3. ஓவாத³வக்³கோ³

1. ஓவாத³ஸிக்கா²பத³-அத்த²யோஜனா

144. பி⁴க்கு²னிவக்³க³ஸ்ஸ பட²மே தேஸந்தி தே²ரானம். மஹாகுலேஹி நிக்க²மித்வா பப்³ப³ஜிதாதி யோஜனா. குலதீ⁴தரோ விஜ்ஜமானகு³ணம் கத²யந்தீதி ஸம்ப³ந்தோ⁴. ‘‘ஞாதிமனுஸ்ஸான’’ந்திபத³ம் ‘‘கத²யந்தீ’’திபதே³ ஸம்பதா³னம். குதோதி கஸ்ஸ தே²ரஸ்ஸ ஸந்திகாதி அத்தோ². தேஸந்தி தே²ரானம் கு³ணந்தி ஸம்ப³ந்தோ⁴. ‘‘கதே²து’’ந்திபத³மபேக்கி²த்வா ‘‘விஜ்ஜமானகு³ணே’’தி வத்தப்³பே³ அவத்வா ‘‘வட்டந்தீ’’திபத³மபேக்கி²ய ‘‘விஜ்ஜமானகு³ணா’’தி வுத்தம். ஹீதி ஸச்சம், யஸ்மா வா. ததோதி கத²னகாரணா அபி⁴ஹரிம்ஸூதி ஸம்ப³ந்தோ⁴. தேனாதி அபி⁴ஹரணஹேதுனா.

தேஸந்தி ச²ப்³ப³க்³கி³யானம். தாஸூதி பி⁴க்கு²னீஸு. ‘‘பி⁴க்கு²னியோ’’திபத³ம் ‘‘உபஸங்கமித்வா’’திபதே³ கம்மம். ச²ப்³ப³க்³கி³யானம் பி⁴க்கு²னீஸு உபஸங்கமனம் லாப⁴தண்ஹாய ஹோதி, பி⁴க்கு²னீனம் ச²ப்³ப³க்³கீ³ஸு உபஸங்கமனம் சலசித்ததாய ஹோதீதி அஞ்ஞமஞ்ஞூபஸங்கமந்தானம் விஸேஸோ. திரச்சா²னபூ⁴தா கதா² திரச்சா²னகதா² நிரத்த²ககதா²தி த³ஸ்ஸேந்தோ ஆஹ ‘‘திரச்சா²னகத²ந்தீ’’தி. ஸக்³க³மக்³க³க³மனேபீதி பிஸத்³தோ³ மோக்க²க³மனே பன கா நாம கதா²தி த³ஸ்ஸேதி. ராஜானோ ஆரப்³ப⁴ பவத்தா கதா² ராஜகதா². ஆதி³ஸத்³தே³ன சோரகதா²த³யோ ஸங்க³ண்ஹாதி.

147. தே பி⁴க்கூ²தி ச²ப்³ப³க்³கி³யா பி⁴க்கூ² ப⁴வேய்யுந்தி ஸம்ப³ந்தோ⁴. அதி³ட்ட²ம் ஸச்சம் யேஹீதி அதி³ட்ட²ஸச்சா, தேஸம் பா⁴வோ அதி³ட்ட²ஸச்சத்தம், தஸ்மா அதி³ட்ட²ஸச்சத்தா ப³ந்தி⁴த்வாதி யோஜனா. நேஸந்தி ச²ப்³ப³க்³கி³யானம். அஞ்ஞேனேவ உபாயேனாதி அலத்³த⁴ஸம்முதிதோ அஞ்ஞேனேவ லத்³த⁴ஸம்முதிஸங்கா²தேன காரணேன கத்துகாமோதி ஸம்ப³ந்தோ⁴. பரதோதி பரஸ்மிம் பச்சா², உபரீதி அத்தோ². கரோந்தோ வாதி பரிபா³ஹிரே கரோந்தோ ஏவ ஹுத்வா ஆஹாதி யோஜனா. ஹீதி ஸச்சம், யஸ்மா வா. யஸ்மா ந பூ⁴தபுப்³பா³னி, இதி தஸ்மா பரிபா³ஹிரம் கரோந்தோ வாதி அத்தோ².

தத்தா²தி ‘‘அனுஜானாமீ’’திஆதி³வசனே. ஸீலவாதி ஏத்த² வந்துஸத்³தோ³ பஸம்ஸத்தே² ச அதிஸயத்தே² ச நிச்சயோக³த்தே² ச ஹோதி. தஸ்ஸாதி லத்³த⁴ஸம்முதிகஸ்ஸ. தந்தி ஸீலம். பாதிமோக்க²ஸம்வரஸத்³தா³னம் கம்மதா⁴ரயபா⁴வம், தேஹி ச ஸம்வுதஸத்³த³ஸ்ஸ தப்புரிஸபா⁴வம் த³ஸ்ஸேதும் வுத்தம் ‘‘பாதிமோக்கோ²வா’’திஆதி³. தத்த² ஏவஸத்³தே³ன கம்மதா⁴ரயபா⁴வம், ஏனஸத்³தே³ன ச தப்புரிஸபா⁴வம் த³ஸ்ஸேதீதி த³ட்ட²ப்³ப³ம்.

வத்ததீதி அத்தபா⁴வம் பவத்தேதி. காரிதபச்சயோ ஹி அத³ஸ்ஸனம் க³தோ. இமினா இரியாபத²விஹார தி³ப்³ப³விஹார ப்³ரஹ்மவிஹார அரியவிஹாரேஸு சதூஸு விஹாரேஸு அத்தபா⁴வவத்தனம் இரியாபத²விஹாரம் த³ஸ்ஸேதி. ஹீதி ஸச்சம். ஏதந்தி ‘‘பாதிமோக்க²ஸம்வரஸம்வுதோ விஹரதீ’’திவசனம். விப⁴ங்கே³தி ஜா²னவிப⁴ங்கே³.

‘‘ஸீல’’ந்திஆதீ³னி அட்ட² பதா³னி துல்யாதி⁴கரணானி. அயம் பனேத்த² ஸம்ப³ந்தோ⁴ – ஸீலம் குஸலானம் த⁴ம்மானம் ஸமாபத்தியா பதிட்டா² ஆதி³ சரணம் ஸம்யமோ ஸம்வரோ மோக்க²ம் பமோக்க²ந்தி. ஸமாபத்தியாதி ஸமாபத்தத்தா²ய. ‘‘உபேதோ’’திஆதீ³னி ஸத்த பதா³னி அஞ்ஞமஞ்ஞவேவசனானி. தத்த² உபபன்னோதி யுத்தோ அனுயுத்தோ. ஸமன்னாக³தோதி ஸமந்ததோ அனு புனப்புனம் ஆக³தோதி ஸமன்னாக³தோ, ஸமங்கீ³பூ⁴தோதி அத்தோ². ஏத்த² ஹி ஸம்ஸத்³தோ³ ஸமந்தத்த²வாசகோ, அனுஸத்³தோ³ நஉபச்சி²ன்னத்த²வாசகோ. தேனாதி தேன காரணேன. பாலேதீதி அத்தபா⁴வம் பா³த⁴னதோ ரக்க²தி. யபேதீதி அத்தபா⁴வோ பவத்ததி. யாபேதீதி அத்தபா⁴வம் பவத்தாபேதி. யப யாபனே. யாபனம் பவத்தனந்தி ஹி தா⁴துபாடே²ஸு வுத்தம் (ஸத்³த³னீதிதா⁴துமாலாயம் 18 பகாரந்ததா⁴து). விஹரதீதி ஏத்த² ஏகோ ஆகாரத்த²வாசகோ இதிஸத்³தோ³ லுத்தனித்³தி³ட்டோ², இதி வுச்சதி, இதி வுத்தந்தி வா யோஜனா.

ஆசாரகோ³சரஸத்³தா³னம் த்³வந்த³பா⁴வம், தேஹி ச ஸம்பன்னஸத்³த³ஸ்ஸ தப்புரிஸபா⁴வம் த³ஸ்ஸேந்தோ ஆஹ ‘‘ஆசாரகோ³சரஸம்பன்னோ’’திஆதி³. தத்த² சஸத்³தே³ன த்³வந்த³பா⁴வம், ஏனஸத்³தே³ன ச தப்புரிஸபா⁴வம் த³ஸ்ஸேதி. அணுஸத்³தோ³ அப்பத்தோ², மத்தஸத்³தோ³ பமாணத்தோ²தி ஆஹ ‘‘அப்பமத்தகேஸூ’’தி. ‘‘த³ஸ்ஸனஸீலோ’’திஇமினா ‘‘த³ஸ்ஸாவீ’’திஏத்த² ஆவீஸத்³த³ஸ்ஸ தஸ்ஸீலத்த²பா⁴வம் த³ஸ்ஸேதி. ‘‘ஸமாதா³யா’’தி ஏத்த² ஸம்புப்³ப³ஆபுப்³ப³ஸ்ஸ தா³ஸத்³த³ஸ்ஸ கம்மாபேக்க²த்தா தஸ்ஸ கம்மம் த³ஸ்ஸேதும் வுத்தம் ‘‘தம் தம் ஸிக்கா²பத³’’ந்தி. இமினா ‘‘ஸிக்கா²பதே³ஸூ’’தி உபயோக³த்தே² பு⁴ம்மவசனந்தி த³ஸ்ஸேதி. அத² வா ஸிக்கா²பதே³ஸூதி நித்³தா⁴ரணத்தே² பு⁴ம்மவசனமேதம். ‘‘தம் தம் ஸிக்கா²பத³’’ந்தி கம்மம் பன அஜ்ஜா²ஹரிதப்³ப³ந்தி த³ஸ்ஸேதி. ‘‘ஸமாதா³யா’’தி ஏத்த² ஸம்ஸத்³த³ஸ்ஸ ச ஆபுப்³ப³ஸ்ஸ தா³ஸத்³த³ஸ்ஸ ச யகாரஸ்ஸ ச அத்த²ம் த³ஸ்ஸேதும் ‘‘ஸாது⁴கம் க³ஹேத்வா’’தி வுத்தம். ஏத்தா²தி இமிஸ்ஸம் அட்ட²கதா²யம். வித்தா²ரோ பன க³ஹேதப்³போ³தி யோஜனா. யோதி குலபுத்தோ.

அஸ்ஸாதி லத்³த⁴ஸம்முதிகஸ்ஸ. யம் தம் ப³ஹு ஸுதம் நாம அத்தி², தம் ந ஸுதமத்தமேவாதி யோஜனா. மஞ்ஜூஸாயந்தி பேளாயம். ஸா ஹி ஸாமிகஸ்ஸ ஸத⁴னத்தம் மஞ்ஞதே இமாயாதி ‘‘மஞ்ஜூஸா’’தி வுச்சதி. மஞ்ஜூஸாயம் ரதனம் ஸன்னிசிதம் விய ஸுதம் ஸன்னிசிதம் அஸ்மிம் புக்³க³லேதி யோஜனா, ஏதேனாதி ‘‘ஸன்னிசித’’ந்திபதே³ன, த³ஸ்ஸேதீதி ஸம்ப³ந்தோ⁴. ஸோதி லத்³த⁴ஸம்முதிகோ பி⁴க்கு². ஸன்னிசிதரதனஸ்ஸேவாதி ஸன்னிசிதரதனஸ்ஸ இவ. தந்தி ‘‘யே தே த⁴ம்மா’’திஆதி³வசனம். ஏத்தா²தி இமஸ்மிம் ஸிக்கா²பதே³. அஸ்ஸாதி லத்³த⁴ஸம்முதிகஸ்ஸ பி⁴க்கு²னோ. தத்தா²தி ‘‘வசஸா பரிசிதா’’திஆதி³வசனே. ஏவமத்தோ² வேதி³தப்³போ³தி யோஜனா. பகு³ணாதி உஜுகா. உஜுகோ ஹி அஜிம்ஹத்தா பகட்டோ² உத்தமோ கு³ணோதி அத்தே²ன ‘‘பகு³ணோ’’தி வுச்சதி. அனுபேக்கி²தாதி புனப்புனம் உபக³ந்த்வா இக்கி²தா, பஸ்ஸிதா த³ஸ்ஸிதாதி அத்தோ². அத்த²தோதி அபி⁴தே⁴ய்யத்த²தோ, அட்ட²கதா²தோதி அத்தோ². காரணதோதி த⁴ம்மதோ, பாளிதோதி அத்தோ². தி³ட்டி²ஸத்³த³ஸ்ஸ பஞ்ஞாஸத்³த³வேவசனத்தா ‘‘பஞ்ஞாயா’’தி வுத்தம். ஸுபச்சக்க²கதாதி ஸுட்டு² அக்கா²னம் இந்த்³ரியானம் படிமுக²ம் கதா.

‘‘ப³ஹுஸ்ஸுதோ’’தி ஏத்த² ப³ஹுஸ்ஸுதஸ்ஸ திவித⁴பா⁴வம் த³ஸ்ஸேந்தோ ஆஹ ‘‘அயம் பனா’’திஆதி³. நிஸ்ஸயதோ முச்சதீதி நிஸ்ஸயமுச்சனகோ. பரிஸம் உபட்டா²பேதீதி பரிஸுபட்டா²கோ. பி⁴க்கு²னியோ ஓவத³தீதி பி⁴க்கு²னோவாத³கோ. தத்தா²தி திவிதே⁴ஸு ப³ஹுஸ்ஸுதேஸு. நிஸ்ஸயமுச்சனகேன ஏத்தகம் உக்³க³ஹேதப்³ப³ந்தி ஸம்ப³ந்தோ⁴. உபஸம்பதா³யாதி உபஸம்பாதே³த்வா. பஞ்ச வஸ்ஸானி ஏதஸ்ஸாதி பஞ்சவஸ்ஸோ. தேன உக்³க³ஹேதப்³ப³ந்தி யோஜனா. ஸப்³ப³ந்திமேனாதி ஸப்³பே³ஸம் பரிச்சே²தா³னம் அந்தே லாமகே பவத்தேன. பகு³ணாதி அஜிம்ஹா உஜுகா. வாசுக்³க³தாதி தஸ்ஸேவ வேவசனம். யஸ்ஸ ஹி பாளிபாடா² ஸஜ்ஜா²யனகாலே பகு³ணா ஹோந்தி, தஸ்ஸ வாசுக்³க³தா. யஸ்ஸ வா பன வாசுக்³க³தா ஹோந்தி, தஸ்ஸ பகு³ணா. தஸ்மா தானி பதா³னி அஞ்ஞமஞ்ஞகாரணவேவசனானி. பக்க²தி³வஸேஸூதி ஜுண்ஹபக்க²காளபக்க²பரியாபன்னேஸு தி³வஸேஸு. த⁴ம்மஸாவனத்தா²யாதி ஸம்பத்தானம் பரிஸானம் த⁴ம்மஸ்ஸ ஸாவனத்தா²ய ஸுணாபனத்தா²யாதி அதி⁴ப்பாயோ. ஸாவனத்தா²யாதி ஏத்த² யுபச்சயபரத்தா காரிதபச்சயோ லோபோ ஹோதீதி த³ட்ட²ப்³ப³ம். தஸ்மா ஸாவீயதே ஸுணாபீயதே ஸாவனந்தி வசனத்தோ² காதப்³போ³. பா⁴ணவாரா உக்³க³ஹேதப்³பா³தி ஸம்ப³ந்தோ⁴. ஸம்பத்தானந்தி அத்தனோ ஸந்திகம் ஸம்பத்தானம். பரிகத²னத்தா²யாதி பரிஸ்ஸங்கே³ன ஆலிங்க³னேன கத²னத்த²ம், அப்பஸத்³த³ஸங்கா²தாய வாசாய கத²னத்த²ந்தி அத்தோ². ‘‘கதா²மக்³கோ³’’தி வுத்தத்தா வத்து²கதா²யேவ அதி⁴ப்பேதா, ந ஸுத்தஸங்கா²தோ பாளிபாடோ². அனு பச்சா², புனப்புனம் வா தா³யகா மோத³ந்தி ஏதாயாதி அனுமோத³னா. ஜா²னம் வா மக்³கோ³ வா ப²லம் வா ஸமணத⁴ம்மோ நாம. தஸ்ஸ கரணத்த²ம் உக்³க³ஹேதப்³ப³ந்தி யோஜனா. ஹீதி ஸச்சம், யஸ்மா வா. சதூஸு தி³ஸாஸு அபடிஹதோதி சாதுத்³தி³ஸோ, அபடிஹதத்தே² ணபச்சயோ.

பரிஸுபட்டா²பகேன காதப்³பா³தி யோஜனா. அபி⁴வினயேதி அஞ்ஞமஞ்ஞபரிச்சி²ன்னே வினயபிடகே. த்³வே விப⁴ங்கா³தி பி⁴க்கு²விப⁴ங்கோ³ ச பி⁴க்கு²னிவிப⁴ங்கோ³ ச. அஸக்கோந்தேன பரிஸுபட்டா²பகேன பி⁴க்கு²னாதி ஸம்ப³ந்தோ⁴. ஏவம் அத்தனோ அத்தா²ய உக்³க³ஹேதப்³ப³ம் த³ஸ்ஸேத்வா இதா³னி பரிஸாய அத்தா²ய உக்³க³ஹேதப்³ப³ம் த³ஸ்ஸேந்தோ ஆஹ ‘‘பரிஸாய பனா’’திஆதி³. அபி⁴த⁴ம்மேதி அஞ்ஞமஞ்ஞபரிச்சி²ன்னே ஸுத்தந்தபிடகே ஏவ, ந அபி⁴த⁴ம்மபிடகே. தயோ வக்³கா³தி ஸகா³தா²வக்³கோ³ நிதா³னவக்³கோ³ க²ந்த⁴வக்³கோ³தி தயோ வக்³கா³. வாஸத்³தோ³ அனியமவிகப்பத்தோ². ஏகந்தி ஏகம் நிபாதம். ததோ ததோதி நிகாயதோ. ஸமுச்சயம் கத்வாதி ராஸிம் கத்வா. ந வுத்தந்தி அட்ட²கதா²ஸு ந கதி²தம். யஸ்ஸ பன நத்தி², ஸோ ந லப⁴தீதி யோஜனா. ஸுத்தந்தே சாதி ஸுத்தந்தபிடகே பன. உக்³க³ஹிதோதி ஸரூபகத²னேன க³ஹிதோ, உச்சாரிதோதி அத்தோ². தி³ஸாபாமோக்கோ²தி தி³ஸாஸு டி²தானம் பி⁴க்கு²ஆதீ³னம் பாமோக்கோ². யேன காமம் க³மோதி யதா²காமம் க³மோ.

சதூஸு நிகாயேஸூதி கு²த்³த³கனிகாயதோ அஞ்ஞேஸு தீ³க⁴னிகாயாதீ³ஸு. ஏகஸ்ஸாதி அஞ்ஞதரஸ்ஸ ஏகஸ்ஸ. ஏகனிகாயேனாதி ஏகஸ்மிம் நிகாயே லத்³த⁴னயேன. ஹீதி ஸச்சம், யஸ்மா வா. தத்தா²தி சதுப்பகரணஸ்ஸ அட்ட²கதா²யம். நானத்த²ந்தி நானாபயோஜனம். தந்தி வினயபிடகம். ஏத்தாவதாதி ஏத்தகபமாணேன பகு³ணேன. ஹோதீதி இதிஸத்³தோ³ பரிஸமாபனத்தோ². இதி பரிஸமாபனம் வேதி³தப்³ப³ந்தி யோஜனா.

உப⁴யானி கோ² பனஸ்ஸாதி ஆதி³ பன வுத்தந்தி ஸம்ப³ந்தோ⁴. அஞ்ஞஸ்மிந்தி வினயபிடகதோ இதரஸ்மிம். தத்தா²தி ‘‘உப⁴யானி கோ² பனஸ்ஸா’’திஆதி³வசனே. யதா² யேனாகாரேன ஆக³தானி, தம் ஆகாரம் த³ஸ்ஸேதுந்தி யோஜனா. பத³பச்சாப⁴ட்ட²ஸங்கரதோ³ஸவிரஹிதானீதி பதா³னம் பச்சாப⁴ட்ட²ஸங்கரபூ⁴தேஹி தோ³ஸேஹி விரஹிதானி. ஏத்த² ச பத³பச்சாப⁴ட்ட²ந்தி பதா³னம் படினிவத்தித்வா ஆப⁴ஸ்ஸனம் க³ளனம், சுதந்தி அத்தோ². பத³ஸங்கரந்தி பதா³னம் விபத்தி, வினாஸோதி அத்தோ². ‘‘ஸுத்தஸோ’’தி ஸாமஞ்ஞதோ வுத்தேபி க²ந்த⁴கபரிவாரஸுத்தம் ஏவ க³ஹேதப்³ப³ந்தி ஆஹ ‘‘க²ந்த⁴கபரிவாரதோ’’தி. அனுப்³யஞ்ஜனஸோதி ஏத்த² ப்³யஞ்ஜனஸத்³தோ³ அக்க²ரஸ்ஸ ச பத³ஸ்ஸ ச வாசகோதி ஆஹ ‘‘அக்க²ரபத³பாரிபூரியா சா’’தி. ஹீதி ஸச்சம், யஸ்மா வா.

‘‘ஸிதி²லத⁴னிதாதீ³ன’’ந்திபத³ம் ‘‘வசனேனா’’திபதே³ கம்மம், ‘‘வசனேனா’’திபத³ம் ‘‘ஸம்பன்னாக³தோ’’திபதே³ ஹேது, ‘‘விஸ்ஸட்டா²ய அனேலக³ளாய அத்த²ஸ்ஸ விஞ்ஞாபனியா’’திபதா³னி ‘‘வாசாயா’’திபதே³ விஸேஸனானி. ஸிதி²லத⁴னிதாதீ³னந்தி ஆதி³ஸத்³தே³ன நிக்³க³ஹிதவிமுத்தஸம்ப³ந்த⁴வவத்தி²ததீ³க⁴ ரஸ்ஸ க³ரு லஹு ஸங்கா²தா அட்ட² ப்³யஞ்ஜனபு³த்³தி⁴யோ ஸங்க³ண்ஹாதி. யதா²விதா⁴னவசனேனாதி அக்க²ரசிந்தகானம் யதா² ஸம்வித³ஹனவசனேன. வாசாயேவ கரீயதி கதீ²யதி உச்சாரீயதி வாக்கரணம் சகாரஸ்ஸ ககாரம் கத்வா. ஹீதி ததே³வ யுத்தம். மாதுகா³மோ யஸ்மா ஸரஸம்பத்திரதோ, தஸ்மா ஹீளேதீதி யோஜனா. ‘‘ஸரஸம்பத்திரஹித’’ந்திபத³ம் ‘‘வசன’’ந்திபதே³ விஸேஸனபா⁴வேன விஸேஸம் கத்வா ‘‘ஹீளேதீ’’திபதே³ ஹேதுபா⁴வேன ஸம்பஜ்ஜனதோ ஹேதுஅந்தோக³த⁴விஸேஸனந்தி த³ட்ட²ப்³ப³ம். ஸப்³பா³ஸந்தி பி⁴க்கு²னீனம். ‘‘ஸீலாசாரஸம்பத்தியா’’திஇமினா ஜாதி கோ³த்த ரூப போ⁴கா³தி³னாதிஅத்த²ம் நிவத்தேதி. காரணஞ்சாதி அட்ட²கத²ஞ்ச. தஜ்ஜேத்வாதி உப்³பே³ஜேத்வா. தாஸந்தி பி⁴க்கு²னீனம். கி³ஹிகாலேதி பி⁴க்கு²னோவாத³கஸ்ஸ கி³ஹிகாலே அனஜ்ஜா²பன்னபுப்³போ³ ஹோதீதி ஸம்ப³ந்தோ⁴. ஹி ததே³வ யுத்தம். ‘‘மாதுகா³மோ’’திபத³ம் ‘‘ந கரோதீ’’திபதே³ ஸுத்³த⁴கத்தா, ‘‘உப்பாதே³தீ’’திபதே³ ஹேதுகத்தா. டி²தஸ்ஸ பி⁴க்கு²னோ த⁴ம்மதே³ஸனாயாபீதி யோஜனா. அபிஸத்³தோ³ க³ரஹத்தோ². விஸபா⁴கே³ஹீதி விருத்³தே⁴ஹி வத்தா²ரம்மணேஹி. அயுத்தட்டா²னேதி பப்³ப³ஜிதானம் அனனுரூபட்டா²னே. ச²ந்த³ராக³ந்தி ப³லவதண்ஹம். தேனாதி தேன ஹேதுனா.

‘‘ஏத்த² சா’’திஆதி³ம்ஹி அயம் பன ஸங்க³ஹோ –

‘‘ஸீலவா ப³ஹுஸ்ஸுதோ ச, ஸ்வாக³தோ ச ஸுவாசகோ;

பியோ படிப³லோ சாபி, நஜ்ஜா²பன்னோ ச வீஸதீ’’தி.

148. வத்து²ஸ்மிந்தி அட்டு²ப்பத்தியம். ககாரலோபம் கத்வா க³ருத⁴ம்மாதி வுச்சந்தீதி ஆஹ ‘‘க³ருகேஹி த⁴ம்மேஹீ’’தி. தேதி க³ருத⁴ம்மா. ஹீதி யஸ்மா. ‘‘ஏகதோ’’தி ஸாமஞ்ஞேன வுத்தவசனஸ்ஸ விஸேஸேன க³ஹேதப்³ப³தம் த³ஸ்ஸேதும் வுத்தம் ‘‘பி⁴க்கு²னீனம் ஸந்திகே’’தி. யதா²வத்து²கமேவாதி பாசித்தியமேவ. தஞ்ஹி வத்து²ஸ்ஸ ஆபத்திகாரணஸ்ஸ அனுரூபம் பவத்தத்தா ‘‘யதா²வத்து²க’’ந்தி வுச்சதி.

149. பாதோதி பகே³வ, பட²மந்தி அத்தோ². அஸம்மட்ட²ம் ஸம்மஜ்ஜீதப்³ப³ந்தி ஸம்ப³ந்தோ⁴. அஸம்மஜ்ஜனே தோ³ஸம் பாகடம் கரோந்தோ ஆஹ ‘‘அஸம்மட்ட²ம் ஹீ’’திஆதி³. ஹீதி தப்பாகடீகரணஜோதகோ. தந்தி பரிவேணம். தி³ஸ்வா ப⁴வேய்யுந்தி ஸம்ப³ந்தோ⁴. தேனாதி அஸோதுகாமானம் விய ப⁴வனஹேதுனா. பரிவேணஸம்மஜ்ஜனஸ்ஸ ஆனிஸம்ஸம் த³ஸ்ஸேத்வா பானீயபரிபோ⁴ஜனீயஉபட்டா²னஸ்ஸ தமேவ த³ஸ்ஸேந்தோ ஆஹ ‘‘அந்தோ கா³மதோ பனா’’தி ஆதி³. தஸ்மிந்தி பானீயபரிபோ⁴ஜனீயே.

ஸாகா²ப⁴ங்க³ம்பீதி ப⁴ஞ்ஜிதப்³ப³ஸாக²ம்பி. து³தியோதி விஞ்ஞூ புரிஸோ து³தியோ. நிஸீதி³தப்³ப³ட்டா²னம் த³ஸ்ஸேந்தோ ஆஹ ‘‘நிஸீதி³தப்³ப³’’ந்திஆதி³. ‘‘விஹாரமஜ்ஜே²’’தி ஸாமஞ்ஞதோ வத்வா விஸேஸதோ த³ஸ்ஸேதும் வுத்தம் ‘‘த்³வாரே’’தி. ஓஸரந்தி அவஸரந்தி ஏத்தா²தி ஓஸரணம், தஞ்ச தம் டா²னஞ்சேதி ஓஸரணட்டா²னம், தஸ்மிம். ஸமக்³க³த்தா²தி ஏத்த² ஸம்புப்³போ³ ச ஆபுப்³போ³ ச க³முஸத்³தோ³ ஹோதி, ததோ ஹிய்யத்தனீஸங்கா²தம் த்த²வசனம் வா ஹோதி, பஞ்சமீஸங்கா²தஸ்ஸ த²வசனஸ்ஸ த்த²த்தம் வா ஹோதி, ஸம்யோக³பரத்தா ஆ உபஸக்³கோ³ ரஸ்ஸோ ச ஹோதி, இதி அத்த²ம் த³ஸ்ஸேந்தோ ஆஹ ‘‘ஸம்மா ஆக³தத்தா²’’தி. தத்த² ‘‘ஸம்மா’’திபதே³ன ஸம்ஸத்³த³ஸ்ஸ அத்த²ம் த³ஸ்ஸேதி, ‘‘ஆ’’இதிபதே³ன ஆத்யூபஸக்³க³ம், ‘‘க³த’’இதிபதே³ன க³முதா⁴தும், ‘‘த்த²’’இதிபதே³ன ஹிய்யத்தனீஸங்கா²தம் த்த²வசனம் வா, பஞ்சமீஸங்கா²தஸ்ஸ த²வசனஸ்ஸ த்த²த்தம் வா த³ஸ்ஸேதி. அயம் பனேத்த²த்தோ² – ஸமம் தும்ஹே ஆக³தத்தா²தி. பஞ்சமீஸங்கா²தஸ்ஸ த²வசனஸ்ஸ த்த²த்தகாலே ஸமம் தும்ஹே ஆகா³ அத்த² ப⁴வதா²தி. ‘‘ஆக³ச்ச²ந்தீ’’திபதே³ன ‘‘வத்தந்தீ’’தி ஏத்த² வதுதா⁴துயா அத்த²ம் த³ஸ்ஸேதி, ‘‘பகு³ணா வாசுக்³க³தா’’திபதே³ஹி அதி⁴ப்பாயம் த³ஸ்ஸேதி. பாளீதி க³ருத⁴ம்மபாளி.

தத்தா²தி தஸ்ஸம் பாளியம், தேஸு வா அபி⁴வாத³னாதீ³ஸு சதூஸு. மக்³க³ஸம்பதா³னந்தி மக்³க³ம் பரிஹரித்வா பி⁴க்கு²ஸ்ஸ ஓகாஸதா³னம். பீ³ஜனந்தி பீ³ஜனியா விதூ⁴பனம். பானீயாபுச்ச²னந்தி பானீயஸ்ஸ ஆபுச்ச²னம். ஆதி³ஸத்³தே³ன பரிபோ⁴ஜனீயாபுச்ச²னாதி³கம் ஸங்க³ண்ஹாதி. ஏத்த² சாதி ஏதேஸு சதூஸு அபி⁴வாத³னாதீ³ஸு. ‘‘அந்தோ கா³மே வா’’திஆதீ³னி ச² பதா³னி ‘‘காதப்³ப³மேவா’’திபதே³ ஆதா⁴ரோ. ராஜுஸ்ஸாரணாயாதி ரஞ்ஞோ ஆனுபா⁴வேன ஜனானம் உஸ்ஸாரணாய. மஹாபி⁴க்கு²ஸங்கோ⁴ ஸன்னிபததி ஏத்தா²தி மஹாஸன்னிபாதம், தஸ்மிம் மஹாஸன்னிபாதே டா²னே நிஸின்னே ஸதீதி யோஜனா. பச்சுட்டா²னந்தி படிகச்சேவ உட்டா²னம். தம் தந்தி ஸாமீசிகம்மம்.

ஸக்கத்வாதி சித்திம் கத்வா, ஸம் ஆத³ரம் கத்வாதி அத்தோ². தேனாஹ ‘‘யதா² கதோ’’திஆதி³. திண்ணம் கிச்சானந்தி ‘‘ஸக்கத்வா க³ரும்கத்வா மானேத்வா’’திஸங்கா²தானம் திண்ணம் கிச்சானம். அனீயஸத்³தோ³ கம்மத்தோ²தி ஆஹ ‘‘ந அதிக்கமிதப்³போ³’’தி.

நத்தி² பி⁴க்கு² ஏத்தா²தி அபி⁴க்கு²கோ ஆவாஸோ, ஸோ கித்தகே டா²னே அபி⁴க்கு²கோ, யோ ஆவாஸோ அபி⁴க்கு²கோ நாம ஹோதீதி ஆஹ ‘‘ஸசே’’தி ஆதி³. ‘‘உபஸ்ஸயதோ’’திபத³ம் ‘‘அப்³ப⁴ந்தரே’’திபதே³ அபாதா³னம். ஏத்தா²தி அபி⁴க்கு²கே ஆவாஸே. ஹீதி ஸச்சம். ததோதி அட்³ட⁴யோஜனப்³ப⁴ந்தரே டி²தஆவாஸதோ. பரந்தி அஞ்ஞஸ்மிம் ஆவாஸே, பு⁴ம்மத்தே² சேதம் உபயோக³வசனம். பச்சா²ப⁴த்தந்தி ப⁴த்ததோ பச்சா². தத்தா²தி அபி⁴க்கு²கே ஆவாஸே. ‘‘பி⁴க்கு²னியோ’’திபத³ம் ‘‘வத³ந்தீ’’திபதே³ கம்மம். வுத்தப்பமாணேதி அட்³ட⁴யோஜனப்³ப⁴ந்தரஸங்கா²தே வுத்தப்பமாணே. ஸாகா²மண்ட³பேபீதி ஸாகா²ய சா²தி³தமண்ட³பேபி. பிஸத்³தே³ன ஆவாஸே பன கா நாம கதா²தி த³ஸ்ஸேதி. வுத்தாதி வஸிதா. ஏத்தாவதாதி ஏகரத்தம் வஸிதமத்தேன. ஏத்தா²தி ஸபி⁴க்கு²கே ஆவாஸே. உபக³ச்ச²ந்தீஹி பி⁴க்கு²னீஹி யாசிதப்³பா³தி யோஜனா. பக்க²ஸ்ஸாதி ஆஸள்ஹீமாஸஸ்ஸ ஜுண்ஹபக்க²ஸ்ஸ. ‘‘தேரஸிய’’ந்திபதே³ன அவயவிஅவயவபா⁴வேன யோஜேதப்³ப³ம். மயந்தி அம்ஹே. யதோதி யேன உஜுனா மக்³கே³னாதி ஸம்ப³ந்தோ⁴. தேனாஹ ‘‘தேன மக்³கே³னா’’தி. அஞ்ஞேன மக்³கே³னாதி உஜுமக்³க³தோ அஞ்ஞேன ஜிம்ஹமக்³கே³ன. அயந்தி அயம் ஆவாஸோ. ததோதி பி⁴க்கூ²னம் ஆவாஸதோ, பி⁴க்கு²னிஉபஸ்ஸயதோ வா, இத³மேவ யுத்ததரம். வக்க²தி ஹி ‘‘அம்ஹாகம் உபஸ்ஸயதோ கா³வுதமத்தே’’தி. கே²மட்டா²னேதி அப⁴யட்டா²னே. தஞ்ஹி கீ²யந்தி ப⁴யா ஏத்தா²தி கே²மம், கே²மஞ்ச தம் டா²னஞ்சேதி கே²மட்டா²னந்தி கத்வா ‘‘கே²மட்டா²ன’’ந்தி வுச்சதி. தாஹி பி⁴க்கு²னீஹீதி அட்³ட⁴யோஜனமத்தே டா²னே வஸந்தீஹி. தா பி⁴க்கு²னியோதி கா³வுதமத்தே டா²னே வஸந்தியோ. அந்தராதி தும்ஹாகம், அம்ஹாகஞ்ச நிவாஸனட்டா²னஸ்ஸ, நிவாஸனட்டா²னதோ வா அந்தரே வேமஜ்ஜே². பு⁴ம்மத்தே² சேதம் நிஸ்ஸக்கவசனம். டி²தே மக்³கே³தி ஸம்ப³ந்தோ⁴ ‘‘ஸந்திகா’’திபத³ம் ‘‘ஆக³த’’இதிபதே³ அபாதா³னம். தத்தா²தி அஞ்ஞாஸம் பி⁴க்கு²னீனம் உபஸ்ஸயே. இதி யாசிதப்³பா³தி யோஜனா. ததோதி பி⁴க்கூ²னம் யாசிதப்³ப³தோ, பரந்தி ஸம்ப³ந்தோ⁴.

சாதுத்³த³ஸேதி ஆஸள்ஹீமாஸஸ்ஸ ஜுண்ஹபக்க²ஸ்ஸ சதுத்³த³ஸன்னம் தி³வஸானம் பூரணே தி³வஸே. இதா⁴தி இமஸ்மிம் விஹாரே. ‘‘ஓவாத³’’ந்திபத³ம் ‘‘அனு’’இதிபதே³ கம்மம். அனுஜீவந்தியோதி அனுக³ந்த்வா ஜீவனம் வுத்திம் கரோந்தியோ. வுத்தா பி⁴க்கூ²தி ஸம்ப³ந்தோ⁴. து³தியதி³வஸேதி ஆஸள்ஹீபுண்ணமியம். அதா²தி பக்கமனானந்தரம். ஏத்தா²தி பி⁴க்கூ²னம் பக்கந்தத்தா அபஸ்ஸனே. ‘‘ஆபோ⁴க³ம் கத்வா’’திஇமினா ஆபோ⁴க³ம் அகத்வா வஸிதும் ந வட்டதீதி தீ³பேதி. ஸபி⁴க்கு²காவாஸம் க³ந்தப்³ப³மேவாதி அதி⁴ப்பாயோ. ஸாதி வஸ்ஸச்சே²தா³பத்தி. ஹீதி ஸச்சம், யஸ்மா வா. கேனசி காரணேனாதி பி⁴க்கா²சாரஸ்ஸ அஸம்பதா³தி³னா கேனசி நிமித்தேன. ஹீதி ஸச்சம். பி⁴க்கூ²னம் பக்கந்தாதி³காரணா அபி⁴க்கு²காவாஸே வஸந்தியா கிம் அபி⁴க்கு²காவாஸேவ பவாரேதப்³ப³ந்தி ஆஹ ‘‘பவாரேந்தியா பனா’’திஆதி³.

அன்வத்³த⁴மாஸந்தி ஏத்த² அனுஸத்³தோ³ விச்ச²த்த²வாசகோ கம்மப்பவசனீயோ, தேன பயோக³த்தா பு⁴ம்மத்தே² உபயோக³வசனந்தி ஆஹ ‘‘அத்³த⁴மாஸே அத்³த⁴மாஸே’’தி. பச்சாஸீஸிதப்³பா³தி ஏத்த² பதிபுப்³போ³ ச ஆபுப்³போ³ ச ஸிதா⁴து இச்ச²த்தே²தி ஆஹ ‘‘இச்சி²தப்³பா³’’தி. ஸிதா⁴துயா த்³வேபா⁴வோ ஹோதி. ஆபுப்³போ³ ஸிஸி இச்சா²யந்திபி தா⁴துபாடே²ஸு வுத்தம். தத்தா²தி ‘‘உபோஸத²புச்ச²க’’ந்திவசனே. பக்க²ஸ்ஸாதி யஸ்ஸ கஸ்ஸசி பக்க²ஸ்ஸ. மஹாபச்சரியம் பன வுத்தந்தி ஸம்ப³ந்தோ⁴. ஓவாத³ஸ்ஸ யாசனம் ஓவாதோ³ உத்தரபத³லோபேன, ஸோயேவ அத்தோ² பயோஜனம் ஓவாத³த்தோ², தத³த்தா²ய. பாடிபத³தி³வஸதோதி து³தியதி³வஸதோ. ஸோ ஹி சந்தோ³ வுத்³தி⁴ஞ்ச ஹானிஞ்ச படிமுக²ம் பஜ்ஜதி ஏத்த², ஏதேனாதி வா பாடிபதோ³தி வுச்சதி. இதீதி ஏவம் வுத்தனயேன. ப⁴க³வா பஞ்ஞபேதீதி யோஜனா. அஞ்ஞஸ்ஸாதி த⁴ம்மஸ்ஸவனகம்மதோ அஞ்ஞஸ்ஸ. நிரந்தரந்தி அபி⁴க்க²ணம், ‘‘பஞ்ஞபேதீ’’திபதே³ பா⁴வனபும்ஸகம். ஹீதி வித்தா²ரோ. ஏவஞ்ச ஸதீதி ஏவம் ப³ஹூபகாரே ஸதி ச. யந்தி யம் த⁴ம்மம். ஸாத்தி²கந்தி ஸபயோஜனம். யதா²னுஸிட்ட²ந்தி அனுஸிட்டி²யா அனுரூபம். ஸப்³பா³யேவ பி⁴க்கு²னியோபீதி யோஜனா. ஹீதி ஸச்சம்.

ஓவாத³ம் க³ச்ச²தீதி ஓவாத³ம் யாசிதும் பி⁴க்கு²ஸங்க⁴ஸ்ஸ ஆராமம் க³ச்ச²தி. ந ஓவாதோ³ க³ந்தப்³போ³தி ஓவாத³ம் யாசிதும் பி⁴க்கு²ஸங்க⁴ஸ்ஸ ஆராமோ ந க³ந்தப்³போ³. ஓவாதோ³தி ச உபயோக³த்தே² பச்சத்தவசனந்தி த³ட்ட²ப்³ப³ம். இதரதா² ஹி ஸத்³த³பயோகோ³ விருஜ்ஜே²ய்ய. ஓவாத³ம் க³ந்துந்தி ஓவாத³ம் யாசனத்தா²ய பி⁴க்கு²ஸங்க⁴ஸ்ஸ ஆராமம் க³ந்தும்.

‘‘த்³வே திஸ்ஸோ பி⁴க்கு²னியோ’’திபத³ம் ‘‘யாசித்வா’’திபதே³ து³தியாகம்மம். ‘‘பேஸேதப்³பா³’’திபதே³ பட²மாகம்மம். ஓவாதூ³பஸங்கமனந்தி ஓவாத³ஸ்ஸ க³ஹணத்தா²ய உபஸங்கமனம். ஆராமந்தி பி⁴க்கு²ஸங்க⁴ஸ்ஸ ஆராமம். ததோதி க³மனதோ பரந்தி ஸம்ப³ந்தோ⁴. தேன பி⁴க்கு²னாதி ஓவாத³படிக்³கா³ஹகேன பி⁴க்கு²னா. தந்தி ஸம்மதம் பி⁴க்கு²ம்.

உஸ்ஸஹதீதி ஸக்கோதி. பாஸாதி³கேனாதி பஸாத³ம் ஆவஹேன பஸாத³ஜனகேன காயவசீமனோகம்மேனாதி அத்தோ². ஸம்பாதே³தூதி திவித⁴ம் ஸிக்க²ம் ஸம்பாதே³து. ஏத்தாவதாதி ஏத்தகேன ‘‘பாஸாதி³கேன ஸம்பாதே³தூ’’தி வசனமத்தேன. ஹீதி ப²லஜோதகோ. ஏதந்தி ‘‘தாஹீ’’திவசனம்.

ஏத்த² ச பி⁴க்கூ²னம் ஸங்க⁴க³ணபுக்³க³லவஸேன வசனவாரோ திவிதோ⁴ ஹோதி, தம் திவித⁴ம் வசனவாரம் பி⁴க்கு²னீனம் ஸங்க⁴க³ணபுக்³க³லவஸேன தீஹி வசனவாரேஹி கு³ணிதம் கத்வா நவ வசனவாரா ஹோந்தி, தம் ஆகாரம் த³ஸ்ஸேந்தோ ஆஹ ‘‘தத்ராயம் வசனக்கமோ’’தி. தத்ராதி புரிமவசனாபேக்க²ம். வசனாகாரோ பாகடோவ.

ஏகா பி⁴க்கு²னீ வா ப³ஹூஹி பி⁴க்கு²னீஉபஸ்ஸயேஹி ஓவாத³த்தா²ய பேஸிதே வசனாகாரம் த³ஸ்ஸேந்தோ ஆஹ ‘‘பி⁴க்கு²னிஸங்கோ⁴ ச அய்யா’’திஆதி³.

தேனாபீதி ஓவாத³படிக்³கா³ஹகேனாபி ‘‘ஓவாத³’’ந்திபத³ம் ‘‘படிக்³கா³ஹகேனா’’தி பதே³ கம்மம். புன ‘‘ஓவாத³’’ந்திபத³ம் ‘‘அபடிக்³க³ஹேது’’ந்திபதே³ கம்மம். ப³லதி அஸ்ஸாஸபஸ்ஸாஸமத்தேன ஜீவதி, ந பஞ்ஞாஜீவிதேனாதி பா³லோ. கி³லாயதி ருஜதீதி கி³லானோ. க³மிஸ்ஸதி க³ந்தும் ப⁴ப்³போ³தி க³மிகோ. அயம் பனேத்த² யோஜனா – க³ந்தும் ப⁴ப்³போ³ யோ பி⁴க்கு² க³மிஸ்ஸதி க³மனம் கரிஸ்ஸதி, இதி தஸ்மா ஸோ பி⁴க்கு² க³மிகோ நாம. அத² வா யோ பி⁴க்கு² க³ந்தும் ப⁴ப்³ப³த்தா க³மிஸ்ஸதி க³மனம் கரிஸ்ஸதி, இதி தஸ்மா ஸோ பி⁴க்கு² க³மிகோ நாமாதி. ‘‘ப⁴ப்³போ³’’தி ச ஹேதுஅந்தோக³த⁴விஸேஸனம்.

தத்தா²தி பா³லாதீ³ஸு தீஸு புக்³க³லேஸு. து³தியபக்க²தி³வஸேதி பாடிபத³தோ து³தியபக்க²தி³வஸே. உபோஸத²க்³கே³தி உபோஸத²கே³ஹே. தஞ்ஹி உபோஸத²ம் க³ண்ஹந்தி, உபோஸதோ² வா க³ய்ஹதி அஸ்மிந்தி ‘‘உபோஸத²க்³க³’’ந்தி வுச்சதி. தஸ்மிம் உபோஸத²க்³கே³. ‘‘அனாரோசேது’’ந்தி வசனஸ்ஸ ஞாபகம் த³ஸ்ஸேத்வா ‘‘அபச்சாஹரிது’’ந்தி வசனஸ்ஸ தமேவ த³ஸ்ஸேந்தோ ஆஹ ‘‘அபரம்பி வுத்த’’ந்திஆதி³.

தத்தா²தி ஓவாத³படிக்³கா³ஹகேஸு பி⁴க்கூ²ஸு. நோ சஸ்ஸாதி நோ சே அஸ்ஸ. ஸப⁴ம் வாதி ஸமஜ்ஜம் வா. ஸா ஹி ஸஹ பா⁴ஸந்தி ஏத்த², ஸந்தேஹி வா பா⁴தி தி³ப்³ப³தீதி ‘‘ஸபா⁴’’தி வுச்சதி, தம் ஸப⁴ம் வா உபஸங்கமிஸ்ஸாமீதி யோஜனா. தத்ராதி தஸ்மிம் ஸபா⁴தி³கே. ஏவம் ‘‘தத்தா²’’திபதே³பி.

சதுத்³த³ஸன்னம் பூரணோ சாதுத்³த³ஸோ, தஸ்மிம் பவாரேத்வாதி ஸம்ப³ந்தோ⁴. பி⁴க்கு²ஸங்கே⁴தி பி⁴க்கு²ஸங்க⁴ஸ்ஸ ஸந்திகே, ஸமீபத்தே² சேதம் பு⁴ம்மவசனம். அஜ்ஜதனாதி ஏத்த² அஸ்மிம் அஹனி அஜ்ஜ, இமஸத்³த³தோ அஹனீதி அத்தே² ஜ்ஜபச்சயோ, இமஸத்³த³ஸ்ஸ ச அகாரோ, அஜ்ஜ ஏவ அஜ்ஜதனா, ஸ்வத்தோ² ஹி தனபச்சயோ. அபரஸ்மிம் அஹனி அபரஜ்ஜ, அபரஸத்³த³தோ அஹனீதி அத்தே² ஜ்ஜபச்சயோ ஸத்தம்யந்தோயேவ. ஏத்தா²தி பவாரணே, ‘‘அனுஜானாமீ’’திஆதி³வசனே வா. ஹீதி ஸச்சம்.

கோலாஹலந்தி கோதூஹலம். பட²மம் பி⁴க்கு²னீ யாசிதப்³பா³தி ஸங்கே⁴ன பட²மம் பி⁴க்கு²னீ யாசிதப்³பா³.

தாய பி⁴க்கு²னியா வசனீயோ அஸ்ஸாதி யோஜனா. பஸ்ஸந்தோ படிகரிஸ்ஸதீதி வஜ்ஜாவஜ்ஜம் பஸ்ஸந்தோ ஹுத்வா படிகரிஸ்ஸதி.

உபி⁴ன்னந்தி பி⁴க்கு²பி⁴க்கு²னீனம். யதா²டா²னேயேவாதி யம் யம் டா²னம் யதா²டா²னம், தஸ்மிம் யதா²டா²னேயேவ. கேனசி பரியாயேனாதி கேனசி காரணேன. அவபுப்³போ³ வரஸத்³தோ³ பிஹிதத்தோ²தி ஆஹ ‘‘பிஹிதோ’’தி. வசனம்யேவாதி ஓவாத³வசனம்யேவ. பதோ²தி ஜேட்ட²கட்டா²னே டா²னஸ்ஸ காரணத்தா பதோ². தோ³ஸம் பனாதி அபி⁴க்கமனாதீ³ஸு ஆதீ³னவம் பன. அஞ்ஜேந்தீதி மக்கே²ந்தி. பி⁴க்கூ²ஹி பன ஓவதி³தும் அனுஸாஸிதும் வட்டதீதி யோஜனா.

அஞ்ஞந்தி ஓவாத³தோ அஞ்ஞம். ஏஸோதி க³ருத⁴ம்மோ.

150. ‘‘அத⁴ம்மகம்மே’’தி ஏத்த² கதமம் கம்மம் நாமாதி ஆஹ ‘‘அத⁴ம்மகம்மேதிஆதீ³ஸூ’’திஆதி³. தத்தா²தி அத⁴ம்மகம்மத⁴ம்மகம்மேஸு.

152. உத்³தே³ஸம் தே³ந்தோ ப⁴ணதி, அனாபத்தீதி யோஜனா. ஓஸாரேதீதி கதே²தி. சதுபரிஸதீதி சதுபரிஸஸ்மிம். தத்ராபீதி தேன பி⁴க்கு²னீனம் ஸுணனகாரணேனாதி. பட²மம்.

2. அத்த²ங்க³தஸிக்கா²பத³ம்

153. து³தியே பரியாயஸத்³தோ³ வாரத்தோ²தி ஆஹ ‘‘வாரேனா’’தி. வாரோதி ச அனுக்கமோயேவாதி ஆஹ ‘‘படிபாடியாதி அத்தோ²’’தி. அதி⁴கம் சித்தம் இமஸ்ஸாதி அதி⁴சேதோதி த³ஸ்ஸேந்தோ ஆஹ ‘‘அதி⁴சித்தவதோ’’திஆதி³. அதி⁴சித்தம் நாம இத⁴ அரஹத்தப²லசித்தமேவ, ந விபஸ்ஸனாபாத³கபூ⁴தம் அட்ட²ஸமாபத்திசித்தந்தி ஆஹ ‘‘அரஹத்தப²லசித்தேனா’’தி. ‘‘அதி⁴சித்தஸிக்கா²’’திஆதீ³ஸு (பாரா. 45; தீ³. நி. 3.305; ம. நி. 1.497; அ. நி. 6.105; மஹானி. 10) ஹி விபஸ்ஸனாபாத³கபூ⁴தம் அட்ட²ஸமாபத்திசித்தம் ‘‘அதி⁴சித்த’’ந்தி வுச்சதி. ந பமஜ்ஜதோதி ந பமஜ்ஜந்தஸ்ஸ. ஸாதச்சகிரியாயாதி ஸததகரணேன. உபோ⁴ லோகே முனதி ஜானாதீதி முனீதி ச, மோனம் வுச்சதி ஞாணம் முனனட்டே²ன ஜானனத்தே²ன, தமஸ்ஸத்தீ²தி முனீதி ச த³ஸ்ஸேந்தோ ஆஹ ‘‘முனினோதீ’’திஆதி³. தத்த² ‘‘யோ முனதி…பே… முனனேன வா’’திஇமினா பட²மத்த²ம் த³ஸ்ஸேதி, ‘‘மோனம் வுச்சதி…பே… வுச்சதீ’’திஇமினா து³தியத்த²ம் த³ஸ்ஸேதி. முன க³தியந்தி தா⁴துபாடே²ஸு (ஸத்³த³னீதிதா⁴துமாலாயம் 15 பகாரந்ததா⁴து) வுத்தத்தா ‘‘யோ முனதீ’’தி ஏத்த² பூ⁴வாதி³க³ணிகோ முனதா⁴துயேவ, ந கீயாதி³க³ணிகோ முதா⁴தூதி த³ட்ட²ப்³ப³ம். அத² வா முன ஞாணேதி தா⁴துபாடே²ஸு (ஸத்³த³னீதிதா⁴துமாலாயம் 17 கியாதி³க³ணிக) வுத்தத்தா ‘‘முனாதீ’’தி கீயாதி³க³ணிகோவ. தா⁴த்வந்தனகாரலோபோதி த³ட்ட²ப்³ப³ம். ‘‘மோனம் வுச்சதி ஞாண’’ந்தி சேத்த² ஞாணம் நாம அரஹத்தஞாணமேவ. மோனஸ்ஸ பதோ² மோனபதோ²தி வுத்தே ஸத்ததிம்ஸ போ³தி⁴பக்கி²யத⁴ம்மாவ அதி⁴ப்பேதாதி ஆஹ ‘‘ஸத்ததிம்ஸபோ³தி⁴பக்கி²யத⁴ம்மேஸூ’’தி. அத² வா அதி⁴ஸீலஸிக்கா²த³யோ அதி⁴ப்பேதாதி ஆஹ ‘‘தீஸு வா ஸிக்கா²ஸூ’’தி. புப்³ப³பா⁴க³படிபத³ந்தி அரஹத்தஞாணஸ்ஸ புப்³ப³பா⁴கே³ பவத்தம் ஸீலஸமத²விபஸ்ஸனாஸங்கா²தம் படிபத³ம். புப்³ப³பா⁴கே³தி அரஹத்தஞாணஸ்ஸ புப்³ப³பா⁴கே³. ஏத்தா²தி ‘‘அதி⁴சேதஸோ…பே… ஸிக்க²தோ’’தி வசனே. ‘‘தாதி³னோ’’திபத³ம் ‘‘முனினோ’’திபதே³ன யோஜேதப்³ப³ந்தி ஆஹ ‘‘தாதி³ஸஸ்ஸ கீ²ணாஸவமுனினோ’’தி. ஏத்தா²தி ‘‘ஸோகா ந ப⁴வந்தி தாதி³னோ’’தி வசனே. ராகா³த³யோ உபஸமேதீதி உபஸந்தோதி த³ஸ்ஸேதும் வுத்தம் ‘‘ராகா³தீ³ன’’ந்தி. ஸதி அஸ்ஸத்தீ²தி ஸதிமாதி கத்வா மந்துஸத்³தோ³ நிச்சயோக³த்தோ²தி ஆஹ ‘‘ஸதியா அவிரஹிதஸ்ஸா’’தி.

ந கஸீயதி ந விலேகீ²யதீதி அகாஸோ, ஸோயேவ ஆகாஸோ. அந்தரேன சி²த்³தே³ன இக்கி²தப்³போ³தி அந்தலிக்கோ². ஆகாஸோ ஹி சதுப்³பி³தோ⁴ அஜடாகாஸோ, கஸிணுக்³கா⁴டிமாகாஸோ, பரிச்சி²ன்னாகாஸோ, ரூபபரிச்சே²தா³காஸோதி. தத்த² அஜடாகாஸோவ இதா⁴தி⁴ப்பேதோ ‘‘அந்தலிக்கே²’’தி விஸேஸிதத்தா. தேனாஹ ‘‘ந கஸிணுக்³கா⁴டிமே, ந பன ரூபபரிச்சே²தே³’’தி. பரிச்சி²ன்னாகாஸோபி ரூபபரிச்சே²தா³காஸேன ஸங்க³ஹிதோ. ‘‘ம’’ந்தி பத³ம் ‘‘அவமஞ்ஞந்தீ’’தி பதே³ கம்மம். ஏத்தகமேவாதி ஏதப்பமாணம் ‘‘அதி⁴சேதஸோ’’திஆதி³ஸங்கா²தம் வசனமேவ, ந அஞ்ஞம் பு³த்³த⁴வசனந்தி அத்தோ². அயந்தி சூளபந்த²கோ தே²ரோ. ஹந்தா³தி வஸ்ஸக்³க³த்தே² நிபாதோ. மம ஆனுபா⁴வம் த³ஸ்ஸேமி, தும்ஹே பஸ்ஸத² க³ண்ஹதா²தி அதி⁴ப்பாயோ. வுட்டா²யாதி ததோ சதுத்த²ஜ்ஜா²னதோ வுட்ட²ஹித்வா. அந்தராபி தா⁴யதீதி ஏத்த² பிஸத்³த³ஸ்ஸ அட்டா²னத்த²ம் த³ஸ்ஸேந்தோ ஆஹ ‘‘அந்தரதா⁴யதிபீ’’தி. ஏஸேவ நயோ ‘‘ஸேய்யம்பி கப்பேதீ’’தி ஏத்த²பி. தே²ரோதி சூளபந்த²கோ தே²ரோ. இத³ம் பத³ம் அந்தரந்தரா யுத்தட்டா²னேஸு ஸம்ப³ந்தி⁴த்வா ‘‘தஞ்சேவ ப⁴ணதீ’’திஇமினா ஸம்ப³ந்தி⁴தப்³ப³ம். பா⁴துதே²ரஸ்ஸாதி ஜேட்ட²கபா⁴துபூ⁴தஸ்ஸ மஹாபந்த²கதே²ரஸ்ஸ.

பத்³மந்தி கா³தா²யம் தயோ பாதா³ இந்த³வஜிரா, சதுத்த²பாதோ³ உபேந்த³வஜிரோ. தஸ்மா பத்³மந்தி ஏத்த² மகாரே பரே து³காருகாரஸ்ஸ லோபம் கத்வா பரக்க²ரம் நேத்வா ‘‘பத்³ம’’ந்தி த்³விபா⁴வேன லிகி²தப்³ப³ம். அவீதக³ந்த⁴ந்தி ஏத்த² வீதி தீ³கு⁴ச்சாரணமேவ யுத்தம். பங்கே த³வதி க³ச்ச²தீதி பது³மம். கோகம் து³க்³க³ந்த⁴ஸ்ஸ ஆதா³னம் நுத³தி அபனேதீதி கோகனுத³ம். ஸுந்த³ரோ க³ந்தோ⁴ இமஸ்ஸாதி ஸுக³ந்த⁴ம். அயம் பனேத்த² யோஜனா – யதா² கோகனுத³ஸங்கா²தம் ஸுக³ந்த⁴ம் பாதோ பகே³வ பா³லாதபேன பு²ல்லம் விகஸிதம் அவீதக³ந்த⁴ம் ஹுத்வா விரோசமானம் பது³மம் ஸியா, ததா² அங்கீ³ரஸம் அங்கி³தோ ஸரீரதோ நிச்ச²ரணபப⁴ஸ்ஸரரஸம் ஹுத்வா விரோசமானபூ⁴தம் அந்தலிக்கே² தபந்தம் ஆதி³ச்சம் இவ தேதா⁴துகே தபந்தம் ஸம்மாஸம்பு³த்³த⁴ம் பஸ்ஸாதி.

பகு³ணந்தி வாசுக்³க³தம். ததோதி அஸக்குணேய்யதோ. நந்தி சூளபந்த²கம். தே²ரோதி மஹாபந்த²கோ தே²ரோ நிக்கட்³டா⁴பேஸீதி ஸம்ப³ந்தோ⁴. ஸோதி சூளபந்த²கோ. அதா²தி தஸ்மிம் காலே. ப⁴க³வா ஆஹாதி யோஜனா. பு³த்³த⁴சக்கு²னாதி ஆஸயானுஸயஇந்த்³ரியபரோபரியத்தஞாணஸங்கா²தேன ஸப்³ப³ஞ்ஞுபு³த்³தா⁴னம் சக்கு²னா. தந்தி சூளபந்த²கம். தஸ்ஸாதி சூளபந்த²கஸ்ஸ. அதா²தி தஸ்மிம் ஆரோசனகாலே. அஸ்ஸாதி சூளபந்த²கஸ்ஸ, த³த்வாதி ஸம்ப³ந்தோ⁴. ரஜம் மலம் ஹரதி அபனேதீதி ரஜோஹரணம், பிலோதிகக²ண்ட³ம். ஸோதி சூளபந்த²கோ. தஸ்ஸாதி பிலோதிகக²ண்ட³ஸ்ஸ, ‘‘அந்த’’ந்திபதே³ அவயவிஸம்ப³ந்தோ⁴. பரிஸுத்³த⁴ம்பீதி பிஸத்³தோ³ அபரிஸுத்³தே⁴ பிலோதிகக²ண்டே³ கா நாம கதா²தி த³ஸ்ஸேதி. ஸம்வேக³ந்தி ஸந்தாஸம் ப⁴யந்தி அத்தோ². அதா²தி தஸ்மிம் ஆரம்ப⁴காலே. அஸ்ஸாதி சூளபந்த²கஸ்ஸ. ‘‘த’’ந்திபத³ம் ‘‘மமாயனபா⁴வ’’ந்திபதே³ன ஸம்ப³ந்த⁴ம் கத்வா யோஜனா காதப்³பா³தி. து³தியம்.

3. பி⁴க்கு²னுபஸ்ஸயஸிக்கா²பத³ம்

162. ததியே ‘‘ஓவத³தி பாசித்தியஸ்ஸா’’தி ஸாமஞ்ஞதோ வுத்தேபி விஸேஸதோ அத்தோ² க³ஹேதப்³போ³தி ஆஹ ‘‘அட்ட²ஹி க³ருத⁴ம்மேஹி ஓவத³ந்தஸ்ஸேவ பாசித்திய’’ந்தி. இதோதி இமஸ்மா ஸிக்கா²பத³ம்ஹா. யத்த² யத்தா²தி யஸ்மிம் யஸ்மிம் ஸிக்கா²பதே³. ஸப்³ப³த்த² தத்த² தத்தா²தி யோஜனாதி. ததியம்.

பகிண்ணககதா²

ஏத்தா²தி இமஸ்மிம் ஸிக்கா²பதே³. இத³ம் பகிண்ணகம் வுத்தந்தி ஸம்ப³ந்தோ⁴. தீணி பாசித்தியானீதி பி⁴க்கு²னோ அஸம்மதத்தா ஏகம் பாசித்தியம், ஸூரியஸ்ஸ அத்த²ங்க³தத்தா ஏகம், பி⁴க்கு²னுபஸ்ஸயம் உபஸங்கமிதத்தா ஏகந்தி தீணி பாசித்தியானி. கத²ந்தி கேன காரணேன ஹோதீதி யோஜனா. தத்தா²தி பி⁴க்கு²னுபஸ்ஸயம். தஸ்ஸேவாதி ஸம்மதஸ்ஸேவ பி⁴க்கு²னோ. அஞ்ஞேன த⁴ம்மேனாதி க³ருத⁴ம்மேஹி அஞ்ஞேன த⁴ம்மேன. தி³வா பனாதி ஸூரியுக்³க³மனதோ தஸ்ஸ அனத்த²ங்க³தேயேவாதி.

4. ஆமிஸஸிக்கா²பத³ம்

164. சதுத்தே² ப³ஹும் மானம் கதம் யேஹீதி ப³ஹுகதா. ப³ஹுகதா ஹுத்வா ந ஓவத³ந்தீதி அத்த²ம் த³ஸ்ஸேந்தோ ஆஹ ‘‘ந ப³ஹுகதா’’திஆதி³. த⁴ம்மேதி ஸீலாதி³த⁴ம்மே. அதி⁴ப்பாயோதி ‘‘ந ப³ஹுகதா’’திபத³ஸ்ஸ, ச²ப்³ப³க்³கி³யானம் வா அதி⁴ப்பாயோதி யோஜனா. ‘‘கத்துகாமோதி ஆதீ³ன’’ந்திபத³ம் ‘‘அத்தோ²’’திபதே³ வாசகஸம்ப³ந்தோ⁴.

அஸம்மதோ நாம ட²பிதோ வேதி³தப்³போ³தி யோஜனா. ஸம்முதிந்தி பி⁴க்கு²னோவாத³கஸம்முதிம். பச்சா² ஸாமணேரபூ⁴மியம் டி²தோதி யோஜனாதி. சதுத்த²ம்.

5. சீவரதா³னஸிக்கா²பத³ம்

169. பஞ்சமே ரதி²காயாதி ரச்சா²ய. ஸா ஹி ரத²ஸ்ஸ ஹிதத்தா ரதி²காதி வுச்சதி. ஸந்தி³ட்டா²தி ஸமோதா⁴னவஸேன த³ஸ்ஸீயித்தா²தி ஸந்தி³ட்டா². தி³ட்ட²மத்தகா மித்தாதி ஆஹ ‘‘மித்தா’’தி. ஸேஸந்தி வுத்தவசனதோ ஸேஸம் வசனம். தத்ராதி சீவரபடிக்³க³ஹணஸிக்கா²பதே³. ஹீதி விஸேஸஜோதகம். இதா⁴தி இமஸ்மிம் சீவரதா³னஸிக்கா²பதே³தி. பஞ்சமம்.

6. சீவரஸிப்³ப³னஸிக்கா²பத³ம்

175. ச²ட்டே² உதா³யீதி ஏத்த² மஹாஉதா³யீ, காளுதா³யீ, லாளுதா³யீதி தயோ உதா³யீ ஹோந்தி. தேஸு ததியோவாதி⁴ப்பேதோதி ஆஹ ‘‘லாளுதா³யீ’’தி. பபா⁴வேன டா²தி பவத்ததீதி பட்டோ²தி கதே படிப³லோவ லப்³ப⁴தி. தேனாஹ ‘‘படிப³லோ’’தி. நிபுணோதி குஸலோ. ‘‘படிபா⁴னேன கதசித்த’’ந்திஇமினா ‘‘படிபா⁴னசித்த’’ந்தி பத³ஸ்ஸ மஜ்ஜே² பத³லோபம் த³ஸ்ஸேதி. ஸோதி லாளுதா³யீ அகாஸீதி ஸம்ப³ந்தோ⁴. தஸ்ஸாதி சீவரஸ்ஸ. ‘‘யதா²ஸம்ஹட’’ந்தி ஏத்த² ஏவஸத்³தோ³ அஜ்ஜா²ஹரிதப்³போ³தி ஆஹ ‘‘யதா²ஸம்ஹடமேவா’’தி.

176. யம் சீவரம் நிவாஸிதும் வா பாருபிதும் வா ஸக்கா ஹோதி, தம் சீவரம் நாமாதி யோஜனா. ஏவம் ஹீதி ஏவமேவ. ‘‘து³க்கட’’ந்திஇமினா ‘‘ஸயம் ஸிப்³ப³தி, ஆபத்தி பாசித்தியஸ்ஸா’’தி ஏத்த² அந்தராபத்திம் த³ஸ்ஸேதி. ஆராதி ஸூசி. ஸா ஹி அரதி நிஸ்ஸங்க³வஸேன க³ச்ச²தி பவிஸதீதி ‘‘ஆரா’’தி வுச்சதி, தஸ்ஸா பதோ² க³மனம் ஆராபதோ², தஸ்மிம், ஆராபத²ஸ்ஸ நீஹரணாவஸானத்தா ‘‘நீஹரணே’’தி வுத்தம். ஸதக்க²த்தும்பீதி அனேகக்க²த்தும்பி. ஆணத்தோதி ஆணாபீயதீதி ஆணத்தோ. ‘‘ஆணாபிதோ’’தி வத்தப்³பே³ ணாபேஸத்³த³ஸ்ஸ லோபம், இகாரஸ்ஸ ச அகாரம் கத்வா, ‘‘ஆத³த்தே’’தி ஆக்²யாதபதே³ தேவிப⁴த்தியா விய தபச்சயஸ்ஸ ச த்³விபா⁴வம் கத்வா ஏவம் வுத்தம். தேனாஹ ‘‘ஸகிம் சீவரம் ஸிப்³பா³தி வுத்தோ’’தி. அத² பனாதி ததோ அஞ்ஞதா² பன. ஆணத்தஸ்ஸாதி ஆணாபிதஸ்ஸ. ஸம்ப³ஹுலானிபி பாசித்தியானி ஹோந்தீதி ஸம்ப³ந்தோ⁴.

யேபி நிஸ்ஸிதகா ஸிப்³ப³ந்தீதி யோஜனா, ஆசரியுபஜ்ஜா²யேஸு ஸிப்³ப³ந்தேஸூதி ஸம்ப³ந்தோ⁴. தேஸந்தி ஆசரியுபஜ்ஜா²யானம். தேஸம்பீதி நிஸ்ஸிதகானம்பி. ஞாதிகானம் பி⁴க்கு²னீனம் சீவரந்தி ஸம்ப³ந்தோ⁴. ‘‘அந்தேவாஸிகேஹீ’’திபத³ம் ‘‘ஸிப்³பா³பேந்தீ’’திபதே³ காரிதகம்மம். தத்ராபீதி ஆசரியுபஜ்ஜா²யேஹி ஸிப்³பா³பனேபி. ‘‘அந்தேவாஸிகே’’திபத³ம் ‘‘வஞ்சேத்வா’’திபதே³ ஸுத்³த⁴கம்மம், ‘‘ஸிப்³பா³பேந்தீ’’திபதே³ காரிதகம்மம். இதரேஸந்தி ஆசரியுபஜ்ஜா²யானந்தி. ச²ட்ட²ம்.

7. ஸம்விதா⁴னஸிக்கா²பத³ம்

181. ஸத்தமே ‘‘தாஸம் பி⁴க்கு²னீனம் பச்சா² க³ச்ச²ந்தீன’’ந்தி பதா³னி ‘‘பத்தசீவர’’ந்தி பாட²ஸேஸேன யோஜேதப்³பா³னீதி ஆஹ ‘‘பச்சா² க³ச்ச²ந்தீனம் பத்தசீவர’’ந்தி. தா பி⁴க்கு²னியோ பச்சா² க³ச்ச²ந்தியோதி விப⁴த்திவிபல்லாஸம் கத்வா ‘‘தூ³ஸேஸு’’ந்திபதே³ன யோஜேதப்³பா³னீதி ஆஹ ‘‘தா பி⁴க்கு²னியோ சோரா தூ³ஸயிம்ஸூ’’தி. அத² வா விப⁴த்திவிபல்லாஸமகத்வா ‘‘அச்சி²ந்தி³ம்ஸூ’’தி பதே³ ‘‘பத்தசீவர’’ந்திபத³ம் அஜ்ஜா²ஹரித்வா ‘‘தூ³ஸேஸு’’ந்திபதே³ ‘‘ஸீல’’ந்தி பாட²ம் அஜ்ஜா²ஹரித்வா யோஜேதப்³ப³ந்தி த³ட்ட²ப்³ப³ம்.

182-3. ஸம்புப்³போ³, விபுப்³போ³ ச தா⁴தா⁴து த்வாபச்சயோ ஹோதீதி ஆஹ ‘‘ஸம்வித³ஹித்வா’’தி. குக்குடோதி தம்ப³சூளோ. ஸோ ஹி குகதி ஆஹாரத்த²ம் பாணகாத³யோ ஆத³தா³தீதி குக்குடோ. அயந்தி கா³மோ. அதி⁴கரணே ணோதி ஆஹ ‘‘ஸம்பத³ந்தி ஏத்தா²’’தி. ஏத்தா²தி ச ஏதஸ்மிம் கா³மே. உத்தரபத³ஸ்ஸ அதி⁴கரணத்த²த்தா புப்³ப³பதே³ன ச²ட்டீ²ஸமாஸோதி ஆஹ ‘‘குக்குடான’’ந்திஆதி³. ஏவம் ணஸத்³த³ஸ்ஸ அதி⁴கரணத்த²ம், புப்³ப³பதே³ன ச²ட்டீ²ஸமாஸஞ்ச த³ஸ்ஸேத்வா இதா³னி ணஸத்³த³ஸ்ஸ பா⁴வத்த²ம், புப்³ப³பதே³ன பா³ஹிரத்த²ஸமாஸஞ்ச த³ஸ்ஸேதும் வுத்தம் ‘‘அத² வா’’தி. தத்தா²தி பச்சி²மபாடே². உப்பதித்வாதி உட்³டி³த்வா உத்³த⁴ம் ஆகாஸம் லங்கி³த்வாதி அத்தோ². ஏத்தா²தி பச்சி²மபாடே². த்³விதா⁴தி பத³க³மனபக்க²க³மனவஸேன த்³விபகாரேன. ‘‘உபசாரோ ந லப்³ப⁴தீ’’திஇமினா கா³மந்தரோ ந ஹோதி, ஏககா³மோயேவ பன ஹோதி, தஸ்மா ஆபத்திபி ஏகாயேவ ஹோதீதி த³ஸ்ஸேதி. பச்சூஸேதி பபா⁴தே. ஸோ ஹி படிவிருத்³த⁴ம் திமிரம் உஸேதி நாஸேதீதி பச்சூஸோதி வுச்சதி. வஸ்ஸந்தஸ்ஸாதி ரவந்தஸ்ஸ. ‘‘வசனதோ’’திபத³ம் ‘‘ஆபத்தியேவா’’திபதே³ ஞாபகஹேது. ரதனமத்தந்தரோதி குக்குபமாணேன ப்³யவதா⁴னோ.

தத்ராதி ‘‘கா³மந்தரே கா³மந்தரே’’தி வசனே. ஹீதி வித்தா²ரோ. உபோ⁴பீதி பி⁴க்கு²பி⁴க்கு²னியோபி ஸம்வித³ஹந்தீதி ஸம்ப³ந்தோ⁴. ந வத³ந்தீதி அட்ட²கதா²சரியா ந கத²யந்தி. சதுன்னம் மக்³கா³னம் ஸமாக³மட்டா²னம் சதுக்கம், த்³வின்னம், திண்ணம், சதுக்கதோ அதிரேகானம் வா மக்³கா³னம் ஸம்ப³த்³த⁴ட்டா²னம் ஸிங்கா⁴டகம். தத்ராபீதி உபசாரோக்கமனேபி. கா³மதோதி அத்தனோ கா³மதோ. யாவ ந ஓக்கமந்தி, தாவாதி யோஜனா. ஸந்தா⁴யாதி ஆரப்³ப⁴. அதா²தி தஸ்மிம் நிக்க²மனகாலே. த்³வேபீதி பி⁴க்கு²பி⁴க்கு²னியோபி க³ச்ச²ந்தீதி ஸம்ப³ந்தோ⁴. தந்தி வசனம்.

ஹீதி விஸேஸோ. ‘‘கா³மந்தரே கா³மந்தரே’’தி புரிமஸ்மிம் நயே அதிக்கமே அனாபத்தி, ஓக்கமனே ஆபத்தீதி அயம் விஸேஸோ.

184. க³தபுப்³ப³த்தா²தி க³தபுப்³பா³ அத்த² ப⁴வதா²தி அத்தோ². ஏஹி க³ச்சா²மாதி வா ஆக³ச்சே²ய்யாஸீதி வா வத³தீதி யோஜனா. சேதியவந்த³னத்த²ந்தி தூ²பஸ்ஸ வந்தி³தும்.

185. விஸங்கேதேனாதி ஏத்த² காலவிஸங்கேதோ, த்³வாரவிஸங்கேதோ, மக்³க³விஸங்கேதோதி திவிதோ⁴. தத்த² காலவிஸங்கேதேனேவ அனாபத்திம் ஸந்தா⁴ய ‘‘விஸங்கேதேன க³ச்ச²ந்தி, அனாபத்தீ’’தி ஆஹ. த்³வாரவிஸங்கேதேன வா மக்³க³விஸங்கேதேன வா ஆபத்திமோக்கோ² நத்தி². தமத்த²ம் த³ஸ்ஸேந்தோ ஆஹ ‘‘புரேப⁴த்த’’ந்திஆதி³. சக்கஸமாருள்ஹாதி இரியாபத²சக்கம் வா ஸகடசக்கம் வா ஸம்மா ஆருள்ஹா. ஜனபதா³தி ஜனகோட்டா²ஸா. பரியாயந்தீதி பரி புனப்புனம் யந்தி ச ஆயந்தி சாதி. ஸத்தமம்.

8. நாவாபி⁴ருஹனஸிக்கா²பத³ம்

188. அட்ட²மே ஸஹ அஞ்ஞமஞ்ஞம் த²வனம் அபி⁴த்த²வனம் ஸந்த²வோ, ஸங்க³மோதி வுத்தம் ஹோதி. மித்தபா⁴வேன ஸந்த²வோ மித்தஸந்த²வோ, லோகேஹி அஸ்ஸாதே³தப்³போ³ ச ஸோ மித்தஸந்த²வோ சேதி லோகஸ்ஸாத³மித்தஸந்த²வோ, தஸ்ஸ வஸோ பபூ⁴, தேன வா ஆயத்தோதி லோகஸ்ஸாத³மித்தஸந்த²வவஸோ, தேன. உத்³த⁴ம் க³ச்ச²தீதி உத்³த⁴ம்கா³மினீதி த³ஸ்ஸேந்தோ ஆஹ ‘‘உத்³த⁴’’ந்திஆதி³. உத்³த⁴ந்தி ச இத⁴ படிஸோதோ. தேனாஹ ‘‘நதி³யா படிஸோத’’ந்தி. ‘‘உத்³த⁴ம்கா³மினி’’ந்திமாதிகாபத³ம் ‘‘உஜ்ஜவனிகாயா’’திபத³பா⁴ஜனியா ஸம்ஸந்தே³ந்தோ ஆஹ ‘‘யஸ்மா பனா’’திஆதி³. யோதி பி⁴க்கு². உத்³த⁴ம் ஜவனதோதி படிஸோதம் க³மனதோ. தேனாதி தேன ஹேதுனா. அஸ்ஸாதி ‘‘உத்³த⁴ம்கா³மினி’’ந்திபத³ஸ்ஸ. அனுஸோதம் இத⁴ அதோ⁴ நாமாதி ஆஹ ‘‘அனுஸோத’’ந்தி. அஸ்ஸபீதி பிஸத்³தோ³ புரிமாபேக்கோ². தத்தா²தி ‘‘உத்³த⁴ம்கா³மினிம் வா அதோ⁴கா³மினிம் வா’’திவசனே. யந்தி நாவம் ஹரந்தீதி ஸம்ப³ந்தோ⁴. ஸம்படிபாத³னத்த²ந்தி ஸம்மா படிமுக²ம் பாத³னத்த²ம், உஜுபஜ்ஜாபனத்த²ந்தி அத்தோ². ஏத்தா²தி நாவாயம். ‘‘ட²பேத்வா’’திபத³பா⁴ஜனிமபேக்கி²த்வா ‘‘உபயோக³த்தே² நிஸ்ஸக்கவசன’’ந்தி ஆஹ. ‘‘அஞ்ஞத்ரா’’தி மாதிகாபதே³ அபேக்கி²தே நிஸ்ஸக்கத்தே² நிஸ்ஸக்கவசனம்பி யுஜ்ஜதேவ.

189. ஏகம் தீரம் அகா³மகம் அரஞ்ஞம் ஹோதீதி யோஜனா. அத்³த⁴யோஜனக³ணனாய பாசித்தியானி ஹோந்தீதி ஸம்ப³ந்தோ⁴. மஜ்ஜே²ன க³மனேபீதி பிஸத்³தோ³ அகா³மகஅரஞ்ஞதீரபஸ்ஸேன க³மனே கா நாம கதா²தி த³ஸ்ஸேதி. ந கேவலம் நதி³யாதி கேவலம் நதி³யா ஏவ அனாபத்தி நாதி யோஜனா, அஞ்ஞேஸுபி ஸமுத்³தா³தீ³ஸு அனாபத்தீதி அதி⁴ப்பாயோ. யோபி பி⁴க்கு² க³ச்ச²தீதி ஸம்ப³ந்தோ⁴. ஹீதி ஸச்சம், யஸ்மா வா.

191. காலவிஸங்கேதோ, தித்த²விஸங்கேதோ, நாவாவிஸங்கேதோதி திவிதோ⁴ விஸங்கேதோ. தத்த² காலவிஸங்கேதேன அனாபத்திம் ஸந்தா⁴ய ‘‘விஸங்கேதேன அபி⁴ருஹந்தீ’’தி வுத்தம். அஞ்ஞேன விஸங்கேதேன ஆபத்தியேவ, தமத்த²ம் த³ஸ்ஸேந்தோ ஆஹ ‘‘இதா⁴பீ’’திஆதீ³தி. அட்ட²மம்.

9. பரிபாசிதஸிக்கா²பத³ம்

192. நவமே மஹானாகே³ஸூதி மஹாஅரஹந்தேஸு திட்ட²மானேஸு ஸந்தேஸு, சேதகே பேஸ்ஸபூ⁴தே நவகே பி⁴க்கூ² நிமந்தேதீதி அதி⁴ப்பாயோ. இதரதா²தி விப⁴த்திவிபல்லாஸதோ வா பாட²ஸேஸதோ வா அஞ்ஞேன பகாரேன. அந்தரம் மஜ்ஜ²ம் பத்தா கதா² அந்தரகதா²தி த³ஸ்ஸேந்தோ ஆஹ ‘‘அவஸான’’ந்திஆதி³. பகிரீயித்தா²தி பகதா, ந பகதா விப்பகதாதி வுத்தே கரியமானகதா²வாதி ஆஹ ‘‘கரியமானா ஹோதீ’’தி. அத்³த⁴ச்சி²கேனாதி உபட்³ட⁴சக்கு²னா. தேஹீதி தே²ரேஹி.

194. லத்³த⁴ப்³ப³ந்தி லத்³தா⁴ரஹம். அஸ்ஸாதி ‘‘பி⁴க்கு²னிபரிபாசித’’ந்திபத³ஸ்ஸ. ஸம்மா ஆரபி⁴தப்³போ³தி ஸமாரம்போ⁴தி த³ஸ்ஸேந்தோ ஆஹ ‘‘ஸமாரத்³த⁴ம் வுச்சதீ’’தி. படியாதி³தஸ்ஸாதி பரிபாசிதஸ்ஸ ப⁴த்தஸ்ஸ. கி³ஹீனம் ஸமாரம்போ⁴தி கி³ஹிஸமாரம்போ⁴, கத்வத்தே² சேதம் ஸாமிவசனம். ததோதி ததோ ப⁴த்ததோ. அஞ்ஞத்ராதி வினா. தமத்த²ம் விவரந்தோ ஆஹ ‘‘தம் பிண்ட³பாதம் ட²பேத்வா’’தி. பத³பா⁴ஜனே பன வுத்தந்தி ஸம்ப³ந்தோ⁴. ‘‘ஞாதகபவாரிதேஹீ’’திபத³ம் ‘‘அஸமாரத்³தோ⁴’’திபதே³ கத்தா. அத்த²தோதி பி⁴க்கு²னிஅபரிபாசிதஅத்த²தோ. தஸ்மாதி யஸ்மா அத்த²தோ ஸமாரத்³தோ⁴வ ஹோதி, தஸ்மா.

195. படியாதி³தந்தி படியத்தம். பகதியா படியத்தம் பகதிபடியத்தந்தி த³ஸ்ஸேந்தோ ஆஹ ‘‘பகதியா’’திஆதி³. மஹாபச்சரியம் பன வுத்தந்தி ஸம்ப³ந்தோ⁴. தஸ்ஸாதி தஸ்ஸேவ பி⁴க்கு²னோ. அஞ்ஞஸ்ஸாதி ததோ அஞ்ஞஸ்ஸ பி⁴க்கு²னோ.

197. பி⁴க்கு²னிபரிபாசிதேபீதி பிஸத்³தோ³ பி⁴க்கு²னிஅபரிபாசிதே கா நாம கதா²தி த³ஸ்ஸேதீதி. நவமம்.

10. ரஹோனிஸஜ்ஜஸிக்கா²பத³ம்

198. த³ஸமே பாளிஅத்தோ² சாதி ஏத்த² பாளிஸத்³தோ³ வினிச்சி²யஸத்³தே³ ச யோஜேதப்³போ³ ‘‘பாளிவினிச்ச²யோ’’தி. ஹீதி ஸச்சம், யஸ்மா வா. ‘‘இத³ம் ஸிக்கா²பத³’’ந்திபத³ம் ‘‘ஏகபரிச்சே²த³’’ந்திபதே³ துல்யத்த²கத்தா, ‘‘பஞ்ஞத்த’’ந்திபதே³ கம்மம். உபரீதி அசேலகவக்³கே³தி. த³ஸமம்.

ஓவாத³வக்³கோ³ ததியோ.