1. ககசூபமஸுத்தவண்ணனா

222. மோளிந்தி கேஸரசனம். வேஹாயஸந்தி ஆகாஸே. ரதனசங்கோடவரேனாதி ரதனஸிலாமயவரசங்கோடகேன ஸஹஸ்ஸனேத்தோ ஸிரஸா படிக்³க³ஹி. ‘‘ஸுவண்ணசங்கோடகவரேனா’’திபி (பு³. வம். அட்ட². 23 தூ³ரேனிதா³னகதா²; ஜா. அட்ட². 1.2 அவிதூ³ரேனிதா³னகதா²) பாடோ².

ஸாதி மோளி. மோளி ஏதஸ்ஸ அத்தீ²தி மோளிகோ, மோளிகோ ஏவ மோளியோ. ப²க்³கு³னோதி பன நாமம். ஸங்கா²தி ஸமஞ்ஞா. வேலீயதி க²ணமுஹுத்தாதி³வஸேன உபதி³ஸீயதீதி வேலா, காலோதி ஆஹ ‘‘தாயம் வேலாயம்…பே… அயம் காலவேலா நாமா’’தி. வேலயதி பரிச்சே²த³வஸேன திட்ட²தீதி வேலா, ஸீமா. வேலயதி ஸம்கிலேஸபக்க²ம் சாலயதீதி வேலா, ஸீலம். அனதிக்கமனட்டோ²பி சஸ்ஸ ஸம்கிலேஸத⁴ம்மனிமித்தம் அசலனமேவ. விஞ்ஞுபுரிஸாபா⁴வே ச²பஞ்சவாசாமத்தம் ஓவாதே³ பமாணம் நாம.த³வஸஹக³தம் கத்வாதி கீளாஸஹிதம் கத்வா.

மிஸ்ஸீபூ⁴தோதி அனனுலோமிகஸம்ஸக்³க³வஸேன மிஸ்ஸீபூ⁴தோ. ‘‘அவண்ணம் பா⁴ஸதீ’’தி ஸங்கே²பதோ வுத்தம் விவரிதும் ‘‘தாபனபசனகோட்டனாதீ³னீ’’திஆதி³ வுத்தம். அதி⁴கரணம்பி கரோதீதி ஏத்த² யதா² ஸோ அதி⁴கரணாய பரிஸக்கதி, தம்த³ஸ்ஸனம் ‘‘இமேஸம் பி⁴க்கூ²ன’’ந்திஆதி³. அதி⁴கரணம் ஆகட்³ட⁴தீதி அதி⁴கரணம் உத்³தி³ஸ்ஸ தே பி⁴க்கூ² ஆகட்³ட⁴தி, அதி⁴கரணம் வா தேஸு உப்பாதே³ந்தோ ஆகட்³ட⁴தி. உத்³தே³ஸபத³ம் வாதி பத³ஸோ உத்³தே³ஸமத்தம் வா. நேவ பியகம்யதாயாதி நேவ அத்தனி ஸத்து²னோ பியபா⁴வகாமதாய. ந பே⁴தா³தி⁴ப்பாயேனாதி ந ஸத்து²னோ தேன பி⁴க்கு²னா பே⁴தா³தி⁴ப்பாயேன. அத்த²காமதாயாதி மோளியப²க்³கு³னஸ்ஸ ஹிதகாமதாய.

224. அவண்ணபா⁴ஸனேதி பி⁴க்கு²னீனம் அகு³ணகத²னே. ச²ந்தா³தீ³னம் வத்து²பா⁴வதோ காமகு³ணா கே³ஹம் விய கே³ஹம், தே ச தே ஸிதா நிஸ்ஸிதாதி கே³ஹஸ்ஸிதாதி வுத்தா. தண்ஹாச²ந்தா³பி தாஸம் கத்துகாமதாபீதி உப⁴யேபி தண்ஹாச²ந்தா³, படிக⁴ச²ந்தா³ பன தேஸம் கத்துகாமதா ஏவ. ப²லிகமணி விய பகதிபப⁴ஸ்ஸரஸ்ஸ சித்தஸந்தானஸ்ஸ உபஸங்கோ³ விய விபரிணாமகாரணம் ராகா³த³யோதி ஆஹ ‘‘ரத்தம்பி சித்தம் விபரிணத’’ந்திஆதி³. ஹிதானுகம்பீதி கருணாய பச்சுபட்டா²பனமாஹ. ‘‘யஸ்ஸந்தரதோ ந ஸந்தி கோபா’’திஆதீ³ஸு (உதா³. 20) விய அந்தர-ஸத்³தோ³ சித்தபரியாயோதி ஆஹ ‘‘தோ³ஸந்தரோதி தோ³ஸசித்தோ’’தி.

225. து³ப்³ப³சதாய ஓவாத³ம் அஸம்படிச்ச²ந்தோ சித்தேனேவ படிவிருத்³தோ⁴ அட்டா²ஸி. க³ண்ஹிம்ஸு சித்தம், ஹத³யகா³ஹினிம் படிபஜ்ஜிம்ஸூதி அத்தோ². பூரயிம்ஸு அஜ்ஜா²ஸயந்தி அத்தோ². ஏகஸ்மிம் ஸமயே பட²மபோ³தி⁴யம். ஏகாஸனம் போ⁴ஜனஸ்ஸ ஏகாஸனபோ⁴ஜனம், ஏகவேலாயமேவ போ⁴ஜனம். தஞ்ச கோ² புப்³ப³ண்ஹே ஏவாதி ஆஹ ‘‘ஏகம் புரேப⁴த்தபோ⁴ஜன’’ந்திஆதி³. ஸத்தக்க²த்தும் பு⁴த்தபோ⁴ஜனம்பி இமஸ்மிம் ஸுத்தே ஏகாஸனபோ⁴ஜனந்தேவ அதி⁴ப்பேதம், ந ஏகாஸனிகதாய ஏகாய ஏவ நிஸஜ்ஜாய போ⁴ஜனம். ‘‘அப்பட³ம்ஸ…பே… ஸம்ப²ஸ்ஸ’’ந்திஆதீ³ஸு விய அப்ப-ஸத்³தோ³ அபா⁴வத்தோ²தி ஆஹ ‘‘நிராபா³த⁴தம், நித்³து³க்க²த’’ந்தி. பதா⁴னாதி³வஸேன ஸல்லஹுகம் அகிச்ச²ம் உட்டா²னம் ஸல்லஹுகஉட்டா²னம். ந ஏகப்பஹாரேனாதி ந ஏகவாரேன, ந ஏகஸ்மிம்யேவ காலேதி அதி⁴ப்பாயோ. த்³வே போ⁴ஜனானீதி ‘‘அபரண்ஹே ரத்திய’’ந்தி காலவஸேன த்³வே போ⁴ஜனானி. பஞ்ச கு³ணேதி அப்பாபா³தா⁴தி³கே பஞ்ச ஆனிஸம்ஸே. ஸதுப்பாத³கரணீயமத்தமேவாதி ஸதுப்பாத³மத்தகரணீயமேவ, நிவாரேதப்³ப³ஸ்ஸ புனப்புனம் ஸமாத³பனஞ்ச நாஹோஸி.

மண்ட³பூ⁴மீதி ஓஜவந்தபூ⁴மி, யத்த² பரிஸிஞ்சனேன வினா ஸஸ்ஸானி கிட்டா²னி ஸம்பஜ்ஜந்தி. யுகே³ யோஜேதப்³பா³னி யோக்³கா³னி, தேஸம் ஆசரியோ யோக்³கா³சரியோ, தேஸம் ஸிக்கா²பனகோ. கா³மணிஹத்தி²ஆத³யோபி ‘‘யோக்³கா³’’தி வுச்சந்தீதி ஆஹ பாளியம் ‘‘அஸ்ஸத³ம்மஸாரதீ²’’தி. சதூஸு மக்³கே³ஸு யேன யேன மக்³கே³ன இச்ச²தி. ஜவஸமகா³தி³பே⁴தா³ஸு க³தீஸு யம் யம் க³திம். தம் தம் மக்³க³ம் ஆருள்ஹாவ ஓதிண்ணாயேவ. நேவ வாரேதப்³பா³ ரஸ்மிவினிக்³க³ண்ஹனேன. ந விஜ்ஜி²தப்³பா³ பதோத³லட்டி²யா. க³மனமேவாதி இமே யுத்தா மம இச்சா²னுரூபம் மந்த³ம் க³ச்ச²ந்தி, ஸமம் க³ச்ச²ந்தி, ஸீக⁴ம் க³ச்ச²ந்தீதி கு²ரேஸு நிமித்தக்³க³ஹணம் பட்ட²பேத்வா ஸாரதி²னா தேஸம் க³மனமேவ பஸ்ஸிதப்³ப³ம் ஹோதி, ந தத்த² நியோஜனம். தேஹிபி பி⁴க்கூ²ஹி. பஜஹிம்ஸு பஜஹிதப்³ப³ம். ஸாலதூ³ஸனாதி ஸாலருக்க²விஸனாஸகா. அஞ்ஞா ச வல்லியோ ஸாலருக்கே² வினந்தி⁴த்வா டி²தா. ப³ஹி நீஹரணேனாதி ஸாலவனதோ ப³ஹி ச²ட்³ட³னேன. ஸுஸண்டி²தாதி ஸண்டா²னஸம்பன்னா, மரியாத³ம் ப³ந்தி⁴த்வாதி ஆலவாலஸம்பாத³னவஸேன மரியாத³ம் ப³ந்தி⁴த்வா. கிபில்லபுடகம் தம்ப³கிபில்லகபுடகம். ஸுக்க²த³ண்ட³கஹரணம் ஆலவாலப்³ப⁴ந்தரா.

226. விதே³ஹரட்டே² ஜாதஸம்வட்³ட⁴தாய வேதே³ஹிகா. பண்டா³ வுச்சதி பஞ்ஞா, தாய இதா க³தா பவத்தாதி பண்டி³தா. க³ஹபதானீதி கே³ஹஸாமினீ. ஸோரச்சேனாதி ஸம்யமேன. நிவாதவுத்தீதி பணிபாதகாரீ. நிப்³பு³தாதி நிப்³பு³தது³ச்சரிதபரிளாஹா. உட்டா²ஹிகாதி உட்டா²னவீரியவதீ. கிப்³பி³ஸாதி குரூரா.

227. ஏவம் அக்க²ந்தியா தோ³ஸம் த³ஸ்ஸேத்வாதி ‘‘கு³ணவந்தோ’’தி லோகே பத்த²டகித்திஸத்³தா³னம்பி அக்க²ந்தினிமித்தம் அயஸுப்பத்திகு³ணபரிஹானிஆதி³ம் அக்க²மதாயஆதீ³னவம் பகாஸேத்வா. வசனபதே²தி வசனமக்³கே³ யுத்தகாலாதி³கே. ஸண்ஹாபா⁴வோபி ஹி வசனஸ்ஸ பவத்திஆகாரோதி கத்வா ‘‘வசனபதோ²’’ த்வேவ வுத்தோ. தேஸம்யேவ காலாதீ³னம். மேத்தா ஏதஸ்ஸ அத்தீ²தி மேத்தம், உப்பன்னம் மேத்தசித்தம் ஏதேஸந்தி உப்பன்னமேத்தசித்தா. புன ‘‘காலேன வா, பி⁴க்க²வே’’திஆதி³ (பரி. 362, 363) பாளி த⁴ம்மஸபா⁴வத³ஸ்ஸனவஸேன பவத்தா ‘‘பரம் சோத³னாவஸேன வத³ந்தா நாம இமேஹி ஆகாரேஹி வத³ந்தீ’’தி. அதி⁴முஞ்சித்வாதி அபி⁴ரதிவஸேன தஸ்மிம் புக்³க³லே பா⁴வனாசித்தம் முஞ்சித்வா விஸ்ஸஜ்ஜேத்வா. ஸோ புக்³க³லோ ஆரம்மணம் ஏதஸ்ஸாதி ததா³ரம்மணம், மேத்தசித்தம். யதி³ ஏவம் பதே³ஸவிஸயம் தம் கத²ம் நிப்பதே³ஸவிஸயம் விய ஹோதீதி சோதே³ந்தோ ‘‘கத²ம் ததா³ரம்மணம் ஸப்³பா³வந்தம் லோகம் கரோதீ’’தி ஆஹ, இதரோ ‘‘பஞ்ச வசனபதே²’’திஆதி³னா பரிஹரதி. இத⁴ ததா³ரம்மணஞ்சாதி தஸ்ஸேவ மேத்தசித்தஸ்ஸ ஆரம்மணம் கத்வாதி பாளியம் வசனஸேஸோ த³ட்ட²ப்³போ³. தேனாஹ ‘‘புன தஸ்ஸேவா’’திஆதி³. ஸப்³பா³ ஸத்தகாயஸங்கா²தா பஜா ஏதஸ்ஸ அத்தீ²தி ஸப்³பா³வந்தோதி இமமத்த²ம் த³ஸ்ஸேந்தோ ‘‘ஸப்³பா³வந்த’’ந்தி ஆஹ. விபுலேனாதி மஹாஜனாரம்மணேன. மஹந்தபரியாயோ ஹி விபுல-ஸத்³தோ³, மஹத்தஞ்சேத்த² ப³ஹுகபா⁴வோ. தேனாஹ ‘‘அனேகஸத்தாரம்மணேனா’’தி. தஞ்ச புக்³க³லந்தி பஞ்ச வசனபதே² க³ஹேத்வா ஆக³தபுக்³க³லம். சித்தஸ்ஸாதி மேத்தாஸஹக³தசித்தஸ்ஸ. ஏத்த² ச மேத்தாஸஹக³தேன சேதஸா விஹரிஸ்ஸாமாதி ஸம்ப³ந்தோ⁴. தத்த² கத²ந்தி ஆஹ ‘‘தஞ்ச புக்³க³லம் ஸப்³ப³ஞ்ச லோகம் தஸ்ஸ சித்தஸ்ஸ ஆரம்மணம் கத்வா அதி⁴முச்சித்வா’’தி.

228. தத³த்த²தீ³பிகந்தி யா மேத்தம் சேதோவிமுத்திம் ஸம்மதே³வ பா⁴வேத்வா டி²தஸ்ஸ நிப்³பி³காரதோ கேனசி விகாரம் ந ஆபாதே³தப்³ப³தா, தத³த்த²ஜோதிகம். அபத²விந்தி பத²வீ ந ஹோதீதி அபத²வீ. நிப்பத²விந்தி ஸப்³பே³ன ஸப்³ப³ம் பத²வீபா⁴வாபா⁴வம். திரியம் பன அபரிச்சி²ன்னாதி கஸ்மா வுத்தம், நனு சக்கவாளபப்³ப³தேஹி தம் தம் சக்கவாளம் பரிச்சி²ந்த³தி? ந, தத³ஞ்ஞசக்கவாளபத²வியா ஏகாப³த்³த⁴பா⁴வதோ. திண்ணஞ்ஹி சக்கானம் அந்தரஸதி³ஸே திண்ணம் திண்ணம் லோகதா⁴தூனம் அந்தரேயேவ பத²வீ நத்தி² லோகந்தரனிரயபா⁴வதோ. சக்கவாளபப்³ப³தந்தரேஹி ஸம்ப³த்³த⁴ட்டா²னே பத²வீ ஏகாப³த்³தா⁴வ. விவட்டகாலே ஹி ஸண்ட²ஹமானாபி பத²வீ யதா²ஸண்டி²தபத²வியா ஏகாப³த்³தா⁴வ ஸண்ட²ஹதி. தேனாஹ ‘‘திரியம் பன அபரிச்சி²ன்னா’’தி. இமினாவ க³ம்பீ⁴ரபா⁴வேன வுத்தபரிமாணதோ பரம் நத்தீ²தி தீ³பிதம் ஹோதி.

229. ஹலித்³தீ³தி ஹலித்³தி³வண்ணம் அதி⁴ப்பேதந்தி ஆஹ ‘‘யம் கிஞ்சி பீதகவண்ண’’ந்தி. வண்ணஸங்கா²தம் ரூபம் அஸ்ஸ அத்தீ²தி ரூபீ, ந ரூபீதி அரூபீதி ஆஹ ‘‘அரூபோ’’தி. தேனேவாஹ ‘‘ஸனித³ஸ்ஸனபா⁴வபடிக்கே²பதோ’’தி.

230. பஞ்ச யோஜனஸதானீதி ஹிமவந்ததோ ஸமுத்³த³ம் பவிட்ட²ட்டா²னவஸேன வுத்தம், ந அனோதத்தத³ஹமுக²தோ. அஞ்ஞா நதி³யோ உபாதா³ய லப்³ப⁴மானம் க³ம்பீ⁴ரதம் அப்பமேய்யஉத³கதஞ்ச க³ஹேத்வா ‘‘க³ம்பீ⁴ரா அப்பமேய்யா’’தி வுத்தம். அட்ட²கதா²யம் பன திணுக்காய தாபேதப்³ப³த்தாபா⁴வத³ஸ்ஸனபரமேதந்தி வுத்தம் ‘‘ஏதேன பயோகே³னா’’திஆதி³.

231. தூலினீ விய தூலினீதி ஆஹ ‘‘ஸிம்ப³லிதூலலதாதூலஸமானா’’தி. ஸஸ்ஸரந்தி ஏவம்பவத்தோ ஸத்³தோ³ ஸஸ்ஸரஸத்³தோ³. அனுரவத³ஸ்ஸனஞ்ஹேதம். ததா² ப⁴ப்³ப⁴ரஸத்³தோ³. ஸப்³ப³மேதம் மேத்தாவிஹாரினோ சித்தஸ்ஸ தூ³ஸேதும் அஸக்குணேய்யபா⁴வத³ஸ்ஸனபரம். அயஞ்ஹேத்த² ஸங்கே²பத்தோ² – யதா² மஹாபத²வீ கேனசி புரிஸேன அபத²விம் காதும் ந ஸக்கா, யதா² ஆகாஸே கிஞ்சி ரூபம் பட்ட²பேதும் ந ஸக்கா, யதா² க³ங்கா³ய உத³கம் திணுக்காய தாபேதும் ந ஸக்கா, யதா² ச பி³ளாரப⁴ஸ்தம் த²த்³த⁴ம் ப²ருஸஞ்ச ஸம்ப²ஸ்ஸம் காதும் ந ஸக்கா, ஏவமேவம் மேத்தாய சேதோவிமுத்தியா ஆஸேவிதாய பா⁴விதாய ப³ஹுலீகதாய பஞ்ச வசனபதே² க³ஹேத்வா ஆக³தபுரிஸேன கேனசி பரியாயேன சித்தஸ்ஸ அஞ்ஞத²த்தம் காதும் ந ஸக்காதி.

232. ஓசரகாதி பரூபகா⁴தவஸேன ஹீனகம்மகாரினோ. தேனாஹ ‘‘நீசகம்மகாரகா’’தி. அனதி⁴வாஸனேனாதி அக்க²மனேன. மய்ஹம் ஓவாத³கரோ ந ஹோதீதி பரம்ஹி அனத்த²காரிம்ஹி சித்தபதோ³ஸனேன ஆகா⁴துப்பாத³னேன மம ஸாஸனே ஸம்மாபடிபஜ்ஜமானோ நாம ந ஹோதி.

233. அணுந்தி அப்பகம் தனு பரித்தகம். தூ²லந்தி மஹந்தம் ஓளாரிகம். வசனபத²ஸ்ஸ பன அதி⁴ப்பேதத்தா தம் ஸாவஜ்ஜவிபா⁴கே³ன க³ஹேதப்³ப³ந்தி ஆஹ ‘‘அப்பஸாவஜ்ஜம் வா மஹாஸாவஜ்ஜம் வா’’தி. க²ந்தியா இத³ம் பா⁴ரியம் ந ஹோதீதி அவோசும் ‘‘அனதி⁴…பே… பஸ்ஸாமா’’தி. தீ³க⁴ரத்தந்தி சிரகாலம், அச்சந்தமேவாதி அத்தோ². அச்சந்தஞ்ச ஹிதஸுக²ம் நாம அஞ்ஞாதி⁴க³மேனேவாதி ஆஹ ‘‘அரஹத்தேன கூடம் க³ண்ஹந்தோ’’தி.

ககசூபமஸுத்தவண்ணனாய லீனத்த²ப்பகாஸனா ஸமத்தா.