157. ஸோணகுடிகண்ணவத்து²கதா²

257. ஏதேனாதி ‘‘குரரக⁴ரே’’தி பாடே²ன. அஸ்ஸாதி மஹாகச்சானஸ்ஸ. பபாதனாமகேதி யஸ்மா மஹாதடோ ஏத்த² அத்தி², தஸ்மா பபாதனாமகோ ஹோதி. ஏதேனாதி ‘‘பபாதகே பப்³ப³தே’’தி பாடே²ன. அஸ்ஸாதி மஹாகச்சானஸ்ஸ. கோடிஅக்³க⁴னகம் பிளந்த⁴னம் கண்ணே ஏதஸ்ஸத்தீ²தி குடிகண்ணோதி வசனத்த²ம் த³ஸ்ஸேந்தோ ஆஹ ‘‘கோடிஅக்³க⁴னகம் பனா’’திஆதி³. பிளந்த⁴தி அனேனாதி பிளந்த⁴னம், அலங்காரோ. த³ந்தஜோ சதுத்த²க்க²ரோ. ‘‘பஸாத³ஜனக’’ந்தி இமினா பஸாத³ம் ஜனேதீதி பாஸாதி³கோதி வசனத்த²ம் த³ஸ்ஸேதி. பஸாத³னீயந்தி பஸாதி³தப்³ப³ம், பஸாதி³தும் அரஹந்தி அத்தோ². அத்த²வசனந்தி அத்தோ² வுச்சதி அனேனாதி அத்த²வசனம். பாளியம் இதா³னி போத்த²கேஸு ‘‘பஸாத³னீய’’ந்தி பாடோ² நத்தி². ‘‘பாஸாதி³க’’ந்திபத³ஸ்ஸ புப்³பே³ ‘‘த³ஸ்ஸனீய’’ந்தி பாடோ²யேவ அத்தி². உத்தமத³மத²ஸமத²ந்திஏத்த² த³மத²ஸத்³த³ஸ்ஸ ஞாணத்த²ஞ்ச இந்த்³ரியஸம்வரத்த²ஞ்ச ஸமத²ஸத்³த³ஸ்ஸ ஸமாத⁴த்த²ஞ்ச சித்தூபஸமத்த²ஞ்ச த³ஸ்ஸேந்தோ ஆஹ ‘‘உத்தமம் த³மத²ஞ்சா’’திஆதி³. சஸத்³தே³ன த்³வந்த³வாக்யம் த³ஸ்ஸேதி. விஸூகாயிகவிப்ப²ந்தி³தானந்தி விஸூகாய படிபக்கா²ய பவத்தானம் தி³ட்டி²சித்தஸங்கா²தானம் விவித⁴சலனானம். ‘‘வீரியிந்த்³ரிய’’ந்தி இமினா யதிந்த்³ரியந்தி ஏத்த² யதஸத்³தோ³ வீரியவாசகோதி த³ஸ்ஸேதி. நாக³ந்தி ஏத்த² நத்தி² ஆகு³ பாபமேதஸ்ஸாதி நாகோ³தி வசனத்த²ம் த³ஸ்ஸேந்தோ ஆஹ ‘‘ஆகு³விரஹித’’ந்தி கிம் தி³வஸதோ பட்டா²யாதி ஆஹ ‘‘மம பப்³ப³ஜ்ஜாதி³வஸதோ பட்டா²யா’’தி. கண்ஹா மத்திகா உத்தரி ஏத்தா²தி கண்ஹுத்தராதி அத்த²ம் த³ஸ்ஸேந்தோ ஆஹ ‘‘கண்ஹமத்திகுத்தரா’’தி. ‘‘உபரீ’’தி இமினா உத்தரஸத்³த³ஸ்ஸ அத்த²ம் த³ஸ்ஸேதி. ‘‘கு³ன்னம் கு²ரேஹீ’’தி இமினா கு³ன்னம் கு²ரகண்டகஸதி³ஸத்தா கோ³கண்டகா நாமாதி த³ஸ்ஸேதி. தே கோ³கண்டகே ரக்கி²துந்தி ஸம்ப³ந்தோ⁴. ஏவம் க²ரா பூ⁴மி ஹோதீதி யோஜனா. ஏதேஹீதி ஏரகூ³ஆதீ³ஹி சதூஹி திணேஹி. தந்தி ஏரகூ³திணம். தேனாதி மோரகூ³திணேன. ஜந்துஸ்ஸ வண்ணோதி ஸம்ப³ந்தோ⁴. ஸேனாஸனம் பஞ்ஞபேஸீதி ஏத்த² கிம் நாம ஸேனாஸனம் பஞ்ஞபேஸீதி ஆஹ ‘‘பி⁴ஸிம் வா கடஸாரகம் வா பஞ்ஞபேஸீ’’தி. பஞ்ஞபேத்வா ச பன ஸோணஸ்ஸ ஆரோசேஸி. கிம் ஆரோசேஸீதி ஆஹ ‘‘ஆவுஸோ’’திஆதி³. ஸத்தா² வஸிதுகாமோதி ஸம்ப³ந்தோ⁴.

258. ‘‘தஸ்ஸ ஸோணஸ்ஸா’’தி இமினா படிபா⁴து தந்தி ஏத்த² ‘‘த’’ந்திபத³ம் ஸாம்யத்தே² உபயோக³வசனந்தி த³ஸ்ஸேதி. தந்தி தவ. அட்ட²கவக்³கி³கானீதி அட்ட²பமாணோ, அட்ட²ஸமூஹோ வா வக்³கோ³ ஏதேஸந்தி அட்ட²கவக்³கி³கானி. காமஸுத்தாதீ³னி (ஸு. நி. 772 ஆத³யோ) ஸோளஸ ஸுத்தானி. யோதி புக்³க³லோ, ஸமன்னாக³தோதி ஸம்ப³ந்தோ⁴. அரியோபீதி பிஸத்³தோ³ ந கேவலம் ஸுசிஸமன்னாக³தோயேவ பாபே ந ரமதி, அத² கோ² அரியோபீதி த³ஸ்ஸேதி. ‘‘படிபா⁴து த’’ந்தி பாட²தோ யாவ ‘‘ஸுசீதி வுத்த’’ந்தி பாடா² கேஸுசியேவ அட்ட²கதா²போத்த²கேஸு அத்தி². அயம் க்²வஸ்ஸாதி ஏத்த² அஸ்ஸஸத்³தோ³ ஆக்²யாதோதி ஆஹ ‘‘ப⁴வேய்யா’’தி. பரித³ஸ்ஸேஸீதி பஞ்ச வரானி பரிச்சி²ந்தி³த்வா த³ஸ்ஸேஸி. யம் வசனம் மே உபஜ்ஜா²யோ ஜானாபேதி, தஸ்ஸ வசனஸ்ஸ அயம் காலோ ப⁴வேய்யாதி யோஜனா.

259. வினயத⁴ரபஞ்சமேனாதி ஏத்த² உபஜ்ஜா²யபஞ்சமேனாதி அத்த²ம் படிக்கி²பந்தோ ஆஹ ‘‘அனுஸ்ஸாவனாசரியபஞ்சமேனா’’தி. உபாஹனகோஸகோதி உபாஹனாய பக்கி²பனோகாஸோ கோஸகோ. ஏளகசம்மஅஜசம்மேஸு அகப்பியம் நாம நத்தி². மிக³சம்மே பன கிஞ்சி வட்டதி, ந கிஞ்சி வட்டதி. தம் விப⁴ஜித்வா த³ஸ்ஸேந்தோ ஆஹ ‘‘மிக³சம்மே’’திஆதி³. ஏதேஸம்யேவாதி ஏணிமிகா³தீ³னம் ச²ன்னமேவ. அஞ்ஞேஸம் பனாதி ச²ஹி மிகே³ஹி அவஸேஸானம் பன. தேஸம் சம்மம் ந வட்டதீதி ஸம்ப³ந்தோ⁴.

கா³தா²யம் மக்கடோ ச காளஸீஹோ ச ஸரபோ⁴ ச கத³லிமிகோ³ ச கேசி யே வாளமிகா³ அத்தி², தே சாதி யோஜனா. தேஸந்தி மக்கடாதீ³னம்.

தத்தா²தி கா³தா²ய, மக்கடாதீ³ஸு வா. ‘‘ஸீஹப்³யக்³க⁴அச்ச²தரச்சா²’’தி இமினா வாளமிகா³னம் ஸரூபம் த³ஸ்ஸேதி. ஏத்தகாயேவ வாளமிகா³தி ஆஹ ‘‘ந கேவல’’ந்திஆதி³. ஏதேஸம்யேவாதி ஸீஹப்³யக்³க⁴அச்ச²தரச்சா²னமேவ. ந சம்மம் ந வட்டதீதி ஸம்ப³ந்தோ⁴. யேஸந்தி ச²ன்னம் ஏணிமிகா³தீ³னம். தேதி ச² ஏணிமிகா³தி³கே. ஹி ஸச்சம் ஸப்³பே³ஸம் ஏதேஸம் வாளமிகா³னம் சம்மம் ந வட்டதீதி யோஜனா. ஆஹரித்வா வா ந தி³ன்னந்தி ஆஹரித்வா வா ஹத்தே² வா பாத³மூலே வா ட²பேத்வா ந தி³ன்னம். ‘‘க³ணனம் ந உபேதீ’’தி இமினா க³ணனம் உபக³ச்ச²தீதி க³ணனூபக³ந்தி அத்த²ம் த³ஸ்ஸேதி. அதி⁴ட்டி²தஞ்சாதி அதி⁴ட்டி²தம் பன. யதா³தி யஸ்மிம் காலே. ததோதி காலதோ.

இதி சம்மக்க²ந்த⁴கவண்ணனாய யோஜனா ஸமத்தா.