7. பப்³ப³ஜ்ஜாகதா²

31. போராணானுபோராணானந்தி புராணே ச அனுபுராணே ச ப⁴வானம். ஏகஸட்டீ²தி ஏகோ ச ஸட்டி² ச, ஏகேன வா அதி⁴கா ஸட்டி² ஏகஸட்டி².

தத்ராதி தேஸு ஏகஸட்டி²மனுஸ்ஸஅரஹந்தேஸு. புப்³ப³யோகோ³தி புப்³பே³ கதோ உபாயோ, புப்³பூ³பனிஸ்ஸயோதி அத்தோ². வக்³க³ப³ந்தே⁴னாதி ஸமூஹம் கத்வா ப³ந்தே⁴ன. தேதி பஞ்சபஞ்ஞாஸ ஜனா. ஜா²பேஸ்ஸாமாதி ட³ய்ஹிஸ்ஸாம. நீஹரிம்ஸூதி கா³மதோ நீஹரிம்ஸு. தேஸூதி பஞ்சபஞ்ஞாஸஜனேஸு. பஞ்ச ஜனே ட²பேத்வாதி ஸம்ப³ந்தோ⁴. ஸேஸாதி பஞ்சஹி ஜனேஹி அவஸேஸா. ஸோதி யஸோ தா³ரகோ. தேபீதி சத்தாரோபி ஜனா. தத்தா²தி ஸரீரே. தே ஸப்³பே³பீதி யஸஸ்ஸ மாதாபிதுப⁴ரியாஹி ஸத்³தி⁴ம் ஸப்³பே³பி தே ஸஹாயகா. தேனாதி புப்³ப³யோகே³ன.

ஆமந்தேஸீதி கதே²ஸி.

32. தி³ப்³பே³ஸு விஸயேஸு ப⁴வா தி³ப்³பா³ லோப⁴பாஸாதி த³ஸ்ஸேந்தோ ஆஹ ‘‘தி³ப்³பா³ நாமா’’திஆதி³. லோப⁴பாஸாதி லோப⁴ஸங்கா²தா ப³ந்த⁴னா. அஸவனதாதி ஏத்த² கரணத்தே² பச்சத்தவசனந்தி ஆஹ ‘‘அஸவனதாயா’’தி. பரிஹாயந்தீதி ஏத்த² கேன பரிஹாயந்தீதி ஆஹ ‘‘விஸேஸாதி⁴க³மதோ’’தி. விஸேஸாதி⁴க³மதோதி மக்³க³ப²லஸங்கா²தஸ்ஸ விஸேஸஸ்ஸ அதி⁴க³மதோ.

33. அந்தம் லாமகம் கரோதீதி அந்தகோதி வசனத்த²ம் த³ஸ்ஸேந்தோ ஆஹ ‘‘லாமகா’’தி. ‘‘ஹீனஸத்தா’’தி இமினா அந்தகஸ்ஸ ஸரூபம் த³ஸ்ஸேதி. ஆமந்தனபத³மேதம். தந்தி ராக³பாஸம். ஹீதி ஸச்சம். ஸோதி மாரோ பாபிமா. அந்தலிக்கே² சரந்தானம் பஞ்சாபி⁴ஞ்ஞானம்பி ப³ந்த⁴னத்தா அந்தலிக்கே² சரதி பவத்ததீதி அந்தலிக்க²சரோதி வசனத்தே²ன ராக³பாஸோ ‘‘அந்தலிக்க²சரோ’’தி மாரேன பாபிமதா வுத்தோ.

34. நானாஜனபத³தோதி ஏகிஸ்ஸாபி தி³ஸாய நானாஜனபத³தோ. ‘‘அனுஜானாமி…பே… பப்³பா³ஜேதா²’’திஆதி³ம்ஹி வினிச்ச²யோ ஏவம் வேதி³தப்³போ³தி யோஜனா. பப்³பா³ஜேந்தேன பி⁴க்கு²னா பப்³பா³ஜேதப்³போ³தி ஸம்ப³ந்தோ⁴. யே படிக்கி²த்தா புக்³க³லாதி யோஜனா. பரதோதி பரஸ்மிம். ‘‘ந பி⁴க்க²வே…பே… பப்³பா³ஜேதப்³போ³’’தி பாளிம் (மஹாவ. 89) ஆதி³ம் கத்வாதி யோஜனா. தேதி படிக்கி²த்தபுக்³க³லே. ஸோபி சாதி ஸோபி ச புக்³க³லோ. அனுஞ்ஞாதோயேவ பப்³பா³ஜேதப்³போ³தி ஸம்ப³ந்தோ⁴. தஸ்ஸ சாதி புக்³க³லஸ்ஸ ச, அத² வா தேஸஞ்ச மாதாபிதூனம். வசனவிபல்லாஸோ ஹேஸ. அனுஜானனலக்க²ணம் வண்ணயிஸ்ஸாமாதி ஸம்ப³ந்தோ⁴.

ஏவந்தி இமினா வுத்தனயேன. சஸத்³தோ³ வாக்யஸம்பிண்ட³னத்தோ². ஸசே அச்சி²ன்னகேஸோ ஹோதி ச, ஸசே ஏகஸீமாய அஞ்ஞேபி பி⁴க்கூ² அத்தி² சாதி அத்தோ². அஞ்ஞேபீதி அத்தனா அபரேபி. ப⁴ண்டூ³தி முண்டோ³, ஸோயேவ கம்மம் ப⁴ண்டு³கம்மம். தஸ்ஸாதி ப⁴ண்டு³கம்மஸ்ஸ. ஓகாஸோதி பப்³ப³ஜ்ஜாய க²ணோ. ‘‘ஓகாஸம் ந லப⁴தீ’’தி வத்வா தஸ்ஸ காரணம் த³ஸ்ஸேதும் வுத்தம் ‘‘ஸசே’’திஆதி³.

அவுத்தோபீதி ஏத்த² பிஸத்³தோ³ வுத்தோ பன கா நாம கதா²தி த³ஸ்ஸேதி. உபஜ்ஜா²யம் உத்³தி³ஸ்ஸ பப்³பா³ஜேதீதி ஏத்த² பப்³ப³ஜ்ஜா சதுப்³பி³தா⁴ தாபஸபப்³ப³ஜ்ஜா பரிப்³பா³ஜகபப்³ப³ஜ்ஜா ஸாமணேரபப்³ப³ஜ்ஜா உபஸம்பத³பப்³ப³ஜ்ஜாதி. தத்த² கேஸமஸ்ஸுஹரணம் தாபஸபப்³ப³ஜ்ஜா நாம வக்கலாதி³க³ஹணதோ பட²மமேவ வஜிதப்³ப³த்தா. இஸிபப்³ப³ஜ்ஜாதிபி தஸ்ஸாயேவ நாமம். கேஸமஸ்ஸுஹரணமேவ பரிப்³பா³ஜகபப்³ப³ஜ்ஜா நாம காஸாயாதி³க³ஹணதோ பட²மமேவ வஜிதப்³ப³த்தா. கேஸமஸ்ஸுஹரணஞ்ச காஸாயச்சா²த³னஞ்ச ஸாமணேரபப்³ப³ஜ்ஜா நாம ஸரணக³ஹணதோ பட²மமேவ வஜிதப்³ப³த்தா. உபஸம்பத³பப்³ப³ஜ்ஜா திவிதா⁴ ஏஹிபி⁴க்கு²உபஸம்பத³பப்³ப³ஜ்ஜா ஸரணக³ஹணூபஸம்பத³பப்³ப³ஜ்ஜா ஞத்திசதுத்த²வாசிகூபஸம்பத³பப்³ப³ஜ்ஜாதி. தத்த² ஏஹிபி⁴க்கூ²பஸம்பத³பப்³ப³ஜ்ஜாயம் கேஸமஸ்ஸுஹரணாதி³ ஸப்³ப³ம் ஏகதோவ ஸம்பஜ்ஜதி ‘‘ஏஹி பி⁴க்கூ²’’தி ப⁴க³வதோ வசனேன அபி⁴னிப்ப²ன்னத்தா. ஸரணக³ஹணூபஸம்பத³பப்³ப³ஜ்ஜா ஸாமணேரபப்³ப³ஜ்ஜஸதி³ஸாயேவ. கேஸமஸ்ஸுஹரணஞ்ச காஸாயச்சா²த³னஞ்ச ஸரணக³ஹணஞ்ச ஞத்திசதுத்த²வாசிகூபஸம்பத³பப்³ப³ஜ்ஜா நாம கம்மவாசாக³ஹணதோ பட²மமேவ வஜிதப்³ப³த்தா. தத்த² ஸாமணேரபப்³ப³ஜ்ஜம் ஸந்தா⁴ய வுத்தம் ‘‘உபஜ்ஜா²யம் உத்³தி³ஸ்ஸ பப்³பா³ஜேதீ’’தி. உபஜ்ஜா²யம் உத்³தி³ஸ்ஸாதி உபஜ்ஜா²யஸ்ஸ வேய்யாவச்சகரட்டா²னனியமம் கத்வா. பப்³ப³ஜ்ஜாகம்மே அத்தனோ இஸ்ஸரியமகத்வாதி அத்தோ². த³ஹரேன பி⁴க்கு²னா கேஸச்சே²த³னம் காஸாயச்சா²த³னம் ஸரணதா³னந்தி தீணி கிச்சானி காதப்³பா³னியேவ. கேசி ‘‘ஸரணானி பன ஸயம் தா³தப்³பா³னீ’’தி பாட²ம் இதா⁴னேத்வா த³ஹரேன பி⁴க்கு²னா ஸரணானி ந தா³தப்³பா³னீதி வத³ந்தி, தம் ந க³ஹேதப்³ப³ம் த³ஹரஸ்ஸ பி⁴க்கு²த்தா, பி⁴க்கூ²னம் பப்³பா³ஜேதும் லப⁴னத்தா ச. உபஜ்ஜா²யோ சே கேஸச்சே²த³னஞ்ச காஸாயச்சா²த³னஞ்ச அகத்வா பப்³ப³ஜ்ஜத்த²ம் ஸரணானியேவ தே³தி, ந ருஹதி பப்³ப³ஜ்ஜா பப்³ப³ஜ்ஜாய அகத்தப்³ப³த்தா. கம்மவாசம் ஸாவேத்வா உபஸம்பாதே³தி, ருஹதி உபஸம்பதா³ அபத்தசீவரானம் உபஸம்பத³ஸித்³தி⁴தோ, கம்மவிபத்தியா அபா⁴வதோ ச. க²ண்ட³ஸீமந்தி உபசாரஸீமட்ட²ம் ப³த்³த⁴ஸீமம். பப்³பா³ஜேத்வாதி கேஸச்சே²த³னம் ஸந்தா⁴ய வுத்தம் ‘‘காஸாயானி அச்சா²தே³த்வா’’தி காஸாயச்சா²த³னஸ்ஸ விஸும் வுத்தத்தா. ஸாமணேரஸ்ஸ ஸரணதா³னஸ்ஸ அருஹத்தா ‘‘ஸரணானி பன ஸயம் தா³தப்³பா³னீ’’தி வுத்தம். புரிஸம் பப்³பா³ஜேதுந்தி ஸம்ப³ந்தோ⁴. ஹீதி ஸச்சம். ஆணத்தியாதி பி⁴க்கூ²னம் ஆணத்தியா. யேன கேனசீதி க³ஹட்ட²பப்³ப³ஜிதேஸு யேன கேனசி.

‘‘ப⁴ப்³ப³ரூபோ’’தி வத்வா தஸ்ஸ அத்த²ம் த³ஸ்ஸேதும் வுத்தம் ‘‘ஸஹேதுகோ’’தி. ஸஹேதுகோதி மக்³க³ப²லானம் உபனிஸ்ஸயேஹி ஸஹ பவத்தோ. யஸஸ்ஸீதி பரிவாரயஸேன ச கித்தியஸேன ச ஸமன்னாக³தோ. ஓகாஸம் கத்வாபீதி ஓகாஸம் கத்வா ஏவ. ஸயமேவாதி ந அஞ்ஞோ ஆணாபேதப்³போ³. ஏத்தோயேவாதி த³ஸ்ஸனட்டா²னதோயேவ. அஸ்ஸாதி பப்³ப³ஜ்ஜாபேக்க²ஸ்ஸ. க²ஜ்ஜு வாதி கண்டு³வனம் வா. ‘‘கச்சு² வா’’திபி பாடோ², பாமம் வாதி அத்தோ². பிளகா வாதி போ²டா வா. ஏத்தகேனாதி ஏதபமாணேன க⁴ம்ஸித்வா ந்ஹாபனமத்தேன. அனிவத்தித⁴ம்மாதி கி³ஹிபா⁴வம் அனிவத்தனஸபா⁴வா. கதஞ்ஞூதி கதஸ்ஸூபகாரஸ்ஸ ஜானனஸீலா. கதவேதி³னோதி கதஞ்ஞூபகாரஸ்ஸ வேத³ம் பாகடம் கரோந்தோ.

அனிய்யானிககதா²தி யாவத³த்த²ம் ஸுபித்வா யாவத³த்த²ம் பு⁴ஞ்ஜீத்வா சித்தகேளிம் கரோந்தோ அனுக்கண்டி²தோ விஹராஹீதிஆதி³கா கதா². நகதே²தப்³ப³ம் த³ஸ்ஸேத்வா கதே²தப்³ப³ம் த³ஸ்ஸேந்தோ ஆஹ ‘‘அத²க்²வஸ்ஸா’’தி. அஸ்ஸாதி பப்³ப³ஜ்ஜாபேக்க²ஸ்ஸ. ஆசிக்க²னாகாரம் த³ஸ்ஸேந்தோ ஆஹ ‘‘ஆசிக்க²ந்தேன சா’’திஆதி³. வண்ண…பே… வஸேனாதி வண்ணோ ச ஸண்டா²னஞ்ச க³ந்தோ⁴ ச ஆஸயோ ச ஓகாஸோ ச, தேஸம் வஸேன, ஆசிக்கி²தப்³ப³ந்தி ஸம்ப³ந்தோ⁴. ஹீதி ப²லஜோதகோ, ஆசிக்க²னஸ்ஸ ப²லம் வக்கா²மீதி அத்தோ². ஸோதி பப்³ப³ஜ்ஜாபேக்கோ². புப்³பே³தி புப்³ப³ப⁴வே, பப்³ப³ஜனதோ புப்³பே³ வா. கண்டகவேதா⁴பேக்கோ² பரிபக்கக³ண்டோ³ விய ஞாணம் பவத்ததீதி யோஜனா. அஸ்ஸாதி பப்³ப³ஜ்ஜாபேக்க²ஸ்ஸ. இந்தா³ஸனீதி ஸக்கஸ்ஸ வஜிராவுதோ⁴. ஸோ ஹி இந்தே³ன அஸீயதி கி²பீயதீதி இந்தா³ஸனீதி வுச்சதி. இந்தா³ஸனி பப்³ப³தே சுண்ணயமானா விய ஸப்³பே³ கிலேஸே சுண்ணயமானம்யேவாதி யோஜனா. கு²ரக்³கே³யேவாதி கு²ரஸ்ஸ கோடியமேவ. கு²ரகம்மபரியோஸானேயேவாதி அத்தோ². ஹீதி ஸச்சம். தஸ்மாதி யஸ்மா பத்தா, தஸ்மா. அஸ்ஸாதி பப்³ப³ஜ்ஜாபேக்க²ஸ்ஸ.

கி³ஹிக³ந்த⁴ந்தி கே³ஹே டி²தஸ்ஸ ஜனஸ்ஸ க³ந்த⁴ம். அதா²பீதி யதி³பி அச்சா²தே³தீதி ஸம்ப³ந்தோ⁴. அஸ்ஸாதி பப்³ப³ஜ்ஜாபேக்க²ஸ்ஸ. ஆசரியோ வாதி ஸரணதா³னாசரியோ வா கம்மவாசாசரியோ வா ஓவாதா³சரியோ வா. தம்யேவ வாதி பப்³ப³ஜ்ஜாபேக்க²மேவ வா. தேன பி⁴க்கு²னாவாதி ஆசரியுபஜ்ஜா²யபி⁴க்கு²னா ஏவ.

அனாணத்தியாதி ஆசரியுபஜ்ஜா²யேஹி அனாணத்தியா. இமினா ஆசரியுபஜ்ஜா²யேஹி அனாணத்தேன யேன கேனசி நிவாஸனாதீ³னி ந காதப்³பா³னீதி த³ஸ்ஸேதி. பி⁴க்கு²னாதி ஆசரியுபஜ்ஜா²யபி⁴க்கு²னா. தஸ்ஸேவாதி பப்³ப³ஜ்ஜாபேக்க²ஸ்ஸேவ. உபஜ்ஜா²யமூலகேதி உபஜ்ஜா²யமூலகே நிவாஸனபாருபனே. அயந்தி வினிச்ச²யோ.

தத்தா²தி பப்³ப³ஜ்ஜூபஸம்பத³ட்டா²னே. தேஸந்தி பி⁴க்கூ²னம். அதா²தி வந்தா³பனதோ பச்சா², வந்தா³பனஸ்ஸ அனந்தரா வா. ‘‘ஏவம் வதே³ஹீ’’தி பாளினயனித³ஸ்ஸனமுகே²ன ‘‘யமஹம் வதா³மி, தம் வதே³ஹீ’’தி அட்ட²கதா²னயம் நித³ஸ்ஸேதி. அதா²தி தத³னந்தரம். அஸ்ஸாதி பப்³ப³ஜ்ஜாபேக்க²ஸ்ஸ, தா³தப்³பா³னீதி ஸம்ப³ந்தோ⁴. ஏகபத³ம்பீதி தீஸு வாக்யபதே³ஸு ஏகம் வாக்யபத³ம்பி, நவஸு வா விப⁴த்யந்தபதே³ஸு ஏகபத³ம்பி. ஏகக்க²ரம்பீதி சதுவீஸதக்க²ரேஸு ஏகக்க²ரம்பி.

ஏகதோ ஸுத்³தி⁴யாதி ஏகஸ்ஸேவ கம்மவாசாசரியஸ்ஸ டா²னகரணஸம்பத்தியா ஸுஜ்ஜ²னேன. உப⁴தோ ஸுத்³தி⁴யாவாதி உப⁴யேஸம் ஸரணதா³னாசரியஸாமணேரானம் ஸுஜ்ஜ²னேன ஏவ. டா²னகரணஸம்பத³ந்தி உரஆதி³ட்டா²னானஞ்ச ஸம்வுதாதி³கரணானஞ்ச ஸம்பத³ம். வத்துந்தி டா²னகரணஸம்பத³ம் வத்தும். ந ஸக்கோதீதி வத்தும் ந ஸக்கோதீதி யோஜனா.

இமானீதி ஸரணானி. சஸத்³தோ³ உபன்யாஸோ, பனஸத்³தோ³ பதா³லங்காரோ. ஏகஸம்ப³ந்தா⁴னீதி ஏகதோ ஸம்ப³ந்தா⁴னி. அனுனாஸிகந்தம் கத்வா தா³னகாலே ‘‘பு³த்³த⁴ம்’’இதி ‘‘ஸரணம்’’இதி பதா³னஞ்ச ‘‘ஸரணம்’’இதி ‘‘க³ச்சா²மி’’இதி பதா³னஞ்ச அந்தரா விச்சே²த³மகத்வா ஏகஸம்ப³ந்த⁴மேவ கத்வா தா³தப்³பா³னீதி வுத்தம் ஹோதி. கஸ்மா திண்ணம் பதா³னமந்தரா ப்³யவதா⁴னஸ்ஸ கஸ்ஸசி அக்க²ரஸ்ஸ அபா⁴வதோ. விச்சி²ந்தி³த்வாதி விச்சே²த³ம் கத்வா. மகாரந்தம் கத்வா தா³னகாலே திண்ணம் பதா³னமந்தரா ஏகஸம்ப³ந்த⁴மகத்வா விச்சி²ந்தி³த்வா ஏவ கத்வா தா³தப்³பா³னீதி வுத்தம் ஹோதி. கஸ்மா? திண்ணம் பதா³னமந்தரா ப்³யவதா⁴னஸ்ஸ நிஸ்ஸரஸ்ஸ மகாரஸ்ஸ அத்தி²பா⁴வதோ. அந்த⁴கட்ட²கதா²யம் வுத்தந்தி ஸம்ப³ந்தோ⁴. தந்தி வசனம், ‘‘நத்தீ²’’திபதே³ கத்தா, ‘‘ந வுத்த’’ந்திபதே³ கம்மம். ததா²தி ‘‘அஹம் ப⁴ந்தே பு³த்³த⁴ரக்கி²தோ’’திஆதி³னா ஆகாரேன, அவத³ந்தஸ்ஸ ஸரணம் ந குப்பதி, பு³காரத³காராதீ³னம் ப்³யஞ்ஜனானம் டா²னகரணஸம்பத³ம் ஹாபேந்தஸ்ஸேவ ஸரணம் குப்பதீதி அதி⁴ப்பாயோ.

‘‘திக்க²த்து’’ந்தி இமினா ஸகிம் வா த்³விக்க²த்தும் வா ந வட்டதீதி தீ³பேதி. திக்க²த்துதோ அதி⁴கம் பன ஸஹஸ்ஸக்க²த்தும்பி வட்டதியேவ. தத்தா²தி தாஸு பப்³ப³ஜ்ஜாஉபஸம்பதா³ஸு. பரதோதி பரஸ்மிம். ஸாதி உபஸம்பதா³. பப்³ப³ஜ்ஜா பன அனுஞ்ஞாதா ஏவாதி ஸம்ப³ந்தோ⁴. பரதோபீதி பிஸத்³தோ³ புப்³பா³பேக்கோ². ஸாதி பப்³ப³ஜ்ஜா. ஏத்தாவதாதி ஏத்தகேன கேஸச்சே²த³னகாஸாயச்சா²த³னஸரணதா³னேன. ஹீதி ப²லஜோதகோ.

ஏஸாதி ஏஸோ ஸாமணேரோதி அத்தோ². ‘‘க³திமா’’தி வத்வா தஸ்ஸத்த²ம் த³ஸ்ஸேந்தோ ஆஹ ‘‘பண்டி³தஜாதிகோ’’தி. அதா²தி ஏவம் ஸதி. அஸ்ஸாதி ஸாமணேரஸ்ஸ. தஸ்மிம்யேவ டா²னேதி ஸாமணேரபூ⁴மியம் டி²தட்டா²னேயேவ. யதா² ப⁴க³வதா உத்³தி³ட்டா²னி, ததா² உத்³தி³ஸிதப்³பா³னீதி யோஜனா. ஏதந்தி ‘‘அனுஜானாமி…பே… ஜாதரூப ரஜதபடிக்³க³ஹணா வேரமணீ’’தி வசனம்.

தந்தி அந்த⁴கட்ட²கதா²யம் வுத்தவசனம். யதா²பாளியாவாதி ஏவஸத்³தோ³ ஸன்னிட்டா²னத்தோ², தேன யதா²பாளியாவ உத்³தி³ஸிதப்³பா³னி. யதா²பாளிம் விஸஜ்ஜேத்வா அஞ்ஞதா² ஏவ உத்³தி³ஸிதப்³பா³னீதி வாத³ம் நிவாரேதி. யதா²பாளிம் விஸஜ்ஜேத்வா அஞ்ஞதா² ‘‘பாணாதிபாதா வேரமணிம் ஸிக்கா²பத³ம் ஸமாதி³யாமீ’’தி உத்³தி³ஸந்தோபி நித்³தோ³ஸோயேவ. ஹீதி ஸச்சம், யஸ்மா வா. தானீதி ஸிக்கா²பதா³னி. யாவாதி யத்தகம் காலம் ந ஜானாதி, ந குஸலோ ஹோதீதி ஸம்ப³ந்தோ⁴. ஸந்திகாவசரோயேவாதி ஆசரியுபஜ்ஜா²யானம் ஸமீபே அவசாரோவ. அஸ்ஸாதி ஸாமணேரஸ்ஸ. கப்பியாகப்பியந்தி த³ஸஸிக்கா²பத³வினிமுத்தம் கப்பியம் பராமாஸாதி³ஞ்ச அகப்பியம் அபராமாஸாதி³ஞ்ச. தேனாபீதி ஸாமணேரேனாபி. நாஸனங்கா³னீதி லிங்க³னாஸனஅங்கா³னி. ஸாது⁴கம் ஸிக்கி²தப்³ப³ந்தி ஸாது⁴கம் அஸிக்க²ந்தஸ்ஸ லிங்க³னாஸனஞ்ச த³ண்ட³கம்மனாஸனஞ்ச ஹோதீதி அதி⁴ப்பாயோ.