4. காணமாதாஸிக்கா²பத³ம்

230. சதுத்தே² ‘‘நகுலமாதாதி’’ஆதீ³ஸு (அ. நி. 1.266; அ. நி. அட்ட². 1.1.266) நகுலஸ்ஸ ப⁴க³வதோ மாதா நகுலமாதாதி ச நகுலஞ்ச ப⁴க³வதோ தம் மாதா சாதி நகுலமாதாதி ச அத்தோ² ஸம்ப⁴வதி, ‘‘உத்தரமாதாதி’’ஆதீ³ஸு உத்தராய மாதா உத்தரமாதாதி அத்தோ²யேவ ஸம்ப⁴வதி. தேஸு ‘‘உத்தரமாதா’’திபத³ஸ்ஸேவ ‘‘காணமாதா’’திபத³ஸ்ஸ காணாய மாதா காணமாதாதி அத்தோ²யேவ ஸம்ப⁴வதீதி ஆஹ ‘‘காணாய மாதா’’தி. தஸ்ஸா தீ⁴துயா ‘‘காணா’’தினாமேன விஸ்ஸுதபா⁴வம் த³ஸ்ஸேந்தோ ஆஹ ‘‘ஸா கிரா’’திஆதி³. ஸாதி தா³ரிகா விஸ்ஸுதா அஹோஸீதி ஸம்ப³ந்தோ⁴. அஸ்ஸாதி மஹாஉபாஸிகாய. யே யேதி புரிஸா. ‘‘ராகே³ன காணா ஹோந்தீ’’திஇமினா கணந்தி நிமிலந்தி ராகே³ன புரிஸா ஏதாயாதி காணாதி அத்த²ம் த³ஸ்ஸேதி. தஸ்ஸாதி காணாய. ஆக³தந்தி ஏத்த² பா⁴வத்தே² தோதி ஆஹ ‘‘ஆக³மன’’ந்தி. அதி⁴ப்பாயோதி ‘‘கிஸ்மிம் வியா’’திபத³ஸ்ஸ, காணமாதாய வா அதி⁴ப்பாயோ. ரித்தாதி துச்சா², ஸுஞ்ஞாதி அத்தோ². ‘‘அஸ்மிம் க³மனே’’திஇமினா பா³ஹிரத்த²ஸமாஸம் த³ஸ்ஸேதி. ‘‘அரியஸாவிகா’’திஆதி³னா அரியானம் பி⁴க்கூ²ஹி அபடிவிப⁴த்தபோ⁴க³ம் த³ஸ்ஸேதி. ந கேவலம் கிஞ்சி பரிக்க²யம் அக³மாஸி, அத² கோ² ஸப்³ப³ந்தி ஆஹ ‘‘ஸப்³ப³ம் பரிக்க²யம் அக³மாஸீ’’தி. காணாபீதி பிஸத்³தோ³ ந கேவலம் மாதாயேவ மக்³க³ப²லபா⁴கி³னீ அஹோஸி, அத² கோ² காணாபி ஸோதாபன்னா அஹோஸீதி த³ஸ்ஸேதி. ஸோபி புரிஸோதி காணாய பதிபூ⁴தோ ஸோபி புரிஸோ. பகதிட்டா²னேயேவாதி ஜேட்ட²கபஜாபதிட்டா²னேயேவ.

231. இமஸ்மிம் பன வத்து²ஸ்மிந்தி இமஸ்மிம் பூவவத்து²ஸ்மிம். ஏதந்தி பாதே²ய்யவத்து²ம். அரியஸாவகத்தாதி அரியபூ⁴தஸ்ஸ ஸாவகஸ்ஸ பா⁴வதோ, அரியஸ்ஸ வா ஸம்மாஸம்பு³த்³த⁴ஸ்ஸ ஸாவகபா⁴வதோ.

233. பஹேணகபண்ணாகாரஸத்³தா³னம் அஞ்ஞமஞ்ஞவேவசனத்தா வுத்தம் ‘‘பஹேணகத்தா²யாதி பண்ணாகாரத்தா²யா’’தி. இதா⁴தி ‘‘பூவேஹி வா’’திபதே³, ஸிக்கா²பதே³ வா. ப³த்³த⁴ஸத்தூதி மது⁴ஸக்க²ராதீ³ஹி மிஸ்ஸேத்வா ப³த்³த⁴ஸத்து. தூ²பீகதந்தி தூ²பீகதம் கத்வா.

‘‘த்³வத்திபத்தபூரே’’திபத³ஸ்ஸ விஸேஸனுத்தரபா⁴வம் த³ஸ்ஸேதும் வுத்தம் ‘‘பூரே பத்தே’’தி. த்³வே வா தயோ வா பத்தாதி த்³வத்திபத்தா, வாஸத்³த³த்தே² ஸங்க்²யோப⁴யபா³ஹிரத்த²ஸமாஸோ, திஸத்³த³பரத்தா த்³விஸ்ஸ ச அகாரோ ஹோதி, த்³வத்திபத்தா ச தே பூரா சாதி த்³வத்திபத்தபூரா, தே த்³வத்திபத்தபூரே க³ஹேத்வாதி யோஜனா. ‘‘ஆசிக்கி²தப்³ப³’’ந்தி வுத்தவசனஸ்ஸ ஆசிக்க²னாகாரம் த³ஸ்ஸேந்தோ ஆஹ ‘‘அத்ர மயா’’திஆதி³. தேனாபீதி து³தியேனாபி. பட²மபி⁴க்கு² ஏகம் க³ஹேத்வா து³தியபி⁴க்கு²ஸ்ஸ ஆரோசனஞ்ச து³தியபி⁴க்கு² ஏகம் க³ஹேத்வா ததியபி⁴க்கு²ஸ்ஸ ஆரோசனஞ்ச அதிதி³ஸந்தோ ஆஹ ‘‘யேனா’’திஆதி³. தத்த² யேனாதி பட²மபி⁴க்கு²னா. படிக்கமந்தி பு⁴ஞ்ஜீத்வா ஏத்தா²தி படிக்கமனந்தி வுத்தே அஸனஸாலாவ க³ஹேதப்³பா³தி ஆஹ ‘‘அஸனஸால’’ந்தி. யத்தா²தி யஸ்ஸம் அஸனஸாலாயம். முகோ²லோகனம் ந வட்டதீதி ஆஹ ‘‘அத்தனோ’’திஆதி³. அஞ்ஞத்தா²தி படிக்கமனதோ அஞ்ஞத்த². அஸ்ஸாதி பி⁴க்கு²ஸ்ஸ.

‘‘ஸம்விப⁴ஜிதப்³ப³’’ந்தி வுத்தவசனஸ்ஸ ஸம்விப⁴ஜனாகாரம் த³ஸ்ஸேதும் வுத்தம் ‘‘ஸசே தயோ’’திஆதி³. யதா²மித்தந்தி யஸ்ஸ யஸ்ஸ மித்தஸ்ஸ. அகாமாதி ந காமேன. காரணத்தே² சேதம் நிஸ்ஸக்கவசனம்.

235. அந்தராமக்³கே³தி மக்³க³ஸ்ஸ அந்தரோ அந்தராமக்³கோ³, ஸுகு²ச்சாரணத்த²ம் மஜ்ஜே² தீ³கோ⁴, தஸ்மிம். ப³ஹும்பி தே³ந்தானம் ஏதேஸம் ஞாதகபவாரிதானம் ப³ஹும்பி படிக்³க³ண்ஹந்தஸ்ஸாதி யோஜனா. அட்ட²கதா²ஸு பன வுத்தந்தி ஸம்ப³ந்தோ⁴. அட்ட²கதா²னம் வசனம் பாளியா ந ஸமேதீதி. சதுத்த²ம்.