1. பட²மஸிக்கா²பத³-அத்த²யோஜனா

978. சித்தாகா³ரவக்³க³ஸ்ஸ பட²மே ரஞ்ஞோ கீளனட்டா²னம் அகா³ரம் ராஜாகா³ரந்தி வசனத்த²ம் த³ஸ்ஸேந்தோ ஆஹ ‘‘ரஞ்ஞோ கீளனக⁴ர’’ந்தி. சித்தம் அகா³ரம் சித்தாகா³ரம். ஆராமந்தி நக³ரதோ நாதிதூ³ரஆராமோதி ஆஹ ‘‘உபவன’’ந்தி. உய்யானந்தி ஸம்பன்னபுப்ப²ப²லதாய உத்³த⁴ம் உல்லோகேத்வா மனுஸ்ஸா யந்தி க³ச்ச²ந்தி ஏத்தா²தி உய்யானம். போக்க²ரணிந்தி போக்க²ரம் பது³மம் நேதீதி போக்க²ரணீ. பஞ்சபீதி ராஜாகா³ராதீ³னி பஞ்சபி. ஸப்³ப³த்தா²தி த³ஸ்ஸனத்தா²ய க³மனே ச க³ந்த்வா பஸ்ஸனே சாதி ஸப்³பே³ஸு.

981. ‘‘அஜ்ஜா²ராமே’’திஆதி³னா ஆராமே டி²தாய ஆராமதோ ப³ஹி கதே ராஜாகா³ராதி³கே பஸ்ஸந்தியாபி அனாபத்தீதி த³ஸ்ஸேதி. தானீதி ராஜாகா³ராதீ³னீதி. பட²மம்.