2. ஸேலஸுத்தவண்ணனா

396. கேணியோதி தஸ்ஸ நாமம், புப்³பே³ கேணியா ஜீவிகாகப்பனதோதி வத³ந்தி. ஜடிலோதி ஜடாத⁴ரோ. ப்³ராஹ்மணஜாதிகத்தா கோடிஸாரதாய ச ப்³ராஹ்மணமஹாஸாலோ. பயோஜேத்வா நிஸ்ஸயோ ஹுத்வா வஸதி, ரத்திம் காமஸம்பத்திம் அனுப⁴வதீதி வா யோஜனா. ஸுஸங்க²தந்தி ஸப்பிமது⁴ஸக்கராதீ³ஹி சேவ மரிசஸிங்கீ³வேராதீ³ஹி ச ஸுட்டு² அபி⁴ஸங்க²தம்.

படிக்கே²பபஸன்னதாயாதி அஹோவதாயம் அப்பிச்சோ², யோ நிமந்தியமானோபி ந ஸாதி³யதீதி உபனிமந்தியமானஸ்ஸ படிக்கே²பே தித்தி²யானம் பஸன்னபா⁴வதோதி. தம் கத²ம்? விருத்³த⁴மேதந்தி ‘‘அகாரணமேத’’ந்தி படிக்கி²பதி.

398. கப்பஸஹஸ்ஸேஹிபி…பே… அஹோஸீதி இத³ம் நானுஸ்ஸவஸித்³த⁴ம் அனுமானக்³க³ஹணம் ஸந்தா⁴யாஹ. பதே³தி உத்தரபத³லோபேன நித்³தே³ஸோதி ஆஹ ‘‘பத³ப்பமாணே’’தி. பஜ்ஜதி நிக்கி²பதி ஏத்தா²தி வா பத³ம் பகதியா பாத³னிக்கி²பட்டா²னம், தஸ்மிம் பதே³. கீளாபஸுததாதி³னா பமாத³ம் ஆபஜ்ஜதி. போ³தி⁴ஸத்தசாரிகந்தி து³க்கரசரியம் ஸந்தா⁴ய வத³தி.

399. பரிபுண்ணதாயாதி அனூனதாய. அஹீனங்க³தாயாதி அவேகல்லபா⁴வதோ. ரோசதீதி ருசி, தே³ஹப்பபா⁴, ஸோப⁴ணா ருசி ஏதஸ்ஸாதி ஸுருசி. ஆரோஹஸம்பத்தி காயஸ்ஸ பமாணயுத்தஉச்சதா. பரிணாஹஸம்பத்தி கிஸதூ²லபா⁴வவஜ்ஜிதபரிணாஹதா. ஸண்டா²னஸம்பத்தி அவயவானம் ஸுஸண்டி²ததா. சாருத³ஸ்ஸனோதி பியத³ஸ்ஸனோ தேனாஹ ‘‘ஸுசிரம்பீ’’திஆதி³. ஸுவண்ணஸதி³ஸவண்ணோதி ஜாதிஹிங்கு³லகேன மத்³தி³த்வா ஸிலானிக⁴ம்ஸேனேவ பரிகம்மம் கத்வா ட²பிதக⁴னஸுவண்ணரூபவண்ணோ. மஹாபுரிஸபா⁴வம் ப்³யஞ்ஜேந்தி பகாஸேந்தீதி ப்³யஞ்ஜனானி, மஹாபுரிஸலக்க²ணானீதி ஆஹ ‘‘பட²மம் வுத்தப்³யஞ்ஜனானேவா’’தி.

புப்³பே³ வுத்தந்தி ‘‘ஸுருசீ’’தி புப்³பே³ வுத்தம், ‘‘ஆதி³ச்சோவ விரோசஸீ’’தி புன வுத்தம். ‘‘சாருத³ஸ்ஸனோ ஸுவண்ணவண்ணோஸீ’’தி புப்³பே³ வுத்தம், ‘‘கல்யாணத³ஸ்ஸனோ பி⁴க்கு² கஞ்சனாப⁴த்தசோ’’தி புன வுத்தந்தி இமமத்த²ம் ஸந்தா⁴யாஹ ‘‘உத்தரகா³தா²யபி ஏஸேவ நயோ’’தி. ஸாதிஸயம் உத்தமவண்ணே வண்ணேத்வா உத்தமவண்ணினோதி பதே³ன ஸந்தம் பகாஸேதீதி ஆஹ ‘‘உத்தமவண்ணஸம்பன்னஸ்ஸா’’தி. உத்தமஸாரதீ²தி ஸேட்ட²புரிஸஸாரதி². தத்த² தத்த² ஜம்பு³வனஸண்ட³மண்டி³ததாய ஜம்பு³தீ³போ ‘‘ஜம்பு³ஸண்டோ³’’தி வுச்சதி. இஸ்ஸரியந்தி சக்கவத்திஸ்ஸரியம்.

ஜாதிக²த்தியாதி ஜாதிமந்தோ க²த்தியா. ராஜாபி⁴ராஜாதி ஏத்த² அபி⁴-ஸத்³தோ³ பூஜத்தோ²தி ஆஹ ‘‘ராஜூனம் பூஜனீயோ’’தி.

அப்பமாணாதி அபரிமாணா லோகதா⁴துயோ. ‘‘யாவதா பன ஆகங்கே²ய்யா’’தி (அ. நி. 3.81) ஹி வுத்தம். த⁴ம்மராஜா அனுத்தரோதி ஏத்த² வுத்தஅனுத்தரபா⁴வம் ‘‘யாவதா ஹீ’’திஆதி³னா பாகடதரம் கத்வா த⁴ம்மராஜபா⁴வம் விபா⁴வேதும் ‘‘ஸ்வாஹ’’ந்திஆதி³ வுத்தம். த⁴ம்மேனாதி படிவேத⁴த⁴ம்மேன. தேனாஹ ‘‘அனுத்தரேனேவா’’தி. அனுத்தரேனாதி விஸிட்டே²ன உத்தமேன. இமஸ்மிம் பக்கே² த⁴ம்மேனாதி படிபத்தித⁴ம்மேனாதிபி ஸங்க³ய்ஹதி. பரியத்தித⁴ம்மேனாதி தே³ஸனாத⁴ம்மேன ஆணாசக்கம் பவத்தேமீதி யோஜனா. தே³ஸனாஞாணபடிவேத⁴ஞாணவிபா⁴க³ம் த⁴ம்மசக்கமேவ வா. அப்படிவத்தியந்தி படிவத்திதும் அஸக்குணேய்யம்.

ததா²க³தேன ஜாதோதி ததா²க³தேன ஹேதுனா அரியாய ஜாதியா ஜாதோ. ஹேதுஅத்தே² கரணவசனம். அனுஜாதோதி ச வுத்தே அனு-ஸத்³த³ஸ்ஸ வஸேன ததா²க³தந்தி ச உபயோக³வசனமேவ ஹோதி, ஸோ ச அனு-ஸத்³தோ³ ஹேதுஅத்த²ஜோதகோதி ஆஹ ‘‘ததா²க³தம் ஹேதும் அனுஜாதோ’’தி. அவஞ்ஞாதப்³ப³பா⁴வேன ஜாதோதி அவஜாதோ து³ப்படிபன்னத்தா. தேனாஹ ‘‘து³ஸ்ஸீலோ’’தி. ததா² ஹி வுத்தம் கோகாலிகம் ஆரப்³ப⁴ ‘‘புரிஸந்தகலி அவஜாதோ’’தி. புத்தோ நாம ந ஹோதி தஸ்ஸ ஓவாதா³னுஸாஸனியம் அட்டி²தத்தா. ஏவமாஹாதி ‘‘அனுஜாதோ ததா²க³த’’ந்தி ஏவமாஹ.

விஜ்ஜாதி மக்³க³விஜ்ஜா. உக்கட்ட²னித்³தே³ஸேன விமுத்தீதி ப²லவிமுத்தி. நனு ச மக்³கோ³ பா⁴வேதப்³பே³ன க³ஹிதோதி? ஸச்சம் க³ஹிதோ, ஸப்³பே³ ச பன ஸத்த த⁴ம்மா அபி⁴ஞ்ஞேய்யாதி விஜ்ஜாய அபி⁴ஞ்ஞேய்யபா⁴வோ வுத்தோ. இமினா வா நயேன ஸப்³பே³ஸம்பி அபி⁴ஞ்ஞேய்யபா⁴வோ வுத்தோ ஏவாதி வேதி³தப்³போ³. ப²லேன வினா ஹேதுபா⁴வஸ்ஸேவ அபா⁴வதோ ஹேதுவசனேன ப²லஸித்³தி⁴, நிரோத⁴ஸ்ஸ ச ஸம்பாபனேன மக்³க³ஸ்ஸ ஹேதுபா⁴வோ. து³க்க²ஸ்ஸ நிப்³ப³த்தனேன தண்ஹாய ஸமுத³யபா⁴வோதி இமமத்த²ம் ஸங்க³ஹிதமேவ அத்த²தோ ஆபன்னத்தா. யுத்தஹேதுனாதி யுத்தியுத்தேன ஹேதுனா பு³த்³த⁴பா⁴வம் ஸாதே⁴தி ஸச்சவினிமுத்தஸ்ஸ பு³ஜ்ஜி²தப்³ப³ஸ்ஸ அபா⁴வதோ ஸச்சஸம்போ³த⁴னேனேவ ச தஸ்ஸ அனவஸேஸதோ பு³த்³த⁴த்தா. அத்த²வசனஞ்சேதம், பயோக³வசனானி பன – ப்³ராஹ்மண, அஹம் ஸம்மாஸம்பு³த்³தோ⁴ ஸப்³ப³தா² அவிபரீதத⁴ம்மதே³ஸனோ, ஸம்மாஸம்பு³த்³த⁴த்தா ஸப்³ப³த்த² அவிபரீதமாசிக்க²தி யதா²ஹம் ஸப்³ப³மக்³க³தே³ஸகோதி. கிம் பன ப⁴க³வா ஸயமேவ அத்தனோ ஸம்மாஸம்பு³த்³த⁴பா⁴வம் ஆரோசேதீதி? மஹாகருணாய அஞ்ஞேஸம் மஹாவிஸயதோ. தத்த² ‘‘ஏகோம்ஹி ஸம்மாஸம்பு³த்³தோ⁴, ஸப்³பா³பி⁴பூ⁴ ஸப்³ப³விதூ³ஹமஸ்மீ’’திஆதீ³னி (மஹாவ. 11; ம. நி. 1.285; 2.341; கதா². 405) ஸுத்தபதா³னி இத³மேவ ச ஸுத்தபத³ம் ஏதஸ்ஸ அத்த²ஸ்ஸ ஸாத⁴கம்.

ஸல்லகந்தனோதி ஸல்லானம் ஸமுச்சி²ன்னத்தா. ரோக³ஸ்ஸாதி கிலேஸரோக³ஸ்ஸ. தஸ்மாதி அபுனபவத்திபாத³னேன திகிச்ச²னதோ. ப்³ரஹ்மம் வா ஸேட்ட²ம் ஸம்மாஸம்போ³தி⁴ம் பத்தோதி ப்³ரஹ்மபூ⁴தோ. ஏவம் ஆக³தாயாதி இமினா –

‘‘காமா தே பட²மா ஸேனா, து³தியா அரதி வுச்சதி;

ததியா கு²ப்பிபாஸா தே, சதுத்தீ² தண்ஹா பவுச்சதி.

தி²னமித்³த⁴ம் தேபஞ்சமம் தி²னமித்³த⁴ம் தே, ச²ட்டா² பீ⁴ரூ பவுச்சதி;

ஸத்தமீ விசிகிச்சா² தே, மக்கோ² த²ம்போ⁴ தே அட்ட²மோ.

லாபோ⁴ ஸிலோகோ ஸக்காரோ, மிச்சா²லத்³தோ⁴ ச யோ யஸோ;

யோ சத்தானம் ஸமுக்கம்ஸே, பரே ச அவஜானதி;

ஏஸா நமுசி தே ஸேனா, கண்ஹஸ்ஸாபி⁴ப்பஹாரினீ’’தி. (ஸு. நி. 438-441);

ஏவம் வுத்தம் நவவித⁴ம் ஸேனம் ஸங்க³ய்ஹதி. வஸே வத்தேத்வாதி ஸமுச்சி²ந்த³னேன அனுப்பாத³தாபாத³னேன வஸே வத்தேத்வா. குதோசி அப⁴யோ நிப்³ப⁴யோ.

ஸயமேவ த³ட்ட²ப்³ப³ந்தி யேன யேன அதி⁴க³தோ, தேன தேன பரஸத்³தா⁴ய க³ந்தப்³ப³ம் ஹித்வா அஸம்மோஹதோ பச்சவேக்க²ணாஞாணேனேவ ஸாமம் த³ட்ட²ப்³ப³ம். தேனாஹ ‘‘பச்சக்க²’’ந்தி. பஸட்டா² தி³ட்டி² ஸந்தி³ட்டி². யதா² ரதே²ன ஜயதீதி ரதி²கோ, ஏவம் இத³ம் மக்³க³ப்³ரஹ்மசரியம் ஸந்தி³ட்டி²யா ஜயதீதி ஸந்தி³ட்டி²கம். அத² வா தி³ட்ட²ந்தி த³ஸ்ஸனம் வுச்சதி, தி³ட்ட²மேவ ஸந்தி³ட்ட²ம், ஸந்த³ஸ்ஸனந்தி அத்தோ². ஸந்தி³ட்ட²ம் அரஹதீதி ஸந்தி³ட்டி²கோ யதா² வத்த²யுக³ம் அரஹதீதி வத்த²யுகி³கோ. ஸந்தி³ட்டி²கம் ப²லதா³னம் ஸந்தா⁴ய நாஸ்ஸ காலோதி அகாலம், அகாலமேவ அகாலிகம், ந காலந்தரம் கே²பேத்வா ப²லம் தே³தி, அத்தனோ பன பவத்திஸமனந்தரமேவ ப²லம் தே³தீதி அத்தோ². அத² வா அத்தனோ ப²லப்பதா³னே பகட்டோ² காலோ பத்தோ அஸ்ஸாதி காலிகோ, லோகியோ குஸலத⁴ம்மோ, இத³ம் பன ஸமனந்தரப²லத்தா ந காலிகம்.

400. ‘‘மஹாயஞ்ஞம் பவத்தயீ’’திஆதீ³ஸு கேவலம் தா³னத⁴ம்மாதீ³ஸு யஞ்ஞபரியாயஸம்ப⁴வதோ ‘‘ப்³ராஹ்மணானம் யஞ்ஞாபா⁴வதோ’’தி வுத்தம். ப்³ராஹ்மணா ஹி ‘‘அக்³கி³முகா² தே³வா’’தி அக்³கி³ஜுஹனபுப்³ப³கம் யஞ்ஞம் வித³ஹந்தி. தேனாஹ ‘‘அக்³கி³ஜுஹனப்பதா⁴னாதி அத்தோ²’’தி ‘‘பூ⁴ர்பு⁴வ? ஸ்வ?’’ இதி ஸாவித்தீ புப்³ப³கத்தா முக²ம் புப்³ப³ங்க³மம். ‘‘முக²மிவ முக²’’ந்திஆதீ³ஸு விய இதா⁴பி பதா⁴னபரியாயோ முக²ஸத்³தோ³தி த³ஸ்ஸேந்தோ ‘‘மனுஸ்ஸானம் ஸேட்ட²தோ ராஜா ‘முக²’ந்தி வுத்தோ’’தி ஆஹ. ஆதா⁴ரதோதி ஓகா³ஹந்தீனம் நதீ³னம் ஆதா⁴ரபா⁴வதோ படிஸரணதோ க³ந்தப்³ப³ட்டா²னபா⁴வதோ. ஸஞ்ஞாணதோதி சந்த³யோக³வஸேன அஜ்ஜ அஸுகனக்க²த்தந்தி பஞ்ஞாயனதோ. ஆலோககரணதோதி நக்க²த்தானி அபி⁴ப⁴வித்வா ஆலோககரணதோ. ஸோம்மபா⁴வதோதி ஸீதஹிமவாஸீதவாதூபக்க²ரபா⁴வதோ. தபந்தானந்தி தீ³பஸிகா² அக்³கி³ஜாலா அஸனிவிசக்கந்தி ஏவமாதீ³னம் விஜ்ஜலந்தானம். ஆயமுக²ம் அக்³க³த³க்கி²ணேய்யபா⁴வேன.

தி³ப்³ப³சக்கு² த⁴ம்மசக்கு² பஞ்ஞாசக்கு² பு³த்³த⁴சக்கு² ஸமந்தசக்கூ²தி இமேஹி பஞ்சஹி சக்கூ²ஹி. தே ஸரணஸ்ஸாதி தே ஸரணஸ்ஸ ச, தே ஸரணபா⁴வமூலகத்தா இதரத்³வயஸ்ஸ ச, யதா²வுத்த தே-பதே³ன வுத்தத்த²தோ பரஸ்ஸ சாதி அத்தோ². இத³ம் வுத்தம் ஹோதி – ‘‘தே துய்ஹம், இதரஸ்ஸ ச ஸரணஸ்ஸ அஹோ ஆனுபா⁴வோ’’தி. ஆவுத்திவஸேன வா தே ஸரணஸ்ஸாதி ஏத்த² அத்தோ² விபா⁴வேதப்³போ³ – துய்ஹம் ஸரணபூ⁴தஸ்ஸ ச இதரஸரணஸ்ஸ ச ஆனுபா⁴வோதி. ஸேஸம் ஸுவிஞ்ஞேய்யமேவ.

ஸேலஸுத்தவண்ணனாய லீனத்த²ப்பகாஸனா ஸமத்தா.