185. சதுமஹாபதே³ஸகதா²

305. இத³ம் ந கப்பதீதிஆதீ³தி ‘‘இத³ம் ந கப்பதீ’’திஆத³யோ இமே சத்தாரோ மஹாபதே³ஸேதி யோஜனா. அபஸ்ஸயம் கத்வா தி³ஸியந்தி ஏத்தா²தி அபதே³ஸா ஓகாஸா, அபஸ்ஸயம் கத்வா தி³ஸியந்தி ஏதேஹீதி வா அபதே³ஸா காரணா, ‘‘மஹந்தா அபதே³ஸா மஹாபதே³ஸா. தஞ்சாதி மஹாபதே³ஸஸங்கா²தம் தஞ்ச ஸுத்தம், க³ஹேத்வாதி யோஜனா. பரிமத்³த³ந்தாதி புனப்புனம் மத்³த³ந்தா, உபபரிக்க²ந்தாதி அத்தோ². இத³ந்தி காரணம். தந்தி நவமஹாப²லஅபரண்ணம். தானீதி கு²த்³த³கப²லபானானி. ஹீதி ஸச்சம்.

தேஸந்தி ச²ன்னம் சீவரானம். தத்தா²தி ச²ஸு அனுலோமசீவரேஸு. ‘‘பாணகேஹி ஸஞ்ஜாதவத்த²’’ந்தி இமினா கோஸேய்யவத்த²பா⁴வம் த³ஸ்ஸேதி. த்³வே படாதி சீனபடஸோமாரபடா. து³கூலம் ஸாணஸ்ஸ அனுலோமந்தி யோஜனா.

தேஸம்யேவாதி த்³வின்னம் பத்தானமேவ. தேஸம்யேவாதி திண்ணம் தும்பா³னமேவ. தேஸம்யேவாதி த்³வின்னம் காயப³ந்த⁴னானமேவ. ஸேதச்ச²த்தந்தி ஸேதேஹி வத்தே²ஹி கதம் ச²த்தம். தேஸம்யேவாதி திண்ணம் ச²த்தானமேவ.

ஸம்பி⁴ன்னரஸந்தி ஸம்ஸக்³க³ரஸம். ஏத்த² பி⁴ஜ்ஜித்தா²தி பி⁴ன்னோதி வசனத்தே²ன பி⁴தி³தா⁴து த்³விதா⁴கரணஸங்கா²தோ பே⁴த³த்தோ² ஹோதி, தா⁴த்வத்த²பா³த⁴கேன ஸம்த்யூபஸக்³கே³ன பி⁴தி³தா⁴துயா பே⁴த³த்த²ம் பா³தே⁴த்வா ஸம்ஸக்³க³த்த²வாசகோ ஹோதீதி த³ட்ட²ப்³ப³ம். ச²ல்லிம்பீதி தசம்பி. ஸகலேனேவாதி ச²ல்லியா ஏவ. பாயாஸேன அஸம்ஸட்ட²ம் யம் ஸப்³பீ³தி யோஜனா. தானீதி தக்கோலஜாதிப²லாதீ³னி. யட்டி²மது⁴காதீ³ஸுபீதி மது⁴லட்டி²காதீ³ஸுபி. ‘‘லட்டி²மது⁴காதீ³ஸுபீ’’தி வா பாடோ², ஸோ அபாடோ²யேவ. யம் யந்தி வத்து². யதா²தி யேனாகாரேன, தோ⁴வியமானே தச்சி²யமானேதி ஸம்ப³ந்தோ⁴.

ஸம்பி⁴ன்னரஸந்தி வத்வா தமேவத்த²ம் த³ஸ்ஸேதும் வுத்தம் ‘‘ஸம்ஸட்ட²’’ந்தி. ஸபா⁴வந்தி யாவகாலம் கப்பியஸபா⁴வம். தஸ்மாதி யஸ்மா உபனேதி, தஸ்மா. தேனாதி ஸத்தாஹகாலிகேன. தத³ஹுபடிக்³க³ஹிதந்தி தத³ஹேவ படிக்³க³ஹிதம். த்³வீஹபடிக்³க³ஹிதேன ஸத்தாஹகாலிகேனாதி ஸம்ப³ந்தோ⁴.

ஏத்தா²தி காலிகஸம்ஸக்³கே³. ஆபத்தியோ வேதி³தப்³பா³தி யதா²க்கமம் ஆபத்தியோ வேதி³தப்³பா³. ஸப்³ப³த்தா²தி ஸப்³ப³ஸ்மிம் பே⁴ஸஜ்ஜக்க²ந்த⁴கே.

இதி பே⁴ஸஜ்ஜக்க²ந்த⁴கவண்ணனாய யோஜனா ஸமத்தா.