6. ஆராமவக்³கோ³

1. பட²மஸிக்கா²பத³-அத்த²யோஜனா

1025. ஆராமவக்³க³ஸ்ஸ பட²மே உபசாரந்தி அபரிக்கி²த்தஸ்ஸ ஆராமஸ்ஸ பரிக்கே²பாரஹட்டா²னம் உபசாரம்.

1027. ‘‘ஸீஸானுலோகிகா’’தி ஸாமஞ்ஞதோ வுத்தேபி பி⁴க்கு²னீனமேவ ஸீஸந்தி ஆஹ ‘‘பி⁴க்கு²னீன’’ந்தி. யத்தா²தி யஸ்மிம் டா²னேதி. பட²மம்.

2. து³தியஸிக்கா²பத³ம்

1028. து³தியே அப்³ப⁴ந்தரோதி அப்³ப⁴ந்தரே பரியாபன்னோ, ஜாதோ வா. ‘‘ஸங்காமேஸீ’’தி இமினா ஸம்ஹரீதி ஏத்த² ஹரதா⁴துயா ஸங்கமனத்த²ம் த³ஸ்ஸேதி. ந்ஹாபிதாதி கப்பகா. தே ஹி நஹாபேந்தி ஸோசாபேந்தீதி ந்ஹாபிதாதி வுச்சந்தி. தந்தி காஸாவனிவாஸனந்தி. து³தியம்.

3-4. ததிய-சதுத்த²ஸிக்கா²பத³ம்

1036. ததியசதுத்தே²ஸு அனுத்தானட்டா²னம் நத்தீ²தி. ததியசதுத்தா²னி.

5. பஞ்சமஸிக்கா²பத³ம்

1043. பஞ்சமே ‘‘குலே மச்ச²ரோ’’தி ஏத்த² மச்ச²ரனம் மச்ச²ரோதி வசனத்தோ² காதப்³போ³. ‘‘தம் குலம் அஸ்ஸத்³த⁴ம் அப்பஸன்ன’’ந்தி குலஸ்ஸ அவண்ணம் பா⁴ஸதீதி யோஜனா. ‘‘பி⁴க்கு²னியோ து³ஸ்ஸீலா பாபத⁴ம்மா’’தி பி⁴க்கு²னீனம் அவண்ணம் பா⁴ஸதீதி யோஜனா.

1045. ‘‘ஸந்தம்யேவ ஆதீ³னவ’’ந்தி ஸம்ப³ந்தி⁴யா ஸம்ப³ந்த⁴ம் த³ஸ்ஸேதும் வுத்தம் ‘‘குலஸ்ஸ வா பி⁴க்கு²னீனம் வா’’தி இமினா த்³வீஸு அஞ்ஞதரமேவ ந ஸம்ப³ந்தோ⁴ ஹோதி, அத² கோ² த்³வயம்பீதி த³ஸ்ஸேதீதி. பஞ்சமம்.

6. ச²ட்ட²ஸிக்கா²பத³ம்

1048. ச²ட்டே² ஓவாதா³யாதி ஏத்த² ந யோ வா ஸோ வா ஓவாதோ³ ஹோதி, அத² கோ² க³ருத⁴ம்மோயேவாதி ஆஹ ‘‘க³ருத⁴ம்மத்தா²யா’’தி. ஸஹ வஸதி ஏத்த², ஏதேனாதி வா ஸம்வாஸோதி வசனத்தே²ன உபோஸத²பவாரணா ஸம்வாஸோ நாமாதி ஆஹ ‘‘உபோஸத²பவாரணாபுச்ச²னத்தா²யா’’தி. ‘‘புச்ச²னத்தா²யா’’தி இமினா ‘‘ஸம்வாஸாயா’’தி ஏத்த² உத்தரபத³லோபபா⁴வம் த³ஸ்ஸேதி. ஏத்தா²தி பி⁴க்கு²னிவிப⁴ங்கே³, ஸிக்கா²பதே³ வா பாளியம் வாதி. ச²ட்ட²ம்.

7-9. ஸத்தம-அட்ட²ம-நவமஸிக்கா²பத³ம்

1053. ஸத்தமட்ட²மனவமேஸு அனுத்தானவசனம் நத்தி². கேவலம் பன ‘‘இமிஸ்ஸாபீ’’தி பத³ம் விஸேஸோ, இமிஸ்ஸாபி பாளியாதி அத்தோ²தி. ஸத்தமட்ட²மனவமானி.

10. த³ஸமஸிக்கா²பத³ம்

1062. த³ஸமே த்³வே காயா உபரிமகாயோ ஹேட்டி²மகாயோதி. தத்த² கடிதோ உத்³த⁴ம் உபரிமகாயோ, ஹேட்டா² ஹேட்டி²மகாயோ. தத்த² ‘‘பஸாகே²’’தி இத³ம் ஹேட்டி²மகாயஸ்ஸ நாமந்தி ஆஹ ‘‘அதோ⁴காயே’’தி. ஹீதி ஸச்சம். ததோதி அதோ⁴காயதோ. இமினா பஞ்சமீபா³ஹிரத்த²ஸமாஸம் த³ஸ்ஸேதி. ருக்க²ஸ்ஸ ஸாகா² பபி⁴ஜ்ஜித்வா க³தா விய உபோ⁴ ஊரூ பபி⁴ஜ்ஜித்வா க³தாதி யோஜனா.

1065. பா²லேஹீதி ஏத்த² இதிஸத்³தோ³ ஆத்³யத்தோ². தேன ‘‘தோ⁴வா’’திஆதீ³னி சத்தாரி பதா³னி ஸங்க³ண்ஹாதி. ஆணத்திது³க்கடானீதி ஹேட்டா² வுத்தேஸு அட்ட²ஸு து³க்கடேஸு வினயது³க்கடமேவ. ஸேஸேஸூதி பி⁴ந்த³னதோ ஸேஸேஸு பா²லனாதீ³ஸூதி. த³ஸமம்.

ஆராமவக்³கோ³ ச²ட்டோ².