10. ஸங்கா³ரவஸுத்தவண்ணனா

473. அபி⁴ப்பஸன்னாதி அபி⁴ஸமேச்ச பஸன்னா. தேனாஹ – ‘‘அவேச்சப்பஸாத³வஸேன பஸன்னா’’தி. ப்³ராஹ்மணீ விக³தமலமச்சே²ரதாய ‘‘துய்ஹம் தே³ய்யத⁴ம்மம் ருச்சனகட்டா²னே தே³ஹீ’’தி ஆஹ. மக்³கே³னேவ ஹிஸ்ஸா மச்ச²ரியஸ்ஸ பஹீனத்தா பு³த்³த⁴பக்க²ப்³ராஹ்மணபக்க²வஸேன உப⁴தோபக்கி²கா.

கிம்ஸூதி கிந்தி புச்சா²வசனம். சே²த்வா அனாதி³யித்வா வினாஸேத்வா. ஸுக²ம் ஸேதீதி சித்தஸந்தாபாபா⁴வேன ஸுகே²ன ஸுபதி. ந ஸோசதீதி ததோ ஏவ ஸோகம் நாம வினாஸேதி. கோத⁴ந்தி குஜ்ஜ²னலக்க²ணம் கோத⁴ம். சே²த்வா ஸமுச்சி²ந்தி³த்வா. ஸுக²ம் ஸேதீதி கோத⁴பரிளாஹேன அபரிட³ய்ஹமானத்தா ஸுக²ம் ஸுபதி. கோத⁴வினாஸேன வினட்ட²தோ³மனஸ்ஸத்தா ந ஸோசதி. விஸமூலஸ்ஸாதி து³க்க²விபாகஸ்ஸ. மது⁴ரக்³க³ஸ்ஸாதி அக்கோஸகஸ்ஸ பச்சக்கோஸனேன, பஹாரகஸ்ஸ படிப்பஹரணேன யம் ஸுக²ம் உப்பஜ்ஜதி, தம் ஸந்தா⁴யேவ ‘‘மது⁴ரக்³கோ³’’தி வுத்தோ. இமஸ்மிஞ்ஹி டா²னே பரியோஸானம் ‘‘அக்³க³’’ந்தி வுத்தம். அரியாதி பு³த்³தா⁴த³யோ அரியா.

பஞ்ஹம் கதே²ஸீதி ப்³ராஹ்மணோ கிர சிந்தேஸி – ‘‘ஸமணோ கோ³தமோ லோகபூஜிதோ, ந ஸக்கா யம் வா தம் வா வத்வா ஸந்தஜ்ஜேதும், ஏகம் ஸண்ஹபஞ்ஹம் புச்சி²ஸ்ஸாமீ’’தி. ஸோ ஏகம் புச்சா²கா³த²ம் அபி⁴ஸங்க²ரித்வா ‘‘ஸசே அஸுகஸ்ஸ நாம வத⁴ம் ரோசேமீதி வக்க²தி, யே துய்ஹம் ந ருச்சந்தி, தே மாரேதுகாமோஸி, லோகவதா⁴ய உப்பன்னோ கிம் துய்ஹம் ஸமணபா⁴வேனாதி நிக்³க³ஹேஸ்ஸாமி. ஸசே ந கஸ்ஸசி வத⁴ம் ரோசேமீதி வக்க²தி, அத² நம் த்வம் ராகா³தீ³னம்பி வத⁴ம் ந இச்ச²ஸி, தஸ்மா ஸமணோ ஹுத்வா ஆஹிண்ட³ஸீதி நிக்³க³ண்ஹிஸ்ஸாமீதி இமம் உப⁴தோகோடிகம் பஞ்ஹம் புட்டோ² ஸமணோ கோ³தமோ நேவ கி³லிதும் ந உக்³கி³லிதும் ஸக்கி²ஸ்ஸதீ’’தி ஏவம் சிந்தேத்வா இமம் பய்ஹம் புச்சி². தஸ்ஸ ப⁴க³வா அஜ்ஜா²ஸயானுரூபம் கதே²ஸி. ஸோ பஞ்ஹப்³யாகரணேன ஆராதி⁴தசித்தோ பப்³ப³ஜ்ஜம் யாசி. ஸத்தா² தம் பப்³பா³ஜேஸி, ஸோ பப்³ப³ஜ்ஜாகிச்சம் மத்த²கம் பாபேஸி. தேன வுத்தம் ‘‘பப்³ப³ஜித்வா அரஹத்தம் பத்தோ’’தி.

அவபூ⁴தாதி அதோ⁴பூ⁴தா. அதோ⁴பா⁴வோ ஸத்தானம் அவட்³டி⁴ அவமங்க³லந்தி ஆஹ – ‘‘அவட்³டி⁴பூ⁴தா அவமங்க³லபூ⁴தாயேவா’’தி. பரிபூ⁴தாதி பரிப⁴வப்பத்தா. விஜ்ஜமானானந்தி பாளியம் அனாத³ரே ஸாமிவசனந்தி தத³த்த²ம் த³ஸ்ஸேந்தோ ‘‘விஜ்ஜமானேஸூ’’திஆஹ. பகட்ட²ம், பவட்³ட⁴ம் வா ஞாணந்தி பஞ்ஞாணந்தி ப⁴க³வதோ ஞாணம் விஸேஸேத்வா வுத்தம்.

474. அபி⁴ஜானித்வாதி அபி⁴விஸிட்டே²ன ஞாணேன ஜானித்வா. வோஸிதவோஸானாதி கதகரணீயதாய ஸப்³ப³ஸோ பரிஸோஸிதனிட்டா². பாரமிஸங்கா²தந்தி பரமுக்கம்ஸபா⁴வதோ பாரமீதி ஸங்கா²தம். தேனாஹ ‘‘ஸப்³ப³த⁴ம்மானம் பாரபூ⁴த’’ந்தி. ப்³ரஹ்மசரியஸ்ஸாதி ஸாஸனப்³ரஹ்மசரியஸ்ஸ ஆதி³பூ⁴தம். தேனாஹ ‘‘உப்பாத³கா ஜனகா’’தி. ‘‘இத³மேவம் ப⁴விஸ்ஸதி இத³மேவ’’ந்தி தக்கனம் தக்கோ, ஸோ ஏதஸ்ஸ அத்தீ²தி தக்கீ. யஸ்மா ஸோ தம் தம் வத்து²ம் ததா² ததா² தக்கித்வா க³ண்ஹதி, தஸ்மா வுத்தம் ‘‘தக்ககா³ஹீ’’தி. வீமம்ஸனஸீலோ வீமம்ஸீ பச்சக்க²பூ⁴தமத்த²ம் வீமம்ஸனபூ⁴தாய பஞ்ஞாய கேவலம் வீமம்ஸனதோ. தேனாஹ ‘‘பஞ்ஞாசாரம் சராபேத்வா ஏவம்வாதீ³’’தி. யதா²வுத்ததக்கீவீமம்ஸீபா⁴வேன தக்கபரியாஹதம் வீமம்ஸானுசரிதம் ஸயம்படிபா⁴னம் ஏவமேதந்தி வத்வா.

485. அட்டி²தபதா⁴னவதந்தி அஞ்ஞத்த² கிஸ்மிஞ்சி புக்³க³லே அட்டி²தபதா⁴னவதம் அனஞ்ஞஸாதா⁴ரணம் போ⁴தோ கோ³தமஸ்ஸ பதா⁴னம் அஹோஸி. ஸப்புரிஸபதா⁴னவதம் அஹோஸி ஸப்புரிஸபதா⁴னவதாதி⁴க³தானம் ஏதாதி³ஸானம் அரஹதம் அச்ச²ரியபுக்³க³லானம்யேவ ஆவேணிகபதா⁴னவதம் அஹோஸி. அஜானந்தோவ பகாஸேதீதி அயம் புச்சி²தமத்த²ம் ஸயம் பச்சக்க²தோ அஜானந்தோ ஏவ கேவலம் ஸத்³த³ம் உப்பாதே³த்வாவ பகாஸேஸீதி ஸஞ்ஞாய ஆஹ. அஜானனபா⁴வே ஸந்தேதி இமே அதி⁴தே³வாதி பச்சக்க²தோ ஜானனே அஸதி. பண்டி³தேன மனுஸ்ஸேனாதி லோகவோஹாரகுஸலேன மனுஸ்ஸேன, த்வம் பன லோகவோஹாரேபி அகுஸலோ. வசனத்த²ஞ்ஹி அஜானந்தோ யம் கிஞ்சி வத³தி. உச்சேன ஸம்மதந்தி உச்சம் ஸுபாகடம் ஸப்³ப³ஸோ தருணதா³ரகேஹிபி ஸம்மதம். ஞாதமேதம் யதி³த³ம் அத்தி² தே³வாதி. தேனாஹ ‘‘ஸுஸுதா³ரகாபீ’’திஆதி³. தே³வாதி உபபத்திதே³வா. அதி⁴தே³வா நாம ஸம்முதிதே³வேஹி அதி⁴கதே³வாதி கத்வா, தத³ஞ்ஞே ச மனுஸ்ஸே அதி⁴கபா⁴வே கிமேவ வத்தப்³ப³ம். ஸேஸம் ஸுவிஞ்ஞேய்யமேவ.

பபஞ்சஸூத³னியா மஜ்ஜி²மனிகாயட்ட²கதா²ய

ஸங்கா³ரவஸுத்தவண்ணனாய லீனத்த²ப்பகாஸனா ஸமத்தா.

நிட்டி²தா ச ப்³ராஹ்மணவக்³க³வண்ணனா.

மஜ்ஜி²மபண்ணாஸடீகா ஸமத்தா.