221. பச்சி²மவிகப்பனுபக³சீவராதி³கதா²

359. கதபம்ஸுகூலோதி கதோ பம்ஸுகூலோ. இமினா ‘‘பம்ஸுகூலதோ’’தி பத³ஸ்ஸ விஸேஸனபரபத³த்தம் த³ஸ்ஸேதி. அக்³க³ளாரோபனேனாதி அக்³க³ளஸ்ஸ ஆரோபனேன. ‘‘ஸுத்தேனேவா’’தி ஏத்த² ஏவஸத்³தே³ன பிலோதிகம் நிவத்தேதி. அஞ்சி²த்வா அஞ்சி²த்வாதி ஆகட்³டி⁴த்வா ஆகட்³டி⁴த்வா. அபி⁴தா⁴து ஹி ஆகட்³ட⁴னத்தோ². ‘‘ஸங்கா⁴டிகோணோ தீ³கோ⁴’’தி இமினா விகண்ணோதி ஏத்த² விஸமோ கண்ணோ விகண்ணோதி கத்வா கண்ணஸத்³த³ஸ்ஸ கோணத்த²ம் த³ஸ்ஸேதி. ததோதி க³ளனதோ. லுஜ்ஜந்தீதி வலிம் க³ண்ஹந்தி. அட்ட²பத³கந்தி பத³ஸ்ஸ அட்ட²பதே³ன ஸிப்³பி³தம் அட்ட²பத³கந்தி வசனத்த²ம் த³ஸ்ஸேந்தோ ஆஹ ‘‘அட்ட²பத³கச்சி²ன்னேன பத்தமுக²ம் ஸிப்³பி³து’’ந்தி. தத்த² அட்ட²பத³கச்சி²ன்னேன பத்தமுக²ம் ஸிப்³பி³துந்தி அட்ட²பத³லிக²னேன தத்த² தத்த² க³ப்³ப⁴ம் த³ஸ்ஸேத்வா பத்தமுக²ம் ஸிப்³பி³தும். ‘‘அட்ட²பத³கச்ச²ன்னேனா’’திபி பாடோ², அட்ட²ப²லகாகாரேனாதி அத்தோ².

360. ‘‘ஆக³ந்துகபத்தம்பி தா³து’’ந்தி இமினா அன்வாதி³கந்தி பத³ஸ்ஸ அனுபச்சா² ஆக³ந்துகபா⁴வேன தீ³யதீதி அன்வாதி³கந்தி வசனத்த²ம் த³ஸ்ஸேதி. சதுத்த²க்க²ரேனபி பாடோ², அனுபச்சா² ஆக³ந்துகபா⁴வேன தீ⁴யதி ட²பீயதீதி அன்வாதி⁴கந்தி காதப்³போ³. இத³ம் பனாதி அன்வாதி⁴கம் பன.

361. ஸேஸஞாதீனந்தி மாதாபிதூஹி ஸேஸஞாதீனம். வினிபாதேதியேவாதி வினஸ்ஸந்தோ நிபாதேதியேவ.

362. ‘‘வஸ்ஸிகோ’’தி ஸங்கேதீயதி க³ண்ஹீயதீதி வஸ்ஸிகஸங்கேதந்தி வுத்தே சத்தாரோ மாஸாதி ஆஹ ‘‘சத்தாரோ மாஸே’’தி. ஹீதி ஸச்சம், யஸ்மா வா. ஆரஞ்ஞகஸ்ஸ பி⁴க்கு²னோதி ஸம்ப³ந்தோ⁴. தேனாதி ஆரஞ்ஞகேன பி⁴க்கு²னா.