47. பண்ட³கவத்து²கதா²

109. த³ஹரதருணஸத்³தா³னம் வேவசனத்தா வுத்தம் ‘‘த³ஹரே…பே… தருணே’’தி. மோளிக³ல்லஸத்³தோ³ தூ²லஸரீரவாசகோ அனிப்ப²ன்னபாடிபதி³கோதி ஆஹ ‘‘மோளிக³ல்லேதி தூ²லஸரீரே’’தி. ஹத்தி²ப⁴ண்டே³தி ஏத்த² ஹத்தி²ஸங்கா²தம் ப⁴ண்ட³ம் ஏதேஸந்தி ஹத்தி²ப⁴ண்டா³தி வுத்தே ஹத்தி²கோ³பகாதி ஆஹ ‘‘ஹத்தி²கோ³பகே’’தி. அபி⁴தா⁴னே (அபி⁴தா⁴னப்பதீ³பிகாயம் 367 கா³தா²யம்) பன ‘‘ஹத்தி²மேண்டோ³’’தி பாடோ² அத்தி².

பண்ட³கோதி பட³தி விகலபா⁴வம் க³ச்ச²தீதி பண்ட³கோ. ஸம்கே²பேன வுத்தமத்த²ம் வித்தா²ரேன த³ஸ்ஸேந்தோ ஆஹ ‘‘தத்தா²’’திஆதி³. தத்த² யஸ்ஸாதி பண்ட³கஸ்ஸ. அஸுசினாதி ஸம்ப⁴வேன. ஆஸித்தஸ்ஸாதி ஆஸிஞ்சிதப்³ப³ஸ்ஸ. இமினா அஸுசினா முகே² ஆஸிஞ்சிதப்³போ³தி ஆஸித்தோதி வசனத்த²ம் த³ஸ்ஸேதி. அயந்தி பண்ட³கோ. அஜ்ஜா²சாரந்தி மேது²னஜ்ஜா²சாரம். ‘‘உஸூயாய உப்பன்னாயா’’திஇமினா உஸூயதீதி உஸூயோதி வசனத்த²ம் த³ஸ்ஸேதி. உபக்கமேனாதி வாயாமேன. பீ³ஜானீதி அண்டா³னி. இமினா உபக்கமேன ஏதஸ்மா பீ³ஜானி அபனீதானீதி ஓபக்கமிகோதி வசனத்த²ம் த³ஸ்ஸேதி. பக்கே² பவத்தோ பண்ட³கோ பக்க²பண்ட³கோ, பக்கே² பரிளாஹவூபஸமோ பண்ட³கோ பக்க²பண்ட³கோதி வசனத்த²ம் த³ஸ்ஸேந்தோ ஆஹ ‘‘ஏகச்சோ பனா’’திஆதி³. தத்த² புப்³ப³வசனத்தே² பக்கே²தி காலபக்கே²தி அத்தோ² த³ட்ட²ப்³போ³. பச்சி²மவசனத்தே² பக்கே²தி ஜுண்ஹபக்கே²தி அத்தோ² த³ட்ட²ப்³போ³. ‘‘அகுஸலவிபாகானுபா⁴வேனா’’தி பத³ம் ‘‘பண்ட³கோ ஹோதீ’’திபதே³யேவ ஸம்ப³ந்தி⁴தப்³ப³ம். அஸ்ஸாதி பண்ட³கஸ்ஸ. நபும்ஸகபண்ட³கோதி புரிஸோ விய ஸாதிஸயம் பச்சாமித்தே ந பும்ஸகேதி அபி⁴மத்³த³னம் காதும் ந ஸக்கோதீதி நபும்ஸகோ. ந புமா ந இத்தீ²தி நபும்ஸகோதி கத்வா நபுமனஇத்தி²ஸத்³த³ஸ்ஸ நிருத்தினயேன நபும்ஸககரணம்பி வத³ந்தி. நபும்ஸகோயேவ பண்ட³கோ நபும்ஸகபண்ட³கோ. தேஸூதி பஞ்சஸு பண்ட³கேஸு. தேஸுபீதி ஓபக்கமிகாதீ³ஸு தீஸுபி. ‘‘யஸ்மிம் பக்கே²’’தி இமினா பக்கே² பக்கே² பண்ட³கபா⁴வம் நிவத்தேதி. அஸ்ஸாதி பண்ட³கஸ்ஸ. ஏத்தா²தி பஞ்சஸு பண்ட³கேஸு. ஸோபீதி பண்ட³கோபி. இதோதி பண்ட³கவாரதோ. ‘‘ஏஸேவ நயோ’’தி இமினா லிங்க³னாஸனமேவ அதிதி³ஸதி.