2. அலக³த்³தூ³பமஸுத்தவண்ணனா

234. பா³த⁴யிம்ஸூதி (ஸாரத்த². டீ. பாசித்திய 3.417) ஹனிம்ஸு. தம்தம்ஸம்பத்தியா விப³ந்த⁴னவஸேன ஸத்தஸந்தானஸ்ஸ அந்தரே வேமஜ்ஜே² ஏதி ஆக³ச்ச²தீதி அந்தராயோ, தி³ட்ட²த⁴ம்மிகாதி³அனத்தோ², அனதிக்கமனட்டே²ன தஸ்மிம் அந்தராயே நியுத்தா, அந்தராயம் வா ப²லம் அரஹந்தி, அந்தராயஸ்ஸ வா கரணஸீலாதி அந்தராயிகா. தேனாஹ ‘‘அந்தராயம் கரோந்தீதி அந்தராயிகா’’தி. ஆனந்தரியத⁴ம்மாதி ஆனந்தரியஸபா⁴வசேதனாத⁴ம்மா. தத்ராயம் வசனத்தோ² – சுதிஅனந்தரப²லம் அனந்தரம் நாம, தஸ்மிம் அனந்தரே நியுத்தா, தன்னிப்³ப³த்தனேன அனந்தரகரணஸீலா, அனந்தரபயோஜனாதி வா ஆனந்தரிகா, தே ஏவ ஆனந்தரியாதி வுத்தா. கம்மானி ஏவ அந்தராயிகாதி கம்மந்தராயிகா. மோக்க²ஸ்ஸேவ அந்தராயம் கரோதி, ந ஸக்³க³ஸ்ஸ மிச்சா²சாரலக்க²ணாபா⁴வதோ. ந ஹி பி⁴க்கு²னியா த⁴ம்மரக்கி²தபா⁴வோ அத்தி². பாகதிகபி⁴க்கு²னீவஸேன சேதம் வுத்தம், அரியாய பன பவத்தம் அபாயஸம்வத்தனியமேவ. நந்த³மாணவகோ சேத்த² நித³ஸ்ஸனம். உபி⁴ன்னம் ஸமானச்ச²ந்த³தாவஸேன வா அஸக்³க³ந்தராயிகதா, மோக்க²ந்தராயிகதா பன மோக்க²த்த²படிபத்தியா விதூ³ஸனதோ, அபி⁴ப⁴வித்வா பன பவத்தியம் ஸக்³க³ந்தராயிகதாபி ந ஸக்கா நிவாரேதுந்தி. அஹேதுகதி³ட்டி²அகிரியதி³ட்டி²னத்தி²கதி³ட்டி²யோவ நியதபா⁴வம் பத்தா நியதமிச்சா²தி³ட்டி²த⁴ம்மா. படிஸந்தி⁴த⁴ம்மாதி படிஸந்தி⁴சித்துப்பாத³மாஹ. பண்ட³காதி³க்³க³ஹணஞ்சேத்த² நித³ஸ்ஸனமத்தம் ஸப்³பா³யபி அஹேதுகபடிஸந்தி⁴யா விபாகந்தராயிகபா⁴வதோ. யா ஹி அரியே உபவத³தி, ஸா சேதனா அரியூபவாத³த⁴ம்மா. ததோ பரந்தி க²மாபனதோ உபரி. யம் பனேத்த² வத்தப்³ப³ம், தம் மஹாஸீஹனாத³ஸ்ஸ லீனத்த²பகாஸனே வுத்தமேவ. யாவ பி⁴க்கு²பா⁴வம் படிஜானாதி பாராஜிகம் ஆபன்னோ. ந வுட்டா²தி ஸேஸம் க³ருகாபத்திம். ந தே³ஸேதி லஹுகாபத்திம்.

அயம் பி⁴க்கு² அரிட்டோ². ரஸேன ரஸம் ஸம்ஸந்தி³த்வாதி அனவஜ்ஜேன பச்சயபரிபு⁴ஞ்ஜனரஸேன ஸாவஜ்ஜம் காமகு³ணபரிபோ⁴க³ரஸம் ஸமானேத்வா. உபனேந்தோ வியாதி ப³ந்த⁴னம் உபனேந்தோ விய. ‘‘க⁴டேந்தோ வியா’’திபி பாடோ². உபஸம்ஹரந்தோ வியாதி ஸதி³ஸதம் உபஸம்ஹரந்தோ விய ஏகந்தஸாவஜ்ஜே அனவஜ்ஜபா⁴வபக்கே²பேன. பாபகந்தி லாமகட்டே²ன து³க்³க³திஸம்பாபனட்டே²ன ச பாபகம். ஸேதுகரணவஸேன மஹாஸமுத்³த³ம் ப³ந்த⁴ந்தேன விய. ஸப்³ப³ஞ்ஞுதஞ்ஞாணேன ‘‘ஸாவஜ்ஜ’’ந்தி தி³ட்ட²ம் ‘‘அனவஜ்ஜ’’ந்தி க³ஹணேன தேன படிவிருஜ்ஜ²ந்தோ. ஏகந்ததோ அனந்தராயிகந்தி க³ஹணேன வேஸாரஜ்ஜஞாணம் படிபா³ஹந்தோ. காமகண்டகேஹி அரியமக்³க³ஸம்மாபடிபத்தி ந உபக்கிலிஸ்ஸதீதி வத³ந்தோ ‘‘அரியமக்³கே³ கா²ணுகண்டகாதீ³னி பக்கி²பந்தோ’’தி வுத்தோ. பட²மபாராஜிகஸிக்கா²பத³ஸங்கா²தே, ‘‘அப்³ரஹ்மசரியம் பஹாயா’’தி (தீ³. நி. 1.8, 194) ஆதி³தே³ஸனாஸங்கா²தே ச ஆணாசக்கே.

புச்ச²மானா ஸமனுயுஞ்ஜந்தி நாம. புச்சா² ஹி அனுயோகோ³தி. தேனாதி⁴க³தாய லத்³தி⁴யா அனுவஜ்ஜனத்த²ம் பச்சனுபா⁴ஸனேன புன படிஜானாபனம் பதிட்டா²பனம், தம் பனஸ்ஸ ஆதா³ய ஸமாதா³பனம் விய ஹோதீதி ஆஹ ‘‘ஸமனுகா³ஹந்தி நாமா’’தி. தஸ்ஸா பன லத்³தி⁴யா அனுயுஞ்ஜிதாய வுச்சமானம்பி காரணம் காரணபதிரூபகமேவாதி தஸ்ஸ புச்ச²னம் ஸமனுபா⁴ஸனம். அனுத³ஹனட்டே²ன அனுபாயபடிபத்தியா ஸம்பதி ஆயதிஞ்ச அனுத³ஹனட்டே²ன. மஹாபி⁴தாபனட்டே²ன அனவட்டி²தஸபா⁴வதாய. இத்தரபச்சுபட்டா²னட்டே²ன முஹுத்தரமணீயதாய. தாவகாலிகட்டே²ன பரேஹி அபி⁴ப⁴வனீயதாய. ஸப்³ப³ங்க³பச்சங்க³பலிப⁴ஞ்ஜனட்டே²ன சே²த³னபே⁴த³னாதி³அதி⁴கரணபா⁴வேன. உக்³கா⁴டஸதி³ஸதாய அதி⁴குட்டனட்டே²ன. அவணே வணம் உப்பாதே³த்வா அந்தோ அனுபவிஸனஸபா⁴வதாய வினிவிஜ்ஜ²னட்டே²ன. தி³ட்ட²த⁴ம்மிகஸம்பராயிகஅனத்த²னிமித்ததாய ஸாஸங்கஸப்படிப⁴யட்டே²ன.தி³ட்டி²தா²மேனாதி தஸ்ஸா தி³ட்டி²யா தா²மக³தபா⁴வேன. தி³ட்டி²பராமாஸேனாதி தி³ட்டி²ஸங்கா²தபராமஸனேன. தி³ட்டி²யேவ ஹி த⁴ம்மஸபா⁴வம் அதிக்கமித்வா பரதோ ஆமஸனேன பராமாஸோ. அபி⁴னிவிஸ்ஸாதி தண்ஹாபி⁴னிவேஸபுப்³ப³ங்க³மேன தி³ட்டா²பி⁴னிவேஸேன ‘‘இத³மேவேத்த² தத²’’ந்தி அபி⁴னிவிஸித்வா. யஸ்மா ஹி அபி⁴னிவேஸனம் தத்த² அபி⁴னிவிட்ட²ம் நாம ஹோதி.தஸ்மா ஆஹ ‘‘அதி⁴ட்ட²ஹித்வா’’தி.

235. நத்தீ²தி வத்துகாமோபீதி அத்தனோ லத்³தி⁴ம் நிகு³ஹேதுகாமதாய அவஜானிதுகாமோபி. ஸம்படிச்ச²தி படிஜானாதி. த்³வே கதா²தி விஸம்வாத³னகத²ம் ஸந்தா⁴ய வத³தி. அபூ⁴தகதா² ஹி புப்³பே³ பவத்தா பூ⁴தகதா²ய வஸேன த்³வே கதா²தி வுச்சதி.

236. கஸ்ஸ கோ² நாமாதி இமினா ஸத்தா² ‘‘ந மம துய்ஹம் தாதி³ஸஸ்ஸ அத்தா²ய த⁴ம்மதே³ஸனா நாம பூ⁴தபுப்³பா³’’தி த³ஸ்ஸேதி. தேனாஹ ‘‘க²த்தியஸ்ஸ வா’’திஆதி³.

ஞாணமயா உஸ்மா ஏதஸ்ஸ அத்தீ²தி உஸ்மீ, ததா²ரூபேஹி பச்சயேஹி அனுஸ்மீகதோ தஸ்மிம் அத்தபா⁴வே படிவேத⁴க³ப்³போ⁴அபி உஸ்மீகதோதி விகதபா⁴வதோ பஞ்ஞாபீ³ஜமஸ்ஸ இமஸ்மிம் த⁴ம்மவினயே அபி நு அத்தீ²தி ப⁴க³வா பி⁴க்கூ² புச்ச²தி. தே படிக்கி²பந்தா வத³ந்தி டா²னக³தேன து³ச்சரிதேன ஞாணுபஹதபா⁴வம் ஸம்பஸ்ஸந்தா. நித்தேஜபூ⁴தோதி நித்தேஜம் பூ⁴தோ தேஜோஹானிப்பத்தோ. ததோ ஏவ பி⁴க்கூ²னம்பி ஸம்முகா² ஓலோகேதும் அஸமத்த²தாய பத்தக்க²ந்தோ⁴ அதோ⁴முகோ². ஸஹத⁴ம்மிகம் கிஞ்சி வத்தும் அவிஸஹனதோ அப்படிபா⁴னோ. ஸம்பத்தூபக³ந்தி ஸம்பத்திஆவஹம். படிப்பஸ்ஸம்பே⁴ந்தோதி படிஸேதே⁴ந்தோ.

237. அந்தராயகரலத்³தி⁴யா ஸபா⁴வவிபா⁴வனேன பரிஸம் ஸோதே⁴தி. நிஸ்ஸாரேதி நீஹரதி அவிஸுத்³த⁴தி³ட்டி²தாய. கஸ்ஸசி பு³த்³தா⁴னுபா⁴வம் அஜானந்தஸ்ஸ. தஸ்ஸ ஹி ஏவம் ப⁴வேய்ய ‘‘ஸஹஸா கதி²த’’ந்தி. ந ஹி கதா³சி பு³த்³தா⁴னம் ஸஹஸா கிரியா நாம அத்தி². அஸ்ஸாதி ‘‘கஸ்ஸசீ’’தி வுத்தபி⁴க்கு²ஸ்ஸ. ஸுத்வாபி துண்ஹீபா⁴வம் ஆபஜ்ஜேய்யாதி அதா²பி ஸியாதி ஸம்ப³ந்தோ⁴. தம் ஸப்³ப³ந்தி ‘‘ஸசே ஹீ’’திஆதி³னா வுத்தம் ஸப்³ப³ம் பரிகப்பனம். ந கரிஸ்ஸந்தீதி பரிஸாய லத்³தி⁴ம் ஸோதே⁴தீதி ஸம்ப³ந்தோ⁴. லத்³தி⁴ம் பகாஸேந்தோதி மஹாஸாவஜ்ஜதாவஸேன பகாஸேந்தோ. ஸஞ்ஞாவிதக்கேஹீதி ஸுப⁴னிமித்தானுப்³யஞ்ஜனக்³கா³ஹாதி³வஸேன பவத்தேஹி ஸஞ்ஞாவிதக்கேஹி. தேனாஹ ‘‘கிலேஸகாமஸம்பயுத்தேஹீ’’தி. மேது²னஸமாசாரந்தி இத³ம் அதி⁴காரவஸேன வுத்தம். தத³ஞ்ஞம்பி பன – ‘‘அபிச கோ² மாதுகா³மஸ்ஸ உச்சா²த³னம் பரிமத்³த³னம் நஹாபனம் ஸம்பா³ஹனம் ஸாதி³யதீ’’திஆதி³னா (அ. நி. 7.50) ஆக³தம் விஸபா⁴க³வத்து²விஸயம் ஆமிஸபரிபோ⁴க³ம். ‘‘அஞ்ஞத்ரேவ காமேஹி அஞ்ஞத்ர காமஸஞ்ஞாஹி அஞ்ஞத்ர காமவிதக்கேஹி ஸமாசரிஸ்ஸதீ’’தி நேதம் டா²னம் விஜ்ஜதி.

238. யோனிஸோ பச்சவேக்க²ணேன நத்தி² ஏத்த² ச²ந்த³ராகோ³தி நிச்ச²ந்த³ராகோ³, தம் நிச்ச²ந்த³ராக³ம். கதா³சி உபோஸதி²கபா⁴வேன ஸமாதி³ன்னஸீலாபி ஹோந்தி கதா³சி நோதி அனிப³த்³த⁴ஸீலானம் க³ஹட்டா²னம். ஸீலஸமாதா³னபா⁴வதோ அந்தராயகரம். வத்து²காமானம் ஸச்ச²ந்த³ராக³பரிபோ⁴க³ஞ்ச. அபச்சவேக்க²ணேன பி⁴க்கூ²னம் ஆவரணகரம். பச்சயானம் ஸச்ச²ந்த³ராக³பரிபோ⁴க³ஞ்ச. அயம் அரிட்டோ² து³க்³க³ஹிதாய பரியத்தியா வஸேன அம்ஹே சேவ அப்³பா⁴சிக்க²தி, அத்தானஞ்ச க²னதி, ப³ஹுஞ்ச அபுஞ்ஞம் பஸவதீதி ஏவம் ஸஞ்ஞா மா ஹோந்தூதி து³க்³க³ஹிதாய பரியத்தியா தோ³ஸம் த³ஸ்ஸேந்தோ ஆஹ. உக்³க³ண்ஹந்தீதி ஸஜ்ஜா²யந்தி சேவ வாசுக்³க³தம் கரோந்தா தா⁴ரேந்தி சாதி அத்தோ².

ஸுத்தந்திஆதி³னா நவப்பபே⁴த³ம்பி பரியத்தித⁴ம்மம் பரியாதி³யதி. கத²ம் ஸுத்தம் நவப்பபே⁴த³ம்? ஸகா³த²கஞ்ஹி ஸுத்தம் கே³ய்யம், நிக்³கா³த²கம் ஸுத்தம் வேய்யாகரணம், தது³ப⁴யவினிமுத்தஞ்ச ஸுத்தம் உதா³னாதி³விஸேஸஸஞ்ஞாவிரஹிதம் நத்தி², யம் ஸுத்தங்க³ம் ஸியா, மங்க³லஸுத்தாதீ³னஞ்ச ஸுத்தங்க³ஸங்க³ஹோ ந ஸியா கா³தா²பா⁴வதோ த⁴ம்மபதா³தீ³னம் விய, கே³ய்யங்க³ஸங்க³ஹோ வா ஸியா ஸகா³த²கத்தா ஸகா³தா²வக்³க³ஸ்ஸ விய, ததா² உப⁴தோவிப⁴ங்கா³தீ³ஸு ஸகா³த²கப்பதே³ஸானந்தி? வுச்சதே –

ஸுத்தந்தி ஸாமஞ்ஞவிதி⁴, விஸேஸவித⁴யோ பரே;

ஸனிமித்தா நிரூள்ஹத்தா, ஸஹதாஞ்ஞேன நஞ்ஞதோ. (தீ³. நி. டீ. 1.நிதா³னகதா²வண்ணனா; அ. நி. டீ. 2.4.6; ஸாரத்த². டீ. 1.பா³ஹிரனிதா³னகதா²);

ஸப்³ப³ஸ்ஸபி ஹி பு³த்³த⁴வசனஸ்ஸ ஸுத்தந்தி அயம் ஸாமஞ்ஞவிதி⁴. தேனேவாஹ ஆயஸ்மா மஹாகச்சானோ நேத்தியம் (நேத்தி. 1.ஸங்க³ஹவார) ‘‘நவவித⁴ஸுத்தந்தபரியேட்டீ²’’தி. ‘‘ஏத்தகம் தஸ்ஸ ப⁴க³வதோ ஸுத்தாக³தம் ஸுத்தபரியாபன்னம் (பாசி. 655, 1242), ஸகவாதே³ பஞ்ச ஸுத்தஸதானீ’’தி (த⁴. ஸ. அட்ட². நிதா³னகதா²; கதா². அட்ட². நிதா³னகதா²) ஏவமாதி³ ச ஏதஸ்ஸ அத்த²ஸ்ஸ ஸாத⁴கம். ததே³கதே³ஸேஸு பன கே³ய்யாத³யோ விஸேஸவித⁴யோ தேன தேன நிமித்தேன பதிட்டி²தா. ததா² ஹி கே³ய்யஸ்ஸ ஸகா³த²கத்தம் தப்³பா⁴வனிமித்தம். லோகேபி ஹி ஸஸிலோகம் ஸகா³த²கம் வா சுண்ணியக³ந்த²ம் ‘‘கே³ய்ய’’ந்தி வத³ந்தி. கா³தா²விரஹே பன ஸதி புச்ச²ம் கத்வா விஸ்ஸஜ்ஜனபா⁴வோ வேய்யாகரணஸ்ஸ தப்³பா⁴வனிமித்தம். புச்சா²விஸ்ஸஜ்ஜனஞ்ஹி ‘‘ப்³யாகரண’’ந்தி வுச்சதி, ப்³யாகரணமேவ வேய்யாகரணம்.

ஏவம் ஸந்தே ஸகா³த²காதீ³னம்பி புச்ச²ம் கத்வா விஸ்ஸஜ்ஜனவஸேன பவத்தானம் வேய்யாகரணபா⁴வோ ஆபஜ்ஜதீதி? நாபஜ்ஜதி கே³ய்யாதி³ஸஞ்ஞானம் அனோகாஸபா⁴வதோ, ‘‘கா³தா²விரஹே ஸதீ’’தி விஸேஸிதத்தா ச. ததா² ஹி த⁴ம்மபதா³தீ³ஸு கேவலம் கா³தா²ப³ந்தே⁴ஸு, ஸகா³த²கத்தேபி ஸோமனஸ்ஸஞாணமயிககா³தா²யுத்தேஸு, ‘‘வுத்தஞ்ஹேத’’ந்தி (இதிவு. 1) ஆதி³வசனஸம்ப³ந்தே⁴ஸு, அப்³பு⁴தத⁴ம்மபடிஸம்யுத்தேஸு ச ஸுத்தவிஸேஸேஸு யதா²க்கமம் கா³தா²-உதா³ன-இதிவுத்தக-அப்³பு⁴தத⁴ம்ம-ஸஞ்ஞா பதிட்டி²தா, ததா² ஸதிபி கா³தா²ப³ந்த⁴பா⁴வே ப⁴க³வதோ அதீதாஸு ஜாதீஸு சரியானுபா⁴வப்பகாஸகேஸு ஜாதகஸஞ்ஞா, ஸதிபி பஞ்ஹவிஸ்ஸஜ்ஜனபா⁴வே ஸகா³த²கத்தே ச கேஸுசி ஸுத்தந்தேஸு வேத³ஸ்ஸ லபா⁴பனதோ வேத³ல்லஸஞ்ஞா பதிட்டி²தாதி ஏவம் தேன தேன ஸகா³த²கத்தாதி³னா நிமித்தேன தேஸு தேஸு ஸுத்தவிஸேஸேஸு கே³ய்யாதி³ஸஞ்ஞா பதிட்டி²தாதி விஸேஸவித⁴யோ ஸுத்தங்க³தோ பரே கே³ய்யாத³யோ. யம் பனேத்த² கே³ய்யங்கா³தி³னிமித்தரஹிதம், தம் ஸுத்தங்க³ம் விஸேஸஸஞ்ஞாபரிஹாரேன ஸாமஞ்ஞஸஞ்ஞாய பவத்தனதோதி. நனு ச ஸகா³த²கம் ஸுத்தம் கே³ய்யம், நிக்³கா³த²கம் ஸுத்தம் வேய்யாகரணந்தி ஸுத்தங்க³ம் ந ஸம்ப⁴வதீதி சோத³னா தத³வத்தா² ஏவாதி? ந தத³வத்தா² ஸோதி⁴தத்தா. ஸோதி⁴தஞ்ஹி புப்³பே³ ‘‘கா³தா²விரஹே ஸதி புச்சா²விஸ்ஸஜ்ஜனபா⁴வோ வேய்யாகரணஸ்ஸ தப்³பா⁴வனிமித்த’’ந்தி.

யஞ்ச வுத்தம் ‘‘கா³தா²பா⁴வதோ மங்க³லஸுத்தாதீ³னம் ஸுத்தங்க³ஸங்க³ஹோ ந ஸியா’’தி (கு². பா. 5.1; ஸு. நி. 261), தம் ந, நிருள்ஹத்தா. நிருள்ஹோ ஹி மங்க³லஸுத்தாதீ³னம் ஸுத்தபா⁴வோ. ந ஹி தானி த⁴ம்மபத³பு³த்³த⁴வம்ஸாத³யோ விய கா³தா²பா⁴வேன பஞ்ஞாதானி, கிந்து ஸுத்தபா⁴வேனேவ. தேனேவ ஹி அட்ட²கதா²யம் ‘‘ஸுத்தனாமக’’ந்தி நாமக்³க³ஹணம் கதம். யம் பன வுத்தம் ‘‘ஸகா³த²கத்தா கே³ய்யங்க³ஸங்க³ஹோ ஸியா’’தி, தத³பி நத்தி², யஸ்மா ஸஹதாஞ்ஞேன. ஸஹ கா³தா²ஹீதி ஹி ஸகா³த²கம், ஸஹபா⁴வோ ச நாம அத்த²தோ அஞ்ஞேன ஹோதி, ந ச மங்க³லஸுத்தாதீ³ஸு கா³தா²வினிமுத்தோ கோசி ஸுத்தபதே³ஸோ அத்தி², யோ ‘‘ஸஹ கா³தா²ஹீ’’தி வுச்சேய்ய, ந ச ஸமுதா³யோ நாம கோசி அத்தி². யத³பி வுத்தம் ‘‘உப⁴தோவிப⁴ங்கா³தீ³ஸு ஸகா³த²கப்பதே³ஸானம் கே³ய்யங்க³ஸங்க³ஹோ ஸியா’’தி, தத³பி ந அஞ்ஞதோ. அஞ்ஞா ஏவ ஹி தா கா³தா² ஜாதகாதி³பரியாபன்னத்தா, அதோ ந தாஹி உப⁴தோவிப⁴ங்கா³தீ³னம் கே³ய்யங்க³பா⁴வோதி. ஏவம் ஸுத்தாதீ³னம் அங்கா³னம் அஞ்ஞமஞ்ஞஸங்கராபா⁴வோ வேதி³தப்³போ³.

அத்த²த்த²ந்தி அத்த²பூ⁴தம் யதா²பூ⁴தம் அத்த²ம். அனத்த²ம்பி கேசி விபல்லாஸவஸேன ‘‘அத்தோ²’’தி க³ண்ஹந்தீதி ‘‘அத்த²த்த²’’ந்தி விஸேஸேத்வா வுத்தம். காரணத்த²ந்தி காரணபூ⁴தம் அத்த²ம், ஸீலம் ஸமாதி⁴ஸ்ஸ காரணம், ஸமாதி⁴ விபஸ்ஸனாயாதி ஏவம் தஸ்ஸ தஸ்ஸ காரணபூ⁴தம் அத்த²ம். தேனாஹ ‘‘இமஸ்மிம் டா²னே ஸீல’’ந்திஆதி³. தேனேதம் த³ஸ்ஸேதி – இமஸ்மிம் டா²னே ஸீலம் கதி²தம், தஞ்ச யாவதே³வ ஸமாத⁴த்த²ம், ஸமாதி⁴ விபஸ்ஸனத்தோ², விபஸ்ஸனா மக்³க³த்தா², மக்³கோ³ ப²லத்தோ², வட்டம் கதி²தம் யாவதே³வ விவட்டாதி⁴க³மத்த²ந்தி ஜானிதும் ந ஸக்கோந்தீதி. ஏவம் பாளியம் ‘‘அத்த²’’ந்தி இமினா பா⁴ஸிதத்த²பயோஜனத்தா²னம் க³ஹிததா வேதி³தப்³பா³. ந பரிக்³க³ண்ஹந்தீதி ந விசாரேந்தி, நிஜ்ஜா²னபஞ்ஞாக்க²மா ந ஹோந்தி, நிஜ்ஜா²யித்வா பஞ்ஞாய ரோசேத்வா க³ஹேதப்³பா³ ந ஹோந்தீதி அதி⁴ப்பாயோ. இதி ஏவம் ஏதாய பரியத்தியா வாத³ப்பமோக்கா²னிஸம்ஸா அத்தனோ உபரி பரேஹி ஆரோபிதவாத³ஸ்ஸ நிக்³க³ஹஸ்ஸ மோக்க²பயோஜனா ஹுத்வா த⁴ம்மம் பரியாபுணந்தி. வாத³ப்பமோக்கோ² வா நிந்தா³பமோக்கோ². யஸ்ஸ சாதி யஸ்ஸ ச ஸீலாதி³பூரணேன பத்தப்³ப³ஸ்ஸ, மக்³க³ஸ்ஸ வா தத³தி⁴க³மேன பத்தப்³ப³ஸ்ஸ, ப²லஸ்ஸ வா தத³தி⁴க³மேன பத்தப்³ப³ஸ்ஸ, அனுபாதா³விமோக்க²ஸ்ஸ வா அத்தா²ய. த⁴ம்மம் பரியாபுணந்தி, ஞாயேன பரியாபுணந்தீதி அதி⁴ப்பாயோ. நானுபோ⁴ந்தி ந விந்த³ந்தி. தேஸம் தே த⁴ம்மா து³க்³க³ஹிதா உபாரம்ப⁴மானத³ப்பமக்க²பளாஸாதி³ஹேதுபா⁴வேன தீ³க⁴ரத்தம் அஹிதாய து³க்கா²ய ஸம்வத்தந்தி.

239. அலம் பரியத்தோ க³தோ³ அஸ்ஸாதி அலக³த்³தோ³ அனுனாஸிகலோபம் த³-காராக³மஞ்ச கத்வா. வட்டது³க்க²கந்தாரதோ நித்த²ரணத்தா²ய பரியத்தி நித்த²ரணபரியத்தி. ப⁴ண்டா³கா³ரே நியுத்தோ ப⁴ண்டா³கா³ரிகோ, ப⁴ண்டா³கா³ரிகோ விய ப⁴ண்டா³கா³ரிகோ, த⁴ம்மரதனானுபாலகோ. அஞ்ஞம் அத்த²ம் அனபேக்கி²த்வா ப⁴ண்டா³கா³ரிகஸ்ஸேவ ஸதோ பரியத்தி ப⁴ண்டா³கா³ரிகபரியத்தி. ‘‘வம்ஸானுரக்க²கோவா’’தி அவதா⁴ரணம் ஸீஹாவலோகனஞாயேன தந்திதா⁴ரகோவ பவேணிபாலகோவாதி புரிமபத³த்³வயேபி யோஜேதப்³ப³ம்.

யதி³ தந்திதா⁴ரணாதி³அத்த²ம் பு³த்³த⁴வசனஸ்ஸ பரியாபுணனம் ப⁴ண்டா³கா³ரிகபரியத்தி, கஸ்மா ‘‘கீ²ணாஸவஸ்ஸா’’தி விஸேஸேத்வா வுத்தம், நனு ஏகச்சஸ்ஸ புது²ஜ்ஜனஸ்ஸபி அயம் நயோ லப்³ப⁴தீதி அனுயோக³ம் ஸந்தா⁴யாஹ ‘‘யோ பனா’’திஆதி³. அத்தனோ டா²னேதி நித்த²ரணட்டா²னே. காமம் புது²ஜ்ஜனோ ‘‘பவேணிம் பாலேஸ்ஸாமீ’’தி அஜ்ஜா²ஸயேன பரியாபுணாதி. அத்தனோ பன ப⁴வகந்தாரதோ அனித்திண்ணத்தா தஸ்ஸ ஸா பரியத்தி நித்த²ரணபரியத்தி ஏவ நாம ஹோதீதி அதி⁴ப்பாயோ. தேனாஹ ‘‘புது²ஜ்ஜனஸ்ஸா’’திஆதி³.

நிஜ்ஜா²னம் க²மந்தீதி நிஜ்ஜா²னபஞ்ஞம் க²மந்தி. தத்த² தத்த² ஆக³தே ஸீலாதி³த⁴ம்மே நிஜ்ஜா²யித்வா பஞ்ஞாய ரோசேத்வா யாதா²வதோ க³ஹேதப்³பா³ ஹோந்தி. தேனாஹ ‘‘இத⁴ ஸீல’’ந்திஆதி³. ந கேவலம் ஸுக்³க³ஹிதம் பரியத்திம் நிஸ்ஸாய மக்³க³பா⁴வனாப²லஸச்சி²கிரியா, பரவாத³னிக்³க³ஹஸகவாத³பதிட்டா²பனாதீ³னிபி இஜ்ஜ²ந்தீதி த³ஸ்ஸேதும் ‘‘பரவாதே³’’திஆதி³ வுத்தம். தேனாஹ ‘‘உப்பன்னம் பரப்பவாத³ம் ஸஹத⁴ம்மேன ஸுனிக்³க³ஹம் நிக்³க³ஹித்வா’’திஆதி³ (தீ³. நி. 2.268). இச்சி²திச்சி²தட்டா²னந்தி தி³ட்டி²வினிவேட²னாதி³வஸேன இச்சி²தம் இச்சி²தம் பாளிபதே³ஸம். மோசேதுந்தி அபனேதும். அஹிதாய து³க்கா²ய அஸம்வத்தனம்பி தத³பா⁴வே உப்பஜ்ஜனகஹிதஸுக²ஸ்ஸ காரணமேவ தஸ்மிம் ஸதி பா⁴வதோதி. ஸுக்³க³ஹிதஅலக³த்³த³ஸ்ஸபி ஹிதாய ஸுகா²ய ஸம்வத்தனதா த³ட்ட²ப்³பா³.

240. உத்தரந்தி ஏதேனாதி உத்தரோ, ஸினந்தி ப³ந்த⁴ந்தீதி ஸேது, உத்தரோ ச ஸோ ஸேது சாதி உத்தரஸேது. கூலம் பரதீரம் வஹதி பாபேதீதி குல்லம். கலாபம் கத்வா ப³த்³தோ⁴தி வேளுனளாதீ³ஹி கலாபவஸேன ப³த்³தோ⁴. அணுந்தி இத³ம் அட்ட²ஸமாபத்திஆரம்மணம் ஸஞ்ஞோஜனம் ஸந்தா⁴ய வத³தி. தூ²லந்தி இதரம். தி³ட்டி²ந்தி யதா²பூ⁴தத³ஸ்ஸனம், விபஸ்ஸனந்தி அத்தோ². ஏவம் பரிஸுத்³த⁴ம் ஏவம் பரியோதா³தந்தி தேபூ⁴மகேஸு த⁴ம்மேஸு ஞாதம் ‘‘நேதம் மம, நேஸோஹமஸ்மி, ந மேஸோ அத்தா’’தி, ஏவம் தண்ஹாதி³ட்டி²ஸம்கிலேஸாபா⁴வேன ஸப்³ப³ஸோ விஸுத்³த⁴ம், பரிஸுத்³த⁴த்தா ஏவ பரியோதா³தம். ந அல்லீயேதா²தி நிகந்திவஸேன ந நிஸ்ஸயேத². ந கேலாயேதா²தி ந மமாயேத². ந த⁴னாயேதா²தி த⁴னம் த்³ரப்³யம் ந கயிராத². உப⁴யத்தா²தி ஸமதே² விபஸ்ஸனாய ச.

அஸத்³த⁴ம்மேதிஆதீ³ஸு அஸதம் ஹீனஜ்ஜா²ஸயானம் த⁴ம்மோதி அஸத்³த⁴ம்மோ. கா³மவாஸீனம் த⁴ம்மோதி கா³மத⁴ம்மோ. கிலேஸானம் வஸ்ஸனஸபா⁴வதாய வஸலத⁴ம்மோ. கிலேஸேஹி தூ³ஸிதத்தா தூ²லத்தா ச து³ட்டு²ல்லோ. உத³கஸுத்³தி⁴பரியோஸானதாய ஓத³கந்திகோ. ‘‘த⁴ம்மாபி வோ பஹாதப்³பா³’’தி இமினாபி ஓவாதே³ன பி⁴க்கூ² உத்³தி³ஸ்ஸ கதே²ந்தோபி அரிட்ட²ம்யேவ நிக்³க³ண்ஹாதி.

241. திவித⁴க்³கா³ஹவஸேனாதி தண்ஹாமானதி³ட்டி²க்³கா³ஹவஸேன. யதி³ ஏவம் ‘‘அஹம் மமாதி க³ண்ஹாதீ’’தி கா³ஹத்³வயமேவ கஸ்மா வுத்தந்தி? நயித³மேவம் தத்தா²பி கா³ஹத்தயஸ்ஸேவ வுத்தத்தா. ‘‘அஹ’’ந்தி ஹி இமினா மானதி³ட்டி²க்³கா³ஹா வுத்தா ‘‘அஹமஸ்மீ’’தி கா³ஹஸாமஞ்ஞதோ. தி³ட்டி²பி தி³ட்டி²ட்டா²னம் புரிமுப்பன்னாய தி³ட்டி²யா உத்தரதி³ட்டி²யா ஸக்காயதி³ட்டி²யா ஸஸ்ஸததி³ட்டி²யா ச காரணபா⁴வதோ. ஆரம்மணம் பஞ்ச க²ந்தா⁴, ரூபாரம்மணாதீ³னி ச. தி³ட்டி²யா பச்சயோ அவிஜ்ஜா-ப²ஸ்ஸ-ஸஞ்ஞா-விதக்க-அயோனிஸோமனஸிகார-பாபமித்தபரதோகோ⁴ஸாதி³கோ தி³ட்டி²யா உபனிஸ்ஸயாதி³பச்சயோ. வுத்தஞ்ஹேதம் படிஸம்பி⁴தா³யம் (படி. ம. 1.124)‘‘கதமானி அட்ட² தி³ட்டி²ட்டா²னானி அவிஜ்ஜாபி ப²ஸ்ஸோபி ஸஞ்ஞாபி விதக்கோபி அயோனிஸோமனஸிகாரோபி பாபமித்தோபி பரதோகோ⁴ஸோபி தி³ட்டி²ட்டா²ன’’ந்திஆதி³. ரூபாரம்மணாதி ருப்பனஸபா⁴வத⁴ம்மாரம்மணா. ரூபம் பன அத்தாதி ந வத்தப்³ப³ம் இத⁴ ‘‘ரூபம் அத்ததோ ஸமனுபஸ்ஸதீ’’தி (ஸம். நி. 3.81, 345) இமஸ்ஸ கா³ஹஸ்ஸ அனதி⁴ப்பேதத்தா. ஸோ ஹி ‘‘யம்பி தம் தி³ட்டி²ட்டா²ன’’ந்திஆதி³னா பரதோ வுச்சதி. இத⁴ பன ‘‘ரூபவந்தம் அத்தானம் ஸமனுபஸ்ஸதி, அத்தனி ரூபம், ரூபஸ்மிம் அத்தான’’ந்தி இமே தயோ கா³ஹா அதி⁴ப்பேதாதி கேசி, தத³யுத்தம். யஸ்மா ரூபம் அத்தா ந ஹோதி, அத்தக்³கா³ஹஸ்ஸ பன ஆலம்ப³னம் ஹோதி, அத்தஸபா⁴வேயேவ வா ரூபாதி³த⁴ம்மே ஆரப்³ப⁴ அத்ததி³ட்டி² உப்பஜ்ஜதி, ந அத்தானம் தஸ்ஸ பரமத்த²தோ அனுபலப்³ப⁴னதோ, தஸ்மா ரூபாதி³ஆரம்மணாவ அத்ததி³ட்டீ²தி கத்வா வுத்தம், ரூபம் பன ‘‘அத்தா’’தி ந வத்தப்³ப³ந்தி அயமேத்த² அத்தோ². ‘‘யம்பி தம் தி³ட்டி²ட்டா²ன’’ந்திஆதி³னா பன விபஸ்ஸனாபடிவிபஸ்ஸனா விய தி³ட்டி²அனுபஸ்ஸனா நாம த³ஸ்ஸிதா.

க³ந்த⁴ரஸபோ²ட்ட²ப்³பா³யதனானம் ஸம்பத்தகா³ஹிந்த்³ரியவிஸயதாய பத்வா க³ஹேதப்³ப³தா. தஞ்ஹி தஸ்ஸ அத்தனோ விஸயம் பரிபு⁴த்வா ஸம்ப³ந்த⁴ம் ஹுத்வா க³ண்ஹாதி. அவஸேஸானி ஸத்தாயதனானி விஞ்ஞாதம் நாம மனஸா விஞ்ஞாதப்³ப³தோ. அஞ்ஞதா² இதரேஸம்பி விஞ்ஞாததா ஸியா. பத்தந்தி அதி⁴க³தம். பரியேஸிதந்தி க³வேஸிதம். அனுவிசரிதந்தி சிந்திதம். தேனாஹ ‘‘மனஸா’’தி. ஏத்த² ச பத்தபரியேஸனானம் அபடிக்கே²பஸ்ஸ, விஸும், ஏகஜ்ஜ²ம் படிக்கே²பஸ்ஸ ச வஸேன சதுக்கோடிகம் த³ஸ்ஸேத்வா பத்தபரியேஸிதேஹி அனுவிசரிதஸ்ஸ பே⁴த³ம் த³ஸ்ஸேதும் ‘‘லோகஸ்மிஞ்ஹீ’’திஆதி³ வுத்தம். பரியேஸித்வா பத்தம் பட²மம் சேதஸா பச்சா² காயேன பத்தத்தா பத்தம் நாம. பரியேஸித்வா நோபத்தம் பரியேஸிதம் நாம கேவலம் பரியேஸிதபா⁴வதோ. அபரியேஸித்வா பத்தஞ்ச நோபத்தஞ்ச மனஸா அனுவிசரிதப்³ப³தோ மனஸானுவிசரிதம் நாம.

அயஞ்ச விகப்போ ஆகுலோ வியாதி ‘‘அத² வா’’திஆதி³ வுத்தம். பத்தட்டே²னாதி பத்தபா⁴வேன பத்ததாஸாமஞ்ஞேன. அபரியேஸித்வா நோபத்தம் மனஸானுவிசரிதம் நாம பத்தியா பரியேஸனாய ச அபா⁴வதோ. ஸப்³ப³ம் வா ஏதந்தி ‘‘பரியேஸித்வா பத்தம்பீ’’திஆதி³னா வுத்தம் சதுப்³பி³த⁴ம்பி. இமினாதி ‘‘யம்பி தம் தி³ட்டி²ட்டா²னம்’’திஆதி³வசனேன. விஞ்ஞாணாரம்மணா தண்ஹாமானதி³ட்டி²யோ கதி²தா பாரிஸேஸஞாயேன. ஏவம் பாரிஸேஸஞாயபரிக்³க³ஹே கிம் பயோஜனந்தி ஆஹ ‘‘தே³ஸனாவிலாஸேனா’’திஆதி³. யேஸம் வினேய்யானம் தே³ஸேதப்³ப³த⁴ம்மஸ்ஸ ஸரூபம் அனாமஸித்வா ஆரம்மணகிச்ச-ஸம்பயுத்தத⁴ம்ம-ப²லவிஸேஸாதி³-பகாரந்தரவிபா⁴வனேன படிவேதோ⁴ ஹோதி, தேஸம் தப்பகாரபே⁴தே³ஹி த⁴ம்மேஹி, யேஸம் பன யேன ஏகேனேவ பகாரேன ஸரூபேனேவ வா விபா⁴வனே கதே படிவேதோ⁴ ஹோதி, தேஸம் தம் வத்வா த⁴ம்மிஸ்ஸரத்தா தத³ஞ்ஞம் நிரவஸேஸாகாரவிபா⁴வனஞ்ச தே³ஸனாவிலாஸோ. தேனாஹ ‘‘தி³ட்டா²தி³ஆரம்மணவஸேன விஞ்ஞாணம் த³ஸ்ஸித’’ந்தி.

தி³ட்டி²ட்டா²னந்தி தி³ட்டி² ஏவ தி³ட்டி²ட்டா²னம், தம் ஹேட்டா² வுத்தனயமேவ. யம் ரூபம் ஏஸா தி³ட்டி² ‘‘லோகோ ச அத்தா சா’’தி க³ண்ஹாதி. தம் ரூபம் ஸந்தா⁴ய ‘‘ஸோ லோகோ ஸோ அத்தா’’தி வசனம் வுத்தந்தி யோஜனா. ஸோ பேச்சப⁴விஸ்ஸாமீதி உத்³த⁴மாகா⁴தனிகவாத³வஸேனாயம் தி³ட்டீ²தி ஆஹ ‘‘ஸோ அஹம் பரலோகம் க³ந்த்வா நிச்சோ ப⁴விஸ்ஸாமீ’’திஆதி³. து⁴வோதி தி²ரோ. ஸஸ்ஸதோதி ஸப்³ப³தா³பா⁴வீ. அவிபரிணாமத⁴ம்மோதி ஜராய மரணேன ச அவிபரிணாமேதப்³ப³ஸபா⁴வோ, நிப்³பி³காரோதி அத்தோ². தம்பி த³ஸ்ஸனந்தி தம்பி ததா²வுத்தம் தி³ட்டி²த³ஸ்ஸனம் அத்தானம் விய தண்ஹாதி³ட்டி²க்³கா³ஹவிஸேஸேன க³ண்ஹாதி. தேனாஹ ‘‘ஏதம் மமா’’திஆதி³. தி³ட்டா²ரம்மணாதி தி³ட்டி²விஸயா. கத²ம் பன தி³ட்டி² தி³ட்டி²விஸயா ஹோதீதி ஆஹ ‘‘விபஸ்ஸனாயா’’திஆதி³. படிவிபஸ்ஸனாகாலேதி யமகதோ ஸம்மஸனாதி³காலம் ஸந்தா⁴யாஹ. தத்த² அக்க²ரசிந்தகானம் ஸத்³தே³ விய, வேத³ஜ்ஜா²யீனம் வேத³ஸத்தே² விய ச தி³ட்டி²யம் தி³ட்டி²க³திகானம் தி³ட்டி²க்³கா³ஹப்பவத்தி த³ட்ட²ப்³பா³.

ஸமனுபஸ்ஸதீதி பத³ஸ்ஸ ச தஸ்ஸோ ஸமனுபஸ்ஸனா அத்தோ²தி யோஜனா. தேன ஸமனுபஸ்ஸனா நாம சதுப்³பி³தா⁴தி த³ஸ்ஸேதி. தத்த² ஞாணம் தாவ ஸமவிஸமம் ஸம்மா யாதா²வதோ அனுபஸ்ஸதீதி ஸமனுபஸ்ஸனா. இதரா பன ஸம்கிலேஸவஸேன அனு அனு பஸ்ஸந்தீதி ஸமனுபஸ்ஸனா. யதி³ ஏவம் ஹோது தாவ தி³ட்டி²ஸமனுபஸ்ஸனா மிச்சா²த³ஸ்ஸனபா⁴வதோ, கத²ம் தண்ஹாமானாதி? தண்ஹாயபி ஸத்தானம் பாபகரணே உபாயத³ஸ்ஸனவஸேன பஞ்ஞாபதிரூபிகா பவத்தி லப்³ப⁴தேவ, யாய வஞ்சனனிகதிஸாசியோகா³ ஸம்ப⁴வந்தி. மானோபி ஸேய்யாதி³னா த³ஸ்ஸனவஸேனேவ ததா² அத்தானம் ஊஹதீதி தண்ஹாமானானம் ஸமனுபஸ்ஸனாபதிரூபிகா பவத்தி லப்³ப⁴தீதி த³ட்ட²ப்³ப³ம். அவிஜ்ஜமானேதி ‘‘ஏதம் மமா’’தி ஏவம் க³ஹேதப்³பே³ தண்ஹாவத்து²ஸ்மிம் அஜ்ஜ²த்தக²ந்த⁴பஞ்சகே அனுபலப்³ப⁴மானே வினட்டே². ந பரிதஸ்ஸதி ப⁴யபரித்தாஸதண்ஹாபரித்தாஸானம் மக்³கே³ன ஸமுக்³கா⁴திதத்தா.

242. சதூஹி காரணேஹீதி ‘‘அஸதி ந பரிதஸ்ஸதீ’’தி வுத்தம்பி இதரேஹி தீஹி ஸஹ க³ஹேத்வா வுத்தம். சதூஹி காரணேஹீதி சதுக்கோடிகஸுஞ்ஞதாகத²னஸ்ஸ காரணேஹி. ப³ஹித்³தா⁴ அஸதீதி பா³ஹிரே வத்து²ஸ்மிம் அவிஜ்ஜமானே. ஸா பனஸ்ஸ அவிஜ்ஜமானதா லத்³த⁴வினாஸேன வா அலத்³தா⁴லாபே⁴ன வாதி பாளியம் – ‘‘அஹு வத மே, தம் வத மே நத்தி², ஸியா வத மே, தம் வதாஹம் ந லபா⁴மீ’’தி வுத்தந்தி தது³ப⁴யம் பரிக்கா²ரவஸேன விப⁴ஜித்வா தத்த² பரிதஸ்ஸனம் த³ஸ்ஸேதும் ‘‘ப³ஹித்³தா⁴ பரிக்கா²ரவினாஸே’’திஆதி³ வுத்தம். தத்த² யானம் ‘‘ரதோ² வய்ஹ’’ந்தி ஏவமாதி³. வாஹனம் ஹத்தி²அஸ்ஸாதி³.

யேஹி கிலேஸேஹீதி யேஹி அஸந்தபத்த²னாதீ³ஹி கிலேஸேஹி. ஏவம் ப⁴வேய்யாதி ஏவம் ‘‘அஹு வத மே’’திஆதி³னா சோத³னாதி³ ப⁴வேய்ய. தி³ட்டி²ட்டா²னாதி⁴ட்டா²னபரியுட்டா²னாபி⁴னிவேஸானுஸயானந்தி ஏத்த² அபராபரம் பவத்தாஸு தி³ட்டீ²ஸு யா பரதோ உப்பன்னா தி³ட்டி²யோ, தாஸம் புரிமுப்பன்னா தி³ட்டி²யோ காரணட்டே²ன தி³ட்டி²ட்டா²னானி. அதி⁴கரணட்டே²ன தி³ட்டா²தி⁴ட்டா²னானி, பரியுட்டா²னப்பத்தியா ஸப்³பா³பி தி³ட்டி²பரியுட்டா²னானி. ‘‘இத³மேவ ஸச்சம் மோக⁴மஞ்ஞ’’ந்தி (ம. நி. 2.202, 427; 3.27-29; உதா³. 55; மஹானி. 20; நேத்தி. 59) பவத்தியா அபி⁴னிவேஸா. அப்பஹீனபா⁴வேன ஸந்தானே ஸயந்தீதி அனுஸயாதி ஏவம் தி³ட்டி²ட்டா²னாதீ³னம் பதா³னம் விபா⁴கோ³ வேதி³தப்³போ³. தண்ஹாதீ³ஹி கம்பனியதாய ஸப்³ப³ஸங்கா²ராவ இஞ்ஜிதானீதி ஸப்³ப³ஸங்கா²ரஇஞ்ஜிதானி. ஸேஸபத³த்³வயேபி ஏஸேவ நயோ. உபதீ⁴யதி ஏத்த² து³க்க²ந்தி உபதி⁴, க²ந்தா⁴வ உபதி⁴ க²ந்தூ⁴பதி⁴. ஏஸ நயோ ஸேஸேஸுபி. ததே³வ ச ஆக³ம்ம தண்ஹா கீ²யதி விரஜ்ஜதி நிருஜ்ஜ²தீதி யோஜனா. உச்சி²ஜ்ஜிஸ்ஸாமி நாமஸ்ஸூதிஆதீ³ஸு நிபாதமத்தம், ஸம்ஸயே வா. தாஸோதி அத்தனியாபா⁴வம் படிச்ச தண்ஹாபரித்தாஸோ சேவ ப⁴யபரித்தாஸோ ச. தேனாஹ ‘‘தாஸோ ஹேஸோ’’திஆதி³. நோ சஸ்ஸம்,நோ ச மே ஸியாதி ‘‘அஹ’’ந்தி கிர கோசி நோ சஸ்ஸம், ‘‘மே’’தி ச கிஞ்சி நோ ஸியாதி. தாஸப்பதீகாரத³ஸ்ஸனஞ்ஹேதம்.

243. ஏத்தாவதாதி ‘‘ஏவம் வுத்தே’’திஆதி³னா, புச்சா²னுஸந்தி⁴வஸேன பவத்தாய ‘‘ச²யிமானி, பி⁴க்க²வே, தி³ட்டி²ட்டா²னானீ’’திஆதி³னா (ம. நி. 1.241) வா. ஸாபி ஹி அஜ்ஜ²த்தக²ந்த⁴வினாஸே பரிதஸ்ஸனகம் த³ஸ்ஸேத்வா அபரிதஸ்ஸனகம் த³ஸ்ஸேந்தீ பவத்தாதி தஸ்ஸனகஸ்ஸ ஸுஞ்ஞதாத³ஸ்ஸனம் அகிச்சஸாத⁴கம்பி ஸுஞ்ஞதாத³ஸ்ஸனமேவாதி இமேஸம் வஸேன ‘‘சதுக்கோடிகா ஸுஞ்ஞதா கதி²தா’’தி வுத்தம். ப³ஹித்³தா⁴ பரிக்கா²ரந்தி பா³ஹிரம் ஸவிஞ்ஞாணகம் அவிஞ்ஞாணகஞ்ச ஸத்தோபகரணம். தஞ்ஹி ஜீவிதவுத்தியா பரிக்கா²ரகட்டே²ன ‘‘பரிக்கா²ரோ’’தி வுத்தம். பரிக்³க³ஹம் நாம கத்வாதி ‘‘மம இத³’’ந்தி பரிக்³க³ஹேதப்³ப³தாய பரிக்³க³ஹிதம் நாம கத்வா. ஸப்³போ³பி தி³ட்டி²க்³கா³ஹோ ‘‘அத்தா நிச்சோ து⁴வோ ஸஸ்ஸதோ, அத்தா உச்சி²ஜ்ஜதி வினஸ்ஸதீ’’திஆதி³னா அத்ததி³ட்டி²ஸன்னிஸ்ஸயோயேவாதி வுத்தம் ‘‘ஸக்காயதி³ட்டி²பமுகா² த்³வாஸட்டி²தி³ட்டி²யோ’’தி. அயாதா²வக்³கா³ஹினா அபி⁴னிவேஸனபஞ்ஞாபனானம் உபத்த²ம்ப⁴பா⁴வதோ தி³ட்டி² ஏவ நிஸ்ஸயோதி தி³ட்டி²னிஸ்ஸயோ. பரிக்³க³ண்ஹேய்யாதி நிச்சாதி³விஸேஸயுத்தம் கத்வா பரிக்³க³ண்ஹேய்ய. கிமேவம் பரிக்³க³ஹேதும் ஸக்குணேய்ய? ஸப்³ப³த்தா²தி ‘‘தம், பி⁴க்க²வே, அத்தவாது³பாதா³னம் உபாதி³யேத², தம், பி⁴க்க²வே, தி³ட்டி²னிஸ்ஸயம் நிஸ்ஸயேதா²’’தி ஏதேஸுபி.

244. அத்தனி வா ஸதீதி யஸ்ஸ அத்தனோ ஸந்தகபா⁴வேன கிஞ்சி அத்தனியந்தி வுச்சேய்ய, தஸ்மிம் அத்தனி ஸதி, ஸோ ஏவ பன அத்தா பரமத்த²தோ நத்தீ²தி அதி⁴ப்பாயோ. ஸக்கா ஹி வத்தும் பா³ஹிரகபரிகப்பிதோ அத்தா ‘‘பரமத்தோ²’’தி? ஸியா க²ந்த⁴பஞ்சகம் ஞேய்யஸபா⁴வத்தா யதா² தம் க⁴டோ, யதி³ பன தத³ஞ்ஞம் நாம கிஞ்சி அப⁴விஸ்ஸ, ந தம் நியமதோ விபரீதம் ஸியாதி? ந ச ஸோ பரமத்த²தோ அத்தி² பமாணேஹி அனுபலப்³ப⁴மானத்தா துரங்க³மவிஸாணம் வியாதி. அத்தனியே வா பரிக்கா²ரே ஸதீதி ‘‘இத³ம் நாம அத்தனோ ஸந்தக’’ந்தி தஸ்ஸ கிஞ்சனபா⁴வேன நிச்சி²தே கிஸ்மிஞ்சி வத்து²ஸ்மிம் ஸதி. அத்தனோ இத³ந்தி ஹி அத்தனியந்தி. அஹந்தி ஸதீதி ‘‘அஹம் நாமாய’’ந்தி அஹம்காரவத்து²பூ⁴தே பரமத்த²தோ நித்³தா⁴ரிதஸரூபே கிஸ்மிஞ்சி ஸதி தஸ்ஸ ஸந்தகபா⁴வேன மமாதி கிஞ்சி க³ஹேதும் யுத்தம் ப⁴வேய்ய. மமாதி ஸதி ‘‘அஹ’’ந்தி ஏத்தா²பி ஏஸேவ நயோ. இதி பரமத்த²தோ அத்தனோ அனுபலப்³ப⁴மானத்தா அத்தனியம் கிஞ்சி பரமத்த²தோ நத்தே²வாதி ஸப்³ப³ஸங்கா²ரானம் அனத்ததாய அனத்தனியதம், அனத்தனியதாய ச அனத்தகதம் த³ஸ்ஸேதி. பூ⁴ததோதி பூ⁴தத்த²தோ. தத²தோதி தத²ஸபா⁴வதோ. தி²ரதோதி டி²தஸபா⁴வதோ நிப்³பி³காரதோ.

யஸ்மா ஹுத்வா ந ஹோதீதி யஸ்மா புப்³பே³ அஸந்தம் பச்சயஸமவாயேன ஹுத்வா உப்பஜ்ஜித்வா புன ப⁴ங்கு³பக³மேன ந ஹோதி, தஸ்மா ந நிச்சந்தி அனிச்சம், அது⁴வந்தி அத்தோ². ததோ ஏவ உப்பாத³வயவத்திதோதி உப்பஜ்ஜனவஸேன நிருஜ்ஜ²னவஸேன ச பவத்தனதோ. ஸபா⁴வவிக³மோ இத⁴ விபரிணாமோ, க²ணிகதா தாவகாலிகதா, நிச்சஸபா⁴வாபா⁴வோ ஏவ நிச்சபடிக்கே²போ. அனிச்சத⁴ம்மா ஹி தேனேவ அத்தனோ அனிச்சபா⁴வேன அத்த²தோ நிச்சதம் படிக்கி²பந்தி நாம. ததா² ஹி வுத்தம் ‘‘ந நிச்சந்தி அனிச்ச’’ந்தி. உப்பாத³ஜராப⁴ங்க³வஸேன ரூபஸ்ஸ நிரந்தரபா³த⁴தாதி படிபீளனாகாரேனஸ்ஸ து³க்க²தா. ஸந்தாபோ து³க்க²து³க்க²தாதி³வஸேன ஸந்தாபனம் பரித³ஹனம், ததோ ஏவஸ்ஸ து³ஸ்ஸஹதாய து³க்க²மதா. திஸ்ஸன்னம் து³க்க²தானம் ஸம்ஸாரது³க்க²ஸ்ஸ ச அதி⁴ட்டா²னதாய து³க்க²வத்து²கதா. ஸுக²ஸபா⁴வாபா⁴வோ ஏவ ஸுக²படிக்கே²போ. விபரிணாமத⁴ம்மந்தி ஜராய மரணேன ச விபரிணமனஸபா⁴வம். யஸ்மா இத³ம் ரூபம் பச்சயஸமவாயேன உப்பாத³ம், உப்பாதா³னந்தரம் ஜரம் பத்வா அவஸ்ஸமேவ பி⁴ஜ்ஜதி, பி⁴ன்னஞ்ச பி⁴ன்னமேவ, நாஸ்ஸ கஸ்ஸசி ஸங்கமோதி ப⁴வந்தரானுபக³மனஸங்கா²தேன ஸங்கமாபா⁴வேன விபரிணாமத⁴ம்மதம் பாகடம் காதும் ‘‘ப⁴வஸங்கந்தி உபக³மனஸபா⁴வ’’ந்தி வுத்தம். பகதிபா⁴வவிஜஹனம் ஸபா⁴வவிக³மோ நிருஜ்ஜ²னமேவ. ந்தி அனிச்சம் து³க்க²ம் விபரிணாமத⁴ம்மம் ரூபம். இமினாதி ‘‘நோ ஹேதம், ப⁴ந்தே’’தி ரூபஸ்ஸ தண்ஹாதி³க்³கா³ஹானம் வத்து²பா⁴வபடிக்கே²பேன. ரூபஞ்ஹி உப்பன்னம் டி²திம் மா பாபுணாது, டி²திப்பத்தம் மா ஜீரது, ஜரப்பத்தம் மா பி⁴ஜ்ஜது, உத³யப்³ப³யேஹி மா கிலமியதூதி ந ஏத்த² கஸ்ஸசி வஸீபா⁴வோ அத்தி², ஸ்வாயமஸ்ஸ அவஸவத்தனட்டோ² அனத்ததாஸல்லக்க²ணஸ்ஸ காரணம் ஹோதீதி ஆஹ ‘‘அவஸவத்தனாகாரேன ரூபம், ப⁴ந்தே, அனத்தாதி படிஜானந்தீ’’தி. நிவாஸிகாரகவேத³கஅதி⁴ட்டா²யகவிரஹேன ததோ ஸுஞ்ஞதா ஸுஞ்ஞட்டோ², ஸாமிபூ⁴தஸ்ஸ கஸ்ஸசி அபா⁴வோ அஸ்ஸாமிகட்டோ², யதா²வுத்தவஸவத்திபா⁴வாபா⁴வோ அனிஸ்ஸரட்டோ², பரபரிகப்பிதஅத்தஸபா⁴வாபா⁴வோ ஏவ அத்தபடிக்கே²பட்டோ².

யஸ்மா அனிச்சலக்க²ணேன விய து³க்க²லக்க²ணம், தது³ப⁴யேன அனத்தலக்க²ணம் ஸுவிஞ்ஞாபயம், ந கேவலம், தஸ்மா தது³ப⁴யேனேத்த² அனத்தலக்க²ணவிபா⁴வனம் கதந்தி த³ஸ்ஸேந்தோ ‘‘ப⁴க³வா ஹீ’’திஆதி³மாஹ. தத்த² அனிச்சவஸேனாதி அனிச்சதாவஸேன. து³க்க²வஸேனாதி து³க்க²தாவஸேன. ந உபபஜ்ஜதீதி ந யுஜ்ஜதி. தமேவ அயுஜ்ஜமானதம் த³ஸ்ஸேதும் ‘‘சக்கு²ஸ்ஸ உப்பாதோ³பீ’’திஆதி³ வுத்தம். யஸ்மா அத்தவாதீ³ அத்தானம் நிச்சம் பஞ்ஞபேதி, சக்கு²ம் பன அனிச்சம், தஸ்மா சக்கு² விய அத்தாபி அனிச்சோ ஆபன்னோ. தேனாஹ ‘‘யஸ்ஸ கோ² பனா’’திஆதி³. தத்த² வேதீதி விக³ச்ச²தி நிருஜ்ஜ²தி. இதி சக்கு² அனத்தாதி சக்கு²ஸ்ஸ உத³யப்³ப³யவந்ததாய அனிச்சதா, அத்தனோ ச அத்தவாதி³னா அனிச்சதாய அனிச்சி²தத்தா சக்கு² அனத்தா.

காமம் அனத்தலக்க²ணஸுத்தே (ஸம். நி. 3.59; மஹாவ. 20) – ‘‘யஸ்மா ச கோ², பி⁴க்க²வே, ரூபம் அனத்தா, தஸ்மா ரூபம் ஆபா³தா⁴ய ஸம்வத்ததீ’’தி ரூபஸ்ஸ அனத்ததாய து³க்க²தா விபா⁴விதா விய தி³ஸ்ஸதி, ததா²பி ‘‘யஸ்மா ரூபம் ஆபா³தா⁴ய ஸம்வத்ததி, தஸ்மா அனத்தா’’தி பாகடதாய ஸாபா³த⁴தாய ரூபஸ்ஸ அத்தஸாராபா⁴வோ விபா⁴விதோ, ததோ ஏவ ச ‘‘ந லப்³ப⁴தி ரூபே ஏவம் மே ரூபம் ஹோது, ஏவம் மே ரூபம் மா அஹோஸீ’’தி ரூபே கஸ்ஸசி அனிஸ்ஸரதா, தஸ்ஸ ச அவஸவத்தனாகாரோ த³ஸ்ஸிதோதி ஆஹ ‘‘து³க்க²வஸேன அனத்ததம் த³ஸ்ஸேதீ’’தி. யத³னிச்சம் தம் து³க்க²ந்தி யம் வத்து² அனிச்சம், தம் து³க்க²ம் உத³யப்³ப³யபடிபீளிதத்தா, யம் பன நிச்சம் தத³பா⁴வதோ, தம் ஸுக²ம் யதா² தம் நிப்³பா³னந்தி அதி⁴ப்பாயோ. யம் தந்தி காரணனித்³தே³ஸோவாயம், யஸ்மா ரூபம் அனிச்சம், தம் தஸ்மாதி அத்தோ². யம் து³க்க²ம் தத³னத்தாதி ஏத்த² வுத்தனயேனேவ அத்தோ² வேதி³தப்³போ³. அனிச்சந்தி இமினா க⁴டாதி³ விய பச்சயுப்பன்னத்தா ரூபம் அனிச்சந்தி இமமத்த²ம் த³ஸ்ஸேதி. இமினாவ நயேன ‘‘அனத்தா’’தி வத்தும் லப்³ப⁴மானேபி ‘‘அனத்தா’’தி வத்தா நாம நத்தி². ஏவம் து³க்க²ந்தி வத³ந்தீதி ஏத்தா²பி யதா²ரஹம் வத்தப்³ப³ம் ‘‘அக்கி²ஸூலாதி³விகாரப்பத்தகாலே விய பச்சயுப்பன்னத்தா து³க்க²ம் ரூப’’ந்திஆதி³னா. து³த்³த³ஸம் து³ப்பஞ்ஞாபனம். ததா² ஹி ஸரப⁴ங்கா³த³யோபி ஸத்தா²ரோ நாத்³த³ஸம்ஸு, குதோ பஞ்ஞாபனா. தயித³ம் அனத்தலக்க²ணம்.

தஸ்மாதிஹாதிஆதி³னா தியத்³த⁴க³தரூபம் லக்க²ணத்தயம் ஆரோபேத்வா வுத்தந்தி ஆஹ ‘‘ஏதரஹி அஞ்ஞதா³பீ’’தி. தம் பன யாதி³ஸம் தாதி³ஸம்பி ததா² வுத்தந்தி அஜ்ஜ²த்தாதி³விஸேஸோபி வத்தப்³போ³. பி-ஸத்³தே³ன வா தஸ்ஸாபி ஸங்க³ஹோ த³ட்ட²ப்³போ³.

245. உக்கண்ட²தீதி நாபி⁴ரமதி. அஞ்ஞத்த² ‘‘நிப்³பி³தா³’’தி ப³லவவிபஸ்ஸனா வுச்சதி, ஸானுலோமா பன ஸங்கா²ருபேக்கா² ‘‘வுட்டா²னகா³மினீ’’தி, ஸா இத⁴ கத²ம் நிப்³பி³தா³ நாம ஜாதாதி ஆஹ ‘‘வுட்டா²னகா³மினிவிபஸ்ஸனாய ஹீ’’திஆதி³. இமினா ஸிகா²பத்தனிப்³பே³த³தாய வுட்டா²னகா³மினீ இத⁴ நிப்³பி³தா³னாமேன வுத்தாதி த³ஸ்ஸேதி.

‘‘ஸோ அனுபுப்³பே³ன ஸஞ்ஞக்³க³ம் பு²ஸதீ’’தி (தீ³. நி. 1.414, 415) வத்வா ‘‘ஸஞ்ஞா கோ² போட்ட²பாத³ பட²மம் உப்பஜ்ஜதி, பச்சா² ஞாண’’ந்தி (தீ³. நி. 1.416) வுத்தத்தா ஸஞ்ஞக்³க³ந்தி வுத்தா லோகியாஸு பஹானஸஞ்ஞாஸு ஸிகா²பத்தபா⁴வதோ. த⁴ம்மட்டி²திஞாணந்தி வுத்தா இத³ப்பச்சயதாத³ஸ்ஸனஸ்ஸ மத்த²கப்பத்தீதி கத்வா. ததோ பரஞ்ஹி அஸங்க²தாரம்மணம் ஞாணம் ஹோதி. தேனாஹ – ‘‘புப்³பே³ கோ² ஸுஸிம த⁴ம்மட்டி²திஞாணம், பச்சா² நிப்³பா³னே ஞாண’’ந்தி (ஸம். நி. 2.70). பாரிஸுத்³தி⁴பதா⁴னியங்க³ந்தி வுத்தா மக்³கா³தி⁴க³மஸ்ஸ பரிபந்த²பூ⁴தஸப்³ப³ஸம்கிலேஸவிஸுத்³தி⁴ பதா⁴னிகஸ்ஸ யோகி³னோ, பதா⁴னபா⁴வனாய வா ஜாதம் அங்க³ந்தி கத்வா. படிபதா³ஞாணத³ஸ்ஸனவிஸுத்³தீ⁴தி வுத்தா பரமுக்கம்ஸக³தபடிபதா³ஞாணத³ஸ்ஸனவிஸுத்³தி⁴பா⁴வதோ. அதம்மயதந்தி ஏத்த² தம்மயதா நாம தண்ஹா, காமதண்ஹாதீ³ஸு தாய தாய நிப்³ப³த்தத்தா தம்மயம் நாம தேபூ⁴மிகப்பவத்தம், தஸ்ஸ பா⁴வோதி கத்வா. தஸ்ஸா தண்ஹாய பரியாதா³னதோ வுட்டா²னகா³மினிவிபஸ்ஸனா அதம்மயதாதி வுச்சதி. நிஸ்ஸாயாதி தம் அதம்மயதம் பச்சயம் கத்வா. ஆக³ம்மாதி தஸ்ஸேவ வேவசனம். நானத்தாதி நானாஸபா⁴வா ப³ஹூ அனேகப்பகாரா. நானத்தஸிதாதி நானாரம்மணனிஸ்ஸிதா ரூபாதி³விஸயா. ஏகத்தாதி ஏகஸபா⁴வா. ஏகத்தஸிதாதி ஏகம்யேவ ஆரம்மணம் நிஸ்ஸிதா. தம் நிஸ்ஸாயாதி தம் ஏகத்தஸிதம் உபேக்க²ம் பச்சயம் கத்வா. ஏதிஸ்ஸாதி ஏதிஸ்ஸா உபேக்கா²ய. பஹானம் ஹோதீதி அஞ்ஞாணுபேக்க²தோ பபு⁴தி ஸப்³ப³ம் உபேக்க²ம் பஜஹித்வா டி²தஸ்ஸ ‘‘அதம்மயதா’’தி வுத்தாய வுட்டா²னகா³மினிவிபஸ்ஸனாய அரூபாவசரஸமாபத்திஉபேக்கா²ய விபஸ்ஸனுபேக்கா²ய ச பஹானம் ஹோதீதி பரியாதா³னந்தி வுத்தாதி. ஸப்³ப³ஸங்கா²ரக³தஸ்ஸ முஞ்சிதுகம்யதாபடிஸங்கா²னஸ்ஸ ஸிகா²பத்தபா⁴வதோ வுட்டா²னகா³மினீ முஞ்சிதுகம்யதா படிஸங்கா²னந்தி ச வுத்தா. முது³மஜ்ஜா²தி³வஸேன பவத்திஆகாரமத்தம், அத்த²தோ ஏகத்தா² முஞ்சிதுகம்யதாத³யோ, ப்³யஞ்ஜனமேவ நானம். த்³வீஹி நாமேஹீதி கோ³த்ரபு⁴, வோதா³னந்தி இமேஹி த்³வீஹி நாமேஹி.

விராகோ³தி மக்³கோ³, அச்சந்தமேவ விரஜ்ஜதி ஏதேனாதி விராகோ³, தேன. மக்³கே³ன ஹேதுபூ⁴தேன. விமுச்சதீதி படிப்பஸ்ஸத்³தி⁴விமுத்திவஸேன விமுச்சதி. தேனாஹ ‘‘ப²லம் கதி²த’’ந்தி.

மஹாகீ²ணாஸவோதி பஸம்ஸாவசனம் யதா² ‘‘மஹாராஜா’’தி. ததா² ஹி தம் பஸம்ஸந்தோ ஸத்தா² ‘‘அயம் வுச்சதி, பி⁴க்க²வே, பி⁴க்கு² உக்கி²த்தபலிகோ⁴ இதிபீ’’திஆதி³மாஹாதி. தத³த்த²ம் விவரிதும் ‘‘இதா³னி தஸ்ஸா’’திஆதி³ வுத்தம். யதா²பூ⁴தேஹீதி யாதா²வதோ பூ⁴தேஹி. து³ருக்கி²பனட்டே²னாதி பசுரஜனேஹி உக்கி²பிதும் அஸக்குணேய்யபா⁴வேன. நிப்³பா³னனக³ரப்பவேஸே விப³ந்த⁴னேன பலிகோ⁴ வியாதி பலிகோ⁴தி வுச்சதி. மத்த²கச்சி²ன்னோ தாலோ பத்தப²லாதீ³னம் அனங்க³தோ தாலாவத்து² அஸிவே ‘‘ஸிவா’’தி ஸமஞ்ஞா விய. தேனாஹ ‘‘ஸீஸச்சி²ன்னதாலோ விய கதா’’தி. புனப்³ப⁴வஸ்ஸ கரணஸீலோ, புனப்³ப⁴வம் வா ப²லம் அரஹதீதி போனோப⁴விகோ. ஏவம்பூ⁴தோ பன புனப்³ப⁴வம் தே³தி நாமாதி ஆஹ ‘‘புனப்³ப⁴வதா³யகோ’’தி. புனப்³ப⁴வக²ந்தா⁴னம் பச்சயோதி இமினா ஜாதிஸம்ஸாரோதி ப²லூபசாரேன காரணம் வுத்தந்தி த³ஸ்ஸேதி. பரிக்கா²தி வுச்சதி ஸந்தானஸ்ஸ பரிக்கி²பனதோ. ஸம்கிண்ணத்தாதி ஸப்³ப³ஸோ கிண்ணத்தா வினாஸிதத்தா. க³ப்³பீ⁴ரானுக³தட்டே²னாதி க³ம்பீ⁴ரம் அனுபவிட்ட²ட்டே²ன. லுஞ்சித்வாதி உத்³த⁴ரித்வா. ஏதானீதி காமராக³ஸஞ்ஞோஜனாதீ³னி. அக்³க³ளாதி வுச்சந்தி அவதா⁴ரணட்டே²ன. அக்³க³மக்³கே³ன பதிதோ மானத்³த⁴ஜோ ஏதஸ்ஸாதி பதிதமானத்³த⁴ஜோ. இதரபா⁴ரோரோபனஸ்ஸ புரிமபதே³ஹி பகாஸிதத்தா ‘‘மானபா⁴ரஸ்ஸேவ ஓரோபிதத்தா பன்னபா⁴ரோதி அதி⁴ப்பேதோ’’தி வுத்தம். மானஸம்யோகே³னேவ விஸம்யுத்தத்தாதி ஏத்தா²பி ஏஸேவ நயோ. பஞ்சபி க²ந்தே⁴ அவிஸேஸதோ அஸ்மீதி க³ஹேத்வா பவத்தமானோ ‘‘அஸ்மிமானோ’’தி அதி⁴ப்பேதோதி வுத்தம் ‘‘ரூபே அஸ்மீதி மானோ’’திஆதி³.

நக³ரத்³வாரஸ்ஸ பரிஸ்ஸயபடிபா³ஹனத்த²ஞ்சேவ ஸோப⁴னத்த²ஞ்ச உபோ⁴ஸு பஸ்ஸேஸு ஏஸிகத்த²ம்பே⁴ நிக²ணித்வா ட²பேந்தீதி ஆஹ ‘‘நக³ரத்³வாரே உஸ்ஸாபிதே ஏஸிகத்த²ம்பே⁴’’தி. பாகாரவித்³த⁴ம்ஸனேனேவ பரிக்கா²ய பூ⁴மிஸமகரணம் ஹோதீதி ஆஹ ‘‘பாகாரம் பி⁴ந்த³ந்தோ பரிக்க²ம் ஸம்கிரித்வா’’தி. ஏவந்திஆதி³ உபமாஸம்ஸந்த³னம். ஸந்தோ ஸம்விஜ்ஜமானோ காயோ த⁴ம்மஸமூஹோதி ஸக்காயோ, உபாதா³னக்க²ந்த⁴பஞ்சகம். த்³வத்திம்ஸ கம்மகாரணா து³க்க²க்க²ந்தே⁴ ஆக³தா. அக்கி²ரோக³ஸீஸரோகா³த³யோ அட்ட²னவுதி ரோகா³. ராஜப⁴யாதீ³னி பஞ்சவீஸதி மஹாப⁴யானி.

246. அனதி⁴க³மனீயவிஞ்ஞாணதந்தி ‘‘இத³ம் நாம நிஸ்ஸாய இமினா நாம ஆகாரேன பவத்ததீ’’தி ஏவம் து³விஞ்ஞேய்யசித்ததம். அன்வேஸந்தி பச்சத்தே ஏகவசனந்தி ஆஹ ‘‘அன்வேஸந்தோ’’தி. ஸத்தோபி ததா²க³தோதி வுச்சதி ‘‘ததா²க³தோ பரம் மரணா’’திஆதீ³ஸு (தீ³. நி. 1.65) விய. ஸத்தோ ஹி யதே²கோ கம்மகிலேஸேஹி இத்த²த்தம் ஆக³தோ, ததா² அபரோபி ஆக³தோதி ‘‘ததா²க³தோ’’தி வுச்சதி. உத்தமபுக்³க³லோதி ப⁴க³வந்தம் ஸந்தா⁴ய வத³தி. கீ²ணாஸவோபீதி யோ கோசி கீ²ணாஸவோபி ‘‘ததா²க³தோ’’தி அதி⁴ப்பேதோ. ஸோபி ஹி யதே²கோ சதூஸு ஸதிபட்டா²னேஸு ஸூபட்டி²தசித்தோ ஸத்த போ³ஜ்ஜ²ங்கே³ யதா²பூ⁴தம் பா⁴வேத்வா அனுத்தரம் அரஹத்தம் ஆக³தோ அதி⁴க³தோ, ததா² அபரோபி ஆக³தோதி ‘‘ததா²க³தோ’’தி வுச்சதி. அஸம்விஜ்ஜமானோதி பரமத்த²தோ அனுபலப்³ப⁴னீயோ. அவிந்தே³ய்யோதி ந விந்தி³தப்³போ³, து³விஞ்ஞேய்யோதி அத்தோ².

ததா²க³தோ ஸத்தோ புக்³க³லோதி ந பஞ்ஞபேமி பரமத்த²தோ ஸத்தஸ்ஸேவ அபா⁴வதோதி அதி⁴ப்பாயோ. கிம் பஞ்ஞபேஸ்ஸாமி பஞ்ஞத்திஉபாதா³னஸ்ஸபி த⁴ரமானகஸ்ஸ அபா⁴வதோ. ‘‘அனுப்பாதோ³ கே²மம், அனுப்பத்தி கே²ம’’ந்திஆதி³னா அஸங்க²தாய தா⁴துயா பக்க²ந்த⁴னவஸேன பவத்தம் அக்³க³ப²லஸமாபத்திஅத்த²ம் விபஸ்ஸனாசித்தம் வா.

துச்சா²தி கரணே நிஸ்ஸக்கவசனந்தி ஆஹ ‘‘துச்ச²கேனா’’தி. வினயதீதி வினயோ, ஸோ ஏவ வேனயிகோ. ததா² மந்தி ததா²பூ⁴தம் மம். பரமத்த²தோ விஜ்ஜமானஸ்ஸ ஹி ஸத்தஸ்ஸ அபா⁴வம் வத³ந்தோ ஸத்தவினாஸபஞ்ஞாபகோ ச நாம ஸியா, அஹம் பன பரமத்த²தோ அவிஜ்ஜமானம் தம் ‘‘நத்தீ²’’தி வதா³மி. யதா² ச லோகோ வோஹரதி, ததே²வ தம் வோஹராமி, ததா²பூ⁴தம் மம் யே ஸமணப்³ராஹ்மணா ‘‘வேனயிகோ ஸமணோ கோ³தமோ’’தி வத³ந்தா அஸதா துச்சா² முஸா அபூ⁴தேன அப்³பா⁴சிக்க²ந்தீதி யோஜனா. அப்படிஸந்தி⁴கஸ்ஸ கீ²ணாஸவஸ்ஸ சரிமசித்தம் நிருபாதா³னதோ அனுபாதா³னோ விய ஜாதவேதோ³ பரினிப்³பு³தம் இத³ம் நாம நிஸ்ஸிதந்தி ந பஞ்ஞாயதீதி வத³ந்தோ கிமேத்தாவதா உச்சே²த³வாதீ³ ப⁴வேய்ய, நாஹம் கதா³சிபி அத்தி², நாபி கோசி அத்தீ²தி வதா³மி. ஏவம் ஸந்தே கிம் நிஸ்ஸாய தே மோக⁴புரிஸா ஸதோ ஸத்தஸ்ஸ நாம உச்சே²த³ம் வினாஸம் விப⁴வம் பஞ்ஞபேதீதி வத³ந்தா அஸதா…பே… அப்³பா⁴சிக்க²ந்தீதி அயமேத்த² அதி⁴ப்பாயோ.

மஹாபோ³தி⁴மண்ட³ம்ஹீதி போ³தி⁴மண்ட³க்³க³ஹணேன ஸத்தஸத்தாஹமாஹ. தேன த⁴ம்மசக்கபவத்தனதோ (ஸம். நி. 5.1081; மஹாவ. 13; படி. ம. 2.30) புப்³பே³ வுத்தம் தந்திதே³ஸனம் வத³தி. சதுஸச்சமேவ பஞ்ஞபேமீதி ஏதேன ஸச்சவிமுத்தா ஸத்து²தே³ஸனா நத்தீ²தி த³ஸ்ஸேதி. ஏத்த² ச – ‘‘புப்³பே³ சேவ ஏதரஹி ச து³க்க²ஞ்சேவ பஞ்ஞபேமி து³க்க²ஸ்ஸ ச நிரோத⁴’’ந்தி வத³ந்தோ ப⁴க³வா நாஹம் கதா³சிபி ‘‘அத்தா உச்சி²ஜ்ஜதி, வினஸ்ஸதீ’’தி வா, ‘‘அத்தா நாம கோசி அத்தீ²’’தி வா வதா³மி. ஏவம் ஸந்தே கிம் நிஸ்ஸாய தே மோக⁴புரிஸா ‘‘ஸதோ ஸத்தஸ்ஸ உச்சே²த³ம் வினாஸம் விப⁴வம் பஞ்ஞபேதீ’’தி அஸதா துச்சே²ன அப்³பா⁴சிக்க²ந்தீதி த³ஸ்ஸேதி. பரேதி அமாமகா, மம ஓவாத³ஸ்ஸ அபா⁴ஜனபூ⁴தாதி அத்தோ²தி ஆஹ ‘‘ஸச்சானி…பே… அஸமத்த²புக்³க³லா’’தி. அதி⁴ப்பாயேனாதி இமினா தேஸம் அதி⁴ப்பாயமத்தம், ரோஸனவிஹேஸனானி பன ததா²க³தஸ்ஸ ஆகாஸஸ்ஸ விலிக²னம் விய ந ஸம்ப⁴வந்தியேவாதி த³ஸ்ஸேதி. ஆஹனதி சித்தந்தி ஆகா⁴தோ. அப்பதீதா ஹோந்தி ஏதேனாதி அப்பச்சயோ. சித்தம் ந அபி⁴ராத⁴யதீதி அனபி⁴ரத்³தி⁴. அதுட்டீ²தி துட்டி²படிபக்கோ² ததா²பவத்தோ சித்துப்பாதோ³, கோதோ⁴ ஏவ வா.

பரேதி அஞ்ஞே ஏகச்சே. ஆனந்த³ந்தி பமோத³ந்தி ஏதேனாதி ஆனந்தோ³, பீதியா ஏவேதம் அதி⁴வசனம். ஸோப⁴னமனதா ஸோமனஸ்ஸம், சேதஸிகஸுக²ஸ்ஸேதம் அதி⁴வசனம். உப்பிலதி புரிமாவத்தா²ய பி⁴ஜ்ஜதி விஸேஸம் ஆபஜ்ஜதீதி உப்பிலம், ததே³வ உப்பிலாவிதம், தஸ்ஸ பா⁴வோ உப்பிலாவிதத்தம். யாய உப்பன்னாய காயசித்தம் வாதபூரிதப⁴த்தா விய உத்³து⁴மாயனாகாரப்பத்தம் ஹோதி, தஸ்ஸா கே³ஹஸ்ஸிதாய ஓத³க்³கி³யபீதியா ஏதம் அதி⁴வசனம். ஸச்சானி படிவிஜ்ஜி²தும் அஸமத்தா²தி து³க்க²மேவ உப்பஜ்ஜதி நிருஜ்ஜ²தி ச, ந அஞ்ஞோ ஸத்தோ நாம அத்தீ²தி ஏவம் ஜானிதும் அஸமத்தா² ‘‘அத்தா நாம அத்தீ²’’தி ஏவம்தி³ட்டி²னோ அப்பஹீனவிபல்லாஸா. உத்தமம் பஸாத³னீயட்டா²னம் ததா²க³தம்பி அக்கோஸந்தி, கிமங்க³ம் பன பி⁴க்கூ²தி அதி⁴ப்பாயோ.

247. அனத்தனியேபி க²ந்த⁴பஞ்சகே மிச்சா²கா³ஹவஸேன அத்தனியஸஞ்ஞாய பவத்தஸ்ஸ ச²ந்த³ராக³ஸ்ஸ பஹானம். அம்ஹாகம் நேவ அத்தாதி யஸ்மா ரூபவேத³னாதி³யேவ அத்தக்³கா³ஹவத்து² தப்³பி³னிமுத்தஸ்ஸ லோப⁴னேய்யஸ்ஸ அபா⁴வதோ. ஏதம் திணகட்ட²ஸாகா²பலாஸம் ந அம்ஹாகம் ரூபம், ந விஞ்ஞாணம், தஸ்மா அம்ஹாகம் நேவ அத்தாதி யோஜனா. அஜ்ஜ²த்திகஸ்ஸ வத்து²னோ நேவ அத்தாதி படிக்கி²த்தத்தா பா³ஹிரவத்து² அத்தனியபா⁴வேன படிக்கி²த்தம் ஹோதீதி ஆஹ ‘‘அம்ஹாகம் சீவராதி³பரிக்கா²ரோபி ந ஹோதீ’’தி. க²ந்த⁴பஞ்சகம்யேவாதி பா³ஹிரவத்து²ம் நித³ஸ்ஸனம் கத்வா க²ந்த⁴பஞ்சகம்யேவ ந தும்ஹாகந்தி பஜஹாபேதி. ந உப்பாடேத்வா கந்த³ம் விய. ந லுஞ்சித்வா வா கேஸே வியாதி. இமினா ரூபாதீ³னம் நாமமுகே²ன பஹானம் இச்ச²ந்தி. உல்லிங்கி³தமத்த²ம் ச²ந்த³ராக³வினயேன பஜஹாபேதீதி ஸரூபதோ த³ஸ்ஸேதி.

248. ‘‘தம் கிம் மஞ்ஞத², பி⁴க்க²வே, ரூபம் நிச்சம் வா’’திஆதி³ தே³ஸனா திபரிவட்டம். யாவ இமம் டா²னந்தி ‘‘ஏவம் ஸ்வாக்கா²தோ’’தி யாவாயம் பாளிபதே³ஸோ. ஸுவிஞ்ஞேய்யபா⁴வேன அக்கா²தத்தாபி ஸ்வாக்கா²தோதி ஆஹ ‘‘ஸுகதி²தத்தா ஏவ உத்தானோ விவடோ பகாஸிதோ’’தி. திரியம் விதா³ரணேன சி²ன்னம், தீ³க⁴ஸோ பா²லனேன பி⁴ன்னம், ததோ ஏவ தத்த² தத்த² ஸிப்³பி³தக³ண்டி²கதஜிண்ணவத்த²ம் பிலோதிகா, தத³பா⁴வதோ சி²ன்னபிலோதிகோ, பிலோதிகரஹிதோதி அத்தோ². இரியாபத²-ஸண்ட²பனஅவிஜ்ஜமானஜா²ன-விபஸ்ஸனானி சி²ன்னாய அவிஜ்ஜமானாய படிபத்தியா ஸிப்³ப³னக³ண்டி²கரணஸதி³ஸானி, தாதி³ஸம் இத⁴ நத்தீ²தி ஆஹ ‘‘ந ஹேத்த²…பே… அத்தீ²’’தி. பதிட்டா²தும் ந லப⁴தீதி பேஸலேஹி ஸத்³தி⁴ம் ஸம்வாஸவஸேனபி பதிட்டா²தும் ந லப⁴தி, விஸேஸாதி⁴க³மவஸேன பன வத்தப்³ப³மேவ நத்தி².

காரண்ட³வம் நித்³த⁴மதா²தி விபன்னஸீலதாய கசவரபூ⁴தம் புக்³க³லம் கசவரமிவ நிரபேக்கா² அபனேத². கஸம்பு³ஞ்சாபகஸ்ஸதா²தி கஸடபூ⁴தஞ்ச நம் க²த்தியாதீ³னம் மஜ்ஜ²க³தம் ஸம்பி⁴ன்னம் பக்³க⁴ரிதகுட்ட²ம் சண்டா³லம் விய அபகஸ்ஸத² நிக்கட்³ட⁴த². கிம் காரணம்? ஸங்கா⁴ராமோ நாம ஸீலவந்தானம் கதோ, ந து³ஸ்ஸீலானம், யதோ ஏததே³வ. ததோ பலாபே வாஹேத², அஸ்ஸமணே ஸமணமானினேதி யதா² பலாபா அந்தோஸாரரஹிதா அதண்டு³லா ப³ஹி து²ஸேன வீஹி விய தி³ஸ்ஸந்தி, ஏவம் பாபபி⁴க்கூ² அந்தோஸீலரஹிதாபி ப³ஹி காஸாவாதி³பரிக்கா²ரேன பி⁴க்கூ² விய தி³ஸ்ஸந்தி, தஸ்மா ‘‘பலாபா’’தி வுச்சந்தி, தே பலாபே வாஹேத² ஓது⁴னாத² வித⁴மத². பரமத்த²தோ அஸ்ஸமணே வேஸமத்தேன ஸமணமானினே ஏவம் நித்³த⁴மித்வான…பே…பதிஸ்ஸதாதி. தத்த² கப்பயவ்ஹோதி கப்பேத², கரோதா²தி வுத்தம் ஹோதி. பதிஸ்ஸதாதி பதி பதி ஸதா ஸம்பஜானந்தா ஸுட்டு² பஜானந்தா. பதிஸ்ஸதா வா ஸப்பதிஸ்ஸா அஞ்ஞமஞ்ஞம் ஸகா³ரவா. அதே²வம் ஸுத்³தா⁴ ஸுத்³தே⁴ஹி ஸம்வாஸம் கப்பேந்தா தி³ட்டி²ஸீலஸாமஞ்ஞேன ஸமக்³கா³. அனுக்கமேன பரிபாகக³தபஞ்ஞதாய நிபகா. ஸப்³ப³ஸ்ஸேவிமஸ்ஸ து³க்க²வட்டஸ்ஸ அந்தம் கரிஸ்ஸத², பரினிப்³பா³னம் பாபுணிஸ்ஸதா²தி அத்தோ².

வட்டம் தேஸம் நத்தி² பஞ்ஞாபனாய ஸப்³ப³ஸோ ஸமுச்சி²ன்னவட்டமூலகத்தா.

த⁴ம்மம் அனுஸ்ஸரந்தி, த⁴ம்மஸ்ஸ வா அனுஸ்ஸரணஸீலாதி த⁴ம்மானுஸாரினோ. ஏவம் ஸத்³தா⁴னுஸாரினோபி வேதி³தப்³பா³. படிபன்னஸ்ஸாதி படிபஜ்ஜமானஸ்ஸ, ஸோதாபத்திமக்³க³ட்டோ²பி அதி⁴ப்பேதோ. அதி⁴மத்தந்தி ப³லவம். பஞ்ஞாவாஹீதி பஞ்ஞம் வாஹேதி, பஞ்ஞா வா இமம் புக்³க³லம் வஹதீதி பஞ்ஞாவாஹீதிபி வத³ந்தி. பஞ்ஞாபுப்³ப³ங்க³மந்தி பஞ்ஞம் புரேசாரிகம் கத்வா. அயம் வுச்சதீதி அயம் ஏவரூபோ புக்³க³லோ பஞ்ஞாஸங்கா²தேன த⁴ம்மேன ஸரதி அனுஸ்ஸரதீதி த⁴ம்மானுஸாரீ. ஸத்³தா⁴வாஹீதி ஸத்³த⁴ம் வாஹேதி, ஸத்³தா⁴ வா இமம் புக்³க³லம் வஹதீதி ஸத்³தா⁴வாஹீதிபி வத³ந்தி. ஸத்³தா⁴புப்³ப³ங்க³மந்தி ஸத்³த⁴ம் புரேசாரிகம் கத்வா. அயம் வுச்சதீதி அயம் ஏவரூபோ புக்³க³லோ ஸத்³தா⁴ய ஸரதி அனுஸ்ஸரதீதி ஸத்³தா⁴னுஸாரீ. ஸத்³தா⁴மத்தந்தி ‘‘இதிபி ஸோ ப⁴க³வா’’திஆதி³னா பு³த்³த⁴ஸுபு³த்³த⁴தாய ஸத்³த³ஹனமத்தம். மத்த-ஸத்³தே³ன அவேச்சப்பஸாத³ம் நிவத்தேதி. பேமமத்தந்தி யதா²வுத்தஸத்³தா⁴னுஸாரேன உப்பன்னம் துட்டி²மத்தம். ஸினேஹோதி கேசி. ஏவம் விபஸ்ஸனம் பட்ட²பேத்வா நிஸின்னானந்தி கலாபஸம்மஸனாதி³வஸேன ஆரத்³த⁴விபஸ்ஸனானம். ஏகா ஸத்³தா⁴தி விபஸ்ஸனானுஸாரேன ஸ்வாக்கா²தத⁴ம்மதா ஸித்³தா⁴, ததோ ஏவ ஏகா ஸேட்டா² உளாரா ஸத்³தா⁴ உப்பஜ்ஜதி. ஏகம் பேமந்தி ஏத்தா²பி ஏஸேவ நயோ. ஸக்³கே³ ட²பிதா விய ஹோந்தீதி தேஸம் ஸத்³தா⁴பேமானம் ஸக்³க³ஸம்வத்தனியதாய அப்³யபி⁴சாரீபா⁴வமாஹ. சூளஸோதாபன்னோதி வத³ந்தி ஏகதே³ஸேன ஸச்சானுபோ³தே⁴ டி²தத்தா. ஸேஸம் ஸுவிஞ்ஞேய்யமேவ.

அலக³த்³தூ³பமஸுத்தவண்ணனாய லீனத்த²ப்பகாஸனா ஸமத்தா.