1. ப்³ரஹ்மாயுஸுத்தவண்ணனா

383. ‘‘மஹாஸத்தோ மஹித்³தி⁴கோ மஹானுபா⁴வோ’’திஆதீ³ஸு (மஹாவ. 38) உளாரதா விஸயோ, ‘‘மஹாஜனகாயோ ஸன்னிபதீ’’திஆதீ³ஸு ஸம்ப³ஹுலபா⁴வவிஸயோ, இத⁴ பன தது³ப⁴யம்பிஸ்ஸ அத்தோ²தி ‘‘மஹதாதி கு³ணமஹத்தேனபி மஹதா’’திஆதி³ வுத்தம். அப்பிச்ச²தாதீ³தி ஆதி³-ஸத்³தே³ன ஸந்துட்டி²ஸல்லேக²பவிவேகஅஸம்ஸக்³க³வீரியாரம்பா⁴தீ³னம் ஸங்க³ஹோ. தி³ட்டி²ஸீலஸாமஞ்ஞஸங்கா⁴தஸங்கா²தேனாதி ஏத்த² ‘‘நியதோ ஸம்போ³தி⁴பராயணோ’’ (ஸம். நி. 2.41; 3.998, 1004) – ‘‘அட்டா²னமேதம், பி⁴க்க²வே, அனவகாஸோ, யம் தி³ட்டி²ஸம்பன்னோ புக்³க³லோ ஸஞ்சிச்ச பாணம் ஜீவிதா வோரோபேய்யாதி நேதம் டா²னம் விஜ்ஜதீ’’திஆதி³வசனதோ தி³ட்டி²ஸீலானம் நியதஸபா⁴வத்தா ஸோதாபன்னாபி அஞ்ஞமஞ்ஞம் தி³ட்டி²ஸீலஸாமஞ்ஞேன ஸம்ஹதா, பகே³வ ஸகதா³கா³மிஆத³யோ. ‘‘ததா²ரூபாய தி³ட்டி²யா தி³ட்டி²ஸாமஞ்ஞக³தோ விஹரதி (தீ³. நி. 3.324, 356; ம. நி. 1.492; 3.54; அ. நி. 6.11; பரி. 274) ததா²ரூபேஹி ஸீலேஹி ஸீலஸாமஞ்ஞக³தோ விஹரதீ’’தி (தீ³. நி. 3.324; ம. நி. 1.492; 3.54; அ. நி. 6.12; பரி. 274) வசனதோ புது²ஜ்ஜனானம்பி தி³ட்டி²ஸீலஸாமஞ்ஞேன ஸம்ஹதபா⁴வோ லப்³ப⁴தியேவ.

ஓட்ட²பஹதகரணவஸேன அத்த²விபா⁴க³வஸேன. ஸனிக⁴ண்டு³கேடுபா⁴னந்தி ஏத்த² நிக⁴ண்டூ³தி வசனீயவாசகபா⁴வேன அத்த²ம் ஸத்³த³ஞ்ச க²ண்ட³தி விப⁴ஜ்ஜ த³ஸ்ஸேதீதி நிக²ண்டு³. ஸோ ஏவ இத⁴ க²-காரஸ்ஸ க⁴-காரம் கத்வா ‘‘நிக⁴ண்டூ³’’தி வுத்தோ. கிடதி க³மேதி கிரியாதி³விபா⁴க³ம், தம் வா அனவஸேஸபரியாதா³னதோ க³மேந்தோ பூரேதீதி கேடுப⁴ம். வேவசனப்பகாஸகந்தி பரியாயஸத்³த³தீ³பகம், ஏகேகஸ்ஸ அத்த²ஸ்ஸ அனேகபரியாயவசனவிபா⁴வகந்தி அத்தோ². நித³ஸ்ஸனமத்தஞ்சேதம் அனேகேஸம்பி அத்தா²னம் ஏகஸத்³த³வசனீயதாவிபா⁴வனவஸேனபி தஸ்ஸ க³ந்த²ஸ்ஸ பவத்தத்தா. வசீபே⁴தா³தி³லக்க²ணா கிரியா கப்பீயதி ஏதேனாதி கிரியாகப்போ, ஸோ பன வண்ணபத³ஸம்ப³ந்த⁴பத³த்த²விபா⁴க³தோ ப³ஹுவிகப்போதி ஆஹ ‘‘கிரியாகப்பவிகப்போ’’தி. இத³ஞ்ச மூலகிரியாகப்பக³ந்த²ம் ஸந்தா⁴ய வுத்தம். ஸோ ஹி ஸதஸஹஸ்ஸபரிமாணோ நலசரியாதி³பகரணம். டா²னகரணாதி³விபா⁴க³தோ நிப்³ப³சனவிபா⁴க³தோ ச அக்க²ரா பபே⁴தீ³யந்தி ஏதேஹீதி அக்க²ரப்பபே⁴தா³, ஸிக்கா²னிருத்தியோ. ஏதேஸந்தி வேதா³னம். தே ஏவ வேதே³ பத³ஸோ காயதீதி பத³கோ. தம் தம் ஸத்³த³ம் தத³த்த²ஞ்ச ப்³யாகரோதி ப்³யாசிக்க²தி ஏதேனாதி ப்³யாகரணம், ஸத்³த³ஸத்த²ம். ஆயதிம் ஹிதம் தேன லோகோ ந யததி ந ஈஹதீதி லோகாயதம். தஞ்ஹி க³ந்த²ம் நிஸ்ஸாய ஸத்தா புஞ்ஞகிரியாய சித்தம்பி ந உப்பாதே³ந்தி. வயதீதி வயோ, ந வயோ அவயோ, ந அவயோ அனவயோ, ஆதி³மஜ்ஜ²பரியோஸானேஸு கத்த²சி அபரிகிலந்தோ அவித்தா²யந்தோ தே க³ந்தே² ஸந்தா⁴ரேதி பூரேதீதி அத்தோ². த்³வே படிஸேதா⁴ பகதிம் க³மேந்தீதி த³ஸ்ஸேந்தோ ‘‘அவயோ ந ஹோதீ’’தி வத்வா தத்த² அவயம் த³ஸ்ஸேதும் ‘‘அவயோ…பே… ந ஸக்கோதீ’’தி வுத்தம்.

384. க³ரூதி பா⁴ரியம் அத்தானம் ததோ மோசேத்வா க³மனம் து³க்கரம் ஹோதி. அனத்தோ²பி உப்பஜ்ஜதி நிந்தா³ப்³யாரோஸஉபாரம்பா⁴தி³. அப்³பு⁴க்³க³தோதி ஏத்த² அபி⁴ஸத்³த³யோகே³ன இத்த²ம்பூ⁴தாக்²யானத்தே² உபயோக³வசனம்.

லக்க²ணானீதி லக்க²ணதீ³பனானி மந்தபதா³னி. அந்தரதா⁴யந்தீதி ந கேவலம் லக்க²ணமந்தானியேவ, அஞ்ஞானிபி ப்³ராஹ்மணானம் ஞாணப³லாபா⁴வேன அனுக்கமேன அந்தரதா⁴யந்தி. ததா² ஹி வத³ந்தி ‘‘ஏகஸதம் அத்³த⁴ரியம் தி³பஞ்ஞாஸமத்ததோ ஸாமா’’திஆதி³. பணிதி⁴மஹதோ ஸமாதா³னமஹதோதிஆதி³னா பச்சேகம் மஹ-ஸத்³தோ³ யோஜேதப்³போ³. பணிதி⁴மஹந்ததாதி³ சஸ்ஸ பு³த்³த⁴வம்ஸசரியாபிடகவண்ணனாதி³வஸேனேவ வேதி³தப்³போ³. நிட்டா²தி நிப்ப²த்தியோ. ஜாதிஸாமஞ்ஞதோதி லக்க²ணஜாதியா லக்க²ணபா⁴வேன ஸமானபா⁴வதோ. யதா² ஹி பு³த்³தா⁴னம் லக்க²ணானி ஸுவிஸுத்³தா⁴னி ஸுபரிப்³யத்தானி பரிபுண்ணானி ச ஹோந்தி, ந ஏவம் சக்கவத்தீனம். தேனாஹ ‘‘ந தேஹேவ பு³த்³தோ⁴ ஹோதீ’’தி.

அபி⁴ரூபதா தீ³கா⁴யுகதா, அப்பாதங்கதா ப்³ராஹ்மணாதீ³னம் பியமனாபதாதி சதூஹி அச்ச²ரியத⁴ம்மேஹி. தா³னம் பியவசனம் அத்த²சரியா ஸமானத்ததாதி இமேஹி சதூஹி ஸங்க³ஹவத்தூ²ஹி. ரஞ்ஜனதோதி பீதிஜனனதோ. சக்கம் சக்கரதனம் வத்தேதி பவத்தேதீதி சக்கவத்தீ, ஸம்பத்திசக்கேஹி ஸயம் வத்தேதி, தேஹி ச பரம் ஸத்தனிகாயம் வத்தேதி பவத்தேதீதி சக்கவத்தீ, பரஹிதாவஹோ இரியாபத²சக்கானம் வத்தோ வத்தனம் ஏதஸ்ஸ அத்தீ²தி சக்கவத்தீ, அப்படிஹதம் வா ஆணாஸங்கா²தம் சக்கம் வத்தேதீதி சக்கவதீ, அப்படிஹதம் வா ஆணாஸங்கா²தம் சக்கம் வத்தேதீதி சக்கவத்தீ, க²த்தியமண்ட³லாதி³ஸஞ்ஞிதம் சக்கம் ஸமூஹம் அத்தனோ வஸே வத்தேதீதி சக்கவத்தீ. த⁴ம்மம் சரதீதி த⁴ம்மிகோ. த⁴ம்மதோ அனபேதத்தா த⁴ம்மோ ரஞ்ஜனத்தே²ன ராஜாதி த⁴ம்மராஜா. கோபாதீ³தி ஆதி³-ஸத்³தே³ன காமலோப⁴மானமதா³தி³கே ஸங்க³ண்ஹாதி. விஜிதாவீதி விஜிதவா. கேனசி அகம்பியட்டே²ன ஜனபத³த்தா²வரியப்பத்தோ. த³ள்ஹப⁴த்திபா⁴வதோ வா ஜனபதோ³ தா²வரியம் பத்தோ ஏத்தா²தி ஜனபத³த்தா²வரியப்பத்தோ. சித்தீகதபா⁴வாதி³னாபி (கு². பா. அட்ட². 6.3; தீ³. நி. அட்ட². 2.33; ஸம். நி. அட்ட². 3.5.223; ஸு. நி. அட்ட². 1.226; மஹானி. அட்ட². 50) சக்கஸ்ஸ ரதனட்டோ² வேதி³தப்³போ³. ஏஸ நயோ ஸேஸேஸுபி. ரதினிமித்ததாய வா சித்தீகதாதி³பா⁴வஸ்ஸ ரதிஜனனட்டே²ன ஏகஸங்க³ஹதாய விஸும் அக்³க³ஹணம்.

இமேஹி பன ரதனேஹி ராஜா சக்கவத்தீ யம் யமத்த²ம் பச்சனுபோ⁴தி, தம் தம் த³ஸ்ஸேதும் ‘‘இமேஸு பனா’’திஆதி³ வுத்தம். அஜிதம் ஜினாதி மஹேஸக்க²தாஸம்வத்தனியகம்மனிஸ்ஸந்த³பா⁴வதோ. விஜிதே யதா²ஸுக²ம் அனுவிசரதி ஹத்தி²ரதனம் அஸ்ஸரதனஞ்ச அபி⁴ருஹித்வா தேஸம் ஆனுபா⁴வேன அந்தோபாதராஸேயேவ ஸகலம் பத²விம் அனுஸம்யாயித்வா ராஜதா⁴னியம் பச்சாக³மனதோ. பரிணாயகரதனேன விஜிதமனுரக்க²தி தேன தத்த² தத்த² கத்தப்³ப³கிச்சஸ்ஸ ஸம்விதா⁴னதோ. ஸேஸேஹீதி மணிரதனஇத்தி²ரதனக³ஹபதிரதனேஹி. தத்த² மணிரதனேன யோஜனப்பமாணே தே³ஸே அந்த⁴காரம் வித⁴மித்வா ஆலோகத³ஸ்ஸனாதி³னா ஸுக²மனுப⁴வதி, இத்தி²ரதனேன அதிக்கந்தமானுஸரூபஸம்பத்தித³ஸ்ஸனாதி³வஸேன, க³ஹபதிரதனேன இச்சி²திச்சி²தமணிகனகரஜதாதி³த⁴னப்படிலாப⁴வஸேன. உஸ்ஸாஹஸத்தியோகோ³ யேன கேனசி அப்படிஹதாணாசக்கபா⁴வஸித்³தி⁴தோ. ஹத்தி²அஸ்ஸரதனாதீ³னம் மஹானுபா⁴வத்தா கோஸஸம்பத்தியாபி பபா⁴வஸம்பத்திஸித்³தி⁴தோ ‘‘ஹத்தி²…பே… யோகோ³’’தி வுத்தம். கோஸோ ஹி நாம ஸதி உஸ்ஸாஹஸம்பத்தியம் (உக்³க³தேஜஸ்ஸ ஸுகுமாரபரக்கமஸ்ஸ பஸன்னமுக²ஸ்ஸ ஸம்முகே² பாபுணாதி). பச்சி²மேனாதி பரிணாயகரதனேன. தஞ்ஹி ஸப்³ப³ராஜகிச்சேஸு குஸலம் அவிரஜ்ஜ²னபயோக³ம். தேனாஹ ‘‘மந்தஸத்தியோகோ³’’தி. திவித⁴ஸத்தியோக³ப²லம் பரிபுண்ணம் ஹோதீதி ஸம்ப³ந்தோ⁴. ஸேஸேஹீதி ஸேஸேஹி பஞ்சஹி ரதனேஹி. அதோ³ஸகுஸலமூலஜனிதகம்மானுபா⁴வேனாதி அதோ³ஸஸங்கா²தேன குஸலமூலேன ஸஹஜாதாதி³பச்சயவஸேன உப்பாதி³தகம்மஸ்ஸ ஆனுபா⁴வேன ஸம்பஜ்ஜந்தி ஸோம்மதரரதனஜாதிகத்தா. மஜ்ஜி²மானி மணிஇத்தி²க³ஹபதிரதனானி. அலோப⁴…பே… கம்மானுபா⁴வேன ஸம்பஜ்ஜந்தி உளாரத⁴னஸ்ஸ உளாரத⁴னபடிலாப⁴காரணஸ்ஸ ச பரிச்சாக³ஸம்பதா³ஹேதுகத்தா. பச்சி²மந்தி பரிணாயகரதனம். தஞ்ஹி அமோஹ…பே… கம்மானுபா⁴வேன ஸம்பஜ்ஜதி மஹாபஞ்ஞேனேவ சக்கவத்திராஜகிச்சஸ்ஸ பரிணேதப்³ப³த்தா.

ஸரணதோ படிபக்க²வித⁴மனதோ ஸூரா. தேனாஹ ‘‘அபீ⁴ருகஜாதிகா’’தி. அஸுரே விஜினித்வா டி²தத்தா வீரோ, ஸக்கோ தே³வானமிந்தோ³, தஸ்ஸ அங்க³ம் தே³வபுத்தோ ஸேனங்க³பா⁴வதோதி வுத்தம் ‘‘வீரங்க³ரூபாதி தே³வபுத்தஸதி³ஸகாயா’’தி. ஸபா⁴வோதி ஸபா⁴வபூ⁴தோ அத்தோ². வீரகாரணந்தி வீரபா⁴வகாரணம். வீரியமயஸரீரா வியாதி ஸவிக்³க³ஹவீரியஸதி³ஸா ஸவிக்³க³ஹஞ்சே வீரியம் ஸியா, தம்ஸதி³ஸாதி அத்தோ². நனு ரஞ்ஞோ சக்கவத்திஸ்ஸ படிஸேனா நாம நத்தி², யமஸ்ஸ புத்தா பமத்³தே³ய்யும், அத² கஸ்மா ‘‘பரஸேனபமத்³த³னா’’தி வுத்தந்தி சோத³னம் ஸந்தா⁴யாஹ ‘‘ஸசே’’திஆதி³. தேன பரஸேனா ஹோது வா மா வா, தே பன ஏவம் மஹானுபா⁴வாதி த³ஸ்ஸேதி. த⁴ம்மேனாதி கதூபசிதேன அத்தனோ புஞ்ஞத⁴ம்மேன. தேன ஹி ஸஞ்சோதி³தா பத²வியம் ஸப்³ப³ராஜானோ பச்சுக்³க³ந்த்வா ‘‘ஸ்வாக³தம் தே மஹாராஜா’’திஆதி³ம் வத்வா அத்தனோ ரஜ்ஜம் ரஞ்ஞோ சக்கவத்திஸ்ஸ நிய்யாதே³ந்தி. தேன வுத்தம் ‘‘ஸோ இமம்…பே… அஜ்ஜா²வஸதீ’’தி. அட்ட²கதா²யம் பன தஸ்ஸ யதா²வுத்தத⁴ம்மஸ்ஸ சிரதரம் விபச்சிதும் பச்சயபூ⁴தம் சக்கவத்திவத்தஸமுதா³க³தம் பயோக³ஸம்பத்திஸங்கா²தம் த⁴ம்மம் த³ஸ்ஸேதும் ‘‘பாணோ ந ஹந்தப்³போ³திஆதி³னா பஞ்சஸீலத⁴ம்மேனா’’தி வுத்தம். ஏவஞ்ஹி ‘‘அத³ண்டே³ன அஸத்தே²னா’’தி இத³ம் வசனம் ஸுட்டு²தரம் ஸமத்தி²தம் ஹோதி, யஸ்மா ராகா³த³யோ பாபத⁴ம்மா உப்பஜ்ஜமானா ஸத்தஸந்தானம் சா²தே³த்வா பரியோனந்தி⁴த்வா திட்ட²ந்தி, குஸலபவத்திம் நிவாரேந்தி, தஸ்மா தே ‘‘ச²த³னா, ச²தா³’’தி ச வுத்தா.

விவட்டேத்வா பரிவத்தேத்வா. பூஜாரஹதா வுத்தா ‘‘அரஹதீதி அரஹ’’ந்தி. தஸ்ஸாதி பூஜாரஹதாய. யஸ்மா ஸம்மாஸம்பு³த்³தோ⁴, தஸ்மா அரஹந்தி. பு³த்³த⁴த்தஹேதுபூ⁴தா விவட்டச்ச²த³தா வுத்தா ஸவாஸனஸப்³ப³கிலேஸப்பஹானபுப்³ப³கத்தா பு³த்³த⁴பா⁴வஸித்³தி⁴யா. அரஹம் வட்டாபா⁴வேனாதி ப²லேன ஹேதுஅனுமானத³ஸ்ஸனம். ஸம்மாஸம்பு³த்³தோ⁴ ச²த³னாபா⁴வேனாதி ஹேதுனா ப²லானுமானத³ஸ்ஸனம். ஹேதுத்³வயம் வுத்தம் ‘‘விவட்டோ விச்ச²தோ³ சா’’தி. து³தியவேஸாரஜ்ஜேனாதி ‘‘கீ²ணாஸவஸ்ஸ தே படிஜானதோ’’திஆதி³னா (ம. நி. 1.150) ஆக³தேன வேஸாரஜ்ஜேன. புரிமஸித்³தீ⁴தி புரிமஸ்ஸ பத³ஸ்ஸ அத்த²ஸித்³தி⁴. பட²மேனாதி ‘‘ஸம்மாஸம்பு³த்³த⁴ஸ்ஸ தே படிஜானதோ’’திஆதி³னா (ம. நி. 1.150) ஆக³தேன வேஸாரஜ்ஜேன. து³தியஸித்³தீ⁴தி பு³த்³த⁴த்தஸித்³தி⁴. ததியசதுத்தே²ஹீதி ‘‘யே கோ² பன தே அந்தராயிகா த⁴ம்மா’’திஆதி³னா (ம. நி. 1.150), ‘‘யஸ்ஸ கோ² பன தே அத்தா²யா’’திஆதி³னா (ம. நி. 1.150) ச ஆக³தேஹி ததியசதுத்தே²ஹி வேஸாரஜ்ஜேஹி. ததியஸித்³தீ⁴தி விவட்டச்ச²த³னதா ஸித்³தி⁴. யாதா²வதோ அந்தராயிகனிய்யானிகத⁴ம்மாபதே³ஸேன ஹி ஸத்து² விவட்டச்ச²த³பா⁴வோ லோகே பாகடோ அஹோஸி. புரிமம் த⁴ம்மசக்கு²ந்தி புரிமபத³ம் ப⁴க³வதோ த⁴ம்மசக்கு²ம் ஸாதே⁴தி கிலேஸாரீனம் ஸம்ஸாரசக்கஸ்ஸ ச அரானம் ஹதபா⁴வதீ³பனதோ. து³தியம் பத³ம் பு³த்³த⁴சக்கு²ம் ஸாதே⁴தி ஸம்மாஸம்பு³த்³த⁴ஸ்ஸேவ தம் ஸம்ப⁴வதோ. ததியம் பத³ம் ஸமந்தசக்கு²ம் ஸாதே⁴தி ஸவாஸனஸப்³ப³கிலேஸப்பஹானதீ³பனதோ. ‘‘ஸம்மாஸம்பு³த்³தோ⁴’’தி ஹி வத்வா ‘‘விவட்டச்ச²தோ³’’தி வசனம் பு³த்³த⁴பா⁴வாவஹமேவ ஸப்³ப³கிலேஸப்பஹானம் விபா⁴வேதீதி. ஸூரபா⁴வந்தி லக்க²ணவிபா⁴வனேன விஸத³ஞாணதம்.

385. க³வேஸீதி (தீ³. நி. டீ. 1.287) ஞாணேன பரியேஸனம் அகாஸி. ஸமானயீதி ஞாணேன ஸங்கலேந்தோ ஸமானம் ஆனயி ஸமாஹரி. ந ஸக்கோதி ஸம்குசிதே இரியாபதே² யேபு⁴ய்யேன தேஸம் து³ப்³பி³பா⁴வனதோ. கங்க²தீதி பத³ஸ்ஸ ஆகங்க²தீதி அயமத்தோ²தி ஆஹ – ‘‘அஹோ வத பஸ்ஸேய்யந்தி பத்த²னம் உப்பாதே³தீ’’தி. கிச்ச²தீதி கிலமதி. ‘‘கங்க²தீ’’தி பத³ஸ்ஸ புப்³பே³ ஆஸீஸனத்த²தம் வத்வா இதா³னி தஸ்ஸ ஸம்ஸயத்த²த்தமேவ விகப்பந்தரவஸேன த³ஸ்ஸேந்தோ ‘‘கங்கா²ய வா து³ப்³ப³லா விமதி வுத்தா’’திஆதி³ வுத்தம். தீஹி த⁴ம்மேஹி திப்பகாரேஹி ஸம்ஸயத⁴ம்மேஹி. காலுஸ்ஸியபா⁴வோதி அப்பஸன்னதாய ஹேதுபூ⁴தோ ஆவிலபா⁴வோ. யஸ்மா ப⁴க³வதோ கோஸோஹிதம் ஸப்³ப³பு³த்³தா⁴வேணிகம் வத்த²கு³ய்ஹம் ஸுவிஸுத்³த⁴கஞ்சனமண்ட³லஸன்னிகாஸம் அத்தனோ ஸண்டா²னஸன்னிவேஸஸுந்த³ரதாய ஆஜானேய்யக³ந்த⁴ஹத்தி²னோ வரங்க³சாருபா⁴வம் விகஸமானதபனியாரவிந்த³ஸமுஜ்ஜலகேஸராவத்தவிலாஸம் ஸஞ்ஜா²பபா⁴னுரஞ்ஜிதஜலவனந்தராபி⁴லக்கி²த-ஸம்புண்ணசந்த³மண்ட³லஸோப⁴ஞ்ச அத்தனோ ஸிரியா அபி⁴பு⁴ய்ய விராஜதி, யம் பா³ஹிரப்³ப⁴ந்தரமலேஹி அனுபக்கிலிட்ட²தாய சிரகாலம் ஸுபரிசிதப்³ரஹ்மசரியாதி⁴காரதாய ஸுஸண்டி²தஸண்டா²னஸம்பத்தியா ச கோபீனம்பி ஸந்தம் அகோபீனமேவ, தஸ்மா வுத்தம் ‘‘ப⁴க³வதோ ஹீ’’திஆதி³. பஹூதபா⁴வந்தி புது²லபா⁴வம். ஏத்தே²வ ஹி தஸ்ஸ ஸம்ஸயோ, தனுமுது³ஸுகுமாரதாதீ³ஸு பனஸ்ஸ கு³ணேஸு தஸ்ஸ விசாரணா ஏவ நாஹோஸி.

ஹிரிகரணோகாஸந்தி ஹிரியிதப்³ப³ட்டா²னம். சா²யந்தி படிபி³ம்ப³ம். கீதி³ஸந்தி ஆஹ ‘‘இத்³தி⁴யா’’திஆதி³. சா²யாரூபந்தி ப⁴க³வதோ படிபி³ம்ப³ரூபம். தஞ்ச கோ² பு³த்³த⁴ஸந்தானதோ வினிமுத்தம் ரூபகமத்தம் ப⁴க³வதோ ஸரீரவண்ணஸண்டா²னாவயவம் இத்³தி⁴மயம் பி³ம்ப³கமத்தம், தம் பன த³ஸ்ஸேந்தோ ப⁴க³வா யதா² அத்தனோ பு³த்³த⁴ரூபம் ந தி³ஸ்ஸதி, ததா² கத்வா த³ஸ்ஸேதி. நீஹரித்வாதி ப²ரித்வா.

கண்ணஸோதானம் உபசிததனுதம்ப³லோமதாய தோ⁴தரஜதபனாளிகாஸதி³ஸதா வுத்தா. முக²பரியந்தேதி கேஸந்தே.

கிரியாகரணந்தி கிரியாய காயிகஸ்ஸ வாசஸிகஸ்ஸ படிபத்தி. தத்தா²தி தேஸு கிச்சேஸு. த⁴ம்மகதி²கானம் வத்தம் த³ஸ்ஸேதும் பீ³ஜனிக்³க³ஹணம் கதம். ந ஹி அஞ்ஞதா² ஸப்³ப³ஸ்ஸபி லோகஸ்ஸ அலங்காரபூ⁴தம் பரமுக்கம்ஸக³தம் ஸிக்கா²ஸம்யமானம் பு³த்³தா⁴னம் முக²சந்த³மண்ட³லம் படிச்சா²தே³தப்³ப³ம் ஹோதி.

பத்த²ரிதவிதானஓலம்பி³தக³ந்த⁴தா³மகுஸுமதா³மகே க³ந்த⁴மண்ட³லமாளே. புப்³ப³பா⁴கே³ன பரிச்சி²ந்தி³த்வாதி ‘‘ஏத்தகம் வேலம் ஸமாபத்தியா வீதினாமேஸ்ஸாமீ’’தி ஏவம் பவத்தேன புப்³ப³பா⁴கே³ன காலம் பரிச்சி²ந்தி³த்வா. பச்சயதா³யகேஸு அனுரோத⁴வஸேன பரிஸம் உஸ்ஸாதே³ந்தோ வா பக்³க³ண்ஹந்தோ, அதா³யகேஸு விரோத⁴வஸேன பரிஸம் அபஸாதே³ந்தோ வா.

யோக³க்கே²மம் அந்தராயாபா⁴வம். ஸபா⁴வகு³ணேனேவாதி யதா²வுத்தகு³ணேனேவ. போ⁴தோ கோ³தமஸ்ஸ கு³ணம் ஸவிக்³க³ஹம் சக்கவாளம் அதிஸம்பா³த⁴ம் வித்தா²ரேன ஸந்தா⁴ரேதும் அப்பஹோந்ததோ. ப⁴வக்³க³ம் அதினீசம் உபரூபரி ஸந்தா⁴ரேதும் அப்பஹோந்ததோ.

386. டா²னக³மனாதீ³ஸு (தீ³. நி. டீ. 2.35) பூ⁴மியம் ஸுட்டு² ஸமம்பதிட்டி²தா பாதா³ ஏதஸ்ஸாதி ஸுப்பதிட்டி²தபாதோ³. தம் பன ப⁴க³வதோ ஸுப்பதிட்டி²தபாத³தம் ப்³யதிரேகமுகே²ன விபா⁴வேதும் ‘‘யதா² ஹீ’’திஆதி³ வுத்தம். தத்த² அக்³க³தலந்தி அக்³க³பாத³தலம். பண்ஹீதி பண்ஹிதலம். பஸ்ஸந்தி பாத³தலஸ்ஸ த்³வீஸு பஸ்ஸேஸு ஏகேகம், உப⁴யமேவ வா பரியந்தம் பஸ்ஸம். ஸுவண்ணபாது³கதலம் விய உஜுகம் நிக்கி²பியமானம். ஏகப்பஹாரேனேவாதி ஏகக்க²ணேயேவ. ஸகலம் பாத³தலம் பூ⁴மிம் பு²ஸதி நிக்கி²பனே. ஏகப்பஹாரேனேவ ஸகலம் பாத³தலம் பூ⁴மிதோ உட்ட²ஹதீதி யோஜனா.

தத்ராதி தாய ஸுப்பதிட்டி²தபாத³தாய அனுபுப்³ப³னின்னாவ அச்ச²ரியப்³பு⁴தம் இத³ம் வுச்சமானம் நிஸ்ஸந்த³ப²லம். வுத்தமேவத்த²ம் ஸத்து² திதி³வக³மனேன ஸுபாகடம் காதும் ‘‘ததா² ஹீ’’திஆதி³ம் வத்வா ‘‘ந ஹீ’’திஆதி³னா தம் ஸமத்தே²தி. தேன பட²மலக்க²ணதோபி து³தியலக்க²ணம் மஹானுபா⁴வந்தி த³ஸ்ஸேதி. ததா² ஹி வக்க²தி ‘‘அந்தமஸோ சக்கவத்திரஞ்ஞோ பரிஸம் உபாதா³ய ஸப்³போ³பி சக்கலக்க²ணஸ்ஸேவ பரிவாரோ’’தி. யுக³ந்த⁴ரபப்³ப³தஸ்ஸ தாவதிம்ஸப⁴வனஸ்ஸ ச பகதிபத³னிக்கே²பட்டா²னுபஸங்கமனே நேவ பு³த்³தா⁴னம், ந தே³வதானம் ஆனுபா⁴வோ, அத² கோ² பு³த்³தா⁴னம் லக்க²ணானுபா⁴வோதி இமமத்த²ம் நித³ஸ்ஸிதம். ஸீலதேஜேன…பே… த³ஸன்னம் பாரமீனம் ஆனுபா⁴வேனாதி இத³ம்பி லக்க²ணனிப்³ப³த்தகம்மவிஸேஸகித்தனமேவாதி த³ட்ட²ப்³ப³ம். ஸப்³பா³வந்தேஹீதி ஸப்³ப³பதே³ஸவந்தேஹி.

நாபி⁴பரிச்சி²ன்னாதி நாபி⁴யம் பரிச்சி²ன்னா பரிச்சே²த³வஸேன டி²தா. நாபி⁴முக²பரிக்கே²பபட்டோதி பகதிசக்கஸ்ஸ அக்க²ப்³பா⁴ஹதபரிஹரணத்த²ம் நாபி⁴முகே² ட²பேதப்³ப³பரிக்கே²பபட்டோ. நேமிமணிகாதி நேமியம் ஆவளிபா⁴வேன டி²தமணிகாலேகா².

ஸம்ப³ஹுலவாரோதி ப³ஹுவித⁴லேக²ங்க³விபா⁴வனவாரோ. ஸத்தீதி ஆவுத⁴ஸத்தி. ஸிரிவச்சோ²தி ஸிரிமுக²ம். நந்தீ³தி த³க்கி²ணாவட்டம். ஸோவத்திகோதி ஸோவத்திஅங்கோ. வடம்ஸகோதி ஆவேளம். வட்³ட⁴மானகந்தி புரிஸஹாரி புரிஸங்க³ம். மோரஹத்த²கோதி மோரபிஞ்ச²கலாபோ, மோரபிஞ்ச² பரிஸிப்³பி³தோ வா பீ³ஜனிவிஸேஸோ. வாலபீ³ஜனீதி சாமரிவாலம். ஸித்³த⁴த்தா²தி³ புண்ணக⁴டபுண்ணபாதியோ. ‘‘சக்கவாளோ’’தி வத்வா தஸ்ஸ பதா⁴னாவயவே த³ஸ்ஸேதும் ‘‘ஹிமவா ஸினேரு…பே… ஸஹஸ்ஸானீ’’தி வுத்தம்.

ஆயதபண்ஹீதி இத³ம் அஞ்ஞேஸம் பண்ஹிதோ தீ³க⁴தம் ஸந்தா⁴ய வுத்தம், ந பன அதிதீ³க⁴தந்தி ஆஹ ‘‘பரிபுண்ணபண்ஹீ’’தி. யதா² பன பண்ஹிலக்க²ணம் பரிபுண்ணம் நாம ஹோதி, தம் ப்³யதிரேகமுகே²ன த³ஸ்ஸேதும் ‘‘யதா² ஹீ’’திஆதி³ வுத்தம். ஆரக்³கே³னாதி மண்ட³லாய ஸிகா²ய. வட்டேத்வாதி யதா² ஸுவட்டம் ஹோதி, ஏவம் வட்டேத்வா. ரத்தகம்ப³லகே³ண்டு³கஸதி³ஸாதி ரத்தகம்ப³லமயகே³ண்டு³கஸதி³ஸா.

மக்கடஸ்ஸேவாதி வானரஸ்ஸ விய. தீ³க⁴பா⁴வேன ஸமதம் ஸந்தா⁴யேதம் வுத்தம். நிய்யாஸதேலேனாதி ச²தி³கனிய்யாஸாதி³னிய்யாஸஸம்மிஸ்ஸேன தேலேன.

தலுனாதி ஸுகுமாரா.

சம்மேனாதி அங்கு³லந்தரவேடி²தசம்மேன. படிப³த்³த⁴அங்கு³லந்தரோதி ஏகதோ ஸம்ப³த்³த⁴அங்கு³லந்தரோ. ஏகப்பமாணாதி தீ³க⁴தோ ஸமானப்பமாணா. யவலக்க²ணந்தி அப்³ப⁴ந்தரதோ அங்கு³லிபப்³பே³டி²தம் யவலக்க²ணம். படிவிஜ்ஜி²த்வாதி தம்தம்பப்³பா³னம் ஸமானதே³ஸதாய அங்கு³லீனம் பஸாரிதகாலே அஞ்ஞமஞ்ஞம் விஜ்ஜி²தானி விய பு²ஸித்வா திட்ட²ந்தி.

ஸங்கா² வுச்சந்தி கோ³ப்ப²கா, உத்³த⁴ம் ஸங்கா² ஏதேஸந்தி உஸ்ஸங்கா², பாதா³. பிட்டி²பாதே³தி பிட்டி²பாத³ஸமீபே. ஸுகே²ன பாதா³ பரிவத்தந்தி பாத³னாமனாதீ³ஸு, தேனேவ க³ச்ச²ந்தானம் தேஸம் ஹேட்டா² பாத³தலானி தி³ஸ்ஸந்தி. தேனாதி கோ³ப்ப²கானம் பிட்டி²பாத³தோ உத்³த⁴ம் பதிட்டி²தத்தா. சதுரங்கு³லமத்தஞ்ஹி தானி உத்³த⁴ம் ஆரோஹித்வா பதிட்ட²ஹந்தி, நிகு³ள்ஹானி ச ஹோந்தி, ந அஞ்ஞேஸம் விய பஞ்ஞாயமானானி. ஸதிபி தே³ஸந்தரப்பவத்தியம் நிச்சலோதி த³ஸ்ஸனத்த²ம் நாபி⁴க்³க³ஹணம்.

யஸ்மா ஏணீமிக³ஸ்ஸ ஸமந்ததோ ஏகஸதி³ஸமம்ஸா அனுக்கமேன உத்³த⁴ம் தூ²லா ஜங்கா⁴ ஹோந்தி, தஸ்மா வுத்தம் ‘‘ஏணீமிக³ஸதி³ஸஜங்கா⁴’’தி. பரிபுண்ணஜங்கோ⁴தி ஸமந்ததோ மம்ஸூபசயேன பரிபுண்ணஜங்கோ⁴. தேனாஹ ‘‘ந ஏகதோ’’திஆதி³.

ஏதேனாதி ‘‘அனோனமந்தோ’’திஆதி³வசனேன, ஜாணுபா²ஸுபா⁴வதீ³பனேனாதி அத்தோ². அவஸேஸஜனாதி இமினா லக்க²ணேன ரஹிதா ஜனா. கு²ஜ்ஜா வா ஹோந்தி ஹேட்டி²மகாயதோ உபரிமகாயஸ்ஸ ரஸ்ஸதாய. வாமனா வா உபரிமகாயதோ ஹேட்டி²மகாயஸ்ஸ ரஸ்ஸதாய. ஏதேன ட²பேத்வா ஸம்மாஸம்பு³த்³த⁴ம் சக்கவத்தினஞ்ச இதரே ஸத்தா கு²ஜ்ஜா வாமனா சாதி த³ஸ்ஸேதி.

ஓஹிதந்தி ஸமோஹிதம் அந்தோக³த⁴ம். ததா²பூ⁴தம் பன தம் தேன ச²ன்னம் ஹோதீதி ஆஹ ‘‘படிச்ச²ன்ன’’ந்தி.

ஸுவண்ணவண்ணோதி ஸுவண்ணவண்ணவண்ணோதி அயமேத்த² அத்தோ²தி ஆஹ ‘‘ஜாதிஹிங்கு³லகேனா’’திஆதி³. ஸ்வாயமத்தோ² ஆவுத்திஞாயேன ச வேதி³தப்³போ³. ஸரீரபரியாயோ இத⁴ வண்ணஸத்³தோ³தி அதி⁴ப்பாயேன பட²மவிகப்பம் வத்வா ததா²ரூபாய பன ருள்ஹியா அபா⁴வம் மனஸி கத்வா வண்ணதா⁴துபரியாயமேவ வண்ணஸத்³த³ம் க³ஹேத்வா து³தியவிகப்போ வுத்தோ.

ரஜோதி ஸுகு²மரஜோ. ஜல்லந்தி மலீனபா⁴வாவஹோ ரேணுஸஞ்சயோ. தேனாஹ ‘‘மலம் வா’’தி. யதி³ விவட்டதி, கத²ம் ந்ஹானாதீ³தி ஆஹ ‘‘ஹத்த²தோ⁴வனா’’திஆதி³.

ஆவட்டபரியோஸானேதி பத³க்கி²ணாவட்டாய அந்தே.

ப்³ரஹ்முனோ ஸரீரம் புரதோ வா பச்ச²தோ வா அனோனமித்வா உஜுகமேவ உக்³க³தந்தி ஆஹ ‘‘ப்³ரஹ்மா விய உஜுக³த்தோ’’தி. பஸ்ஸவங்காதி த³க்கி²ணபஸ்ஸேன வா வாமபஸ்ஸேன வா வங்கா.

ஹத்த²பிட்டி²ஆதி³வஸேன ஸத்த உஸ்ஸதா³ ஏதஸ்ஸாதி ஸத்துஸ்ஸதோ³.

ஸீஹஸ்ஸ புப்³ப³த்³த⁴ம் ஸீஹபுப்³ப³த்³த⁴ம், பரிபுண்ணாவயவதாய ஸீஹபுப்³ப³த்³த⁴ம் விய ஸகலோ காயோ அஸ்ஸாதி ஸீஹபுப்³ப³த்³த⁴காயோ. ஸீஹஸ்ஸேவாதி ஸீஹஸ்ஸ விய. ஸண்ட²ந்தீதி ஸண்ட²ஹந்தி. நானாசித்தேனாதி விவித⁴சித்தேன. புஞ்ஞசித்தேனாதி பாரமிதாபுஞ்ஞசித்தரூபேன. சித்திதோதி ஸஞ்ஜாதசித்தபா⁴வோ.

த்³வின்னம் கோட்டானமந்தரந்தி த்³வின்னம் பிட்டி²பா³ஹானம் வேமஜ்ஜ²ம், பிட்டி²மஜ்ஜ²ஸ்ஸ உபரிபா⁴கோ³. சிதம் பரிபுண்ணந்தி அனின்னபா⁴வேன சிதம், த்³வீஹி கோட்டேஹி ஸமதலதாய பரிபுண்ணம். உக்³க³ம்மாதி உக்³க³ந்த்வா.

நிக்³ரோத⁴பரிமண்ட³லோ விய பரிமண்ட³லோ நிக்³ரோத⁴பரிமண்ட³லோ ஏகஸ்ஸ பரிமண்ட³லஸத்³த³ஸ்ஸ லோபம் கத்வா. ந ஹி ஸப்³போ³ நிக்³ரோதோ⁴ மண்ட³லோ. தேனாஹ ‘‘ஸமக்க²ந்த⁴ஸாகோ² நிக்³ரோதோ⁴’’தி. பரிமண்ட³லஸத்³த³ஸன்னிதா⁴னேன வா பரிமண்ட³லோவ நிக்³ரோதோ⁴ க³ய்ஹதீதி பரிமண்ட³லஸத்³த³ஸ்ஸ லோபேன வினாபி அயமத்தோ² லப்³ப⁴தீதி ஆஹ ‘‘நிக்³ரோதோ⁴ விய பரிமண்ட³லோ’’தி. யாவதக்வஸ்ஸாதி ஓ-காரஸ்ஸ வ-காராதே³ஸம் கத்வா வுத்தம்.

ஸமவட்டிதக்க²ந்தோ⁴தி ஸமம் ஸுவட்டிதக்க²ந்தோ⁴. கோஞ்சா விய தீ³க⁴க³லா, ப³கா விய வங்கக³லா, வராஹா விய புது²லக³லாதி யோஜனா. ஸுவண்ணாலிங்க³ஸதி³ஸோதி ஸுவண்ணமயகு²த்³த³கமுதி³ங்க³ஸதி³ஸோ.

ரஸக்³க³ஸக்³கீ³தி மது⁴ராதி³பே⁴த³ம் ரஸம் க³ஸந்தி அந்தோ பவேஸந்தீதி ரஸக்³க³ஸா, ரஸக்³க³ஸானம் அக்³கா³ ரஸக்³க³ஸக்³கா³, தா ஏதஸ்ஸ ஸந்தீதி ரஸக்³க³ஸக்³கீ³. தேனாதி ஓஜாய அப²ரணேன, ஹீனதா⁴துகத்தா தே ப³ஹ்வாபா³தா⁴ ஹோந்தி.

‘‘ஹனூ’’தி ஸன்னிஸ்ஸயத³ந்தாதா⁴ரஸ்ஸ ஸமஞ்ஞா, தம் ப⁴க³வதோ ஸீஹஹனுஸதி³ஸம், தஸ்மா ப⁴க³வா ஸீஹஹனு. தத்த² யஸ்மா பு³த்³தா⁴னம் ரூபகாயஸ்ஸ த⁴ம்மகாயஸ்ஸ ச உபமா நாம நிஹீனுபமாவ, நத்தி² ஸமானுபமா, குதோ அதி⁴கூபமா, தஸ்மா அயம்பி நிஹீனுபமாதி த³ஸ்ஸேதும் ‘‘தத்தா²’’திஆதி³ வுத்தம். திபா⁴க³வஸேன மண்ட³லதாய த்³வாத³ஸியம் பக்க²ஸ்ஸ சந்த³ஸதி³ஸானி.

த³ந்தானம் உச்சனீசதா அப்³ப⁴ந்தரபா³ஹிரபஸ்ஸவஸேனபி வேதி³தப்³பா³, ந அக்³க³வஸேனேவ. தேனாஹ ‘‘அயபட்டசி²ன்னஸங்க²படலம் வியா’’தி. அயபட்டந்தி ச ககசம் அதி⁴ப்பேதம். விஸமாதி விஸமஸண்டா²னா.

விச்சி²ந்தி³த்வா விச்சி²ந்தி³த்வா பவத்தஸரதாய சி²ன்னஸ்ஸராபி. அனேகாகாரதாய பி⁴ன்னஸ்ஸராபி. காகஸ்ஸ விய அமனுஞ்ஞஸரதாய காகஸ்ஸராபி. அபலிபு³த்³த⁴த்தாதி அனுபத்³து³தவத்து²கத்தா. வத்து²ந்தி ச அக்க²ருப்பத்திட்டா²னமாஹ. அட்ட²ங்க³ஸமன்னாக³தோதி ஏத்த² அட்ட²ங்கா³னி பரதோ ஆக³மிஸ்ஸந்தி. மஞ்ஜுகோ⁴ஸோதி மது⁴ரஸ்ஸரோ.

கரவீகஸத்³தோ³ யேஸம் ஸத்தானம் ஸோதபத²ம் உபக³ச்ச²தி, தே அத்தனோ ஸரஸம்பத்தியா பகதிம் ஜஹாபேத்வா அவஸே கரோந்தோ அத்தனோ வஸே வத்தேதி, ஏவம் மது⁴ரோதி த³ஸ்ஸேந்தோ ‘‘தத்ரித³’’ந்திஆதி³மாஹ. தம் பீதிந்தி தம் பு³த்³த⁴க³தம் பீதிம். தேனேவ நீஹாரேன புனப்புனம் பவத்தந்தம் அவிஜஹித்வா விக்க²ம்பி⁴தகிலேஸா தே²ரானம் ஸந்திகே லத்³த⁴த⁴ம்மஸ்ஸவனஸப்பாயா உபனிஸ்ஸயஸம்பத்தியா பரிபக்கஞாணதாய ‘‘ஸத்தஹி…பே… பதிட்டா²ஸீ’’தி. ஸத்தஸதமத்தேன ஓரோத⁴ஜனேன ஸத்³தி⁴ம் பத³ஸாவ தே²ரானம் ஸந்திகம் உபக³தத்தா ‘‘ஸத்தஹி ஜங்கா⁴ஸதேஹி ஸத்³தி⁴’’ந்தி வுத்தம்.

அபி⁴னீலனேத்தோதி அதி⁴கனீலனேத்தோ. அதி⁴கனீலதா ச ஸாதிஸயம் நீலபா⁴வேன வேதி³தப்³பா³, ந நேத்தே நீலவண்ணஸ்ஸேவ அதி⁴கபா⁴வதோதி ஆஹ ‘‘ந ஸகலனீலனேத்தோவா’’திஆதி³. பீதலோஹிதவண்ணா ஸேதமண்ட³லக³தராஜிவஸேன, நீலஸேதகாளவண்ணா பன தம்தம்மண்ட³லவஸேனேவ வேதி³தப்³பா³.

சக்கு²ப⁴ண்ட³ந்தி அக்கி²த³லந்தி கேசி, அக்கி²த³லபத்தந்தி அஞ்ஞே. அக்கி²த³லேஹி பன ஸத்³தி⁴ம் அக்கி²பி³ம்ப³ந்தி வேதி³தப்³ப³ம். ஏவஞ்ஹி வினிக்³க³தக³ம்பீ⁴ரஜோதனாபி யுத்தா ஹோதி.

உண்ணாஸத்³தோ³ லோகே அவிஸேஸதோ லோமபரியாயோ, இத⁴ பன லோமவிஸேஸவாசகோதி ஆஹ ‘‘உண்ணலோம’’ந்தி. நலாடமஜ்ஜ²ஜாதாதி நலாடமஜ்ஜ²க³தா. ஓதா³ததாய உபமா, ந முது³தாய. ரஜதபுப்³பு³ளகாதி ரஜதமயதாரகா.

த்³வே அத்த²வஸே படிச்ச வுத்தந்தி யஸ்மா பு³த்³தா⁴ சக்கவத்தினோ ச பரிபுண்ணனலாடதாய பரிபுண்ணஸீஸபி³ம்ப³தாய ச ‘‘உண்ஹீஸஸீஸா’’தி வுச்சந்தி, தஸ்மா தே த்³வே அத்த²வஸே படிச்ச ‘‘உண்ஹீஸஸீஸோ’’தி இத³ம் வுத்தம். இதா³னி தம் அத்த²த்³வயம் ப⁴க³வதி ஸுப்பதிட்டி²தந்தி த³ஸ்ஸேதும் ‘‘ததா²க³தஸ்ஸஹீ’’திஆதி³ வுத்தம். ஸண்ஹதமதாய ஸுவண்ணவண்ணதாய ச ரஞ்ஞோ ப³த்³த⁴உண்ஹீஸபட்டோ விய விரோசதி. கப்பஸீஸாதி த்³விதா⁴பூ⁴தஸீஸா. ப²லஸீஸாதி ப²லஸதி³ஸஸீஸா. அட்டி²ஸீஸாதி மம்ஸஸ்ஸ அபா⁴வதோ தசோபரியோனத்³த⁴அட்டி²மத்தஸீஸா. தும்ப³ஸீஸாதி லாபு³ஸதி³ஸஸீஸா. பப்³பா⁴ரஸீஸாதி பிட்டி²பா⁴கே³ன ஓலம்ப³மானஸீஸா. புரிமனயேனாதி பரிபுண்ணனலாடதாபக்கே²ன. உண்ஹீஸவேடி²தஸீஸோ வியாதி உண்ஹீஸபட்டேன வேடி²தஸீஸபதே³ஸோ விய. உண்ஹீஸம் வியாதி சே²கேன ஸிப்பினா விரசிதஉண்ஹீஸமண்ட³லம் விய.

கம்மந்தி யேன யேன கம்மேன யம் யம் லக்க²ணம் நிப்³ப³த்தம், தம் தம் கம்மம். கம்மஸரிக்க²கந்தி தஸ்ஸ தஸ்ஸ லக்க²ணஸ்ஸ தம்கம்மானுரூபதா. லக்க²ணந்தி தஸ்ஸ மஹாபுரிஸலக்க²ணஸ்ஸ அவிபரீதஸபா⁴வோ. லக்க²ணானிஸம்ஸந்தி தம் லக்க²ணபடிலாபே⁴ன லத்³த⁴ப்³ப³கு³ணோ. இமானி கம்மாதீ³னீதி இமானி அனந்தரம் வுத்தானி கம்மகம்மஸரிக்க²காதீ³னி த³ஸ்ஸேத்வா தம் ஸரூபதோ விபா⁴வேத்வா கதே²தப்³பா³னி ஸம்வண்ணகேன.

ரதனவிசித்தஸுவண்ணதோரணம் தஸ்மிம் காலே மனுஸ்ஸலோகே நத்தீ²தி வுத்தம் ‘‘தே³வனக³ரே’’தி. ஸப்³ப³ஸோ ஸுபுப்பி²தஸாலருக்கோ² அஸாதா⁴ரணஸோபோ⁴ மனுஸ்ஸூபசாரே ந லப்³ப⁴தீதி ஆஹ ‘‘ஸேலந்தரம்ஹீ’’தி. கிரியாசாரந்தி காயிகவாசஸிககிரியாபவத்திம்.

387. ஸததபாடிஹாரியந்தி ஸததம் சரிமப⁴வே ஸப்³ப³காலம் லக்க²ணனிப்³ப³த்தககம்மானுபா⁴வஹேதுகம் பு³த்³தா⁴வேணிகம் பாடிஹாரியம். பு³த்³தா⁴னம் அதிதூ³ரே பாத³ம் நிக்கி²பிதுகாமானம்பி நாதிதூ³ரே ஏவ நிக்கி²பனம் ஹோதீதி ‘‘ந அதிதூ³ரே ட²பேஸ்ஸாமீதி உத்³த⁴ரதீ’’தி வுத்தம். பகதிஸஞ்சரணவஸேனேதம் வுத்தம், தாதி³ஸேன பாதே³ன அனேகயோஜனே ட²பேஸ்ஸாமீதி உத்³த⁴ரணம்பி ஹோதியேவ. அதிதூ³ரம் ஹீதிஆதி³ பமாணாதிக்கமே தோ³ஸத³ஸ்ஸனம். ஏவம் ஸதீதி ஏவம் த³க்கி²ணபாத³வாமபாதா³னம் யதா²தி⁴ப்பேதபதிட்டி²தட்டா²னே ஸதி. பத³விச்சே²தோ³தி பத³வாரவிச்சே²தோ³. யாதி³ஸம் பஸாரேந்தோ வாமபாத³ஸ்ஸ உத்³த⁴ரணம் பதிட்டா²னஞ்ச, த³க்கி²ணபாத³ஸ்ஸ தாதி³ஸமேவ, இதி நேஸம் உத்³த⁴ரணபதிட்டா²னானம் ஸமானதோ அஞ்ஞமஞ்ஞபா⁴வேன அனூனானதி⁴கதாய வுத்தம் ‘‘த³க்கி²ணபாத³கிச்சம் வாமபாதே³ன நியமிதம், வாமபாத³கிச்சம் த³க்கி²ணபாதே³ன நியமித’’ந்தி.

தி³வாதி உபகட்டா²ய வேலாய. விஹாரப⁴த்தத்தா²யாதி விஹாரே யதா²வுத்³த⁴ம் க³ஹேதப்³ப³ப⁴த்தத்தா²ய. பச்ச²தோ ஆக³ச்ச²ந்தோதி பகதிக³மனேன பச்ச²தோ ஆக³ச்ச²ந்தோ. ஓகாஸம் ந லப⁴தீதி பத³னிக்கே²பட்டா²னம் ந லப⁴தி. ஊருபரியாயோ இத⁴ ஸத்தி²-ஸத்³தோ³தி ஆஹ ‘‘ந ஊரும் உன்னாமேதீ’’தி. த³ண்ட³ங்குஸம் வுச்சதி தீ³க⁴த³ண்டோ³ அங்குஸோ, தேன ருக்க²ஸாக²ம் சி²ந்த³தோ புரிஸஸ்ஸ யதா² பச்சா²பா⁴கே³ன பாதா³னம் ஓஸக்கனம் ஹோதி, ஏவம் ப⁴க³வதோ பாதா³ ந ஓஸக்கந்தீதி ஆஹ ‘‘ருக்க²ஸாகா²சே²த³ன…பே… ஓஸக்காபேதீ’’தி. ஓப³த்³தா⁴னாப³த்³த⁴ட்டா²னேஹி பாத³ம் கோட்டேந்தோ வியாதி ஆப³த்³த⁴ட்டா²னேன அனாப³த்³த⁴ட்டா²னேன ச பாத³க²ண்ட³ம் கோட்டேத்வா த²த்³த⁴ம் கரோந்தோ விய. ந இதோ சிதோ ச சாலேதீதி அபராபரம் ந சாலேதி. உஸ்ஸங்க²பாத³தாய ஸுகே²னேவ பாதா³னம் பரிவத்தனதோ நாபி⁴தோ பட்டா²ய உபரிமகாயோ ந இஞ்ஜதீதி ஹேட்டி²மகாயோவ இஞ்ஜதி. தேனாஹ ‘‘உபரிம…பே… நிச்சலோ ஹோதீ’’தி. ந ஜானாதி அனிஞ்ஜனதோ. காயப³லேனாதி க³மனபயோக³ஸங்கா²தேன காயக³தேன விஸேஸப³லேன. ஜவக³மனஹேதுபூ⁴தேன வா காயப³லேன. தேனாஹ ‘‘பா³ஹா கி²பந்தோ’’திஆதி³. ஜவேன க³ச்ச²ந்தோ ஹி பா³ஹா கி²பதி, ஸரீரதோ ஸேதா³ முச்சந்தி. நாகா³பலோகிதவஸேனாதி நாக³ஸ்ஸ அபலோகனமிவ ஸகலகாயேனேவ பரிவத்தேத்வா அபலோகனவஸேன.

அனாவரணஞாணஸ்ஸாதி அனாவரணஞாணப³லேன த³ஸ்ஸனஸ்ஸ. அனாவரணவாரோ பன காயே பதிட்டி²தரூபத³ஸ்ஸனம்பி அனாவரணமேவாதி த³ஸ்ஸனத்த²ம் வுத்தோ. இந்த³கீ²லதோ பட்டா²யாதி நக³ரத்³வாரே இந்த³கீ²லதோ பட்டா²ய. பகதிஇரியாபதே²னேவாதி ஓனமனாதி³ம் அகத்வா உஜுகக³மனாதி³னா ஏவ. யதி³ ஏவம் கோட்ட²கத்³வாரகே³ஹப்பவேஸே கத²ந்தி ஆஹ ‘‘த³லித்³த³மனுஸ்ஸான’’ந்திஆதி³. பரிவத்தேந்தேனாதி நிபஜ்ஜனத்த²ம் காயம் பரிவத்தேந்தேன.

ஹத்தே²ஹி க³ஹேத்வாதி உபோ⁴ஹி ஹத்தே²ஹி உபோ⁴ஸு கடிப்பதே³ஸேஸு பரிக்³க³ஹேத்வா. பததி நிஸீத³னட்டா²னே நிபஜ்ஜனவஸேன பததி. ஓரிமம் அங்க³ம் நிஸ்ஸாய நிஸின்னோதி பல்லங்கமாபு⁴ஜித்வா உக்குடிகனிஸஜ்ஜாய உபரிமகாயம் ஹேட்டி²மகாயே பதிட்ட²பேந்தோயேவ பா⁴ரீகரணவஸேன ஓரிமங்க³ம் நிஸ்ஸாய நிஸின்னோ. க⁴ம்ஸந்தோதி ஆனிஸத³தே³ஸேன ஆஸனட்டா²னம் க⁴ம்ஸந்தோ. பாரிமங்க³ந்தி ஸத்தி²பா⁴க³ஸம்மத்³த³ம் ஆனிஸத³பதே³ஸம். ததே²வாதி க⁴ம்ஸந்தோ ஏவ. ஓலம்ப³கம் தா⁴ரேந்தோ வியாதி ஓலம்ப³கஸுத்தம் ஓதாரேந்தோ விய. தேன உஜுகமேவ நிஸீத³னமாஹ. ஸரீரஸ்ஸ க³ருகபா⁴வஹேதூனம் தூ³ரதோ ஸமுபாயிதபா⁴வேன ஸல்லஹுகபா⁴வதோ தூலபிசும் ட²பேந்தோ விய.

அப்பேஸக்கா²னம் மஹானுபா⁴வகே³ஹப்பவேஸே ஸியா ச²ம்பி⁴தத்தம், சித்தக்கோ²போ⁴, த³ரத²வஸேன நானப்பகாரகப்பனம், ப⁴யவஸேன தண்ஹாவஸேன பரிதஸ்ஸனம், தம் ஸப்³ப³ம் ப⁴க³வதோ நத்தீ²தி த³ஸ்ஸேதும் பாளியம் ‘‘ந ச²ம்ப⁴தீ’’திஆதி³ (ம. நி. 2.387) வுத்தந்தி ஆஹ ‘‘ந ச²ம்ப⁴தீ’’திஆதி³.

உத³கம் தீ³யதி ஏதேனாதி உத³கதா³னம், பி⁴ங்காராதி³ உத³கபா⁴ஜனம். ப³த்³த⁴ம் கத்வாதி ஹத்த²க³தமத்திகம் விய அத்தனோ வஸே அவத்தந்தம் கத்வா. பரிவத்தேத்வாதி குஜ்ஜித்வா. விச²ட்³ட³யமானோ உத³கஸ்ஸ விக்கி²பனவஸேன ச²ட்³ட³யமானோ.

ததா² ந க³ண்ஹாதி, ப்³யஞ்ஜனமத்தாய ஏவ க³ண்ஹந்தோ. ப⁴த்தம் வா அமனாபந்தி ஆனேத்வா யோஜனா. ப்³யஞ்ஜனேன ஆலோபஅதினாமனம், ஆலோபேன ப்³யஞ்ஜனஅதினாமனந்தி இமேஸு பன த்³வீஸு பட²மமேவ அஸாருப்பதாய அனிட்ட²ம் வஜ்ஜேதப்³ப³ந்தி பாளியம் படிக்கி²த்தந்தி த³ட்ட²ப்³ப³ம். ஸப்³ப³த்தே²வாதி ஸப்³ப³ஸ்மிம் ஆஹரிதப்³ப³வத்து²ஸ்மிம் ஸுபணீதபா⁴வேன ரஸோ பாகடோ ஹோதி ஞாணேன பரிஞ்ஞாதத்தா. ரஸகே³தோ⁴ பன நத்தி² ஸேதுகா⁴தத்தா.

அஸ்ஸாதி ‘‘நேவ த³வாயா’’திஆதி³பத³ஸ்ஸ. வுத்தமேதந்தி ‘‘விஸுத்³தி⁴மக்³கே³ வினிச்ச²யோ ஆக³தோ’’தி ஸப்³பா³ஸவஸுத்தே (ம. நி. 1.23) ஸம்வண்ணயந்தேன வுத்தமேதம், தஸ்மா ந ஏத்த² தம் வத்தப்³ப³ந்தி அதி⁴ப்பாயோ, தஸ்மா யோ தஸ்மிம் தஸ்மிம் வினிச்ச²யே விஸேஸவாதோ³ இச்சி²தப்³போ³. ஸோ பரமத்த²மஞ்ஜூஸாய விஸுத்³தி⁴மக்³க³வண்ணனாய வுத்தனயேனேவ வேதி³தப்³போ³. பத்தஸ்ஸ க³ஹணட்டா²னந்தி ஹத்தே²ன பத்தஸ்ஸ க³ஹணபதே³ஸம். வினிவத்தித்வாதி பத்தே ஸப்³ப³ம் ஆமிஸக³தம் ஸத்³தி⁴ம் ப⁴த்தேன வினிவத்தித்வா க³ச்ச²தி. பமாணாதிக்கந்தந்தி கேலாயனவஸேன அதிக்கந்தபமாணம் ஆரக்க²ம் ட²பேதி. சீவரபோ⁴க³ந்தரந்தி சீவரபடலந்தரம். உத³ரேன அக்கமித்வாதி உத³ரேனேவ ஸன்னிரும்பி⁴த்வா.

அப்பத்தகாலம் அபி⁴முக²ம் நாமேதி உபனாமேதீதி அதினாமேதி, பத்தகாலம் அதிக்காமேந்தோ நாமேதி அபனேதீதி அதினாமேதி. உப⁴யம்பி ஏகஜ்ஜ²ம் க³ஹேத்வா பாளியம் ‘‘ந ச அனுமோத³னஸ்ஸ காலமதினாமேதீ’’தி வுத்தந்தி த³ஸ்ஸேந்தோ ‘‘யோ ஹீ’’திஆதி³மாஹ.

வேக³க³மனேன படிஸம்முஞ்சித்வா தா⁴வித்வா க³ச்ச²தி. அச்சுக்கட்ட²ந்தி அதிவிய உத்³த⁴ம் கத்வா கட்³டி⁴தபாருதம். தேனாஹ ‘‘யோ ஹி யாவ ஹனுகட்டி²தோ…பே… ஹோதீ’’தி. அச்சோக்கட்ட²ந்தி அதிவிய ஹேட்டா² கத்வா கட்³டி⁴தபாருதம். தேனாஹ ‘‘யாவ கோ³ப்ப²கா ஓதாரேத்வா’’தி. உப⁴தோ உக்கி²பித்வாதி த³க்கி²ணதோ வாமதோதி உபோ⁴ஸு பஸ்ஸேஸு உத்தராஸங்க³ம் உக்கி²பித்வா. த²னந்தி த³க்கி²ணத²னம்.

விஸ்ஸட்டோ²தி விமுத்தோ. தேனாஹ ‘‘விஸ்ஸட்ட²த்தாயேவ சேஸ விஞ்ஞேய்யோ’’தி. யஸ்மா அமுத்தவாதி³னோ வசனம் அவிஸ்ஸட்ட²தாய ந ஸினிய்ஹதி, ந ஏவம் முத்தவாதி³னோதி ஆஹ ‘‘ஸினித்³தோ⁴’’தி. விஞ்ஞேய்யோதி ஸுபரிப்³யத்ததாய அக்க²ரதோ ச ப்³யஞ்ஜனதோ ச விஞ்ஞாதும் ஸக்குணேய்யோ. தேனாஹ ‘‘பாகடோ’’தி. விஞ்ஞாபனியோதி விஜானிதப்³போ³. ப்³யஞ்ஜனவஸேனேவ சேத்த² விஞ்ஞேய்யதா வேதி³தப்³பா³ கோ⁴ஸஸ்ஸ அதி⁴ப்பேதத்தா. மது⁴ரோதி பியோ பேமனீயோ அபலிபு³த்³தோ⁴. ஸவனமரஹதி, ஸவனஸ்ஸ ஸோதஸ்ஸ ஹிதோதி வா ஸவனீயோ. ஸம்பிண்டி³தோதி ஸஹிதோ. ப⁴க³வதோ ஹி ஸத்³தோ³ உப்பத்திட்டா²னகதாஸஞ்சிதத்தா ஸஹிதாகாரேனேவ ஆபாத²மாக³ச்ச²தி, ந அயோஸலாகாய பஹடகம்ஸதா²லம் விய விப்பகிண்ணோ. தேனாஹ ‘‘அவிஸாரீ’’தி. க³ம்பீ⁴ரோதி யதா² க³ம்பீ⁴ரவத்து²பரிச்சி²ந்த³னேன ஞாணஸ்ஸ க³ம்பீ⁴ரஸமஞ்ஞா, ஏவம் க³ம்பீ⁴ரட்டா²னஸம்ப⁴வதோ ஸத்³த³ஸ்ஸ க³ம்பீ⁴ரஸமஞ்ஞாதி ஆஹ ‘‘க³ம்பீ⁴ரோதி க³ம்பீ⁴ரஸமுட்டி²தோ’’தி. நின்னாத³வாதி ஸவிஸேஸம் நின்னாத³வா. ஸ்வாயம் விஸேஸோ க³ம்பீ⁴ரபா⁴வஸித்³தோ⁴தி ஆஹ ‘‘க³ம்பீ⁴ரத்தாயேவ சேஸ நின்னாதீ³’’தி. ஏவமேத்த² சத்தாரி அங்கா³னி சதுரங்க³னிப்பா²தீ³னி வேதி³தப்³பா³னி. அகாரணா மா நஸ்ஸீதி பு³த்³தா⁴னுபா⁴வேன விய ஸரஸ்ஸ பரிஸபரியந்ததா வுத்தா, த⁴ம்மதாவஸேனேவ பன ஸா வேதி³தப்³பா³ தஸ்ஸ மூலகாரணஸ்ஸ ததா² அவட்டி²தத்தா.

பச்சோஸக்கித்வாதி படினிவத்தித்வா. ஸமுஸ்ஸிதகஞ்சனபப்³ப³தம் விய உபரி இந்த³னீலரதனவிததஸிக²ம் விஜ்ஜுல்லதாபூ⁴ஸிதம். மஹாபத²வீஆத³யோ ஸத்து²கு³ணபடிபா⁴க³தாய நித³ஸ்ஸனம், கேவலம் மஹந்ததாமத்தம் உபாதா³ய நித³ஸ்ஸிதா.

390. அப்படிஸம்விதி³தோதி அனாரோசிதோ. ஆக³மனவஸேன சேத்த² படிஸம்வேதி³தந்தி ஆஹ ‘‘அவிஞ்ஞாதஆக³மனோ’’தி. உக்³க³தபா⁴வந்தி குலபோ⁴க³விஜ்ஜாதீ³ஹி உளாரபா⁴வம். அனுத்³த³யஸம்பன்னாதி காருணிகா.

391. ஸஹஸாவ ஓகாஸகரணேன உச்சகுலீனதா தீ³பிதா ஹோதீதி ஆஹ ‘‘வேகே³ன உட்டா²ய த்³விதா⁴ பி⁴ஜ்ஜித்வா’’திஆதி³.

நாரிஸமானனாமந்தி இத்தி²அத்த²ஜோதகனாமம். தேனாஹ ‘‘இத்தி²லிங்க³’’ந்தி. அவ்ஹாதப்³பா³தி கதே²தப்³பா³.

394. ஏகனீஹாரேனேவ அட்ட² பஞ்ஹே ப்³யாகரோந்தோ. ‘‘புப்³பே³னிவாஸம்…பே… பவுச்சதீ’’தி இமினா புப்³பே³னிவாஸஸ்ஸ விதி³தகாரணம் வுத்தந்தி ஆஹ ‘‘தஸ்ஸ புப்³பே³னிவாஸோ பாகடோ’’தி. தி³ப்³ப³சக்கு²ஞாணம் கதி²தம் தஸ்ஸ பரிப⁴ண்ட³ஞாணபா⁴வதோ யதா²கம்மூபக³ஞாணஸ்ஸ. ‘‘ஜாதிக்க²யம் பத்தோ, அபி⁴ஞ்ஞா வோஸிதோ’’தி ச வுத்தத்தா முனீதி அஸேக்க²முனி இதா⁴தி⁴ப்பேதோதி ஆஹ ‘‘அரஹத்தஞாணமோனேய்யேன ஸமன்னாக³தோ’’தி.

கிலேஸராகே³ஹி கிலேஸவிவண்ணதாஹி. ஜாதிக்க²யப்பத்தத்தா ‘‘அதோ² ஜாதிக்க²யம் பத்தோ’’தி வுத்தத்தா. அபி⁴ஜானித்வாதி அபி⁴விஸிட்ட²தாய அக்³க³மக்³க³பஞ்ஞாய ஞத்வா. இதா³னி படிஸம்பி⁴தா³யம் ஆக³தனயேன பரிஞ்ஞாபஹானபா⁴வனாஸச்சி²கிரியாஸமாபத்தீனம் பாரக³மனேன பாரகூ³தி அயமேத்த² அத்தோ²தி த³ஸ்ஸேதும் ‘‘பாரகூ³தி வா’’திஆதி³ வுத்தம். அபி⁴ஞ்ஞேய்யத⁴ம்மானம் ஜானனவஸேன அபி⁴ஞ்ஞாபாரகூ³. தாதி³ஸோதி யாதி³ஸோ ‘‘பாரகூ³ ஸப்³ப³த⁴ம்மான’’ந்தி பத³த்³வயேன வுத்தோ, தாதி³ஸோ. ச²ஹி ஆகாரேஹீதி பஜானனாதீ³ஹி யதா²வுத்தேஹி ச²ஹி ஆகாரேஹி.

காமஞ்சேத்த² த்³வே ஏவ புச்சா²கா³தா² த்³வே ச விஸ்ஸஜ்ஜனாகா³தா², புச்சா²படிபாடியா பன அஸங்கரதோ ச விஸ்ஸஜ்ஜனம் பவத்ததி, தம் நித்³தா⁴ரேதும் கிம் பனாதிஆதி³ வுத்தம். வேதே³ஹி க³தத்தாதி வேதே³ஹி மக்³க³ஞாணேஹி பாரங்க³தத்தா. புப்³பே³னிவாஸந்திஆதீ³ஹி விஜ்ஜானம் அத்தி²தாய போ³தி⁴தத்தா. பாபத⁴ம்மானந்தி ச²த்திம்ஸபாபத⁴ம்மானம் ஸோத்தா²னம் மக்³க³ம் பாபனேன நிஸ்ஸேஸதோ ஸோதி⁴தத்தா.

395. த⁴ம்மோ நாம அரஹத்தமக்³கோ³ குஸலத⁴ம்மேஸு உக்கம்ஸபாரமிப்பத்தியா உக்கட்ட²னித்³தே³ஸேன. தஸ்ஸ அனுரூபத⁴ம்மபா⁴வதோ அனுத⁴ம்மோ நாம ஹேட்டி²மமக்³க³ப²லத⁴ம்மா. யோ ஸத்து² ஸந்திகே த⁴ம்மம் ஸுத்வா யதா²னுஸிட்ட²ம் ந படிபஜ்ஜதி, ஸோ ததா²க³தம் த⁴ம்மாதி⁴கரணம் விஹேடே²தி நாம. யோ பன படிபஜ்ஜந்தோ ச த³ந்தா⁴பி⁴ஞ்ஞதாய கம்மட்டா²னஸோத⁴னத்த²ம் அந்தரந்தரா ப⁴க³வந்தம் உபஸங்கமித்வா அனேகவாரம் கதா²பேதி, ஸோ ஏத்தாவதா த⁴ம்மாதி⁴கரணம் ததா²க³தம் விஹேடே²தீதி ந வத்தப்³போ³. ந ஹி ப⁴க³வதோ த⁴ம்மதே³ஸனாய பரிஸ்ஸமோ அத்தி², அயஞ்ச அத்தோ² மஹாஸுத³ஸ்ஸனஸுத்தாதீ³ஹி (தீ³. நி. 2.241 ஆத³யோ) தீ³பேதப்³போ³, தஸ்மா – ‘‘ஸச்சத⁴ம்மஸ்ஸ அனுத⁴ம்ம’’ந்தி வத்தப்³பே³ வுத்தமேவ ப்³யதிரேகமுகே²ன விபா⁴வேதும் ‘‘ந ச மம் த⁴ம்மாதி⁴கரணம் விஹேஸேஸீ’’தி வுத்தந்தி த³ட்ட²ப்³ப³ம். தத்த² பரினிப்³பா³யீதி பரகாலே சேத்த² பரினிப்³பா³னம்பி ஸங்க³ய்ஹதி, தம் பன இமஸ்மிம் க³ஹிதமேவ ஹோதீதி ஆஹ ‘‘தே³ஸனாய அரஹத்தேனேவ கூடம் க³ஹித’’ந்தி.

ப்³ரஹ்மாயுஸுத்தவண்ணனாய லீனத்த²ப்பகாஸனா ஸமத்தா.