்த⁴வஸேன டி²தட்டா²னதோ. இதரோதி பட²மம் க³ஹிதசீவரபச்சயதோ இதரோ.

அப்பதாயாதி அப்பபா⁴வதோ, கா³ஹியமானேதி ஸம்ப³ந்தோ⁴. பரிவேணக்³கே⁴னாதி பரிவேணபரிச்சே²தே³ன. லப⁴ந்தீதி பரிவேணஸாமிகா பி⁴க்கூ² லப⁴ந்தி. தந்தி பரிவேணம். விஜடேத்வாதி விஜடம் கத்வா, த்³வே வா தயோ வா கோட்டா²ஸே கத்வாதி அத்தோ². பக்கி²பித்வாதி பா⁴க³கோட்டா²ஸம் பக்கி²பித்வா. ந ஏவம் காதப்³ப³ந்தி யதா² மஹாஸுமத்தே²ரோ ஆஹ, ததா² ந காதப்³ப³ந்தி அத்தோ². அகாதப்³ப³காரணம் த³ஸ்ஸேந்தோ ஆஹ ‘‘மனுஸ்ஸா ஹீ’’திஆதி³. தத்தா²தி பரிவேணே, பவிஸிதப்³ப³ம் இதி ஆஹாதி யோஜனா. ஏத்தா²தி ஏதஸ்மிம் கா³ஹணட்டா²னே. படிக்கோஸதீதி படிஸேதே⁴தி. படிக்கோஸனாகாரம் த³ஸ்ஸேந்தோ ஆஹ ‘‘மா ஆவுஸோ’’திஆதி³. இதி வுத்தம், இதி படிக்கோஸதீதி யோஜனா. ஏகோ ஹி இதிஸத்³தோ³ லுத்தனித்³தி³ட்டோ². தஸ்ஸாதி மஹாதே²ரஸ்ஸ. ஸங்க³ஹந்தி பி⁴க்கூ²னம் ஸங்க³ஹம். தந்தி மஹாதே²ரம்.

ஏவம் வத்தப்³ப³ந்தி ஏவம் வக்க²மானனயேன வத்தப்³ப³ம். பச்சயம் தா⁴ரேத², இதி வத்தப்³ப³ந்தி யோஜனா. பாபுணாதி ஆவுஸோ இதி வுத்தேதி யோஜனா. ‘‘க³ஹிதம் ஹோதீ’’தி இமினா ‘‘க³ண்ஹத², க³ண்ஹாமீ’’தி பச்சுப்பன்னகாலவஸேன வுத்தத்தா க³ஹிதம் ஹோதீதி த³ஸ்ஸேதி. அதீதஅனாக³தகாலவஸேன அக³ஹிதபா⁴வம் த³ஸ்ஸேந்தோ ஆஹ ‘‘ஸசே பனா’’திஆதி³. ஸதுப்பாத³மத்தந்தி க³ஹணே ஸதியா உப்பாத³னமத்தம். ஏத்தா²தி ஸேனாஸனபச்சயக³ஹணட்டா²னே.

யோபீதி யம்பி. உபயோக³த்தே² சேதம் பச்சத்தவசனம், யம்பி பச்சயம் விஸ்ஸஜ்ஜேதீதி யோஜனா. பச்சயந்தி ச சீவரபச்சயம். அயம்பீதி அயம்பி பச்சயோ. பிஸத்³தோ³ மஹாலாப⁴பரிவேணே பச்சயம் ஸம்பிண்டே³தி. தஸ்மிம்யேவ பரிவேணேதி தஸ்மிம் பம்ஸுகூலிகேன க³ஹிதபரிவேணே ஏவ. அஞ்ஞஸ்ஸாதி பம்ஸுகூலிகதோ அஞ்ஞஸ்ஸ பி⁴க்கு²ஸ்ஸ. பம்ஸுகூலிகோ ‘‘அஹம் வஸாமீ’’தி ஸேனாஸனம் ஜக்³கி³ஸ்ஸதி. இதரோ ‘‘அஹம் பச்சயம் க³ண்ஹாமீ’’தி ஸேனாஸனம் ஜக்³கி³ஸ்ஸதீதி யோஜனா. த்³வீஹி காரணேஹீதி வஸனக³ஹணவஸேன த்³வீஹி காரணேஹி. பம்ஸுகூலிகே க³ண்ஹந்தேதி ஸம்ப³ந்தோ⁴. இதா⁴தி ஸேனாஸனே. தேனாதி பம்ஸுகூலிகேன. ஹேட்டா²தி ஸேனாஸனஸ்ஸ ஹேட்டா², டி²தம் அஞ்ஞம் பி⁴க்கு²ந்தி ஸம்ப³ந்தோ⁴. தேனாதி பம்ஸுகூலிகேன, கிஞ்சி வசனந்தி ஸம்ப³ந்தோ⁴. வுத்த²வஸ்ஸஸ்ஸ பம்ஸுகூலிகஸ்ஸாதி யோஜனா. வட்டதீதி பம்ஸுகூலிகஸ்ஸ வட்டதி. தஸ்மிம் ஸேனாஸனேதி பம்ஸுகூலிகேன க³ஹிதஸேனாஸனே. யேஸம் பனாதி மனுஸ்ஸானம் பன. தேஸந்தி மனுஸ்ஸானம்.

தூ²பம் கத்வாதி சேதியம் கத்வா. தஸ்ஸாதி தூ²பஸ்ஸ. தேன பி⁴க்கு²னாதி வஸ்ஸாவாஸிகம் கா³ஹகபி⁴க்கு²னா. தந்தி போ⁴ஜனஸாலம். கா³ஹேதும் வட்டதீதி ஸம்ப³ந்தோ⁴. ஸப்³ப³மித³ந்தி ஸப்³ப³ம் இத³ம் வசனம்.

பாடிபத³அருணதோதி வஸ்ஸூபனாயிகதி³வஸஸங்கா²தஸ்ஸ பாடிபத³ஸ்ஸ அருணுக்³க³மனதோ. விதக்கசாரிகோதி ‘‘கத்த² நு கோ² வஸிஸ்ஸாமீ’’திஆதி³னா விதக்கேன சரணே அனுயுத்தோ. ஸேனாஸனம் யாசதீதி ஸேனாஸனக்³கா³ஹாபகம் ஸேனாஸனம் யாசதி. க³ஹிதந்தி ஸங்கே⁴ன க³ஹிதம். யத்தா²தி டா²னே. வஸ்ஸூபக³தேஹி வத்தப்³பா³தி ஸம்ப³ந்தோ⁴. புனப்புனம், ஸமம் வா சேதியங்க³ணாதி³ம் முஞ்சந்தி ஸோதே⁴ந்தி இமாஹீதி ஸம்முஞ்சனியோ. முசிதா⁴து ஸோத⁴னத்தே² யுபச்சயோ கரணத்தே² ஹோதி. தாலுஜோ பட²மக்க²ரோ. ஸுலபா⁴ சே த³ண்ட³கா, ஏகேகேன த்³வே திஸ்ஸோ யட்டி²ஸம்முஞ்சனியோ ப³ந்தி⁴தப்³பா³. ஸுலபா⁴ சே ஸலாகா, ச²பஞ்சமுட்டி²ஸம்முஞ்சனியோ ப³ந்தி⁴தப்³பா³தி அத்தோ². பஞ்ச பஞ்ச உக்காதி அரஞ்ஞவிஹாரேஸு பரிஸ்ஸயவிஜானனத்த²ம் பஞ்ச பஞ்ச அக்³கி³உக்கா கோட்டேதப்³பா³ சி²ந்தி³தப்³பா³தி அத்தோ².

‘‘நிப³த்³த⁴வத்தம் ட²பேத்வா’’தி ஏத்த² அகத்தப்³ப³வத்தம் த³ஸ்ஸேந்தோ ஆஹ ‘‘வத்தம் கரோந்தேஹி சா’’திஆதி³. தத்த² வத்தம் கரோந்தேஹி ச ஏவரூபம் அத⁴ம்மிகவத்தம் ந காதப்³ப³ந்தி ஸம்ப³ந்தோ⁴. ஹி ஸச்சம், ஸப்³பே³வ ஏதே உத்³தே³ஸாத³யோ பபஞ்சாதி யோஜனா. பபஞ்சேந்தி ஸம்ஸாரே சிரம் ட²பேந்தீதி பபஞ்சா. மூக³ப்³ப³தந்தி மூகா³னம் வதம், மூகே³ஹி கத்தப்³ப³ம் வா, மூகே³ன விய வா அமூகே³ஹி கத்தப்³ப³ம் வதம். ஏவம் அகாதப்³ப³வத்தம் த³ஸ்ஸேத்வா இதா³னி காதப்³ப³வத்தம் த³ஸ்ஸேந்தோ ஆஹ ‘‘பரியத்தித⁴ம்மோ நாமா’’திஆதி³. திவித⁴ம்பீதி பரியத்திபடிபத்திபடிவேத⁴வஸேன திப்பகாரம்பி. அவயவபரியத்தித⁴ம்மோபி அவயவிபரியத்தித⁴ம்மம், அவயவிபரியத்தித⁴ம்மோ வா அவயவபரியத்தித⁴ம்மம் பதிட்டா²பேதி, தஸ்மா பரியத்தித⁴ம்மோ அத்தனாபி அத்தானம் பதிட்டா²பேஸீதி வேதி³தப்³ப³ம். உத்³தி³ஸதா²தி பரியத்திம் உத்³தி³ஸத². ஸோதே⁴த்வா…பே… உபஸம்பாதே³தா²தி ஏத்த² ஸோத⁴னம் நாம ஸப்³பே³ஸம் ஆசாரகுலபுத்தானம் உபபரிக்க²னம். ஸோதே⁴த்வா நிஸ்ஸயம் தே³தா²தி ஏத்த² ஸோத⁴னம் நாம பி⁴க்கு²ஸபா⁴க³தம் உபபரிக்க²னம். ஹீதி ஸச்சம். குலபுத்தோதி ஆசாரகுலபுத்தோ. யத்தகானி து⁴தங்கா³னி ஸமாதி³யிதும் ஸக்கோதா²தி யோஜனா. அந்தோவஸ்ஸம் நாமேதந்தி பு⁴ம்மத்தே² உபயோக³வசனமேதம். ஏதஸ்மிம் அந்தோவஸ்ஸேதி ஹி அத்தோ², ப⁴விதப்³ப³ந்திஆதீ³ஸு ஸம்ப³ந்தி⁴தப்³ப³ம். ஸகலதி³வஸந்தி ஸகலதி³வஸம்ஹி, அப்பமத்தேஹீதி ஸம்ப³ந்தோ⁴. ஏகசாரிகவத்தந்தி ஏககேன சரிதப்³ப³ம் வத்தம். ப⁴ஸ்ஸேதி வசனே. த³ஸவத்து²ககத²ந்தி அப்பிச்ச²தாதி³த³ஸவத்து²க கத²ம்.

விக்³கா³ஹிகபிஸுணப²ருஸவசனானீதி விக்³க³ஹம் கலஹம் ஜனேதீதி விக்³கா³ஹிகம், விக்³கா³ஹிகவசனஞ்ச பிஸுணவசனஞ்ச ப²ருஸவசனஞ்ச விக்³கா³ஹிகபிஸுணப²ருஸவசனானி. மனஸிகாரப³ஹுலா விஹரத² இதி ஓவதி³தப்³பா³தி யோஜனா. த³ந்தகட்ட²கா²த³னவத்தந்தி ஹேட்டா² அதி³ன்னாதா³னவண்ணனாயம் வுத்தம் த³ந்தகட்ட²கா²த³னே, த³ந்தகட்ட²கா²த³னஸ்ஸ வா வத்தம். ‘‘பத்தம் த²விகாய பக்கி²பந்தேன ந கதே²தப்³ப³’’ந்தி இமினா கதே²ந்தே பமாதே³ன பத்தோ பி⁴ஜ்ஜேய்யாதி பத்தஸ்ஸ கு³த்தத்தா²ய கத²னம் நிவாரேதி. ஆசிக்கி²தப்³பா³தி இதிஸத்³தோ³ பரிஸமாபனத்தோ².

கோசி தா³யகோதி ஸம்ப³ந்தோ⁴. ஆக³ந்துகோ பி⁴க்கூ²தி சீவரக்³கா³ஹிததோ பச்சா² ஆக³தோ ஆக³ந்துகோ பி⁴க்கு². ஸங்க⁴த்தே²ரோதி ஆவாஸிகஸங்க⁴த்தே²ரோ. பட²மபா⁴க³ந்தி புப்³பே³ கா³ஹிதம் பட²மபா⁴க³ம், பரிவத்தேத்வாதி புப்³பே³ கா³ஹிதபா⁴கே³ன பச்சா² தா³தப்³ப³ம் வஸ்ஸாவாஸிகம் பரிவத்தேத்வா. ஆக³ந்துகஸ்ஸ வஸ்ஸக்³கே³ன பத்தட்டா²னே ஆக³ந்துகஸ்ஸ தா³தப்³ப³ந்தி யோஜனா. ‘‘ஆக³ந்துகஸ்ஸா’’தி பத³ம் புப்³பா³பரம் அபேக்க²தி. தஸ்மா த்³வின்னம் பதா³னம் மஜ்ஜே² வுத்தம். பட²மவஸ்ஸூபக³தாதி பட²மவஸ்ஸூபனாயிகதி³வஸே வஸ்ஸூபக³தா. ‘‘த்³வே தீணி சத்தாரீ’’தி வசனஸ்ஸ வா ப³ஹூனம் பி⁴க்கூ²னம் வா ப்³யாபனத்தா²ய ‘‘லத்³த⁴ம் லத்³த⁴’’ந்தி விச்சா²வஸேன வுத்தம். தேன பனாதி ஆக³ந்துகேன பன. பட²மவஸ்ஸூபக³தேஹி அப்பகே லத்³தே⁴ பச்சி²மவஸ்ஸூபனாயிகதி³வஸே தா³தப்³பா³னம் வஸ்ஸாவாஸிகானம் ப³ஹுகேபி அயம் நயோ ஞாதப்³போ³தி கத்வா ந வுத்தோ.

த்³வீஸுபீதி பட²ம து³தியவஸேன த்³வீஸுபி. வஸ்ஸூபக³தா பி⁴க்கூ² பி⁴க்கா²ய கிலமந்தா வத³ந்தீதி ஸம்ப³ந்தோ⁴. இதா⁴தி டா²னே. வஸந்தாதி ஏகதோ வஸந்தா. த்³வே பா⁴கா³ ஹோம ஸாது⁴ வதாதி யோஜனா. ஸாது⁴ வதாதி ஏகம்ஸேன ஸுந்த³ரா ப⁴வேய்யுந்தி அத்தோ². யேஸந்தி பி⁴க்கூ²னம். தத்தா²தி ஞாதிபவாரிதட்டா²னேஸு. பவாரணாயாதி பவாரணாதி³வஸே. தேஸூதி பி⁴க்கூ²ஸு. யேதி பி⁴க்கூ². தத்தா²தி ஞாதிபவாரிதட்டா²னேஸு. கஸ்மா அபலோகேத்வா தா³தப்³ப³ம், நனு தே ஸாதி³யந்தீதி ஆஹ ‘‘ஸாதி³ யந்தாபி ஹீ’’திஆதி³. தத்த² ஹீதி யஸ்மா. ‘‘நேவ வஸ்ஸாவாஸிகஸ்ஸ ஸாமினோ’’தி இமினா தேஸம் வஸ்ஸச்சி²ன்னதம் தீ³பேதி. நேவ அதா³தும் லப⁴ந்தீதி பட²மமேவ கதிகவத்தஸ்ஸ கதத்தா அதா³தும் நேவ லப⁴ந்தி, ஸப்³பே³ஸம் நோ அம்ஹாகந்தி யோஜனா. இதா⁴தி டா²னே. தந்தி கதிகவத்தம். ஏகோ பி⁴க்கூ²தி ஸம்ப³ந்தோ⁴. தேஸந்தி பி⁴க்கூ²னம். தத்தா²தி ஸபா⁴க³ட்டா²னே. வஸித்வா ஆக³தானம் தேஸம் பி⁴க்கூ²னந்தி யோஜனா. ந லப்³ப⁴தி இதி வுத்தந்தி யோஜனா. இமேஸந்தி வஸ்ஸாவாஸிஅப்பத்தகானம் ஏகச்சானம். கா³ஹிதஸதி³ஸமேவாதி வஸ்ஸாவாஸிகஸ்ஸ கா³ஹிதேன ஸதி³ஸமேவ. தேஸமேவாதி ஏகச்சானமேவ.

பக்கந்தோபீதி அஞ்ஞம் டா²னம் பக்கமந்தோபி. ஹீதி ஸச்சம், யஸ்மா வா. தேன பி⁴க்கு²னா கதம் பானீயஉபட்ட²பனாதி³கம்மம் ப⁴தினிவிட்ட²ம் ப⁴தியா டி²தந்தி யோஜனா. அபலோகனகம்மம் கத்வா கா³ஹிதம் ஸங்கி⁴கந்தி ஸம்ப³ந்தோ⁴. ஸங்கி⁴கந்தி தத்ருப்பாத³ம் ஸந்தா⁴ய வுத்தம். விப்³ப⁴ந்தோபீதி பிஸத்³தோ³ பகே³வ சி²ன்னவஸ்ஸோதி த³ஸ்ஸேதி. பச்சயவஸேனேவாதி ஸத்³தா⁴தே³ய்யபச்சயவஸேன. வத³ந்தீதி கேசி வத³ந்தி.

தி³ஸம்க³மிகோ பி⁴க்கு² விப்³ப⁴மதீதி ஸம்ப³ந்தோ⁴. மனுஸ்ஸேதி வஸ்ஸாவாஸிகதா³யகமனுஸ்ஸே. ஸம்முகா²தி ஆவாஸிகஸ்ஸ ஸம்முகா². ஸம்படிச்சா²பேத்வாதி ‘‘ஸுட்டு² த³ஸ்ஸாமா’’தி படிச்சா²பேத்வா. யஸ்ஸ கா³ஹிதந்தி யஸ்ஸ பி⁴க்கு²னோ ஸேனாஸனம் கா³ஹிதம். ஸேனாஸனஸாமிகஸ்ஸாதி ஸேனாஸனதா³யகஸ்ஸ புத்ததீ⁴தாத³யோதி ஸம்ப³ந்தோ⁴. ஸேனாஸனே தே³மாதி ஸேனாஸனஸ்ஸ தே³ம. தத்தா²தி ஸேனாஸனே. ஏகமேவ வத்த²ம் தா³தப்³ப³ம். கஸ்மா? புக்³க³லஸ்ஸ அத³த்வா ஸேனாஸனஸ்ஸேவ தா³தப்³ப³த்தா. வஸ்ஸாவாஸிகட்டி²திகாயாதி வஸ்ஸாவாஸிககா³ஹிதஸ்ஸ டி²திகாய. ஏஸேவ நயோதி ஸேனாஸனஸ்ஸேவ தி³ன்னத்தா ஏஸேவ நயோ. தஸ்ஸேவ ஹோந்தீதி புக்³க³லஸ்ஸேவ தி³ன்னத்தா தஸ்ஸேவ ஹோந்தி.

து³தியோ தே²ராஸனே கா³ஹிதோ ஹோதீதி ஸம்ப³ந்தோ⁴. பட²மபா⁴க³ஸ்ஸ ஸாமணேரஸ்ஸ கா³ஹிதத்தா வுத்தம் ‘‘வரபா⁴க³ம் ஸாமணேரஸ்ஸ த³த்வா’’தி. உபோ⁴பீதி த்³வே தே²ரஸாமணேரேபி. ஸயமேவாதி தா³யகோ ஸயமேவ. யந்தி வஸ்ஸாவாஸிகம். யஸ்ஸாதி தே²ரஸ்ஸ வா ஸாமணேரஸ்ஸ வா.

இதோதி வுத்தனயதோ. த³ஹரஸாமணேரஸ்ஸாதி தருணஸ்ஸ ஸாமணேரஸ்ஸ. ஸோதி க⁴ரஸாமிகோ. நந்தி பத்தஜனம். யஸ்ஸாதி பி⁴க்கு²னோ. தேஸந்தி மனுஸ்ஸானம். யதா²பூ⁴தம் ஆசிக்கி²தப்³ப³ந்தி விப்³ப⁴மகாலங்கதகாரணம் யதா²பூ⁴தம் ஆசிக்கி²தப்³ப³ம். ஸுத்³த⁴பம்ஸுகூலிகாயேவாதி அஞ்ஞேஹி அமிஸ்ஸா ஸுத்³தா⁴ பம்ஸுகூலிகாயேவாதி. இத³ம் நேவாஸிகவத்தந்தி நிக³மனம்.

உபனந்த³வத்து²கதா²

319. அயமத்தோ²தி அயம் வக்க²மானோ அத்தோ², ஏவம் வேதி³தப்³போ³தி ஸம்ப³ந்தோ⁴. தத்தா²தி கா³மகே. தந்தி ஸேனாஸனம், க³ண்ஹந்தேனேவாதி ஸம்ப³ந்தோ⁴. இதா⁴தி ஸாவத்தி²யம். முத்தந்தி தே ஸேனாஸனம் முஞ்சிதம் ஹோதி. தத்ராபீதி கா³மகேபி. உப⁴யத்தா²தி ஸாவத்தி²யம், கா³மகே சாதி உப⁴யத்த².

ஏத்தா²தி உபனந்த³வத்து²ஸ்மிம். கத²ந்தி கேன பகாரேன படிப்பஸ்ஸம்ப⁴தி. இதா⁴தி ஸாஸனே. ஏகச்சோ க³ண்ஹாதீதி ஸம்ப³ந்தோ⁴. தத்ராபீதி ஸாமந்தவிஹாரேபி. தஸ்ஸாதி பி⁴க்கு²ஸ்ஸ. இதா⁴தி ஸேனாஸனே. ஆலயமத்தந்தி சித்துப்பாத³மத்தம். இச்சஸ்ஸாதி இதி அஸ்ஸ, ஏவம் அஸ்ஸ பி⁴க்கு²ஸ்ஸாதி அத்தோ². ஸப்³ப³த்தா²தி ஸப்³ப³ஸ்மிம் ‘‘க³ஹணேன க³ஹண’’ந்திஆதி³கே சதுக்கே. யோ பன க³ச்ச²தீதி ஸம்ப³ந்தோ⁴. உபசாரஸீமாதிக்கமேதி நிமித்தத்தே² சேதம் பு⁴ம்மவசனம், பா⁴வேன பா⁴வலக்க²ணே வா. தத்தா²தி அஞ்ஞஸ்மிம் விஹாரே பச்சாக³ச்ச²தி, வட்டதி, ஸேனாஸனக்³கா³ஹோ ந படிப்பஸ்ஸம்ப⁴தீதி அதி⁴ப்பாயோ.

320. யோதி பி⁴க்கு². மஹந்ததரோ வா த³ஹரதரோ வாதி அத்தனோ மஹந்ததரோ வா த³ஹரதரோ வா ஹோதி. ஸோ பி⁴க்கு² திவஸ்ஸந்தரோ நாமாதி யோஜனா. ஏகஸ்ஸ பி⁴க்கு²னோ திண்ணம் வஸ்ஸானமந்தரே டி²தோ திவஸ்ஸந்தரோ அஞ்ஞோ பி⁴க்கு². தத்தா²தி பி⁴க்கூ²ஸு. இமே ஸப்³பே³தி திவஸ்ஸந்தரத்³விவஸ்ஸந்தரஸமானவஸ்ஸிகே இமே பி⁴க்கூ², லப⁴ந்தீதி ஸம்ப³ந்தோ⁴. யம் திண்ணம் பஹோதீதி மஞ்சபீட²வினிமுத்தம் யம் ஆஸனம் திண்ணம் ஸுக²ம் நிஸீதி³தும் பஹோதி, ததா²ரூபே ஆஸனேபி த்³வே த்³வே ஹுத்வா நிஸீதி³தும் லப⁴ந்தீதி யோஜனா. அபிஸத்³தே³ன மஞ்சபீடா²னி அபேக்க²தி. இத³ம் பச்சி²மதீ³கா⁴ஸனம். அனுபஸம்பன்னேனாபீதி பிஸத்³தோ³ பகே³வ உபஸம்பன்னேனாதி த³ஸ்ஸேதி.

ஹத்தி²கும்பே⁴தி ஹத்தி²ஸிரோபிண்டே³. இமினா ஹத்தி²ஸத்³தே³ன ஹத்தி²கும்போ⁴ க³ஹிதோ அவயவூபசாரேன வா உத்தரபத³லோபேன வாதி த³ஸ்ஸேதி. ஹத்தீ² வியாதி ஹத்தீ², பூ⁴மிபா⁴கோ³, ஹத்தி²ம்ஹி பதிட்டி²தோ பாத³ஸங்கா²தோ நகோ² இமஸ்ஸாதி ஹத்தி²னக²கோ, பாஸாதோ³. ஏதம் ‘‘ஹத்தி²னக²கோ’’தி நாமம் ஏவம்கதஸ்ஸ பாஸாத³ஸ்ஸ நாமந்தி யோஜனா. ‘‘ஸுவண்ணரஜதாதி³விசித்ரானீ’’தி பத³ம் ‘‘கவாடானி மஞ்சபீடா²னி தாலவண்டானீ’’தி ஸப்³ப³பதே³ஸு யோஜேதப்³ப³ம். யம்கிஞ்சி சித்தகம்மகதம் அத்தி², ஸப்³ப³ம் வட்டதீதி யோஜனா. பாஸாத³ஸ்ஸ தே³மாதி ஸம்ப³ந்தோ⁴. பாடேக்கந்தி பாஸாத³தோ விஸும். படிக்³க³ஹிதமேவாதி ஸப்³ப³ம் படிக்³க³ஹிதமேவ ஹோதி. கோ³னகாதீ³னி அட்டா²ரஸ அத்த²ரணானி பரிபு⁴ஞ்ஜிதுந்தி ஸம்ப³ந்தோ⁴. கி³ஹிவிகடனீஹாரேனாதி கி³ஹீஹி விஸேஸேன யதா²காமம் கரியதீதி கி³ஹிவிகடம், கி³ஹிஸந்தகம். ‘‘கி³ஹிவிகட’’ந்தி நீஹாரோ அபி⁴னீஹாரோ கி³ஹிவிகடனீஹாரோ, தேன. லப்³ப⁴ந்தீதி நிஸீதி³துமேவ லப்³ப⁴ந்தி. தத்ராபீதி த⁴ம்மாஸனேபி.

அவிஸ்ஸஜ்ஜியவத்து²கதா²

321. ஏதானீதி க³ருப⁴ண்டா³னி. தத்தா²தி ராஸிவஸேன பஞ்சஸு ஸரூபவஸேன பஞ்சவீஸதியா க³ருப⁴ண்டே³ஸு. ஆக³ந்த்வா, ஆபு⁴ஸோ வா ரமந்தி ஏத்தா²தி ஆராமோ. தேஸம்யேவாதி புப்பா²ராமப²லாராமானமேவ. ‘‘ட²பிதோகாஸோ’’தி இமினா வத்து²ஸத்³த³ஸ்ஸ பூ⁴மிபே⁴த³த்த²ம் த³ஸ்ஸேதி. வஸதி ஆராமோ பதிட்ட²ஹதி ஏத்தா²தி ஆராமவத்து². தேஸு வாதி ஏத்த² வாஸத்³தே³ன நவபூ⁴மிபா⁴க³தோ அஞ்ஞஸ்ஸ போராணபூ⁴மிபா⁴க³ஸ்ஸபி ஆராமவத்து²பா⁴வம் விகப்பேதி. விஸேஸேன சதுஇரியாபதே² ஹரதி பவத்தேதி ஏத்தா²தி விஹாரோ. தஸ்ஸாதி விஹாரஸ்ஸ. சதுன்னம் மஞ்சானந்தி நித்³தா⁴ரணத்தே² ஸாமிவசனம். அஞ்ஞதரோ மஞ்சோ நாமாதி யோஜனா. ஏஸேவ நயோ ஸேஸேஸுபி. ‘‘லோஹேன கதா கும்பீ⁴’’தி இமினா லோஹகும்பீ⁴தி ஏத்த² மஜ்ஜே²லோபஸமாஸம் த³ஸ்ஸேதி. லோஹமயா கும்பீ⁴ லோஹகும்பீ⁴தி வசனத்தோ²பி யுஜ்ஜதேவ. ‘‘ஏஸேவ நயோ’’தி இமினா லோஹேன கதம் பா⁴ணகம், லோஹேன கதோ வாரகோ, லோஹேன கதம் கடாஹந்தி அத்த²ம் அதிதி³ஸதி. ஏத்தா²தி பா⁴ணகவாரககடாஹேஸு. அரஞ்ஜரோதி அதிமஹந்தத்தா அரம் கி²ப்பம் ஜரதி வினாஸேதீதி அரஞ்ஜரோ. அத² வா ஜலம் க³ண்ஹிதும் அலந்தி அரஞ்ஜரோ லகாரானம் ரகாரே கத்வா.

கா³தா²வஸேன நிக³மனம் த³ஸ்ஸேந்தோ ஆஹ ‘‘ஏவ’’ந்திஆதி³. தத்த² ஏவம் பகாஸயீதி ஸம்ப³ந்தோ⁴. த்³வே க³ருப⁴ண்டா³னி த்³விஸங்க³ஹானி ஹோந்தி, ததியம் க³ருப⁴ண்ட³ம் சதுஸங்க³ஹம் ஹோதி, சதுத்த²ம் க³ருப⁴ண்ட³ம் நவகோட்டா²ஸம் ஹோதி, பஞ்சமம் க³ருப⁴ண்ட³ம் அட்ட²பே⁴த³னம் ஹோதி, இதி இமினா பகாரேன பஞ்சனிம்மலலோசனோ நாதோ² பஞ்சஹி ராஸீஹி பஞ்சவீஸவித⁴ம் க³ருப⁴ண்ட³ம் பகாஸயீதி யோஜனா.

தத்ராதி க³ருப⁴ண்டே³. ஹீதி வித்தா²ரோ. ஸப்³ப³ம்பி இத³ம் க³ருப⁴ண்ட³ம் அவிஸ்ஸஜ்ஜியந்தி வுத்தந்தி யோஜனா. இதா⁴தி இமஸ்மிம் வத்து²ஸ்மிம். பரிவாரே பன ஆக³தந்தி ஸம்ப³ந்தோ⁴.

பஞ்ச ராஸயோ மஹேஸினா வுத்தாதி யோஜனா. ஏத்தா²தி பரிவாரே.

தத்ராதி ‘‘பரிவத்தனவஸேனா’’தி வசனே. இத³ம் க³ருப⁴ண்ட³ம் உபனேதுந்தி ஸம்ப³ந்தோ⁴. நிச்சம் திட்ட²ந்தீதி தா²வரா, டா²தா⁴து வரபச்சயோ, டா²காரஸ்ஸ தா²காரோ. இமினா ஆராமஆராமவத்து²விஹாரவிஹாரவத்தூ²னி க³ஹேதப்³பா³னி. அவிஸ்ஸஜ்ஜியஅவேப⁴ங்கீ³யத்தா க³ரு அலஹுகம் ப⁴ண்ட³ம் க³ருப⁴ண்ட³ம். இமினா மஞ்சாதீ³னி ஏகவீஸதி க³ருப⁴ண்டா³னி க³ஹேதப்³பா³னி. தா²வரேதி ஆதா⁴ரே பு⁴ம்மம், பரியாபன்னந்தி ஸம்ப³ந்தோ⁴. அத² வா நித்³தா⁴ரணே பு⁴ம்மம், தா²வரேஸூதி ஹி அத்தோ², கே²த்தந்திஆதீ³ஸு ஸம்ப³ந்தி⁴தப்³ப³ம். கி²பதி புப்³ப³ண்ணபீ³ஜமேத்தா²தி கே²த்தம். வஸதி அபரண்ணபீ³ஜம் பதிட்டா²தி ஏத்தா²தி வத்து², தலே பூ⁴மிபா⁴கே³ ஏகதோ வா த்³வீஹி வா தீஹி வா டா²னேஹி ஆவரணம் கரீயதி ஏத்தா²தி தளாகோ, ஸரோ. கஸ்ஸகானம் மதேன கத்தப்³பா³தி மாதிகா. ஆராமேன பரிவத்தேதுந்தி ஸம்ப³ந்தோ⁴. கானி பரிவத்தேதுந்தி ஆஹ ‘‘இமானி சத்தாரிபீ’’தி. பிஸத்³தோ³ அவயவஸம்பிண்ட³னோ.

தத்ராதி ‘‘பரிவத்தேதும் வட்டதீ’’தி வசனே. தூ³ரேதி ஸங்கா⁴ராமதோ தூ³ரட்டா²னே. யம்பீதி நாளிகேரப²லம்பி. ஹரந்தீதி ஸங்க⁴ஸ்ஸ ஹரந்தி. அஞ்ஞேஸந்தி ஸங்க⁴தோ அஞ்ஞேஸம் மனுஸ்ஸானந்தி ஸம்ப³ந்தோ⁴. தேதி மனுஸ்ஸா. ஸங்கே⁴ன ஸம்படிச்சி²தப்³போ³தி ஸம்ப³ந்தோ⁴. ருச்சதீதி ஸங்க⁴ஸ்ஸாராமேன மனுஸ்ஸானமாராமம், மனுஸ்ஸானமாராமேன வா ஸங்க⁴ஸ்ஸாராமம் பரிவத்தேதும் ருசீயதி இச்சீ²யதி. பி⁴க்கூ²னம் ஆராமோதி ஸம்ப³ந்தோ⁴. அயந்தி மனுஸ்ஸானமாராமோ. கு²த்³த³கோதி ஸங்கா⁴ராமதோ கு²த்³த³கோ. ஆயந்தி அயதி ஆயஸாமிகோ த⁴னேன வட்³டி⁴ம் க³ச்ச²தி அனேனாதி ஆயோ, தம். ஸமகமேவாதி ஸமப்பமாணமேவ, ஆயம் ஸசே தே³தீதி ஸம்ப³ந்தோ⁴. பமாணத்தே² கபச்சயோ. மனுஸ்ஸானம் ருக்கா²தி ஸம்ப³ந்தோ⁴. அதிரேகம் ஸங்க⁴ஸ்ஸ தே³மாதி ஸம்ப³ந்தோ⁴. ஜானாபேத்வாதி ‘‘ஸங்கே⁴ தி³ன்னம் மஹப்ப²ல’’ந்தி (ம. நி. 3.376) ஸங்க⁴ஸ்ஸ தி³ன்னதா³னஸ்ஸ ஆனிஸம்ஸம் மனுஸ்ஸானம் ஜானாபேத்வா. ப²லதா⁴ரினோ ஹோந்தி நனூதி யோஜனா. ஏவந்திஆதி³ நிக³மனம். ஏதேனேவ நயேனாதி யேன நயேன ஆராமோ ஆராமேன பரிவத்தேதப்³போ³, ஏதேனேவ நயேன. மஹந்தேன வா கு²த்³த³கேன வா ஆராமவத்து²னா சாதி யோஜனா. ஆராம ஆராமவத்து²விஹாரவிஹாரவத்தூ²னி பரிவத்தேதப்³பா³னீதி ஸம்ப³ந்தோ⁴.

உபோ⁴பீதி கே³ஹபாஸாத³வஸேன உபோ⁴பி. தத்தா²தி கே³ஹே. இத³ம் பனாதி பாஸாத³ஸங்கா²தம் கே³ஹம், மனுஸ்ஸானம் கே³ஹந்தி ஸம்ப³ந்தோ⁴. மஹக்³கே⁴ன வா அப்பக்³கே⁴ன வா விஹாரவத்து²னா சாதி யோஜனா. விஹாரவிஹாரவத்து²ஆராமஆராமவத்தூ²னி பரிவத்தேதப்³பா³னீதி ஸம்ப³ந்தோ⁴. ஏவந்திஆதி³ நிக³மனம்.

க³ருப⁴ண்டே³ன க³ருப⁴ண்ட³பரிவத்தனே ஏவம் வினிச்ச²யோ வேதி³தப்³போ³தி யோஜனா. பம்ஸ்வாகா³ரகேஸூதி பம்ஸுகீளனத்தா²ய கதேஸு அகா³ரகேஸு. கப்பியமஞ்சாதி ஸங்க⁴க³ணபுக்³க³லானம் கப்பியா ஸுவண்ணரஜதாதீ³ஹி அகதா மஞ்சா. விஹாரஸ்ஸ பன ஸுவண்ணரஜதமயாதி³காபி கப்பியா மஞ்சா தா³தப்³பா³தி ஸம்ப³ந்தோ⁴. ப³ஹிஸீமாயாதி உபசாரஸீமதோ ப³ஹி. தத்தா²தி ஸங்க⁴த்தே²ரஸ்ஸ வஸனட்டா²னே. தத்தா²தி தஸ்ஸ பி⁴க்கு²னோ வஸனட்டா²னே. ‘‘மஹக்³கே⁴னா’’தி வுத்தவசனம் நியமேந்தோ ஆஹ ‘‘ஸதக்³க⁴னகேன வா ஸஹஸ்ஸக்³க⁴னகேன வா’’தி. மஞ்சஸதந்தி மஞ்சப³ஹும். ஏதேஸுபீதி பீட²பி⁴ஸிபி³ப்³போ³ஹனேஸுபி. தத்தா²தி பீட²பி⁴ஸிபி³ப்³போ³ஹனேஸு. கப்பியம் பீடா²தீ³தி ஸம்ப³ந்தோ⁴. அகப்பியம் வா மஹக்³க⁴ம் கப்பியம் வாதி கப்பியேன வா மஹக்³க⁴கப்பியேன வா பரிவத்தேத்வாதி ஸம்ப³ந்தோ⁴. ‘‘வுத்தவத்தூ²னீ’’தி பத³ம் ‘‘பரிவத்தேத்வா’’தி பதே³ அவுத்தகம்மம், ‘‘க³ஹேதப்³பா³னீ’’தி பதே³ வுத்தகம்மம், புப்³பா³பராபேக்க²பத³ம்.

பஸதமத்தஉத³கக³ண்ஹகானிபீதி ஏத்த² பஸதோ நாம குஞ்சிதபாணி. ஸீஹளதீ³பேதி ஸீஹம் லாதி க³ண்ஹாதீதி ஸீஹளோ லகாரஸ்ஸ ளகாரம் கத்வா, ஸீஹபா³ஹுனாமகோ ராஜா, தஸ்ஸ புத்தத்தா விஜயகுமாரோபி ஸீஹளோ நாம, தேன ஆதி³ம்ஹி நிவாஸபா⁴வேன க³ஹிதத்தா தீ³போ ஸீஹளதீ³போ நாம, தஸ்மிம். பாத³ம் க³ண்ஹாதீதி பாத³க³ண்ஹனோ, ஸோயேவ பாத³க³ண்ஹனகோ. பாதோ³ நாமாதி ‘‘பாத³க³ண்ஹனகோ’’தி ஏத்த² பாதோ³ நாம. யோ லோஹவாரகோ மக³த⁴னாளியா பஞ்சனாளிமத்தம் க³ண்ஹாதி, ஸோ லோஹவாரகோ பாதோ³ நாமாதி யோஜனா. இமினா பமாணஸ்ஸ நாமம் பமாணவந்தே உபசாரதோ வோஹாரனயம் த³ஸ்ஸேதி. ததோதி பஞ்சனாளிமத்தக³ண்ஹனகவாரகதோ. இமானீதி லோஹகும்பீ⁴ஆதீ³னி.

பி⁴ங்கா³ர …பே… கடச்சு²ஆதீ³னீதி பி⁴ங்கா³ரோ ச படிக்³க³ஹோ ச உளுங்கோ ச த³ப்³பி³ ச கடச்சு² ச பாதி ச தட்டகோ ச ஸரகோ ச ஸமுக்³கோ³ ச அங்கா³ரகபல்லோ ச தூ⁴மகடச்சு² ச பி⁴ங்கா³ர…பே… தூ⁴மகடச்சு²யோ, தா ஆதி³ யேஸம் தானீதி பி⁴ங்கா³ர…பே… கடச்சு²ஆதீ³னி. ஆதி³ஸத்³தே³ன அஞ்ஞானி உபகரணானி க³ஹேதப்³பா³னி. பா⁴ஜனீயானீதி பா⁴ஜேதப்³பா³னி. கம்ஸலோஹாதீ³திஆதி³ஸத்³தே³ன வட்டலோஹம் ஸங்க³ண்ஹாதி. வட்டலோஹம் நாம பீதலோஹம். ஹீதி ஸச்சம், யஸ்மா வா. பாரிஹாரியந்தி ஸங்கி⁴கபரிபோ⁴க³ம் பரிஹரித்வா அபனேத்வா புக்³க³லிகபரிபோ⁴கே³ன பரிபு⁴ஞ்ஜனம், ‘‘அத்தஸந்தக’’ந்தி வா பரிக்³க³ஹேன ஹரித்வா பு⁴ஞ்ஜனம் ந வட்டதி. கி³ஹிவிகடனீஹாரேனேவாதி ‘‘கி³ஹிவிகட’’ந்தி அபி⁴னீஹாரேனேவ.

அஞ்ஞஸ்மிம்பி கப்பியலோஹப⁴ண்டே³ பரியாபன்னா அஞ்ஜனீதி யோஜனா. அத² வா கப்பியலோஹப⁴ண்டே³தி நித்³தா⁴ரணே பு⁴ம்மம், ‘‘அஞ்ஜனீ’’திஆதி³னா ஸம்ப³ந்தி⁴தப்³ப³ம். ஸூசீதி சீவராதி³ஸிப்³ப³னகா ஸூசி. பண்ணஸூசீதி பண்ணே லிக²னா ஸூசி. அஞ்ஞம்பீதி அஞ்ஜனிஆதி³தோ அஞ்ஞம்பி. தூ⁴மனேத்தஞ்ச பா²லஞ்ச தீ³பருக்கோ² ச தீ³பகபல்லகோ ச ஓலம்ப³கதீ³போ ச தூ⁴மனேத்த…பே… ஓலம்ப³கதீ³பா. இத்தி²புரிஸதிரச்சா²னக³தஸங்கா²தானி ரூபானி ஏதேஸு அத்தீ²தி இத்தி²புரிஸதிரச்சா²னக³தரூபகானி. தூ⁴மனேத்த…பே… ஓலம்ப³கதீ³பா ச தே இத்தி²புரிஸதிரச்சா²னக³தரூபகானி சேதி தூ⁴மனேத்த…பே… ரூபகானி, விஸேஸனபரனிபாதோ. தானி வா அஞ்ஞானி வா பி⁴த்திச்ச²த³னகவாடாதீ³ஸு உபனேதப்³பா³னி லோஹப⁴ண்டா³னீதி ஸம்ப³ந்தோ⁴. லோஹகி²லகந்தி லோஹமயம் ஆணிம். பரிஹரித்வாதி ‘‘அத்தனோ ஸந்தக’’ந்தி பரிக்³க³ஹேன ஹரித்வா, ஸங்கி⁴கபரிபோ⁴க³கி³ஹிவிகடானி வா அபனேத்வா. கீ²ரபாஸாணமயானீதி கீ²ரவண்ணேன பாஸாணேன கதானி.

ஸுவண்ணஞ்ச ரஜதஞ்ச ஹாரகூடஞ்ச ஜாதிப²லிகஞ்ச ஸுவண்ண…பே… ஜாதிப²லிகானி, தேஹி கதானி பா⁴ஜனானி ஸுவண்ண…பே… பா⁴ஜனானி. ஸப்³ப³ந்தி ஸுவண்ணரஜதாதி³ஸப்³ப³ம். வட்டதீதி ஸங்க⁴க³ணபுக்³க³லானம் வட்டதி.

வாஸிஆதீ³ஸு ஏவம் வினிச்ச²யோ வேதி³தப்³போ³தி யோஜனா, நித்³தா⁴ரணே வா பு⁴ம்மம். யாய வாஸியா ந ஸக்காதி ஸம்ப³ந்தோ⁴. ததோதி வாஸிதோ. மஹத்தரீஸத்³தோ³ மஹந்தபரியாயோ அனிப்ப²ன்னபாடிபதி³கோ. மஹத்தரீ வாஸீதி ஸம்ப³ந்தோ⁴. வேஜ்ஜானந்தி பி⁴ஸக்கானம். ஸிராவேத⁴னப²ரஸுபீதி பிஸத்³தே³ன ததோ மஹந்தம் பன பகே³வாதி த³ஸ்ஸேதி. யா பன குடா²ரீ ஆவுத⁴ஸங்கே²பேன கதாதி ஸம்ப³ந்தோ⁴. அத² வா ஆவுத⁴ஸங்கே²பேன கதா யா பன குடா²ரீ அத்தீ²தி யோஜனா. அனாமாஸாதி அனாமஸிதப்³பா³, அனாமாஸாரஹாதி அத்தோ². சதுரங்கு³லமத்தோபீதி பிஸத்³தோ³ ததோ அதி⁴கோ பன பகே³வாதி த³ஸ்ஸேதி. நிக²ணித்வா கா²த³தீதி நிகா²த³னம். சதுரஸ்ஸம் முக²மேதஸ்ஸாதி சதுரஸ்ஸமுக²ம். தோ³ணிஸதி³ஸம் முக²மேதஸ்ஸாதி தோ³ணிமுக²ம். ஸம்முஞ்சனித³ண்ட³வேத⁴னம்பி நிகா²த³னம் த³ண்ட³ப³த்³த⁴ம் ஹோதி சேதி யோஜனா. த³ண்டே³ன ப³ந்தி⁴தப்³ப³ந்தி த³ண்ட³ப³த்³த⁴ம், த³ண்ட³ம் ப³த்³த⁴மேதஸ்ஸாதி வா த³ண்ட³ப³த்³த⁴ம். ‘‘அத³ண்ட³க’’ந்தி வத்வா தஸ்ஸேவத்த²ம் த³ஸ்ஸேதும் வுத்தம் ‘‘ப²லமத்தமேவா’’தி. நத்தி² த³ண்ட³மேதஸ்ஸாதி அத³ண்ட³கம். யந்தி நிகா²த³னம். பரிஹரிதுந்தி புக்³க³லிகபா⁴வேன பரிக்³க³ஹேத்வா ஹரிதும், ஸங்கி⁴கபா⁴வம் அபனேதும் வா. ஸிக²ரம்பி நிகா²த³னேனேவ ஸங்க³ஹிதம் லக்க²ணஹாரனயேன ஸமானகிச்சபா⁴வதோ. ஸிக²ரந்தி யேன பரிப்³ப⁴மித்வா சி²ந்த³ந்தி, யேஹி மனுஸ்ஸேஹி தி³ன்னானீதி ஸம்ப³ந்தோ⁴. தேதி மனுஸ்ஸா, வத³ந்தீதி ஸம்ப³ந்தோ⁴. நோதி அம்ஹாகம். பாகதிகேதி பகதியா டி²தே, யதா² பட²மம் டி²தா ஹோந்தி, ததா² கரிஸ்ஸாமாதி அத்தோ². ஸசே ஆஹரந்தீதி ஸசே ஆயாசனம் அகத்வா ஹரந்தி. அனாஹரந்தாபீதி புன அனாஹரந்தாபி.

கம்மாரோ ச தட்டகாரோ ச சுந்த³காரோ ச நளகாரோ ச மணிகாரோ ச பத்தப³ந்த⁴கோ ச கம்மார…பே… பத்தப³ந்த⁴கா, தேஸம். அதி⁴கரணீ ச முட்டி²கோ ச ஸண்டா³ஸோ ச துலா ச அதி⁴கரணி…பே… துலா. ஸங்கே⁴ தி³ன்னகாலதோதி ஸங்க⁴ஸ்ஸ தி³ன்னகாலதோ. திபும் சி²ந்த³தி அனேனாதி திபுச்சே²த³னம், தமேவ ஸத்த²கம் திபுச்சே²த³னஸத்த²கம். மஹாகத்தரிஞ்ச மஹாஸண்டா³ஸஞ்ச மஹாபிப்பி²லிகஞ்ச ட²பேத்வாதி யோஜனா. கஸ்மா ட²பிதானீதி ஆஹ ‘‘மஹாகத்தரிஆதீ³னி க³ருப⁴ண்டா³னீ’’தி. தத்த² யஸ்மா மஹாகத்தரிஆதீ³னி க³ருப⁴ண்டா³னி, தஸ்மா ‘‘ட²பேத்வா மஹாகத்தரி’’ந்தி ஆதி³ மயா வுத்தந்தி யோஜனா.

வல்லிஆதீ³ஸு ஏவம் வினிச்ச²யோ வேதி³தப்³போ³தி யோஜனா. வேத்தவல்லிஆதி³காதி வேத்தஸங்கா²தவல்லிஆதி³கா. அட்³ட⁴ப³ஹுப்பமாணாதி ஏத்த² –

‘‘ப்³யாமோ ஸஹகரா பா³ஹு, த்³வேபஸ்ஸத்³வயவித்த²தா’’தி. –

அபி⁴தா⁴னே (அபி⁴தா⁴னப்பதீ³பிகாயம் 269 கா³தா²யம்) வுத்தத்தா பா³ஹு நாம இத⁴ ப்³யாமோவ அதி⁴ப்பேதோ. தஸ்மா த்³வீஸு பஸ்ஸேஸு வித்த²தானம் ப்³யாமஸங்கா²தானம் ஸஹகரானம் த்³வின்னம் பா³ஹூனம் அட்³டோ⁴தி அட்³ட⁴பா³ஹு, தஸ்ஸ பமாணமேதஸ்ஸாதி அட்³ட⁴பா³ஹுப்பமாணாதி வசனத்தோ² காதப்³போ³, தீ³க⁴தோ த்³விஹத்தா² வல்லீதி வுத்தம் ஹோதி. தத்த²ஜாதகாதி திஸ்ஸம் ஸங்க⁴ஸ்ஸ பூ⁴மியம் ஜாதகா. ரக்கி²தகோ³பிதாதி ஸங்கே⁴ன ஸயம் ரக்கி²தா, பரேஹி கோ³பிதா. இமினா அரக்கி²தஅகோ³பிதா க³ருப⁴ண்ட³ம் ந ஹோதீதி த³ஸ்ஸேதி. ஸாதி வல்லி. அதிரேகா ஹோதீதி ஸம்ப³ந்தோ⁴. உபனேதுந்தி தம் வல்லிம் உபனேதும். ஸுத்தஞ்ச மகசிவாகஞ்ச நாளிகேரஹீரஞ்ச சம்மஞ்ச ஸுத்த…பே… சம்மானி, தேஹி கதா ஸுத்த…பே… சம்மமயா. ரஜ்ஜுகா வா யோத்தானி வா க³ருப⁴ண்ட³ம் ஹோதீதி ஸம்ப³ந்தோ⁴. ஏகவட்டா வா த்³விவட்டா வாதி ஏத்த² வாஸத்³தே³ன திவட்டாதி³ம் ஸங்க³ண்ஹாதி. அவட்டேத்வா தி³ன்னம் ஸுத்தஞ்ச அவட்டேத்வா தி³ன்னா மகசிவாகனாளிகேரஹீரா சாதி யோஜனா.

யோ கோசி வேளூதி ஸம்ப³ந்தோ⁴. ஸோபீதி வேளுபி வட்டதீதி ஸம்ப³ந்தோ⁴. பிஸத்³தே³ன வல்லிம் அபேக்க²தி. இத³மேத்தா²தி இத³ம் ஸப்³ப³ம் ஏத்த² வேளும்ஹி, வேளூஸு வா இத³ந்தி ஸம்ப³ந்தோ⁴. ஸமகம் வாதி க³ஹிதவேளுனா ஸமப்பமாணம் வா. அதிரேகம் வாதி ததோ அதிரேகம் வா. தம்அக்³க⁴னகந்தி தஸ்ஸ வேளுனோ அக்³க⁴னாரஹம். பா²திகம்மந்தி வட்³டி⁴கம்மம். தத்தே²வாதி க³ண்ஹனட்டா²னேவ. க³மனகாலேதி க³ண்ஹனட்டா²னதோ அஞ்ஞத்த² க³மனகாலே. ‘‘பஹிணித்வா தா³தப்³போ³’’தி இமினா ஸயம் வா ஆக³ந்த்வா தா³தப்³போ³தி அத்தோ²பி லக்க²ணஹாரனயேன க³ஹேதப்³போ³ ஸமானகிச்சத்தா.

முஞ்ஜபப்³ப³ஜஸத்³தே³ன முஞ்ஜபப்³ப³ஜதிணானம் பாளியம் விஸும் க³ஹிதத்தா திணஸத்³தே³ன தானி ட²பேத்வா பாரிஸேஸஞாயேன அவஸேஸதிணமேவ க³ஹேதப்³ப³ந்தி த³ஸ்ஸேந்தோ ஆஹ ‘‘முஞ்ஜம் பப்³ப³ஜஞ்ச ட²பேத்வா’’திஆதி³. ஸமானப²லத்தா லக்க²ணஹாரனயேன பண்ணம்பி திணேனேவ ஸங்க³ஹிதந்தி த³ஸ்ஸேந்தோ ஆஹ ‘‘யத்தா²’’திஆதி³. தத்த² யத்தா²தி யஸ்மிம் டா²னே, இதீதி ஏவம். திணஞ்ச க³ருப⁴ண்ட³ம் ஹோதீதி ஸம்ப³ந்தோ⁴. தத்த²ஜாதகம் வாதி தஸ்மிம் ஸங்கா⁴ராமே ஜாதகம் வா. ப³ஹாராமேதி ஸங்கா⁴ராமதோ ப³ஹி. தம்பீதி திணம்பி. பிஸத்³தே³ன வல்லிவேளூ அபேக்க²தி. அட்ட²ங்கு³லப்பமாணோபீதி தீ³க⁴தோ அட்ட²ங்கு³லபமாணோபி. ரித்தபோத்த²கோதி அலிகி²தத்தா துச்சோ² மகசிவத்தா²தி³கோபி பண்ணமயோபி போத்த²கோ. இத³ஞ்ச பண்ணபஸங்கே³ன வுத்தம்.

பஞ்சவண்ணா வாதி நீலபீதலோஹிதோதா³தமஞ்ஜிட்ட²வஸேன பஞ்சவண்ணனா வா. தம்பீதி மத்திகம்பி. பிஸத்³தே³ன வல்லிவேளுதிணானி அபேக்க²தி.

தா³ருப⁴ண்டே³ ஏவம் வினிச்ச²யோ வேதி³தப்³போ³தி யோஜனா. ரக்கி²தகோ³பிதோ யோ கோசி தா³ருப⁴ண்ட³கோ அத்தீ²தி யோஜனா. மஹாஅட்ட²கதா²யம் பன வுத்தோதி ஸம்ப³ந்தோ⁴.

தத்ராதி மஹாஅட்ட²கதா²யம், ‘‘தேன கோ² பன ஸமயேனா’’தி பாளியம் வா. இமேஸூதி ஆஸந்தி³காதீ³ஸு. ஏத்தா²தி பீடே²ஸு, பலாலபீடே²னாதி ஸம்ப³ந்தோ⁴. ப்³யக்³க⁴சம்மஓனத்³த⁴ந்தி ப்³யக்³க⁴சம்மேன அவனத்³த⁴ம். வாளரூபபரிக்கி²த்தந்தி வாளரூபேஹி பரிவாரிதம். ரதனபரிஸிப்³பி³தந்தி ரதனஸுத்தேன ஸமந்ததோ ஸிப்³பி³தம்.

ஏதேஸுபீதி வங்கப²லகாதீ³ஸுபி. ‘‘ஸங்க²தா²லகம் பன பா⁴ஜனீய’’ந்தி பாட²ஸ்ஸானந்தரம் ‘‘ததா²’’தி பாடோ² அத்தி², ஸோ ஏத்த² ந யுஜ்ஜதி, பரதோ பன ‘‘யேன கேனசி கதம் க³ருப⁴ண்ட³மேவா’’தி பாட²ஸ்ஸானந்தரம் யுஜ்ஜதி. தத்த² ஹி யதா² யேன கேனசி கதம் க³ருப⁴ண்ட³மேவ ஹோதி, ததா² த²ம்ப⁴துலாஸோபானப²லகாதீ³ஸு தா³ருமயம் வா பாஸாணமயம் வா யம்கிஞ்சி கே³ஹஸம்பா⁴ரரூபம் க³ருப⁴ண்ட³மேவாதி அத்தோ².

ஸப்³ப³ந்தி ஸகலம் உத³கதும்ப³பாத³கத²லிகமண்ட³லம். ஏதேஸுபீதி ஆதா⁴ரகாதீ³ஸுபி. ததா² த²ம்ப⁴தலாதி ஏத்த² ததா²ஸத்³தே³ன ‘க³ருப⁴ண்ட³மேவா’’தி பத³ம் அதிதி³ஸதி. ஸங்கே⁴ தி³ன்னந்தி ஸங்க⁴ஸ்ஸ தி³ன்னம். பூ⁴மத்த²ரணந்தி பூ⁴மியம் அத்த²ரிதப்³ப³ம். தம்பீதி ஏளகசம்மம்பி.

உது³க்க²லம் க³ருப⁴ண்ட³மேவாதி ஸம்ப³ந்தோ⁴. ஏஸேவ நயோ முஸலந்திஆதீ³ஸுபி. ஏதேஸூதி மஞ்சபாதா³தீ³ஸு. அனுஞ்ஞாதவாஸியாதி பா⁴ஜனத்தா²ய அனுஞ்ஞாதவாஸியா. த⁴மகரணோதி ஏத்த² ‘‘ஸங்க²ம் த⁴மதி, ஸங்க²த⁴மகோ’’திஆதீ³ஸு விய நிஸ்ஸம்யோக³பாடோ²யேவ யுஜ்ஜதி. தஸ்மா த⁴மதி வாதேன பவத்ததீதி த⁴மோ, வாதஹேதுகோ ஸத்³தோ³, த⁴மம் கரோதீதி த⁴மகரணோதி வசனத்தோ² காதப்³போ³. ஸப்³ப³மேதந்தி அனுஞ்ஞாதவாஸித³ண்டா³தி³கம் ஏதம் ஸப்³ப³ம். ததோதி அனுஞ்ஞாதவாஸித³ண்டா³தி³கதோ, மஹந்ததரம் வாஸித³ண்டா³தி³கம் க³ருப⁴ண்ட³ந்தி யோஜனா.

யதா²ஜாதமேவாதி யதா²பவத்தமேவ. தேஹீதி ஹத்தி²த³ந்தாதீ³ஹி, ‘‘கத’’இதி பதே³ன ஸம்ப³ந்தி⁴தப்³ப³ம். தச்சி²தனிட்டி²தோபீதி தச்சி²தகம்மேன நிட்டி²தோபி.

மத்திகாப⁴ண்டே³ ஏவம் வினிச்ச²யோ வேதி³தப்³போ³தி யோஜனா, உபபோ⁴கோ³ ச பரிபோ⁴கோ³ ச உபபோ⁴க³பரிபோ⁴க³ம், ஸமாஹாரத்³வந்தோ³. இத³ம் பத³ம் ‘‘க⁴டபிதா⁴னாதி³குலாலபா⁴ஜன’’ந்தி பதே³னேவ ஸம்ப³ந்தி⁴தப்³ப³ம். து²பிகாதீதி ஏத்த² இதிஸத்³தோ³ இமஸத்³த³த்தோ². இத³ம் ஸப்³ப³ம் ஸங்க⁴ஸ்ஸ தி³ன்னகாலதோ பட்டா²ய க³ருப⁴ண்ட³ந்தி யோஜனா. ‘‘அனதிரித்தபமாணோ’’தி விஸேஸனபத³ம் ‘‘க⁴டகோ’’தி விஸேஸ்யபதே³னேவ ஸம்ப³ந்தி⁴தப்³ப³ம். ஏத்தா²தி மத்திகாப⁴ண்டே³, ஆதா⁴ரே வா நித்³தா⁴ரணே வா த்த² பச்சயோ. மத்திகாப⁴ண்டே³ குண்டி³கா பா⁴ஜனீயகோட்டா²ஸம் ப⁴ஜதி, ஏவம் லோஹப⁴ண்டே³பீதி யோஜனா. ஏத்தா²தி க³ருப⁴ண்ட³வினிச்ச²யே.

நவகம்மதா³னகதா²

323. ப⁴ண்டி³காட்ட²பனமத்தேனாதி ஏத்த² ப⁴ண்டி³காட்ட²பனம் நாம ப⁴ண்டி³கயோஜனந்தி ஆஹ ‘‘கபோதப⁴ண்டி³கயோஜனமத்தேனா’’தி. அஸ்ஸாதி பி⁴க்கு²ஸ்ஸ. சிதகதூ⁴மோதி சிதகே உட்டி²தோ தூ⁴மோ. ஏதஸ்ஸேவாதி பி⁴க்கு²ஸ்ஸ ஏவ விஹாரோதி ஸம்ப³ந்தோ⁴. தூ⁴மகாலேதி தூ⁴மஸ்ஸ உட்டி²தகாலே. ‘‘அபலோகேத்வா’’தி இமினா தூ⁴மகாலே அபலோகிதம் தூ⁴மகாலிகம். தூ⁴மகாலிகம் ஹுத்வாதி அத்த²யோஜனம் கத்வா பாளியம் ‘‘பரியோஸிதவிஹார’’ந்தி பதே³ன ஸம்ப³ந்தி⁴தப்³ப³பா⁴வம் த³ஸ்ஸேதி. கதபரியோஸிதவிஹாரந்தி கதபரியோஸிதோ விஹாரோ இமஸ்ஸ நவகம்மஸ்ஸாதி கதபரியோஸிதவிஹாரம். இத³ம் நவகம்மம் தே³ந்தீதி ஸம்ப³ந்தோ⁴. யாவ கோ³பானஸியோ ந ஆரோஹந்தி, தாவ விப்பகதோ நாமாதி யோஜனா. ததோதி கோ³பானஸிஆரோஹனதோ. கஞ்சிதே³வ ஸமாத³பேத்வா காரேஸ்ஸதீதி விஹாரஸாமிகோயேவ கஞ்சி பி⁴க்கு²ம்ஸமாத³பேத்வா காரேஸ்ஸதி. பஞ்சஹத்தே² விஹாரேதி ஸம்ப³ந்தோ⁴. ச²வஸ்ஸிகம் நவகம்மந்தி ஸம்ப³ந்தோ⁴. ஏத்தா²தி அட்³ட⁴யோகே³. ஸோதி அட்³ட⁴யோகோ³. மஹல்லகம் நியாமேத்வா த³ஸ்ஸேந்தோ ஆஹ ‘‘த³ஸஹத்தே² ஏகாத³ஸஹத்தே²’’தி. த³ஸவஸ்ஸிகம் வா ஏகாத³ஸவஸ்ஸிகம் வா நவகம்மந்தி ஸம்ப³ந்தோ⁴. ததோதி த்³வாத³ஸஹத்த²தோ. லோஹபாஸாத³ஸதி³ஸேபி பாஸாதே³தி ஸம்ப³ந்தோ⁴. ததோதி த்³வாத³ஸவஸ்ஸிகனவகம்மதோ.

நவகம்மிகோதி நவகம்மே யுத்தபயுத்தோ. உதுகாலேதி ஹேமந்தகி³ம்ஹகாலே. படிபா³ஹிதுந்தி அஞ்ஞேஸம் ஸம்பத்தபி⁴க்கூ²னம் படிஸேதே⁴தும். ஆவாஸஸாமிகஸ்ஸாதி ஆவாஸதா³யகஸ்ஸ. தஸ்ஸாதி ஆவாஸஸாமிகஸ்ஸ. வம்ஸேதி அன்வயே. தேதி தவ. ஸோதி ஆவாஸஸாமிஆதி³கோ. பி⁴க்கூ²ஹி ஜக்³கி³தப்³போ³தி ஸம்ப³ந்தோ⁴. தேபீதி ஞாதிஉபட்டா²காபி. தஸ்மிம்பீதி ஸங்கி⁴கபச்சயேபி. ப³ஹூ ஆவாஸேதி ஸம்ப³ந்தோ⁴. ஏகம் ஆவாஸந்தி யோஜனா.

ஏகம் வா ஆவாஸந்தி ஸம்ப³ந்தோ⁴. ததோதி விஸஜ்ஜிதாவாஸேஹி, உப்பன்னானீதி ஸம்ப³ந்தோ⁴. குருந்தி³யம் பன வுத்தம், கிந்தி வுத்தந்தி யோஜனா. ஏகம் மஞ்சட்டா²னம் க³ஹேத்வாதி ஏகம் மஞ்சட்டா²னம் புக்³க³லிகபா⁴வேன க³ஹேத்வா. திபா⁴க³ந்தி ததியபா⁴க³ம். அயமேவ வா பாடோ². ஏத்தா²தி நட்ட²விஹாரே. புக்³க³லிகமேவாதி புக்³க³லிகம் ஏவ, புக்³க³லிகம் இவ வா. ஜக்³கா³தி ஜக்³கா³ஹி. ஹீதி ப²லஜோதகோ. ஏவம் ஜக்³கி³தோ பனாதி ஏவம் ஜக்³கி³தோ விஹாரோ பன. தஸ்மிந்தி ஜக்³க³ந்தே. ஸத்³தி⁴விஹாரிகாதீ³னம் தா³துகாமோ ஹோதீதி ஸங்க⁴ஸ்ஸ ப⁴ண்ட³ட்ட²பனம் வா நவகானம் வஸனட்டா²னம் வா அத³த்வா அத்தனோயேவ ஸத்³தி⁴விஹாரிகாதீ³னம் தா³துகாமோ ஹோதி. ஸத்³தி⁴விஹாரிகாதீ³னம் தா³தும் லப்³ப⁴தீதி ஸப்³ப³விஹாரம் புக்³க³லிகபா⁴வேன அக்³க³ஹேத்வா ஏகதே³ஸஸ்ஸேவ க³ஹிதத்தா ஸத்³தி⁴விஹாரிகாதீ³னம் தா³தும் லப்³ப⁴தீதி அத்தோ². ஜக்³கா³பேதப்³போ³ இதி வுத்தந்தி யோஜனா. ஏத்த² ‘‘வுத்த’’ந்தி பாடோ² அத்தி², ஸோ அபாடோ²யேவ ‘‘குருந்தி³யம் பன வுத்த’’ந்தி பத³ஸ்ஸ ஆகாரத்தா.

அஞ்ஞம் இத³ம்பி ச வக்க²மானவசனம் தத்தே²வ குருந்தி³யம் வுத்தந்தி யோஜனா. கிந்தி வுத்தந்தி ஆஹ ‘‘த்³வே பி⁴க்கூ²’’திஆதி³. த்³வே பி⁴க்கூ² கரோந்தீதி ஸம்ப³ந்தோ⁴. யேனாதி பி⁴க்கு²னா. ஸோயேவ ஸாமீதி யேன ஸா பூ⁴மி பட²மம் க³ஹிதா, ஸோயேவ ஸாமீதி அத்தோ². பதிரூபே டா²னேதி பதிரூபே ஸேனாஸனட்டா²னே. தந்தி புக்³க³லிககரணம். யம் பன வயகம்மந்தி யோஜனா. ஏத்த² ச வயகம்மந்தி தஸ்மிம் விஹாரே கதஸ்ஸ கம்மஸ்ஸ மூலம். விஹாரஸ்ஸ மூலம் தா³தப்³ப³ந்தி வுத்தம் ஹோதி. தஸ்ஸாதி ஸங்கி⁴கம் கரோந்தஸ்ஸ. தத்தே²வாதி கதவிஹாரே ஏவ. கதாவாஸேதி ஸமீபத்தே² பு⁴ம்மவசனம், கதாவாஸஸமீபேதி வுத்தம் ஹோதி. சா²யூபக³ப²லூபகா³தி சா²யம் உபக³ச்ச²ந்தா ச ப²லம் உபக³ச்ச²ந்தா ச, சா²யாப²லானி உபஹரந்தாதி அத்தோ². அபலோகேத்வாதி ஸங்க⁴ம் அபலோகேத்வா. ஸாமிகாதி ருக்க²ஸாமிகா. ஹாரேதப்³பா³தி அபனேதப்³பா³.

‘‘ஸங்கி⁴கவல்லிமத்தம்பி அக்³க³ஹேத்வா’’தி இமினா ஸங்கி⁴கம் க³ஹேத்வா ஸங்கி⁴காய பூ⁴மியா ஸசே விஹாரம் கரோதி, ஸங்கி⁴கமேவாதி த³ஸ்ஸேதி. த்³விபூ⁴மகதிபூ⁴மகாதீ³ஸு பாஸாதே³ஸு உபட்³ட⁴பா⁴க³ம் த³ஸ்ஸேந்தோ ஆஹ ‘‘பாஸாதோ³ சேவ ஹோதீ’’திஆதி³. உபரி பாஸாதோ³தி ஸம்ப³ந்தோ⁴. ஸோதி விஹாரகாரகோ பி⁴க்கு², தஸ்ஸ ஹேட்டா²பாஸாதோ³தி ஸம்ப³ந்தோ⁴. விஹாரேதி ஸங்கி⁴கவிஹாரே, விஹாரஸமீபேதி அத்தோ². அகதட்டா²னேதி சயபமுகா²னம் அகதபுப்³ப³ட்டா²னே. சயம் வா பமுக²ம் வாதி ஸங்கி⁴கவிஹாரஸ்ஸ சயம் வா பமுக²ம் வா. ப³ஹிகுட்டேதி குட்டஸ்ஸ, குட்டதோ வா ப³ஹி. தஸ்ஸாதி சயபமுக²காரகஸ்ஸ பி⁴க்கு²ஸ்ஸ ஹோதீதி ஸம்ப³ந்தோ⁴. விஸமம் பப்³ப³தகந்த³ராதி³ந்தி ஸம்ப³ந்தோ⁴. அபதே³தி ஸுகரஸ்ஸ அகாரணே. கதம் ஹோதீதி சயம் வா பமுக²ம் வா கதம் ஹோதி. தத்தா²தி சயபமுகே²ஸு, ஸங்கோ⁴ அனிஸ்ஸரோ இதி வுத்தந்தி யோஜனா.

வரஸேய்யம் க³ஹேதுந்தி ஸம்ப³ந்தோ⁴.

புன ஆக³ந்த்வாதி பக்கமித்வா புன ஆக³ந்த்வா. தஸ்ஸாதி நவகம்மகா³ஹகஸ்ஸ பி⁴க்கு²ஸ்ஸ. ஏதந்தி ஸேனாஸனம்.

அஞ்ஞத்ரபரிபோ⁴க³படிக்கே²பாதி³கதா²

324. நாதிஹரந்தீதி ஏத்த² அதிஸத்³தோ³ ஹரணத்தோ², ஹரஸத்³தோ³ பரிபு⁴ஞ்ஜனத்தோ²தி ஆஹ ‘‘அஞ்ஞத்ர ஹரித்வா ந பரிபு⁴ஞ்ஜந்தீ’’தி. யம் மஞ்சபீடா²தீ³தி யோஜனா. தத்தா²தி உந்த்³ரியமஹாவிஹாரே. தந்தி மஞ்சபீடா²தி³ம். தஸ்மாதி யஸ்மா அனுஜானாதி, தஸ்மா. தந்தி மஞ்சபீடா²தி³ம். அஞ்ஞத்ராதி அஞ்ஞம் விஹாரம். அரோக³ந்தி அனட்டா²ஜிண்ணத்தா அரோக³ம். தஸ்மிம் விஹாரேதி உந்த்³ரியவிஹாரே. தஸ்மிந்தி உந்த்³ரியவிஹாரே. ததோதி உந்த்³ரியவிஹாரதோ. ஸுயோஜிதானீதி ஸுட்டு² யோஜிதானி. மூலதா³னம் வா படிபாகதிகம் வா நத்தீ²தி அதி⁴ப்பாயோ. ச²ட்³டி³தவிஹாரதோதி பி⁴க்கூ²ஹி அனபேக்கே²ன ச²ட்³டி³தஸங்கி⁴கவிஹாரதோ ச புக்³க³லேன ஸாபேக்கே²ன ச²ட்³டி³தபுக்³க³லிகவிஹாரதோ ச. ஆவாஸிககாலேதி ஆவாஸிகானம் டி²தகாலே. ததோதி ச²ட்³டி³தவிஹாரதோ.

பா²திகம்மத்தா²யாதி ஏத்த² பா²திஸத்³தோ³ வட்³ட⁴னத்தோ²தி ஆஹ ‘‘வட்³டி⁴கம்மத்தா²யா’’தி. ஏத்தா²தி ‘‘பா²திகம்மத்தா²யா’’தி பாடே².

சக்கலிகந்தி சக்காகாரேன லாதி பவத்ததி, சக்காகாரம் வா லாதி க³ண்ஹாதீதி சக்கலம், ததே³வ சக்கலிகம், பாத³புஞ்ஜனம், ‘‘கம்ப³லாதீ³ஹி வேடே²த்வா கத’’ந்தி இமினா தஸ்ஸ கரணாகாரம் த³ஸ்ஸேதி. யேஹீதி பாதே³ஹி. உத³கந்தி ஸேனாஸனஸ்ஸ திந்தகம் உத³கம். உத³கம் ந பஞ்ஞாயதீதி யோஜனா. ஸஉபாஹனேன அக்கமிதும் ந வட்டதீதி யோஜனா.

ஸுதா⁴பூ⁴மியந்தி ஸுதா⁴ய லித்தாயம் பூ⁴மியம். பரிப⁴ண்ட³பூ⁴மியந்தி கோ³மயகஸாவபரிப⁴ண்ட³பூ⁴மியம். பாதா³தி மஞ்சபாதா³. தஸ்மிந்தி சோளகே. ட²பேந்தஸ்ஸாதி மஞ்சபாதே³ ட²பேந்தஸ்ஸ. தத்தா²தி தேஸு பி⁴க்கூ²ஸு. நேவாஸிகாதி நிப³த்³த⁴ம் வஸந்தீதி நேவாஸிகா. ட²பேந்தீதி மஞ்சபாதே³ ட²பேந்தி. ததே²வாதி யதா² நேவாஸிகா வளஞ்ஜந்தி, ததே²வ ஆக³ந்துகேஹி வளஞ்ஜிதும் வட்டதீதி அத்தோ².

ஸேதபி⁴த்தி வாதி ஏத்த² வாஸத்³தே³ன நீலபி⁴த்திஆத³யோ ஸம்பிண்டே³தி. ‘‘த்³வாரம்பி வாதபானம்பீ’’திஆதி³னா ஸாமஞ்ஞதோ வுத்தத்தா த்³வாரவாதபானாத³யோ அபரிகம்மகதாபி ந அபஸ்ஸயிதப்³பா³. கேனசி வா வத்தா²தி³னாதி ஸம்ப³ந்தோ⁴.

‘‘ஹுத்வா’’தி இமினா ‘‘தோ⁴தபாத³கா’’தி பத³ஸ்ஸ ‘‘நிபஜ்ஜிது’’ந்தி பதே³ கிரியாவிஸேஸனபா⁴வம் த³ஸ்ஸேதி, ‘‘பி⁴க்கூ²’’தி பதே³ காரகவிஸேஸனபா⁴வம் நிவத்தேதி. கஸ்மிம் டா²னே நிபஜ்ஜிதும் குக்குச்சாயந்தீதி ஆஹ ‘‘தோ⁴தேஹி பாதே³ஹி அக்கமிதப்³ப³ட்டா²னே’’தி. ‘‘அக்கமிதப்³ப³ட்டா²னஸ்ஸேதம் அதி⁴வசன’’ந்தி இமினா ‘‘தோ⁴தபாத³கே’’தி பாட²ஸ்ஸ தோ⁴தோ பாதோ³ திட்ட²தி ஏத்த² டா²னேதி தோ⁴தபாத³கம், தஸ்மிம் தோ⁴தபாத³கேதி அத்த²ம் த³ஸ்ஸேதி. ஏதந்தி ‘‘தோ⁴தபாத³கே’’தி நாமம். ‘‘பச்சத்த²ரித்வா’’தி ஏத்த² கேன பச்சத்த²ரித்வாதி ஆஹ ‘‘பச்சத்த²ரணேனா’’தி. ‘‘அத்தனோ ஸந்தகேனா’’தி இமினா ஸங்கி⁴கேன பச்சத்த²ரணேன பச்சத்த²ரணம் படிக்கி²பதி. நித்³தா³யதோபீதி நித்³தா³யகாரணாபி, ஸம்குடிதேதி ஸம்ப³ந்தோ⁴. அத² வா நித்³தா³யதோபீதி நித்³தா³யந்தஸ்ஸபி. ‘‘ஸரீராவயவோ’’தி பதே³ ஸாம்யத்த²ச²ட்டீ², ‘‘ஆபத்தியேவா’’தி பதே³ ஸம்பதா³னம். லோமேஸு பு²ஸந்தேஸூதி ஸம்ப³ந்தோ⁴. ‘‘பரிபோ⁴க³ஸீஸேனா’’தி இமினா பரிபோ⁴க³ம் அகத்வா கேனசி கம்மேன ஸரீராவயவேன பு²ஸந்தஸ்ஸ அனாபத்தீதி த³ஸ்ஸேதி. ஹத்த²தலேன பு²ஸிதும் பாத³தலேன பு²ஸிதும் வா அக்கமிதும் வாதி யதா²லாப⁴யோஜனா த³ட்ட²ப்³பா³. ‘‘பரிபோ⁴க³ஸீஸேனா’’தி பத³ஸ்ஸ அத்த²ம் த³ஸ்ஸேந்தோ ஆஹ ‘‘மஞ்சபீட²ம் நீஹரந்தஸ்ஸா’’திஆதி³.

ஸங்க⁴ப⁴த்தாதி³அனுஜானனகதா²

325. ‘‘ஸங்க⁴ஸ்ஸ ப⁴த்த’’ந்தி இமினா ஸங்க⁴ப⁴த்தந்தி பத³ஸ்ஸ ச²ட்டீ²ஸமாஸம் த³ஸ்ஸேதி. ஸங்க⁴ஸ்ஸ அத்தா²ய ஆப⁴தம் ப⁴த்தம் காதும் ந ஸக்கோந்தீதி யோஜனா. உத்³தே³ஸப⁴த்தந்திஆதீ³ஸு ஏவமத்தோ² வேதி³தப்³போ³தி யோஜனா. ‘‘உத்³தே³ஸேன லத்³த⁴பி⁴க்கூ²னம் ப⁴த்தம் காது’’ந்தி இமினா உத்³தே³ஸேன லத்³த⁴பி⁴க்கூ²னம் காதப்³ப³ம் ப⁴த்தம் உத்³தே³ஸப⁴த்தந்தி வசனத்த²ம் த³ஸ்ஸேதி. ததே²வாதி யதா² ஸங்க⁴தோ உத்³தி³ஸித்வா லத்³த⁴பி⁴க்கூ², ததே²வ. பரிச்சி²ந்தி³த்வாதி ‘‘ஏகம் வா’’திஆதி³னா பரிச்சி²ந்தி³த்வா. தேஸந்தி லத்³த⁴பி⁴க்கூ²னம். இமினா நிமந்தேத்வா லத்³த⁴பி⁴க்கூ²னம் காதப்³ப³ம் ப⁴த்தம் நிமந்தனப⁴த்தந்தி வசனத்த²ம் த³ஸ்ஸேதி. ‘‘ஸலாகாயோ சி²ந்தி³த்வா’’தி இமினா ஸலாகாயோ சி²ந்தி³த்வா காதப்³ப³ம் ப⁴த்தம் ஸலாகப⁴த்தந்தி வசனத்த²ம் த³ஸ்ஸேதி. பக்கி²கந்தி உபோஸதி²கந்தி பாடிபதி³கந்தி ஏவம் நியாமேத்வாதி யோஜனா. பஞ்சமீஆதீ³ஸு பக்கே²ஸு காதப்³ப³ம் பக்கி²கம். உபோஸதே² காதப்³ப³ம் உபோஸதி²கம். பாடிபதே³ காதப்³ப³ம் பாடிபதி³கம், தமேவ ப⁴த்தம் பாடிபதி³கப⁴த்தம். உத்³தே³ஸப⁴த்தம் நிமந்தனந்தி ஏத்த² இதிஸத்³தோ³ ஆத்³யத்தோ², உத்³தே³ஸப⁴த்தம் நிமந்தனந்திஆதி³ம் இமம் வோஹாரம் பத்தானீதி ஹி அத்தோ². உத்³தே³ஸப⁴த்தாதீ³னியேவ அனுஜானனமகத்வா கஸ்மா ஸங்க⁴ப⁴த்தம்பி அனுஜானாதீதி ஆஹ ‘‘யஸ்மா பனா’’திஆதி³. தத்த² யஸ்மா ஸக்கி²ஸ்ஸந்தீதி ஸம்ப³ந்தோ⁴. தேதி மனுஸ்ஸா. தம்பீதி ஸங்க⁴ப⁴த்தம்பி. பிஸத்³தே³ன உத்³தே³ஸப⁴த்தாதீ³னி அபேக்க²தி.

ஸங்க⁴ப⁴த்தாதீ³னம் வித்தா²ரம் த³ஸ்ஸேந்தோ ஆஹ ‘‘தத்தா²’’திஆதி³. தத்த² தத்தா²தி ‘‘ஸங்க⁴ப⁴த்தம் உத்³தே³ஸப⁴த்த’’ந்திஆதி³பாடே², ஏவம் வினிச்ச²யோ வேதி³தப்³போ³தி யோஜனா, ஸங்க⁴ப⁴த்தாதீ³ஸு வா நித்³தா⁴ரணே பு⁴ம்மம், பு⁴ஞ்ஜந்தானம் அம்ஹாகம் அஜ்ஜ த³ஸ த்³வாத³ஸ தி³வஸா அஹேஸுந்தி யோஜனா. அஞ்ஞதோதி அஞ்ஞஸ்மா டா²னா. தத்தா²தி ஸங்க⁴ப⁴த்தே. வத்தப்³பா³தி மனுஸ்ஸா வத்தப்³பா³. தந்தி ஸங்க⁴ப⁴த்தம், தா⁴துகம்மம், ‘‘அம்ஹாக’’ந்தி காரிதகம்மம். தந்தி ஸங்க⁴ப⁴த்தம்.

உத்³தே³ஸப⁴த்தகதா²

அயம் நயோ ஏவம் வேதி³தப்³போ³தி யோஜனா. ரஞ்ஞா வா பஹிதேதி ஸம்ப³ந்தோ⁴. ஸசே அத்தீ²தி ஸசே டி²திகா அத்தி². உத்³தே³ஸகேனாதி ப⁴த்துத்³தே³ஸகேன. ந அதிக்காமேதப்³ப³ந்தி உத்³தே³ஸப⁴த்தம் ந அதிக்காமேதப்³ப³ம். தே பனாதி பிண்ட³பாதிகா பன. டி²திகம் ட²பேத்வாதி டி²திகம் டி²தட்டா²னே ட²பேத்வா முஞ்சித்வாதி அத்தோ². தேஸந்தி மஹாதே²ரானம். யோஜனந்தரிகவிஹாரதோபீதி யோஜனேன ப்³யவதா⁴னே டி²தவிஹாரதோபி. டி²தட்டா²னதோதி டி²திகாய டி²தட்டா²னதோ. அஸம்பத்தானம்பீதி ப⁴த்துத்³தே³ஸட்டா²னம் அஸம்பத்தானம்பி. வட்³டி⁴தா நாம ஸீமாதி உபசாரஸீமா வட்³டி⁴தா நாம. ஸங்க⁴னவகஸ்ஸ தி³ன்னேபீதி யாவ து³தியபா⁴கோ³ ந தா³தப்³போ³, தாவ ஸங்க⁴னவகஸ்ஸ தி³ன்னேபி. வஸ்ஸக்³கே³னாதி க³ணியதீதி க³ம், வஸ்ஸமேவ க³ம் வஸ்ஸக்³க³ம், தேன வஸ்ஸக்³கே³ன, வஸ்ஸக³ணனாயாதி வுத்தம் ஹோதி. யதி³ ‘‘வஸ்ஸக்³கே⁴னா’’தி சதுத்த²க்க²ரேன பாடோ² ப⁴வேய்ய, ஏவம் ஸதி வஸ்ஸபரிச்சே²தே³னாதி அத்தோ² த³ட்ட²ப்³போ³, அயமேவ யுத்ததரோ.

ஏகஸ்மிம் விஹாரேதி ஏகிஸ்ஸம் விஹாரஸீமாயம். தஸ்மிம்யேவ ப⁴த்துத்³தே³ஸட்டா²னேதி ஏத்த² ஏவஸத்³தே³ன அஞ்ஞஸ்மிம் டா²னே கா³ஹணம் படிக்கி²பதி. ஏகோதி ஏகோ தா³யகோ. தேனாதி பஹிதபி⁴க்கு²னா. ஸோ அத்தோ²தி ஸோ ஹேது. தம்தி³வஸந்தி தஸ்மிம் பஹிததி³வஸே. பமுஸ்ஸதீதி ஸதிபவாஸேன முஸ்ஸதி. போ⁴ஜனஸாலாயாதி ப⁴த்துத்³தே³ஸட்டா²னஸங்கா²தாய போ⁴ஜனஸாலாய. யா பகதிட்டி²திகாதி யோஜனா. ‘‘ஏகாப³த்³தா⁴ ஹோந்தீ’’தி வுத்தவசனஸ்ஸ அத்த²ம் த³ஸ்ஸேந்தோ ஆஹ ‘‘அஞ்ஞமஞ்ஞம் த்³வாத³ஸஹத்த²ந்தரம் அவிஜஹித்வா’’தி. நவம் டி²திகந்தி ப⁴த்துத்³தே³ஸட்டா²னே ட²பிதபகதிட்டி²திகதோ அஞ்ஞம் நவம் டி²திகம். ஹீதி ஸச்சம், யஸ்மா வா. ஏதந்தி உத்³தே³ஸப⁴த்தம். ‘‘ஸ்வே’’தி நியாமேத்வா வுத்தத்தா து³தியதி³வஸே ந லப்³ப⁴தி.

கோசீதி தா³யகோ. ஸகவிஹாரே டீ²திகாவஸேனேவ கா³ஹேதப்³ப³ந்தி யம் விஹாரம் க³ச்ச²ந்தி, தத்த² அபவிட்ட²த்தா ஸகவிஹாரே டி²திகாவஸேனேவ கா³ஹேதப்³ப³ம். தி³ன்னம் பன ப⁴த்தம் கா³ஹேதப்³ப³ந்தி ஸம்ப³ந்தோ⁴. ஸம்பத்தானந்தி தி³ன்னட்டா²னம் ஸம்பத்தானம். தத்தா²தி தி³ன்னட்டா²னம், ஸம்பத்தானம்யேவாதி ஸம்ப³ந்தோ⁴. தஸ்ஸ விஹாரஸ்ஸாதி பவிட்ட²விஹாரஸ்ஸ. தஸ்மிம் தஸ்மிம் டா²னேதி கா³மத்³வாரவீதி²சதுக்கஸங்கா²தே தஸ்மிம் தஸ்மிம் டா²னே. அந்தோஉபசாரக³தானந்தி ஏத்த² அந்தோஉபசாரோ நாம த்³வாத³ஸஹத்த²ப்³ப⁴ந்தரம்.

கா³மத்³வாரூபசார வீதி²சதுக்கூபசார க⁴ரூபசாரேஸு தீஸு க⁴ரூபசாரஸ்ஸ விஸேஸம் த³ஸ்ஸேந்தோ ஆஹ ‘‘க⁴ரூபசாரோ சேத்தா²’’திஆதி³. ஏத்தா²தி தீஸு உபசாரேஸு. க⁴ரூபசாரோ வேதி³தப்³போ³தி ஸம்ப³ந்தோ⁴. ஏகோ உபசாரோ ஏத்தா²தி ஏகூபசாரம் க⁴ரம். இமேஸந்தி சதுன்னம் க⁴ரானம். தத்தா²தி சதூஸு க⁴ரேஸு. ஏககுலஸ்ஸ யம் க⁴ரந்தி ஸம்ப³ந்தோ⁴. ஏகவளஞ்ஜந்தி ஏகத்³வாரேன ஸமானபரிபோ⁴க³ம். தத்தா²தி ஏகூபசாரே.

யம் பன ஏகம் க⁴ரம் கதந்தி ஸம்ப³ந்தோ⁴. ஸுக²விஹாரத்தா²யாதி கலஹம் விச்சி²ந்தி³த்வா ஸுக²விஹாரத்தா²ய. தஸ்மிம் தஸ்மிம் டா²னேதி பி⁴த்தியா பரிச்சி²ன்னே தஸ்மிம் தஸ்மிம் டா²னே.

யஸ்மிம் பன க⁴ரே நிஸீதா³பேந்தீதி ஸம்ப³ந்தோ⁴. யம்பி நிவேஸனந்தி யோஜனா.

யோ பன உத்³தே³ஸலாபோ⁴ உப்பஜ்ஜதி, ஸோ பாபுணாதீதி யோஜனா. கிஞ்சாபி தி³ஸ்ஸந்தி, ததா²பீதி யோஜனா.

யோ பனாதி பி⁴க்கு² பன, லப⁴தீதி ஸம்ப³ந்தோ⁴. அஞ்ஞஸ்மிந்தி அத்தனா அஞ்ஞஸ்மிம். தேனாதி உத்³தே³ஸப⁴த்தம் லப⁴ந்தேன பி⁴க்கு²னா.

காலம் படிமானேந்தேஸூதி போ⁴ஜனகாலம் படிமானேந்தேஸு பி⁴க்கூ²ஸு, நிஸின்னேஸூதி ஸம்ப³ந்தோ⁴. கோசி மனுஸ்ஸோ வத³தீதி ஸம்ப³ந்தோ⁴. ஸங்கு⁴த்³தே³ஸபத்தம் தே³த² இதி வாதி யோஜனா. ‘‘ஏஸேவ நயோ’’தி இமினா பத்தஸ்ஸ டா²னே பி⁴க்கு²ம் பக்கி²பித்வா வுத்தே அதிதி³ஸதி.

ஏத்தா²தி உத்³தே³ஸப⁴த்தே, ஏவம்வசனே வா. பேஸலோதி பியஸீலோ. தேனாதி உத்³தே³ஸகேன. கிந்தி ஜானாதீதி ஆஹ ‘‘த³ஸவஸ்ஸேன லத்³த⁴’’ந்தி. தஸ்ஸாதி உத்³தே³ஸகஸ்ஸ, வசனந்தி ஸம்ப³ந்தோ⁴. அப்பஸத்³தா³தி ஸணிகஸத்³தா³. ‘‘அபஸத்³தா³’’திபி பாடோ², நிஸ்ஸத்³தா³தி அத்தோ². ஸப்³ப³னவகஸ்ஸாதி ஸப்³பே³ஸம் பி⁴க்கூ²னம் நவகஸ்ஸ. சா²யாயபி புச்சி²யமானாயாதி அனாத³ரே பு⁴ம்மவசனம், ஸாமிவசனம் வா. ந லப⁴தீதி பாபுணாபிதத்தா ந லப⁴தி. நிஸின்னஸ்ஸாபி நித்³தா³யந்தஸ்ஸாபீதி அனாத³ரே ஸாமிவசனம், பி⁴க்கு²ஸ்ஸ நிஸின்னஸ்ஸாபி நித்³தா³யந்தஸ்ஸாபீதி அத்தோ². ஹீதி ஸச்சம். ஏதம் பா⁴ஜனீயப⁴ண்ட³ம் நாமாதி யோஜனா. தத்தா²தி ‘‘ஸம்பத்தஸ்ஸேவ பாபுணாதீ’’தி வசனே. உபசாரேனாதி த்³வாத³ஸஹத்தூ²பசாரேன. தஸ்மிந்தி அந்தோபரிக்கே²பே.

கோசி உபாஸகோ பஹிணாதீதி ஸம்ப³ந்தோ⁴. பணீதபோ⁴ஜனானந்தி பணீதபோ⁴ஜனேஹி. உத³கஸ்ஸாதி உத³கேன, பூரேத்வாதி ஸம்ப³ந்தோ⁴. ஆக³தா மனுஸ்ஸாதி ஸம்ப³ந்தோ⁴. யேனாதி பி⁴க்கு²னா. யந்தி வத்து². திசீவரபரிவாரந்தி திசீவரேன பரிவாரிதம், திசீவரபரிவாரவந்தம் வா உத்³தே³ஸப⁴த்தந்தி அத்தோ². ஹி ஸச்சம் அஸ்ஸ பி⁴க்கு²ஸ்ஸ புஞ்ஞவிஸேஸோ ஈதி³ஸோதி யோஜனா. நனு உத³கம்பிஸ்ஸ புஞ்ஞவிஸேஸம், கஸ்மா அஞ்ஞம் உத்³தே³ஸப⁴த்தம் லப⁴தீதி ஆஹ ‘‘உத³கம் பனா’’திஆதி³.

க³ஹேத்வா ஆக³தா தே மனுஸ்ஸாதி யோஜனா. தேஸந்தி மஹாதே²ராதீ³னம். த³ஹரஸாமணேரேஹீதி த³ஹரேஹி ஸாமணேரேஹி, லத்³தே⁴ஸூதி ஸம்ப³ந்தோ⁴.

தத்தா²தி உத்³தே³ஸப⁴த்தே. புரதோதி மஹாதே²ரானம் புரதோ. பத்தேதி ஸங்கு⁴த்³தே³ஸபத்தே, அகா³ஹிதேயேவாதி ஸம்ப³ந்தோ⁴. ஆஹடம்பி உத்³தே³ஸப⁴த்தந்தி ஸம்ப³ந்தோ⁴.

ஏகோ வத³தீதி ஸம்ப³ந்தோ⁴. ஸோதி மனுஸ்ஸோ, ப⁴ணதீதி ஸம்ப³ந்தோ⁴. யதா² தே ருச்சதி, ததா² வத்வா ஆஹராதி யோஜனா. விஸ்ஸட்ட²தூ³தோ நாமாதி அத்தனோ ருசிம் விஸ்ஸஜ்ஜித்வா தஸ்ஸ ருசியா விஸ்ஸட்டோ² தூ³தோ நாம. படிபாடிபத்தம் வாதி ஸங்க⁴தோ படிபாடியா லத்³த⁴ம் பத்தம் வா, இத³ம் நிமந்தனப⁴த்தம் ஸந்தா⁴ய வுத்தம். யம் இச்ச²தீதி விஸ்ஸட்ட²தூ³தோ யம் இச்ச²தி. ஸோதி பா³லோ, ந வத்தப்³போ³தி ஸம்ப³ந்தோ⁴. புச்சா²ஸபா⁴கே³ன வதே³ய்யாதி ஸம்ப³ந்தோ⁴. ததோதி வத³னகாரணா.

கூடட்டி²திகா நாமாதி அஞ்ஞேஹி உத்³தே³ஸப⁴த்தேஹி மிஸ்ஸேத்வா உஜுகட்டி²திகாய பவத்தித்வா கூடேன பவத்தா டி²திகா நாம ஹோதி. தமேவத்த²ம் வித்தா²ரேந்தோ ஆஹ ‘‘ரஞ்ஞோ வா ஹீ’’திஆதி³. ஏகசாரிகப⁴த்தானீதி பதி ஏகம் கத்வா சரிதப்³பா³னி ப⁴க்கி²தப்³பா³னீதி ஏகசாரிகானி, அஞ்ஞேஹி உத்³தே³ஸப⁴த்தேஹி அமிஸ்ஸேத்வா பதி ஏகம் கத்வா ப⁴க்கி²தப்³பா³னீதி வுத்தம் ஹோதி, தானியேவ ப⁴த்தானி ஏகசாரிகப⁴த்தானி. ஏகச்சே பி⁴க்கூ² க³தாதி ஸம்ப³ந்தோ⁴. தேஸூதி ஏகச்சேஸு பி⁴க்கூ²ஸு. தங்க²ணம்யேவாதி தஸ்மிம் நிஸின்னக்க²ணேயேவ. புன தங்க²ணம்யேவாதி தஸ்மிம் கா³ஹணக்க²ணேயேவ. ‘‘பணீதப⁴த்த’’ந்தி வுத்தே ‘‘கதிவஸ்ஸதோ பட்டா²யா’’தி வத³ந்தி, ‘‘ஏத்தகவஸ்ஸதோ நாமா’’தி வுத்தேதி யோஜனா. கா³ஹிதேதி டி²திகம் அஜானந்தேஹி ஆக³ந்துகேஹி பத்தே கா³ஹிதே. ஆக³தேஹிபி டி²திகம் ஜானனகபி⁴க்கூ²ஹீதி ஸம்ப³ந்தோ⁴. ஏஸேவ நயோ பரதோபி. பி⁴க்கூ²யேவ ஆக³ச்ச²ந்தூதி பத்தம் அக்³க³ஹேத்வா பி⁴க்கூ²யேவ ஆக³ச்ச²ந்தூதி அதி⁴ப்பாயோ.

நேதி டி²திகம் அஜானந்தே ஆக³ந்துகே. ராஜா போ⁴ஜேத்வாதி ராஜா அத்தனோ கே³ஹே போ⁴ஜேத்வா. நேஸந்தி ஆக³ந்துகானம், பத்தேபீதி ஸம்ப³ந்தோ⁴. யம் ஆஹடந்தி யம் ப⁴த்தம் அபு⁴ஞ்ஜித்வா ஆஹடம். தம் ந கா³ஹேதப்³ப³ந்தி தம் ப⁴த்தம் டி²திகாய ந கா³ஹேதப்³ப³ம் தோ²கத்தா. நேஸந்தி ஆக³ந்துகானம். கீ³வா ஹோதீதி இணம் ஹோதி. இணம் நாம படிதா³தப்³ப³ஸபா⁴வோ ஹோதி, தஸ்மா படிதா³தப்³ப³ந்தி அதி⁴ப்பாயோ. ஏத்தா²தி டி²திகம் அஜானித்வா பு⁴த்தட்டா²னே. தாவ நிஸீதி³தப்³ப³ந்தி தாவ ஆக³மேத்வா நிஸீதி³தப்³ப³ம். பத்தட்டா²னேன கா³ஹணம்பி கீ³வாஸதி³ஸோதி புரிமதே²ரஸ்ஸ மதி ப⁴வேய்ய. ஏவஞ்ஹி ஸதி த்³வின்னம் தே²ரானம் வாதோ³ ஸதி³ஸோயேவ.

ஏகோ பிண்ட³பாதோதி ஸம்ப³ந்தோ⁴. ததா²ரூபோதி திசீவரபரிவாரோ ஸதக்³க⁴னகோ. அயந்தி பிண்ட³பாதோ. இதி வுத்தம் அட்ட²கதா²ஸு.

ஏகோ பி⁴க்கூ²தி ஸம்ப³ந்தோ⁴. அந்தராப⁴ட்ட²கோதி உத்³தே³ஸப⁴த்தஸ்ஸ அந்தரே வேமஜ்ஜே² ப⁴ஸ்ஸதி க³லதீதி அந்தராப⁴ட்ட²கோ. பரிபுண்ணவஸ்ஸோ யோ பன ஸாமணேரோதி யோஜனா. தஸ்ஸ உபஸம்பஜ்ஜிதஸாமணேரஸ்ஸ டி²திகா அதிக்கந்தாதி ஸம்ப³ந்தோ⁴. ஸோதி உத்³தே³ஸப⁴த்தபத்தோ பி⁴க்கு². ஸமீபேதி அத்தனோ ஸமீபே. தஞ்சே தே²ய்யாய ஹரந்தீதி தம் பத்தம் பத்தஹாரகா தே²ய்யாய ஹரந்தி சே. கீ³வா ஹோதீதி பத்ததா³பகஸ்ஸ கீ³வா ஹோதி. ஸோ பி⁴க்கூ²தி ஸமீபே நிஸின்னோ ஸோ பி⁴க்கு². அஸ்ஸாதி பத்ததா³பகஸ்ஸ. ‘‘அய’’ந்தி போத்த²கேஸு பாடோ² அத்தி², ஸோ ந ஸுந்த³ரோ. ததோதி உத்³தே³ஸப⁴த்தக⁴ரதோ. ‘‘ஸுஹடோ’’தி வசனஸ்ஸ அத்த²ம் த³ஸ்ஸேந்தோ ஆஹ ‘‘ப⁴த்தஸ்ஸ தி³ன்னத்தா கீ³வா ந ஹோதீ’’தி.

ஸாதி³யனகோதி உத்³தே³ஸப⁴த்தஸாதி³யனகோ, ஹோதீதி ஸம்ப³ந்தோ⁴. த³ஸஹிபி பத்தேஹி ப⁴த்தம் ஆஹராபேத்வாதி யோஜனா. பி⁴க்கு²த³த்தியம் நாமாதி பி⁴க்கு²னா த³த்தியம் நாம. ஸோ பி⁴க்கூ²தி ஸாதி³யனகோ ஸோ பி⁴க்கு². தே பி⁴க்கூ²தி பிண்ட³பாதிகே தே பி⁴க்கூ². ஏத² ப⁴ந்தே மய்ஹம் ஸஹாயா ஹோத² இதி வத்வாதி ஸம்ப³ந்தோ⁴. தஸ்ஸாதி உபாஸகஸ்ஸ. தத்தா²தி உபாஸகஸ்ஸ க⁴ரே. தஸ்ஸேவாதி ஸாதி³யனகஸ்ஸேவ. இதரேதி நவபிண்ட³பாதிகா. நேஸந்தி த³ஸன்னம் பி⁴க்கூ²னம். தஸ்ஸ பி⁴க்கு²னோதி ஸாதி³யனகஸ்ஸ பி⁴க்கு²னோ. பு⁴த்தாவீனந்தி பு⁴த்தவந்தானம்.

தேதி நவபிண்ட³பாதிகா, வுத்தா க³ச்ச²ந்தீதி ஸம்ப³ந்தோ⁴. தத்தா²தி உபாஸகஸ்ஸ க⁴ரே. தத்ராதி த³ஸஸு பி⁴க்கூ²ஸு. மது⁴ரேன ஸரேன அனுமோத³னம் கரோந்தஸ்ஸ ஏகஸ்ஸ த⁴ம்மகத²ம் ஸுத்வாதி யோஜனா. அகதபா⁴கோ³ நாமாதி புப்³பே³ ந கரியித்தா²தி அகதோ, ஸோயேவ பா⁴கோ³ கோட்டா²ஸோதி அகதபா⁴கோ³, ஆக³ந்துகபா⁴கோ³ நாமாதி அத்தோ².

ஏகோ உபாஸகோ தே³தீதி ஸம்ப³ந்தோ⁴. இமந்தி கா²த³னீயபோ⁴ஜனீயம். பத்தஸாமிகஸ்ஸ தா³தப்³ப³ந்தி யோஜனா. ட²பேத்வாதி பகதியா ட²பேத்வா. ‘‘ஸப்³போ³ ஸங்கோ⁴ பு⁴ஞ்ஜதூ’’தி வத்வா ச கிஞ்சி அவத்வா ச க³தேபி பட²மமேவ ‘‘ஸப்³ப³ம் ஸங்கி⁴கம் பத்தம் தே³தா²’’தி வுத்தத்தா பா⁴ஜேத்வா பரிபு⁴ஞ்ஜிதப்³ப³ம்.

பாதியா ஆஹரித்வாதி ஸம்ப³ந்தோ⁴. ஏகேகம் ஆலோபந்தி ஏகேகஸ்ஸ பி⁴க்கு²ஸ்ஸ ஏகேகம் ஆலோபம். அச்ச²தீதி வஸதி. கஸ்ஸ தேதி கஸ்ஸ அத்தா²ய தயா, ஆனீதந்தி யோஜனா. ‘‘ஏகேன பி⁴க்கு²னா’’தி பத³ம் ‘‘கா³ஹேதப்³ப³’’ந்தி பதே³ காரிதகம்மம், ‘‘ப⁴த்த’’ந்தி தா⁴துகம்மம் தப்³ப³பச்சயோ வத³தி.

கிம் ஆஹரீயதீதி அவத்வாதி கிம் வத்து² தயா ஆஹரீதீதி உபாஸகம் அபுச்சி²த்வா. ‘‘கிம் ஆஹரிஸ்ஸஸீ’’திபி பாடோ², கிம் வத்து²ம் த்வம் ஆஹரிஸ்ஸஸீதி அத்தோ². ஸபரிவாராய யாகு³யா ச மஹக்³கா⁴னம் ப²லானஞ்ச பணீதானம் க²ஜ்ஜகானஞ்ச ததா² ஆவேணிகா டி²திகா காதப்³பா³தி யோஜனா. ஏகா ஏவ டி²திகாதி ஸமானா ஏவ டி²திகா. ததா² பா²ணிதஸ்ஸாதி ஏத்த² ததா²ஸத்³தே³ன ‘‘ஏகா ஏவ டி²திகா வட்டதீ’’தி பத³ம் அதிதி³ஸதி.

இதி உத்³தே³ஸப⁴த்தகதா²ய யோஜனா ஸமத்தா.

நிமந்தனப⁴த்தகதா²

நிமந்தனம் புக்³க³லிகம் ஸங்கி⁴கஞ்சாதி து³வித⁴ம். தத்த² புக்³க³லிகம் ஸந்தா⁴ய வுத்தம் ‘‘புக்³க³லிகம் சே ஸயமேவ இஸ்ஸரோ’’தி. ‘‘ஏத்தகே பி⁴க்கூ² ஸங்க⁴தோ உத்³தி³ஸதா²’’திஆதீ³னி அவத்வா ‘‘ஏத்தகானம் பி⁴க்கூ²னம் ப⁴த்தம் க³ண்ஹதா²’’தி நிமந்தேத்வா தி³ன்னம் ஸங்கி⁴கம் நிமந்தனம் நாம. ஏத்தா²தி நிமந்தனே. பிண்ட³பாதிகானம்பி வட்டதீதி ‘‘பி⁴க்க²’’ந்தி கப்பியவோஹாரேன வுத்தத்தா பிண்ட³பாதிகானம்பி வட்டதி. படிபாடியாதி ஸங்க⁴தோ லத்³த⁴படிபாடியா. ஆக³தமனுஸ்ஸோ வத³தீதி ஸம்ப³ந்தோ⁴. விச்சி²ந்தி³த்வாதி ‘‘தும்ஹே ச க³ச்ச²தா²’’தி வசனம் விச்சி²ந்தி³த்வா.

நிமந்தனப⁴த்தக⁴ரதோதி நிமந்தனப⁴த்தஸ்ஸ தி³ன்னக⁴ரதோ. ஏகோ ஆஹரதீதி ஸம்ப³ந்தோ⁴. பூரேத்வாதி ப⁴த்தஸ்ஸ பூரேத்வா. தந்தி ப⁴த்தம். இதா⁴பீதி நிமந்தனேபி.

ததோதி வத³னகாரணா. ‘‘ஸோ பி⁴க்கூ²’’தி பத³ம் ‘‘அஸ்ஸா’’தி பதே³ பகதிகத்தா, ‘‘ஜிகு³ச்ச²னீயோ’’தி பத³ம் தத்தே²வ விகதிகத்தா. அஸ்ஸாதி ப⁴வேய்ய, ஹோதி வா. ‘‘பத்தத்தா²ய ஆக³தோம்ஹீ’’தி வத³ந்தஸ்ஸ தஸ்ஸ பத்தோ தா³தப்³போ³தி யோஜனா. ப⁴த்தாஹரணகபத்தந்தி ப⁴த்தம் ஆஹரதி அனேனாதி ப⁴த்தாஹரணகோ, ஸோயேவ பத்தோ ப⁴த்தாஹரணகபத்தோ, தம். படிபாடிப⁴த்தந்தி படிபாடியா லத்³த⁴ம் ப⁴த்தம்.

ஆலோபப⁴த்தட்டி²திகதோதி ஏகேகஆலோபேன லத்³த⁴ஸ்ஸ ப⁴த்தஸ்ஸ டி²திகதோ. ஆலோபஸங்கே²பேனாதி ஏகேகஸ்மிம் ஆலோபே தம்ஸம்கி²பனேன. அயம் நயோ உத்³தே³ஸப⁴த்ததோ விஸேஸோ. கஸ்ஸ தே ஆப⁴தந்தி கஸ்ஸ அத்தா²ய தயா ஆப⁴தந்தி யோஜனா. ஸங்க⁴ஸ்ஸ மே ப⁴த்தந்தி ஸங்க⁴ஸ்ஸ அத்தா²ய மயா ப⁴த்தம் ஆப⁴தம். தே²ரானம் மே ப⁴த்தந்தி தே²ரானம் மயா ப⁴த்தம் ஆப⁴தம்.

உபாஸகோ பஹிணாதீதி ஸம்ப³ந்தோ⁴. இமே தயோ ஜனாதி ஸங்க⁴த்தே²ரோ ச க³ந்த²து⁴தங்க³வஸேன அபி⁴ஞ்ஞாதோ ச ப⁴த்துத்³தே³ஸகோ சாதி இமே தயோ ஜனா. புச்சி²துந்தி ‘‘கிம் ஸங்க⁴தோ க³ண்ஹாமி, உதா³ஹு யே ஜானாமி, தேஹி ஸத்³தி⁴ம் ஆக³ச்சா²மீ’’தி புச்சி²தும். ஆருஹியித்தா²தி ஆரூள்ஹா. அத்தனவமேஹீதி அத்தா நவமோ ஏதேஸந்தி அத்தனவமா, தேஹி பி⁴க்கூ²ஹீதி ஸம்ப³ந்தோ⁴. ஹீதி யஸ்மா. ஏதே பி⁴க்கூ²தி ஸங்க⁴த்தே²ராத³யோ தயோ ஏதே பி⁴க்கூ². தேனாதி க³ந்த²து⁴தங்கா³தீ³ஹி அனபி⁴ஞ்ஞாதேன பி⁴க்கு²னா படிபஜ்ஜிதப்³ப³ந்தி ஸம்ப³ந்தோ⁴. நிஸ்ஸிதகே வா, யே பி⁴க்கூ² ஜானாத², தே பி⁴க்கூ² வா க³ஹேத்வாதி யோஜனா. அத்தனா அஞ்ஞோ கா³மோ க³ந்தப்³போ³தி ஸம்ப³ந்தோ⁴. ஸோயேவ கா³மோதி நிமந்தனகா³மோயேவ.

தத்ராதி அஸனஸாலாயம். உஸ்ஸவாதீ³ஸூதி ச²ணாதீ³ஸு. ஆதி³ஸத்³தே³ன அஞ்ஞேன கேனசி காரணேன மனுஸ்ஸானம் ப³ஹுஸன்னிபாதம் ஸங்க³ண்ஹாதி. ததா³தி தஸ்மிம் நிமந்தனகாலே. ஸன்னிபாதட்டா²னதோதி பி⁴க்கூ²னம் ஸன்னிபாதட்டா²னதோ. யதா²ஸத்தீதி ஸத்தியா அனுரூபம், ஸத்திம் அனதிக்கமித்வாதி அத்தோ². ஏத்த² ச ஸத்திஸத்³த³ஸ்ஸ குந்தஸங்கா²தஸ்ஸ ஸத்த²ஸ்ஸபி வாசகத்தா தம் படிக்கி²பந்தோ ஆஹ ‘‘யதா²ப³ல’’ந்தி.

ஸங்க⁴த்தே²ரோ வா ஆக³ச்ச²ந்தீதி ஸம்ப³ந்தோ⁴. ப³ஹுகத்தாரமபேக்கி²த்வா ‘‘ஆக³ச்ச²ந்தீ’’தி ப³ஹுவசனவஸேன வுத்தம். ஏகவாரந்தி ஏகஸ்மிம் தி³வஸே, ஆக³மனதி³வஸேதி அத்தோ². படிப³த்³த⁴காலதோதி தத்தே²வ ஸகட்டா²னே வாஸஸ்ஸ நிப³த்³த⁴காலதோ. து³தியவாரேதி து³தியதி³வஸே. அபி⁴னவஆக³ந்துகாவாதி அனாக³மனபுப்³பா³ அபி⁴னவா ஆக³ந்துகாவ. தத்ராதி தஸ்மிம் பத்தட்டா²னே. தேஸந்தி அபி⁴னவஆக³ந்துகானம். ஏத்தா²தி அனாக³தபுப்³ப³ட்டா²னே.

ஸப்³ப³த்தா²தி ஸப்³பே³ஸு ஸகட்டா²னஆக³ந்துகட்டா²னேஸு. தேனாதி அதிலாபி⁴னா பி⁴க்கு²னா. அவிஸேஸேத்வாதி விஸேஸமகத்வா.

ஸலாகப⁴த்தகதா²

ஸலாகப⁴த்தம் பன ஏவம் வேதி³தப்³ப³ந்தி யோஜனா. ‘‘வசனதோ’’தி பத³ம் ‘‘தா³தப்³பா³’’தி பதே³ ஞாபகஹேது. ஸலாகாய வாதி குஸத³ண்டே³ வா. அஸுகஸ்ஸ நாமாதி அஸுகஸ்ஸ நாம உபாஸகஸ்ஸ. உபனிப³ந்தி⁴த்வாதி லிகி²த்வா, சி²ந்தி³த்வாதி அத்தோ². ‘‘ஓபுஞ்ஜித்வா’’தி பத³ஸ்ஸ அத்த²ம் த³ஸ்ஸேந்தோ ஆஹ ‘‘புனப்புனம் ஹேட்டு²பரியவஸேன ஆலோளேத்வா’’தி. ப⁴த்துத்³தே³ஸகேன தா³தப்³பா³தி ஸம்ப³ந்தோ⁴.