3. ஸமுச்சயக்க²ந்த⁴கம்

1. ஸுக்கவிஸ்ஸட்டி²கதா²

ஸமுச்சயக்க²ந்த⁴கே தத்தா²தி சதுப்³பி³தே⁴ஸு மானத்தேஸு. யம் மானத்தம் தி³ய்யதி, இத³ம் அப்படிச்ச²ன்னமானத்தம் நாமாதி யோஜனா. ஏஸேவ நயோ அனந்தரவாக்யேஸுபி. படிச்ச²ன்னாய ஆபத்தியாதி ஹேத்வத்தே² கரணவசனம், காரணத்தே² நிஸ்ஸக்கவசனம் வா. அத்³த⁴மாஸந்தி பன்னரஸதி³வஸகாலம். ஓதா⁴யாதி ஸமூஹம் கத்வா. ‘‘ஏகதோ கத்வா’’தி இமினா ‘‘ஓதா⁴யா’’தி பத³ஸ்ஸ அத்த²ம் த³ஸ்ஸேதி. தேஸூதி சதுப்³பி³தே⁴ஸு மானத்தேஸு. இத³ந்தி மானத்தம். அப்படிச்ச²ன்னாய…பே… வசனதோதி ஞாபகஹேது. ஏதேன அப்படிச்ச²ன்னாய ஆபத்தியா தா³தப்³ப³ம் மானத்தம் அப்படிச்ச²ன்னமானத்தந்தி வசனத்த²ம் த³ஸ்ஸேதி. தந்தி அப்படிச்ச²ன்னமானத்தம். இதா⁴தி இமிஸ்ஸம் பாளியம். ததுத்தரீதி ததோ தீஹிபி உத்தரி. நானாவத்தூ²னி ஏதாஸந்தி நானாவத்து²காயோ. தாஸந்தி நானாவத்து²கானம்.

மாளகஸீமாயமேவாதி ஸீமமாளகே ஏவ, ஸீமங்க³ணே ஏவாதி அத்தோ². தத்தே²வாதி மாளகஸீமாயமேவ.

வேத³யாமஹந்தி வேத³யாமி அஹம். மம மானத்தசரபா⁴வம் ஸங்க⁴ம் ஜானாபேமீதி அத்தோ². வேத³யதீதி மந்தி ஜானாபேதி, இதி மம் ஸங்கோ⁴ தா⁴ரேதூதி அதி⁴ப்பாயோ. வுத்தனயேனேவாதி பாரிவாஸிகக்க²ந்த⁴கே வுத்தனயேனேவ. நிக்கி²பிதப்³ப³ந்தி ‘‘மானத்தம் நிக்கி²பாமி, வத்தம் நிக்கி²பாமீ’’தி நிக்கி²பிதப்³ப³ம். மாளகதோதி ஸீமங்க³ணதோ. ஸோபீதி ஸஹ க³ச்ச²ந்தோபி. ‘‘மாளகே நாரோசித’’ந்தி இமினா யஸ்ஸ மாளகே ஆரோசிதம், தஸ்ஸ அனாரோசேத்வாபி நிக்கி²பிதப்³ப³ந்தி த³ஸ்ஸேதி. ஆரோசேந்தேன வத்தப்³ப³ந்தி ஸம்ப³ந்தோ⁴.

விஸபா⁴கே³ஹி ஸஹ வஸந்தஸ்ஸ வத்தஸ்ஸ து³ப்பூரிதத்தா வுத்தம்’’ஸபா⁴கா³ பி⁴க்கூ² வஸந்தீ’’தி. சதூஹி, பஞ்சஹி வாதி வாஸத்³தே³ன ததோ அதிரேகம்பி ஸங்க³ண்ஹாதி. பரிக்கே²பாரஹட்டா²னதோதி சீவரக்க²ந்த⁴கே (மஹாவ. அட்ட². 379) வுத்தபரிக்கே²பாரஹட்டா²னதோ. ‘‘த்³வே லேட்³டு³பாதே அதிக்கமித்வா’’தி இத³ம் விஹாரே பி⁴க்கூ²னம் ஸஜ்ஜா²யாதி³ஸத்³த³ஸவனூபசாரபஹானத்த²ம் வுத்தம். ஸசே ஸவனூபசாரதோ ந முச்சதி, ததோ அதிரேகம்பி அதிக்கமிதப்³ப³ம். ஓக்கம்மாதி மக்³க³படிபன்னானம் பி⁴க்கூ²னம் வசனஸத்³த³ஸவனூபசாரபஹானத்த²ம் ஓக்கமித்வா. ‘‘கு³ம்பே³ன வா வதியா வா’’தி த³ஸ்ஸனூபசாரபஹானத்த²ம் வுத்தம். இத⁴ உபசாரோ நாம யத்த² ட²த்வா பஸ்ஸதி ஸுணாதி, ஸோயேவ தே³ஸோ. அஞ்ஞோதி சதூஹி பஞ்சஹி வா பி⁴க்கூ²ஹி அஞ்ஞோ. ஏஸாதி ஏஸோ மானத்தசாரிகோ.

‘‘த்³வாத³ஸஹத்த²ம் உபசாரம் ஓக்கமித்வா’’தி இமினா அனோக்கமித்வா அஜானந்தஸ்ஸேவ க³ச்ச²தி, நத்தி² ரத்திச்சே²தோ³பீதி த³ஸ்ஸேதி. ஏத்த² தி³ட்ட²ரூபானம் ஸுதஸத்³தா³னம் த்³வாத³ஸஹத்தூ²பசாரதோ ப³ஹி டி²தானம்பி ஆரோசேதப்³ப³ம். அதி³ட்டா²ஸுதானம்பி அந்தோ த்³வாத³ஸஹத்தூ²பசாரக³தானம் ஆரோசேதப்³ப³ந்தி த³ட்ட²ப்³ப³ம். ஸதி கரணீயேதி இத³ம் க³ந்துஸ்ஸ காரணத³ஸ்ஸனத்த²ம் வுத்தம். அஸதி கரணீயேபி க³ந்தும் வட்டதி. ஸோபீதி ஏகோ பி⁴க்கு²பி. ‘‘தஸ்ஸ ஸந்திகே ஆரோசேத்வா’’தி இமினா அனாரோசனே வத்தபே⁴த³து³க்கடம் ஹோதீதி த³ஸ்ஸேதி. ஏகஸ்ஸ ஸந்திகே ஆரோசேத்வா நிக்கி²பியமானே கிம் ஊனே க³ணே சரணதோ³ஸோ வா விப்பவாஸோ வா ந ஹோதீதி ஆஹ ‘‘அயஞ்சா’’திஆதி³. தத்த² அயஞ்சாதி மானத்தசாரிகோ பன. யஸ்மா காரணா வஸி, தேன காரணேனாதி யோஜனா. பி⁴க்கூ²னஞ்ச அத்தி²பா⁴வம் ஸல்லக்கே²த்வாதி பகதத்தாக³தகாலே தஸ்ஸ அனாரோசேத்வாவ க³ச்ச²ந்தி, தஸ்மா பி⁴க்கூ²னஞ்ச த்³வாத³ஸஹத்தூ²பசாரே அத்தி²பா⁴வம் ஸல்லக்கே²த்வாதி அத்தோ². ஏத்த² ச ‘‘க³ணஸ்ஸ ஆரோசேத்வா’’தி இமினா ஊனே க³ணே சரணதோ³ஸாபா⁴வம் த³ஸ்ஸேதி. ‘‘பி⁴க்கூ²னஞ்ச அத்தி²பா⁴வம் ஸல்லக்கே²த்வா’’தி இமினா விப்பவாஸதோ³ஸாபா⁴வம் த³ஸ்ஸேதி. யந்தி புப்³பே³ அனாரோசிதம் யம் பி⁴க்கு²ம். அயந்தி பட²மம் பஸ்ஸிதப்³ப³ஸ்ஸ ஆரோசேத்வா நிக்கி²பனம். ‘‘நிக்கி²த்தவத்தஸ்ஸ பரிஹாரோ’’தி இமினா அனிக்கி²த்தவத்தே அந்தோஉபசாரக³தானம் ஸப்³பே³ஸம் ஆரோசேதப்³ப³ந்தி த³ஸ்ஸேதி.

அயந்தி மானத்தசாரிகோ, டி²தோதி ஸம்ப³ந்தோ⁴. தேனாபீதி மானத்தசாரிகேனபி, யாசிதப்³ப³ந்தி யோஜனா. ஸோதி அனிக்கி²த்தவத்தோ பி⁴க்கு². தத்ராதி ‘‘ஸோ அப்³பே⁴தப்³போ³’’தி வசனே. அயம் அப்³பா⁴னவிதி⁴ வுத்தோதி யோஜனா. அயஞ்சாதி அப்³பா⁴னவிதி⁴ ச. தாஸந்தி ஆபத்தீனம். ஏவந்திஆதி³ நிக³மனம். படிச்ச²ன்னமானத்தம் பன தா³தப்³ப³ம் ஹோதீதி ஸம்ப³ந்தோ⁴. ‘‘படிச்ச²ன்னாயா’’திஆதி³னா படிச்ச²ன்னாய ஆபத்தியா தா³தப்³ப³ம் மானத்தம் படிச்ச²ன்னமானத்தந்தி வசனத்த²ம் த³ஸ்ஸேதி. நந்தி படிச்ச²ன்னமானத்தம்.

2. பரிவாஸகதா²

102. தஸ்ஸாதி படிச்ச²ன்னமானத்தஸ்ஸ. ஸமோதா⁴னேத்வாதி இதே⁴வ பரிவாஸகதா²யம் ஸமோதா⁴னேத்வா. இதே⁴வ பரிவாஸகதா²யம் த³ஸ்ஸயிஸ்ஸாமாதி யோஜனா. இதே⁴வஸத்³தோ³ ஹி புப்³பா³பராபேக்கோ².

இத⁴ அதி⁴ப்பேதம் பரிவாஸம் வித்தா²ரேத்வா த³ஸ்ஸேந்தோ ஆஹ ‘‘அயம் ஹீ’’திஆதி³. இத⁴ அதி⁴ப்பேதோ பரிவாஸோ நாம திவிதோ⁴ ஹோதீதி யோஜனா. தத்தா²தி திவிதே⁴ஸு பரிவாஸேஸு. ‘‘யதா²படிச்ச²ன்னாய ஆபத்தியா’’தி வசனம் வித்தா²ரேந்தோ ஆஹ ‘‘கஸ்ஸசி ஹீ’’திஆதி³. யதா² உதா³யித்தே²ரஸ்ஸ ஏகாஹபடிச்ச²ன்னா அயம் ஆபத்தி ஹோதி, ததா² கஸ்ஸசி ஏகாஹபடிச்ச²ன்னா ஆபத்தி ஹோதீதி யோஜனா. யதா² ச பரதோ ஆக³தா உதா³யித்தே²ரஸ்ஸேவ ஆபத்தி ஹோதி, ததா² கஸ்ஸசி த்³விஹாதி³படிச்ச²ன்னா ஆபத்தி ஹோதீதி யோஜனா. இமினா வுத்தனயானுஸாரேன பரதோபி நயோ நேதப்³போ³. தஸ்மாதி யஸ்மா ஏகாஹாதி³படிச்ச²ன்னா ஏகாதி³ஆபத்தி ஹோதி, தஸ்மா ஜானிதப்³போ³தி யோஜனா.

படிச்ச²ன்னபா⁴வம் வித்தா²ரேந்தோ ஆஹ ‘‘அயம் ஹீ’’திஆதி³. தத்தா²தி ‘‘த³ஸஹாகாரேஹீ’’தி பாடே². ஆபத்திஇதி ஸஞ்ஞா ஏதஸ்ஸாதி ஆபத்திஸஞ்ஞீ . பஹு சாதி ஸமத்தோ² ச. பபுப்³போ³ ஹூதா⁴து ஸமத்த²த்தே² ஹோதி.

தத்தா²தி தஸ்ஸம் மாதிகாயம். யந்தி ஆபத்திம். ஸோபி சாதி பி⁴க்கு²பி ச. தத்தா²தி தஸ்ஸம் ஆபத்தியம். அயந்தி பி⁴க்கு². தத்தா²தி ஆபத்தியம். அலஜ்ஜிபக்கே² திட்ட²தீதி ‘‘ஸஞ்சிச்ச ஆபத்திம் பரிகூ³ஹதீ’’தி (பரி. 359) வுத்தபக்கே² டி²தத்தா அலஜ்ஜிபக்கே² திட்ட²தி.

பகதத்தோதி ஏத்த² ‘‘பாராஜிகம் அனஜ்ஜா²பன்னோ’’தி அத்த²ம் படிக்கி²பந்தோ ஆஹ ‘‘திவித⁴ம் உக்கே²பனீயகம்மம் அகதோ’’தி. ஏதந்தி அப்படிச்ச²ன்னபா⁴வம், ‘‘ஆபஜ்ஜதி…பே… குஸலேஹி சிந்திதா’’தி வசனம் வா.

கா³தா²ய ‘‘ஸாவஸேஸ’’ந்தி இமினா பாராஜிகம் நிவத்தேதி. க³ருகந்தி ஏத்த² ஸங்கா⁴தி³ஸேஸமேவ அதி⁴ப்பேதந்தி த³ஸ்ஸேதி. அனாத³ரியந்தி ஸிக்கா²பதே³ அனாத³ரியம். வஜ்ஜந்தி து³க்கடம். உக்கி²த்தகேன கரணபூ⁴தேன.

யஸ்ஸாதி பி⁴க்கு²ஸ்ஸ, நத்தீ²தி ஸம்ப³ந்தோ⁴. பீ⁴ருகஜாதிகதாயாதி பீ⁴ருகஸபா⁴வதாய. பப்³ப³தவிஹாரே வஸந்தஸ்ஸ யஸ்ஸ பி⁴க்கு²னோதி யோஜனா. பப்³ப³தவிஹாரேதி பப்³ப³தஸ்ஸ தலே, அந்தரே வா காரிதே விஹாரே. ஏதஸ்மிந்தி ஏதாதி³ஸே. அந்தராயே ஸதியேவாதி யோஜனா. தஸ்ஸ அச்ச²ன்னாவ ஹோதீதி யோஜனா. அனந்தராயிகஸஞ்ஞாய சா²த³யதோ அச்ச²ன்னாவாதி அனந்தராயிகஸஞ்ஞாய சா²தே³ந்தஸ்ஸாபி ஏகந்தேன அந்தராயிகத்தா அச்ச²ன்னாவாதி அதி⁴ப்பாயோ.

அஸ்ஸாதி பி⁴க்கு²ஸ்ஸ. ஹனுகவாதோதி ஹனுகஸ்ஸ கே³லஞ்ஞகரோ வாதோ. விஜ்ஜ²தீதி ஹனுகம் விஜ்ஜ²தி. இமினாதி பி⁴க்கு²னா. பஹுஸஞ்ஞினோ சா²தி³தாபி ஏகந்தேன அபஹுத்தா அச்சா²தி³தாவ ஹோதி.

சா²தே³துகாமோ சாதி ஏத்த² இத³ம் சதுக்கம் வேதி³தப்³ப³ம் சா²தே³துகாமோ சா²தே³தி, சா²தே³துகாமோ நச்சா²தே³தி, அச்சா²தே³துகாமோ சா²தே³தி, நச்சா²தே³துகாமோ நச்சா²தே³தீதி. தத்த² பட²மபத³ம் ஸந்தா⁴ய வுத்தம் ‘‘இத³ம் உத்தானத்த²மேவா’’தி. ஏவம் ஸேஸாஸுபி மாதிகாஸு சதுக்கம் வேதி³தப்³ப³ம். சதூஸு சதுக்கேஸு பட²மபதே³ ஏவ ச²ன்னா ஹோதி, ந ஸேஸபதே³ஸு. அனுத்தானத்த²ம் த³ஸ்ஸேந்தோ ஆஹ ‘‘ஸசே பனா’’திஆதி³. புரேப⁴த்தே வாதி புரேப⁴த்தம் வா, ப⁴த்ததோ, ப⁴த்தஸ்ஸ வா புரேதி புரேப⁴த்தம். அப்³யயீபா⁴வஸமாஸே ஸத்தமீவிப⁴த்தியா அமிதிகாரியஸ்ஸ அனிச்சபா⁴வதோ வுத்தம் ‘‘புரேப⁴த்தே’’தி. ஏஸேவ நயோ ‘‘பச்சா²ப⁴த்தே’’தி ஏத்தா²பி. து³தியபத³ஸ்ஸ அத்த²ம் த³ஸ்ஸேத்வா ததியபத³ஸ்ஸ அத்த²ம் த³ஸ்ஸேந்தோ ஆஹ ‘‘யஸ்ஸ பனா’’திஆதி³. அபி⁴க்கு²கே டா²னே வஸந்தஸ்ஸ யஸ்ஸ பி⁴க்கு²ஸ்ஸாதி யோஜனா. ஆக³மேந்தஸ்ஸ க³ச்ச²ந்தஸ்ஸாதி அனாத³ரே சேதானி ஸாமிவசனானி.

சதுத்த²பத³ஸ்ஸ அத்த²ம் த³ஸ்ஸேந்தோ ஆஹ ‘‘யோ பனா’’திஆதி³. தத்த² யோ பனாதி பி⁴க்கு² பன, ஆவி கரோதீதி ஸம்ப³ந்தோ⁴. ஸபா⁴க³ந்தி அவேரிம். அயந்தி பி⁴க்கு². உபஜ்ஜா²யோ இதி வா ஆசரியோ இதி வாதி யோஜனா. லஜ்ஜாயாதி லஜ்ஜனிமித்தம், லஜ்ஜகாரணா, லஜ்ஜஹேது வா. ஹீதி ஸச்சம், யஸ்மா வா, இதா⁴தி ஆபத்திஆரோசனட்டா²னே. அவேரிஸபா⁴க³ஸ்ஸாதி அவேரீ ஹுத்வா ஸபா⁴க³ஸ்ஸ.

பகாஸேதுகாமோதி அஞ்ஞேஸம் பகாஸேதுகாமோ. உபஜ்ஜா²யஸ்ஸாபீதி பிஸத்³தே³ன அஞ்ஞஸ்ஸ ஸந்திகே கா நாம கதா²தி த³ஸ்ஸேதி. தத்தா²தி ஆபத்திஆரோசனட்டா²னே. ஸபா⁴க³ஸங்கா⁴தி³ஸேஸந்தி வத்து²ஸபா⁴க³ஸங்கா⁴தி³ஸேஸம். ஸுத்³த⁴ஸ்ஸாதி வத்து²ஸபா⁴க³ஸங்கா⁴தி³ஸேஸதோ ஸுத்³த⁴ஸ்ஸ. ஆவிகரணாகாரம் த³ஸ்ஸேந்தோ ஆஹ ‘‘ஆவிகரோந்தோ சா’’திஆதி³. இதி இமானீதிஆதி³ நிக³மனம்.

ததோதி ஜானிதப்³ப³தோ, பரந்தி ஸம்ப³ந்தோ⁴. ஏகாஹபடிச்ச²ன்னாதி ஏகாஹேன படிச்ச²ன்னா. யாவ சுத்³த³ஸ தி³வஸானி, தாவ தி³வஸவஸேன யோஜனா காதப்³பா³தி யோஜனா. பக்க²படிச்ச²ன்னந்தி பக்கே²ன படிச்ச²ன்னம். அதிரேகபக்க²படிச்ச²ன்னந்தி பக்க²தோ அதிரேகேன படிச்ச²ன்னம்.

ஸம்வச்ச²ரபடிச்ச²ன்னந்தி ஸம்வச்ச²ரேன படிச்ச²ன்னம். ததோ வாதி அதிரேகஸட்டி²ஸம்வச்ச² ரதோ வா. பி⁴ய்யோபீதி அதிரேகம்பி.

ததோதி தீஹி ஆபத்தீஹி. பரந்தி அதிரேகம். க³ணனவஸேனாதி ஆபத்திக³ணனவஸேன. வத்து²கித்தனவஸேன வாதி ஆபத்தீனம் வத்து²கித்தனவஸேன வா. நாமமத்தவஸேன வாதி ‘‘ஸங்கா⁴தி³ஸேஸாபத்தியோ’’தி ஏவம் நாமஸ்ஸேவ வஸேன வா. ஏத்த² ஹி மத்தஸத்³தோ³ அவதா⁴ரணத்தோ², தேன வத்து²ம் நிவத்தேதி.

தத்தா²தி ‘‘நாமமத்தவஸேனா’’தி பதே³. ஸஜாதிஸாதா⁴ரணந்தி ஸஸ்ஸ அத்தனோ ஜாதி ஸஜாதி, தாய ஸாதா⁴ரணம் ஸஜாதிஸாதா⁴ரணம். ஸப்³பே³ஸம், ஸப்³பே³ஹி வா ஆபத்தீஹி ஸாதா⁴ரணம் ஸப்³ப³ஸாதா⁴ரணம். தத்தா²தி து³விதே⁴ஸு நாமேஸு. ஸப்³ப³ஸாதா⁴ரணனாமவஸேனாபீதி ஏத்த² பிஸத்³தோ³ ‘‘அஹம் ப⁴ந்தே ஸம்ப³ஹுலா ஸங்கா⁴தி³ஸேஸா ஆபஜ்ஜிம் ஏகாஹபடிச்ச²ன்னாயோ’’தி ஏவம் ஸஜாதிஸாதா⁴ரணனாமவஸேனபி ‘‘அஹம் ப⁴ந்தே ஸம்ப³ஹுலா ஸங்கா⁴தி³ஸேஸா ஆபத்தியோ ஆபஜ்ஜிம் ஏகாஹபடிச்ச²ன்னாயோ’’தி ஏவம் உப⁴யஸாதா⁴ரணவஸேனபி வத்தும் வட்டதீதி த³ஸ்ஸேதி. ஹீதி ஸச்சம். ஸப்³ப³ம்பி பரிவாஸாதி³கம் இத³ம் வினயகம்மந்தி யோஜனா. வஸதி ஆபத்தி ஏத்த² ததா³யத்தவுத்திதாயாதி வத்து². கோ³ வுச்சதி வசனம் வா ஞாணம் வா, தம் தாயதீதி கோ³த்தம்.

தத்தா²தி வத்தா²தீ³ஸு சதுப்³பி³தே⁴ஸு. தத்தா²தி தேஸு வசனேஸு. ஸுக்கவிஸ்ஸட்டி²ம் காயஸம்ஸக்³க³ந்திஆதி³னா வசனேனாபீதி ஏத்த² ஆதி³ஸத்³தே³ன து³ட்டு²ல்லாதி³வசனானி ஸங்க³ண்ஹாதி. இத⁴ பனாதி இமஸ்மிம் பன டா²னே. யோ யோதி திஸ்ஸோ வா பு²ஸ்ஸோ வா ஆபன்னோ ஹோதி.

ஏவம் ஆரோசேதப்³ப³ந்தி ஏவம் வக்க²மானனயேன ஆரோசேதப்³ப³ந்தி யோஜனா. கிம் ஆரோசேதப்³ப³ம்? ‘‘அஹம் ப⁴ந்தே…பே… ஸங்கோ⁴ தா⁴ரேது’’ இதி ஆரோசேதப்³ப³ந்தி யோஜனா.

வேத³யாமஹந்தி வேத³யாமி அஹம். மம பாரிவாஸிகபா⁴வம் ஸங்க⁴ம், ஸங்க⁴ஸ்ஸ வா ஜானாபேமீதி அத்தோ². வேத³யதீதி மந்தி வேத³யதி இதி மம். பாரிவாஸிகபா⁴வம் ஸங்க⁴ம், ஸங்க⁴ஸ்ஸ வா ஜானாபேதீதி மம் ஸங்கோ⁴ தா⁴ரேதூதி அத்தோ². ஏத்த² ப³ஹூஸு அட்ட²கதா²போத்த²கேஸு ‘‘திண்ணம் வா அதிரேகானம் வா ஆரோசேந்தேன ஆயஸ்மந்தோ தா⁴ரேந்தூ’’தி பாடோ² அத்தி². கேஸுசி அட்ட²கதா²போத்த²கேஸு ‘‘திண்ணம் ஆரோசேந்தேன ஆயஸ்மந்தோ தா⁴ரேந்தூ’’தி ஏத்தகோயேவ பாடோ² அத்தி². ஹேட்டா² மானத்தகதா²யம்பி ஏவமேவ அத்தி². தத்த² ‘‘அதிரேகான’’ந்தி இமினா தீஹி அதிரேகானம் ஆரோசேந்தேன ஸங்க⁴ம் அபேக்கி²த்வா ஸசே ஏகவசனவஸேன வத்துகாமோ ஹோதி, ‘‘மம் ஸங்கோ⁴ தா⁴ரேதூ’’தி வத்தப்³ப³ம். அத² ஸம்ப³ஹுலே பி⁴க்கூ² அபேக்கி²த்வா ஸசே ப³ஹுவசனவஸேன வத்துகாமோ ஹோதி, யதா² திண்ணம், ஏவம் ‘‘மம் ஆயஸ்மந்தோ தா⁴ரேந்தூ’’தி வத்தப்³ப³ந்தி த³ஸ்ஸேதி. இத³ஞ்ச ஸத்³த³ஸத்த²வஸேனேவ வுத்தம், ந வினயகம்மவிபத்திவஸேனாதி த³ட்ட²ப்³ப³ம்.

‘‘விஹாரேயேவ ரத்திபரிக்³க³ஹோ’’தி இமினா அந்தோஉபசாரஸீமாயம்பி பரிவஸிதப்³ப³பா⁴வம் த³ஸ்ஸேதி. உபசாரஸீமந்தி பரிக்கி²த்தஸ்ஸ விஹாரஸ்ஸ பரிக்கே²பம், அபரிக்கி²த்தஸ்ஸ பரிக்கே²பாரஹட்டா²னம். ஏஸாதி பாரிவாஸிகோ பி⁴க்கு². அஸ்ஸாதி ஆக³தஸ்ஸ பி⁴க்கு²னோ.

ததோதி ஆபத்திபடிச்ச²ன்னதி³வஸதோ. குக்குச்சவினோத³னத்தா²யாதி ஆபத்திபடிச்ச²ன்னதி³வஸேன ஸமம் பரிவஸிதப்³ப³ம் நுகோ², ந நுகோ²தி குக்குச்சஸ்ஸ வினோத³னத்தா²ய. பரிவுத்த²த்தாதி பரிவஸிதத்தா. ஸோதி பரிவுத்தோ² பி⁴க்கு². இத³ந்தி தா³தப்³ப³மானத்தம். தந்தி படிச்ச²ன்னமானத்தம். சா²ரத்தந்தி ச²ரத்தியோ ஸமாஹடாதி சா²ரத்தம், ஸமாஹாரே தி³கு³. ‘‘ச²ரத்த’’ந்தி வத்தப்³பே³ ஸுகு²ச்சாரணத்த²ம் ச²காரஸ்ஸ தீ³க⁴ம் கத்வா ஏவம் வுத்தம், அச்சந்தஸம்யோகே³ சேதம் உபயோக³வசனம்.

அப்படிச்ச²ன்னாபத்திம் தா³தும் வட்டதீதி ஸம்ப³ந்தோ⁴. இமினா ஹேட்டா² வுத்தம் படிச்ச²ன்னமானத்தம் இமஸ்மிம் படிச்ச²ன்னமானத்தே ஸமோதா⁴னேத்வாபி தா³தும் வட்டதீதி த³ஸ்ஸேதி. ஏவம் ஸந்தேபி மூலமானத்தம் படிச்ச படிச்ச²ன்னமானத்தந்தி வுச்சதி. கத²ம் தா³தும் வட்டதீதி யோஜனா.

அஸ்ஸாதி மானத்தம் யாசந்தஸ்ஸ. தத³னுரூபந்தி தஸ்ஸ யாசனஸ்ஸ அனுரூபம். ஸசே படிச்ச²ன்னா த்³வேதி ஏத்த² த்³வேதி நித³ஸ்ஸனமத்தம் ததோ அதிரேகம்பி க³ஹேதப்³ப³த்தா. ஸப்³ப³த்தா²தி ஸப்³பே³ஸு ஏகப³ஹூஸு. தத³னுரூபமே வாதி தஸ்ஸ மானத்ததா³னஸ்ஸ அனுரூபமேவ. இத⁴ பனாதி படிச்ச²ன்னமானத்தே பன. இதீதிஆதி³ நிக³மனம். யம் மானத்தம் தி³ய்யதீதி யோஜனா. ஏத்தா²தி படிச்ச²ன்னமானத்தே.

அவஸேஸாதி அப்படிச்ச²ன்னபரிவாஸபடிச்ச²ன்னபரிவாஸேஹி அவஸேஸா. தத்தா²தி அவஸேஸேஸு த்³வீஸு பரிவாஸேஸு. அத⁴ம்மிகமானத்தசாராவஸானே அனுஞ்ஞாதபரிவாஸோதி ஸம்ப³ந்தோ⁴. கிஸ்மிம் வத்து²ஸ்மிம் அனுஞ்ஞாதோதி ஆஹ ‘‘இமஸ்மிம் வத்து²ஸ்மி’’ந்தி. ஏஸாதி ஸுத்³த⁴ந்தோ, தா³தப்³போ³தி ஸம்ப³ந்தோ⁴. ஏதந்தி ஜானனாஜானனம்.

தத்தா²தி த்³வீஸு ஸுத்³த⁴ந்தேஸு, சூளஸுத்³த⁴ந்தோதி வுச்சதீதி ஸம்ப³ந்தோ⁴. யோதி பி⁴க்கு², வத³தீதி ஸம்ப³ந்தோ⁴. ஆரோசிததி³வஸதோதி ஆபத்திஆரோசிததி³வஸதோ.

தந்தி சூளஸுத்³த⁴ந்தம், பரிவஸந்தேன பரிவஸிதப்³ப³ந்தி ஸம்ப³ந்தோ⁴. அக்³க³ஹேஸீதி பரிவாஸம் அக்³க³ஹேஸி. அஞ்ஞந்தி க³ஹிதமாஸதோ அஞ்ஞம். ‘‘பரிவாஸதா³னகிச்சம் நத்தீ²’’தி இமினா பரிவாஸக³ஹணகிச்சம்பி நத்தீ²தி த³ஸ்ஸேதி க³ண்ஹந்தஸ்ஸேவ தா³தப்³ப³த்தா, தே³ந்தஸ்ஸேவ க³ஹேதப்³ப³த்தா வா. உத்³த⁴ம்பி ஆரோஹதீதி பரிவாஸக³ஹணகாலதோ அஞ்ஞம்பி காலம் பரிவஸிதப்³ப³த்தா உத்³த⁴ம்பி ஆரோஹதி. ஹேட்டா²பி ஓரோஹதீதி பரிவாஸக³ஹணகாலதோ ஊனம்பி காலம் பரிவஸிதப்³ப³த்தா ஹேட்டா²பி ஓரோஹதி. இத³ந்தி ஆரோஹனோரோஹனம். தஸ்ஸாதி ஸுத்³த⁴ந்தபரிவாஸஸ்ஸ. ஏகமேவ படிச்ச த்³வே, திஸ்ஸோ, ஸம்ப³ஹுலா வா ப⁴வந்தீதி ஆஹ ‘‘ஏகம் வினா ஸம்ப³ஹுலானம் அபா⁴வதோ’’தி.

ஏவம் சூளஸுத்³த⁴ந்தம் த³ஸ்ஸேத்வா மஹாஸுத்³த⁴ந்தம் த³ஸ்ஸேந்தோ ஆஹ ‘‘யோ பனா’’திஆதி³. தந்தி மஹாஸுத்³த⁴ந்தம். யாவ யத்தகோ உபஸம்பத³தி³வஸோ ஹோதி, தாவ தத்தகம் காலந்தி யோஜனா. உத்³த⁴ம் நாரோஹதீதி உத்³த⁴ம் ஆரோஹனகாலஸ்ஸ அபா⁴வதோ உத்³த⁴ம் ந ஆரோஹதி. ஏத்தா²தி ஸுத்³த⁴ந்தபரிவாஸே. அயம் ஸுத்³த⁴ந்தபரிவாஸோ நாமாதி நிக³மனம்.

தத்தா²தி திவிதே⁴ஸு ஸமோதா⁴னபரிவாஸேஸு. ‘‘ஓது⁴னித்வா ஸமோத³ஹித்வா தா³தப்³ப³பரிவாஸோ’’தி இமினா ஓது⁴னித்வா ஸமோதா⁴னேத்வா தா³தப்³போ³ பரிவாஸோ ஓதா⁴னஸமோதா⁴னோதி வசனத்த²ம் த³ஸ்ஸேதி, ‘‘பரிவாஸோ’’தி இமினா தத்³தி⁴தணபச்சயஸ்ஸ ஸரூபம் த³ஸ்ஸேதி. ஏத்த² ச அவது⁴னியதே, அவது⁴னிதப்³ப³ந்தி வா ஓதா⁴னம், ஸம் ஏகதோ ஓத³ஹீயதே ஸம்பிண்டீ³யதே, உத³ஹியதி ஸம்பிண்டி³யதீதி வா ஸமோதா⁴னந்தி அவயவவசனத்தோ² காதப்³போ³. ‘‘மக்கே²த்வா’’தி இமினா து⁴தா⁴துயா பப்போடனத⁴ம்ஸனதோ⁴வனானி த³ஸ்ஸேதி. ஸோதி ஓதா⁴னஸமோதா⁴னோ, ஆக³தோதி ஸம்ப³ந்தோ⁴.

ஏத்தா²தி ஓதா⁴னஸமோதா⁴னே. யோதி பி⁴க்கு², படிச்சா²தே³தீதி ஸம்ப³ந்தோ⁴. பரிவஸந்தோ வா மானத்தாரஹோ வா மானத்தம் சரந்தோ வா அப்³பா⁴னாரஹோ வா யோ பி⁴க்கூ²தி யோஜனா. ‘‘புரிமாய ஆபத்தியா’’தி பத³ம் ‘‘ஸமா வா’’தி பதே³ ஸஹாதி³யோகோ³. ‘‘ஊனதரா’’திபதே³ விப⁴த்திஅபாதா³னம், அனுமேய்யவிஸயஅபாதா³னம் வா. ‘‘அதி³வஸே கத்வா’’தி இமினா ஓது⁴னித்வாதி ஏத்த² து⁴தா⁴துயா யதா²வுத்தத்தே²யேவ த³ஸ்ஸேதி. ஊனகபக்க²படிச்ச²ன்னாதி பக்க²தோ ஊனகேன படிச்ச²ன்னா. ஏதேனுபாயேனாதி பக்கே² வுத்தேன ஏதேன உபாயேன.

தத்தா²தி மூலாபத்திதோ அதிரேகபடிச்ச²ன்னே. ஆவி காராபேத்வாதி மூலாபத்திதோ அந்தராபத்தியா படிச்ச²ன்னபா⁴வம் ஆவி காராபேத்வா. ஏத்தா²தி ஆபத்திபடிச்ச²ன்னே. பமாணந்தி காரணம். யாதி ஆபத்தி. தத்தா²தி மூலபா⁴வேன கத்தப்³பா³யம் மூலிஆபத்தியம். இதரந்தி மூலிபா⁴வேன கத்தப்³ப³ம் மூலாபத்திம். ஸமோதா⁴யாதி ஸமோத³ஹித்வா. பக்கி²பித்வாதி அத்தோ².

ஏகா வா யா ஆபத்தி ஸப்³ப³சிரபடிச்ச²ன்னா ஹோதீதி யோஜனா. ஸப்³ப³சிரபடிச்ச²ன்னாயோதி ஸப்³பா³ஸம் ஆபத்தீனம் சிரேன படிச்ச²ன்னாயோ. தாஸந்தி ஆபத்தீனம். அக்³கே⁴னாதி பரிச்சே²தே³ன. அக்³க⁴ஸத்³தோ³ ஹேத்த² பரிச்சே²த³த்த²வாசகோ. அபி⁴தா⁴னே (அபி⁴தா⁴னப்பதீ³பிகாயம் 1048 கா³தா²யம்) வுத்தம் ‘‘அக்³கோ⁴ முல்யே ச பூஜனே’’தி. ஏத்த² ‘‘முல்யே சா’’தி பத³ஸ்ஸ மூலபரிச்சே²தே³தி அத்தோ² த³ட்ட²ப்³போ³. தமேவத்த²ம் த³ஸ்ஸேந்தோ ஆஹ ‘‘தாஸம் ரத்திபரிச்சே²த³வஸேனா’’தி. இமேஹி பதே³ஹி அக்³கே⁴ன ரத்திபரிச்சே²தே³ன ஸமோதா⁴னேத்வா தா³தப்³போ³ பரிவாஸோ அக்³க⁴ஸமோதா⁴னோதி வசனத்த²ம் த³ஸ்ஸேதி. ஏத்த² ச ‘‘ஸப்³ப³சிரபடிச்ச²ன்னாயோ’’தி வுத்தத்தா கிஞ்சாபி கோடிஅத்த²வாசகோ ததியக்க²ரேன பாடோ² யுத்தோ விய தி³ஸ்ஸதி. ததா²பி ஸோ பாடோ² ந க³ஹேதப்³போ³. கஸ்மா? ப³ஹூஸு பாளிபோத்த²கேஸு, அட்ட²கதா²போத்த²கேஸு ச அலிகி²தத்தா. ப³ஹூஸு ஹி போராணபோத்த²கேஸு சதுத்த²க்க²ரேன பாடோ²யேவ லிகி²தோ, தஸ்மா ஸோ பாடோ²யேவ க³ஹேதப்³போ³, ந அஞ்ஞோதி த³ட்ட²ப்³ப³ம். ஸோதி அக்³க⁴ஸமோதா⁴னோ. ஆக³தோயேவாதி ஸம்ப³ந்தோ⁴.

யஸ்ஸ பனாதி பி⁴க்கு²ஸ்ஸ, படிச்ச²ன்னாதி ஸம்ப³ந்தோ⁴. ஸப்³ப³ந்தி ஸகலம். ஆபத்திஸஹஸ்ஸகா³தா²ய –

த³ஸஸதம் ஆபத்தியோ ரத்திஸதம் சா²த³யித்வானாதி யோஜனா. இமினா நயேனபி அக்³க⁴ஸமோதா⁴னோதி ஏத்த² அக்³க⁴ஸத்³த³ஸ்ஸ சதுத்த²க்க²ரேன பாட²ஸ்ஸ யுத்தபா⁴வோ வேதி³தப்³போ³. அக்³கே⁴ன த³ஸரத்திபரிச்சே²தே³ன ஸமோதா⁴ய தா³தப்³போ³ அக்³க⁴ஸமோதா⁴னோ.

யோ பரிவாஸோ நானாவத்து²காயோ ஆபத்தியோ ஏகதோ கத்வா தி³ய்யதி, அயம் பரிவாஸோ மிஸ்ஸகஸமோதா⁴னோ நாமாதி யோஜனா. ஏத்த² வத்து²வஸேன மிஸ்ஸகா ஆபத்தியோ ஸமோதா⁴னேத்வா தா³தப்³போ³ பரிவாஸோ மிஸ்ஸகஸமோதா⁴னோதி வசனத்தோ² காதப்³போ³. தத்ராதி மிஸ்ஸகஸமோதா⁴னே. தத³னுரூபாயாதி தஸ்ஸ யாசனஸ்ஸ அனுரூபாய.

ஏத்த² சாதி மிஸ்ஸகஸமோதா⁴னே ச, காதும் வட்டதீதி ஸம்ப³ந்தோ⁴.

‘‘பக்க²மானத்தஞ்ச …பே… கத²யிஸ்ஸாமா’’தி யம் வசனம் வுத்தம், தஸ்ஸ வசனஸ்ஸ ஓகாஸோதி யோஜனா. தம் பனாதி பக்க²மானத்தம் பன. ‘‘அட்³ட⁴மாஸமேவ தா³தப்³ப³’’ந்தி இமினா பக்க²மேவ தா³தப்³ப³ம் மானத்தம் பக்க²மானத்தந்தி வசனத்த²ம் த³ஸ்ஸேதி. ஹீதி ஸச்சம். தம் பனாதி பக்க²மானத்தம் பன, தா³தப்³ப³ந்தி ஸம்ப³ந்தோ⁴. அத்தனோ ஸீமந்தி அத்தனோ விஹாரஸீமம், மஹாஸீமந்தி அத்தோ². ஸோதே⁴த்வாதி ஸப்³பா³ஸம் ஹத்த²பாஸனயனவஸேன, ச²ந்தா³ரஹானம் ச²ந்த³னயனவஸேன, ஸீமதோ ப³ஹிகரணவஸேன ச ஸோதே⁴த்வா. சதுவக்³க³க³ணந்தி சதுவக்³க³ஸங்க⁴ம். க³ணோதி சேத்த² ஸங்கோ⁴யேவாதி⁴ப்பேதோ.

தத்ராதி ‘‘யோஜனா காதப்³பா³’’தி வசனே. முக²மத்தத³ஸ்ஸனந்தி உபாயமத்தத³ஸ்ஸனம், ஆதி³மத்தத³ஸ்ஸனம் வா. ‘‘ஆபன்னாய பி⁴க்கு²னியா’’தி பத³ம் ‘‘ஏவமஸ்ஸ வசனீயோ’’தி பதே³ கத்தா, ‘‘யாசாபேத்வா’’தி பதே³ காரிதகம்மம். ‘‘ப்³யத்தாய பி⁴க்கு²னியா’’தி பத³ம் ‘‘ஞாபேதப்³போ³’’தி பதே³ காரிதகத்தா, ‘‘ஸங்கோ⁴’’தி பத³ம் தத்தே²வ காரிதகம்மம். ‘‘ஏதம் காரண’’ந்தி தா⁴துகம்மம் அஜ்ஜா²ஹரிதப்³ப³ம். தப்³ப³பச்சயேன காரிதகம்மமேவ வுத்தம். ஞாபேதப்³பா³காரம் த³ஸ்ஸேந்தோ ஆஹ ‘‘ஸுணாது மே’’திஆதி³.

நிக்கி²த்தவத்தந்தி கரணத்தே² சேதம் உபயோக³வசனம். நிக்கி²த்தவத்தேனாதி ஹி அத்தோ². தத்தே²வாதி மாளகஸீமாயமேவ. ஹீதி ஸச்சம், யஸ்மா வா. அஸ்ஸாதி மானத்தசாரிகாய பி⁴க்கு²னியா. தத்ராதி தஸ்மா கத்தப்³ப³வினயகம்மபா⁴வதோதி அத்தோ². நோதி அம்ஹாகம், ஸந்திகந்தி ஸம்ப³ந்தோ⁴. சதூஹி பகதத்தபி⁴க்கு²னீஹி நிஸீதி³தப்³ப³ந்தி ஸம்ப³ந்தோ⁴. கா³மூபசாரதோ த்³வே லேட்³டு³பாதே அதிக்கமித்வாதி இத³ம் பி⁴க்கு²னீவிஹாரூபசாராதிக்கமம் ஸந்தா⁴ய வுத்தம். விஹாரூபசாரதோபீதி பி⁴க்கு²விஹாரூபசாரதோபி. தத்தா²தி பி⁴க்கு²னீனம் நிஸின்னட்டா²னம். குருந்தி³மஹாபச்சரீஸு பன வுத்தந்தி ஸம்ப³ந்தோ⁴. விஹாரஸ்ஸ சாதி பி⁴க்கு²விஹாரஸ்ஸ ச. கா³மஸ்ஸ உபசாரம் முஞ்சிதும் வட்டதீதி ந வுத்தந்தி யோஜனா. தஸ்மா கா³மூபசாரேபி நிஸீதி³தும் வட்டதீதி அதி⁴ப்பாயோ.

தாய பி⁴க்கு²னியா ஆரோசேதப்³ப³ந்தி ஸம்ப³ந்தோ⁴.

தத்தே²வாதி பி⁴க்கு²னீனம் நிஸீத³னட்டா²னேயேவ. டா²னந்தி பி⁴க்கூ²னம் டா²னம். ஏதீதி ஆக³ச்ச²தி. பகே³வாதி பாதோயேவ. தாயாதி மானத்தசாரினியா.

அனிக்கி²த்தவத்தாய பன பி⁴க்கு²னியாதி ஸம்ப³ந்தோ⁴. அஜானனபச்சயாதி அஜானனகாரணா. தந்தி வசனம். பாரிவாஸிகவத்தாதீ³னந்தி ஆதி³ஸத்³தே³ன ஆக³ந்துகவத்தபூரணனிஸ்ஸயபடிப்பஸ்ஸத்³தா⁴த³யோ ஸங்க³ண்ஹாதி. யுத்ததரம் தி³ஸ்ஸதீதி யுத்ததரம் ஹுத்வா தி³ஸ்ஸதி. இமினா அனிக்கி²த்தவத்தபி⁴க்கு²னா விய பி⁴க்கு²னியாபி அந்தோஉபசாரஸீமக³தானம்யேவ ஆரோசேதப்³ப³ம், ந கா³மே டி²தானம்பி க³ந்த்வா ஆரோசேதப்³ப³ந்தி தீ³பேதி. உபோஸதே²தி உபோஸத²தி³வஸே. ஏஸேவ நயோ பவாரணாயபி. தே³வஸிகந்தி தி³வஸே தி³வஸே. தஸ்மிம் கா³மேதி பி⁴க்கு²னீனம் வஸனகா³மே. அஞ்ஞத்ராதி பி⁴க்கு²னீனம் வஸனகா³மதோ அஞ்ஞஸ்மிம் கா³மே. தத்ராதி பி⁴க்கு²னீனம் வஸனகா³மம். த³ஸ்ஸேத்வாதி பி⁴க்கு²னீனம் த³ஸ்ஸேத்வா. தாயாதி மானத்தசாரினியா. விஹாரந்தி பி⁴க்கூ²னம் விஹாரம். உபசாரஸீமாயாதி உபசாரஸீமதோ ப³ஹீதி ஸம்ப³ந்தோ⁴. அயந்தி மானத்தசாரினீ.

வீஸதி க³ணோ இமஸ்ஸாதி வீஸதிக³ணோ, ஸங்கோ⁴, தஸ்மிம். மானத்தம் சரமானா பி⁴க்கு²னீதி யோஜனா. இத³ம் பக்க²மானத்தம் நாமாதி இத³ம் புப்³ப³வசனஸ்ஸ நிக³மவஸேன பரவசனஸ்ஸ கத²னத்தா²ய வுத்தந்தி த³ட்ட²ப்³ப³ம்.

தத்தா²தி திவிதே⁴ஸு மானத்தேஸு. யதே³தம் மானத்தம் அனுஞ்ஞாதந்தி ஸம்ப³ந்தோ⁴. பரதோதி பரஸ்மிம். பரிவாஸம் பரிவஸந்தஸ்ஸ மூலாயபடிகஸ்ஸிதஸ்ஸ உதா³யித்தே²ரஸ்ஸ அனுஞ்ஞாதந்தி ஸம்ப³ந்தோ⁴. ஆபஜ்ஜித்வாதி ஆபஜ்ஜனதோ. இத³ந்தி மானத்தம் வுச்சதீதி ஸம்ப³ந்தோ⁴. ஹீதி ஸச்சம், யஸ்மா வா. ஓதா⁴னஸமோதா⁴னந்தி ஏத்த² வசனத்தோ² ஹேட்டா² வுத்தோயேவ. தம்பீதி குருந்தி³யம் வுத்தவசனம்பி.

தந்தி அக்³க⁴ஸமோதா⁴னமிஸ்ஸகஸமோதா⁴னம், தா³தப்³ப³ந்தி ஸம்ப³ந்தோ⁴. ஏத்தாவதாதி ஏதபரிமாணேன வசனக்கமேன, ‘‘அயஞ்ஹி இத⁴ அதி⁴ப்பேதோ பரிவாஸோ நாமா’’தி (சூளவ. அட்ட². 102) வசனதோ பட்டா²ய யாவ ‘‘யோஜேத்வா தா³தப்³ப³’’ந்தி வசனம், தாவ வசனக்கமேனாதி அத்தோ². ‘‘தேன ஹி பி⁴க்க²வே…பே… த³ஸ்ஸேஸ்ஸாமா’’தி யம் வசனம் வுத்தந்தி யோஜனா. ‘‘அத்த²தோ’’தி இமினா ஸத்³தோ³பி க³ஹேதப்³போ³ அவினாபா⁴வதோ.

படிச்ச²ன்னபரிவாஸகதா²

102. யா பாளி வுத்தாதி ஸம்ப³ந்தோ⁴.

108. ததோதி பாளிதோ. தம் ஆபத்திந்தி தம் அந்தராபத்திம். அஸ்ஸாதி பி⁴க்கு²ஸ்ஸ. நிக்கி²த்தவத்தோ பி⁴க்கூ²தி ஸம்ப³ந்தோ⁴, ஹுத்வாதி வா. ஸோதி பி⁴க்கு², டி²தோ ஹுத்வாதி ஸம்ப³ந்தோ⁴. தஸ்ஸா ஆபத்தியாதி தஸ்ஸா அந்தராபத்தியா. படிச்ச²ன்னா ஹோதீதி அந்தராபத்திபி படிச்ச²ன்னா ஹோதி. தஸ்மிம்பீதி மூலாய படிகஸ்ஸனேபி. மக்கி²தாதி பிஸிதா, த⁴ம்ஸிதா வா. மக்கி²யந்தி பிஸியந்தி, த⁴ம்ஸியந்தீதி வா மக்கி²தா, பரிவுத்த²தி³வஸா. ததோதி பாளிதோ பரந்தி ஸம்ப³ந்தோ⁴. பரதோபி ஏஸேவ நயோ. ஏவந்திஆதி³ நிக³மனம். படிச்ச²ன்னவாரே த³ஸ்ஸிதா ஹோந்தீதி ஸம்ப³ந்தோ⁴.

ஸமோதா⁴னபரிவாஸகதா²

125. ததோதி படிச்ச²ன்னவாரதோ, பரம் த³ஸ்ஸிதந்தி ஸம்ப³ந்தோ⁴. ஏத்த² சாதி ஏதஸ்மிம் வாரே ச. யஸ்மாதி யஸ்மா காரணா, யேன காரணேன வா. தேனேவாதி தேனேவ காரணேன, தஸ்மா காரணா வா, ‘‘மூலாய…பே… தே³தூ’’தி வுத்தந்தி யோஜனா. தஸ்மா ஸப்³பே³ மக்கி²தாவ ஹோந்தீதி யோஜனா. ததோதி வாரதோ பரம் நிட்டா²பிதந்தி ஸம்ப³ந்தோ⁴.

அக்³க⁴ஸமோதா⁴னபரிவாஸகதா²

134. ததோதி வாரதோ பரம் த³ஸ்ஸிதோதி ஸம்ப³ந்தோ⁴. ததோதி வாரதோ பரம் பாளி ட²பிதாதி ஸம்ப³ந்தோ⁴. லஜ்ஜித⁴ம்மே வா உப்பன்னேதி ஸம்ப³ந்தோ⁴. யந்தி கம்மம். ததோதி வாரதோ பரம் ததே²வ பாளி ட²பிதாதி ஸம்ப³ந்தோ⁴.

138. ததோதி வாரதோ பரம் புரிமனயேனேவ பாளி ட²பிதாதி ஸம்ப³ந்தோ⁴.

ஸுத்³த⁴ந்தபரிவாஸாதி³கதா²

156. ததோதி வாரதோ பரம் ஸுத்³த⁴ந்தபரிவாஸோ த³ஸ்ஸிதோதி ஸம்ப³ந்தோ⁴.

160. ததோதி பாளிதோ பரம் பாளி ட²பிதாதி ஸம்ப³ந்தோ⁴.

165. தத்தா²தி பாளியம். அந்தரா…பே… அப்படிச்ச²ன்னாயோதிஆதீ³ஸு அத்தோ² த³ட்ட²ப்³போ³தி ஸம்ப³ந்தோ⁴.

166. பச்சி²மஸ்மிம் ஆபத்திக்க²ந்தே⁴தி ஏத்த² ஆபத்திக்க²ந்த⁴ஸ்ஸ பே⁴த³பா⁴வதோ கிம் ‘‘பச்சி²மஸ்மிம் ஆபத்திக்க²ந்தே⁴’’தி வுத்தந்தி ஆஹ ‘‘ஏகோவ ஸோ ஆபத்திக்க²ந்தோ⁴’’தி. அத² கஸ்மா ‘‘பச்சி²மஸ்மிம் ஆபத்திக்க²ந்தே⁴’’தி வுத்தந்தி ஆஹ ‘‘பச்சா² சா²தி³தத்தா பனா’’திஆதி³. ஏத்த² பனஸத்³தோ³ க³ரஹத்த²வாசகோ, ததா²பீதி ஹி அத்தோ². ஏகோபி ஆபத்திக்க²ந்தோ⁴ பச்சா² சா²தி³தத்தா பச்சி²மஸ்மிம் ஆபத்திக்க²ந்தே⁴தி வுத்தந்தி அதி⁴ப்பாயோ.

180. ‘‘வவத்தி²தா ஸம்பி⁴ன்னா’’தி ஏதம் வசனந்தி யோஜனா.

8. த்³வேபி⁴க்கு²வாரஏகாத³ஸகாதி³கதா²

181. ததோதி பாளிதோ பரம் வுத்தந்தி ஸம்ப³ந்தோ⁴. தத்தா²தி பாளியம். மிஸ்ஸகந்தி ஏத்த² கேஹி மிஸ்ஸகந்தி ஆஹ ‘‘து²ல்லச்சயாதீ³ஹி மிஸ்ஸக’’ந்தி.

184. ததோதி பாளிதோ பரம் வுத்தந்தி ஸம்ப³ந்தோ⁴. தத்தா²தி ‘‘இத⁴ பன பி⁴க்க²வே’’திஆதி³பாடே². தஞ்சாதி ‘‘இத⁴ பன பி⁴க்க²வே’’திஆதி³வசனஞ்ச இதோ புப்³பே³ அவுத்தம் ஸப்³ப³ம் வசனஞ்சாதி யோஜனா.

இதி ஸமுச்சயக்க²ந்த⁴கவண்ணனாய யோஜனா ஸமத்தா.