78. பாதிமோக்கு²த்³தே³ஸகதா²

150. இமம் நிதா³னந்தி பாதிமோக்க²ஸ்ஸ இமம் நிதா³னம். ஸுதா கோ² பனாதி ஏத்த² ஸுய்யித்தா²தி ஸுதா, ஸுய்யஸ்ஸந்தீதி வா ஸுதா, பாராஜிகுத்³தே³ஸாத³யோ. ஸுதா ச ஸுதா ச ஸுதாதி ஸரூபேகஸேஸோ காதப்³போ³. அவஸேஸந்தி நிதா³னுத்³தே³ஸாதி³தோ அவஸேஸம் பாராஜிகுத்³தே³ஸாதி³. ஸுதேனாதி ஸுதஸத்³தே³ன. ‘‘அத்தே² அஸம்ப⁴வதோ ஸத்³தே³ வுத்தவிதா⁴னம் ஹோதீ’’தி ஹி பரிபா⁴ஸதோ ‘‘ஸுதேனா’’தி ஏத்த² ஸத்³தோ³வ க³ஹேதப்³போ³. தேன நயேனாதி தேன நிதா³னுத்³தே³ஸனயேன.

அடவிமனுஸ்ஸப⁴யந்தி அடவியம் நிவஸந்தஸ்ஸ மனுஸ்ஸஸ்ஸ ப⁴யம், வனசரகப⁴யந்தி அத்தோ². ராஜந்தராயோதிஆதீ³ஸு ஏவம் விஸேஸோ வேதி³தப்³போ³தி யோஜனா. த³வதா³ஹோதி தா³யம் த³ஹதீதி த³வதா³ஹோ ஆகாரஸ்ஸ ரஸ்ஸம், யகாரஸ்ஸ ச வகாரம் கத்வா. நந்தி பி⁴க்கு²ம். ஏகம் வா பி⁴க்கு²ந்தி யோஜனா. பட²மோ வா உத்³தே³ஸோதி நிதா³னுத்³தே³ஸோ. ஏத்தா²தி பஞ்சஸு உத்³தே³ஸேஸு. யஸ்மிந்தி உத்³தே³ஸே. ஸோபீதி உத்³தே³ஸோபி. ஸுதேனேவ ஸாவேதப்³போ³தி ஸுதபதே³னேவ ஸங்க⁴ஸ்ஸ ஸாவேதப்³போ³தி ஏவஸத்³தோ³ ‘‘ந வித்தா²ரேனா’’தி த³ஸ்ஸேதி.

அனஜ்ஜி²ட்டா²தி ஏத்த² உபஸக்³க³வஸேன இஸுதா⁴துஸ்ஸ இச்சா²கந்திதோ அஞ்ஞமத்த²ம் த³ஸ்ஸேந்தோ ஆஹ ‘‘அனாணத்தா, அயாசிதா வா’’தி. ஏத்த² ‘‘அனாணத்தா’’தி இத³ம் தே²ரேன அனாணத்தபா⁴வம் ஸந்தா⁴ய வுத்தம். ‘‘அயாசிதா’’தி இத³ம் ஸம்முதிலத்³தே⁴ன நவகேன அயாசிதபா⁴வம் ஸந்தா⁴ய வுத்தந்தி த³ட்ட²ப்³ப³ம். ஏத்தா²தி ‘‘அனஜ்ஜி²ட்டா² த⁴ம்மம் பா⁴ஸந்தீ’’தி வசனே. த⁴ம்மஜ்ஜே²ஸகேதி த⁴ம்மகத²னத்தா²ய அஜ்ஜே²ஸதீதி த⁴ம்மஜ்ஜே²ஸகோ, தஸ்மிம். ஆபுச்சி²த்வா வா தேன ஸங்க⁴த்தே²ரேன யாசிதோ ஹுத்வா வாதி யோஜனா. வாரபடிபாடியாதி வாரானுக்கமேன. தே³ஹீதி வாதி ஏத்த² இதி-வா-ஸத்³தோ³ ‘‘ப⁴ண’’ இதிபதே³ன ச ‘‘கதே²ஹி’’ இதிபதே³ன ச யோஜேதப்³போ³. ‘‘ப⁴ண’’ இதி வா ‘‘கதே²ஹி’’இதி வா ‘‘தே³ஹி’’இதி வா வத்தப்³பா³தி யோஜனா. தீஹிபி விதீ⁴ஹீதி ஓஸாரணகத²னஸரப⁴ஞ்ஞஸங்கா²தேஹி தீஹி ஸஜ்ஜனேஹி. ஏத்த² ச ஸுத்தஸ்ஸ ஓஸாரியதே உச்சாரியதே ஓஸாரணம், அத்த²ஸ்ஸ கதி²யதே கத²னம், ஸுத்தஸ்ஸ ச தத³த்த²ஸ்ஸ ச ஸரேன ப⁴ணியதே ஸரப⁴ஞ்ஞம். ஓஸாரேஹீதி ஸுத்தம் உச்சாரேஹி. கதே²ஹீதி அத்த²ம் கதே²ஹி. ஸரப⁴ஞ்ஞந்தி ஸுத்தஸ்ஸ ச தத³த்த²ஸ்ஸ ச ஸரேன ப⁴ணனம். நந்தி ஸத்³தி⁴விஹாரிகம். ஸஜ்ஜா²யம் அதி⁴ட்ட²ஹித்வாதி ‘‘ஸஜ்ஜா²யம் கரோமீ’’தி அதி⁴ட்ட²ஹித்வா. ஏத்தா²தி அஜ்ஜே²ஸனட்டா²னே.

நிஸ்ஸிதகேதி ஸத்³தி⁴விஹாரிகாத³யோ. ஸோதி ஸங்க⁴த்தே²ரோ, ‘‘வத்தப்³போ³’’திபதே³ கம்மம், ‘‘வத³தீ’’திஆதீ³ஸு பதே³ஸு கத்தா. ஆரத்³த⁴ந்தி ஸங்கே⁴ன ஆரத்³த⁴ம். ட²பேத்வாதி த⁴ம்மஸவனம் ட²பேத்வா. ஓஸாரேத்வாதி பட²மம் ஸுத்தம் ஓஸாரேத்வா. புன கதே²ந்தேனாதி பச்சா² அத்த²ம் கதே²ந்தேன. அட்ட²பேத்வாயேவ வாதி ஸுத்தஸ்ஸ ச அத்த²ஸ்ஸ ச அந்தரா அட்ட²த்வா ஏவ வா. கதே²தப்³ப³ந்தி அத்த²ஜாதம் கதே²தப்³ப³ம். கதே²ந்தஸ்ஸ…பே… நயோதி பட²மம் அத்த²ம் கதே²த்வா புன ஸுத்தஞ்ச அத்த²ஞ்ச ஸரேன ப⁴ணந்தஸ்ஸ புன ஆக³தேபி ஏஸேவ நயோதி அத்தோ².

உபனிஸின்னகதா²யபீதி ஸமீபே நிஸின்னேன கதா²யபி. தேனாதி ஸங்க⁴த்தே²ரேன. வத்தும் வட்டதீதி விஸேஸேத்வா வத்தும் வட்டதி. தேனாதி மனுஸ்ஸேஹி ஜானனபி⁴க்கு²னா. ஸங்க⁴த்தே²ரோ ப⁴ணதி, துண்ஹீ வா ஹோதீதி ஸம்ப³ந்தோ⁴. ‘‘புச்ச²ந்தீ’’தி வுத்தேதி யோஜனா. அனுமோத³னாதீ³ஸுபீதிஆதி³ஸத்³தே³ன த⁴ம்மகதா²த³யோ ஸங்க³ண்ஹாதி. ஸங்க⁴த்தே²ரோ அனுஜானாதீதி ஸம்ப³ந்தோ⁴. ஸப்³ப³த்தா²தி ஸப்³பே³ஸு விஹாரஅந்தரக⁴ரேஸு.

ஸஜ்ஜா²யந்தி ஸயம் இஸ்ஸரேன அயனம் உச்சாரணம், கேனசி அனஜ்ஜி²ட்டோ² ஸயம் அதி⁴இஸ்ஸரேன அயனம் உச்சாரணந்தி அத்தோ². தே²ரோதி ஸத்³தி⁴விஹாரோ தே²ரோ. விஸ்ஸமிஸ்ஸாமீதி கே²த³விரஹிதம் க³மிஸ்ஸாமி. ஆபுச்சி²தப்³ப³ந்தி பட²மதே²ரம்பி புன ஆக³தத்தே²ரம்பி ஆபுச்சி²தப்³ப³ம். ஏகேன ஸங்க⁴த்தே²ரேன அனுஞ்ஞாதேனாதி ஸம்ப³ந்தோ⁴. அஞ்ஞஸ்மீந்தி அனுஞ்ஞாதத்தே²ரதோ அஞ்ஞஸ்மிம் தே²ரேதி ஸம்ப³ந்தோ⁴. தந்தி புன ஆக³தம் தே²ரம். அத்தானம் ஸம்மனிதப்³ப³ந்தி ஏத்த² பச்சத்தே உபயோக³வசனந்தி ஆஹ ‘‘அத்தா ஸம்மனிதப்³போ³’’தி. கிம் ஸம்மதேன பரிஸம் அனோலோகேத்வா புச்சி²தப்³போ³தி ஆஹ ‘‘புச்ச²ந்தேன பனா’’திஆதி³.

153. மேதி மய்ஹம். இதோதி புக்³க³லதோ, உப்பன்னோதி ஸம்ப³ந்தோ⁴. புரம்ஹாகந்தி பத³ஸ்ஸ புரே அம்ஹாகந்தி பத³ச்சே²த³ம் கத்வா புரேஸத்³தோ³ பட²மத்தோ²தி ஆஹ ‘‘பட²மம் அம்ஹாக’’ந்தி. படிகச்சேவஸத்³தோ³ பகே³வபரியாயோ, ‘‘பட²மதரமேவா’’தி இமினா தஸ்ஸ அத்த²ம் த³ஸ்ஸேதி. பூ⁴தமேவாதி விஜ்ஜமானமேவ, தத²மேவ வா.