5. ப்³ரஹ்மயாசனகதா²

7. ப⁴க³வா உபஸங்கமீதி ஸம்ப³ந்தோ⁴. தஸ்மிந்தி அஜபாலனிக்³ரோதே⁴. ஆசிண்ணஸமாசிண்ணோதி ஆசரிதோ ஸம்மாசரிதோ, ந ஏகஸ்ஸ பு³த்³த⁴ஸ்ஸ ஆசிண்ணோ, அத² கோ² ஸப்³ப³பு³த்³தா⁴னம் ஆசிண்ணஸமாசிண்ணோ, அதிஆசிண்ணோ நிச்சாசிண்ணோதி அத்தோ². ஸங்கே²பேன வுத்தமத்த²ம் வித்தா²ரேந்தோ ஆஹ ‘‘ஜானந்தி ஹீ’’திஆதி³. த⁴ம்மதே³ஸனந்தி ப⁴க³வதோ த⁴ம்மதே³ஸனம், த⁴ம்மதே³ஸனத்தா²ய வா ப⁴க³வந்தம், ப⁴க³வந்தம் வா த⁴ம்மதே³ஸனம். ததோதி யாசனகாரணா. ஹீதி ஸச்சம், யஸ்மா வா. லோகஸன்னிவாஸோ ப்³ரஹ்மக³ருகோ யஸ்மா, இதி தஸ்மா உப்பாதே³ஸ்ஸந்தீதி யோஜனா. இதீதிஆதி³ நிக³மனம்.

தத்தா²தி பரிவிதக்கனாகாரபாடே². ‘‘பஞ்சகாமகு³ணேஸு அல்லீய’’ந்தீதி இமினா அல்லீயந்தி அபி⁴ரமிதப்³ப³ட்டே²ன லக்³க³ந்தி ஏத்தா²தி ஆலயா பஞ்ச காமகு³ணாதி வசனத்த²ம் த³ஸ்ஸேதி. அல்லீயந்தீதி லக்³க³ந்தி. ‘‘பஞ்ச காமகு³ணே அல்லீயந்தீ’’திபி பாடோ², ஏவம் ஸதி அல்லீயந்தி அபி⁴ரமிதப்³ப³ட்டே²ன ஸேவியந்தீதி ஆலயா பஞ்ச காமகு³ணாதி வசனத்தோ² காதப்³போ³. அல்லீயந்தீதி ஸேவந்தி. தேதி பஞ்ச காமகு³ணா. ‘‘யதி³த³’’ந்திபத³ஸ்ஸ யம் இத³ந்தி பத³விபா⁴க³ம் கத்வா ‘‘ய’’ந்தி ச ‘‘இத³’’ந்தி ச ஸப்³ப³னாமபத³ந்தி ஆஸங்கா ப⁴வேய்யாதி ஆஹ ‘‘யதி³த³ந்தி நிபாதோ’’தி. இமினா தீஸு லிங்கே³ஸு த்³வீஸு ச வசனேஸு வினாஸம், விகாரம் வா விஸதி³ஸம் வா நஅயனத்தா நக³மனத்தா அப்³யயம் நாமாதி த³ஸ்ஸேதி, அத்தோ² பன ஸப்³ப³னாமத்தோ²யேவாதி த³ட்ட²ப்³ப³ம். தஸ்ஸாதி ‘‘யதி³த³’’ந்தினிபாதஸ்ஸ, அத்தோ²தி ஸம்ப³ந்தோ⁴. டா²னந்தி ‘‘டா²னம்’’இதிபத³ம். படிச்சஸமுப்பாத³ந்தி ‘‘படிச்சஸமுப்பாதோ³’’இதிபத³ம். அத்தோ²பி யுத்தோயேவாதி த³ட்ட²ப்³ப³ம். இமேஸந்தி ஸங்கா²ராதீ³னம் பச்சயுப்பன்னானம். பச்சயாதி அவிஜ்ஜாதி³காரணா. ‘‘இத³ப்பச்சயா ஏவா’’தி இமினா இத³ப்பச்சயதாதி ஏத்த² தாபச்சயஸ்ஸ ஸ்வத்த²ம் தீ³பேதி ‘‘தே³வதா’’திஆதீ³ஸு (கு². பா. அட்ட². ஏவமிச்சாதி³பாட²வண்ணனா) விய.

ஸோ மமஸ்ஸ கிலமதோ²தி ஏத்த² தம்ஸத்³த³ஸ்ஸ விஸயம் த³ஸ்ஸேந்தோ ஆஹ ‘‘யா அஜானந்தானம் தே³ஸனா நாமா’’தி, இமினா ‘‘தே³ஸேய்யம், ந ஆஜானேய்யு’’ந்தி த்³வின்னமேவ கிரியாபதா³னம் தஸத்³த³ஸ்ஸ விஸயபா⁴வம் த³ஸ்ஸேதி, ந ஏகஸ்ஸ கிரியாபத³ஸ்ஸ. ஸோதி தே³ஸனாஸங்கா²தோ காயவசீபயோகோ³, இமினா வாக்யவிஸயே தஸத்³தோ³ உத்தரபத³ஸ்ஸேவ லிங்க³வசனானி க³ண்ஹாதீதி த³ஸ்ஸேதி, ஸமாஸமஜ்ஜே² பன தஸத்³தோ³ புப்³ப³பத³ஸ்ஸேவ லிங்க³வசனானி க³ண்ஹாதி. தேன வுத்தம் ‘‘அவிஜ்ஜா ச ஸா பச்சயோ சா’’தி (உதா³. அட்ட². பட²மபோ³தி⁴ஸுத்தவண்ணனா) ச ‘‘அபி⁴த⁴ம்மோ ச ஸோ பிடகஞ்சா’’தி ச (பாரா. அட்ட². 1.பட²மமஹாஸங்கீ³திகதா²; த⁴. ஸ. அட்ட². நிதா³னகதா²) ஆதி³. கிலமதோ²தி காயகிலமனஹேது. கிலமதி அனேனாதி கிலமதோ². அஸ்ஸாதி ப⁴வேய்ய. ஸாதி காயவசீபயோக³ஸங்கா²தா தே³ஸனா. விஹேஸாதி காயவிஹிம்ஸாஹேது. விஹிம்ஸதி இமாயாதி விஹேஸா. சித்தேன பன பு³த்³தா⁴னம் கிலமதோ² வா விஹேஸா வா நத்தி² அரஹத்தமக்³கே³ன ஸமுச்சி²ன்னத்தா. ‘‘படிப⁴ம்ஸூ’’தி ஏத்த² படீதி கம்மப்பவசனீயயோக³த்தா ‘‘ப⁴க³வந்த’’ந்தி ஏத்த² ஸாம்யத்தே² உபயோக³வசனந்தி ஆஹ ‘‘ப⁴க³வதோ’’தி. ‘‘அனு அச்ச²ரியா’’தி இமினா ‘‘ந அச்ச²ரியா’’தி பத³விபா⁴க³ம் நிவத்தேதி, புனப்புனம் அச்ச²ரியாதி அத்தோ². படிப⁴ம்ஸூதி ஏத்த² படிஸத்³தோ³ படிபா⁴னத்தோ², பா⁴தா⁴து கா²யனத்தோ²தி ஆஹ ‘‘படிபா⁴னஸங்கா²தஸ்ஸ ஞாணஸ்ஸ கோ³சரா அஹேஸு’’ந்தி. ‘‘கோ³சரா அஹேஸு’’ந்தி இமினா கா²யனம் நாம அத்த²தோ கோ³சரபா⁴வேன ப⁴வனந்தி த³ஸ்ஸேதி.

மேதி மம, மயா வா, அதி⁴க³தம் த⁴ம்மம் பகாஸிதுந்தி ஸம்ப³ந்தோ⁴. அரியமக்³க³ஸோதஸ்ஸ படி படிஸோதந்தி வுத்தே நிப்³பா³னமேவாதி ஆஹ ‘‘படிஸோதம் வுச்சதி நிப்³பா³ன’’ந்தி. நிப்³பா³னகா³மிந்தி அரியமக்³க³ம். அரியமக்³கோ³ ஹி யஸ்மா நிப்³பா³னம் க³மயதி, தஸ்மா நிப்³பா³னகா³மீதி வுச்சதி. தமோக²ந்தே⁴னாதி ஏத்த² தமஸத்³தோ³ அவிஜ்ஜாபரியாயோ, க²ந்த⁴ஸத்³தோ³ ராஸத்தோ²தி ஆஹ ‘‘அவிஜ்ஜாராஸினா’’தி. ‘‘அஜ்ஜோ²த்த²டா’’தி இமினா ஆவுடாதி ஏத்த² வுதா⁴து ஆவரணத்தோ²தி த³ஸ்ஸேதி. அப்போஸ்ஸுக்கதாயாதி ஏத்த² அபத்யூபஸக்³கோ³ அபா⁴வத்தோ², தாபச்சயோ பா⁴வத்தோ²தி ஆஹ ‘‘நிருஸ்ஸுக்கபா⁴வேனா’’தி.

8. லோகேதி ஸத்தலோகே. மஹாப்³ரஹ்மேதி மஹாப்³ரஹ்மானோ. அப்பரஜக்க²ஜாதிகாதி ஏத்த² அப்பம் ரஜம் அக்கி²ம்ஹி ஏதேஸந்தி அப்பரஜக்கா², அப்பரஜக்கா² ஜாதி ஸபா⁴வோ ஏதேஸந்தி அப்பரஜக்க²ஜாதிகாதி வசனத்த²ம் த³ஸ்ஸேந்தோ ஆஹ ‘‘பஞ்ஞாமயே’’திஆதி³. ‘‘பஞ்ஞாமயே’’தி இமினா மம்ஸமயேதி அத்த²ம் நிவத்தேதி. ஏதேஸந்தி ஸத்தானம். த⁴ம்மஸ்ஸாதி துபச்சயயோகே³ ச²ட்டீ²கம்மம். ஆபுப்³போ³ ஞாதா⁴து படிவிஜ்ஜ²னத்தோ²தி ஆஹ ‘‘படிவிஜ்ஜி²தாரோ’’தி.

ஸம்விஜ்ஜதி மலம் ஏதேஸந்தி ஸமலா, பூரணகஸ்ஸபாதி³கா ச² ஸத்தா²ரோ, தேஹி. ‘‘ராகா³தீ³ஹீ’’தி இமினா மலஸரூபம் த³ஸ்ஸேதி. அவாபுரேதந்தி ஏத்த² அவபுப்³போ³ ச ஆபுப்³போ³ ச புரதா⁴து விவரணத்தோ²தி ஆஹ ‘‘விவர ஏத’’ந்தி. வகாரஸ்ஸ பகாரம் கத்வா ‘‘அபாபுரேத’’ந்திபி பாடோ². அமதஸத்³த³ஸ்ஸ ஸலிலாத³யோ நிவத்தேதும் வுத்தம் ‘‘நிப்³பா³னஸ்ஸா’’தி. இமே ஸத்தா ஸுணந்தூதி ஸம்ப³ந்தோ⁴. விமலேனாதி ஏத்த² விஸத்³தோ³ அபா⁴வத்தோ²தி ஆஹ ‘‘அபா⁴வதோ’’தி. இமினா நத்தி² மலம் ஏதஸ்ஸாதி விமலோதி வசனத்த²ம் த³ஸ்ஸேதி. ‘‘ஸம்மாஸம்பு³த்³தே⁴னா’’தி இமினா அஞ்ஞபத³த்த²ஸரூபம் த³ஸ்ஸேதி. அனுக்கமேன மக்³கே³ன பு³ஜ்ஜி²தப்³ப³ந்தி அனுபு³த்³த⁴ந்தி வுத்தே சதுஸச்சத⁴ம்மோ க³ஹேதப்³போ³தி ஆஹ ‘‘சதுஸச்சத⁴ம்ம’’ந்தி.

‘‘ஸேலமயே’’தி இமினா ஸிலாய நிப்³ப³த்தோ ஸேலோதி வசனத்த²ம் த³ஸ்ஸேதி. ‘‘ஸப்³ப³ஞ்ஞுதஞ்ஞாணேனா’’தி இமினா ஸமந்தசக்கு²ஸரூபம் த³ஸ்ஸேதி. ப⁴க³வா த்வம்பீதி யோஜனா. த⁴ம்மஸத்³தோ³ பஞ்ஞாபரியாயோதி ஆஹ ‘‘த⁴ம்மமயம் பஞ்ஞாமய’’ந்தி. அபேதோ ஸோகோ இமஸ்ஸாதி அபேதஸோகோ, ப⁴க³வா. ஸோகம் அவதரதீதி ஸோகாவதிண்ணா, ஜனதா. ஸோகாவதிண்ணஞ்ச ஜாதிஜராபி⁴பூ⁴தஞ்சாதி சஸத்³தோ³ யோஜேதப்³போ³. இமினா சஸத்³தோ³ லுத்தனித்³தி³ட்டோ²தி த³ஸ்ஸேதி.

‘‘ப⁴க³வா’’திபத³ம் ‘‘வீரோ’’திஆதீ³ஸு யோஜேதப்³ப³ம். ‘‘வீரியவந்ததாயா’’தி இமினா வீரம் யஸ்ஸத்தீ²தி வீரோதி வசனத்த²ம் த³ஸ்ஸேதி. ஸத்³த³ஸத்தே²ஸு ஆலபனபதே³ஸு விக்³க³ஹோ ந காதப்³போ³தி இத³ம் ஆலபனாவத்த²ம் ஸந்தா⁴ய வுத்தம், இத⁴ பன தேஸமத்த²த³ஸ்ஸனத்தா²ய விக்³க³ஹோ வுத்தோதி த³ட்ட²ப்³ப³ம். ‘‘தே³வபுத்த…பே… விஜிதத்தா’’தி இமினா விஜிதோ மாரேஹி ஸம்கா³மோ அனேனாதி விஜிதஸங்கா³மோதி வசனத்த²ம் த³ஸ்ஸேதி. ஏத்த² ச க²ந்த⁴மாரோ மச்சுமாரேன ஸங்க³ஹிதோ த்³வின்னம் மாரானம் ஏகதோ விஜிதத்தா. ‘‘ஸத்தவாஹோ’’தி பட²மக்க²ரேன ச ‘‘ஸத்த²வாஹோ’’தி து³தியக்க²ரேன ச யுத்தோ. தத்த² ஸத்த²வாஹோ வியாதி ‘‘ஸத்த²வாஹோ’’தி உபசாரேன வுத்தே து³தியக்க²ரேன யுத்தோ, ஸத்தே வஹஹீதி ஸத்தவாஹோதி முக்²யதோ வுத்தே பட²மக்க²ரேன யுத்தோ. இத⁴ பன பட²மக்க²ரேன யுத்தோதி ஆஹ ‘‘ஸத்தே வஹதீதி ஸத்தவாஹோ’’தி. நத்தி² இணம் இமஸ்ஸாதி அணணோ ப⁴க³வா.

9. பு³த்³த⁴சக்கு²னாதி ஏத்த² சக்கு² து³வித⁴ம் மம்ஸசக்கு²ஞாணசக்கு²வஸேன. தத்தா²பி மம்ஸசக்கு² து³வித⁴ம் பஸாத³சக்கு²ஸஸம்பா⁴ரசக்கு²வஸேன. தத்த² பஸாத³ரூபம் பஸாத³சக்கு² நாம, ப⁴முகட்டி²பரிச்சி²ன்னோ மம்ஸபிண்டோ³ ஸஸம்பா⁴ரசக்கு² நாம. ஞாணசக்கு² பன பஞ்சவித⁴ம் (படி. ம. அட்ட². 1.1.3) தி³ப்³ப³த⁴ம்மபஞ்ஞாபு³த்³த⁴ஸமந்தசக்கு²வஸேன. தத்த² தி³ப்³ப³சக்கு²அபி⁴ஞ்ஞாஞாணம் தி³ப்³ப³சக்கு² நாம, ஹேட்டி²மமக்³க³த்தயம் த⁴ம்மசக்கு² நாம, அரஹத்தமக்³க³ஞாணம் பஞ்ஞாசக்கு² நாம, இந்த்³ரியபரோபரியத்தஞாணஞ்ச ஆஸயானுஸயஞாணஞ்ச பு³த்³த⁴சக்கு² நாம, ஸப்³ப³ஞ்ஞுதஞ்ஞாணம் ஸமந்தசக்கு² நாம. இத⁴ பன ‘‘பு³த்³த⁴சக்கு²னா’’தி வுத்தத்தா யதா²வுத்தத்³வேஞாணானியேவாதி ஆஹ ‘‘இந்த்³ரிய…பே… ஞாணேன சா’’தி. ஹீதி ஸச்சம். யேஸந்தி ஸத்தானம். ஸத்³தா⁴தீ³னீதி ஆதி³ஸத்³தே³ன வீரியஸதிஸமாதி⁴பஞ்ஞிந்த்³ரியானி ஸங்க³ண்ஹாதி. திக்கா²னீதி திகி²ணானி. முதூ³னீதி ஸுகு²மதரானி. ஆகாராதி காரணா. இமானி தீணி து³கானி பா³ஹிரத்த²ஸமாஸவஸேன வுத்தானி. ஸுகே²ன விஞ்ஞாபேதப்³பா³தி ஸுவிஞ்ஞாபயா, ததா² து³விஞ்ஞாபயாதி வசனத்த²ம் த³ஸ்ஸேந்தோ ஆஹ ‘‘யே கதி²தகாரண’’ந்திஆதி³. பரலோகோ ச வஜ்ஜஞ்ச பரலோகவஜ்ஜானி, தானி ப⁴யதோ பஸ்ஸந்தீதி பரலோகவஜ்ஜப⁴யத³ஸ்ஸாவினோதி வசனத்த²ம் த³ஸ்ஸேந்தோ ஆஹ ‘‘யே’’திஆதி³. இமானி த்³வே து³கானி கிதவஸேன வுத்தானி, இத⁴ பச்சி²மது³கே ‘‘ந அப்பேகச்சே பரலோகவஜ்ஜப⁴யத³ஸ்ஸாவினோ’’தி து³தியபத³ம் ந வுத்தம், படிஸம்பி⁴தா³மக்³க³பாளியம் (படி. ம. 1.111) பன யுக³ளவஸேன வுத்தம். உப்பலானி ஏத்த² ஸந்தீதி உப்பலினீதி வசனத்தே²ன க³ச்சோ² வா லதா வா போக்க²ரணீ வா வனம் வா ‘‘உப்பலினீ’’தி வுச்சதி, இத⁴ பன ‘‘வன’’ந்தி ஆஹ ‘‘உப்பலவனே’’தி. நிமுக்³கா³னேவ ஹுத்வாதி ஸம்ப³ந்தோ⁴. போஸயந்தீதி வட்³ட⁴ந்தி, இமினா அந்தோனிமுக்³கா³னேவ ஹுத்வா போஸயந்தீதி அந்தோனிமுக்³க³போஸீனீதி வசனத்த²ம் த³ஸ்ஸேதி. ‘‘உத³கேன ஸம’’ந்தி இமினா உத³கேன ஸமம் ஸமோத³கம், ஸமோத³கம் ஹுத்வா டி²தானீதி அத்த²ம் த³ஸ்ஸேதி. ‘‘அதிக்கமித்வா’’தி இமினா அச்சுக்³க³ம்மாதிபத³ஸ்ஸ அதிஉக்³க³ந்த்வாதி அத்த²ம் த³ஸ்ஸேதி.

படிச்ச²ன்னேன ஆரோபிதாதி பாருதா, ந பாருதா அபாருதா. அபாருதா நாம அத்த²தோ விவரணாதி ஆஹ ‘‘விவடா’’தி ஸோதி அரியமக்³கோ³. ஹீதி ஸச்சம். பச்சி²மபத³த்³வயேதி கா³தா²ய உத்தமபத³த்³வயே. அயமேவத்தோ²தி அயம் வக்க²மானோ ஏவம் அத்தோ² த³ட்ட²ப்³போ³தி யோஜனா. ஹீதி வித்தா²ரோ. ந பா⁴ஸிந்தி ஏத்த² உத்தமபுரிஸத்தா ‘‘அஹ’’ந்தி வுத்தம். ‘‘தே³வமனுஜேஸு’’தி வத்தப்³பே³ ஏகஸேஸவஸேன ‘‘மனுஜேஸூ’’தி வுத்தந்தி ஆஹ ‘‘தே³வமனுஸ்ஸேஸூ’’தி.