1. ஆவஸத²பிண்ட³ஸிக்கா²பத³-அத்த²யோஜனா

203. போ⁴ஜனவக்³க³ஸ்ஸ பட²மே ஆவஸதே² பஞ்ஞத்தோ பிண்டோ³ ஆவஸத²பிண்டோ³தி த³ஸ்ஸேந்தோ ஆஹ ‘‘ஸமந்தா’’திஆதி³. பரிக்கி²த்தந்தி பரிவுதம் ஆவஸத²ந்தி ஸம்ப³ந்தோ⁴. அத்³த⁴ம் பத²ம் க³ச்ச²ந்தீதி அத்³தி⁴கா. கி³லாயந்தி ருஜந்தீதி கி³லானா. க³ப்³போ⁴ குச்சி²ட்ட²ஸத்தோ ஏதாஸந்தி க³ப்³பி⁴னியோ. மலம் பப்³பா³ஜேந்தீதி பப்³ப³ஜிதா, தேஸம் யதா²னுரூபந்தி ஸம்ப³ந்தோ⁴. பஞ்ஞத்தானி மஞ்சபீடா²னி ஏத்தா²தி பஞ்ஞத்தமஞ்சபீடோ², தம். அனேகக³ப்³ப⁴பரிச்சே²த³ம் அனேகபமுக²பரிச்சே²த³ம் ஆவஸத²ம் கத்வாதி யோஜனா. தத்தா²தி ஆவஸதே². தேஸம் தேஸந்தி அத்³தி⁴காதீ³னம். ஹிய்யோஸத்³த³ஸ்ஸ அதீதானந்தராஹஸ்ஸ ச அனாக³தானந்தராஹஸ்ஸ ச வாசகத்தா இத⁴ அனாக³தானந்தராஹவாசகோதி ஆஹ ‘‘ஸ்வேபீ’’தி. குஹிம் க³தா இதி வுத்தேதி யோஜனா. ‘‘குக்குச்சாயந்தோ’’திபத³ஸ்ஸ நாமதா⁴தும் த³ஸ்ஸேந்தோ ஆஹ ‘‘குக்குச்சம் கரோந்தோ’’தி.

206. ‘‘அத்³த⁴யோஜனம் வா யோஜனம் வா’’திஇமினா ‘‘பக்கமிது’’ந்திபத³ஸ்ஸ கம்மம் த³ஸ்ஸேதி. ‘‘க³ந்து’’ந்திஇமினா கமுஸத்³த³ஸ்ஸ பத³விக்கே²பத்த²ம் த³ஸ்ஸேதி. ‘‘அனோதி³ஸ்ஸா’’திபத³ஸ்ஸ த்வாபச்சயந்தபா⁴வம் த³ஸ்ஸேதும் ‘‘அனுத்³தி³ஸித்வா’’தி வுத்தம். பாஸம் டே³தீதி பாஸண்டோ³, ஸத்தானம் சித்தேஸு தி³ட்டி²பாஸம் கி²பதீதி அத்தோ². அத² வா தண்ஹாபாஸம், தி³ட்டி²பாஸஞ்ச டே³தி உட்³டே³தீதி பாஸண்டோ³, தம் பாஸண்ட³ம். யாவதத்தோ² பஞ்ஞத்தோ ஹோதீதி யாவதா அத்தோ² ஹோதி, தாவதா பஞ்ஞத்தோ ஹோதீதி யோஜனா. ‘‘யாவத³த்தோ²’’திபி பாடோ², அயமேவத்தோ². த³காரோ பத³ஸந்தி⁴கரோ. ஸகிம் பு⁴ஞ்ஜிதப்³ப³ந்தி ஏகதி³வஸம் ஸகிம் பு⁴ஞ்ஜிதப்³ப³ந்தி அத்தோ². தேனாஹ ‘‘ஏகதி³வஸம் பு⁴ஞ்ஜிதப்³ப³’’ந்தி.

ஏத்தா²தி இமஸ்மிம் ஸிக்கா²பதே³. ஏககுலேன வா பஞ்ஞத்தந்தி ஸம்ப³ந்தோ⁴. பு⁴ஞ்ஜிதும் ந வட்டதி ஏகதோ ஹுத்வா பஞ்ஞத்தத்தாதி அதி⁴ப்பாயோ. நானாகுலேஹி பஞ்ஞத்தம் பிண்ட³ந்தி யோஜனா. பு⁴ஞ்ஜிதும் வட்டதி நானாகுலானி ஏகதோ அஹுத்வா விஸும் விஸும் பஞ்ஞத்தத்தாதி அதி⁴ப்பாயோ. யோபி பிண்டோ³ சி²ஜ்ஜதீதி ஸம்ப³ந்தோ⁴. உபச்சி²ந்தி³த்வாதி அஸத்³தி⁴யாதி³பாபசித்தத்தா உபச்சி²ந்தி³த்வா.

208. அனுவஸித்வாதி புனப்புனம் வஸித்வா. அந்தராமக்³கே³ க³ச்ச²ந்தத்தா ‘‘க³ச்ச²ந்தோ பு⁴ஞ்ஜதீ’’தி இத³ம் தாவ யுத்தம் ஹோது, க³தட்டா²னே பன க³மிதத்தா கத²ம்? பச்சுப்பன்னஸமீபோபி அதீதோ தேன ஸங்க³ஹிதத்தா யுத்தம். ‘‘குதோ நு த்வம் பி⁴க்கு² ஆக³ச்ச²ஸீ’’திஆதீ³ஸு (ஸம். நி. 1.130) விய. தம்ஸமீபோபி ஹி தாதி³ஸோ. நானாட்டா²னேஸு நானாகுலானம் ஸந்தகே பகதியா அனாபத்திபா⁴வதோ நானாட்டா²னேஸு ஏககுலஸ்ஸேவ ஸந்தகம் ஸந்தா⁴ய வுத்தம் ‘‘அனாபத்தீ’’தி. ஆரத்³த⁴ஸ்ஸ விச்சே²த³த்தா ‘‘புன ஏகதி³வஸம் பு⁴ஞ்ஜிதும் லப⁴தீ’’தி வுத்தம். ‘‘ஓதி³ஸ்ஸா’’தி ஸாமஞ்ஞதோ வுத்தேபி பி⁴க்கூ²யேவ க³ஹேதப்³பா³தி ஆஹ ‘‘பி⁴க்கூ²னம்யேவா’’தி. பட²மம்.