9. மஹாஸாரோபமஸுத்தவண்ணனா

307. நசிரபக்கந்தேதி ந சிரம் பக்கந்தே, பக்கந்தஸ்ஸ ஸதோ ந சிரஸ்ஸேவ. ஸலிங்கே³னேவாதி முண்டி³யகாஸாயக்³க³ஹணாதி³னா அத்தனோ புரிமலிங்கே³னேவ. பாடியேக்கே ஜாதேதி விபன்னாசாரதி³ட்டி²தாய பகாஸனீயகம்மகரணதோ பரம் அஞ்ஞதித்தி²யஸதி³ஸே விஸும் பூ⁴தே. குலபுத்தோதி ஜாதிமத்தேன குலபுத்தோ. அஸம்பி⁴ன்னாயாதி ஸம்பே⁴த³ரஹிதாய, ஜாதிஸங்கரவிரஹிதாயாதி அத்தோ. ஜாதிஸீஸேன இத⁴ ஜாதிவத்து²கம் து³க்க²ம் வுத்தந்தி ஆஹ ‘‘ஓதிண்ணோதி யஸ்ஸ ஜாதி அந்தோ அனுபவிட்டா²’’தி. ஜாதோ ஹி ஸத்தோ ஜாதகாலதோ பட்டா²ய ஜாதினிமித்தேன து³க்கே²ன அந்தோ அனுபவிட்டோ² விய விபா³தீ⁴யதி. ஜராயாதிஆதீ³ஸுபி ஏஸேவ நயோ. சத்தாரோ பச்சயா லப்³ப⁴ந்தீதி லாபா⁴, சதுன்னம் பச்சயானம் லப்³ப⁴மானானம் ஸுகதபா⁴வோ ஸுட்டு² அபி⁴ஸங்க²தபா⁴வோ. வண்ணப⁴ணனந்தி கு³ணகித்தனம். அபஞ்ஞாதாதி ஸம்பா⁴வனாவஸேன ந பஞ்ஞாதா. லாபா⁴தி³னிப்³ப³த்தியாபா⁴வத³ஸ்ஸனஞ்ஹேதம். தேனாஹ ‘‘கா⁴ஸச்சா²த³னமத்தம்பி ந லப⁴ந்தீ’’தி. அப்பேஸக்கா²தி அப்பானுபா⁴வா. ஸா பன அப்பேஸக்க²தா அதி⁴பதேய்யஸம்பத்தியா ச பரிவாரஸம்பத்தியா ச அபா⁴வேன பாகடா ஹோதி. தத்த² பரிவாரஸம்பத்தியா அபா⁴வம் த³ஸ்ஸேந்தோ ‘‘அப்பபரிவாரா’’தி ஆஹ.

ஸாரேனபி கேசி அஜானனேன அஞ்ஞாலாபே⁴ன வா அஸாரபூ⁴தம்பி கத்தப்³ப³ம் கரோந்தீதி ததோ விஸேஸனத்த²ம் ‘‘ஸாரேன ஸாரகரணீய’’ந்தி வுத்தந்தி தம் த³ஸ்ஸேந்தோ ‘‘அக்க²சக்கயுக³னங்க³லாதி³க’’ந்தி ஆஹ. ப்³ரஹ்மசரியஸ்ஸாதி ஸிக்கா²த்தயஸங்க³ஹஸ்ஸ ஸாஸனப்³ரஹ்மசரியஸ்ஸ. மஹாருக்க²ஸ்ஸ மக்³க³ப²லஸாரஸ்ஸ ஞாணத³ஸ்ஸனபே²க்³கு³கஸ்ஸ ஸமாதி⁴தசஸ்ஸ ஸீலபபடிகஸ்ஸ சஞ்சலஸபா⁴வா ஸம்ஸப்பசாரீதி ச சத்தாரோ பச்சயா ஸாகா²பலாஸம் நாம. தேனேவாதி லாப⁴ஸக்காரஸிலோகனிப்³ப³த்தனேனேவ. ஸாரோ மே பத்தோதி இமஸ்மிம் ஸாஸனே அதி⁴க³ந்தப்³ப³ஸாரோ நாம இமினா லாபா⁴தி³னிப்³ப³த்தனேன அனுப்பத்தோதி வோஸானம் நிட்டி²தகிச்சம் ஆபன்னோ.

310. ஞாணத³ஸ்ஸனந்தி ஞாணபூ⁴தம் த³ஸ்ஸனம் விஸயஸ்ஸ ஸச்சி²கரணவஸேன பவத்தம் அபி⁴ஞ்ஞாஞாணம். ஸுகு²மம் ரூபந்தி தே³வாதீ³னம், அஞ்ஞம்பி வா ஸுகு²மஸபா⁴வம் ரூபம். தேனாஹ ‘‘அந்தமஸோ…பே… விஹரந்தீ’’தி, தி³ப்³ப³சக்கு² ஹி இத⁴ உக்கட்ட²னித்³தே³ஸேன ‘‘ஞாணத³ஸ்ஸன’’ந்தி க³ஹிதம்.

311. அஸமயவிமோக்க²ம் ஆராதே⁴தீதி ஏத்த² அதி⁴ப்பேதம் அஸமயவிமோக்க²ம் பாளியா ஏவ த³ஸ்ஸேதும் ‘‘கதமோ அஸமயவிமோக்கோ²’’திஆதி³ வுத்தம். அட்ட²ன்னஞ்ஹி ஸமாபஜ்ஜனஸமயோபி அத்தி² அஸமயோபி, மக்³க³விமோக்கே²ன பன விமுச்சனஸ்ஸ ஸமயோ வா அஸமயோ வா நத்தி². யஸ்ஸ ஸத்³தா⁴ ப³லவதீ, விபஸ்ஸனா ச ஆரத்³தா⁴, தஸ்ஸ க³ச்ச²ந்தஸ்ஸ திட்ட²ந்தஸ்ஸ நிஸீத³ந்தஸ்ஸ பு⁴ஞ்ஜந்தஸ்ஸ ச மக்³க³ப²லபடிவேதோ⁴ நாம ந ஹோதீதி ந வத்தப்³ப³ம், இதி மக்³க³விமோக்கே²ன விமுச்சந்தஸ்ஸ ஸமயோ வா அஸமயோ வா நத்தீ²தி ஸோ அஸமயவிமோக்கோ². தேனாஹ ‘‘லோகியஸமாபத்தியோ ஹீ’’திஆதி³.

ந குப்பதி, ந நஸ்ஸதீதி அகுப்பா, கதா³சிபி அபரிஹானஸபா⁴வா. ஸப்³ப³ஸம்கிலேஸேஹி படிப்பஸ்ஸத்³தி⁴வஸேன சேதஸோ விமுத்தீதி சேதோவிமுத்தி. தேனாஹ ‘‘அரஹத்தப²லவிமுத்தீ’’தி. அயமத்தோ² பயோஜனம் ஏதஸ்ஸாதி ஏதத³த்த²ம், ஸாஸனப்³ரஹ்மசரியம், தஸ்ஸ ஏஸா பரமகோடி. யதா²ரத்³த⁴ஸ்ஸ ஸாரோபமேன ப²லேன தே³ஸனா நிட்டா²பிதாதி ஆஹ ‘‘யதா²னுஸந்தி⁴னாவ தே³ஸனம் நிட்ட²பேஸீ’’தி. யம் பனேத்த² அத்த²தோ அவிப⁴த்தம், தம் ஸுவிஞ்ஞேய்யமேவ.

மஹாஸாரோபமஸுத்தவண்ணனாய லீனத்த²ப்பகாஸனா ஸமத்தா.