84. பக்க²க³ணனாதி³உக்³க³ஹணானுஜானனகதா²

156. கதினம் பூரணீதி கதினம் திதீ²னம் பூரணீ. கோ தி³வஸோதி கித்தகோ தி³வஸோ. அய்யாயத்தந்தி அய்யேஹி பி⁴க்கூ²ஹி ஆயத்தம் ஆப³த்³த⁴ம். ஸம்ஹரித்வாதி புன ஸலாகம் ஸம்ஹரித்வா. அயம் பாடோ² கேஸுசி அட்ட²கதா²போத்த²கேஸு நத்தி². காலவதோதி ஏத்த² வந்துபச்சயோ ஸ்வத்தோ²தி ஆஹ ‘‘காலஸ்ஸேவா’’தி. ஏவஸத்³தோ³ பன ஸம்ப⁴வதோ யுஜ்ஜியதி. பகே³வாதி பாதோவ.

158. ஸாயம்பீதி ஸாயன்ஹேபி. பிஸத்³தே³ன அஞ்ஞம்பி ஸரணகாலம் ஸம்பிண்டே³தி.

159. ஆணாபேதுந்தி ஏத்த² அனாணாபேதப்³ப³பி⁴க்கூ² அபனேத்வா ஆணாபேதப்³ப³பி⁴க்கூ² த³ஸ்ஸேதும் வுத்தம் ‘‘கிஞ்சி கம்ம’’ந்திஆதி³. ஸதா³காலமேவ கிஞ்சி கம்மம் கரோந்தோதி யோஜனா. த⁴ம்மகதி²காதீ³ஸூதிஆதி³ஸத்³தே³ன க³ணவாசகாத³யோ ஸங்க³ண்ஹாதி. வாரேனாதி பரியாயேன. ஸம்முஞ்சனிந்தி யட்டி²ஸம்முஞ்சனிம் வா முட்டி²ஸம்முஞ்சனிம் வா. ஸமம், ஸுட்டு² வா முஞ்சதி ஸோதே⁴தி இமாயாதி ஸம்முஞ்சனீ, தாலுஜோ பட²மோ. தம்பீதி ஸாகா²ப⁴ங்க³ம்பி.

160. வுத்தனயேனேவாதி ஸம்மஜ்ஜனே வுத்தனயேனேவ. புன ஆஹரிதப்³பா³னீதி ஸங்கி⁴காவாஸம் ஆஸனானி புன ஆஹரிதப்³பா³னி. தட்டிகாயோபீதி வேணுஆதி³மயா தட்டிகாயோபி.

161. கபல்லிகா வாதி கபாலேஸு பரியாபன்னா பதீ³பகபாலா வா. தந்தி தேலாதி³ம். பரியேஸிதப்³பா³னீதி அனவஜ்ஜபரியேஸனேன பரியேஸிதப்³பா³னி.