210. வரயாசனகதா²

337. கதம் ப⁴த்தகிச்சம் யேனாதி கதப⁴த்தகிச்சோ, தஸ்மிம் ஸதீதி ஸம்ப³ந்தோ⁴. வுத்தனயேனேவாதி ராஹுலவத்து²ம்ஹி (மஹாவ. அட்ட². 105) வுத்தனயேனேவ. இத³ம் வத்த²ந்தி இத³ம் ஸிவேய்யகம் வத்த²ம், உப்பன்னந்தி ஸம்ப³ந்தோ⁴. ‘‘தாவா’’தி அஜ்ஜா²ஹரிதப்³போ³. ஏத்த²ந்தரேதி ஏதஸ்மிம் வத்து²ப்பன்னகாலமஜ்ஜே². கோசி பி⁴க்கூ²தி ஸம்ப³ந்தோ⁴. தேனாதி பம்ஸுகூலிகஹேதுனா. அயந்தி ஜீவகோ. க³ஹபதிசீவரந்தி ஏத்த² க³ஹபதீனம் சீவரந்தி அத்த²ம் படிக்கி²பந்தோ ஆஹ ‘‘க³ஹபதீஹி தி³ன்னம் சீவர’’ந்தி. வத்த²தா³னானிஸம்ஸபடிஸம்யுத்தாயாதி ‘‘வத்த²தோ³ ஹோதி வண்ணதோ³’’திஆதி³காய (ஸம். நி. 1.42) வத்த²தா³னஸ்ஸ ஆனிஸம்ஸேன படிஸம்யுத்தாய. விச்சா²வஸேன வுத்தோ ‘‘இதரீதரேனா’’தி ஸப்³ப³னாமஸத்³தோ³ அனியமத்தோ²தி ஆஹ ‘‘அப்பக்³கே⁴னபி மஹக்³கே⁴னபி யேன கேனசீ’’தி. பாவாரோதி உத்தராஸங்கோ³. ஸோ ஹி பாருபனத்தா²ய வரியதி இச்சி²யதீதி பாவாரோதி வுச்சதி. ‘‘கப்பாஸாதி³பே⁴தோ³’’தி இமினா தஸ்ஸ ஸரூபம் த³ஸ்ஸேதி. பகதிகோஜவமேவாதி பகதியா பி⁴க்கூ²னம் ஸாருப்பம் கோஜவமேவ. ஸோளஸனாடகித்தீ²னம் ட²த்வா நச்சயோக்³யத்தா மஹதீ பிட்டி² ஏதஸ்ஸாதி மஹாபிட்டி²யம், தமேவ கோஜவம் மஹாபிட்டி²யகோஜவம். தஸ்ஸ கிர லோமானி சதுரங்கு³லாதி⁴கானி ஹோந்தி.