4. கோ⁴டமுக²ஸுத்தவண்ணனா

412. கே²மியா நாம ரஞ்ஞோ தே³வியா ரோபிதத்தா தம் அம்ப³வனம் கே²மியம்ப³வனந்தி வுச்சதீதி வத³ந்தி. த⁴ம்மிகோதி த⁴ம்மயுத்தோ ஸப்³ப³ஸோவ அத⁴ம்மம் பஹாய த⁴ம்மே டி²தோ. பரிப்³ப³ஜதி பப்³ப³ஜதி ஏதேனாதி பரிப்³ப³ஜோ, க⁴ராவாஸதோ நிக்க²மனபுப்³ப³கம் லிங்க³க்³க³ஹணவஸேன ஸீலஸமாதா³னம். ஏத்தா²தி ஏதஸ்மிம் பரிப்³ப³ஜே. ஸபா⁴வோதி தம் பரிப்³பா³ஜனியம், தேஹி தேஹி பரிப்³பா³ஜகேஹி அனுட்டா²தப்³போ³ படிபத்தித⁴ம்மஸங்கா²தோ ஸபா⁴வோ. த⁴ம்மோவ பமாணந்தி ஏதேன மயம் அஹிரிமனா சித்தஸ்ஸ யதா²உபட்டி²தம் கதே²ம, தஸ்மா தம் அப்பமாணம், யோ பனேத்த² அவிததோ² த⁴ம்மோ, ததே³வ பமாணம். அதி⁴க³தபடிபத்திஸங்கா²தோ ஸபா⁴வோ அத்தி², தஸ்ஸ தும்ஹேஹி தும்ஹேஹி ப³ஹுனா நானாஸந்த³ஸ்ஸனாதி³ கம்மேன இத⁴ ப⁴விதப்³ப³ம், ப³ஹுதே³வேத்த² வத்தப்³ப³ந்தி அதி⁴ப்பாயோ.

414. ஸாரத்தரத்தாதி ஸாரஜ்ஜனவஸேன ரத்தா, ப³ஹுலராக³வஸேன அபி⁴ரத்தாதி அத்தோ². அத்தனா ஞாபேதப்³ப³மத்த²ம் அனுக்³க³ஹாபேதி போ³தே⁴தீதி அனுக்³க³ஹோ, ஞாபிதகாரணம், ஸஹ அனுக்³க³ஹேனாதி ஸானுக்³க³ஹா. தேனாஹ ‘‘ஸகாரணா’’தி. கிம் பன தம் காரணம்? இமஸ்ஸாதி⁴ப்பாயோ ‘‘நத்தி² த⁴ம்மிகோ பரிப்³ப³ஜோ’’தி மயா வுத்தோ, அத்³தா⁴ பனாயஸ்மா உதே³னோ யாதா²வதோ த⁴ம்மிகம் பரிப்³ப³ஜம் மே ஆசிக்க²தீதி. தேனாஹ ‘‘வுத்தஞ்ஹேத’’ந்திஆதி³.

421. ஸப்³ப³மித³ம் தா²வரஜங்க³மம் புரிஸகதம், தஸ்மா யம் கிஞ்சி கத்வா அத்தா போஸேதப்³போ³ ரக்கி²தப்³போ³தி லோகாயதனிஸ்ஸிதோ நீதிமக்³கோ³ கோ⁴டமுக²கந்தோ, தஸ்மா ஆஹ ‘‘ஏதஸ்ஸ கிர ஜானனஸிப்பே’’திஆதி³. ஸக்³கே³ நிப்³ப³த்தோ நாம நத்தி² அகத்தப்³ப³மேவ கரணதோ. தே³வலோகபரியாபன்னத⁴னம் மனுஸ்ஸானம் உபகப்பபுஞ்ஞாபா⁴வதோ புப்³பே³ அத்தனா நிஹிதத⁴னம் ‘‘அஸுகே சா’’தி ஆசிக்கி²த்வா க³தோ. ஸேஸம் ஸுவிஞ்ஞேய்யமேவ.

கோ⁴டமுக²ஸுத்தவண்ணனாய லீனத்த²ப்பகாஸனா ஸமத்தா.