1. பாராஜிககண்ட³அத்த²யோஜனா

ஏவம் பி⁴க்கு²விப⁴ங்க³ஸ்ஸ, கத்வான யோஜனானயம்;

பி⁴க்கு²னீனம் விப⁴ங்க³ஸ்ஸ, கரிஸ்ஸம் யோஜனானயம்.

யோதி விப⁴ங்கோ³. விப⁴ங்க³ஸ்ஸாதி விப⁴ங்கோ³ அஸ்ஸ. அஸ்ஸாதி ஹோதி. தஸ்ஸாதி பி⁴க்கு²னீனம் விப⁴ங்க³ஸ்ஸ. யதோதி யஸ்மா. அயம் பனேத்த² யோஜனா – பி⁴க்கூ²னம் விப⁴ங்க³ஸ்ஸ அனந்தரம் பி⁴க்கு²னீனம் யோ விப⁴ங்கோ³ ஸங்க³ஹிதோ அஸ்ஸ, தஸ்ஸ பி⁴க்கு²னீனம் விப⁴ங்க³ஸ்ஸ ஸம்வண்ணனாக்கமோ பத்தோ யதோ, ததோ தஸ்ஸ பி⁴க்கு²னீனம் விப⁴ங்க³ஸ்ஸ அபுப்³ப³பத³வண்ணனம் காதும் தாவ பாராஜிகே அயம் ஸம்வண்ணனா ஹோதீதி. அபுப்³பா³னம் பதா³னம் வண்ணனா அபுப்³ப³பத³வண்ணனா, தம்.

1. பட²மபாராஜிகஸிக்கா²பத³ம்

656. ‘‘தேன…பே… ஸாள்ஹோ’’தி ஏத்த² ‘‘ஏத்தா²’’தி பாட²ஸேஸோ யோஜேதப்³போ³. த³ப்³ப³கு³ணகிரியாஜாதினாமஸங்கா²தேஸு பஞ்சஸு ஸத்³தே³ஸு ஸாள்ஹஸத்³த³ஸ்ஸ நாமஸத்³த³பா⁴வம் த³ஸ்ஸேதும் வுத்தம் ‘‘ஸாள்ஹோதி தஸ்ஸ நாம’’ந்தி. மிகா³ரமாதுயாதி விஸாகா²ய. ஸா ஹி மிகா³ரஸேட்டி²னா மாதுட்டா²னே ட²பிதத்தா மிகா³ரமாதா நாம. நவகம்மம் அதி⁴ட்டா²தீதி நவகம்மிகந்தி த³ஸ்ஸேந்தோ ஆஹ ‘‘நவகம்மாதி⁴ட்டா²யிக’’ந்தி. ‘‘பண்டி³ச்சேன ஸமன்னாக³தா’’திஇமினா பண்டா³ வுச்சதி பஞ்ஞா, ஸா ஸஞ்ஜாதா இமிஸ்ஸாதி பண்டி³தாதி வசனத்த²ம் த³ஸ்ஸேதி. வேய்யத்திகேனாதி விஸேஸேன அஞ்ஜதி பாகடம் க³ச்ச²தீதி வியத்தோ, புக்³க³லோ, தஸ்ஸ இத³ம் வேய்யத்திகம், ஞாணம், தேன. ‘‘பண்டா³’’தி வுத்தபஞ்ஞாய ‘‘மேதா⁴’’தி வுத்தபஞ்ஞாய விஸேஸபா⁴வம் த³ஸ்ஸேதும் வுத்தம் ‘‘பாளிக³ஹணே’’திஆதி³. ‘‘மேதா⁴’’தி ஹி வுத்தபஞ்ஞா ‘‘பண்டா³’’தி வுத்தபஞ்ஞாய விஸேஸோ ஹோதி ஸதிஸஹாயத்தா. தத்ருபாயாயாதி அலுத்தஸமாஸோ ‘‘தத்ரமஜ்ஜ²த்ததா’’திஆதீ³ஸு (த⁴. ஸ. அட்ட². யேவாபனகவண்ணனா) விய. ‘‘கம்மேஸூ’’தி இமினா தஸத்³த³ஸ்ஸ விஸயம் த³ஸ்ஸேதி. கத்தப்³ப³கம்முபபரிக்கா²யாதி கத்தப்³ப³கம்மேஸு விசாரணாய. சஸத்³தே³ன ‘‘கதாகத’’ந்தி பத³ஸ்ஸ த்³வந்த³வாக்யம் த³ஸ்ஸேதி. பரிவேஸனட்டா²னேதி பரிபு⁴ஞ்ஜிதும் விஸந்தி பவிஸந்தி ஏத்தா²தி பரிவேஸனம், தமேவ டா²னம் பரிவேஸனட்டா²னம், தஸ்மிம். நிகூடேதி ஏத்த² கூடஸங்கா²தஸிக²ரவிரஹிதே ஓகாஸேதி த³ஸ்ஸேந்தோ ஆஹ ‘‘கோணஸதி³ஸம் கத்வா த³ஸ்ஸிதே க³ம்பீ⁴ரே’’தி. வித்யூபஸக்³கோ³ விகாரவாசகோ, ஸரஸத்³தோ³ ஸத்³த³வாசகோதி ஆஹ ‘‘விப்பகாரஸத்³தோ³’’தி. சரதி அனேனாதி சரணம் பாதோ³, தஸ்மிம் உட்டி²தோ கி³லானோ ஏதிஸ்ஸாதி சரணகி³லானாதி த³ஸ்ஸேந்தோ ஆஹ ‘‘பாத³ரோகே³ன ஸமன்னாக³தா’’தி.

657. ‘‘திந்தா’’தி இமினா அவஸ்ஸுதஸத்³தோ³ இத⁴ கிலின்னத்தே² ஏவ வத்ததி, ந அஞ்ஞத்தே²தி த³ஸ்ஸேதி. அஸ்ஸாதி ‘‘அவஸ்ஸுதா’’திபத³ஸ்ஸ. பத³பா⁴ஜனே வுத்தந்தி ஸம்ப³ந்தோ⁴. தத்தா²தி பத³பா⁴ஜனே. வத்த²ம் ரங்க³ஜாதேன ரத்தம் விய, ததா² காயஸம்ஸக்³க³ராகே³ன ஸுட்டு² ரத்தாதி யோஜனா. ‘‘அபேக்கா²ய ஸமன்னாக³தா’’தி இமினா அபேக்கா² ஏதிஸ்ஸமத்தீ²தி அபேக்க²வதீதி அத்த²ம் த³ஸ்ஸேதி. படிப³த்³த⁴ம் சித்தம் இமிஸ்ஸந்தி படிப³த்³த⁴சித்தாதி த³ஸ்ஸேந்தோ ஆஹ ‘‘படிப³ந்தி⁴த்வா ட²பிதசித்தா வியா’’தி. து³தியபத³விப⁴ங்கே³பீதி ‘‘அவஸ்ஸுதோ’’தி து³தியபத³பா⁴ஜனேபி. புக்³க³லஸத்³த³ஸ்ஸ ஸத்தஸாமஞ்ஞவாசகத்தா புரிஸஸத்³தே³ன விஸேஸேதி. அதோ⁴உப்³ப⁴இதி நிபாதானம் ச²ட்டி²யா ஸமஸிதப்³ப³பா⁴வம் த³ஸ்ஸேதும் வுத்தம் ‘‘அக்க²கானம் அதோ⁴’’திஆதி³. நனு யதா² இத⁴ ‘‘அக்க²கானம் அதோ⁴’’தி வுத்தம், ஏவம் பத³பா⁴ஜனேபி வத்தப்³ப³ம், கஸ்மா ந வுத்தந்தி ஆஹ ‘‘பத³பா⁴ஜனே’’திஆதி³. பத³படிபாடியாதி ‘‘அதோ⁴’’தி ச ‘‘அக்க²க’’ந்தி ச பதா³னம் அனுக்கமேன. ஏத்தா²தி அத⁴க்க²கஉப்³ப⁴ஜாணுமண்ட³லேஸு. ஸாதா⁴ரணபாராஜிகேஹீதி பி⁴க்கு²பி⁴க்கு²னீனம் ஸாதா⁴ரணேஹி பாராஜிகேஹி. நாமமத்தந்தி நாமமேவ.

659. ஏவந்தி இமாய பாளியா விப⁴ஜித்வாதி ஸம்ப³ந்தோ⁴. தத்தா²தி ‘‘உப⁴தோஅவஸ்ஸுதே’’திஆதி³வசனே. ‘‘உப⁴தோஅவஸ்ஸுதே’’தி பாடோ² மூலபாடோ²யேவ, நாஞ்ஞோதி த³ஸ்ஸேந்தேன விஸேஸமகத்வா ‘‘உப⁴தோஅவஸ்ஸுதேதி உப⁴தோ அவஸ்ஸுதே’’தி வுத்தம். உப⁴தோதி ஏத்த² உப⁴ஸரூபஞ்ச தோஸத்³த³ஸ்ஸ ச²ட்ட்²யத்தே² பவத்திஞ்ச த³ஸ்ஸேதும் வுத்தம் ‘‘பி⁴க்கு²னியா சேவ புரிஸஸ்ஸ சா’’தி. தத்த² பி⁴க்கு²னீபுரிஸஸத்³தே³ஹி உப⁴ஸரூபம் த³ஸ்ஸேதி. ‘‘யா’’தி ச ‘‘ஸ’’இதி ச த்³வீஹி ஸத்³தே³ஹி தோபச்சயஸ்ஸ ச²ட்ட்²யத்த²ம், உபி⁴ன்னம் அவஸ்ஸுதபா⁴வே ஸதீதி அத்தோ². பா⁴வபச்சயேன வினா பா⁴வத்தோ² ஞாதப்³போ³தி ஆஹ ‘‘அவஸ்ஸுதபா⁴வே’’தி. யதா²பரிச்சி²ன்னேனாதி ‘‘அத⁴க்க²கம், உப்³ப⁴ஜாணுமண்ட³ல’’ந்தி யேன யேன பரிச்சி²ன்னேன. அத்தனோதி பி⁴க்கு²னியா. தஸ்ஸ வாதி புரிஸஸ்ஸ வா. இதா⁴பீதி காயபடிப³த்³தே⁴ன காயாமஸனேபி.

தத்ராதி தேஸு பி⁴க்கு²பி⁴க்கு²னீஸு. ந காரேதப்³போ³ ‘‘காயஸம்ஸக்³க³ம் ஸாதி³யேய்யா’’தி அவுத்தத்தாதி அதி⁴ப்பாயோ. அசோபயமானாபீதி அசாலயமானாபி, பிஸத்³தோ³ ஸம்பா⁴வனத்தோ², தேன சோபயமானா பகே³வாதி த³ஸ்ஸேதி. ஏவம் பன ஸதீதி சித்தேனேவ அதி⁴வாஸயமானாய ஸதி பன. கிரியஸமுட்டா²னதாதி இமஸ்ஸ ஸிக்கா²பத³ஸ்ஸ கிரியஸமுட்டா²னபா⁴வோ. தப்³ப³ஹுலனயேனாதி ‘‘வனசரகோ (ம. நி. அட்ட². 2.201; 3.133), ஸங்கா³மாவசரோ’’திஆதீ³ஸு (ம. நி. 2.108) விய தஸ்ஸம் கிரியாயம் ப³ஹுலதோ ஸமுட்டா²னனயேன. ஸாதி கிரியஸமுட்டா²னதா.

660. ஏத்தா²தி உப்³ப⁴க்க²கஅதோ⁴ஜாணுமண்ட³லேஸு.

662. ‘‘ஏகதோ அவஸ்ஸுதே’’தி ஏத்தா²பி தோபச்சயோ ச²ட்ட்²யத்தே² ஹோதி. ஸாமஞ்ஞவசனஸ்ஸாபி விஸேஸே அவட்டா²னதோ, விஸேஸத்தி²னா ச விஸேஸஸ்ஸ அனுபயோஜிதப்³ப³தோ ஆஹ ‘‘பி⁴க்கு²னியா ஏவா’’தி. தத்ராதி ‘‘ஏகதோ அவஸ்ஸுதே’’திஆதி³வசனே. ‘‘ததே²வா’’திஇமினா காயஸம்ஸக்³க³ராகே³ன அவஸ்ஸுதோதி அத்த²ம் அதிதி³ஸதி. சதூஸூதி மேது²னராக³ காயஸம்ஸக்³க³ராக³கே³ஹஸிதபேம ஸுத்³த⁴சித்தஸங்கா²தேஸு சதூஸு. யத்தா²தி யஸ்மிம் டா²னே.

663. அயம் புரிஸோ இதி வா இத்தீ² இதி வா அஜானந்தியா வாதி யோஜனாதி. பட²மம்.

2. து³தியபாராஜிகஸிக்கா²பத³ம்

664. து³தியே கச்சி நோ ஸாதி ஏத்த² நோஸத்³தோ³ நுஸத்³த³த்தோ²தி ஆஹ ‘‘கச்சி நு ஸா’’தி. பரிவாரவிபத்தீதி பரிஜனஸ்ஸ வினாஸனம். ‘‘அகித்தீ’’தி ஏத்த² ஸம்முகா² நிந்த³ம் க³ஹேத்வா ‘‘அயஸோ’’திஇமினா பரம்முகா² நிந்தா³ க³ஹேதப்³பா³தி த³ஸ்ஸேதும் வுத்தம் ‘‘பரம்முக²க³ரஹா வா’’தி.

666. ‘‘யா பாராஜிகம் ஆபன்னா’’திஇமினா ‘‘ஸா வா’’தி ஏத்த² தஸத்³த³ஸ்ஸ விஸயம் த³ஸ்ஸேதி. சதுன்னந்தி நித்³தா⁴ரணத்தே² சேதம் ஸாமிவசனம், சதூஸூதி அத்தோ². பச்சா²தி ஸப்³ப³பாராஜிகானம் பச்சா². இமஸ்மிம் ஓகாஸேதி பட²மததியபாராஜிகானமந்தரே டா²னே. ட²பிதந்தி ஸங்கீ³திகாரேஹி நிக்கி²த்தம். ஏத்தா²தி இமஸ்மிம் ஸிக்கா²பதே³. தத்ராதி து³ட்டு²ல்லஸிக்கா²பதே³தி. து³தியம்.

3. ததியபாராஜிகஸிக்கா²பத³ம்

669. ததியே அஸ்ஸாதி ‘‘த⁴ம்மேன வினயேனா’’தி பத³ஸ்ஸ. பத³பா⁴ஜனம் வுத்தந்தி ஸம்ப³ந்தோ⁴. ஞத்திஸம்பதா³ சேவ அனுஸாவனஸம்பதா³ ச ஸத்து²ஸாஸனம் நாமாதி த³ஸ்ஸேந்தோ ஆஹ ‘‘ஞத்தி…பே… ஸம்பதா³ய சா’’தி. ஸத்து²ஸாஸனேனாதி ச ஸத்து² ஆணாய. கம்மந்தி உக்கே²பனீயகம்மம். தத்தா²தி ஸங்கே⁴. ‘‘வசனம் நாதி³யதீ’’திஆதீ³ஸு விய ஸங்க⁴ம் வா நாதி³யதீதி ஏத்த² நாதி³யனம் நாம நானுவத்தனமேவாதி ஆஹ ‘‘நானுவத்ததீ’’தி. தத்தா²தி ஸங்கா⁴தீ³ஸு. அயம் தாவ ஸம்வாஸோதி ஸஹ பி⁴க்கூ² வஸந்தி ஏத்தா²தி ஸம்வாஸோதி அத்தே²ன அயம் ஏககம்மாதி³ ஸம்வாஸோ நாம. ‘‘ஸஹ அயனபா⁴வேனா’’திஇமினா ஸஹ அயந்தி பவத்தந்தீதி ஸஹாயாதி வசனத்த²ம் த³ஸ்ஸேதி. தேதி பி⁴க்கூ². யேஹி சாதி பி⁴க்கூ²ஹி ச. தஸ்ஸாதி உக்கி²த்தகஸ்ஸ. தேனாதி உக்கி²த்தகேன. அத்தனோதி உக்கி²த்தகஸ்ஸாதி. ததியம்.

4. சதுத்த²பாராஜிகஸிக்கா²பத³ம்

675. சதுத்தே² மேது²னராகே³ன அவஸ்ஸுதா நாதி⁴ப்பேதா, காயஸம்ஸக்³க³ராகே³ன அவஸ்ஸுதாவாதி⁴ப்பேதாதி ஆஹ ‘‘காயஸம்ஸக்³க³ராகே³ன அவஸ்ஸுதா’’தி. ‘‘புரிஸபுக்³க³லஸ்ஸா’’திபத³ம் ந ஹத்த²ஸத்³தே³ன ஸம்ப³ந்தி⁴தப்³ப³ம், க³ஹணஸத்³தே³னேவ ஸம்ப³ந்தி⁴தப்³ப³ந்தி த³ஸ்ஸேந்தோ ஆஹ ‘‘யம் புரிஸபுக்³க³லேனா’’திஆதி³. தந்தி க³ஹணம், ‘‘ஹத்த²க்³க³ஹண’’ந்தி வுத்தவசனம் உபலக்க²ணமத்தமேவாதி ஆஹ ‘‘அஞ்ஞம்பீ’’திஆதி³. தத்த² ‘‘அஞ்ஞம்பீ’’தி ஹத்த²க³ஹணதோ இதரம்பி. அபாராஜிகக்கே²த்தேதி உப்³ப⁴க்க²கே அதோ⁴ஜாணுமண்ட³லே. அஸ்ஸாதி ‘‘ஹத்த²க்³க³ஹண’’ந்திபத³ஸ்ஸ. ஏத்தா²தி ‘‘அஸத்³த⁴ம்மஸ்ஸ படிஸேவனத்தா²யா’’திபதே³. காயஸம்ஸக்³கோ³தி காயஸம்ஸக்³கோ³ ஏவ. தேன வுத்தம் ‘‘ந மேது²னத⁴ம்மோ’’தி. ஹீதி ஸச்சம், யஸ்மா வா. ஏத்தா²தி காயஸம்ஸக்³க³க³ஹணே. ஸாத⁴கந்தி ஞாபகம்.

திஸ்ஸித்தி²யோதி பு⁴ம்மத்தே² சேதம் உபயோக³வசனம். தீஸு இத்தீ²ஸூதி ஹி அத்தோ², திஸ்ஸோ இத்தி²யோ உபக³ந்த்வாதி வா யோஜேதப்³போ³. ஏஸேவ நயோ பரதோபி. யம் மேது²னம் அத்தி², தம் ந ஸேவேதி யோஜனா. ந ஸேவேதி ச ந ஸேவதி. திகாரஸ்ஸ ஹி ஏகாரோ. தயோ புரிஸேதி தீஸு புரிஸேஸு, தே வா உபக³ந்த்வா. தயோ ச அனரியபண்ட³கேதி தீஸு அனரியஸங்கா²தேஸு உப⁴தோப்³யஞ்ஜனகேஸு ச பண்ட³கேஸு ச, தே வா உபக³ந்த்வாதி யோஜனா. ந சாசரே மேது²னம் ப்³யஞ்ஜனஸ்மிந்தி அத்தனோ நிமித்தஸ்மிம் மேது²னம் ந ச ஆசரதி. இத³ம் அனுலோமபாராஜிகம் ஸந்தா⁴ய வுத்தம். சே²ஜ்ஜம் ஸியா மேது²னத⁴ம்மபச்சயாதி மேது²னத⁴ம்மகாரணா சே²ஜ்ஜம் ஸியா, பாராஜிகம் ப⁴வேய்யாதி அத்தோ². குஸலேஹீதி பஞ்ஹாவிஸஜ்ஜனே சே²கேஹி, சே²ககாமேஹி வா. அயம் பஞ்ஹோ அட்ட²வத்து²கம் ஸந்தா⁴ய வுத்தோ.

பஞ்ஹாவிஸஜ்ஜனத்தா²ய சிந்தேந்தானம் ஸேத³மோசனகாரணத்தா ‘‘ஸேத³மோசனகா³தா²’’தி வுத்தா. விருஜ்ஜ²தீதி ‘‘ந மேது²னத⁴ம்மோ’’தி வசனேன ‘‘சே²ஜ்ஜம் ஸியா மேது²னத⁴ம்மபச்சயா’’தி வசனம் விருஜ்ஜ²தி, ந ஸமேதீதி அத்தோ². இதி சே வதே³ய்ய, ந விருஜ்ஜ²தி. கஸ்மா? மேது²னத⁴ம்மஸ்ஸ புப்³ப³பா⁴க³த்தாதி யோஜனா. இமினா மேது²னத⁴ம்மஸ்ஸ புப்³ப³பா⁴க³பூ⁴தோ காயஸம்ஸக்³கோ³வ உபசாரேன தத்த² மேது²னத⁴ம்மஸத்³தே³ன வுத்தோ, ந த்³வயம்த்³வயஸமாபத்தீதி தீ³பேதி. ஹிஸத்³தோ³ வித்தா²ரஜோதகோ. பரிவாரேயேவ வுத்தானீதி ஸம்ப³ந்தோ⁴. வண்ணாவண்ணோதி ஸுக்கவிஸட்டி². த⁴னமனுப்பாதா³னந்தி ஸஞ்சரித்தம். ‘‘இமினா பரியாயேனா’’தி இமினா லேஸேன ஸமீபூபசாரேனாதி அத்தோ². ஏதேனுபாயேனாதி ‘‘ஹத்த²க்³க³ஹணம் ஸாதி³யேய்யா’’திபதே³ வுத்தஉபாயேன. ஸப்³ப³பதே³ஸூதி ஸப்³பே³ஸு ‘‘ஸங்கா⁴டிகண்ணக்³க³ஹணம் ஸாதி³யேய்யா’’திஆதீ³ஸு பதே³ஸு. அபி சாதி ஏகம்ஸேன, விஸேஸம் வக்கா²மீதி அதி⁴ப்பாயோ. ‘‘ஏவம்னாமகம் டா²ன’’ந்தி இமினா ‘‘இத்த²ம்னாமம் இமஸ்ஸ டா²னஸ்ஸா’’தி வசனத்த²ம் தீ³பேதி.

676. ஏகந்தரிகாய வாதி ஏத்த² வாஸத்³தே³ன த்³வந்தரிகாதீ³னிபி ஸங்க³ய்ஹந்தி. யேன தேனாதி யேன வா தேன வா. த்³விதிசதுப்பஞ்சச²வத்தூ²னி பேய்யாலவஸேன வா வாஸத்³தே³ன வா க³ஹேதப்³பா³னி. அபி சாதி கிஞ்ச பி⁴ய்யோ, வத்தப்³ப³விஸேஸம் வக்கா²மீதி அதி⁴ப்பாயோ. ஏத்தா²தி ‘‘ஆபத்தியோ தே³ஸேத்வா’’தி வசனே. ஹீதி ஸச்சம். வுத்தந்தி பரிவாரே வுத்தம். தத்ராதி புரிமவசனாபேக்க²ம். தே³ஸிதா ஆபத்தி க³ணனூபிகாதி யோஜனா. ஏகம் வத்து²ம் ஆபன்னா யா பி⁴க்கு²னீதி யோஜனா. து⁴ரனிக்கே²பம் கத்வாதி ‘‘இமஞ்ச வத்து²ம், அஞ்ஞம்பி ச வத்து²ம் நாபஜ்ஜிஸ்ஸாமீ’’தி து⁴ரனிக்கே²பம் கத்வா. யா பன ஸஉஸ்ஸாஹாவ தே³ஸேதீதி யோஜனாதி. சதுத்த²ம்.

ஸாதா⁴ரணாதி பி⁴க்கு²னீஹி ஸாதா⁴ரணா. ஏத்தா²தி ‘‘உத்³தி³ட்டா² கோ² அய்யாயோ’’திஆதி³வசனே.

இதி ஸமந்தபாஸாதி³காய வினயஸம்வண்ணனாய

பி⁴க்கு²னிவிப⁴ங்கே³ பாராஜிககண்ட³வண்ணனாய யோஜனா ஸமத்தா.