1. பரிமண்ட³லவக்³க³-அத்த²யோஜனா

ஸிக்கி²தஸிக்கே²ன தீஸு ஸிக்கா²ஸு சதூஹி மக்³கே³ஹி ஸிக்கி²தஸிக்கே²ன தாதி³னா அட்ட²ஹி லோகத⁴ம்மேஹி அகம்பியட்டே²ன தாதி³னா, இட்டா²னிட்டே²ஸு வா அவிகாரட்டே²ன தாதி³னா ப⁴க³வதா யானி ஸிக்கா²பதா³னி ‘‘ஸேகி²யானீ’’தி பா⁴ஸிதானி, தா³னி தேஸம்பி ஸிக்கா²பதா³னம் அயம்பி வண்ணனாக்கமோ ப⁴வதீதி யோஜனா.

576. தத்தா²தி ஸேகி²யஸிக்கா²பதே³ஸு, அத்தோ² ஏவம் வேதி³தப்³போ³தி யோஜனா. ‘‘ஸமந்ததோ’’திஇமினா பரித்யூபஸக்³க³ஸ்ஸத்த²ம் த³ஸ்ஸேதி. ‘‘நாபி⁴மண்ட³லம் ஜாணுமண்ட³ல’’ந்தி ஏத்த² உத்³த⁴ம்ஸத்³தோ³ ச அதோ⁴ஸத்³தோ³ ச அஜ்ஜா²ஹரிதப்³போ³தி ஆஹ ‘‘உத்³த⁴’’ந்திஆதி³. அட்ட²ங்கு³லமத்தந்தி பா⁴வனபும்ஸகம், நிவாஸேதப்³ப³ந்தி ஸம்ப³ந்தோ⁴. ததோதி அட்ட²ங்கு³லமத்ததோ. யதா² படிச்ச²ன்னம் ஹோதி, ஏவம் நிவாஸேந்தஸ்ஸாதி யோஜனா. தத்ரித³ம் பமாணந்தி தஸ்ஸ நிவாஸனஸ்ஸ இத³ம் பமாணம். தாதி³ஸஸ்ஸாதி தீ³க⁴தோ முட்டி²பஞ்சகஸ்ஸ திரியம் அட்³ட⁴தேய்யஹத்த²ஸ்ஸ நிவாஸனஸ்ஸ. ஜாணுமண்ட³லம் படிச்சா²த³னத்த²ம் வட்டதீதி யோஜனா. தத்தா²தி சீவரேஸு. ந திட்ட²தீதி விரளத்தா ந திட்ட²தி. திட்ட²தீதி க⁴னத்தா திட்ட²தி.

நிவாஸேந்தஸ்ஸ சாதிஏத்த² சஸத்³தோ³ அவதா⁴ரணத்தோ², நிவாஸேந்தஸ்ஸேவாதி அத்தோ². கேவலம் ஏவம் நிவாஸேந்தஸ்ஸேவ து³க்கடம் ந ஹோதி, அத² கோ² ததா² நிவாஸேந்தஸ்ஸாபி து³க்கடமேவாதி யோஜனா. யே பன நிவாஸனதோ³ஸாதி ஸம்ப³ந்தோ⁴. அஞ்ஞேதி புரதோ ச பச்ச²தோ ச ஓலம்பே³த்வா நிவஸனதோ அஞ்ஞே. தே ஸப்³பே³தி ஸப்³பே³ தே நிவாஸனதோ³ஸா. ஏத்தா²தி இமஸ்மிம் விப⁴ங்கே³. தத்தே²வாதி க²ந்த⁴கேயேவ.

அஸஞ்சிச்ச நிவாஸேந்தஸ்ஸ அனாபத்தீதி ஸம்ப³ந்தோ⁴. ஏஸேவ நயோ ‘‘அஸதியா’’தி ஏத்தா²பி. அஜானந்தஸ்ஸாதி ஏத்த² அஜானனம் து³வித⁴ம் நிவாஸனவத்தஸ்ஸ அஜானனம், ஆரூள்ஹோரூள்ஹபா⁴வஸ்ஸ அஜானனந்தி. தத்த² ஆரூள்ஹோரூள்ஹபா⁴வஸ்ஸ அஜானனம் ஸந்தா⁴ய வுத்தம் ‘‘அஜானந்தஸ்ஸா’’தி த³ஸ்ஸேந்தோ ஆஹ ‘‘அஜானந்தஸ்ஸாதி ஏத்தா²’’திஆதி³. ஹீதி ஸச்சம். தஸ்ஸாதி நிவாஸனவத்தஸ்ஸ. அஸ்ஸாதி பி⁴க்கு²னோ. தம் பனாதி ஆபத்திதோ அமோக்க²னம் பன. தஸ்மாதி யஸ்மா யுஜ்ஜதி, தஸ்மா. யோதி பி⁴க்கு². குருந்தி³யம் வுத்தந்தி ஸம்ப³ந்தோ⁴. ஸுக்கா² ஜங்கா⁴ இமஸ்ஸாதி ஸுக்க²ஜங்கோ⁴. மஹந்தம் பிண்டி³கமம்ஸம் இமஸ்ஸாதி மஹாபிண்டி³கமம்ஸோ. தஸ்ஸாதி பி⁴க்கு²ஸ்ஸ.

வணோதி அரு. தஞ்ஹி வணதி க³த்தவிசுண்ணனம் கரோதீதி வணோதி வுச்சதி. வாளமிகா³ வா சோரா வாதி ஏத்த² வாஸத்³தோ³ அவுத்தஸம்பிண்ட³னத்தோ², தேன அஞ்ஞாபி உத³கசிக்க²ல்லாத³யோ ஆபதா³ ஸங்க³ய்ஹந்தி.

577. இதா⁴தி இமஸ்மிம் விப⁴ங்கே³, ஸிக்கா²பதே³ வா. உபோ⁴ கண்ணேதி புரதோ ச பச்ச²தோ ச நிக்³க³தே த்³வே கண்ணே. அவிஸேஸேனாதி ‘‘அந்தரக⁴ரே’’தி ச ‘‘ஆராமே’’தி ச விஸேஸம் அகத்வா ஸாமஞ்ஞேன. விஹாரேபீதி ஸங்க⁴ஸன்னிபாதபு³த்³து⁴பட்டா²னதே²ருபட்டா²னாதி³காலம் ஸந்தா⁴ய வுத்தம்.

578. காயேகதே³ஸே காயஸத்³தோ³ வத்ததீதி ஆஹ ‘‘ஜாணும்பி உரம்பீ’’தி. ‘‘ந ஸீஸம் பாருதேனா’’திஇமினா ‘‘ஸுப்படிச்ச²ன்னேனா’’திபத³ஸ்ஸ அதிப்³யாபிததோ³ஸம் படிக்கி²பதி. க³ண்டி²கந்தி பாஸோ. ஸோ ஹி க³ந்தே²தி ப³ந்த⁴தீதி வா, க³ந்தே²தி ப³ந்த⁴தி ஏத்தா²தி வா கத்வா க³ந்தி²கோதி வுச்சதி. ந்த²காரஸ்ஸ வாண்ட²காரே கதே க³ண்டி²கோ, தம் க³ண்டி²கம் படிமுஞ்சித்வா. உபோ⁴ கண்ணேதி சீவரஸ்ஸ த்³வே கோணே. க³லவாடகதோதி ஏத்த² க³லோதி கண்டோ². ஸோ ஹி க²ஜ்ஜபோ⁴ஜ்ஜலேய்யபேய்யஸங்கா²தம் சதுப்³பி³த⁴ம் அஸனம் க³லதி பன்னோ ஹுத்வா குச்சி²யம் பததி இதோதி க³லோதி வுச்சதி. ஆவாடோயேவ கு²த்³த³கட்டே²ன ஆவாடகோ, கு²த்³த³கத்தே² கோ. க³லே டி²தோ ஆவாடகோ க³லவாடகோ. அகாரதோ ஹி ஆகாரஸ்ஸ லோபோ ‘‘பப’’ந்திஆதீ³ஸு (ஜா. 1.1.2) விய. ஏத்த² ஹி பஆபந்தி பத³ச்சே²தோ³, அகாரதோ ஆகாரஸ்ஸ ச லோபோ. பவத்³த⁴ம் ஆபம் பபம், மஹந்தம் உத³கந்தி அத்தோ². ஸீஸம் விவரித்வாதி ஸம்ப³ந்தோ⁴.

579. வாஸம் உபக³தோதி வா வாஸேன உபக³தோதி வா அத்த²ம் படிக்கி²பந்தோ ஆஹ ‘‘வாஸத்தா²ய உபக³தஸ்ஸா’’தி.

580. ஹத்த²பாதே³ அகீளந்தோ ஸுஸம்வுதோ நாமாதி த³ஸ்ஸேந்தோ ஆஹ ‘‘ஹத்த²ம் வா பாத³ம் வா அகீளாபேந்தோ’’தி.

582. ஓக்கி²த்தசக்கூ²தி ஏத்த² ஓஸத்³தோ³ ஹேட்டா²பரியாயோதி ஆஹ ‘‘ஹேட்டா² கி²த்தசக்கூ²’’தி. ‘‘ஹுத்வா’’திஇமினா கிரியாவிஸேஸனபா⁴வம் த³ஸ்ஸேதி. யுக³யுத்தகோதி யுகே³ யுத்தகோ. த³மியித்தா²தி த³ந்தோ. ஆபு⁴ஸோ ஜானாதி காரணாகாரணந்தி ஆஜானேய்யோ. ஏத்தகந்தி சதுஹத்த²பமாணம். யோ க³ச்ச²தி, அஸ்ஸ பி⁴க்கு²னோ து³க்கடா ஆபத்தி ஹோதீதி யோஜனா. ‘‘பரிஸ்ஸயபா⁴வ’’ந்தி ச ‘‘பரிஸ்ஸயாபா⁴வ’’ந்தி ச த்³வே பாடா² யுஜ்ஜந்தியேவ.

584. இத்த²ம்பூ⁴தலக்க²ணேதி இமம் பகாரம் இத்த²ம் சீவருக்கி²பனம், ப⁴வதி க³ச்ச²தீதி பூ⁴தோ, பி⁴க்கு². லக்கீ²யதி அனேனாதி லக்க²ணம், சீவரம். இத்த²ம் பூ⁴தோ இத்த²ம்பூ⁴தோ, தஸ்ஸ லக்க²ணம் இத்த²ம்பூ⁴தலக்க²ணம், தஸ்மிம். கரணவசனம் த³ட்ட²ப்³ப³ந்தி யோஜனா. இத்த²ம்பூ⁴தலக்க²ணம் நாம கிரியாவிஸேஸனஸ்ஸ ஸபா⁴வோதி ஆஹ ‘‘ஏகதோ வா…பே… ஹுத்வாதி அத்தோ²’’தி. அந்தோஇந்த³கீ²லதோதி கா³மஸ்ஸ அந்தோஇந்த³கீ²லதோதி. பட²மோ வக்³கோ³.