8. குமாரிபூ⁴தவக்³கோ³

1-2-3. பட²ம-து³திய-ததியஸிக்கா²பத³-அத்த²யோஜனா

1119. குமாரிபூ⁴தவக்³க³ஸ்ஸ பட²மது³தியததியேஸு யா பன தா மஹாஸிக்க²மானாதி ஸம்ப³ந்தோ⁴. ஸப்³ப³பட²மா த்³வே மஹாஸிக்க²மானாதி க³ப்³பி⁴னிவக்³கே³ ஸப்³பா³ஸம் ஸிக்க²மானானம் பட²மம் வுத்தா த்³வே மஹாஸிக்க²மானா. தா பனாதி மஹாஸிக்க²மானா பன. ஸிக்க²மானாஇச்சேவ வத்தப்³பா³தி ஸம்முதிகம்மேஸு ஸாமஞ்ஞதோ வத்தப்³பா³. ‘‘கி³ஹிக³தா’’தி வா ‘‘குமாரிபூ⁴தா’’தி வா ந வத்தப்³பா³, வத³ந்தி சே, ஸம்முதிகம்மம் குப்பதீதி அதி⁴ப்பாயோ. கி³ஹிக³தாயாதி ஏத்த² கி³ஹிக³தா நாம புரிஸந்தரக³தா வுச்சதி. ஸா ஹி யஸ்மா புரிஸஸங்கா²தேன கி³ஹினா க³மியித்த², அஜ்ஜா²சாரவஸேன, கி³ஹிம் வா க³மித்த², தஸ்மா கி³ஹிக³தாதி வுச்சதி. அயம் ஸிக்க²மானாதி ஸம்ப³ந்தோ⁴. குமாரிபூ⁴தா நாம ஸாமணேரா வுச்சதி. ஸா ஹி யஸ்மா அகி³ஹிக³தத்தா குமாரீ ஹுத்வா பூ⁴தா, குமாரிபா⁴வம் வா பூ⁴தா க³தா, தஸ்மா குமாரிபூ⁴தாதி வுச்சதி. திஸ்ஸோபீதி கி³ஹிக³தா குமாரிபூ⁴தா மஹாஸிக்க²மானாதி திஸ்ஸோபி. ஸிக்க²மானாதி ஸிக்க²ம் மானேதீதி ஸிக்க²மானாதி. பட²ம து³திய ததியானி.

4. சதுத்த²ஸிக்கா²பத³ம்

1136. சதுத்தே² அனுத்தானவசனம் நத்தீ²தி. சதுத்த²ம்.

5. பஞ்சமஸிக்கா²பத³ம்

பஞ்சமே ஏத்த² ஸிக்கா²பதே³ ‘‘ஸங்கே⁴ன பரிச்சி²ந்தி³தப்³பா³’’தி யம் வசனம் வுத்தம், தஸ்ஸாதி யோஜனாதி. பஞ்சமம்.

6-7-8. ச²ட்ட²-ஸத்தம-அட்ட²மஸிக்கா²பத³ம்

ச²ட்ட²ஸத்தமட்ட²மேஸு அனுத்தானட்டா²னம் நத்தீ²தி. ச²ட்ட²ஸத்தமட்ட²மானி.

9. நவமஸிக்கா²பத³ம்

1158. நவமே அந்தோதி அப்³ப⁴ந்தரே. இமினா ஆத்யூபஸக்³க³ஸ்ஸத்த²ம் த³ஸ்ஸேதி. ‘‘ஸோக’’ந்திஆதி³னா அந்தோ வாஸேதி பவேஸேதீதி ஆவாஸா. ஸோகம் ஆவாஸா ஸோகாவாஸாதி வசனத்த²ம் த³ஸ்ஸேதி. க⁴ரம் க⁴ரஸாமிகா ஆவிஸந்தி விய, ஏவம் அயம்பி ஸோகம் ஆவிஸதீதி யோஜனா. இதீதி ஏவம். யந்தி ஸோகம். ஸ்வாஸ்ஸாதி ஸோ அஸ்ஸா. ஸோதி ஸோகோ. அஸ்ஸாதி ஸிக்க²மானாய. ஆவாஸோதி ஆவாஸோகாஸோ. ‘‘ஏதி³ஸா அய’’ந்தி இமினா ‘‘அஜானந்தீ’’தி ஏத்த² அஜானனாகாரம் த³ஸ்ஸேதீதி. நவமம்.

10. த³ஸமஸிக்கா²பத³ம்

1162. த³ஸமே அனாபுச்சா²தி ஏத்த² த்வாபச்சயோ லோபோதி ஆஹ ‘‘அனாபுச்சி²த்வா’’தி. த்³விக்க²த்துந்தி த்³வே வாரே. ஸகிந்தி ஏகவாரம்.

1163. அபுப்³ப³ம் ஸமுட்டா²னஸீஸம் இமஸ்ஸாதி அபுப்³ப³ஸமுட்டா²னஸீஸம். த்³வீஸுபி டா²னேஸூதி வாசாதோ ச காயவாசாதோ சாதி த்³வீஸு டா²னேஸுபி. அனனுஜானாபேத்வாதி மாதாபிதூஹி ச ஸாமிகேன ச ந அனுஜானாபேத்வாதி. த³ஸமம்.

11. ஏகாத³ஸமஸிக்கா²பத³ம்

1167. ஏகாத³ஸமே தத்தா²தி ‘‘பாரிவாஸியச²ந்த³தா³னேனா’’தி வசனே. அஞ்ஞத்ராதி அஞ்ஞம் டா²னம்.

ஏகம் அஜ்ஜே²ஸந்தீதி ஏகம் பி⁴க்கு²ம் த⁴ம்மகத²னத்தா²ய நிய்யோஜேந்தி. அஞ்ஞம் பனாதி உபோஸதி²கதோ அஞ்ஞம் பன.

தத்ராதி தேஸு பி⁴க்கூ²ஸு. ஸுபா⁴ஸுப⁴ம் நக்க²த்தம் பட²தீதி நக்க²த்தபாட²கோ. தா³ருணந்தி கக்க²ளம். தேதி பி⁴க்கூ². தஸ்ஸாதி நக்க²த்தபாட²கஸ்ஸ பி⁴க்கு²ஸ்ஸ. ‘‘நக்க²த்தம் படிமானேந்தம், அத்தோ² பா³லம் உபச்சகா³’’திஜாதகபாளி (ஜா. 1.1.49). அயம் பனேத்த² யோஜனா – நக்க²த்தம் படிமானேந்தம் பா³லம் அத்தோ² ஹிதம் உபச்சகா³ உபஸமீபே அதிக்கமித்வா அகா³தி. ஏகாத³ஸமம்.

12. த்³வாத³ஸமஸிக்கா²பத³ம்

1170. த்³வாத³ஸமே நப்பஹோதீதி பி⁴க்கு²னியோ நிவாஸாபேதும் ந ஸக்கோதீதி. த்³வாத³ஸமம்.

13. தேரஸமஸிக்கா²பத³ம்

1175. தேரஸமே ஏகம் வஸ்ஸந்தி ஏத்த² வஸ்ஸஸத்³தோ³ ஸம்வச்ச²ரபரியாயோ, உபயோக³வசனஞ்ச பு⁴ம்மத்தே² ஹோதீதி ஆஹ ‘‘ஏகஸ்மிம் ஸம்வச்ச²ரே’’தி. தேரஸமம்.

குமாரிபூ⁴தவக்³கோ³ அட்ட²மோ.