18. ஆசரியவத்தகதா²

75. கிந்தாயந்தி ஏத்த² ஏகாரலோபவஸேன ஸந்தி⁴ ஹோதீதி ஆஹ ‘‘கிம்தே அய’’ந்தி. ‘‘ஓவதி³தப்³போ³தி’’இமினா ஓவதி³யோதி ஏத்த² ண்யபச்சயஸ்ஸ கம்மத்த²ம் த³ஸ்ஸேதி. ‘‘தத³த்தா²யா’’தி இமினா ‘‘யதி³த³ம் க³ணப³ந்தி⁴க’’ந்தி உத்தரவாக்யே யம்ஸத்³த³ம் தி³ஸ்வா புப்³ப³வாக்யே தம்ஸத்³த³ம் ஞாபேதி, தஸ்ஸ பா³ஹுல்லஸ்ஸ அத்தா²யாதி அத்தோ².

76. ஸோதி பஸூரோ பரிப்³பா³ஜகோ. தேனாதி உதா³யித்தே²ரேன. ஸஹத⁴ம்மிகந்தி ஸஹ த⁴ம்மேன காரணேன. ப்³யத்தோ தாவ புப்³பே³ வுத்தலக்க²ணோ ஹோது, படிப³லோ பன கத²ம் ஞாதப்³போ³தி ஆஹ ‘‘யோ பனா’’திஆதி³. யோ பன ஸக்கோதீதி ஸம்ப³ந்தோ⁴. சாதி ஸச்சம். ஏதந்தி படிப³லத்தம், ‘‘பஞ்சஹி…பே… வினேது’’ந்திவசனம் வா.

77. தித்தி²யபக்க²ஸங்கந்தேஸூதி தித்தி²யஸங்கா²தம் ஸாஸனஸ்ஸ படிபக்க²ம் ஸங்கமந்தேஸு. ஆசாரஸமாசாரஸிக்கா²பனகந்தி அதிவிய சரிதப்³ப³ம் ஆபி⁴ஸமாசாரிகஸீலம் ஸிக்கா²பனகம். இமினா ஆசாரம் ஸிக்கா²பேதீதி ஆசரியோதி வசனத்த²ம் த³ஸ்ஸேதி. நாமமத்தமேவாதி ‘‘ஆசரியோ’’தி வா ‘‘அந்தேவாஸிகோ’’தி வா நாமமத்தமேவ. நானந்தி உபஜ்ஜா²யதோ வா ஸத்³தி⁴விஹாரிகதோ வா நானம்.