182. கேணியஜடிலவத்து²கதா²

300. காஜேஹீதி ஏத்த² காஜஸ்ஸ க³ணனம் த³ஸ்ஸேந்தோ ஆஹ ‘‘பஞ்சஹி காஜஸதேஹீ’’தி. ஏகேன காஜேன த்³வின்னம் குடானம் க³ஹிதத்தா வுத்தம் ‘‘குடஸஹஸ்ஸ’’ந்தி. வோதி தும்ஹே. ஸுட்டு² பஸன்னோதி ஸம்ப³ந்தோ⁴.

தத்தா²தி ‘‘அட்ட² பானானீ’’தி பாடே², அட்ட²ஸு பானேஸு வா. ‘‘அம்பே³ஹி கதபான’’ந்தி இமினா மஜ்ஜே²லோபஸமாஸம் த³ஸ்ஸேதி. தத்தா²தி ஆமபக்கேஸு. கரோந்தேன காதப்³ப³ந்தி ஸம்ப³ந்தோ⁴. ஆதி³ச்சபாகேனாதி ஆதி³ச்சஹேதுனா பசனேன. புரேப⁴த்தமேவ கப்பதீதி பி⁴க்கு²னா ஸயம் கதத்தா புரேப⁴த்தமேவ கப்பதி. தேன வுத்தம் ‘‘அனுபஸம்பன்னேஹீ’’திஆதி³. கதம் அம்ப³பானந்தி ஸம்ப³ந்தோ⁴. ஸப்³ப³பானேஸூதி ஜம்பு³பானாதீ³ஸு ஸப்³பே³ஸு பானேஸு.

தேஸூதி ஜம்பு³பானாதீ³ஸு ஸத்தஸு பானேஸு. பனஸத்³தோ³ விஸேஸத்த²ஜோதகோ. ஜம்பு³ப²லேஹீதி ஆமேஹி வா பக்கேஹி வா ஜம்பு³ப²லேஹி. அட்டி²கேஹீதி அட்டி² அஸ்மிமத்தீ²தி அட்டி²கம் ப²லம். ஜாதிரஸேனாதி யதா²ஜாதேன ரஸேன. இமினா மது⁴ஸக்க²ரகப்புராதீ³ஹி ந யோஜேதப்³போ³தி த³ஸ்ஸேதி. தம் பனாதி மது⁴கபானம் பன. முத்³தி³காதி முத்³தி³கப²லானி. ஸாலுகேதி கந்தே³. ஸத்தன்னம் த⁴ஞ்ஞானம் ப²லரஸந்தி தண்டு³லதோ⁴வனோத³கம். ‘‘பக்கடா³கரஸ’’ந்தி இமினா அபக்கடா³கரஸம் வட்டதீதி தீ³பேதி. ஹீதி ஸச்சம், வித்தா²ரோ வா. ரஸோதி பக்கரஸோ. படிக்³க³ஹேத்வா ட²பிதஸப்³பி³ஆதீ³ஹி பக்கானம் யாவஜீவிகானம் பத்தானம் ரஸோதி யோஜனா. பக்கம் யாவஜீவிகபத்தரஸந்தி ஸம்ப³ந்தோ⁴. யாவகாலிகபத்தானம்பீதி பிஸத்³தோ³ பகே³வ யாவஜீவிகபத்தானந்தி த³ஸ்ஸேதி. யம் பானந்தி யம் மது⁴கபுப்ப²ரஸபானம். ஸோதி மது⁴கபுப்ப²ரஸோ. தேனாதி மது⁴கபுப்பே²ன. யதோ காலதோ பட்டா²ய மஜ்ஜம் ந கரோந்தி, ததோதி யோஜனா. உச்சு²ரஸோ நிகஸடோ பச்சா²ப⁴த்தம் வட்டதி ஸத்தாஹகாலிகத்தா. இமே சத்தாரோ ரஸாதி ப²லபத்தபுப்ப²உச்சு²ரஸஸங்கா²தா இமே சத்தாரோ ரஸா. அக்³கி³ஹுத்தமுகா²தி யஞ்ஞா அக்³கி³ஹுதமுகா², அக்³கி³ஹுதஸேட்டா²தி அத்தோ².