23. உபஸம்பாதே³தப்³ப³பஞ்சககதா²

84. இதா³னி =01 யம் லக்க²ணம் வுத்தந்தி ஸம்ப³ந்தோ⁴. ஸங்கே²பதோதி அங்கா³னி அனுத்³த⁴ரித்வா ஸமாஸதோ. தத்தா²தி யம் ‘‘பஞ்சஹி பி⁴க்க²வே அங்கே³ஹி ஸமன்னாக³தேன பி⁴க்கு²னா’’திஆதி³மாஹ, தத்த². அகு³ணங்கே³ஹீதி கு³ணவிரஹிதேஹி அங்கே³ஹி. ஸோதி பி⁴க்கு². ந உபஸம்பாதே³தப்³ப³ந்தி ஏத்த² கம்மவாசாசரியேன ஹுத்வா ந உபஸம்பாதே³தப்³ப³ந்தி ஆஸங்கா ப⁴வேய்யாதி ஆஹ ‘‘உபஜ்ஜா²யேன ஹுத்வா ந உபஸம்பாதே³தப்³ப³’’ந்தி. ஏத்தா²தி ஏதேஸு பஞ்சகேஸு. ஆதீ³ஸூதி ஏத்த² புப்³போ³ நித³ஸ்ஸனத்தோ² இதிஸத்³தோ³ லோபோ ஹோதி. இதிஆதீ³ஸூதி ஹி அத்தோ². அயுத்தவஸேனாதி அனனுரூபவஸேன. யோதி பி⁴க்கு². ஹீதி ஸச்சம், யஸ்மா வா. பரே ச ஸமாத³பேதுந்தி ஸம்ப³ந்தோ⁴. தத்தா²தி ஸீலக்க²ந்தா⁴தி³கே. பரிஹரதீதி பரிஸம் பரிஸ்ஸயதோ ஹரதி அபனேதி. தஸ்ஸாதி பி⁴க்கு²னோ. ‘‘ஸீலாதீ³ஹீ’’திபத³ம் ‘‘பரிஹாயதியேவா’’திபதே³ அபாதா³னம், ‘‘ந வட்³ட⁴தீ’’திபதே³ கரணம். தஸ்மாதிஆதி³ லத்³த⁴கு³ணம். தேனாதி பி⁴க்கு²னா. கஸ்மா ஆபத்திஅங்க³வஸேன ந வுத்தந்தி ஆஹ ‘‘ந ஹீ’’திஆதி³. ஹீதி யஸ்மா. தஸ்ஸேவாதி கீ²ணாஸவஸ்ஸேவ. ந வதே³ய்யாதி கீ²ணாஸவானம் அனபி⁴ரதியா அனுப்பன்னத்தா ந வதே³ய்ய. யதி³ ந கீ²ணாஸவஸ்ஸேவ உபஜ்ஜா²யாசரியபா⁴வோ அனுஞ்ஞாதோ, அத² கஸ்மா கீ²ணாஸவபஞ்சகோ வுத்தோதி ஆஹ ‘‘யஸ்மா பனா’’திஆதி³. யஸ்மா ந பரிஹாயதீதி ஸம்ப³ந்தோ⁴.

அந்தக்³கா³ஹிகாயாதி ஸஸ்ஸதுச்சே²த³ஸங்கா²தம் அந்தம் லாமகம் க³ண்ஹாதி, க³ண்ஹாபேதீதி வா அந்தக்³கா³ஹிகா, தாய. தி³ட்டி²யாதி மிச்சா²தி³ட்டி²யா. யத்தகம் ஸுதந்தி பி⁴க்கு²னோவாத³கஸிக்கா²பதே³ (பாசி. அட்ட². 145-147) வுத்தம் யத்தகம் ஸுதம். தேனாதி ஸுதேன ऋ. யம் ஆபத்தாதி³ தேன ஜானிதப்³ப³ந்தி யோஜனா.

ஆபத்திம் ந ஜானாதீதி ஏத்த² ஆபத்திம் ஆபன்னோதி ந ஜானாதீதி அத்த²ம் த³ஸ்ஸேந்தோ ஆஹ ‘‘இத³ம் நாமா’’திஆதி³. தத்த² ‘‘ஆபன்னோ’’தி இமினா ‘‘ஆபத்தி’’ந்திபத³ம் ‘‘ஆபன்னோ’’திபாட²ஸேஸேன யோஜேதப்³ப³ந்தி த³ஸ்ஸேதி.

ஆபி⁴ஸமாசாரிகாயாதி ஏத்த² உப⁴தோவிப⁴ங்க³பரியாபன்னஸீலதோ அபி⁴விஸேஸேன ஸம்மா சரிதப்³ப³ந்தி ஆபி⁴ஸமாசாரம், க²ந்த⁴கபரியாபன்னம் வத்தபடிபத்திஸீலம், தம் ஆரப்³ப⁴ பஞ்ஞத்தா ஆபி⁴ஸமாசாரிகா, க²ந்த⁴கபரியாபன்னா ஸிக்கா², தாய. ஆதி³ப்³ரஹ்மசாரியகாயாதி ஏத்த² மக்³க³ஸங்கா²தஸ்ஸ ப்³ரஹ்மசரியஸ்ஸ ஆதி³ மரியாதோ³ ஆதி³ப்³ரஹ்மசரியோ, தஸ்மிம் பவத்தா ஆதி³ப்³ரஹ்மசரியகா =02, உப⁴தோவிப⁴ங்க³பரியாபன்னா ஸிக்கா², தாய. ஸேக்க²பண்ணத்தியந்தி ஸிக்கி²தப்³ப³ட்டே²ன ஸிக்கா², ஸா ஏவ ப⁴க³வதா பஞ்ஞத்தத்தா ஸேக்க²பண்ணத்தி. அத² வா ஸிக்க²னம் ஸிக்கா², தாய ஸிக்க²னத்தா²ய ப⁴க³வதா பஞ்ஞபீயதீதி ஸேக்க²பண்ணத்தி உப⁴தோவிப⁴ங்க³பரியாபன்னஸிக்கா²யேவ, தஸ்ஸம். அபி⁴த⁴ம்மேதி ஏத்த² ஸுத்தந்தபாளிதோ அபி⁴ அதிரேகோ, அபி⁴விஸிட்டோ² வா த⁴ம்மோ அபி⁴த⁴ம்மோதி வுத்தே நாமரூபபரிச்சே²த³கம் அபி⁴த⁴ம்மபிடகந்தி ஆஹ ‘‘நாமரூபபரிச்சே²தே³’’தி. அபி⁴வினயேதி ஏத்த² அபி⁴ப⁴வித்வா காயவாசம் வினேதீதி அபி⁴வினயோ, அபி⁴ப⁴வித்வா காயவாசம் வினேதி ஏத்த², ஏதேனாதி வா அபி⁴வினயோதி வுத்தே வினயபிடகந்தி ஆஹ ‘‘ஸகலே வினயபிடகே’’தி. ஸப்³ப³த்தா²தி ஸப்³பே³ஸு பதே³ஸு, ஸப்³பே³ஸம் வா பதா³னம். அத்தோ² த³ட்ட²ப்³போ³தி யோஜனா. ‘‘காரணேனா’’தி ஏத்த² காரணஸத்³தே³ன ‘‘த⁴ம்மதோ’’தி ஏத்த² த⁴ம்மஸத்³த³ஸ்ஸ ஸபா⁴வத்தா²த³யோ நிவாரேத்வா காரணத்த²தம் தீ³பேதி, ஏனஸத்³தே³ன தோபச்சயஸ்ஸ விஸேஸனத்த²ம். இதீதி ஏவம் யதா²வுத்தனயேனாதி அத்தோ². சதுத்தே²தி சதுத்த²பஞ்சகே. சதுத்த²பஞ்சகதோ தீணி பதா³னி, பஞ்சமபஞ்சகதோ த்³வே பதா³னி க³ஹேத்வா பஞ்சகம் கத்வா வுத்தம் ‘‘சத்தாரோ பஞ்சகா’’தி. அட்ட²ஸு பஞ்சகேஸூதி ஸம்ப³ந்தோ⁴.

இதி ஸோளஸபஞ்சகவினிச்ச²யே யோஜனா ஸமத்தா.