10. சூளஸாரோபமஸுத்தவண்ணனா

312. பிங்க³லதா⁴துகோதி பிங்க³லஸபா⁴வோ பிங்க³லச்ச²விகோ, பிங்க³லக்கோ²தி வா அத்தோ². பப்³ப³ஜிதஸமூஹஸங்கா²தோ ஸங்கோ⁴, ந ஸீலாதி³கு³ணேஹி ஸங்க³ஹிதப்³ப³பா⁴வேன. ஸங்கோ⁴ ஏதேஸம் அத்தி² பரிவாரபூ⁴தோதி ஸங்கி⁴னோ. ஸ்வேவாதி ஸோ ஏவ பப்³ப³ஜிதஸமூஹஸங்கா²தோ. ஆசாரஸிக்கா²பனவஸேனாதி அத்தனா பரிகப்பிதஅசேலவதாதி³ஆசாரஸிக்கா²பனவஸேன. பஞ்ஞாதாதி யதா²ஸகம் ஸமாதி³ன்னவதவஸேன சேவ விஞ்ஞாதலத்³தி⁴வஸேன ச பஞ்ஞாதா. லத்³தி⁴கராதி தஸ்ஸா மிச்சா²தி³ட்டி²யா உப்பாத³கா. ப³ஹுஜனஸ்ஸாதி புது²ஜனஸ்ஸ. தஸ்ஸ பன ஆக³மஸம்பதா³பி நாம நத்தி², குதோ அதி⁴க³மோதி ஏகம்ஸதோ அந்த⁴புது²ஜ்ஜனோ ஏவாதி ஆஹ ‘‘அஸ்ஸுதவதோ அந்த⁴பா³லபுது²ஜ்ஜனஸ்ஸா’’தி. ந ஹி விஞ்ஞூ அப்பஸாத³னீயே பஸீத³ந்தி. மங்க³லேஸு காதப்³ப³தா³ஸகிச்சகரோ தா³ஸோ மங்க³லதா³ஸோ.

தந்தாவுதானந்தி தந்தே பஸாரேத்வா வீதானம். க³ண்ட²னகிலேஸோதி ஸம்ஸாரே ப³ந்த⁴னகிலேஸோ. ஏவம் வாதி³தாயாதி ஏவம் படிஞ்ஞதாய, ஏவம் தி³ட்டி²தாய வா. நிய்யானிகாதி நிய்யானக³திஸப்பாடிஹீரகா அனுபாரம்ப⁴பூ⁴தத்தாதி அதி⁴ப்பாயோ. நோ சே நிய்யானிகாதி ஆனேத்வா யோஜனா. தேஸம் ஸப்³ப³ஞ்ஞுபடிஞ்ஞாய அபூ⁴தத்தா தஸ்ஸா அபூ⁴தபா⁴வகத²னேன தஸ்ஸ ப்³ராஹ்மணஸ்ஸ ந காசி அத்த²ஸித்³தீ⁴தி ஆஹ ‘‘நேஸம் அனிய்யானிகபா⁴வகத²னேன அத்தா²பா⁴வதோ’’தி.

318. நிஹீனலோகாமிஸே லீனோ அஜ்ஜா²ஸயோ ஏதஸ்ஸ, ந பன நிப்³பா³னேதி. லீனஜ்ஜா²ஸயோ. ஸாஸனம் ஸிதி²லம் கத்வா க³ண்ஹாதி ஸிக்கா²ய ந திப்³ப³கா³ரவத்தா.

323. ஹேட்டா²தி அனந்தராதீதஸுத்தே மஹாஸாரோபமே. பட²மஜ்ஜா²னாதி³த⁴ம்மா விபஸ்ஸனாபாத³காதி விபஸ்ஸனாய பத³ட்டா²னபூ⁴தா. இதா⁴தி இமஸ்மிம் சூளஸாரோபமே ஆக³தா. நிரோத⁴பாத³காதி அனாகா³மினோ, அரஹந்தோ வா நிரோத⁴ஸமாபத்திம் ஸமாபஜ்ஜிதும் ஸமத்தா². தஸ்மாதி நிரோத⁴பாத³கத்தா. பட²மஜ்ஜா²னாதி³த⁴ம்மா ஞாணத³ஸ்ஸனதோ உத்தரிதராதி வேதி³தப்³பா³.

சூளஸாரோபமஸுத்தவண்ணனாய லீனத்த²ப்பகாஸனா ஸமத்தா.

நிட்டி²தா ச ஓபம்மவக்³க³வண்ணனா.