9. ப³ஹுவேத³னியஸுத்தவண்ணனா

88. பஞ்சகங்கோ³தி வட்³ட⁴கீகிச்சஸாத⁴னே வாஸிஆதி³பஞ்சகம் அங்க³ம் ஸம்த⁴னம் ஏதஸ்மிந்தி பஞ்சகங்கோ³. த²ம்பா⁴தி³வத்தூ²னம் த²பனட்டே²ன த²பதி. பண்டி³தஉதா³யித்தே²ரோ, ந காளுதா³யீ தே²ரோ.

89. பரியாயதி அத்தனோ ப²லம் வத்தேதீதி பரியாயோ, காரணம். வேத³னாஸன்னிஸ்ஸிதோ ச காயிகசேதஸிகபா⁴வோ காரணம். தேனாஹ – ‘‘காயிகசேதஸிகவஸேன த்³வே வேதி³தப்³பா³’’தி. தத்த² பஸாத³காயஸன்னிஸ்ஸிதா காயிகா, சேதோஸன்னிஸ்ஸிதா சேதஸிகா. ஸுகா²தி³வஸேன திஸ்ஸோதி ஏத்த² ஸுக²னது³க்க²னுபேக்க²னானி ஸுகா²தி³வேத³னாய காரணம். தானி ஹி பவத்தினிமித்தானி கத்வா தத்த² ஸுகா²தி³ஸத்³த³ப்பவத்தி, இமினா நயேன ஸேஸேஸுபி யதா²ரஹம் காரணம் நித்³தா⁴ரேத்வா வத்தப்³ப³ம். உபவிசாரவஸேனாதி ஆரம்மணம் உபேச்ச ஸவிஸேஸபவத்திவஸேன. யஸ்மிஞ்ஹி ஆரம்மணே ஸோமனஸ்ஸவேத³னா பவத்ததி, ஆரம்மணதாய தம் உபக³ந்த்வா இதரவேத³னாஹி விஸிட்ட²தாய ஸவிஸேஸம் தத்த² பவத்தி. தேனாஹ ‘‘ஸோமனஸ்ஸட்டா²னியம் ரூபம் உபவிசரதீ’’தி. ஏஸ நயோ ஸேஸவேத³னாஸு கே³ஹஸ்ஸிதானீதி கே³ஹனிஸ்ஸிதானி.

90. பரியாயேனாதி ‘‘இத³மேத்த² து³க்க²ஸ்மிந்தி வதா³மீ’’தி வுத்தட்டா²னம் ஸந்தா⁴ய வத³தி. தம் த³ஸ்ஸேந்தோதி காமஞ்சேத்த² ஸுத்தே – ‘‘த்³வேபானந்த³, வேத³னா வுத்தா’’தி த்³வே ஆதி³ம் கத்வா வேத³னா த³ஸ்ஸிதா, ஏகாபி பன த³ஸ்ஸிதா ஏவாதி த³ஸ்ஸேந்தோ. உபத்த²ம்பே⁴துந்தி ஏகாபி வேத³னா வுத்தா மயா பரியாயேன, ஏவம் ஸதி த்³வேபி வத்தப்³பா³தி ஏவம் தஸ்ஸ வாத³ம் உபத்த²ம்பே⁴தும். கத²ம் பன ஏகா வேத³னா வுத்தாதி? யம் கிஞ்சி வேத³யிதம் ஸுக²ம் வா து³க்க²ம் வா அது³க்க²மஸுக²ம் வா, இத³மேத்த² து³க்க²ஸ்மிந்தி வதா³மீதி. யம் பனேத்த² வத்தப்³ப³ம், தம் இதிவுத்தகவண்ணனாயம் (இதிவு. அட்ட². 52 ஆத³யோ) பரமத்த²தீ³பனியம் வுத்தனயேன வேதி³தப்³ப³ம்.

கத²ம் பனேத்த² ரூபாவசரசதுத்தே² அரூபேஸு ஸஞ்ஞாவேத³யிதனிரோதே⁴ ஸுக²ம் உத்³த⁴தந்தி ஆஹ ‘‘ஏத்த² சா’’திஆதி³. ஸந்தட்டே²னாதி படிபக்க²த⁴ம்மானம் வூபஸந்தபா⁴வேன. பணீதட்டே²னாதி பா⁴வனாவிஸேஸவிஸிட்டே²ன அதப்பகபா⁴வேனேவ ஸேட்ட²பா⁴வேன ச, பச்சயவிஸேஸேன பதா⁴னபா⁴வம் நீதந்திபி பணீதம். வேத³யிதஸுக²ம் நாம வேத³னாபூ⁴தம் ஸுக²ந்தி கத்வா. அவேத³யிதஸுக²ம் நாம யாவதா நித்³து³க்க²தா, தாவதா ஸுக²ந்தி வுச்சதீதி.அத² வா நிரோதோ⁴ ஸுட்டு² கா²த³தி க²னதி காயிகசேதஸிகாபா³த⁴ந்தி வத்தப்³ப³தம் அரஹதி ஸத்தாஹம்பி தத்த² து³க்க²ஸ்ஸ நிருஜ்ஜ²னதோ. தேனாஹ ‘‘நித்³து³க்க²பா⁴வஸங்கா²தேன ஸுக²ட்டே²னா’’தி.

91. யஸ்மிம் யஸ்மிம் ப⁴வே, சித்துப்பாதே³, அவத்தா²ய வா நித்³து³க்க²பா⁴வோ, து³க்க²ஸ்ஸ படிபக்க²தா அனுபலப்³ப⁴னேன து³க்க²விவித்தம், தம் ஸுக²ஸ்மிம்யேவ பஞ்ஞபேதி. ஸேஸம் ஸுவிஞ்ஞேய்யமேவ.

ப³ஹுவேத³னீயஸுத்தவண்ணனாய லீனத்த²ப்பகாஸனா ஸமத்தா.