4. சதுத்த²பாடிதே³ஸனீயஸிக்கா²பத³ம்

570. சதுத்தே² அவருத்³த⁴ஸத்³தோ³ பரிருத்³த⁴ஸத்³த³ஸ்ஸ பரியாயோதி ஆஹ ‘‘பரிருத்³தா⁴ ஹோந்தீ’’தி. ஆரஞ்ஞகஸ்ஸ ஸேனாஸனஸ்ஸ பரிஸமந்ததோ ருத்³தா⁴ ஆவுதா ஹோந்தீதி அத்தோ².

573. ‘‘பஞ்சன்ன’’ந்தி நித்³தா⁴ரணே ஸாமிவசனபா⁴வஞ்ச ‘‘யம்கிஞ்சீ’’தி நித்³தா⁴ரணீயேன ஸம்ப³ந்தி⁴தப்³ப³பா⁴வஞ்ச த³ஸ்ஸேதும் வுத்தம் ‘‘பஞ்சஸு ஸஹத⁴ம்மிகேஸு யம் கிஞ்சீ’’தி. ‘‘பேஸேத்வா கா²த³னீயம் போ⁴ஜனீயம் ஆஹரிஸ்ஸாமீ’’திஇமினா படிஸம்விதி³தாகாரத³ஸ்ஸனம். ‘‘ஆராம’’ந்தி ஸாமஞ்ஞதோ வுத்தேபி ஆரஞ்ஞகஸேனாஸனஸ்ஸ ஆராமோ ஏவ அதி⁴ப்பேதோதி ஆஹ ‘‘ஆரஞ்ஞகஸேனாஸனாராமஞ்சா’’தி. தஸ்ஸாதி ஆரஞ்ஞகஸேனாஸனாராமஸ்ஸ. ‘‘கஸ்மா’’தி புச்சா²ய ‘‘படிமோசனத்த²’’ந்தி விஸஜ்ஜனாய ஸமேதும் ஸம்பதா³னத்தே² நிஸ்ஸக்கவசனம் காதப்³ப³ம். கிமத்த²ந்தி ஹி அத்தோ². படிமோசனத்த²ந்தி தத³த்தே² பச்சத்தவசனம். படிமோசனஸங்கா²தாய அத்தா²யாதி ஹி அத்தோ². அத்த²ஸத்³தோ³ ச பயோஜனவாசகோ. பயோஜனாயாதி ஹி அத்தோ². அத² வா ‘‘படிமோசனத்த²’’ந்தி விஸஜ்ஜனாயம். ‘‘கஸ்மா’’தி புச்சா²ய ஸமேதும் நிஸ்ஸக்கத்தே² பச்சத்தவசனம் காதப்³ப³ம். படிமோசனஸங்கா²தா அத்தா²தி ஹி அத்தோ². அத்த²ஸத்³தோ³ ச காரணவாசகோ. காரணாதி ஹி அத்தோ². ஏவஞ்ஹி புச்சா²விஸஜ்ஜனானம் புப்³பா³பரஸமஸங்கா²தோ விசயோ ஹாரோ பரிபுண்ணோ ஹோதீதி த³ட்ட²ப்³ப³ம். அம்ஹாகந்தி கா²த³னீயபோ⁴ஜனீயபடிஹரந்தானம் அம்ஹாகம். அம்ஹேதி சோரஸங்கா²தே அம்ஹே.

‘‘தஸ்ஸா’’தி பத³ஸ்ஸத்த²ம் த³ஸ்ஸேதும் வுத்தம் ‘‘ஏதிஸ்ஸா யாகு³யா’’தி. அஞ்ஞானிபீதி படிஸம்விதி³தகுலதோ அஞ்ஞானிபி குலானி. தேனாதி படிஸம்விதி³தகுலேன. குருந்தி³வாதே³ யாகு³யா படிஸம்விதி³தம் கத்வா யாகு³ம் அக்³க³ஹேத்வா பூவாதீ³னி ஆஹரந்தி, வட்டதீதி அதி⁴ப்பாயோ.

575. ஏகஸ்ஸாதி பி⁴க்கு²ஸ்ஸ. தஸ்ஸாதி படிஸம்விதி³தபி⁴க்கு²ஸ்ஸ, சதுன்னம் வா பஞ்சன்னம் வா பி⁴க்கூ²னம் அத்தா²யாதி யோஜனா. அஞ்ஞேஸம்பீதி சதுபஞ்சபி⁴க்கு²தோ அஞ்ஞேஸம்பி. அதி⁴கமேவாதி பரிபு⁴த்ததோ அதிரேகமேவ. யம் பனாதி கா²த³னீயபோ⁴ஜனீயம் பன, யம்பி கா²த³னீயபோ⁴ஜனீயம் வனதோ ஆஹரித்வா தே³ந்தீதி யோஜனா. ‘‘தத்த²ஜாதக’’ந்தி ஏத்த² தஸத்³த³ஸ்ஸ விஸயம் த³ஸ்ஸேதும் வுத்தம் ‘‘ஆராமே’’தி. அஞ்ஞேன தி³ன்னந்தி ஸம்ப³ந்தோ⁴. நந்தி மூலகா²த³னீயாதி³ம். படிஸம்விதி³தந்தி படிகச்சேவ ஸுட்டு² ஜானாபிதந்தி அத்தோ²தி. சதுத்த²ம்.

இதி ஸமந்தபாஸாதி³காய வினயஸம்வண்ணனாய

பாடிதே³ஸனீயவண்ணனாய

யோஜனா ஸமத்தா.