163. கு³ளாதி³அனுஜானனகதா²

272. ஹீதி ஸச்சம். பக்கத்தாதி முக்³கா³னம் பக்கபா⁴வதோ. தேதி முக்³கா³.

274. அகப்பியகுடியந்தி அகப்பியகுடியா அந்தோ. அஸ்ஸாதி பி⁴க்கு²னோ ந வட்டதீதி ஸம்ப³ந்தோ⁴. தம்பீதி உண்ஹயாகு³ம்பி. பிஸத்³தே³ன பகே³வ ஆமிஸம் பசிதுந்தி த³ஸ்ஸேதி. உத்தண்டு³லப⁴த்தந்தி பக்கதண்டு³லதோ வியோகோ³தி உத்தண்டு³லோ, உகாரோ ஹி வியோக³த்த²வாசகோ, அபக்கதண்டு³லோதி அத்தோ². உத்தண்டு³லமயம் ப⁴த்தந்தி உத்தண்டு³லப⁴த்தம். ஸகிம் குதி²தேஸு கீ²ரதக்காதீ³ஸு அக்³கி³ம் தா³தும் வட்டதீதி யோஜனா. பி³ளாலாதீ³னம் ஸத்தானம் ஸமூஹோ ரூள்ஹீவஸேன உக்கபிண்ட³கோதி வுச்சதீதி ஆஹ ‘‘பி³ளாலமூஸிககோ³தா⁴மங்கு³ஸா’’தி. விகா⁴ஸாத³பா⁴வேன நிஹதமானத்தா காயவாசம் த³மேதீதி த³மகோ விகா⁴ஸாதோ³தி ஆஹ ‘‘விகா⁴ஸாதா³’’தி.

276. ததோ நீஹடந்தி ஏத்த² தஸத்³த³ஸ்ஸ விஸயம் த³ஸ்ஸேந்தோ ஆஹ ‘‘யத்தா²’’திஆதி³. யத்தா²தி யஸ்மிம் டா²னே. நீஹடந்தி நீஹரித்வா ஹரிதம்.

278. வனட்ட²ம் போக்க²ரட்ட²ந்தி ஏத்த² வனே திட்ட²தீதி வனட்டோ², போக்க²ரே திட்ட²தீதி போக்க²ரட்டோ²தி வசனத்த²ம் த³ஸ்ஸேந்தோ ஆஹ ‘‘வனே சேவா’’திஆதி³. ‘‘பது³மினிக³ச்சே²’’தி இமினா போக்க²ரஸத்³தோ³ பது³மவாசகோதி த³ஸ்ஸேதி. யஸ்ஸ பீ³ஜம் அங்குரம் ந ஜனேதி, தம் ப²லம் அபீ³ஜம் நாமாதி யோஜனா.