42. ஸிக்கா²பத³த³ண்ட³கம்மவத்து²கதா²

106. நாஸனவத்தூ²தி லிங்க³னாஸனாய அதி⁴ட்டா²னம், காரணந்தி வுத்தம் ஹோதி. பச்சி²மானம் பஞ்சன்னந்தி யோஜனா. த³ண்ட³கம்மவத்தூ²தி த³ண்ட³கம்மஸ்ஸ காரணம்.

107. அப்பதிஸ்ஸாதி ஏத்த² பி⁴க்கூ²னம் வசனஸ்ஸ படிமுக²ம் ஆத³ரேன அஸவனம் பி⁴க்கூ² ஜேட்ட²கட்டா²னே ந ட²பேந்தி நாமாதி த³ஸ்ஸேந்தோ ஆஹ ‘‘பி⁴க்கூ² ஜேட்ட²கட்டா²னே’’திஆதி³. ‘‘ஸமானஜீவிகா’’தி இமினா அஸபா⁴க³வுத்திகாதி ஏத்த² ஸபா⁴க³ஸத்³தோ³ ஸமானஸத்³த³பரியாயோ, வுத்திஸத்³தோ³ ஜீவிகபரியாயோதி த³ஸ்ஸேதி. பரிஸக்கதீதி ஏத்த² ஸக்க க³தியந்திதா⁴துபாடே²ஸு (ஸத்³த³னீதிதா⁴துமாலாயம் 16 ளகாரந்ததா⁴து) வுத்தத்தா பரிபுப்³போ³ ஸக்கஸத்³தோ³ க³த்யத்தோ²தி ஆஹ ‘‘பரக்கமதீ’’தி. கிந்தீதி கிமேவ. இதிஸத்³தோ³ ஹேத்த² ஏவஸத்³த³த்தோ², கேன ஏவ உபாயேனாதி ஹி அத்தோ². அக்கோஸதி சேவாதி ஜாதிஆதீ³ஹி அக்கோஸதி சேவ. பே⁴தே³தீதி பே⁴தா³பேதி. ஆவரணம் காதுந்தி ஏத்த² ஆவரணஸத்³தோ³ நிவாரணஸத்³த³வேவசனோதி ஆஹ ‘‘நிவாரணம் காது’’ந்தி. யத்தா²தி யஸ்மிம் பரிவேணே, ஸேனாஸனே வா. வஸ்ஸக்³கே³னாதி வஸ்ஸக³ணனாய. (தஸ்ஸாதி பரிவேணஸேனாஸனஸ்ஸ. உபசாரேதி ஆஸன்னே). முக²த்³வாரிகந்தி முக²ஸங்கா²தேன த்³வாரேன அஜ்ஜோ²ஹரிதப்³ப³ம். ‘‘வத³தோபீ’’தி இமினா வசீபயோகே³ன து³க்கடாபத்திம் த³ஸ்ஸேதி, ‘‘நிக்கி²பதோபீ’’தி இமினா காயபயோகே³ன. அனாசாரஸ்ஸாதி த³ண்ட³கம்மே அனாசாரஸ்ஸ. ஏத்தகே நாம த³ண்ட³கம்மேதி ஏத்தகே நாம உத³காஹராபனாதி³ஸங்கா²தே த³ண்ட³கம்மே. இத³ந்தி யாகு³ப⁴த்தாதி³ம். லச்ச²ஸீதி லபி⁴ஸ்ஸஸி. ‘‘ஏத்தகே நாம த³ண்ட³கம்மே’’தி வுத்தவசனஸ்ஸ யுத்திம் த³ஸ்ஸேந்தோ ஆஹ ‘‘ப⁴க³வதா ஹீ’’திஆதி³. த³ண்ட³கம்மந்தி த³ண்டே³ந்தி த³மேந்தி ஏதேனாதி த³ண்டோ³, ஸோயேவ கத்தப்³ப³த்தா கம்மந்தி த³ண்ட³கம்மம் ஆவரணாதி³. அபராதா⁴னுரூபந்தி வீதிக்கமஸ்ஸ அபராத⁴ஸ்ஸ அனுரூபம். தம்பீதி உத³கதா³ருவாலிகாதி³ஆஹராபணம்பி. தஞ்ச கோ²தி தஞ்ச கரணம். ஓரமிஸ்ஸதீதி காயேன ஓரமிஸ்ஸதி. விரமிஸ்ஸதீதி வாசாய விரமிஸ்ஸதி. உண்ஹபாஸாணே வாதிஆதீ³ஸு வாஸத்³தே³ன அஞ்ஞானிபி அத்ததாபனபரிதாபனாதீ³னி கம்மானி ஸங்க³ண்ஹாதி.