91. ஸங்கு⁴போஸதா²தி³கதா²

168. ‘‘ஸம்மஜ்ஜித்வா’’தி பத³மபேக்கி²த்வா ஸோ தே³ஸோதி ஏத்த² ‘‘உபயோக³த்தே² பச்சத்தவசன’’ந்தி வுத்தம். ஏதந்தி ‘‘ஸோ தே³ஸோ ஸம்மஜ்ஜிதப்³போ³’’திஆதி³வசனம். தேனாதி தேன ஹேதுனா. அட்ட²கதா²சரியா ‘‘ஸம்மஜ்ஜனீ…பே… வுச்சதி’’ இதி ஆஹூதி யோஜனா.

ஸம்மஜ்ஜனீதி ஸம்மஜ்ஜனகரணம். பதீ³போதி பதீ³புஜ்ஜலனம். உத³கந்தி உத³கட்ட²பனம். ஆஸனேனாதி ஆஸனபஞ்ஞாபனேன. ‘‘இதீ’’தி அஜ்ஜா²ஹரிதப்³ப³ம். உபோஸத²ஸ்ஸாதி நவவித⁴ஸ்ஸ உபோஸத²ஸ்ஸ புப்³ப³கரணந்தி ஸம்ப³ந்தோ⁴. ஏதானீதி சத்தாரி கம்மானி. வுச்சதீதி கதி²யதி. இத³ம் ‘‘ஏதானீ’’தி கம்மஸ்ஸ ச ‘‘புப்³ப³கரண’’ந்தி ஆகாரஸ்ஸ ச அபே⁴த³த்தா ஆஸன்னம் ஆகாரமபேக்கி²த்வா ஏகவசனவஸேன வுத்தம். ‘‘அக்கா²தானீ’’தி இத³ம் பன ‘‘இமானி சத்தாரீ’’தி கம்மமபேக்கி²த்வா ப³ஹுவசனவஸேன வுத்தந்தி த³ட்ட²ப்³ப³ம்.

ச²ந்த³பாரிஸுத்³தி⁴உதுக்கா²னந்தி ச²ந்த³க்கா²னஞ்ச பாரிஸுத்³தி⁴க்கா²னஞ்ச உதுக்கா²னஞ்ச. பி⁴க்கு²க³ணனாதி பி⁴க்கூ² க³ணேத்வா அக்கா²னம். ஓவாதோ³தி பி⁴க்கு²னீஹி யாசிதஸ்ஸ ஓவாத³ஸ்ஸ அக்கா²னம். ஏதானீதி ஏதானி பஞ்ச. புப்³ப³கரணதோ பச்சா²தி புப்³ப³கரணஸ்ஸ கரணதோ பச்சா². ஏத்த² ச ‘‘புப்³ப³கரணதோ பச்சா² கத்தப்³பா³னீ’’தி இத³ம் கத்தப்³பா³காரஸ்ஸேவ விஸேஸனம், ந அத்த²ஸ்ஸ. அயம் பன விஸேஸோ – ஸங்க⁴ஸன்னிபாததோ புப்³ப³பா⁴கே³ கத்தப்³ப³த்தா புப்³ப³கரணம் நாம, உபோஸத²கரணதோ புப்³ப³பா⁴கே³ கத்தப்³ப³த்தா புப்³ப³கிச்சம் நாமாதி.

உபோஸதோ²தி உபோஸத²தி³வஸோ. யாவதிகா ச பி⁴க்கூ²தி யத்தகா பி⁴க்கூ². கம்மபத்தாதி உபோஸத²கம்மஸ்ஸ பத்தா யுத்தா அனுரூபா. தாவதிகா பி⁴க்கூ² ஹத்த²பாஸம் அவிஜஹித்வா ஏகஸீமாயம் டி²தா ச ஹோந்தீதி யோஜனா. ஸபா⁴கா³பத்தியோதி வத்து²ஸபா⁴கா³ ஆபத்தியோ. வஜ்ஜனீயாதி வஜ்ஜேதப்³பா³. புக்³க³லாதி க³ஹட்டா²தி³புக்³க³லா. தஸ்மிந்தி தஸ்மிம் உபோஸத²ஸீமமாளகே. ஏதானி சத்தாரீதி பாட²ஸேஸோ.

ஆக³தேஹி தேஹி பி⁴க்கூ²ஹீதி யோஜனா. பன்னரஸோபீதி பிஸத்³தே³ன ந கேவலம் பாளியம் ஆக³தனயேனேவ அதி⁴ட்டா²தும் வட்டதி, அத² கோ² ‘‘அஜ்ஜ மே உபோஸதோ² பன்னரஸோ’’திபீதி த³ஸ்ஸேதி.