7. சூளஹத்தி²பதோ³பமஸுத்தவண்ணனா

288. ஸேதபரிவாரோதி ஸேதபடிச்ச²தோ³, ஸேதவண்ணாலங்காரோதி அத்தோ². புப்³பே³ பன ‘‘ஸேதாலங்காரா’’தி அஸ்ஸாலங்காரோ க³ஹிதோ, இத⁴ சக்கபஞ்ஜரகுப்³ப³ராதி³ரதா²வயவேஸு காதப்³பா³லங்காரோ. ஏவம் வுத்தேனாதி ஏவம் ‘‘ஸேதாய ஸுத³’’ந்திஆதி³னா பகாரேன ஸம்யுத்தமஹாவக்³கே³ (ஸம். நி. 5.4) வுத்தேன. நாதிமஹா யுத்³த⁴மண்ட³லே ஸஞ்சாரஸுக²த்த²ம். யோதோ⁴ ஸாரதீ²தி த்³வின்னம், பஹரணதா³யகேன ஸத்³தி⁴ம் திண்ணம் வா.

நக³ரம் பத³க்கி²ணம் கரோதி நக³ரஸோப⁴னத்த²ம். இத³ம் கிர தஸ்ஸ ப்³ராஹ்மணஸ்ஸ ஜாணுஸ்ஸோணிட்டா²னந்தரம் ஜாதிஸித்³த⁴ம் பரம்பராக³தம் சாரித்தம். தேனாஹ ‘‘இதோ ஏத்தகேஹி தி³வஸேஹீ’’திஆதி³. சாரித்தவஸேன நக³ரவாஸினோபி ததா² ததா² படிபஜ்ஜந்தி. புஞ்ஞவாதி³மங்க³லகத²னே நியுத்தா மாங்க³லிகா. ஸுவத்தி²பத்தனாய ஸோவத்தி²கா. ஆதி³-ஸத்³தே³ன வந்தீ³ஆதீ³னம் ஸங்க³ஹோ. யஸஸிரிஸம்பத்தியாதி யஸஸம்பத்தியா ஸிரிஸம்பத்தியா ச, பரிவாரஸம்பத்தியா சேவ விப⁴வஸோபா⁴ஸம்பத்தியா சாதி அத்தோ².

நக³ராபி⁴முகோ² பாயாஸி அத்தனோ பி⁴க்கா²சாரவேலாய. பண்டி³தோ மஞ்ஞேதி ஏத்த² மஞ்ஞேதி இத³ம் ‘‘மஞ்ஞதீ’’தி இமினா ஸமானத்த²ம் நிபாதபத³ம். தஸ்ஸ இதி-ஸத்³த³ம் ஆனேத்வா அத்த²ம் த³ஸ்ஸேந்தோ ‘‘பண்டி³தோதி மஞ்ஞதீ’’தி ஆஹ. அனுமதிபுச்சா²வஸேன சேதம் வுத்தம். தேனேவாஹ ‘‘உதா³ஹு நோ’’தி. ‘‘தம் கிம் மஞ்ஞதி ப⁴வம் வச்சா²யனோ ஸமணஸ்ஸ கோ³தமஸ்ஸ பஞ்ஞாவேய்யத்திய’’ந்தி ஹி வுத்தமேவத்த²ம் புன க³ண்ஹந்தோ ‘‘பண்டி³தோ மஞ்ஞே’’தி ஆஹ. தஸ்மா வுத்தம் ‘‘ப⁴வம் வச்சா²யனோ, ஸமணம் கோ³தமம் பண்டி³தோதி மஞ்ஞதி, உதா³ஹு நோ’’தி, யதா² தே க²மேய்ய, ததா² நம் கதே²ஹீதி அதி⁴ப்பாயோ.

அஹம் கோ நாம, மம அவிஸயோ ஏஸோதி த³ஸ்ஸேதி. கோ சாதி ஹேதுனிஸ்ஸக்கே பச்சத்தவசனந்தி ஆஹ ‘‘குதோ சா’’தி. ததா² சாஹ ‘‘கேன காரணேன ஜானிஸ்ஸாமீ’’தி, யேன காரணேன ஸமணஸ்ஸ கோ³தமஸ்ஸ பஞ்ஞாவேய்யத்தியம் ஜானேய்யம், தம் காரணம் மயி நத்தீ²தி அதி⁴ப்பாயோ. பு³த்³தோ⁴யேவ ப⁴வேய்ய, அபு³த்³த⁴ஸ்ஸ ஸப்³ப³தா² பு³த்³த⁴ஞாணானுபா⁴வம் ஜானிதும் ந ஸக்காதி. வுத்தஞ்ஹேதம் – ‘‘அப்பமத்தகம் கோ² பனேதம், பி⁴க்க²வே, ஓரமத்தகம் ஸீலமத்தகம், யேன புது²ஜ்ஜனோ ததா²க³தஸ்ஸ வண்ணம் வத³மானோ வதே³ய்ய (தீ³. நி. 1.7), அத்தி², பி⁴க்க²வே, அஞ்ஞேவ த⁴ம்மா க³ம்பீ⁴ரா து³த்³த³ஸா து³ரனுபோ³தா⁴ …பே… யேஹி ததா²க³தஸ்ஸ யதா²பு⁴ச்சம் வண்ணம் ஸம்மா வத³மானோ வதே³ய்யா’’தி (தீ³. நி. 1.28) ச. ஏத்தா²தி ‘‘ஸோபி நூனஸ்ஸ தாதி³ஸோவா’’தி ஏதஸ்மிம் பதே³. பஸத்த² பஸத்தோ²தி பஸத்தே²ஹி அத்தனோ கு³ணேஹேவ ஸோ பஸத்தோ², ந தஸ்ஸ கித்தினா, பஸம்ஸாஸபா⁴வேனேவ பாஸம்ஸோதி அத்தோ². தேனாஹ ‘‘ஸப்³ப³கு³ணான’’ந்திஆதி³. மணிரதனந்தி சக்கவத்தினோ மணிரதனம். ஸதே³வகே லோகே பாஸம்ஸானம்பி பாஸம்ஸோதி த³ஸ்ஸேதும் ‘‘பஸத்தே²ஹி வா’’தி து³தியவிகப்போ க³ஹிதோ.

அரணீயதோ அத்தோ², ஸோ ஏவ வஸதீதி வஸோதி அத்த²வஸோ, தஸ்ஸ தஸ்ஸ பயோக³ஸ்ஸ ஆனிஸம்ஸபூ⁴தம் ப²லந்தி ஆஹ ‘‘அத்த²வஸந்தி அத்தா²னிஸம்ஸ’’ந்தி. அத்தோ² வா வுத்தலக்க²ணோ வஸோ ஏதஸ்ஸாதி அத்த²வஸோ, காரணம். நாக³வனவாஸிகோதி ஹத்தி²னாகா³னம் விசரணவனே தேஸம் க³ஹணத்த²ம் வஸனகோ. அனுக்³க³ஹிதஸிப்போதி அஸிக்கி²தஹத்தி²ஸிப்போ ஆயதவித்த²தஸ்ஸ பத³மத்தஸ்ஸ த³ஸ்ஸனேன ‘‘மஹா வத, போ⁴ நாகோ³’’தி நிட்டா²க³மனதோ. பரதோ பன ப⁴க³வதா வுத்தட்டா²னே. உக்³க³ஹிதஸிப்போ புரிஸோ நாக³வனிகோதி ஆக³தோ ஆயதவித்த²தஸ்ஸ பத³ஸ்ஸ உச்சஸ்ஸ ச நிஸேவிதஸ்ஸ ப்³யபி⁴சாரபா⁴வம் ஞத்வா தத்தகேன நிட்ட²ம் அக³ந்த்வா மஹாஹத்தி²ம் தி³ஸ்வாவ நிட்டா²க³மனதோ. ஞாணம் பஜ்ஜதி ஏத்தா²தி ஞாணபதா³னி, க²த்தியபண்டி³தாதீ³னம் த⁴ம்மவினயே வினீதத்தா வினயேஹி அதி⁴க³தஜ்ஜா²னாதீ³னி. தானி ஹி ததா²க³தக³ந்த⁴ஹத்தி²னோ தே³ஸனாஞாணேன அக்கந்தட்டா²னானி. சத்தாரீதி பன வினேய்யானம் இத⁴ க²த்தியபண்டி³தாதி³வஸேன சதுப்³பி³தா⁴னம்யேவ க³ஹிதத்தா.

289. புக்³க³லேஸு பஞ்ஞாய ச நிபுணதா பண்டி³தஸமஞ்ஞா நிபுணத்த²ஸ்ஸ த³ஸ்ஸனஸமத்த²தாவஸேனேவாதி ஆஹ ‘‘ஸுகு²மஅத்த²ந்தரபடிவிஜ்ஜ²னஸமத்தே²’’தி. கத-ஸத்³தோ³ இத⁴ நிப்ப²ன்னபரியாயோ. பரே பவத³ந்தி ஏத்த², ஏதேனாதி பரப்பவாதோ³, பரஸமயோ. பரேஹி பவத³னம் பரப்பவாதோ³, விக்³கா³ஹிககதா²ய பரவாத³மத்³த³னம். தது³ப⁴யம்பி ஏகதோ கத்வா பாளியம் வுத்தந்தி ஆஹ ‘‘விஞ்ஞாதபரப்பவாதே³ சேவ பரேஹி ஸத்³தி⁴ம் கதவாத³பரிசயே சா’’தி, பரஸமயேஸு பரவாத³மத்³த³னேஸு ச நிப்ப²ன்னேதி அத்தோ². வாலவேதி⁴ரூபேதி வாலவேதி⁴பதிரூபே. தேனாஹ ‘‘வாலவேதி⁴த⁴னுக்³க³ஹஸதி³ஸே’’தி. வாலந்தி அனேகதா⁴ பி⁴ன்னஸ்ஸ வாலஸ்ஸ அம்ஸுஸங்கா²தம் வாலம். பி⁴ந்த³ந்தா வியாதி க⁴டாதி³ம் ஸவிக்³க³ஹம் முக்³க³ராதி³னா பி⁴ந்த³ந்தா விய, தி³ட்டி²க³தானி ஏகம்ஸதோ பி⁴ந்த³ந்தாதி அதி⁴ப்பாயோ. ‘‘அத்த²ம் கு³ய்ஹம் படிச்ச²ன்னம் கத்வா புச்சி²ஸ்ஸாமா’’தி ஸங்க²தம் பத³பஞ்ஹம் புச்ச²ந்தீதி த³ஸ்ஸேதும் ‘‘து³பத³ம்பீ’’திஆதி³ வுத்தம். வத³ந்தி ஏதேனாதி வாதோ³, தோ³ஸோ. புச்சீ²யதீதி பஞ்ஹோ, அத்தோ². புச்ச²தி ஏதேனாதி பஞ்ஹோ, ஸத்³தோ³. தது³ப⁴யம் ஏகதோ க³ஹேத்வா ஆஹ ‘‘ஏவரூபே பஞ்ஹே’’திஆதி³. ‘‘ஏவம் புச்சே²ய்ய, ஏவம் விஸ்ஸஜ்ஜேய்யா’’தி ச புச்சா²விஸ்ஸஜ்ஜனானம் ஸிகா²வக³மனம் த³ஸ்ஸேதி. ஸேய்யோதி உத்தமோ, பரமோ லாபோ⁴தி அதி⁴ப்பாயோ.

ஏவம் அத்தனோ வாத³வித⁴மனப⁴யேனபி பரே ப⁴க³வந்தம் பஞ்ஹம் புச்சி²தும் ந விஸஹந்தீதி வத்வா இதா³னி வாத³வித⁴மனேன வினாபி ந விஸஹந்தி ஏவாதி த³ஸ்ஸேதும் ‘‘அபிசா’’திஆதி³ ஆரத்³த⁴ம். சித்தம் பஸீத³தி பரே அத்தனோ அத்தபா⁴வம்பி விஸ்ஸத்த²ம் நிய்யாதே³துகாமா ஹோந்தி ஓதி⁴ஸகமேத்தாப²ரணஸதி³ஸத்தா தஸ்ஸ மேத்தாயனஸ்ஸ. த³ஸ்ஸனஸம்பன்னாதி த³ட்ட²ப்³ப³தாய ஸம்பன்னா த³ஸ்ஸனானுத்தரியபா⁴வதோ, அதிவிய த³ஸ்ஸனீயாதி அத்தோ².

ஸரணக³மனவஸேன ஸாவகாதி லோகியஸரணக³மனேன ஸாவகா, லோகுத்தரஸரணக³மனேன பன ஸாவகத்தம் பரதோ ஆக³மிஸ்ஸதி, தஞ்ச பப்³ப³ஜிதவஸேன வுச்சதி, இத⁴ க³ஹட்ட²வஸேன, உப⁴யத்தா²பி ஸரணக³மனேன ஸாவகத்தம் வேதி³தப்³ப³ம். தே ஹி பரலோகவஜ்ஜப⁴யத³ஸ்ஸாவினோ குலபுத்தா, ஆசாரகுலபுத்தாபி தாதி³ஸா ப⁴வந்தி. தோ²கேனாதி இமினா ‘‘மனம் அனஸ்ஸாமா’’தி பத³ஸ்ஸத்த²ம் வத³தி.

290. உதா³ஹரீயதி உப்³பே³க³பீதிவஸேனாதி, ததா² வா உதா³ஹரணம் உதா³னம். தேனாஹ ‘‘உதா³ஹாரம் உதா³ஹரீ’’தி. அஸ்ஸ த⁴ம்மஸ்ஸாதி அஸ்ஸ படிபத்திஸத்³த⁴ம்மபுப்³ப³கஸ்ஸ படிவேத⁴ஸத்³த⁴ம்மஸ்ஸ. ஸோதி ஹத்தி²பதோ³பமோ ஹத்தி²பதோ³பமபா⁴வேன வுச்சமானோ த⁴ம்மோ. ஏத்தாவதாதி ஏத்தகேன பரிப்³பா³ஜகேன வுத்தகதா²மக்³க³மத்தேன. காமம் தேன வுத்தகதா²மக்³கே³னபி ஹத்தி²பதோ³பமபா⁴வேன வுச்சமானோ த⁴ம்மோ பரிபுண்ணோவ அரஹத்தம் பாபேத்வா பவேதி³தத்தா, ஸோ ச கோ² ஸங்கே²பதோ, ந வித்தா²ரதோதி ஆஹ ‘‘ந ஏத்தாவதா வித்தா²ரேன பரிபூரோ ஹோதீ’’தி. யதி³ யதா² வித்தா²ரேன ஹத்தி²பதோ³பமோ பரிபூரோ ஹோதி, ததா² தே³ஸனா ஆரத்³தா⁴, அத² கஸ்மா குஸலோதி ந வுத்தோதி சோத³னா.

291. ஆயாமதோபீதி பி-ஸத்³தே³ன உப்³பே³தே⁴னபி ரஸ்ஸாதி த³ஸ்ஸேதி. நீசகாயா ஹி தா ஹோந்தி. உச்சாதி உச்சகா. நிஸேவனம், நிஸேவதி ஏத்தா²தி வா நிஸேவிதம். நிஸேவனஞ்சேத்த² கண்டு³யிதவினோத³னத்த²ம் க⁴ம்ஸனம். தேனாஹ ‘‘க²ந்த⁴ப்பதே³ஸே க⁴ம்ஸிதட்டா²ன’’ந்தி. உச்சாதி அனீசா, உப்³பே³த⁴வந்தியோதி அத்தோ². காளாரிகாதி விரளத³ந்தா, விஸங்க³தத³ந்தாதி அத்தோ². தேனாஹ ‘‘த³ந்தான’’ந்திஆதி³. களாரதாயாதி விரளதாய. ஆரஞ்ஜிதானீதி ரஞ்ஜிதானி, விலிகி²தானீதி அத்தோ². கணேருதாயாதி குடுமலஸண்டா²னதாய. அயம் வாதி ஏத்த² வா-ஸத்³தோ³ ஸம்ஸயிதனிச்ச²யத்தோ² யதா² அஞ்ஞத்தா²பி ‘‘அயம் வா இமேஸம் ஸமணப்³ராஹ்மணானம் ஸப்³ப³பா³லோ ஸப்³ப³மூள்ஹோ’’திஆதீ³ஸு (தீ³. நி. 1.181).

நாக³வனம் வியாதி மஹாஹத்தி²னோ வாமனிகாதீ³னஞ்ச பத³த³ஸ்ஸனட்டா²னபூ⁴தம் நாக³வனம் விய. ஆதி³தோ பட்டா²ய யாவ நீவரணப்பஹானா த⁴ம்மதே³ஸனா ததா²க³தஸ்ஸ பா³ஹிரபரிப்³பா³ஜகாதீ³னஞ்ச பத³த³ஸ்ஸனபா⁴வதோ. ஆதி³தோ பட்டா²யாதி ச ‘‘தம் ஸுணாஹீ’’தி பத³தோ பட்டா²ய. குஸலோ நாக³வனிகோ விய யோகா³வசரோ பரியேஸனவஸேன பமாணக்³க³ஹணதோ. மத்த²கே ட²த்வாதி இமஸ்ஸ ஸுத்தஸ்ஸ பரியோஸானே ட²த்வா. இமஸ்மிம்பி டா²னேதி ‘‘ஏவமேவ கோ² ப்³ராஹ்மணா’’திஆதி³னா உபமேய்யஸ்ஸ அத்த²ஸ்ஸ உபஞ்ஞாஸனட்டா²னேபி.

ஸ்வாயந்தி (தீ³. நி. டீ. 1.190) இத⁴-ஸத்³த³மத்தம் க³ண்ஹாதி, ந யதா²விஸேஸிதப்³ப³ம் இத⁴-ஸத்³த³ம். ததா² ஹி வக்க²தி ‘‘கத்த²சி பத³பூரணமத்தமேவா’’தி. லோகம் உபாதா³ய வுச்சதி லோக-ஸத்³தே³ன ஸமானாதி⁴கரணபா⁴வேன வுத்தத்தா. ஸேஸபத³த்³வயே பன ஸத்³த³ந்தரஸன்னிதா⁴னமத்தேன தம் தம் உபாதா³ய வுத்ததா த³ட்ட²ப்³பா³. ஓகாஸந்தி கஞ்சி பதே³ஸம் இந்த³ஸாலகு³ஹாய அதி⁴ப்பேதத்தா. பத³பூரணமத்தமேவ ஓகாஸாபதி³ஸனஸ்ஸபி அஸம்ப⁴வதோ.

ததா²க³த-ஸத்³தா³தீ³னம் அத்த²விஸேஸோ மூலபரியாயட்ட²கதா²(ம. நி. அட்ட². 1.12) விஸுத்³தி⁴மக்³க³ஸம்வண்ணனாஸு வுத்தோ ஏவ. ததா²க³தஸ்ஸ ஸத்தனிகாயந்தோக³த⁴தாய ‘‘இத⁴ பன ஸத்தலோகோ அதி⁴ப்பேதோ’’தி வத்வா தத்தா²யம் யஸ்மிம் ஸத்தனிகாயே, யஸ்மிஞ்ச ஓகாஸே உப்பஜ்ஜதி, தம் த³ஸ்ஸேதும் ‘‘ஸத்தலோகே உப்பஜ்ஜமானோபி சா’’திஆதி³ வுத்தம். தத்த² இமஸ்மிம்யேவ சக்கவாளேதி இமிஸ்ஸா ஏவ லோகதா⁴துயா. ‘‘அட்டா²னமேதம், பி⁴க்க²வே, அனவகாஸோ, யம் ஏகிஸ்ஸா லோகதா⁴துயா த்³வே அரஹந்தோ ஸம்மாஸம்பு³த்³தோ⁴ அபுப்³ப³ம் அசரிமம் உப்பஜ்ஜேய்யு’’ந்தி (தீ³. நி. 3.161; ம. நி. 3.129; அ. நி. 1.278; நேத்தி. 57; மி. ப. 5.1.1) ஏத்த² ஜாதிகே²த்தபூ⁴தா த³ஸஸஹஸ்ஸிலோகதா⁴து ‘‘ஏகிஸ்ஸா லோகதா⁴துயா’’தி வுத்தா. இத⁴ பன இமம்யேவ லோகதா⁴தும் ஸந்தா⁴ய ‘‘இமஸ்மிம்யேவ சக்கவாளே’’தி வுத்தம். திஸ்ஸோ ஹி ஸங்கீ³தியோ ஆருள்ஹே தேபிடகே பு³த்³த⁴வசனே விஸயகே²த்தம் ஆணாகே²த்தம் ஜாதிகே²த்தந்தி திவிதே⁴ கே²த்தே ட²பேத்வா இமம் சக்கவாளம் அஞ்ஞஸ்மிம் சக்கவாளே பு³த்³தா⁴ உப்பஜ்ஜந்தீதி ஸுத்தம் நத்தி², ந உப்பஜ்ஜந்தீதி பன அத்தி². கத²ம்? ‘‘ந மே ஆசரியோ அத்தி², ஸதி³ஸோ மே ந விஜ்ஜதி (ம. நி. 1.285; 2.341; மஹாவ. 11; கதா². 405; மி. ப. 4.5.11), ஏகோம்ஹி ஸம்மாஸம்பு³த்³தோ⁴’’தி (ம. நி. 1.285; 2.341; கதா². 405; மஹாவ. 11) ஏவமாதீ³னி இமிஸ்ஸா லோகதா⁴துயா ட²த்வா வத³ந்தேன ப⁴க³வதா – ‘‘கிம் பனாவுஸோ, ஸாரிபுத்த, அத்தே²தரஹி அஞ்ஞோ ஸமணோ வா ப்³ராஹ்மணோ வா ப⁴க³வதா ஸமஸமோ ஸம்போ³தி⁴யந்தி ஏவம் புட்டா²ஹம், ப⁴ந்தே, நோதி வதே³ய்ய’’ந்தி வத்வா தஸ்ஸ காரணம் த³ஸ்ஸேதும் – ‘‘அட்டா²னமேதம் அனவகாஸோ, யம் ஏகிஸ்ஸா லோகதா⁴துயா த்³வே அரஹந்தோ ஸம்மாஸம்பு³த்³தா⁴’’தி இமம் ஸுத்தம் த³ஸ்ஸேந்தேன த⁴ம்மஸேனாபதினா ச பு³த்³தா⁴னம் உப்பத்திட்டா²னபூ⁴தம் இமம் லோகதா⁴தும் ட²பேத்வா அஞ்ஞத்த² அனுப்பத்தி வுத்தா ஹோதீதி.

ஸுஜாதாயாதிஆதி³னா வுத்தேஸு சதூஸு விகப்பேஸு பட²மோ விகப்போ பு³த்³த⁴பா⁴வாய ஆஸன்னதரபடிபத்தித³ஸ்ஸனவஸேன வுத்தோ. ஆஸன்னதராய ஹி படிபத்தியம் டி²தோ ‘‘உப்பஜ்ஜதீ’’தி வுச்சதி உப்பாத³ஸ்ஸ ஏகந்திகத்தா, பகே³வ படிபத்தியா மத்த²கே டி²தோ. து³தியோ பு³த்³த⁴பா⁴வாவஹபப்³ப³ஜ்ஜதோ பட்டா²ய ஆஸன்னபடிபத்தித³ஸ்ஸனவஸேன, ததியோ பு³த்³த⁴கரத⁴ம்மபாரிபூரிதோ பட்டா²ய பு³த்³த⁴பா⁴வாய படிபத்தித³ஸ்ஸனவஸேன. ந ஹி மஹாஸத்தானம் துஸிதப⁴வூபபத்திதோ பட்டா²ய போ³தி⁴ஸம்பா⁴ரஸம்ப⁴ரணம் நாம அத்தி². சதுத்தோ² பு³த்³த⁴கரத⁴ம்மஸமாரம்ப⁴தோ பட்டா²ய. போ³தி⁴யா நியதபா⁴வாபத்திதோ பபு⁴தி ஹி விஞ்ஞூஹி ‘‘பு³த்³தோ⁴ உப்பஜ்ஜதீ’’தி வத்தும் ஸக்கா உப்பாத³ஸ்ஸ ஏகந்திகத்தா, யதா² பன ‘‘திட்ட²ந்தி பப்³ப³தா, ஸந்த³ந்தி நதி³யோ’’தி திட்ட²னஸந்த³னகிரியானம் அவிச்சே²த³முபாதா³ய வத்தமானபயோகோ³, ஏவம் உப்பாத³த்தா²ய படிபஜ்ஜனகிரியாய அவிச்சே²த³முபாதா³ய சதூஸு விகப்பேஸு ‘‘உப்பஜ்ஜதி நாமா’’தி வுத்தம். ஸப்³ப³பட²மம் உப்பன்னபா⁴வந்தி ஸப்³பே³ஹி உபரி வுச்சமானேஹி விஸேஸேஹி பட²மம் ததா²க³தஸ்ஸ உப்பன்னதாஸங்கா²தம் அத்தி²தாவிஸேஸம்.

ஸோ ப⁴க³வாதி (அ. நி. டீ. 2.3.64) யோ ‘‘ததா²க³தோ அரஹ’’ந்திஆதி³னா கித்திதகு³ணோ, ஸோ ப⁴க³வா. இமம் லோகந்தி நயித³ம் மஹாஜனஸ்ஸ ஸம்முகா²மத்தம் லோகம் ஸந்தா⁴ய வுத்தம், அத² கோ² அனவஸேஸம் பரியாதா³யாதி த³ஸ்ஸேதும் ‘‘ஸதே³வக’’ந்திஆதி³ வுத்தம். தேனாஹ ‘‘இதா³னி வத்தப்³ப³ம் நித³ஸ்ஸேதீ’’தி. பஜாதத்தாதி யதா²ஸகம் கம்மகிலேஸேஹி நிப்³ப³த்தத்தா. பஞ்சகாமாவசரதே³வக்³க³ஹணம் பாரிஸேஸஞாயேன இதரேஸம் பத³ந்தரேஹி ஸங்க³ஹிதத்தா. ஸதே³வகந்தி ச அவயவேன விக்³க³ஹோ ஸமுதா³யோ ஸமாஸத்தோ². ச²ட்ட²காமாவசரதே³வக்³க³ஹணம் பச்சாஸத்திஞாயேன. தத்த² ஹி ஸோ ஜாதோ தன்னிவாஸீ ச. ப்³ரஹ்மகாயிகாதி³ப்³ரஹ்மக்³க³ஹணந்தி ஏத்தா²பி ஏஸேவ நயோ. பச்சத்தி²கபச்சாமித்தஸமணப்³ராஹ்மணக்³க³ஹணந்தி நித³ஸ்ஸனமத்தமேதம் அபச்சத்தி²கானம் அஸமிதாபா³ஹிதபாபானஞ்ச ஸமணப்³ராஹ்மணானம் ஸஸ்ஸமணப்³ராஹ்மணிவசனேன க³ஹிதத்தா. காமம் ‘‘ஸதே³வக’’ந்திஆதி³விஸேஸனானம் வஸேன ஸத்தவிஸயோ லோக-ஸத்³தோ³தி விஞ்ஞாயதி துல்யயோக³விஸயத்தா தேஸம், ‘‘ஸலோமகோ ஸபக்க²கோ’’திஆதீ³ஸு பன அதுல்யயோகே³பி அயம் ஸமாஸோ லப்³ப⁴தீதி ப்³யபி⁴சாரத³ஸ்ஸனதோ பஜாக³ஹணந்தி ஆஹ ‘‘பஜாவசனேன ஸத்தலோகக்³க³ஹண’’ந்தி.

அரூபினோ ஸத்தா அத்தனோ ஆனேஞ்ஜவிஹாரேன விஹரந்தா ‘‘தி³ப்³ப³ந்தீதி தே³வா’’தி இமம் நிப்³ப³சனம் லப⁴ந்தீதி ஆஹ ‘‘ஸதே³வகக்³க³ஹணேன அரூபாவசரதே³வலோகோ க³ஹிதோ’’தி. தேனேவாஹ ‘‘ஆகாஸானஞ்சாயதனூபகா³னம் தே³வானம் ஸஹப்³யத’’ந்தி (அ. நி. 3.117). ஸமாரகக்³க³ஹணேன ச²காமாவசரதே³வலோகோ க³ஹிதோ தஸ்ஸ ஸவிஸேஸம் மாரஸ்ஸ வஸே வத்தனதோ. ரூபீ ப்³ரஹ்மலோகோ க³ஹிதோ அரூபீப்³ரஹ்மலோகஸ்ஸ விஸும் க³ஹிதத்தா. சதுபரிஸவஸேனாதி க²த்தியாதி³சதுபரிஸவஸேன. இதரா பன சதஸ்ஸோ பரிஸா ஸமாரகாதி³க்³க³ஹணேன க³ஹிதா ஏவாதி. அவஸேஸஸப்³ப³ஸத்தலோகோ நாக³க³ருளாதி³பே⁴தோ³.

ஏத்தாவதா பா⁴க³ஸோ லோகம் க³ஹேத்வா யோஜனம் த³ஸ்ஸேத்வா இதா³னி தேன தேன விஸேஸேன அபா⁴க³ஸோவ லோகம் க³ஹேத்வா யோஜனம் த³ஸ்ஸேதும் ‘‘அபிசேத்தா²’’திஆதி³ வுத்தம். தத்த² உக்கட்ட²பரிச்சே²த³தோதி உக்கம்ஸக³பி⁴விஜானனேன. பஞ்சஸு ஹி க³தீஸு தே³வலோகோவ ஸேட்டோ². தத்தா²பி அரூபினோ ‘‘தூ³ரஸமுஸ்ஸாரிதகிலேஸது³க்க²தாய, ஸந்தபணீதஆனேஞ்ஜவிஹாரஸமங்கி³தாய, அதிவிய தீ³கா⁴யுகதாயா’’தி ஏவமாதீ³ஹி விஸேஸேஹி அதிவிய இதரேஹி உக்கட்டா². ப்³ரஹ்மா மஹானுபா⁴வோதிஆதி³ம் த³ஸஸஹஸ்ஸியம் மஹாப்³ரஹ்முனோ வஸேன வத³தி. ‘‘உக்கட்ட²பரிச்சே²த³தோ’’தி ஹி வுத்தம். அனுத்தரந்தி ஸேட்ட²ம் நவலோகுத்தரம். பா⁴வானுக்கமோ பா⁴வவஸேன பரேஸம் அஜ்ஜா²ஸயவஸேன ‘‘ஸதே³வக’’ந்திஆதீ³னம் பதா³னம் அனுக்கமோ. தீஹாகாரேஹீதி தே³வமாரப்³ரஹ்மஸஹிததாஸங்கா²தேஹி தீஹி பகாரேஹி. தீஸு பதே³ஸூதி ‘‘ஸதே³வக’’ந்திஆதீ³ஸு தீஸு பதே³ஸு. தேன தேனாகாரேனாதி ஸதே³வகத்தாதி³னா தேன தேன பகாரேன. தேதா⁴துகமேவ பரியாதி³ன்னந்தி போராணா பனாஹூதி யோஜனா.

அபி⁴ஞ்ஞாதி ய-காரலோபேனாயம் நித்³தே³ஸோ, அபி⁴ஜானித்வாதி அயமேத்த² அத்தோ²தி ஆஹ ‘‘அபி⁴ஞ்ஞாய, அதி⁴கேன ஞாணேன ஞத்வா’’தி. அனுமானாதி³படிக்கே²போதி அனுமானஉபமானஅத்தா²பத்திஆதி³படிக்கே²போ ஏகப்பமாணத்தா. ஸப்³ப³த்த² அப்படிஹதஞாணாசாரதாய ஹி ஸப்³ப³பச்சக்கா² பு³த்³தா⁴ ப⁴க³வந்தோ. அனுத்தரம் விவேகஸுக²ந்தி ப²லஸமாபத்திஸுக²ம். தேன வீதிமிஸ்ஸாபி கதா³சி ப⁴க³வதோ த⁴ம்மதே³ஸனா ஹோதீதி ஆஹ ‘‘ஹித்வாபீ’’தி. ப⁴க³வா ஹி த⁴ம்மம் தே³ஸேந்தோ யஸ்மிம் க²ணே பரிஸா ஸாது⁴காரம் வா தே³தி, யதா²ஸுதம் வா த⁴ம்மம் பச்சவேக்க²தி, தம் க²ணம் புப்³ப³பா⁴கே³ன பரிச்சி²ந்தி³த்வா ப²லஸமாபத்திம் ஸமாபஜ்ஜதி, யதா²பரிச்சே²த³ஞ்ச ஸமாபத்திதோ வுட்டா²ய டி²தட்டா²னதோ பட்டா²ய த⁴ம்மம் தே³ஸேதி.

தே³ஸகாயத்தேன ஆணாதி³விதி⁴னா அதிஸஜ்ஜனம் பபோ³த⁴னம் தே³ஸனாதி ஸா பரியத்தித⁴ம்மவஸேன வேதி³தப்³பா³தி ஆஹ ‘‘தே³ஸனாய தாவ சதுப்பதி³காயபி கா³தா²யா’’திஆதி³. ஸாஸிதப்³ப³புக்³க³லக³தேன யதா²பராதா⁴தி³ஸாஸிதப்³ப³பா⁴வேன அனுஸாஸனம் தத³ங்க³வினயாதி³வஸேன வினயனம் ஸாஸனந்தி தம் படிபத்தித⁴ம்மவஸேன வேதி³தப்³ப³ந்தி ஆஹ ‘‘ஸீலஸமாதி⁴விபஸ்ஸனா’’திஆதி³. குஸலானந்தி மக்³க³குஸலானம், குஸலானந்தி வா அனவஜ்ஜானம். தேன ப²லத⁴ம்மானம்பி ஸங்க³ஹோ ஸித்³தோ⁴ ஹோதி. ஆதி³பா⁴வோ ஸீலதி³ட்டீ²னம் தம்மூலகத்தா உத்தரிமனுஸ்ஸத⁴ம்மானம். தஸ்மிம் தஸ்மிம் அத்தே² கதா²வதி⁴ஸத்³த³ப்பப³ந்தோ⁴ கா³தா²வஸேன ஸுத்தவஸேன ச வவத்தி²தோ பரியத்தித⁴ம்மோ, யோ இதே⁴வ ‘‘தே³ஸனா’’தி வுத்தோ. தஸ்ஸ பன அத்தோ² விஸேஸேன ஸீலாதி³ ஏவாதி ஆஹ ‘‘ப⁴க³வா ஹி த⁴ம்மம் தே³ஸேந்தோ…பே… நிப்³பா³னம் த³ஸ்ஸேதீ’’தி. தத்த² ஸீலம் த³ஸ்ஸேத்வாதி ஸீலக்³க³ஹணேன ஸஸம்பா⁴ரம் ஸீலம் க³ஹிதம். ததா² மக்³க³க்³க³ஹணேன ஸஸம்பா⁴ரோ மக்³கோ³தி தது³ப⁴யேன அனவஸேஸதோ பரியத்திஅத்த²ம் பரியாதி³யதி. தேனாதி ஸீலாதி³த³ஸ்ஸனேன. அத்த²வஸேன ஹி இத⁴ தே³ஸனாய ஆதி³கல்யாணாதி³பா⁴வோ அதி⁴ப்பேதோ. கதி²கஸண்டி²தீதி கதி²கஸ்ஸ ஸண்டா²னம் கத²னவஸேன ஸமவட்டா²னம்.

ந ஸோ ஸாத்த²ம் தே³ஸேதி நிய்யானத்த²விரஹதோ தஸ்ஸா தே³ஸனாய. ஏகப்³யஞ்ஜனாதி³யுத்தா வாதி ஸிதி²லாதி³பே⁴தே³ஸு ப்³யஞ்ஜனேஸு ஏகப்பகாரேனேவ, த்³விப்பகாரேனேவ வா ப்³யஞ்ஜனேன யுத்தா வா த³மிளபா⁴ஸா விய. ஸப்³ப³த்த² நிரோட்ட²ம் கத்வா வத்தப்³ப³தாய ஸப்³ப³னிரோட்ட²ப்³யஞ்ஜனா வா கிராதபா⁴ஸா விய. ஸப்³ப³த்தே²வ விஸ்ஸஜ்ஜனீயயுத்ததாய ஸப்³ப³விஸ்ஸட்ட²ப்³யஞ்ஜனா வா யவனபா⁴ஸா விய. ஸப்³ப³த்தே²வ ஸானுஸாரதாய ஸப்³ப³னிக்³க³ஹிதப்³யஞ்ஜனா வா பாரஸிகாதி³மிலக்க²பா⁴ஸா விய. ஸப்³பா³பேஸா ஏகதே³ஸப்³யஞ்ஜனவஸேனேவ பவத்தியா அபரிபுண்ணப்³யஞ்ஜனாதி கத்வா ‘‘அப்³யஞ்ஜனா’’தி வுத்தா. அமக்கே²த்வாதி அபலிச்சே²த்வா அவினாஸேத்வா, அஹாபேத்வாதி வா அத்தோ².

ப⁴க³வா யமத்த²ம் ஞாபேதும் ஏககா³த²ம்பி ஏகவாக்யம்பி தே³ஸேதி, தமத்த²ம் தாய தே³ஸனாய ஸப்³ப³ஸோ பரிபுண்ணமேவ கத்வா தே³ஸேதி, ஏவம் ஸப்³ப³த்தா²தி ஆஹ ‘‘ஏகதே³ஸனாபி அபரிபுண்ணா நத்தீ²’’தி. உல்லும்பனஸபா⁴வஸண்டி²தேனாதி ஸம்கிலேஸபக்க²தோ வட்டது³க்க²தோ ச உத்³த⁴ரணஸபா⁴வாவட்டி²தேன சித்தேன. தஸ்மாதி யஸ்மா ஸிக்கா²த்தயஸங்க³ஹம் ஸகலம் ஸாஸனம் இத⁴ ‘‘ப்³ரஹ்மசரிய’’ந்தி அதி⁴ப்பேதம், தஸ்மா. ப்³ரஹ்மசரியந்தி இமினா ஸமானாதி⁴கரணானி ஸப்³ப³பதா³னி யோஜேத்வா அத்த²ம் த³ஸ்ஸேந்தோ ‘‘ஸோ த⁴ம்மம் தே³ஸேதி…பே… பகாஸேதீதி ஏவமேத்த² அத்தோ² த³ட்ட²ப்³போ³’’தி ஆஹ.

தூ³ரஸமுஸ்ஸாரிதமானஸ்ஸேவ ஸாஸனே ஸம்மாபடிபத்தி ஸம்ப⁴வதி, ந மான ஜாதிகஸ்ஸாதி ஆஹ ‘‘நிஹதமானத்தா’’தி. உஸ்ஸன்னத்தாதி ப³ஹுலபா⁴வதோ. போ⁴கா³ரோக்³யாதி³வத்து²கா மதா³ ஸுப்பஹேய்யா ஹோந்தி நிமித்தஸ்ஸ அனவட்டா²னதோ’ ந ததா² குலவிஜ்ஜாமதா³தி க²த்தியப்³ராஹ்மணகுலீனானம் பப்³ப³ஜிதானம்பி ஜாதிவிஜ்ஜா நிஸ்ஸாய மானஜப்பனம் து³ப்பஜஹந்தி ஆஹ ‘‘யேபு⁴ய்யேன ஹி…பே… மானம் கரோந்தீ’’தி. விஜாதிதாயாதி நிஹீனஜாதிதாய. பதிட்டா²தும் ந ஸக்கோந்தீதி ஸுவிஸுத்³தி⁴ம் கத்வா ஸீலம் ரக்கி²தும் ந ஸக்கோந்தி. ஸீலவஸேன ஹி ஸாஸனே பதிட்டா²தி. பதிட்டா²துந்தி வா ஸச்சபடிவேதே⁴ன லோகுத்தராய பதிட்டா²ய பதிட்டா²தும். யேபு⁴ய்யேன ஹி உபனிஸ்ஸயஸம்பன்னா ஸுஜாதா ஏவ ஹோந்தி, ந து³ஜ்ஜாதா.

பரிஸுத்³த⁴ந்தி ராகா³தீ³னம் அச்சந்தமேவ பஹானதீ³பனதோ நிருபக்கிலேஸதாய ஸப்³ப³ஸோ விஸுத்³த⁴ம். ஸத்³த⁴ம் படிலப⁴தீதி போது²ஜ்ஜனிகஸத்³தா⁴வஸேன ஸத்³த³ஹதி. விஞ்ஞுஜாதிகானஞ்ஹி த⁴ம்மஸம்பத்திக³ஹணபுப்³பி³கா ஸத்³தா⁴ஸித்³தி⁴ த⁴ம்மபமாணத⁴ம்மப்பஸன்னபா⁴வதோ. ஜாயம்பதிகா வஸந்தீதி காமம் ‘‘ஜாயம்பதிகா’’தி வுத்தே க⁴ரஸாமிகக⁴ரஸாமினிவஸேன த்³வின்னம்யேவ க³ஹணம் விஞ்ஞாயதி. யஸ்ஸ பன புரிஸஸ்ஸ அனேகா பஜாபதியோ ஹோந்தி, தத்த² கிம் வத்தப்³ப³ம்? ஏகாயபி தாய வாஸோ ஸம்பா³தோ⁴தி த³ஸ்ஸனத்த²ம் ‘‘த்³வே’’தி வுத்தம். ராகா³தி³னா ஸகிஞ்சனட்டே²ன, கே²த்தவத்து²ஆதி³னா ஸபலிபோ³த⁴ட்டே²ன. ராக³ரஜாதீ³னம் ஆக³மனபத²தாபி உப்பஜ்ஜனட்டா²னதா ஏவாதி த்³வேபி வண்ணனா ஏகத்தா², ப்³யஞ்ஜனமேவ நானம். அலக்³க³னட்டே²னாதி அஸஜ்ஜனட்டே²ன அப்படிப³த்³த⁴பா⁴வேன. ஏவம் அகுஸலகுஸலப்பவத்தீனம் டா²னபா⁴வேன க⁴ராவாஸபப்³ப³ஜ்ஜானம் ஸம்பா³த⁴ப்³போ⁴காஸதம் த³ஸ்ஸேத்வா இதா³னி குஸலப்பவத்தியா ஏவ அட்டா²னடா²னபா⁴வேன தேஸம் தம் த³ஸ்ஸேதும் ‘‘அபிசா’’திஆதி³ வுத்தம்.

ஸங்கே²பகதா²தி விஸும் விஸும் பது³த்³தா⁴ரம் அகத்வா ஸங்கே²பதோ அத்த²வண்ணனா. ஏகம்பி தி³வஸந்தி ஏகதி³வஸமத்தம்பி. அக²ண்ட³ம் கத்வாதி து³க்கடமத்தஸ்ஸபி அனாபஜ்ஜனேன அக²ண்டி³தம் கத்வா. கிலேஸமலேன அமலீனந்தி தண்ஹாஸம்கிலேஸாதி³வஸேன அஸம்கிலிட்ட²ம் கத்வா. பரித³ஹித்வாதி நிவாஸேத்வா சேவ பாருபித்வா ச. அகா³ரவாஸோ அகா³ரம் உத்தரபத³லோபேன, தஸ்ஸ வட்³டி⁴ஆவஹம் அகா³ரஸ்ஸ ஹிதம். போ⁴க³க்க²ந்தோ⁴தி போ⁴க³ராஸி போ⁴க³ஸமுதா³யோ. ஆப³ந்த⁴னட்டே²னாதி ‘‘புத்தோ நத்தா’’திஆதி³னா பேமவஸேன ஸபரிச்சே²த³ம் ஸம்ப³ந்த⁴னட்டே²ன. ‘‘அம்ஹாகமேதே’’தி ஞாயந்தீதி ஞாதீ. பிதாமஹபிதுபுத்தாதி³வஸேன பரிவத்தனட்டே²ன பரிவட்டோ.

292. ஸாமஞ்ஞவாசீபி ஸிக்கா²-ஸத்³தோ³ ஸாஜீவ-ஸத்³த³ஸன்னிதா⁴னதோ உபரி வுச்சமானவிஸேஸாபேக்கா²ய ச விஸேஸனிவிட்டோ²வ ஹோதீதி வுத்தம் ‘‘யா பி⁴க்கூ²னம் அதி⁴ஸீலஸங்கா²தா ஸிக்கா²’’தி. ஸிக்கி²தப்³ப³ட்டே²ன ஸிக்கா². ஸஹ ஆஜீவந்தி ஏத்தா²தி ஸாஜீவோ. ஸிக்க²னபா⁴வேனாதி ஸிக்கா²ய ஸாஜீவே ச ஸிக்க²னபா⁴வேன. ஸிக்க²ம் பரிபூரேந்தோதி ஸீலஸம்வரம் பரிபூரேந்தோ. ஸாஜீவஞ்ச அவீதிக்கமந்தோதி – ‘‘நாமகாயோ பத³காயோ நிருத்திகாயோ ப்³யஞ்ஜனகாயோ’’தி (பாரா. அட்ட². 39) வுத்தஸிக்கா²பத³ம் ப⁴க³வதோ வசனம் அவீதிக்கமந்தோ ஹுத்வாதி அத்தோ². இத³மேவ ச த்³வயம் ‘‘ஸிக்க²ன’’ந்தி வுத்தம். தத்த² ஸாஜீவானதிக்கமோ ஸிக்கா²பாரிபூரியா பச்சயோ. ததோ ஹி யாவ மக்³கா³ ஸிக்கா²பாரிபூரீ ஹோதீதி.

பஜஹித்வாதி ஸமாதா³னவஸேன பரிச்சஜித்வா. பஹீனகாலதோ பட்டா²ய…பே… விரதோவாதி ஏதேன பஹானஸ்ஸ விரதியா ச ஸமானகாலதம் த³ஸ்ஸேதி. யதி³ ஏவம் ‘‘பஹாயா’’தி கத²ம் புரிமகாலனித்³தே³ஸோதி? ததா² க³ஹேதப்³ப³தம் உபாதா³ய. த⁴ம்மானஞ்ஹி பச்சயபச்சயுப்பன்னபா⁴வே அபேக்கி²தே ஸஹஜாதானம்பி பச்சயபச்சயுப்பன்னபா⁴வேன க³ஹணம் புரிமபச்சி²மபா⁴வேனேவ ஹோதீதி க³ஹணபவத்திஆகாரவஸேன பச்சயபூ⁴தேஸு ஹிரோத்தப்பஞாணாதீ³ஸு பஹானகிரியாய புரிமகாலவோஹாரோ, பச்சயுப்பன்னாஸு ச விரதீஸு விரமணகிரியாய அபரகாலவோஹாரோ ச ஹோதீதி ‘‘பஹாய படிவிரதோ ஹோதீ’’தி வுத்தம். பஹாயாதி வா ஸமாதா³னகாலவஸேன வுத்தம், பச்சா² வீதிக்கமிதப்³ப³வத்து²ஸமாயோக³வஸேன படிவிரதோதி. பஹாயாதி வா –

‘‘நிஹந்த்வான தமோக²ந்த⁴ம், உதி³தோயம் தி³வாகரோ;

வண்ணபபா⁴ய பா⁴ஸேதி, ஓபா⁴ஸேத்வா ஸமுக்³க³தோ’’தி ச. (விஸுத்³தி⁴. மஹாடீ. 2.578) –

ஏவமாதீ³ஸு விய ஸமானகாலவஸேன வேதி³தப்³போ³. அத² வா பாணோ அதிபாதீயதி ஏதேனாதி பாணாதிபாதோ, பாணகா⁴தஹேதுபூ⁴தோ அஹிரிகானோத்தப்பதோ³ஸமோஹவிஹிம் ஸாதி³கோ சேதனாபதா⁴னோ ஸம்கிலேஸத⁴ம்மோ, தம் ஸமாதா³னவஸேன பஹாய. ததோ…பே… விரதோவ ஹோதீதி அவதா⁴ரணேன தஸ்ஸா விரதியா காலாதி³வஸேன அபரியந்ததம் த³ஸ்ஸேதி. யதா² ஹி அஞ்ஞே ஸமாதி³ன்னவிரதிகாபி அனவட்டி²தசித்ததாய லாப⁴ஜீவிகாதி³ஹேது ஸமாதா³னம் பி⁴ந்த³ந்தேவ, ந ஏவமயம். அயம் பன பஹீனகாலதோ பட்டா²ய ஓரதோ விரதோதி. அதி³ன்னாதா³னம் பஹாயாதிஆதீ³ஸுபி இமினா நயேன அத்தோ² வேதி³தப்³போ³.

த³ண்ட³னம் த³ண்ட³னிபாதனம் த³ண்டோ³. முக்³க³ராதி³பஹரணவிஸேஸோபி இத⁴ பஹரணவிஸேஸோதி அதி⁴ப்பேதோ. தேனாஹ ‘‘ட²பேத்வா த³ண்ட³ம் ஸப்³ப³ம்பி அவஸேஸம் உபகரண’’ந்தி. த³ண்ட³னஸங்கா²தஸ்ஸ பரவிஹேட²னஸ்ஸ பரிவஜ்ஜிதபா⁴வதீ³பனத்த²ம் த³ண்ட³ஸத்தா²னம் நிக்கே²பவசனந்தி ஆஹ ‘‘பரூபகா⁴தத்தா²யா’’திஆதி³. விஹிம்ஸனபா⁴வதோதி விபா³த⁴னபா⁴வதோ. லஜ்ஜீதி ஏத்த² வுத்தலஜ்ஜாய ஓத்தப்பம்பி வுத்தந்தி த³ட்ட²ப்³ப³ம். ந ஹி பாபஜிகு³ச்ச²னபாபுத்தாஸரஹிதம், பாபப⁴யம் வா அலஜ்ஜனம் அத்தி². யஸ்ஸ வா த⁴ம்மக³ருதாய த⁴ம்மஸ்ஸ ச அத்தாதீ⁴னத்தா அத்தாதி⁴பதிபூ⁴தா லஜ்ஜாகிச்சகாரீ, தஸ்ஸ லோகாதி⁴பதிபூ⁴தம் ஓத்தப்பம் கிச்சகரந்தி வத்தப்³ப³மேவ நத்தீ²தி ‘‘லஜ்ஜீ’’இச்சேவ வுத்தம். த³யம் மேத்தசித்ததம் ஆபன்னோதி கஸ்மா வுத்தம், நனு த³யா-ஸத்³தோ³ ‘‘அத³யாபன்னோ’’திஆதீ³ஸு கருணாய வத்ததீதி? ஸச்சமேதம், அயம் பன த³யா-ஸத்³தோ³ அனுரக்க²ணத்த²ம் அந்தோனீதம் கத்வா பவத்தமானோ மேத்தாய ச கருணாய ச பவத்ததீதி இத⁴ மேத்தாய பவத்தமானோ வுத்தோ. மிஜ்ஜதி ஸினிய்ஹதீதி மேத்தா, ஸா ஏதஸ்ஸ அத்தீ²தி மேத்தம், மேத்தம் சித்தம் ஏதஸ்ஸ அத்தீ²தி மேத்தசித்தோ, தஸ்ஸ பா⁴வோ மேத்தசித்ததா, மேத்தாஇச்சேவ அத்தோ².

ஸப்³ப³பாணபூ⁴தஹிதானுகம்பீதி ஏதேன தஸ்ஸா விரதியா ஸத்தவஸேன அபரியந்ததம் த³ஸ்ஸேதி. பாணபூ⁴தேதி பாணஜாதே. அனுகம்பகோதி கருணாயனகோ. யஸ்மா பன மேத்தா கருணாய விஸேஸபச்சயோ ஹோதி, தஸ்மா வுத்தம் ‘‘தாய ஏவ த³யாபன்னதாயா’’தி. ஏவம் யேஹி த⁴ம்மேஹி பாணாதிபாதா விரதி ஸம்பஜ்ஜதி, தேஹி லஜ்ஜாமேத்தாகருணாத⁴ம்மேஹி ஸமங்கி³பா⁴வோ த³ஸ்ஸிதோ, ஸத்³தி⁴ம் பிட்டி²வட்டகத⁴ம்மேஹீதி த³ட்ட²ப்³ப³ம். ஏத்தா²ஹ – கஸ்மா ‘‘பாணாதிபாதம் பஹாயா’’தி ஏகவசனனித்³தே³ஸோ கதோ, நனு நிரவஸேஸானம் பாணானம் அதிபாததோ விரதி இதா⁴தி⁴ப்பேதா? ததா² ஹி வுத்தம் ‘‘ஸப்³ப³பாணபூ⁴தஹிதானுகம்பீ விஹரதீ’’தி. தேனேவ ஹி அட்ட²கதா²யம் ‘‘ஸப்³பே³ பாணபூ⁴தே ஹிதேன அனுகம்பகோ’’தி புது²வசனனித்³தே³ஸோதி? ஸச்சமேதம், பாணபா⁴வஸாமஞ்ஞவஸேன பனேத்த² பாளியம் ஆதி³தோ ஏகவசனனித்³தே³ஸோ கதோ, ஸப்³ப³ஸத்³த³ஸன்னிதா⁴னேன புது²த்தம் விஞ்ஞாயமானமேவாதி ஸாமஞ்ஞனித்³தே³ஸம் அகத்வா பே⁴த³வசனிச்சா²வஸேன த³ஸ்ஸேதும் அட்ட²கதா²யம் ப³ஹுவசனவஸேன அத்தோ² வுத்தோ. கிஞ்ச பி⁴ய்யோ – ஸாமஞ்ஞதோ ஸம்வரஸமாதா³னம், தப்³பி³ஸேஸதோ ஸம்வரபே⁴தோ³தி இமஸ்ஸ விஸேஸஸ்ஸ த³ஸ்ஸனத்த²ம் அயம் வசனபே⁴தோ³ கதோதி வேதி³தப்³ப³ம். விஹரதீதி வுத்தப்பகாரோ ஹுத்வா ஏகஸ்மிம் இரியாபதே² உப்பன்னம் து³க்க²ம் அஞ்ஞேன இரியாபதே²ன விச்சி²ந்தி³த்வா அத்தபா⁴வம் ஹரதி பவத்தேதீதி அத்தோ². தேனாஹ ‘‘இரியதி பாலேதீ’’தி.

ந கேவலம் காயவசீபயோக³வஸேன ஆதா³னமேவ, அத² கோ² ஆகங்க²பிஸ்ஸ பரிச்சத்தவத்து²விஸயாவாதி த³ஸ்ஸேதும் ‘‘சித்தேனபீ’’திஆதி³ வுத்தம். தே²னேதி தே²ய்யம் கரோதீதி தே²னோ, சோரோ. ஸுசிபூ⁴தேனாதி ஏத்த² ஸுசிபா⁴வோ அதி⁴காரதோ ஸத்³த³ந்தரஸன்னிதா⁴னதோ ச தே²ய்யஸம்கிலேஸவிரமணந்தி ஆஹ ‘‘அதே²னத்தாயேவ ஸுசிபூ⁴தேனா’’தி. காமஞ்சேத்த² ‘‘லஜ்ஜீ த³யாபன்னோ’’திஆதி³ ந வுத்தம், அதி⁴காரவஸேன பன அத்த²தோ வா வுத்தமேவாதி வேதி³தப்³ப³ம். யதா² ஹி லஜ்ஜாத³யோ பாணாதிபாதபஹானஸ்ஸ விஸேஸபச்சயோ, ஏவம் அதி³ன்னாதா³னபஹானஸ்ஸபீதி, தஸ்மா ஸாபி பாளி ஆனேத்வா வத்தப்³பா³. ஏஸ நயோ இதோ பரேஸுபி. அத² வா ஸுசிபூ⁴தேனாதி ஏதேன ஹிரோத்தப்பாதீ³ஹி ஸமன்னாக³மோ, அஹிரிகாதீ³னஞ்ச பஹானம் வுத்தமேவாதி ‘‘லஜ்ஜீ’’திஆதி³ ந வுத்தந்தி த³ட்ட²ப்³ப³ம்.

அஸேட்ட²சரியந்தி அஸேட்டா²னம் சரியம், அஸேட்ட²ம் வா சரியம். மிது²னானம் வுத்தாகாரேன ஸதி³ஸபூ⁴தானம் அயந்தி மிது²னோ, யதா²வுத்தோ து³ராசாரோ. ஆராசாரீ மேது²னாதி ஏதேன – ‘‘இத⁴ ப்³ராஹ்மண, ஏகச்சோ…பே… ந ஹேவ கோ² மாதுகா³மேன ஸத்³தி⁴ம் த்³வயம்த்³வயஸமாபத்திம் ஸமாபஜ்ஜதி, அபிச கோ² மாதுகா³மஸ்ஸ உச்சா²த³னபரிமத்³த³னன்ஹாபனஸம்பா³ஹனம் ஸாதி³யதி, ஸோ தத³ஸ்ஸாதே³தி, தம் நிகாமேதி, தேன ச வித்திம் ஆபஜ்ஜதீ’’திஆதி³னா (அ. நி. 7.50) வுத்தா ஸத்தவித⁴மேது²னஸம்யோகா³பி படிவிரதி த³ஸ்ஸிதாதி த³ட்ட²ப்³ப³ம்.

ஸச்சேன ஸச்சந்தி புரிமேன வசீஸச்சேன பச்சி²மம் வசீஸச்சம் ஸந்த³ஹதி அஸச்சேன அனந்தரிகத்தா. தேனாஹ ‘‘யோ ஹீ’’திஆதி³. ஹலித்³தி³ராகோ³ விய ந தி²ரகதோ ஹோதீதி ஏத்த² கதா²ய அனவட்டி²தபா⁴வேன ஹலித்³தி³ராக³ஸதி³ஸதா வேதி³தப்³பா³, ந புக்³க³லஸ்ஸ. பாஸாணலேகா² வியாதி ஏத்தா²பி ஏஸேவ நயோ. ஸத்³தா⁴ அயதி பவத்ததி ஏத்தா²தி ஸத்³தா⁴யோ, ஸத்³தா⁴யோ ஏவ ஸத்³தா⁴யிகோ யதா² ‘‘வேனயிகோ’’தி (ம. நி. 1.246; அ. நி. 8.11; பாரா. 8), ஸத்³தா⁴ய வா அயிதப்³போ³ ஸத்³தா⁴யிகோ, ஸத்³தே⁴ய்யோதி அத்தோ². வத்தப்³ப³தம் ஆபஜ்ஜதிவிஸம்வாத³னதோதி அதி⁴ப்பாயோ.

அனுப்பதா³தாதி (தீ³. நி. டீ. 1.9; அ. நி. டீ. 2.4.198) அனுப³லப்பதா³தா, அனுவத்தனவஸேன வா பதா³தா. கஸ்ஸ பன அனுவத்தனம் பதா³னஞ்சாதி? ‘‘ஸஹிதான’’ந்தி வுத்தத்தா ஸந்தா⁴னஸ்ஸாதி விஞ்ஞாயதி. தேனாஹ ‘‘ஸந்தா⁴னானுப்பதா³தா’’தி. யஸ்மா பன அனுவத்தனவஸேன ஸந்தா⁴னஸ்ஸ பதா³னம் ஆதா⁴னம், ரக்க²ணம் வா த³ள்ஹீகரணம் ஹோதி. தேன வுத்தம் ‘‘த்³வே ஜனே ஸமக்³கே³ தி³ஸ்வா’’திஆதி³. ஆரமந்தி ஏத்தா²தி ஆராமோ, ரமிதப்³ப³ட்டா²னம். யஸ்மா பன ஆ-காரேன வினாபி அயமத்தோ² லப்³ப⁴தி, தஸ்மா வுத்தம் ‘‘ஸமக்³க³ராமோதிபி பாளி, அயமேவேத்த² அத்தோ²’’தி.

ஏத்தா²தி –

‘‘நேலங்கோ³ ஸேதபச்சா²தோ³, ஏகாரோ வத்ததீ ரதோ²;

அனீக⁴ம் பஸ்ஸ ஆயந்தம், சி²ன்னஸோதம் அப³ந்த⁴ன’’ந்தி. (ஸம். நி. 4.347; உதா³. 65; பேடகோ. 25;தீ³. நி. டீ. 1.9) –

இமிஸ்ஸா கா³தா²ய. ஸீலஞ்ஹேத்த² ‘‘நேலங்க³’’ந்தி வுத்தம். தேனேவாஹ – சித்தோ க³ஹபதி, ‘‘நேலங்க³ந்தி கோ², ப⁴ந்தே, ஸீலானமேதம் அதி⁴வசன’’ந்தி (ஸம். நி. 4.347; தீ³. நி. டீ. 1.9). ஸுகுமாராதி அப²ருஸதாய முது³கா. புரஸ்ஸ ஏஸாதி ஏத்த² புர-ஸத்³தோ³ தன்னிவாஸீவாசகோ த³ட்ட²ப்³போ³ ‘‘கா³மோ ஆக³தோ’’திஆதீ³ஸு (தீ³. நி. டீ. 1.9) விய. தேனேவாஹ ‘‘நக³ரவாஸீன’’ந்தி. மனம் அப்பாயதி வட்³டே⁴தீதி மனாபா. தேன வுத்தம் ‘‘சித்தவுத்³தி⁴கரா’’தி.

காலவாதீ³திஆதி³ ஸம்ப²ப்பலாபாபடிவிரதஸ்ஸ படிபத்தித³ஸ்ஸனம். அத்த²ஸம்ஹிதாபி ஹி வாசா அயுத்தகாலபயோகே³ன அத்தா²வஹா ந ஸியாதி அனத்த²விஞ்ஞாபனவாசம் அனுலோமேதி, தஸ்மா ஸம்ப²ப்பலாபம் பஜஹந்தேன அகாலவாதி³தா பரிஹரிதப்³பா³தி வுத்தம் ‘‘காலவாதீ³’’தி. காலே வத³ந்தேனபி உப⁴யானத்த²ஸாத⁴னதோ அபூ⁴தம் பரிவஜ்ஜேதப்³ப³ந்தி ஆஹ ‘‘பூ⁴தவாதீ³’’தி. பூ⁴தஞ்ச வத³ந்தேன யம் இத⁴லோக-பரலோக-ஹிதஸம்பாத³கம், ததே³வ வத்தப்³ப³ந்தி த³ஸ்ஸேதும் ‘‘அத்த²வாதீ³’’தி வுத்தம். அத்த²ம் வத³ந்தேனபி லோகியத⁴ம்மஸன்னிஸ்ஸிதமேவ அவத்வா லோகுத்தரத⁴ம்மஸன்னிஸ்ஸிதம் கத்வா வத்தப்³ப³ந்தி த³ஸ்ஸனத்த²ம் ‘‘த⁴ம்மவாதீ³’’தி வுத்தம். யதா² ச அத்தோ² லோகுத்தரத⁴ம்மஸன்னிஸ்ஸிதோ ஹோதி, தம்த³ஸ்ஸனத்த²ம் ‘‘வினயவாதீ³’’தி வுத்தம். பஞ்சன்னஞ்ஹி ஸம்வரவினயானம், பஞ்சன்னஞ்ச பஹானவினயானம் வஸேன வுச்சமானோ அத்தோ² நிப்³பா³னாதி⁴க³மஹேதுபா⁴வதோ லோகுத்தரத⁴ம்மஸன்னிஸ்ஸிதோ ஹோதீதி. ஏவம் கு³ணவிஸேஸயுத்தோவ அத்தோ² வுச்சமானோ தே³ஸனாகோஸல்லே ஸதி ஸோப⁴தி, கிச்சகரோ ச ஹோதி, ந அஞ்ஞதா²தி த³ஸ்ஸேதும் ‘‘நிதா⁴னவதிம் வாசம் பா⁴ஸிதா’’தி வுத்தம். இதா³னி தம் தே³ஸனாகோஸல்லம் விபா⁴வேதும் ‘‘காலேனா’’திஆதி³மாஹ. புச்சா²தி³வஸேன ஹி ஓதிண்ணவாசாவத்து²ஸ்மிம் ஏகம்ஸாதி³ப்³யாகரணவிபா⁴க³ம் ஸல்லக்கே²த்வா ட²பனாஹேதுஉதா³ஹரணம் ஸம்ஸந்த³னாதி³ம் தம்தம்காலானுரூபம் விபா⁴வேந்தியா பரிமிதபரிச்சி²ன்னரூபாய விபுலதர-க³ம்பீ⁴ரோதா³ர-பரமத்த²-வித்தா²ரஸங்கா³ஹிகாய கதா²ய ஞாணப³லானுரூபம் பரே யாதா²வதோ த⁴ம்மே பதிட்டா²பேந்தோ ‘‘தே³ஸனாகுஸலோ’’தி வுச்சதீதி ஏவமேத்த² அத்த²யோஜனா வேதி³தப்³பா³.

293. ஏவம் படிபாடியா ஸத்த மூலஸிக்கா²பதா³னி விபா⁴வேத்வா ஸதிபி அபி⁴ஜ்ஜா²தி³பஹானஇந்த்³ரியஸம்வரஸதிஸம்பஜஞ்ஞஜாக³ரியானுயோகா³தி³கே உத்தரதே³ஸனாயம் விபா⁴வேதும் தம் பரிஹரித்வா ஆசாரஸீலஸ்ஸேவ விப⁴ஜனவஸேன பாளி பவத்தாதி தத³த்த²ம் விவரிதும் ‘‘பீ³ஜகா³மபூ⁴தகா³மஸமாரம்பா⁴’’திஆதி³ வுத்தம். தத்த² பீ³ஜானம் கா³மோ ஸமூஹோ பீ³ஜகா³மோ. பூ⁴தானம் ஜாதானம் நிப்³ப³த்தானம் ருக்க²க³ச்ச²லதாதீ³னம் ஸமூஹோ பூ⁴தகா³மோ. நனு ச ருக்கா²த³யோ சித்தரஹிததாய ந ஜீவா, சித்தரஹிததா ச பரிப்ப²ந்தா³பா⁴வதோ சி²ன்னே விருஹனதோ விஸதி³ஸஜாதிகபா⁴வதோ சதுயோனிஅபரியாபன்னதோ ச வேதி³தப்³பா³, வுட்³டி⁴ பன பவாளஸிலாலவணானம்பி விஜ்ஜதீதி ந தேஸம் ஜீவபா⁴வே காரணம், விஸயக்³க³ஹணஞ்ச நேஸம் பரிகப்பனாமத்தம் ஸுபனம் விய சிஞ்சாதே³னம், ததா² தோ³ஹளாத³யோ, தத்த² கஸ்மா பீ³ஜகா³மபூ⁴தகா³மஸமாரம்பா⁴ படிவிரதி இச்சி²தாதி? ஸமணஸாருப்பதோ தன்னிவாஸிஸத்தானுரக்க²ணதோ ச. தேனேவாஹ – ‘‘ஜீவஸஞ்ஞினோ ஹி மோக⁴புரிஸ மனுஸ்ஸா ருக்க²ஸ்மி’’ந்திஆதி³ (பாசி. 89).

மூலமேவ பீ³ஜம் மூலபீ³ஜம், மூலபீ³ஜம் ஏதஸ்ஸாதிபி மூலபீ³ஜம். ஸேஸேஸுபி ஏஸேவ நயோ. ப²ளுபீ³ஜந்தி பப்³ப³பீ³ஜம். பச்சயந்தரஸமவாயே ஸதி³ஸப²லுப்பத்தியா விஸேஸகாரணபா⁴வதோ விருஹணஸமத்தே² ஸாரப²லே நிருள்ஹோ பீ³ஜஸத்³தோ³ தத³த்த²ஸம்ஸித்³தி⁴யா மூலாதீ³ஸுபி கேஸுசி பவத்ததீதி மூலாதி³தோ நிவத்தனத்த²ம் ஏகேன பீ³ஜ-ஸத்³தே³ன விஸேஸேத்வா வுத்தம் ‘‘பீ³ஜபீ³ஜ’’ந்தி ‘‘ரூபரூபம் (விஸுத்³தி⁴. 2.449), து³க்க²து³க்க²’’ந்தி (ஸம். நி. 4.327; 5.165; நேத்தி. 11) ச யதா². கஸ்மா பனேத்த² பீ³ஜகா³மபூ⁴தகா³மம் உத்³த⁴ரித்வா பீ³ஜகா³மோ ஏவ நித்³தி³ட்டோ²தி? ந கோ² பனேதம் ஏவம் த³ட்ட²ப்³ப³ம், நனு அவோசும்ஹ – ‘‘மூலமேவ பீ³ஜம் மூலபீ³ஜம், மூலபீ³ஜம் ஏதஸ்ஸாதிபி மூலபீ³ஜ’’ந்தி. தத்த² புரிமேன பீ³ஜகா³மோ நித்³தி³ட்டோ², து³தியேன பூ⁴தகா³மோ, து³விதோ⁴பேஸ மூலபீ³ஜஞ்ச மூலபீ³ஜஞ்ச மூலபீ³ஜந்தி ஸாமஞ்ஞனித்³தே³ஸேன, ஏகஸேஸனயேன வா உத்³தி³ட்டோ²தி வேதி³தப்³போ³. தேனேவாஹ ‘‘பஞ்சவித⁴ஸ்ஸா’’திஆதி³. நீலதிணருக்கா²தி³கஸ்ஸாதி அல்லதிணஸ்ஸ சேவ அல்லருக்கா²தி³கஸ்ஸ ச. ஆதி³-ஸத்³தே³ன ஓஸதி⁴க³ச்ச²லதாதீ³னம் ஸங்க³ஹோ.

ஏகம் ப⁴த்தம் ஏகப⁴த்தம், தம் அஸ்ஸ அத்தீ²தி ஏகப⁴த்திகோ. ஸோ பன ரத்திபோ⁴ஜனேனபி ஸியாதி தன்னிவத்தனத்த²ம் ஆஹ ‘‘ரத்தூபரதோ’’தி. ஏவம்பி அபரண்ஹபோ⁴ஜீபி ஸியா ஏகப⁴த்திகோதி தன்னிவத்தனத்த²ம் ‘‘விரதோ விகாலபோ⁴ஜனா’’தி வுத்தம். அருணுக்³க³மனகாலதோ பட்டா²ய யாவ மஜ்ஜ²ன்ஹிகா அயம் பு³த்³தா⁴தீ³னம் அரியானம் ஆசிண்ணஸமாசிண்ணோ போ⁴ஜனஸ்ஸ காலோ நாம, தத³ஞ்ஞோ விகாலோ. அட்ட²கதா²யம் பன து³தியபதே³ன ரத்திபோ⁴ஜனஸ்ஸ படிக்கி²த்தத்தா ‘‘அதிக்கந்தே மஜ்ஜ²ன்ஹிகே யாவ ஸூரியத்த²ங்க³மனா போ⁴ஜனம் விகாலபோ⁴ஜனம் நாமா’’தி வுத்தம்.

‘‘ஸப்³ப³பாபஸ்ஸ அகரண’’ந்திஆதி³னயப்பவத்தம் (தீ³. நி. 2.90; த⁴. ப. 183; நேத்தி. 30, 50, 116, 124) ப⁴க³வதோ ஸாஸனம் அச்சந்தராகு³ப்பத்தியா நச்சாதி³த³ஸ்ஸனம் ந அனுலோமேதீதி ஆஹ ‘‘ஸாஸனஸ்ஸ அனனுலோமத்தா’’தி. அத்தனா பயோஜியமானம், பரேஹி பயோஜாபியமானஞ்ச நச்சம் நச்சபா⁴வஸாமஞ்ஞேன பாளியம் ஏகேனேவ நச்ச-ஸத்³தே³ன க³ஹிதம், ததா² கீ³தவாதி³த-ஸத்³தே³ன சாதி ஆஹ ‘‘நச்சனனச்சாபனாதி³வஸேனா’’தி. ஆதி³-ஸத்³தே³ன கா³யனகா³யாபனவாத³னவாதா³பனானி ஸங்க³ய்ஹந்தி. த³ஸ்ஸனேன சேத்த² ஸவனம்பி ஸங்க³ஹிதம் விரூபேகஸேஸனயேன. யதா²ஸகம் விஸயஸ்ஸ ஆலோசனஸபா⁴வதாய வா பஞ்சன்னம் விஞ்ஞாணானம் ஸவனகிரியாயபி த³ஸ்ஸனஸங்கே²பஸப்³பா⁴வதோ ‘‘த³ஸ்ஸனா’’இச்சேவ வுத்தம். தேனாஹ ‘‘பஞ்சஹி விஞ்ஞாணேஹி ந கஞ்சி த⁴ம்மம் படிவிஜானாதி அஞ்ஞத்ர அபி⁴னிபாதமத்தா’’தி. அவிஸூகபூ⁴தஸ்ஸ கீ³தஸ்ஸ ஸவனம் கதா³சி வட்டதீதி ஆஹ ‘‘விஸூகபூ⁴தா த³ஸ்ஸனா’’தி. ததா² ஹி வுத்தம் பரமத்த²ஜோதிகாயம் கு²த்³த³கட்ட²கதா²யம் (கு². பா. அட்ட². 2.பச்சி²மபஞ்சஸிக்கா²பத³வண்ணனா) ‘‘த⁴ம்மூபஸம்ஹிதம் கீ³தம் வட்டதி, கீ³தூபஸம்ஹிதோ த⁴ம்மோ ந வட்டதீ’’தி. யம் கிஞ்சீதி க³ந்தி²தம் வா அக³ந்தி²தம் வா யம் கிஞ்சி புப்ப²ம். க³ந்த⁴ஜாதந்தி க³ந்த⁴ஜாதிகம். தஸ்ஸபி ‘‘யம் கிஞ்சீ’’தி வசனதோ பிஸிதஸ்ஸ அபிஸிதஸ்ஸபி யஸ்ஸ கஸ்ஸசி விலேபனாதி³ ந வட்டதீதி த³ஸ்ஸேதி.

உச்சாதி உச்ச-ஸத்³தே³ன ஸமானத்த²ம் ஏகம் ஸத்³த³ந்தரம். ஸேதி ஏத்தா²தி ஸயனம். உச்சாஸயனம் மஹாஸயனஞ்ச ஸமணஸாருப்பரஹிதம் அதி⁴ப்பேதந்தி ஆஹ ‘‘பமாணாதிக்கந்தம் அகப்பியத்த²ரண’’ந்தி. ஆஸனஞ்சேத்த² ஸயனேனேவ ஸங்க³ஹிதந்தி த³ட்ட²ப்³ப³ம். யஸ்மா பன ஆதா⁴ரே படிக்கி²த்தே ததா³தா⁴ரா கிரியா படிக்கி²த்தாவ ஹோதி, தஸ்மா ‘‘உச்சாஸயனமஹாஸயனா’’இச்சேவ வுத்தம், அத்த²தோ பன தது³பபோ⁴க³பூ⁴தனிஸஜ்ஜானிபஜ்ஜனேஹி விரதி த³ஸ்ஸிதாதி த³ட்ட²ப்³ப³ம். அத² வா உச்சாஸயனமஹாஸயனஞ்ச உச்சாஸயனமஹாஸயனஞ்ச உச்சாஸயனமஹாஸயனந்தி ஏதஸ்மிம் அத்தே² ஏகஸேஸேன அயம் நித்³தே³ஸோ கதோ யதா² ‘‘நாமரூபபச்சயா ஸளாயதன’’ந்தி (ம. நி. 3.126; ஸம். நி. 2.1; உதா³. 1), ஆஸனகிரியாபுப்³ப³கத்தா வா ஸயனகிரியாய ஸயனக்³க³ஹணேன ஆஸனம்பி க³ஹிதந்தி வேதி³தப்³ப³ம்.

தா³ருமாஸகோதி யே வோஹாரம் க³ச்ச²ந்தீதி இதி-ஸத்³தே³ன ஏவம்பகாரே த³ஸ்ஸேதி. அஞ்ஞேஹி கா³ஹாபனே உபனிக்கி²த்தஸாதி³யனே ச படிக்³க³ஹணத்தோ² லப்³ப⁴தீதி ஆஹ ‘‘நேவ நம் உக்³க³ண்ஹாதி, ந உக்³க³ண்ஹாபேதி, ந உபனிக்கி²த்தம் ஸாதி³யதீ’’தி. அத² வா திவித⁴ம் படிக்³க³ஹணம் காயேன வாசாய மனஸாதி. தத்த² காயேன படிக்³க³ஹணம் உக்³க³ண்ஹனம், வாசாய படிக்³க³ஹணம் உக்³க³ஹாபனம், மனஸா படிக்³க³ஹணம் ஸாதி³யனந்தி திவித⁴ம்பி படிக்³க³ஹணம் ஏகஜ்ஜ²ம் க³ஹேத்வா ‘‘படிக்³க³ஹணா’’தி வுத்தந்தி ஆஹ ‘‘நேவ நம் உக்³க³ண்ஹாதீ’’திஆதி³. ஏஸ நயோ ஆமகத⁴ஞ்ஞபடிக்³க³ஹணாதிஆதீ³ஸுபி. நீவாராதி³உபத⁴ஞ்ஞஸ்ஸ ஸாலிஆதி³மூலத⁴ஞ்ஞந்தோக³த⁴த்தா வுத்தம் ‘‘ஸத்தவித⁴ஸ்ஸா’’தி. ‘‘அனுஜானாமி, பி⁴க்க²வே, பஞ்ச வஸானி பே⁴ஸஜ்ஜானி அச்ச²வஸம் மச்ச²வஸம் ஸுஸுகாவஸம் ஸுகரவஸம் க³த்³ரப⁴வஸ’’ந்தி (மஹாவ. 262) வுத்தத்தா இத³ம் ஓதி³ஸ்ஸ அனுஞ்ஞாதம் நாம, தஸ்ஸ பன ‘‘காலே படிக்³க³ஹித’’ந்தி (மஹாவ. 262) வுத்தத்தா படிக்³க³ஹணம் வட்டதி. ஸதி பச்சயேதி ஆஹ ‘‘அஞ்ஞத்ர ஓதி³ஸ்ஸ அனுஞ்ஞாதா’’தி.

ஸரூபேன வஞ்சனம் ரூபகூடம், பதிரூபேன வஞ்சனாதி அத்தோ². அங்கே³ன அத்தனோ ஸரீராவயவேன வஞ்சனம் அங்க³கூடம். க³ஹணவஸேன வஞ்சனம் க³ஹணகூடம். படிச்ச²ன்னம் கத்வா வஞ்சனம் படிச்ச²ன்னகூடம். அக்கமதீதி நிப்பீளேதி, புப்³ப³பா⁴கே³ அக்கமதீதி ஸம்ப³ந்தோ⁴.

ஹத³யந்தி நாளிஆதீ³னம் மானபா⁴ஜனானம் அப்³ப⁴ந்தரம். திலாதீ³னம் நாளிஆதீ³ஹி மினனகாலே உஸ்ஸாபிதஸிகா²யேவ ஸிகா². ஸிகா²பே⁴தோ³ தஸ்ஸாஹாபனம்.

கேசீதி ஸாரஸமாஸாசரியா, உத்தரவிஹாரவாஸினோ ச. வதோ⁴தி முட்டி²பஹாரகஸாதாளனாதீ³ஹி விஹேஸனம், விபா³த⁴னந்தி அத்தோ². விஹேட²னத்தோ²பி ஹி வத⁴-ஸத்³தோ³ தி³ஸ்ஸதி ‘‘அத்தானம்வதி⁴த்வா வதி⁴த்வா ரோத³தீ’’திஆதீ³ஸு (பாசி. 879, 881). யதா² ஹி அபரிக்³க³ஹபா⁴வஸாமஞ்ஞே ஸதிபி பப்³ப³ஜிதேஹி அப்படிக்³க³ஹிதப்³ப³வத்து²விபா⁴க³ஸந்த³ஸ்ஸனத்த²ம் இத்தி²குமாரிதா³ஸிதா³ஸாத³யோ விபா⁴கே³ன வுத்தா. ஏவம் பரஸ்ஸ ஹரணபா⁴வதோ அதி³ன்னாதா³னபா⁴வஸாமஞ்ஞே ஸதிபி துலாகூடாத³யோ அதி³ன்னாதா³னவிஸேஸபா⁴வத³ஸ்ஸனத்த²ம் விபா⁴கே³ன வுத்தா, ந ஏவம் பாணாதிபாதபரியாயஸ்ஸ வத⁴ஸ்ஸ புன க³ஹணே பயோஜனம் அத்தி², தத்த² ஸயம்காரோ, இத⁴ பரம்காரோதி ச ந ஸக்கா வத்தும் ‘‘காயவசீபயோக³ஸமுட்டா²பிகா சேதனா ச²ப்பயோகா³’’தி வசனதோ. தஸ்மா யதா²வுத்தோ ஏவேத்த² அத்தோ² யுத்தோ. அட்ட²கதா²யம் பன ‘‘வதோ⁴தி மாரண’’ந்தி வுத்தம், தம்பி போத²னமேவ ஸந்தா⁴யாதி ச ஸக்கா விஞ்ஞாதும் மாரண-ஸத்³த³ஸ்ஸபி விஹிம்ஸனே தி³ஸ்ஸனதோ.

294. சீவரபிண்ட³பாதானம் யதா²க்கமம் காயகுச்சி²பரிஹரணமத்தஜோதனாயம் அவிஸேஸதோ அட்ட²ன்னம் பரிக்கா²ரானம் அந்தரே தப்பயோஜனதா ஸம்ப⁴வதீதி த³ஸ்ஸேந்தோ ‘‘தே ஸப்³பே³பீ’’திஆதி³மாஹ. ஏதேபீதி நவபரிக்கா²ரிகாத³யோபி அப்பிச்சா²வ ஸந்துட்டா²வ. ந ஹி தத்த²கேன மஹிச்ச²தா, அஸந்துட்டி²தா வா ஹோதீதி.

சதூஸு தி³ஸாஸு ஸுக²ம் விஹரதி, ததோ ஏவ ஸுக²விஹாரட்டா²னபூ⁴தா சதஸ்ஸோ தி³ஸா அஸ்ஸ ஸந்தீதி வா சாதுத்³தி³ஸோ. தத்த² சாயம் ஸத்தே வா ஸங்கா²ரே வா ப⁴யேன ந படிஹஞ்ஞதீதி அப்படிகோ⁴. த்³வாத³ஸவித⁴ஸ்ஸ ஸந்தோஸஸ்ஸ வஸேன ஸந்துஸ்ஸனகோ ஸந்துஸ்ஸமானோ. இதரீதரேனாதி உச்சாவசேன. பரிஸ்ஸயானம் பா³ஹிரானம் ஸீஹப்³யக்³கா⁴தீ³னம், அப்³ப⁴ந்தரானஞ்ச காமச்ச²ந்தா³தீ³னம் காயசித்துபத்³த³வானம் அபி⁴ப⁴வனதோ பரிஸ்ஸயானம் ஸஹிதா. த²த்³த⁴பா⁴வகரப⁴யாபா⁴வேன அச்ச²ம்பீ⁴. ஏகோ அஸஹாயோ. ததோ ஏவ க²க்³க³மிக³ஸிங்க³ஸதி³ஸதாய க²க்³க³விஸாணகப்போ சரேய்யாதி அத்தோ².

சி²ன்னபக்கோ², அஸஞ்ஜாதபக்கோ² வா ஸகுணோ க³ந்தும் ந ஸக்கோதீதி ‘‘பக்கீ² ஸகுணோ’’தி பக்கி²-ஸத்³தே³ன விஸேஸேத்வா ஸகுணோ பாளியம் வுத்தோதி ஆஹ ‘‘பக்க²யுத்தோ ஸகுணோ’’தி. யஸ்ஸ ஸன்னிதி⁴காரபரிபோ⁴கோ³ கிஞ்சி ட²பேதப்³ப³ம் ஸாபேக்கா²ய ட²பனஞ்ச நத்தி², தாதி³ஸோ அயம் பி⁴க்கூ²தி த³ஸ்ஸேந்தோ ‘‘அயம் பனேத்த² ஸங்கே²பத்தோ²’’திஆதி³மாஹ. அரியந்தி அபேந்தி ததோ தோ³ஸா, தேஹி வா ஆரகாதி அரியோதி ஆஹ ‘‘அரியேனாதி நித்³தோ³ஸேனா’’தி. அஜ்ஜ²த்தந்தி அத்தனி. நித்³தோ³ஸஸுக²ந்தி நிராமிஸஸுக²ம் கிலேஸவஜ்ஜரஹிதத்தா.

295. யதா²வுத்தே ஸீலஸம்வரே பதிட்டி²தஸ்ஸேவ இந்த்³ரியஸம்வரோ இச்சி²தப்³போ³ தத³தி⁴ட்டா²னதோ, தஸ்ஸ ச பரிபாலகபா⁴வதோதி வுத்தம் ‘‘ஸோ இமினா அரியேன ஸீலக்க²ந்தே⁴ன ஸமன்னாக³தோ பி⁴க்கூ²’’தி. ஸேஸபதே³ஸூதி ‘‘ந நிமித்தக்³கா³ஹீ ஹோதீ’’திஆதீ³ஸு பதே³ஸு. யஸ்மா விஸுத்³தி⁴மக்³கே³ (விஸுத்³தி⁴. 1.15) வுத்தம், தஸ்மா தஸ்ஸ லீனத்த²ப்பகாஸினியம் ஸம்வண்ணனாயம் (விஸுத்³தி⁴. மஹாடீ. 1.15) வுத்தனயேனேவ வேதி³தப்³ப³ம். ரூபாதீ³ஸு நிமித்தாதி³க்³கா³ஹபரிவஜ்ஜனலக்க²ணத்தா இந்த்³ரியஸம்வரஸ்ஸ கிலேஸேஹி அனவஸித்தஸுக²தா அவிகிண்ணஸுக²தா சஸ்ஸ வுத்தா.

296. பச்சயஸம்பத்திந்தி பச்சயபாரிபூரிம். இமே சத்தாரோதி ஸீலஸம்வரோ ஸந்தோஸோ இந்த்³ரியஸம்வரோ ஸதிஸம்பஜஞ்ஞந்தி இமே சத்தாரோ அரஞ்ஞவாஸஸ்ஸ ஸம்பா⁴ரா. திரச்சா²னக³தேஹி வத்தப்³ப³தம் ஆபஜ்ஜதி இஸிஸிங்க³ஸ்ஸ பிதுஆத³யோ விய. வனசரகேஹீதி வனசரகமாதுகா³மேஹி. பே⁴ரவஸத்³த³ம் ஸாவேந்தி, தாவதா அபலாயந்தானம் ஹத்தே²ஹி ஸீஸம்…பே… கரோந்தி. பண்ணத்திவீதிக்கமஸங்கா²தம் காளகம் வா. மிச்சா²விதக்கஸங்கா²தம் திலகம் வா. தந்தி பீதிம் விபூ⁴தபா⁴வேன உபட்டா²னதோ க²யதோ ஸம்மஸந்தோ.

விவித்தந்தி ஜனவிவித்தம். தேனாஹ ‘‘ஸுஞ்ஞ’’ந்தி. ஸா ச விவித்ததா நிஸ்ஸத்³த³பா⁴வேன லக்கி²தப்³பா³தி ஆஹ ‘‘அப்பஸத்³த³ம் அப்பனிக்³கோ⁴ஸ’’ந்தி. ஆவஸத²பூ⁴தம் ஸேனாஸனம் விஹரிதப்³ப³ட்டே²ன விஹாரஸேனாஸனம். மஸாரகாதி³ மஞ்சபீட²ம் தத்த² அத்த²ரிதப்³ப³ம் பி⁴ஸிஉபதா⁴னஞ்ச மஞ்சபீட²ஸம்ப³ந்தி⁴தோ மஞ்சபீட²ஸேனாஸனம். சிமிலிகாதி³ பூ⁴மியம் ஸந்த²ரிதப்³ப³தாய ஸந்த²தஸேனாஸனம். ருக்க²மூலாதி³ படிக்கமிதப்³ப³ட்டா²னம் சங்கமனாதீ³னம் ஓகாஸபா⁴வதோ ஓகாஸஸேனாஸனம்.

‘‘அனுச்ச²விகம் த³ஸ்ஸேந்தோ’’தி வத்வா தமேவ அனுச்ச²விகபா⁴வம் விபா⁴வேதும் ‘‘தத்த² ஹீ’’திஆதி³ வுத்தம். அச்ச²ன்னந்தி இட்ட²கச²த³னாதி³னா அந்தமஸோ ருக்க²ஸாகா²ஹிபி ந ச²ன்னம்.

ப⁴த்தஸ்ஸ பச்ச²தோதி ப⁴த்தபு⁴ஞ்ஜனஸ்ஸ பச்ச²தோ. ஊருப³த்³தா⁴ஸனந்தி ஊரூனம் அதோ⁴ப³ந்த⁴னவஸேன நிஸஜ்ஜம். ஹேட்டி²மகாயஸ்ஸ அனுஜுகட்ட²பனம் நிஸஜ்ஜாவசனேனேவ போ³தி⁴தந்தி. உஜும் காயந்தி ஏத்த² காய-ஸத்³தோ³ உபரிமகாயவிஸயோதி ஆஹ ‘‘உபரிமம் ஸரீரம் உஜுகம் ட²பேத்வா’’தி. தம் பன உஜுகட்ட²பனம் ஸரூபதோ பயோஜனதோ ச த³ஸ்ஸேதும் ‘‘அட்டா²ரஸா’’திஆதி³ வுத்தம். ந பணமந்தீதி ந ஓணமந்தி. ந பரிபததீதி ந விக³ச்ச²தி, வீதி²ம் ந விலங்கே⁴தி. ததோ ஏவ புப்³பே³னாபரம் விஸேஸப்பத்தியா கம்மட்டா²னம் வுத்³தி⁴ம் பா²திம் உபக³ச்ச²தி. முக²ஸமீபேதி முக²ஸ்ஸ ஸமீபே நாஸிகக்³கே³ வா உத்தரோட்டே² வா. இத⁴ பரி-ஸத்³தோ³ அபி⁴-ஸத்³தே³ன ஸமானத்தோ²தி ஆஹ ‘‘கம்மட்டா²னாபி⁴முக²’’ந்தி, ப³ஹித்³தா⁴ புது²த்தாரம்மணதோ நிவாரேத்வா கம்மட்டா²னம்யேவ புரக்க²த்வாதி அத்தோ². பரீதி பரிக்³க³ஹட்டோ² ‘‘பரிணாயிகா’’திஆதீ³ஸு (த⁴. ஸ. 16) விய. நிய்யானட்டோ² படிபக்க²தோ நிக்³க³மனட்டோ², தஸ்மா பரிக்³க³ஹிதனிய்யானஸதிந்தி ஸப்³ப³தா² க³ஹிதாஸம்மோஸம் பரிச்சத்தஸம்மோஸம் ஸதிம் கத்வா, பரமம் ஸதினேபக்கம் உபட்ட²பேத்வாதி அத்தோ².

விக்க²ம்ப⁴னவஸேனாதி ஏத்த² விக்க²ம்ப⁴னம் அனுப்பாத³னம் அப்பவத்தனம் ந படிபக்கே²ன ஸுப்பஹீனதா. பஹீனத்தாதி ச பஹீனஸதி³ஸதம் ஸந்தா⁴ய வுத்தம் ஜா²னஸ்ஸ அனதி⁴க³ததா. ததா²பி நயித³ம் சக்கு²விஞ்ஞாணம் விய ஸபா⁴வதோ விக³தாபி⁴ஜ்ஜ²ம், அத² கோ² பா⁴வனாவஸேன. தேனாஹ ‘‘ந சக்கு²விஞ்ஞாணஸதி³ஸேனா’’தி. ஏஸேவ நயோதி யதா² சக்கு²விஞ்ஞாணம் ஸபா⁴வேன விக³தாபி⁴ஜ்ஜ²ம் அப்³யாபன்னஞ்ச, ந பா⁴வனாய விக்க²ம்பி⁴தத்தா, ந ஏவமித³ம். இத³ம் பன சித்தம் பா⁴வனாய பரிஸோதி⁴தத்தா அப்³யாபன்னம் விக³ததி²னமித்³த⁴ம் அனுத்³த⁴தம் நிப்³பி³சிகிச்ச²ஞ்சாதி அத்தோ². இத³ம் உப⁴யந்தி ஸதிஸம்பஜஞ்ஞமாஹ.

297. உச்சி²ந்தி³த்வா பாதேந்தீதி ஏத்த² உச்சி²ந்த³னம் பாதனஞ்ச தாஸம் பஞ்ஞானம் அனுப்பன்னானம் உப்பஜ்ஜிதும் அப்பதா³னமேவ. இதி மஹக்³க³தானுத்தரபஞ்ஞானம் ஏகச்சாய ச பரித்தபஞ்ஞாய அனுப்பத்திஹேதுபூ⁴தா நீவரணா த⁴ம்மா இதராய ச ஸமத்த²தம் விஹனந்தியேவாதி பஞ்ஞாய து³ப்³ப³லீகரணா வுத்தா. இத³ம்பி பட²மஜ்ஜா²னம் வேனேய்யஸந்தானே பதிட்டா²பியமானம் ஞாணம் பஜ்ஜதி ஏத்தா²தி ஞாணபத³ம். ஞாணம் வளஞ்ஜேதி ஏத்தா²தி ஞாணவளஞ்ஜம்.

299. ந தாவ நிட்ட²ம் க³தோ பா³ஹிரகானம் ஞாணேன அக்கந்தட்டா²னானிபி ஸியுந்தி. யதி³ ஏவம் அனஞ்ஞஸாதா⁴ரணே மக்³க³ஞாணபதே³ கத²ம் ந நிட்ட²ங்க³தோதி ஆஹ ‘‘மக்³க³க்க²ணேபீ’’திஆதி³. தீஸு ரதனேஸு நிட்ட²ம் க³தோ ஹோதீதி பு³த்³த⁴ஸுபு³த்³த⁴தம் த⁴ம்மஸுத⁴ம்மதம் ஸங்க⁴ஸுப்படிபத்திதஞ்ச ஆரப்³ப⁴ ஞாணேன நிட்ட²ம் நிச்ச²யம் உபக³தோ ஹோதி. காமஞ்சேத்த² பட²மமக்³கே³னேவ ஸப்³ப³ஸோ விசிகிச்சா²ய பஹீனத்தா ஸப்³ப³ஸ்ஸபி அரியஸாவகஸ்ஸ கங்கா² வா விமதி வா நத்தி², தத்த² பன யதா² பஞ்ஞாவேபுல்லப்பத்தஸ்ஸ அரஹதோ ஸவிஸயே ஞாணம் ஸவிஸேஸம் ஓகா³ஹதி, ந ததா² அனாகா³மிஆதீ³னந்தி ரதனத்தயே ஸாதிஸயம் ஞாணனிச்ச²யக³மனம் ஸந்தா⁴ய ‘‘அக்³க³மக்³க³வஸேன தத்த²னிட்டா²க³மனம் வுத்த’’ந்தி வுத்தம். யம் பனேத்த² அவிப⁴த்தம், தம் ஸுவிஞ்ஞேய்யமேவாதி.

சூளஹத்தி²பதோ³பமஸுத்தவண்ணனாய லீனத்த²ப்பகாஸனா ஸமத்தா.