6. ச²ட்ட²ஸங்கா⁴தி³ஸேஸஸிக்கா²பத³ம்

705. ச²ட்டே² யதோ த்வந்தி ஏத்த² காரணத்தே² தோபச்சயோதி ஆஹ ‘‘யஸ்மா’’தி. கஸ்ஸா ஹோந்தீதி உய்யோஜிகாஉய்யோஜிதாஸு கஸ்ஸா பி⁴க்கு²னியா ஹோந்தீதி யோஜனா. ந தே³தீதி உய்யோஜிகா உய்யோஜிதாய ந தே³தி. ந படிக்³க³ண்ஹாதீதி உய்யோஜிதா உய்யோஜிகாய ஹத்த²தோ ந படிக்³க³ண்ஹாதி. படிக்³க³ஹோ தேன ந விஜ்ஜதீதி தேனேவ காரணேன உய்யோஜிகாய ஹத்த²தோ உய்யோஜிதாய படிக்³க³ஹோ ந விஜ்ஜதி. ஆபஜ்ஜதி க³ருகம், ந லஹுகந்தி ஏவம் ஸந்தேபி உய்யோஜிகா க³ருகமேவ ஸங்கா⁴தி³ஸேஸாபத்திம் ஆபஜ்ஜதி, ந லஹுகம். தஞ்சாதி தம் ஆபஜ்ஜனஞ்ச. பரிபோ⁴க³பச்சயாதி உய்யோஜிகாய பரிபோ⁴க³ஸங்கா²தா காரணாதி அயம் கா³தா²யத்தோ².

இதரிஸ்ஸா பனாதி உய்யோஜிதாய பன பி⁴க்கு²னியா. பட²மஸிக்கா²பதே³தி பஞ்சமஸிக்கா²பதே³. பஞ்சமஸிக்கா²பத³ஞ்ஹி இமினா ஸிக்கா²பதே³ன யுக³ளபா⁴வேன ஸதி³ஸத்தா இமம் உபாதா³ய பட²மந்தி வுத்தந்தி. ச²ட்ட²ம்.