227. குஸசீராதி³படிக்கே²பகதா²

371. ‘‘அக்கனாளமய’’ந்தி இமினா அக்கனாளேன நிப்³ப³த்தம் அக்கனாளந்தி வசனத்த²ம் த³ஸ்ஸேதி. மகசிமயோதி ஏத்த² மகசிஸத்³தே³ன போத்த²கஸத்³த³ஸ்ஸ க³ந்தா²த³யோ அத்தே² நிவத்தேதி. மயஸத்³தே³ன புரிமனயேனேவ நிப்³ப³த்ததத்³தி⁴தம் த³ஸ்ஸேதி. ஸேஸானீதி அக்கனாளபோத்த²கேஹி ஸேஸானி குஸசீராதீ³னி. தேஸூதி குஸசீராதீ³ஸு.

372. திபட்டசீவரஸ்ஸ வாதி இத³ம் த்³விபட்டசீவரஸ்ஸ மஜ்ஜே² தா³னம் ஸந்தா⁴ய வுத்தம். தேஸந்தி ஸப்³ப³னீலகாதீ³னம். கஞ்சுகந்தி வாரணம். தஞ்ஹி கசியதி காயே ப³ந்தி⁴யதீதி கஞ்சுகோதி வுச்சதி. வேட²னேபீதி உண்ஹீஸேபி. தஞ்ஹி யஸ்மா யேன ஸீஸே வேடி²யதி, தஸ்மா வேட²னந்தி வுச்சதி. ருக்க²ச²ல்லிமயந்தி ஏத்த² ருக்க²ச²ல்லிஸத்³தே³ன திரீடஸத்³த³ஸ்ஸ வக்கலத்த²ம் த³ஸ்ஸேதி. வக்கலஞ்ஹி நிவஸனானம் அங்க³பச்சங்க³ம் திரோபா⁴வம் படிச்ச²ன்னபா⁴வம் ஏதி க³ச்ச²தி அனேனாதி வா ருக்க²ம் திரோபடிச்ச²ன்னம் ஹுத்வா ஏதி பவத்ததீதி வா திரீடந்தி வுச்சதி. அபி⁴தா⁴னே (அபி⁴தா⁴னப்பதீ³பிகாயம் 442 கா³தா²யம்) பன தரீடந்தி தகாரே இகாரவிரஹிதோ பாடோ² அத்தி². பாத³புஞ்ஜனந்தி பாதோ³ புஜியதி ஸோதி⁴யதி அனேனாதி பாத³புஞ்ஜனம், தாலுஜோ ததியக்க²ரோ.

374. ஸந்தே பதிரூபகே கா³ஹகேதி ஏத்த² பதிரூபகோ நாம பக்கமந்தஸ்ஸ பி⁴க்கு²னோ ஸந்தி³ட்ட²ஸம்ப⁴த்தோ. இமினா பதிரூபகே கா³ஹகே அஸதி அத³த்வா ஸங்கே⁴ன பா⁴ஜிதே ஸுபா⁴ஜிதமேவாதி த³ஸ்ஸேதி. ஸத்த ஜனாதி பக்கமந்தஉம்மத்தககி²த்தசித்தவேத³னட்டா சத்தாரோ, உக்கி²த்தகா தயோதி ஸத்த ஜனா.