3. நிஸ்ஸக்³கி³யகண்ட³ம்

1. பட²மனிஸ்ஸக்³கி³யபாசித்தியஸிக்கா²பத³-அத்த²யோஜனா

திம்ஸ நிஸ்ஸக்³கி³யா யே த⁴ம்மா பி⁴க்கு²னீனம் ப⁴க³வதா பகாஸிதா, தேஸம் த⁴ம்மானம் தா³னி இமஸ்மிம் காலே அயம் ஸம்வண்ணனாக்கமோ ப⁴வதீதி யோஜனா.

733. பட²மே ஆமத்திகாபணந்தி ஏத்த² ஆமத்தஸத்³தோ³ பா⁴ஜனபரியாயோதி ஆஹ ‘‘பா⁴ஜனானீ’’தி. பா⁴ஜனானி ஹி அமந்தி பரிபு⁴ஞ்ஜிதப்³ப³பா⁴வம் க³ச்ச²ந்தீதி ‘‘அமத்தானீ’’தி வுச்சந்தி. அமத்தானி விக்கிணந்தீதி ‘‘ஆமத்திகா’’தி வசனத்த²ம் த³ஸ்ஸேந்தோ ஆஹ ‘‘தானீ’’திஆதி³. தேஸந்தி ஆமத்திகானம். தம் வாதி ஆமத்திகாபணம் வா.

734. ‘‘ஸன்னிதி⁴’’ந்தி இமினா ஸம்னிபுப்³போ³ சிஸத்³தோ³ உசினனத்தோ²தி த³ஸ்ஸேதி. ஹிஸத்³தோ³ விஸேஸஜோதகோ. தத்தா²தி மஹாவிப⁴ங்கே³. இதா⁴தி பி⁴க்கு²னிவிப⁴ங்கே³.

இத³ம்பீதி இத³ம் ஸிக்கா²பத³ம்பி. பிஸத்³தோ³ மஹாவிப⁴ங்க³ஸிக்கா²பத³ம் அபேக்க²தீதி. பட²மம்.

2. து³தியனிஸ்ஸக்³கி³யபாசித்தியஸிக்கா²பத³ம்

738. து³தியே அஹதசோளானம்பி ஸேத³மலாதி³கிலின்னே விரூபத்தா ‘‘ஜிண்ணசோளா’’தி வுத்தம். ‘‘அபி அய்யாஹீ’’திஇமினா ‘‘அப அய்யாஹீ’’திபத³விபா⁴க³ம் நிவத்தேதி.

740. ஸப்³ப³ம்பி ஏதம் சீவரந்தி யோஜனா. ஏவம் படிலத்³த⁴ந்தி ஏவம் நிஸ்ஸஜ்ஜித்வா லத்³த⁴ம். யதா²தா³னேயேவாதி யதா² தா³யகேஹி தி³ன்னம், தஸ்மிம் தா³னேயேவ உபனேதப்³ப³ம், அகாலசீவரேயேவ பக்கி²பிதப்³ப³ந்தி அத்தோ²தி. து³தியம்.

3. ததியனிஸ்ஸக்³கி³யபாசித்தியஸிக்கா²பத³ம்

743. ததியே ஹந்த³ஸத்³தோ³ வவஸ்ஸக்³க³த்தே² நிபாதோதி ஆஹ ‘‘ஹந்தா³தி க³ண்ஹா’’தி. ப³ஹூனி நிஸ்ஸக்³கி³யானீதி ஸம்ப³ந்தோ⁴. ஸம்ஹரித்வாதி விஸும் விஸும் ஸங்க⁴ரித்வாதி. ததியம்.

4. சதுத்த²னிஸ்ஸக்³கி³யபாசித்தியஸிக்கா²பத³ம்

748. சதுத்தே² கிணாதி அனேனாதி கயந்தி வசனத்தே²ன மூலம் கயம் நாமாதி ஆஹ ‘‘மூலேனா’’தி. ஸாதி து²ல்லனந்தா³, ஆஹ கிராதி ஸம்ப³ந்தோ⁴. ஞாதா⁴துயா அவபோ³த⁴னத்த²தோ அஞ்ஞம்பி ஞாதா⁴துயா யாசனத்த²ம் த³ஸ்ஸேந்தோ ஆஹ ‘‘யாசித்வா வா’’தி.

752. யந்தி ஸப்³பி³தேலாதி³. தஞ்ஞேவாதி ஸப்³பி³தேலாதி³மேவ. யமகந்தி ஸப்³பி³ம் ஸஹ தேலேன யுக³ளம் கத்வா. வேஜ்ஜேனாதி பி⁴ஸக்கேன. ஸோ ஹி ஆயுப்³பே³த³ஸங்கா²தம் விஜ்ஜம் ஜானாதீதி வேஜ்ஜோதி ச ரோக³ஞ்ச தஸ்ஸ நிதா³னஞ்ச பே⁴ஸஜ்ஜஞ்ச வித³தி ஜானாதீதிபி வேஜ்ஜோதி ச வுச்சதி. ததோதி வேஜ்ஜேன வுத்தகாரணா. கஹாபணஸ்ஸாதி கஹாபணேன, ஆப⁴தந்தி ஸம்ப³ந்தோ⁴தி. சதுத்த²ம்.

5. பஞ்சமனிஸ்ஸக்³கி³யபாசித்தியஸிக்கா²பத³ம்

753. பஞ்சமே ஸாதி ஸிக்க²மானா. அயந்தி ஸிக்க²மானா. அத்³தா⁴தி ஏகம்ஸேன. ‘‘சேதாபேத்வா’’தி ஏத்த² சிதிஸத்³தோ³ ஜானனத்தோ²தி ஆஹ ‘‘ஜானாபேத்வா’’தி. பஞ்சமம்.

6. ச²ட்ட²னிஸ்ஸக்³கி³யபாசித்தியஸிக்கா²பத³ம்

758. ச²ட்டே² ச²ந்த³ம் உப்பாதே³த்வா க³ஹிதம் ச²ந்த³கந்தி வசனத்த²ம் த³ஸ்ஸேந்தோ ஆஹ ‘‘ச²ந்த³க’’ந்திஆதி³. த⁴ம்மகிச்சந்தி புஞ்ஞகரணீயம். த⁴ம்மஸத்³தோ³ ஹேத்த² புஞ்ஞவாசகோ. யந்தி வத்து²ம். பரேஸந்தி அத்தனா அஞ்ஞேஸம். ‘‘ஏத’’ந்தி ‘‘ச²ந்த³க’’ந்தி ஏதம் நாமம். ‘‘அஞ்ஞஸ்ஸத்தா²ய தி³ன்னேனா’’திஇமினா அஞ்ஞஸ்ஸ அத்தோ² அஞ்ஞத³த்தோ², த³காரோ பத³ஸந்தி⁴கரோ, தத³த்தா²ய தி³ன்னோ அஞ்ஞத³த்தி²கோதி வசனத்த²ம் த³ஸ்ஸேதி. ‘‘அஞ்ஞம் உத்³தி³ஸித்வா தி³ன்னேனா’’திஇமினா அஞ்ஞம் உத்³தி³ஸித்வா தி³ன்னம் அஞ்ஞுத்³தி³ஸிகந்தி வசனத்த²ம் த³ஸ்ஸேதி. ‘‘ஸங்க⁴ஸ்ஸ பரிச்சத்தேனா’’தி இமினா ஸங்க⁴ஸ்ஸ பரிச்சத்தோ ஸங்கி⁴கோதி வசனத்த²ம் த³ஸ்ஸேதி.

762. யத³த்தா²யாதி யேஸம் சீவராதீ³னம் அத்தா²ய. யஸத்³தே³ன ஸமாஸபா⁴வதோ புப்³பே³ நிக்³க³ஹிதாக³மோ ஹோதி. தந்தி சீவராதி³கம். தும்ஹேஹீதி தா³யகே ஸந்தா⁴ய வுத்தம். உபத்³த³வேஸூதி து³ப்³பி⁴க்கா²தி³உபஸக்³கே³ஸு. யம் வா தம் வாதி சீவரம் வா அஞ்ஞே வா பிண்ட³பாதாதி³கேதி யம் வா தம் வாதி. ச²ட்ட²ம்.

7. ஸத்தமனிஸ்ஸக்³கி³யபாசித்தியஸிக்கா²பத³ம்

764. ஸத்தமே ஸஞ்ஞாசிகேனாதி ஏத்த² ஸம்ஸத்³த³ஸ்ஸ ஸயமத்தே² பவத்திபா⁴வம் த³ஸ்ஸேதும் வுத்தம் ‘‘ஸயம் யாசிதகேனா’’தி. ஏததே³வாதி ‘‘ஸஞ்ஞாசிகேனா’’தி பத³மேவ. ஏத்தா²தி இமஸ்மிம் ஸிக்கா²பதே³தி. ஸத்தமம்.

8. அட்ட²மனிஸ்ஸக்³கி³யபாசித்தியஸிக்கா²பத³ம்

769. அட்ட²மே க³ணஸ்ஸாதி பி⁴க்கு²னிக³ணஸ்ஸ. இமினா ‘‘மஹாஜனிகேனா’’தி ஏத்த² பி⁴க்கு²னிக³ணோவ மஹாஜனோதி அதி⁴ப்பேதோதி தீ³பேதீதி. அட்ட²மம்.

9. நவமனிஸ்ஸக்³கி³யபாசித்தியஸிக்கா²பத³ம்

774. நவமே இதோதி இமஸ்மா அட்ட²மஸிக்கா²பத³தோ. அதி⁴கதரந்தி அதிரேகதரந்தி. நவமம்.

10. த³ஸமனிஸ்ஸக்³கி³யபாசித்தியஸிக்கா²பத³ம்

778. த³ஸமே ‘‘வினஸ்ஸதீ’’திஇமினா ‘‘உந்த்³ரியதீ’’தி ஏத்த² உதி³தா⁴துயா நஸ்ஸனத்த²ம் த³ஸ்ஸேதி தா⁴தூனமனேகத்த²த்தா. பரிபததீதி பரிக³லித்வா பததி. இமினா நஸ்ஸனாகாரம் த³ஸ்ஸேதி. ஏத்தகமேவாதி ஏதம் பரிமாணம் த்³விபத³மேவாதி. த³ஸமம்.

11. ஏகாத³ஸமனிஸ்ஸக்³கி³யபாசித்தியஸிக்கா²பத³ம்

784. ஏகாத³ஸமே க³ருபாவுரணம் நாம ஸீதகாலே பாவுரணவத்த²ந்தி த³ஸ்ஸேந்தோ ஆஹ ‘‘ஸீதகாலே பாவுரண’’ந்தி. ஸீதகாலே ஹி மனுஸ்ஸா தூ²லபாவுரணம் பாருபந்தி. ‘‘சதுக்கம்ஸபரம’’ந்தி ஏத்த² கம்ஸஸத்³தோ³ பு⁴ஞ்ஜனபத்தே ச ஸுவண்ணாதி³லோஹவிஸேஸே ச சதுகஹாபணே சாதி தீஸு அத்தே²ஸு தி³ஸ்ஸதி, இத⁴ பன சதுகஹாபணே வத்ததீதி த³ஸ்ஸேந்தோ ஆஹ ‘‘கம்ஸோ நாம சதுக்கஹாபணிகோ ஹோதீ’’தி. சதுக்கம்ஸஸங்கா²தம் பரமம் இமஸ்ஸாதி சதுக்கம்ஸபரமம், ஸோளஸகஹாபணக்³க⁴னகம் பாவுரணந்தி அத்தோ²தி. ஏகாத³ஸமம்.

12. த்³வாத³ஸமனிஸ்ஸக்³கி³யபாசித்தியஸிக்கா²பத³ம்

789. த்³வாத³ஸமே லஹுபாவுரணம் நாம உண்ஹகாலே பாவுரணவத்த²ந்தி த³ஸ்ஸேந்தோ ஆஹ ‘‘உண்ஹகாலே பாவுரண’’ந்தி. உண்ஹகாலே ஹி மனுஸ்ஸா ஸுகு²மபாவுரணம் பாருபந்தீதி. த்³வாத³ஸமம்.

நிஸ்ஸக்³கி³யானம் திம்ஸபா⁴வம் த³ஸ்ஸேந்தோ ஆஹ ‘‘மஹாவிப⁴ங்கே³’’திஆதி³. சீவரவக்³க³தோ அபனேத்வாதி ஸம்ப³ந்தோ⁴. அஞ்ஞத³த்தி²கானீதி அஞ்ஞத³த்தி²கபதே³ன வுத்தானி ஸிக்கா²பதா³னி. இதீதி ஏவம். ஏகதோபஞ்ஞத்தானீதி ஏகஸ்ஸேவ பஞ்ஞத்தானி, உப⁴தோபஞ்ஞத்தானீதி உப⁴யேஸம் பஞ்ஞத்தானி. ஏத்தா²தி ‘‘உத்³தி³ட்டா² கோ²’’திஆதி³வசனேதி.

இதி ஸமந்தபாஸாதி³காய வினயஸம்வண்ணனாய

பி⁴க்கு²னிவிப⁴ங்கே³

திம்ஸகவண்ணனாய யோஜனா ஸமத்தா.