6. லடுகிகோபமஸுத்தவண்ணனா

148. மஹாஉதா³யித்தே²ரோதி காளுதா³யிலாளுதா³யித்தே²ரேஹி அஞ்ஞோ மஹாதே³ஹதாய மஹாஉதா³யீதி ஸாஸனே பஞ்ஞாதோ தே²ரோ. அபஹரி அபஹரதி அபஹரிஸ்ஸதீதி அபஹத்தா. தேகாலிகோ ஹி அயம் ஸத்³தோ³. உபஹத்தாதி ஏத்தா²பி ஏஸேவ நயோ. அபஹாரகோதி அபனேதா. உபஹாரகோதி உபனேதா.

149. யந்தி பு⁴ம்மத்தே² பச்சத்தவசனம், தேன ச அனந்தரனித்³தி³ட்ட²ஸமயோ பச்சாமட்டோ²தி ஆஹ ‘‘யஸ்மிம் ஸமயே’’தி. ந ப⁴க³வந்தம் படிச்சாதி ந ப⁴க³வந்தம் ஆரம்மணம் கத்வா.

கம்மனிப்ப²ன்னத்த²ந்தி அத்தனா ஆயாசியமானகம்மஸித்³தி⁴அத்த²ம். ப⁴வதீதி பூ⁴, ந பூ⁴தி அபூ⁴, ப⁴யவஸேன பன ஸா இத்தீ² ‘‘அபு⁴’’ந்தி ஆஹ. ஆது மாதூதி ஏத்த² யதா² –

‘‘அங்கா³ அங்கா³ ஸம்ப⁴வஸி, ஹத³யா அதி⁴ஜாயஸே;

அத்தா ஏவ புத்த நாமாஸி, ஸ ஜீவ ஸரதோ³ஸத’’ந்தி. –

ஆதீ³ஸு புத்தோ ‘‘அத்தா’’தி வுச்சதி குலவஸேன ஸந்தானே பவத்தனதோ. ஏவம் பிதாபி ‘‘புத்தஸ்ஸ அத்தா’’தி வுச்சதி. யஸ்மா ‘‘பி⁴க்கு²ஸ்ஸ அத்தா மாதா’’தி வத்து²காமா ப⁴யவஸேன ‘‘ஆது மாதூ’’தி ஆஹ. தேனாஹ ‘‘ஆதூதி பிதா’’திஆதி³.

150. ஏவமேவந்தி இத³ம் க³ரஹத்த²ஜோதனனிபாதபத³ந்தி வுத்தம் ‘‘க³ரஹந்தோ ஆஹா’’தி. ததா² ஹி நம் வாசகஸத்³தே³னேவ த³ஸ்ஸேந்தோ ‘‘இதே⁴கச்சே மோக⁴புரிஸா’’தி ஆஹ. ஆஹம்ஸூதி தேஸம் ததா² வசனஸ்ஸ அவிச்சே²தே³ன பவத்திதீ³பனந்தி ஆஹ ‘‘வத³ந்தீ’’தி. கிம் பனிமஸ்ஸ அப்பமத்தகஸ்ஸாதி பஹாதப்³ப³வத்து²ம் அவமஞ்ஞமானேஹி வுத்தம். தேனாஹ ‘‘கிம் பனா’’தி. ஹேதும்ஹி ஜோதேதப்³பே³ சேதம் ஸாமிவசனம் யதா² ‘‘அனுஸ்ஸவஸ்ஸ ஹேது, அஜ்ஜே²னஸ்ஸ ஹேதூ’’தி. தேனாஹ ‘‘அப்பமத்தகஸ்ஸ ஹேதூ’’தி. நனு அபஸ்ஸந்தேன விய அஸுணந்தேன விய ப⁴விதப்³ப³ந்தி? ஸத்தா²ரா நாம அப்பமத்தகேஸு தோ³ஸேஸு அபஸ்ஸந்தேன விய ச அஸுணந்தேன விய ச ப⁴விதப்³ப³ந்தி தேஸம் அதி⁴ப்பாயேன விவரணம். தேஸு சாதி ஸிக்கா²காமேஸு ச. அப்பச்சயம் உபட்டா²பேந்தீதி ஆனேத்வா ஸம்ப³ந்தி⁴தப்³ப³ந்தி த³ஸ்ஸேதி. தேஸந்தி யே ‘‘மோக⁴புரிஸா’’தி வுத்தா புக்³க³லா, தேஸம். க³லே ப³த்³த⁴ம் மஹாகட்ட²ந்தி க³லே ஓலம்பே³த்வா ப³த்³த⁴ம் ருக்க²த³ண்ட³மாஹ. பூதிலதாயாதி க³லோசியா. பாராஜிகவத்து² விய து³ப்பஜஹம் ஹோதீதி ச²ந்த³கப்பஹானவஸேன தம் பஜஹிதும் ந ஸக்கோதி.

151. அனுஸ்ஸுக்காதி தஸ்ஸ பஹாதப்³ப³ஸ்ஸ பஹானே உஸ்ஸுக்கரஹிதா. அபச்சாஸீஸனபக்கே²தி தாய பரத³த்தவுத்திதாய கஸ்ஸசி பச்சயஸ்ஸ குதோசி அபச்சாஸீஸகபக்கே² டி²தா ஹுத்வா ஸுப்பஜஹம் ஹோதி, ந தஸ்ஸ பஹானே பா⁴ரியம் அத்தி².

152. த³லித்³தோ³ து³க்³க³தோ. அஸ்ஸகோதி அஸாபதேய்யோ. கே³ஹயட்டி²யோதி கே³ஹச²த³னஸ்ஸ ஆதா⁴ரா, தா உஜுகம் திரியம் ட²பேதப்³ப³த³ண்டா³. ஸமந்ததோ பி⁴த்திபாதே³ஸு ட²பேதப்³ப³த³ண்டா³ மண்ட³லா. காகாதிதா³யிந்தி இதோ சிதோ காகேஹி அதிபாதவஸேன உட்³டே³தப்³ப³ம். தேனாஹ ‘‘யத்த² கிஞ்சிதே³வா’’திஆதி³. ஸூரகாகாதி காகானம் உட்³டே³பனாகாரமாஹ. நபரமரூபந்தி ஹீனரூபம். விலீவமஞ்சகோதி தாலவேத்தகாதீ³ஹி வீதமஞ்சகோ. ஸா பனஸ்ஸ ஸந்தானானம் சி²ன்னபி⁴ன்னதாய ஓலுக்³க³விலுக்³க³தா, ததா² ஸதி ஸா விஸமரூபா ஹோதீதி ஆஹ ‘‘ஓணதா’’திஆதி³. ஸோ புக்³க³லோ லூக²போ⁴ஜீ ஹோதீதி ஆஹ ‘‘த⁴ஞ்ஞம் நாம குத்³ரூஸகோ’’தி. ஸமகாலம் வபிதப்³ப³தாய ஸமவாபகம், யதா²உது வபிதப்³ப³பீ³ஜம். ஜாயிகாதி குச்சி²தா ப⁴ரியா, ஸப்³ப³த்த² க³ரஹாயம் க-ஸத்³தோ³. ஸோ வதாஹம் பப்³ப³ஜேய்யந்தி ஸோஹம் கேஸமஸ்ஸும் ஓஹாரேத்வா பப்³ப³ஜேய்யம், யோஹம் புரிஸோ நாம அஸ்ஸம் வதாதி பப்³ப³ஜ்ஜாவஸேன அத்தனோ புரிஸம் போ³தே⁴ய்ய. தம்ஸபா⁴வே டி²தஸ்ஸ போ³தா⁴ ந து து³க்கரா, ஸா க²டோபிகா. ஸா கும்பீ⁴. மேண்ட³கஸேட்டி²னோ அட்³ட⁴தேளஸானி கோட்டா²கா³ரஸதானி விய.

153. ஸுவண்ணனிக்க²ஸதானந்தி அனேகேஸம் ஸுவண்ணனிக்க²ஸதானம். சயோதி ஸந்தானேஹி நிசயோ அவீசி நிச்சப்பப³ந்த⁴னிசயோ. தேனாஹ ‘‘ஸந்தானதோ கதஸன்னிசயோ’’தி.

154. ஹேட்டா² கிஞ்சாபி அப்பஜஹனகா பட²மம் த³ஸ்ஸிதா, பஜஹனகா பதா⁴னா, தேஸஞ்ச வஸேனேத்த² புக்³க³லசதுக்கம் த³ஸ்ஸிதம். தே தஞ்சேவ பஜஹந்தீதி பஜஹனகா பட²மம் க³ஹிதா. ராஸிவஸேனாதி ‘‘இது⁴தா³யி ஏகச்சோ புக்³க³லோ’’திஆதி³னா சதுக்கே ஆக³தவிபா⁴க³ம் அனாமஸித்வா ‘‘தே தே’’தி பசுரவஸேன வுத்தம். தேனாஹ ‘‘ந பாடியேக்கம் விப⁴த்தா’’தி. அவிபா⁴கே³ன க³ஹிதவத்தூ²ஸு விபா⁴க³தோ க³ஹணம் லோகஸித்³த⁴மேதந்தி த³ஸ்ஸேதும் ‘‘யதா² நாமா’’திஆதி³ வுத்தம். பஜஹனகபுக்³க³லாதி ‘‘தே தஞ்சேவ பஜஹந்தீ’’தி ஏவம் பஜஹனகபுக்³க³லா ஏவ.

உபதி⁴அனுதா⁴வனகாதி உபதீ⁴ஸு அனுஅனுதா⁴வனகா உபதி⁴யோ ஆரப்³ப⁴ பவத்தனகா. விதக்காயேவாதி காமஸங்கப்பாதி³விதக்காயேவ. இந்த்³ரியனானத்ததாதி விமுத்திபரிபாசகானம் இந்த்³ரியானம் பரோபரியத்தம். தஸ்ஸ ஹி வஸேனேவ தே சத்தாரோ புக்³க³லா ஜாதா. அக்³க³மக்³க³த்தா²ய விபஸ்ஸனம் உஸ்ஸுக்காபேத்வா யாவ ந தம் மக்³கே³ன ஸமுக்³கா⁴தேந்தி, தாவ நப்பஜஹந்தி நாம. இதி ஹேட்டி²மா தயோபி அரியா அப்பஹீனஸ்ஸ கிலேஸஸ்ஸ வஸேன ‘‘நப்பஜஹந்தீ’’தி வுத்தா, பகே³வ புது²ஜ்ஜனா. வுத்தனயேன பன விபஸ்ஸனம் மக்³கே³ன க⁴டேந்தா தே சத்தாரோ ஜனா அக்³க³மக்³க³க்க²ணே பஜஹந்தி நாம. தே ஏவ தத்த² ஸீக⁴காரினோ கி²ப்பம் பஜஹந்தி நாம, தேனாஹ ‘‘தத்தா²’’திஆதி³.

ஸம்வேக³ம் கத்வா அக்³கி³ம் அக்கந்தபுரிஸோ விய. மக்³கே³னாதி அனுக்கமாக³தேன அக்³க³மக்³கே³ன. மஹாஹத்தி²பதோ³பமேதி மஹாஹத்தி²பதோ³பமஸுத்தே (ம. நி. 1.300 ஆத³யோ). தத்த² ஹி ‘‘தஸ்ஸ தா⁴தாரம்மணமேவ சித்தம் பக்க²ந்த³தி பஸீத³தி ஸந்திட்ட²தி அதி⁴முச்சதீ’’தி (ம. நி. 1.302) ஏத்த² அதிதிக்க²னாதிதிக்க²-நாதிமந்த³அதிமந்த³-புக்³க³லவஸேன அட்ட²கதா²யம் (ம. நி. அட்ட². 2.302) தயோ வாரா உத்³த⁴டா, தத்த² மஜ்ஜி²மவஸேனேவ பஞ்ஹோ கதி²தோ. இந்த்³ரியபா⁴வனேதி இந்த்³ரியபா⁴வனாஸுத்தே, தத்தா²பி மஜ்ஜி²மனயேனேவ பஞ்ஹோ கதி²தோ. தேனாஹ ‘‘இமேஸூ’’திஆதி³.

தந்தி ‘‘உபதீ⁴’’தி வுத்தம் க²ந்த⁴பஞ்சகம். து³க்க²ஸ்ஸ மூலந்தி ஸப்³ப³ஸ்ஸபி வட்டது³க்க²ஸ்ஸ காரணம். நிக்³க³ஹணோதி நிருபாதா³னோ. தேனாஹ ‘‘நித்தண்ஹோ’’தி.

155. யே பஜஹந்தீதி ‘‘தே தஞ்சேவ பஜஹந்தீ’’தி ஏவம் வுத்தபுக்³க³லா. தே இமே நாம ஏத்தகே கிலேஸே பஜஹந்தீதி யே தே புது²ஜ்ஜனா லாபி⁴னோ ச பஞ்ச காமகு³ணே ஏத்தகே தம்தம்ஜா²னாதி³வத்து²கே ச தம்தம்மக்³க³வஜ்ஜ²தாய பரிச்சி²ன்னத்தா ஏத்தகே கிலேஸே பஜஹந்தி. யே நப்பஜஹந்தீதி ஏத்த² வுத்தனயானுஸாரேன அத்தோ² வேதி³தப்³போ³. அஸுசிஸுக²ம் காயாஸுசிஸன்னிஸ்ஸிதத்தா. அனரியேஹீதி அபரிஸுத்³தே⁴ஹி. படிலாப⁴தோ பா⁴யிதப்³ப³ம் கிலேஸது³க்க²க³திகத்தா. விபாகதோ பா⁴யிதப்³ப³ம் அபாயது³க்க²க³திகத்தா. க³ணதோபி கிலேஸதோபி விவித்தஸுக²ந்தி க³ணஸங்க³ணிகதோ ச கிலேஸஸங்க³ணிகதோ ச விவித்தஸுக²ம். ராகா³தி³வூபஸமத்தா²யாதி ராகா³தி³வூபஸமாவஹம் ஸுக²ம். ந பா⁴யிதப்³ப³ம் ஸம்பதி ஆயதிஞ்ச ஏகந்தஹிதபா⁴வதோ.

156. இஞ்ஜிதஸ்மிந்தி பச்சத்தே பு⁴ம்மவசனந்தி ஆஹ ‘‘இஞ்ஜன’’ந்திஆதி³. இஞ்ஜதி தேனாதி இஞ்ஜிதம், தஸ்ஸ தஸ்ஸ ஜா²னஸ்ஸ கோ²ப⁴கரம் ஓளாரிகம் ஜா²னங்க³ம். சதுத்த²ஜ்ஜா²னம் அனிஞ்ஜனம் ஸன்னிஸின்னாபா⁴வதோ. ததா² ஹி வுத்தம் ‘‘டி²தே ஆனேஞ்ஜப்பத்தே’’தி (தீ³. நி. 1.244-245; ம. நி. 1.384-386; பாரா. 12-13).

அலம்-ஸத்³தோ³ யுத்தத்தோ²பி ஹோதி – ‘‘அலமேவ நிப்³பி³ந்தி³தும், அலம் விமுச்சிது’’ந்திஆதீ³ஸு (தீ³. நி. 2.272; ஸம். நி. 2.124, 128, 134, 143), தஸ்மா அனலம் அனுஸங்க³ம் காதும் அயுத்தந்தி அத்தோ². தேனாஹ ‘‘அகத்தப்³ப³ஆலயந்தி வதா³மீ’’தி. ஸன்னிட்டா²னந்தி ஸம்மாபடிபத்தியம் அலம் ஏத்தாவதாதி உஸ்ஸாஹபடிப்பஸ்ஸம்ப⁴னவஸேன ஸன்னிட்டா²னம் ந காதப்³ப³ந்தி யோஜனா. உத்³த⁴ம்பா⁴கி³யஸஞ்ஞிதம் அணும் வா ஓரம்பா⁴கி³யஸஞ்ஞிதம் தூ²லம் வா, ரூபராகோ³தி ஏவரூபம் அணும் வா காமாஸவோ படிக⁴ந்தி ஏவரூபம் தூ²லம் வா, முது³னா பவத்திஆகாரவிஸேஸேன அப்பஸாவஜ்ஜம், கம்மப³ந்த⁴னட்டே²ன வா அப்பஸாவஜ்ஜம், தப்³பி³பரியாயதோ மஹாஸாவஜ்ஜம் வேதி³தப்³ப³ம். நாதிதிக்க²பஞ்ஞஸ்ஸ வஸேன தே³ஸனாய பவத்தத்தா ‘‘நேய்யபுக்³க³லஸ்ஸ வஸேனா’’தி வுத்தம். ஸப்³ப³ஸோ ஹி பரியாதி³ன்னனிகந்திகஸ்ஸ அரியபுக்³க³லஸ்ஸ வஸேன ஸஞ்ஞாவேத³யிதனிரோத⁴ஸ்ஸ ஆக³தத்தா ‘‘அரஹத்தனிகூடேனேவ நிட்டா²பிதா’’தி வுத்தம். யம் பனேத்த² அத்த²தோ ந விப⁴த்தம், தம் ஸுவிஞ்ஞேய்யமேவ.

லடுகிகோபமஸுத்தவண்ணனாய லீனத்த²ப்பகாஸனா ஸமத்தா.