2. ரதனஸிக்கா²பத³ம்

502. து³தியே பமுஸ்ஸித்வாதி ஸதிவிப்பவாஸேன பமுஸ்ஸித்வா. புண்ணபத்தந்தி துட்டி²தா³யம். தஞ்ஹி மனோரத²புண்ணேன பத்தப்³ப³பா⁴க³த்தா ‘‘புண்ணபத்த’’ந்தி வுச்சதி. தஸ்ஸ ஸரூபம் த³ஸ்ஸேதும் வுத்தம் ‘‘ஸததோ பஞ்ச கஹாபணா’’தி. இத⁴ பன கஹாபணானம் பஞ்சஸதத்தா பஞ்சவீஸகஹாபணா அதி⁴ப்பேதா. ஆப⁴ரணஸத்³த³ஸ்ஸ அலங்காரஸத்³தே³ன பரியாயபா⁴வம் த³ஸ்ஸேதும் வுத்தம் ‘‘அலங்கார’’ந்தி. ‘‘மஹாலதம் நாமா’’தி இமினா ந யோ வா ஸோ வா அலங்காரோ, அத² கோ² விஸேஸாலங்காரோதி த³ஸ்ஸேதி. மஹந்தானி மாலாகம்மலதாகம்மானி ஏத்தா²தி மஹாலதா. லதாக³ஹணேன ஹி மாலாபி க³ஹிதா. நவஹி கோடீஹி அக்³க⁴ம் இமஸ்ஸாதி நவகோடிஅக்³க⁴னகம், நவகோடிஸங்கா²தம் அக்³க⁴ம் அரஹதீதி வா நவகோடிஅக்³க⁴னகம்.

504. அந்தே ஸமீபே வஸனஸீலத்தா பரிசாரிகோ ‘‘அந்தேவாஸீ’’தி வுச்சதீதி ஆஹ ‘‘பரிசாரிகோ’’தி.

506. த்³வே லேட்³டு³பாதாதி தா²மமஜ்ஜி²மஸ்ஸ புரிஸஸ்ஸ த்³வே லேட்³டு³பாதா. ஸங்க⁴…பே… நவகம்மானம் அத்தா²ய உக்³க³ண்ஹந்தஸ்ஸ வா உக்³க³ண்ஹாபேந்தஸ்ஸ வா து³க்கடந்தி யோஜனா. அவஸேஸந்தி ஜாதரூபரஜததோ அவஸேஸம். மாதுகண்ணபிளந்த⁴னதாலபண்ணம்பீதி மாதுயா கண்ணே பிளந்தி⁴ததாலபண்ணம்பி, படிஸாமேந்தஸ்ஸாதி ஸம்ப³ந்தோ⁴.

‘‘கப்பியப⁴ண்ட³ம் ஹோதீ’’தி இமினா அகப்பியப⁴ண்ட³ம் ந வட்டதீதி த³ஸ்ஸேதி. இத³ந்தி ப⁴ண்ட³ம். பலிபோ³தோ⁴ நாமாதி அத்தனோ பலிபோ³தோ⁴ நாம. ச²ந்தே³னபீதி வட்³ட⁴கீஆதீ³னம் ச²ந்த³ஹேதுனாபி. ப⁴யேனபீதி ராஜவல்லபா⁴னம் ப⁴யஹேதுனாபி. ப³லக்காரேனாதி கரணம் காரோ, ப³லேன காரோ ப³லக்காரோ, தேன, ப³லக்காரோ ஹுத்வா பாதேத்வாதி அத்தோ².

தத்தா²தி மஹாராமே. யத்தா²தி யஸ்மிம் டா²னே, ஸங்கா உப்பஜ்ஜதீதி ஸம்ப³ந்தோ⁴. மஹாஜனஸஞ்சரணட்டா²னேஸூதி ப³ஹூனம் ஜனானம் ஸஞ்சரணஸங்கா²தேஸு டா²னேஸு. நக³ஹேதப்³ப³ஸ்ஸ ஹேதும் த³ஸ்ஸேதும் வுத்தம் ‘‘பலிபோ³தோ⁴ ந ஹோதீ’’தி. யஸ்மா பலிபோ³தோ⁴ ந ஹோதி, தஸ்மா ந க³ஹேதப்³ப³ந்தி அதி⁴ப்பாயோ. ஏகோதி ஏகோ பி⁴க்கு² பஸ்ஸதீதி ஸம்ப³ந்தோ⁴. ஓக்கம்மாதி ஓக்கமித்வா.

ரூபஸத்³தோ³ ப⁴ண்ட³பரியாயோதி ஆஹ ‘‘ப⁴ண்ட³’’ந்தி. ப⁴ண்ட³ம் ரூபம் நாமாதி யோஜனா. ப⁴ண்டி³கந்தி ப⁴ண்டே³ன நியுத்தம் புடகம். க³ணேத்வாதி க³ணனம் கத்வா. நிமித்தந்தீதி ஏத்த² இதிஸத்³தோ³ நாமபரியாயோ. லஞ்ச²னாதி³ நிமித்தம் நாமாதி ஹி யோஜனா. லஞ்ச²னாதீ³தி ஆதி³ஸத்³தே³ன நீலபிலோதிகாத³யோ ஸங்க³ண்ஹாதி. லாகா²யாதி ஜதுனா.

பதிரூபா நாம இத⁴ லஜ்ஜிகுக்குச்சகாதி ஆஹ ‘‘லஜ்ஜினோ குக்குச்சகா’’தி. தா²வரந்தி ஜங்க³மா அஞ்ஞம் தா²வரம். அத்³து⁴னோதி காலஸ்ஸ. ஸமாத³பேத்வாதி அஞ்ஞே ஸமாத³பேத்வா. உத்³தி³ஸ்ஸ அரியா திட்ட²ந்தி, ஏஸா அரியான யாசனா’’தி (ஜா. 1.7.59) வுத்தனயேன யாசித்வாதி அத்தோ².

507. ரதனஸம்மதந்தி மனுஸ்ஸானம் உபபோ⁴க³பரிபோ⁴க³ந்தி. து³தியம்.