13. பி³ம்பி³ஸாரஸமாக³மகதா²

55. லட்டி²ஸத்³தோ³ தருணருக்க²வாசகோ ‘‘அம்ப³லட்டி²காய’’ந்திஆதீ³ஸு (தீ³. நி. 1.2), இதா⁴பி தருணதாலருக்கோ² லட்டி² நாமாதி த³ஸ்ஸேந்தோ ஆஹ ‘‘தாலுய்யானே’’தி. வடருக்கே²தி நிக்³ரோத⁴ருக்கே². ஏத்த² ‘‘வட’’இதி இமினா வடருக்கோ² ப³ஹுமூலத்தா ஸுட்டு²ம் பதிட்டா²தீதி அத்தே²ன ஸுப்பதிட்டோ² நாமாதி த³ஸ்ஸேதி. ‘‘ருக்கே²’’இதி இமினா சேதியஸத்³தோ³ சேதியருக்கே² வத்ததீதி த³ஸ்ஸேதி, தே³வாலயஞ்ச தூ²பஞ்ச நிவத்தேதி. தஸ்ஸாதி வடருக்க²ஸ்ஸ. ஏதந்தி ‘‘ஸுப்பதிட்டே² சேதியே’’தி ஏதம் நாமம். லோகவோஹாரவஸேன த³ஸஸஹஸ்ஸஸங்கா²தே ஸங்க்²யாவிஸேஸே நீஹரித்வா யுஜ்ஜிதப்³ப³ந்தி நியுதந்தி வசனத்தே²ன த³ஸஸஹஸ்ஸம் நியுதம் நாமாதி த³ஸ்ஸேந்தோ ஆஹ ‘‘ஏகனியுதம் த³ஸஸஹஸ்ஸானீ’’தி. ‘‘நஹுத’’ந்திபி பாடோ², ஸோ அயுத்தோ நஹுதஸங்கா²தேன ஸங்க்²யாவிஸேஸேன மிஸ்ஸீபா⁴வேன பஸங்க³த்தா. தேஸந்தி த்³வாத³ஸனியுதானம் ப்³ராஹ்மணக³ஹபதிகானம்.

‘‘கிஸஸரீரத்தா’’தி இமினா கிஸோ கோ அத்தா ஏதேஸந்தி கிஸகாதி வசனத்த²ம் த³ஸ்ஸேதி. ககாரோ ஹேத்த² அத்தவாசகோ. ‘‘ஓவாத³கோ’’தி இமினா ஓவதா³னோதி ஏத்த² யுபச்சயோ கத்துத்தோ²தி த³ஸ்ஸேதி. கா³தா²ப³ந்த⁴த்தா அகாரஸ்ஸ தீ³கோ⁴. ‘‘அத² வா’’திஆதி³னா கிஸகோ ஹுத்வா அஞ்ஞே ஓவதா³னோ கிஸகோவதா³னோதி வசனத்த²ம் த³ஸ்ஸேதி. இத³ந்தி இத³ம் அத்த²ஜாதம், அயமத்தோ² வா. த்வம் பஹாஸீதி ஸம்ப³ந்தோ⁴. தந்தி துவம். இதி வுத்தம் ஹோதீதி யோஜனா.

காமித்தி²யோதி ஏகாரலோபவஸேன ஸந்தீ⁴தி ஆஹ ‘‘காமே இத்தி²யோ சா’’தி. உபசீஸூதி ஏத்த² காமக²ந்த⁴கிலேஸஅபி⁴ஸங்கா²ரஸங்கா²தேஸு சதூஸு உபதீ⁴ஸு க²ந்து⁴பதி⁴ அதி⁴ப்பேதோதி ஆஹ ‘‘க²ந்து⁴பதீ⁴ஸூ’’தி.

கோசரஹீதி ஏத்த² கோஸத்³தோ³ ‘‘கோ தே ப³லம் மஹாராஜா’’திஆதீ³ஸு (ஜா. 2.22.1880) விய க்வஸத்³த³த்தோ²தி ஆஹ ‘‘க்வசரஹீ’’தி. நிபாதோயேவேஸ.

பத³ஸத்³த³ஸ்ஸ சரணபதா³த³யோ நிவத்தேதும் வுத்தம் ‘‘நிப்³பா³னபத³’’ந்தி. ‘‘ஸந்தஸபா⁴வதாயா’’திஆதி³னா ஸந்தோ ஸபா⁴வோ இமஸ்ஸ பத³ஸ்ஸாதி ஸந்தம். நத்தி² உபத⁴யோ ஏத்தா²தி அனுபதி⁴கம். நத்தி² கிஞ்சனமேத்தா²தி அகிஞ்சனம். தீஸு ப⁴வேஸு ந ஸஞ்ஜதீதி அஸத்தம். அஞ்ஞதா² ந ப⁴வதீதி அனஞ்ஞதா²பா⁴வி. அஞ்ஞேன கேனசி ந நேதப்³ப³ந்தி அனஞ்ஞனேய்யந்தி வசனத்த²ம் த³ஸ்ஸேதி. தேனாதி ‘‘ஸந்த’’ந்திஆதி³பதே³ன. மேதி மம, மனோதி ஸம்ப³ந்தோ⁴. ஏத்த² தே³வமனுஸ்ஸலோகே மே மனோ ரதோ நாமாதி கிம் வக்கா²மி. இதி இமமத்த²ம் த³ஸ்ஸேதீதி யோஜனா.

56. தஞ்சாதி ஸாவகபா⁴வஞ்ச.

57. அஸ்ஸாஸகாதி ஏத்த² ஆபுப்³போ³ ஸாஸதா⁴து ஆபுப்³ப³ ஸிஸதா⁴துனா ஸதி³ஸோ, ‘‘மே’’தி ச²ட்டீ²யோக³த்தா ண்வுபச்சயோ ச பா⁴வத்தோ²தி ஆஹ ‘‘ஆஸிஸனா’’தி. ‘‘பத்த²னா’’தி இமினா ஆபுப்³ப³ஸிஸதா⁴துயா அத்த²ம் த³ஸ்ஸேதி. அஸ்ஸாதி பி³ம்பி³ஸாரரஞ்ஞோ. தத்தா²தி ரதனத்தயே. நிச்ச²யக³மனமேவாதி ‘‘ஸரண’’இதினிச்ச²யேன ஜானனமேவ க³தோ. அத்தஸன்னிய்யாதனந்தி அத்தனோ அத்தானம் ரதனத்தயே ஸன்னிய்யாதனம். இமினா அத்தஸன்னிய்யாதன, பணிபாத, தப்பராயன, ஸிஸ்ஸபா⁴வூபக³மனஸங்கா²தேஸு சதூஸு ஸரணக³மனேஸு (தீ³. நி. அட்ட². 1.250; ம. நி. அட்ட². 1.56; கு². பா. அட்ட². 1.ஸரணக³மனக³மகவிபா⁴வனா) அத்தஸன்னிய்யாதனஸரணக³மனம் தீ³பேதி. அயந்தி பி³ம்பி³ஸாரோ ராஜா. தந்தி நியதஸரணதம். பணிபாதக³மனஞ்சாதி ஏத்த² பணீதி கரோ. யதா² ஹி பாத³பத³ஸத்³தா³ தீ³க⁴ரஸ்ஸவஸேன ஹுத்வா சரணம் வத³ந்தி, ஏவம் பாணிபணிஸத்³தா³ கரம் வத³ந்தி. தஸ்மா வுத்தம் ‘‘பணீதி கரோ’’தி. பதனம் பாதோ, பணினோ பாதோ பணிபாதோ. அத்த²தோ அஞ்ஜலிபணமனந்தி வுத்தம் ஹோதி. தஸ்ஸ க³மனஞ்ச க³ச்ச²ந்தோதி அத்தோ². இமினா பணிபாதஸரணக³மனம் தீ³பேதி. சஸத்³தோ³ ‘‘பாகட’’ந்தி ஏத்தா²பி யோஜேதப்³போ³. பாகடஞ்ச கரோந்தோதி ஹி அத்தோ².

58. ஸிங்கீ³னிக்க²ஸவண்ணோதி ஏத்த² ஸிங்கீ³ஸங்கா²தோ நிக்கோ² ஸிங்கீ³னிக்கோ², தேன ஸமானோ வண்ணோ ஏதஸ்ஸாதி ஸிங்கீ³னிக்க²ஸவண்ணோதி வசனத்த²ம் த³ஸ்ஸேந்தோ ஆஹ ‘‘ஸிங்கீ³ஸுவண்ணனிக்கே²ன ஸமானவண்ணோ’’தி. தத்த² ‘‘ஸுவண்ண’’இதிபதே³ன நிக்க²ஸத்³த³ஸ்ஸ ஸுவண்ணத்த²ம் த³ஸ்ஸேதி, பஞ்சஸுவண்ணாத³யோ அத்தே² நிவத்தேதி. ‘‘ஸமான’’இதிபதே³ன ஸவண்ணோதி ஏத்த² ஸகாரோ ஸமானஸத்³த³ஸ்ஸேவ காரியோதி த³ஸ்ஸேதி. ஸப்³பே³ஸூதி அகி²லேஸு சக்கா²தி³இந்த்³ரியேஸு. த³ந்தோதி த³மிதோ. இந்த்³ரியஸம்வரோதி வுத்தம் ஹோதி. தமேவத்த²ம் பாகடம் கரோந்தோ ஆஹ ‘‘ப⁴க³வதோ ஹீ’’திஆதி³.

59. ஓணீதோ பத்ததோ பாணி யேனாதி ஓணீதபத்தபாணீதி வசனத்த²ம் த³ஸ்ஸேந்தோ ஆஹ ‘‘பத்ததோ சா’’திஆதி³. ‘‘அபனீதபாணி’’ந்தி இமினா ஓணீதஸத்³தோ³ அபனீதத்தோ², பாணிஸத்³தே³ன ச ஸம்ப³ந்தி⁴தப்³போ³தி த³ஸ்ஸேதி. ‘‘ஸல்லக்கே²த்வா’’தி இமினா ‘‘ப⁴க³வந்த’’ந்தி இமம் கம்மம் ‘‘ஸல்லக்கே²த்வா’’தி பாட²ஸேஸேன யோஜேதப்³ப³ந்தி த³ஸ்ஸேதி. ஏகமந்தந்தி ஏத்த² அந்தஸத்³தோ³ ஸமீபதே³ஸத்தோ², கோடிதே³ஸத்தோ² வா ஹோதி, உபயோக³வசனஞ்ச பு⁴ம்மத்தே² ஹோதீதி த³ஸ்ஸேந்தோ ஆஹ ‘‘ஏகஸ்மிம் பதே³ஸே’’தி. அத்தி²கபயோகே³ கரணஸ்ஸ ஸம்ப⁴வதோ ஆஹ ‘‘பு³த்³தா⁴பி⁴வாத³னக³மனேன வா த⁴ம்மஸ்ஸவனக³மனேன வா’’தி. அப்பாகிண்ணந்தி ஏத்த² அப்பஸத்³தோ³ படிஸேத⁴த்தோ²தி ஆஹ ‘‘அனாகிண்ண’’ந்தி. ‘‘அப்³போ³கிண்ண’’ந்திபி பாடோ². அப்பனிக்³கோ⁴ஸந்தி ஏத்த² ‘‘அப்பஸத்³த³’’ந்திபதே³ன வசனஸத்³த³ஸ்ஸ க³ஹிதத்தா இமினா பாரிஸேஸனயேன நக³ரனிக்³கோ⁴ஸஸத்³தோ³யேவ க³ஹேதப்³போ³தி ஆஹ ‘‘நக³ரனிக்³கோ⁴ஸஸத்³தே³ன அப்பனிக்³கோ⁴ஸ’’ந்தி. தீஸு பாடே²ஸு பட²மேன பாடே²ன ஜனஸ்ஸ வாதோ ஜனவாதோ, தேன விரஹிதம் விஜனவாதந்தி விகப்பம் த³ஸ்ஸேதி. து³தியேன ஜனஸ்ஸ வாதோ³ ஜனவாதோ³, தேன விரஹிதம் விஜனவாத³ந்தி விகப்பம் த³ஸ்ஸேதி. ததியேன ஜனஸ்ஸ பாதோ ஸஞ்சரணம் ஜனபாதோ, தேன விரஹிதம் விஜனபாதந்தி விகப்பம் த³ஸ்ஸேதி. ரஹஸ்ஸம் கரீயதி ஏத்தா²தி ராஹஸ்ஸேய்யகம். மனுஸ்ஸானம் ராஹஸ்ஸேய்யகம் மனுஸ்ஸராஹஸ்ஸேய்யகந்தி வசனத்த²ம் த³ஸ்ஸேதி ‘‘மனுஸ்ஸான’’ந்திஆதி³னா.