35. கம்மாரப⁴ண்டு³வத்து²ஆதி³கதா²

98. துலாதா⁴ரமுண்ட³கோதி மானப⁴ண்ட³தா⁴ரோ முண்ட³கோ. இமினா கம்மாரப⁴ண்டூ³தி ஏத்த² கம்மாரஸத்³தோ³ துலாதா⁴ரபரியாயோ, ப⁴ண்டு³ஸத்³தோ³ முண்ட³கபரியாயோதி த³ஸ்ஸேதி. துலாதா⁴ரோ ஹி அலங்காரவிகதிகரணத்தா²ய கம்மம் அரதி ஜானாதீதி கம்மாரோதி வுச்சதி. முண்ட³கோ ப⁴ண்டீ³யதி ‘‘முண்டோ³’’தி பரிபா⁴ஸீயதீதி ப⁴ண்டூ³தி வுச்சதி. ‘‘ஸுவண்ணகாரபுத்தோ’’தி இமினா தஸ்ஸ ஸரூபம் த³ஸ்ஸேதி. அபலோகேதுந்தி ஏத்த² அபபுப்³போ³ லோகஸத்³தோ³ ஆபுச்ச²னத்தோ²தி ஆஹ ‘‘ஆபுச்சி²து’’ந்தி. ‘‘ப⁴ண்டு³கம்மத்தா²யா’’தி இமினா ப⁴ண்டு³கம்மாயாதி ஏத்த² தத³த்தே² சதுத்தீ²தி த³ஸ்ஸேதி. தத்ராதி ‘‘ஸங்க⁴ம் அபலோகேது’’ந்திஆதி³வசனே. ஸீமாபரியாபன்னேதி விஹாரஸீமாய வா உபசாரஸீமாய வா பரியாபன்னே. தத்தா²தி பி⁴க்கூ²னம் ஸன்னிபாதட்டா²னம். ஏத்த² சாதி ஆபுச்ச²னே ச. வத்தும் வட்டதியேவாதி பஞ்சஸு வாக்யேஸு யம்கிஞ்சி வாக்யம் கதே²தும் வட்டதியேவ. பிஸத்³தே³ன ‘‘இமஸ்ஸ முண்ட³கம்மம் ஆபுச்சா²மீ’’தி வாக்யம்பி ஸங்க³ண்ஹாதி.

தேஸந்தி வீஸதிஆதீ³னம் பி⁴க்கூ²னம். ‘‘த³ஹரபி⁴க்கூ² வா ஸாமணேரே வா’’தி இத³ம் ஆஸன்னவஸேன வுத்தம். கி³ஹிம்பி பேஸேத்வா ஆபுச்சா²பேதும் வட்டதி. கஸ்மா? ‘‘பப்³ப³ஜ்ஜாபேக்க²ம் வினா வா’’தி வுத்தத்தா.

பப்³பா³ஜேந்தஸ்ஸ அனாபத்தியேவ, ஸுபப்³ப³ஜிதோதி ஆஹ ‘‘பப்³பா³ஜேந்தஸ்ஸாபி அனாபத்தீ’’தி.

ஆபுச்சி²தம் பகே³வாதி யோஜனா. க²ண்ட³ஸீமாயந்தி விஹாரஸீமாய வா உபசாரஸீமாய வா அப்³ப⁴ந்தரே டி²தாயம் க²ண்ட³ஸீமாயம். யோ பனாதி பப்³ப³ஜ்ஜாபேக்கோ² பன. விப்³ப⁴ந்தகோ வாதி நவவிப்³ப⁴ந்தகோ வா. பப்³ப³ஜிதானம் த்³வங்கு³லகேஸோ வட்டதீதி ஆஹ ‘‘த்³வங்கு³லகேஸோ வா’’தி. த்³வீஹி அங்கு³லீஹி அதிரித்தோ கேஸோ இமஸ்ஸாதி த்³வங்கு³லாதிரித்தகேஸோ. ஏகஸிகா²மத்தத⁴ரோபி ஹோதீதி யோஜனா.

100. மாரப்³யாதி⁴னாதி மாரணாபா³தோ⁴. ஸோ ஹி ஸத்தானம் மாரணட்டே²ன, விவித⁴ஸ்ஸ ச து³க்க²ஸ்ஸ ஆத³ஹட்டே²ன மாரப்³யாதீ⁴தி வுச்சதி. இமினா அஹிவாதகரோகே³னாதி ஏத்த² அஹிவிஸஸதி³ஸேன வாதேன பவத்தோ ரோகோ³ அஹிவாதகரோகோ³தி வுச்சதீதி த³ஸ்ஸேதி. தமத்த²ம் வித்தா²ரேந்தோ ஆஹ ‘‘யத்ர ஹீ’’திஆதி³. தத்த² யத்ராதி யஸ்மிம் குலே. ஸோ ரோகோ³ தஸ்மிம் குலே த்³விபதே³ சதுப்பதே³ பட²மம் க³ண்ஹாதி, பச்சா² கே³ஹஸாமிகே க³ண்ஹாதீதி த⁴ம்மபத³அட்ட²கதா²யம் (த⁴. ப. அட்ட². 1.ஸாமாவதீவத்து²) வுத்தம். ததா²தி யதா² அஞ்ஞோ பி⁴த்திம் வா ச²த³னம் வா பி⁴ந்தி³த்வா பலாயித்வா திரோகா³மாதி³க³தோ வா ஹுத்வா முச்சதி, ததா². ஏத்த² ச குலே பிதாபுத்தா முச்சிம்ஸூதி அத்தோ².

காகுட்³டே³பகந்தி ஏத்த² காகே உட்³டா³பேதீதி காகுட்³டே³பகோ, காகே வா உட்³டா³பேத்வா ப⁴த்தம் பு⁴ஞ்ஜிதும் ஸக்கோதீதி காகுட்³டே³பகோதி வசனத்த²ம் த³ஸ்ஸேந்தோ ஆஹ ‘‘யோ வாமஹத்தே²னா’’திஆதி³. தத்த² உட்³டா³பேத்வாதி உத்³த⁴ம் ஆகாஸம் க³மனாபேத்வா. தந்தி காகுட்³டே³பகம்.

102. இத்தரஸத்³தோ³ அப்பமத்தகவாசகோ அனிப்ப²ன்னபாடிபதி³கோதி ஆஹ ‘‘அப்பமத்தகோ’’தி. ‘‘கதிபாஹமேவா’’தி இமினா தஸ்ஸ அத்த²ம் த³ஸ்ஸேதி.