64. சத்தாரோனிஸ்ஸயாதி³கதா²

128. உபஸம்பன்னஸமனந்தரமேவாதி உபஸம்பன்னோ ஹுத்வா ஸமனந்தரமேவ, ந காலந்தரேதி அத்தோ². ஏகபோரிஸாதி ஏத்த² போரிஸஸத்³தோ³ உபரி வித்த²தே பு⁴ஜபமாணே ச போஸபமாணே ச வத்ததி. புரிஸஸ்ஸ பமாணா போரிஸா, பமாணத்தே² ணபச்சயோ. சா²யாதி ஆதபாபா⁴வோ. மேதப்³பா³தி பமேதப்³பா³. ‘‘வஸ்ஸானோ’’திஆதி³ ‘‘உதுபமாணம் ஆசிக்கி²தப்³ப³’’ந்தி ஏத்த² ஆசிக்க²ணாகாரத³ஸ்ஸனம். உதுனோ பமாணந்தி அத்த²ம் நிவாரேந்தோ ஆஹ ‘‘ஏத்த² சா’’திஆதி³. அரதி புனப்புனம் க³ச்ச²தீதி உது, பமியதி ஸம்வச்ச²ரோ பரிச்சி²ஜ்ஜியதி அனேனாதி பமாணம். யத்தகேஹி தி³வஸேஹி அபரிபுண்ணோதி ஸம்ப³ந்தோ⁴. யஸ்ஸாதி தி³வஸபா⁴க³ஸ்ஸ. யோ உது அபரிபுண்ணோ, தஸ்ஸ உதுனோதி பாட²ஸேஸோ யோஜேதப்³போ³. ‘‘உதுபமாணம் ஆசிக்கி²தப்³ப³ம், தி³வஸபா⁴கோ³ ஆசிக்கி²தப்³போ³’’தி பதா³னம் அபரம்பி அத்த²விகப்பம் த³ஸ்ஸேந்தோ ஆஹ ‘‘அத² வா’’திஆதி³. தத்த² அயம் நாம உதூதி அயம் உது வஸ்ஸானோ நாமாதி வா ஹேமந்தோ நாமாதி வா கி³ம்ஹோ நாமாதி வா. புப்³ப³ன்ஹோதி அஹஸ்ஸ புப்³போ³ புப்³ப³ன்ஹோ. தத்த² பச்சி²மனயோவ பாஸம்ஸதரோ. கஸ்மா? புரிமனயே உதுபரிபுண்ணே தி³வஸபா⁴கா³சிக்க²ணஸ்ஸ அபா⁴வா, பச்சி²மனயே பன பரிபுண்ணம் வா அபரிபுண்ணம் வா உதுபமாணம் ஆசிக்கி²தப்³ப³ம். உபஸம்பன்னதி³வஸபா⁴கோ³வ ‘‘புப்³ப³ன்ஹோ’’தி வா ‘‘ஸாயன்ஹோ’’தி வா ஆசிக்கி²தப்³போ³. ஸம்கீ³தீதி ஏத்த² ஸம் ஏகதோ கத்வா கா³யிதப்³பா³ கதே²தப்³பா³தி ஸம்கீ³தீதி வசனத்த²ம் த³ஸ்ஸேந்தோ ஆஹ ‘‘இத³மேவ ஸப்³ப³ம் ஏகதோ கத்வா’’திஆதி³. தத்த² கிந்தி கிம் உதும். இத³ம் நாமாதி இத³ம் நாம உதும். வதே³ய்யாஸீதி ஆக³ந்துகானம் வுட்³ட⁴னவகபா⁴வாதி³ஞாபனத்த²ம் கதே²ய்யாஸி.

129. து³தியந்தி ஸஹாயம் பி⁴க்கு²ம் வா ஸாமணேரம் வா புரிஸம் வா. அகரணீயானீதி உபஸம்பன்னேஹி அகத்தப்³பா³னி. பண்டு³பலாஸோதி ஏத்த² பண்டூ³தி ஸேதபீதமிஸ்ஸோ வண்ணோ, பலாஸஸத்³தோ³ பண்ணவாசகோ, ந ஹரிதவாசகோ, நாபி கிம்ஸுகது³மவாசகோதி த³ஸ்ஸேந்தோ ஆஹ ‘‘பண்டு³வண்ணோ பண்ணோ’’தி. பண்டு³பலாஸோதி ஸமாஸோபி ப்³யாஸோபி யுத்தோயேவ. ஸமாஸகாலே பண்டு³ யஸ்ஸத்தீ²தி பண்டு³, ஸோயேவ பலாஸோ பண்டு³பலாஸோதி காதப்³போ³. புப்ப²ப²லாதி³ம் ப³ந்த⁴தீதி ப³ந்த⁴னந்தி வசனத்தே²ன ப³ந்த⁴னஸத்³தோ³ வண்டபரியாயோதி ஆஹ ‘‘வண்டதோ’’தி. புது²ஸிலாதி (ம. நி. அட்ட². 3.60) ஏத்த² புது²ஸத்³தோ³ மஹந்தபரியாயோதி ஆஹ ‘‘மஹாஸிலா’’தி.

130. தஸ்ஸாதி உக்கே²பனீயகம்மாரஹஸ்ஸ பி⁴க்கு²னோ. ஸாமக்³கீ³தி ஸங்க⁴ஸாமக்³கீ³. தேனாதி உக்கே²பனீயகம்மாரஹேன பி⁴க்கு²னா. ஸம்போ⁴கே³தி ஆமிஸேன ச த⁴ம்மேன ச ஸம்போ⁴க³ஹேது. ஏத்த² ஸஹஸேய்யாபி ஸங்க³ஹிதா ஆபத்திபா⁴வதோ. அனாபத்தீதி அனுக்கி²த்தகபா⁴வதோ பாசித்தியாபத்தியா அனாபத்தி, அலஜ்ஜிலக்க²ணாபா⁴வதோ து³க்கடேன அனாபத்தீதி த³ட்ட²ப்³ப³ம்.

இதி ஸமந்தபாஸாதி³காய வினயஸம்வண்ணனாய

த்³வாஸத்ததிஅதி⁴கவத்து²ஸதபடிமண்டி³தஸ்ஸ மஹாக²ந்த⁴கஸ்ஸ

அத்த²வண்ணனாய யோஜனா ஸமத்தா.