8. மது⁴பிண்டி³கஸுத்தவண்ணனா

199. ஜாதிவனந்தி ஸயம்ஜாதம் வனம். தேனாஹ ‘‘அரோபிம’’ந்தி. படிஸல்லானத்தா²யாதி ஏகீபா⁴வத்தா²ய, புது²த்தாரம்மணதோ வா சித்தம் படினிவத்தேத்வா அச்சந்தஸந்தே நிப்³பா³னே ப²லஸமாபத்திவஸேன அல்லீயாபனத்த²ம். த³ண்டோ³ பாணிம்ஹி அஸ்ஸாதி த³ண்ட³பாணி. யதா² ஸோ ‘‘த³ண்ட³பாணீ’’தி வுச்சதி, தம் த³ஸ்ஸேதும் ‘‘அயஞ்ஹீ’’திஆதி³ வுத்தம். த³ண்ட³வித்ததாயாதி த³ண்டே³ ஸோண்ட³தாய. ஸோ ஹி த³ண்ட³பஸுதோ த³ண்ட³ஸிப்பே ச ஸுகுஸலோ தத்த² பாகடோ பஞ்ஞாதோ, தஸ்மா த³ண்ட³ம் க³ஹேத்வாவ விசரதி. ஜங்கா⁴கிலமத²வினோத³னத்த²ந்தி ராஜஸபா⁴ய சிரனிஸஜ்ஜாய உப்பன்னஜங்கா⁴பரிஸ்ஸமஸ்ஸ அபனயனத்த²ம். அதி⁴ச்சனிக்க²மனோதி யாதி³ச்ச²கனிக்க²மனோ, ந அபி⁴ண்ஹனிக்க²மனோ. ஓலுப்³பா⁴தி ஸன்னிரும்பி⁴த்வா டி²தோ. யதா² ஸோ ‘‘ஓலுப்³பா⁴’’தி வுத்தோ, தம் த³ஸ்ஸேதும் ‘‘கோ³பாலகதா³ரகோ வியா’’திஆதி³ வுத்தம்.

200. வத³ந்தி ஏதேனாதி வாதோ³, தி³ட்டீ²தி ஆஹ ‘‘கிம் வாதீ³தி, கிம் தி³ட்டி²கோ’’தி? கிமக்கா²யீதி கிமாசிக்க²கோ, கீதி³ஸத⁴ம்மகதோ²? அசித்தீகாரேனாதி அனாத³ரேன. ததா²புச்ச²னே காரணம் த³ஸ்ஸேந்தோ ‘‘கஸ்மா’’திஆதி³மாஹ. நஸ்ஸதேதந்தி நஸ்ஸது ஏதம் குலம்.

அத்த²ம் ந ஜானாதீதி அத்த²ம் சே ஏகதே³ஸேன ஜானேய்ய, தம் மிச்சா² க³ஹேத்வா படிப்ப²ரித்வாபி திட்டே²ய்ய. தஸ்ஸ தீ³க⁴ரத்தம் அஹிதாய து³க்கா²யாதி தத³ஸ்ஸ அத்தா²ஜானனம் ப⁴க³வதா இச்சி²தம். விக்³கா³ஹிககத²ந்தி விக்³க³ஹகத²ம், ஸாரம்ப⁴கத²ந்தி அத்தோ². நனு ப⁴க³வதா ஸத்³தி⁴ம் லோகே புதூ² ஸமணப்³ராஹ்மணா நானாவாதா³ ஸந்தீதி சோத³னம் ஸந்தா⁴யாஹ ‘‘ததா²க³தோ ஹீ’’திஆதி³. ந விவத³தி விவாத³ஹேதுகானம் காமதி³ட்டி²ஜ்ஜோ²ஸானானம் மக்³கே³னேவ ஸமுக்³கா⁴திதத்தா, தத³பா⁴வதோ பன லோகோ ததா²க³தேன விவத³தி. த⁴ம்மவாதீ³ யதா²பூ⁴தவாதீ³ த⁴ம்மவாதீ³ஹி ந விவத³தி தேஸம் விவதி³துகாமதாய ஏவ அபா⁴வதோ, அத⁴ம்மவாதீ³ பன திணாயபி நமஞ்ஞமானோ தேஹி கிஞ்சி விவத³தி. தேனாஹ ‘‘ந, பி⁴க்க²வே, த⁴ம்மவாதீ³ கேனசி லோகஸ்மிம் விவத³தீ’’தி (ஸம். நி. 3.94). அத⁴ம்மவாதீ³ பன அஸமுச்சி²ன்னவிவாத³ஹேதுகத்தா விவத³தேவ. ததா² சாஹ ‘‘அத⁴ம்மவாதீ³வ கோ², பி⁴க்க²வே, விவத³தீ’’தி.

யதா² ச பனாதி ஏத்த² யதா²-ஸத்³தோ³ ‘‘யதா² ச அனுப்பன்னஸ்ஸ காமச்ச²ந்த³ஸ்ஸ உப்பாதோ³ ஹோதி, தஞ்ச பஜானாதீ’’திஆதீ³ஸு (அ. நி. 3.122) விய காரணத்தோ²தி ஆஹ ‘‘யேன காரணேனா’’தி. காரணாகாரோ வா இத⁴ யதா²-ஸத்³தே³ன வுத்தோ, ஸோ பன அத்த²தோ காரணமேவாதி வுத்தம் ‘‘யேன காரணேனா’’தி. ‘‘இத³ம் கத²ம் இத³ம் கத²ம்’’தி பவத்தனதோ கத²ம்கதா², விசிகிச்சா². ஸா யஸ்ஸ நத்தி², ஸோ அகத²ம்கதீ², தம் அகத²ம்கதி²ம். விப்படிஸாரகுக்குச்சம் ப⁴க³வதா அனாகா³மிமக்³கே³னேவ சி²ன்னம், ஹத்த²பாத³குக்குச்சம் அக்³க³மக்³கே³ன ஆவேணிகத⁴ம்மாதி⁴க³மதோ. அபராபரம் உப்பஜ்ஜனகப⁴வோ ‘‘ப⁴வாப⁴வோ’’தி இதா⁴தி⁴ப்பேதோதி ஆஹ ‘‘புனப்புனப்³ப⁴வே’’தி. ஸம்வராஸம்வரோ ப²லாப²லம் விய கு²த்³த³கமஹந்தோ ப⁴வோ ‘‘ப⁴வாப⁴வோ’’தி வுத்தோதி ஆஹ ‘‘ஹீனபணீதே வா ப⁴வே’’தி. ப⁴வோ வுட்³டி⁴ப்பத்தோ ‘‘அப⁴வோ’’தி வுச்சதி யதா² ‘‘அஸேக்கா² த⁴ம்மா’’தி (த⁴. ஸ. 11.திகமாதிகா). கிலேஸஸஞ்ஞாதி காமஸஞ்ஞாதி³கே வத³தி. கிலேஸா ஏவ வா ஸஞ்ஞானாமேன வுத்தா ‘‘ஸஞ்ஞா பஹாய அமதம் ஏவ பாபுணாதீ’’திஆதீ³ஸு விய. அத்தனோ கீ²ணாஸவபா⁴வம் தீ³பேதீதி இமினாவ பரேஸஞ்ச தத²த்தாய த⁴ம்மம் தே³ஸேதீதி அயம்பி அத்தோ² விபா⁴விதோதி த³ட்ட²ப்³ப³ம். நீஹரித்வா கீளாபேத்வாதி நீஹரித்வா சேவ கீளாபேத்வா ச, நீஹரணவஸேன வா கீளாபேத்வா. திவிஸாக²ந்தி திப⁴ங்க³பா⁴குடி விய நலாடே ஜாதத்தா நலாடிகம்.

201. கிந்தி நு கோ²தி கிம் காரணேனாதி அத்தோ². அனுஸந்தி⁴ம் க³ஹேத்வாதி புச்சா²னுஸந்தி⁴ம் உட்ட²பேத்வா. யதோனிதா³னந்தி யம்னிதா³னம், யம்காரணாதி வுத்தம் ஹோதி. புரிமபதே³ ஹி விப⁴த்தி அலோபம் கத்வா நித்³தே³ஸோ, ச²அஜ்ஜ²த்திகபா³ஹிராயதனாதி³னிதா³னந்தி அயமேவ அத்தோ². ஸங்கா²யந்தி ஸங்கா²பா⁴வேன ஞாயந்தீதி ஸங்கா²தி ஆஹ ‘‘ஸங்கா²தி கோட்டா²ஸா’’தி. காமஞ்சேத்த² மானோபி பபஞ்சோ, அபி⁴னந்த³னஸபா⁴வே ஏவ பன க³ண்ஹந்தோ ‘‘தண்ஹாமானதி³ட்டி²பபஞ்சஸம்பயுத்தா’’தி ஆஹ. ததா² ஹி வக்க²தி ‘‘அபி⁴னந்தி³தப்³ப³’’ந்திஆதி³. ஸமுதா³சரந்தீதி ஸப்³ப³ஸோ உத்³த⁴ம் உத்³த⁴ம் பரியாதா³ய பவத்தந்தி. மரியாத³த்தோ² ஹி அயமாகாரோ, தேன ச யோகே³ன புரிஸந்தி உபயோக³வசனம் யதா² ‘‘ததா²க³தம், பி⁴க்க²வே, அரஹந்தம் ஸம்மாஸம்பு³த்³த⁴ம் த்³வே விதக்கா ஸமுதா³சரந்தீ’’தி (இதிவு. 38). தண்ஹாத³யோ ச யதா²ஸகம் பவத்திஆகாரம் அவிலங்க⁴ந்தியோ ஆஸேவனவஸேன உபரூபரி பவத்தந்தி. ததா² ஹி தா ‘‘பபஞ்சஸங்கா²’’தி வுத்தா.

காரணேதி பவத்திபச்சயே. ஏகாயதனம்பி …பே… நத்தீ²தி சக்கா²யதனாதி³ ஏகம்பி ஆயதனம் அபி⁴னந்தி³தப்³ப³ம் அபி⁴வதி³தப்³ப³ம் அஜ்ஜோ²ஸிதப்³ப³ஞ்ச நத்தி² சே, நனு நத்தி² ஏவ, கஸ்மா ‘‘நத்தி² சே’’தி வுத்தந்தி? ஸச்சம் நத்தி², அப்பஹீனாபி⁴னந்த³னாபி⁴வத³னஅஜ்ஜோ²ஸானானம் பன புது²ஜ்ஜனானம் அபி⁴னந்தி³தப்³பா³தி³ப்பகாரானி ஆயதனானி ஹோந்தீதி தேஸம் ந ஸக்கா நத்தீ²தி வத்து, பஹீனாபி⁴னந்த³னாதீ³னம் பன ஸப்³ப³தா² நத்தீ²தி ‘‘நத்தி² சே’’தி வுத்தம். அஹம் மமந்தி அபி⁴னந்தி³தப்³ப³ந்தி தி³ட்டா²பி⁴னந்த³னாய ‘‘அஹ’’ந்தி தண்ஹாபி⁴னந்த³னாய ‘‘மம’’ந்தி ரோசேதப்³ப³ம். அபி⁴வதி³தப்³ப³ந்தி அபி⁴னிவிஸனஸமுட்டா²பனவஸேன வத்தப்³ப³ம். தேனாஹ ‘‘அஹம் மமந்தி வத்தப்³ப³’’ந்தி. அஜ்ஜோ²ஸித்வாதி தி³ட்டி² தண்ஹா வத்து²ம் அனுபவிஸித்வா கா³ஹத்³வயம் அனஞ்ஞஸாதா⁴ரணம் விய கத்வா. தேனாஹ ‘‘கி³லித்வா பரினிட்ட²பேத்வா’’தி. ஏதேனாதி ‘‘ஏத்த² சே நத்தீ²’’திஆதி³வசனேன. ஏத்தா²தி ஆயதனேஸு. தண்ஹாதீ³னம் அவத்து²பா⁴வத³ஸ்ஸனமுகே²ன தண்ஹாதீ³னம்யேவ அப்பவத்திம் கிலேஸபரினிப்³பா³னம் கதி²தந்தி. தேனாஹ ப⁴க³வா ‘‘ஏஸேவந்தோ’’திஆதி³, அயமேவ அபி⁴னந்த³னாதீ³னம் நத்தி²பா⁴வகரோ மக்³கோ³, தப்படிப்பஸ்ஸத்³தி⁴பூ⁴தம் ப²லம், தம்னிஸ்ஸரணம் வா நிப்³பா³னம் ராகா³னுஸயாதீ³னம் அந்தோ அவஸானம் அப்பவத்தீதி அத்தோ². தேனாஹ ‘‘அயம் …பே… அந்தோ’’தி. ஸப்³ப³த்தா²தி ‘‘ஏஸேவந்தோ படிகா⁴னுஸயானம்’’திஆதீ³ஸு ஸப்³ப³பதே³ஸு.

ஆதி³யதீதி பஹாரதா³னாதி³வஸேன க³ய்ஹதி. மத்த²கப்பத்தம் கலஹந்தி ப⁴ண்ட³னாதி³மத்தே அட்ட²த்வா முக²ஸத்தீஹி விதுத³னாதி³வஸேன மத்த²கப்பத்தம் கலஹம். யாய கரோதீதி ஸம்ப³ந்தோ⁴. ஸேஸபதே³ஸுபி ஏஸேவ நயோ. விருத்³த⁴க்³கா³ஹவஸேன நானாகா³ஹமத்தம், ததா² விருத்³த⁴வாத³வஸேன நானாவாத³மத்தம். ஏவம் பவத்தந்தி க³ருகாதப்³பே³ஸுபி கா³ரவம் அகத்வா ‘‘துவம் துவ’’ந்தி ஏவம் பவத்தம் ஸாரம்ப⁴கத²ம், யாய சேதனாய யம் கரோதி, ஸா துவம் துவம். நிஸ்ஸாயாதி படிச்ச, நிஸ்ஸயாதி³பச்சயே கத்வாதி அத்தோ². கிலேஸானம் உப்பத்தினிமித்ததா தாவ ஆயதனானம் ஹோது தப்³பா⁴வே பா⁴வதோ, நிரோத⁴னிமித்ததா பன கத²ம். ந ஹேத்த² லோகுத்தரத⁴ம்மானம் ஸங்க³ஹோ லோகியானம்யேவ அதி⁴ப்பேதத்தாதி சோத³னம் ஸந்தா⁴யாஹ ‘‘நிருஜ்ஜ²மானாபீ’’திஆதி³. நாமமத்தேன நிமித்ததம் ஸந்தா⁴ய வுத்தோதி த³ஸ்ஸேந்தோ ‘‘யத்து²ப்பன்னா, தத்தே²வ நிருத்³தா⁴ ஹோந்தீ’’தி வத்வா தமத்த²ம் ஸுத்தந்தரேன ஸாதே⁴ந்தோ ‘‘ஸ்வாயமத்தோ²’’திஆதி³மாஹ.

தத்த² ஸமுத³யஸச்சபஞ்ஹேனாதி மஹாஸதிபட்டா²னே ஸமுத³யஸச்சனித்³தே³ஸேன. ஸோ ஹி ‘‘கத்த² உப்பஜ்ஜமானா’’திஆதி³னா புச்சா²வஸேன பவத்தத்தா பஞ்ஹோதி வுத்தோ. நனு தத்த² தண்ஹாய உப்பத்தினிரோதா⁴ வுத்தா, ந ஸப்³ப³கிலேஸானந்தி ஈதி³ஸீ சோத³னா அனவகாஸாதி த³ஸ்ஸேந்தோ ‘‘யதே²வ சா’’திஆதி³மாஹ. லத்³த⁴வோஹாரேதி இமினா ராகா³தீ³னம் அப்பவத்தினிமித்ததாய அந்தோதி ஸமஞ்ஞா நிப்³பா³னஸ்ஸாதி த³ஸ்ஸேதி. ஏதேனேவ அபி⁴னந்த³னாதீ³னம் அபா⁴வோதி ச இத³ம் ஸம்வண்ணிதந்தி த³ட்ட²ப்³ப³ம். கத²ம் பன ஸப்³ப³ஸங்க²தவினிஸ்ஸடே நிப்³பா³னே அகுஸலத⁴ம்மானம் நிரோத⁴ஸம்ப⁴வோதி ஆஹ ‘‘யஞ்ஹி யத்த² நத்தி², தம் தத்த² நிருத்³த⁴ம் நாம ஹோதீ’’தி. ய்வாயம் அப்பவத்தியம் நிரோத⁴வோஹாரோ வுத்தோ, ஸ்வாயமத்தோ² நிரோத⁴பஞ்ஹேன தீ³பேதப்³போ³. ந ஹி தத்த² உப்பஜ்ஜித்வா நிருத்³தா⁴ விதக்கவிசாரா படிப்பஸ்ஸத்³தா⁴தி வுத்தா, அத² கோ² அப்பவத்தா ஏவாதி.

203. ஏவம்ஸம்பத³ந்தி ஏவம்ஸம்பஜ்ஜனகம் ஏவம் பஸ்ஸிதப்³ப³ம் இத³ம் மம அஜ்ஜே²ஸனம். தேனாஹ ‘‘ஈதி³ஸந்தி அத்தோ²’’தி. ஜானம் ஜானாதீதி (அ. நி. டீ. 3.10.113-116) ஸப்³ப³ஞ்ஞுதஞ்ஞாணேன ஜானிதப்³ப³ம் ஸப்³ப³ம் ஜானாதி. உக்கட்ட²னித்³தே³ஸேன ஹி அவிஸேஸக்³க³ஹணேன ச ‘‘ஜான’’ந்தி இமினா நிரவஸேஸம் ஞேய்யஜாதம் பரிக்³க³ண்ஹாதீதி தப்³பி³ஸயாய ஜானனகிரியாய ஸப்³ப³ஞ்ஞுதஞ்ஞாணமேவ கரணம் ப⁴விதும் யுத்தம். அத² வா பகரணவஸேன ‘‘ப⁴க³வா’’தி ஸத்³த³ந்தரஸன்னிதா⁴னேன சாயமத்தோ² விபா⁴வேதப்³போ³. பஸ்ஸிதப்³ப³மேவ பஸ்ஸதீதி தி³ப்³ப³சக்கு²-பஞ்ஞாசக்கு²-த⁴ம்மசக்கு²-பு³த்³த⁴சக்கு²-ஸமந்தசக்கு²-ஸங்கா²தேஹி ஞாணசக்கூ²ஹி பஸ்ஸிதப்³ப³ம் பஸ்ஸதி ஏவ. அத² வா ஜானம் ஜானாதீதி யதா² அஞ்ஞே ஸவிபல்லாஸா காமரூபபரிஞ்ஞாவாதி³னோ ஜானந்தாபி விபல்லாஸவஸேன ஜானந்தி, ந ஏவம் ப⁴க³வா. ப⁴க³வா பன பஹீனவிபல்லாஸத்தா ஜானந்தோ ஜானாதி ஏவ, தி³ட்டி²த³ஸ்ஸனஸ்ஸ ச அபா⁴வா பஸ்ஸந்தோ பஸ்ஸதியேவாதி அத்தோ². த³ஸ்ஸனபரிணாயகட்டே²னாதி யதா² சக்கு² ஸத்தானம் த³ஸ்ஸனத்த²ம் பரிணேதி, ஏவம் லோகஸ்ஸ யாதா²வத³ஸ்ஸனஸாத⁴னதோ த³ஸ்ஸனகிச்சபரிணாயகட்டே²ன சக்கு²பூ⁴தோ, பஞ்ஞாசக்கு²மயத்தா வா ஸயம்பு⁴ஞாணேன பஞ்ஞாசக்கு²ம் பூ⁴தோ பத்தோதி வா சக்கு²பூ⁴தோ. ஞாணபூ⁴தோதி ஏதஸ்ஸ ச ஏவமேவ அத்தோ² த³ட்ட²ப்³போ³. த⁴ம்மா வா போ³தி⁴பக்கி²யா தேஹி உப்பன்னத்தா லோகஸ்ஸ ச தது³ப்பாத³னதோ, அனஞ்ஞஸாதா⁴ரணம் வா த⁴ம்மம் பத்தோதி த⁴ம்மபூ⁴தோ. ப்³ரஹ்மா வுச்சதி மக்³கோ³ தேன உப்பன்னத்தா லோகஸ்ஸ ச தது³ப்பாத³னத்தா, தஞ்ச ஸயம்பு⁴ஞாணேன பத்தோதி ப்³ரஹ்மபூ⁴தோ. சதுஸச்சத⁴ம்மம் வத³தீதி வத்தா. சிரம் ஸச்சபடிவேத⁴ம் பவத்தேந்தோ வத³தீதி பவத்தா. அத்த²ம் நீஹரித்வாதி து³க்கா²தி³அத்த²ம் தத்தா²பி பீளனாதி³அத்த²ம் உத்³த⁴ரித்வா. பரமத்த²ம் வா நிப்³பா³னம் பாபயிதா, அமதஸச்சி²கிரியம் ஸத்தேஸு உப்பாதே³ந்தோ அமதம் த³தா³தீதி அமதஸ்ஸ தா³தா. போ³தி⁴பக்கி²யத⁴ம்மானம் ததா³யத்தபா⁴வதோ த⁴ம்மஸ்ஸாமீ.

204. ஸோ வா உத்³தே³ஸோ அத்தனோபி ஹோதீதி தே²ரோ ‘‘யம் கோ² நோ’’தி ஆஹ. ஸப்³ப³லோகஸாதா⁴ரணா ஹி பு³த்³தா⁴னம் தே³ஸனாதி. இதா³னி யேஹி த்³வாராரம்மணேஹி புரிஸம் பபஞ்சஸஞ்ஞாஸங்கா² ஸமுதா³சரந்தி, தானி தாவ த³ஸ்ஸேந்தோ பபஞ்சஸஞ்ஞாஸங்கா² த³ஸ்ஸேதும் யேன ஸளாயதனவிப⁴ங்கே³ன நித்³தே³ஸோ கதோ, தஸ்ஸ அத்த²ம் த³ஸ்ஸேதும் ‘‘சக்கு²ஞ்சா’’திஆதி³ ஆரத்³த⁴ம். தத்த² நிஸ்ஸயபா⁴வேனாதி நிஸ்ஸயபச்சயபா⁴வேன. நிஸ்ஸயபச்சயோ ச பஸாத³சக்கு²யேவ ஹோதி, ந சுத்³த³ஸஸம்பா⁴ரம், சதுசத்தாலீஸஸம்பா⁴ரம் வா ஸஸம்பா⁴ரசக்கு²ந்தி ஆஹ ‘‘சக்கு²பஸாத³ஞ்ச படிச்சா’’தி. ஆரம்மணபா⁴வேனாதி ஆரம்மணபச்சயபா⁴வேன. ஆரம்மணபச்சயோ ச சதுஸமுட்டா²னிகரூபேஸு யம் கிஞ்சி ஹோதீதி ஆஹ ‘‘சதுஸமுட்டா²னிகரூபே ச படிச்சா’’தி.

ஏத்த² சக்கு² ஏகம்பி விஞ்ஞாணஸ்ஸ பச்சயோ ஹோதி, ரூபாயதனம் பன அனேகமேவ ஸம்ஹதந்தி இமஸ்ஸ விஸேஸஸ்ஸ த³ஸ்ஸனத்த²ம் நிஸ்ஸயபா⁴வேன ‘‘சக்கு²பஸாத³ஞ்ச ஆரம்மணபா⁴வேன சதுஸமுட்டா²னிகரூபே சா’’தி வசனபே⁴தோ³ கதோ. கிம் பன காரணம் சக்கு² ஏகம்பி விஞ்ஞாணஸ்ஸ பச்சயோ ஹோதி, ரூபம் பன அனேகமேவாதி? பச்சயபா⁴வவிஸேஸதோ. சக்கு² ஹி சக்கு²விஞ்ஞாணஸ்ஸ நிஸ்ஸயபுரேஜாதஇந்த்³ரியவிப்பயுத்தபச்சயேஹி பச்சயோ ஹோந்தம் அத்தி²பா⁴வேனேவ ஹோதி தஸ்மிம் ஸதி தஸ்ஸ பா⁴வதோ, அஸதி அபா⁴வதோ, யதோ தம் அத்தி²அவிக³தபச்சயேஹிஸ்ஸ பச்சயோ ஹோதீதி வுச்சதி, தன்னிஸ்ஸிததா சஸ்ஸ ந ஏகதே³ஸேன அல்லீயனவஸேன இச்சி²தப்³பா³ அரூபபா⁴வதோ. அத² கோ² க³ருராஜாதீ³ஸு ஸிஸ்ஸராஜபுரிஸாதீ³னம் விய தப்படிப³த்³த⁴வுத்திதாய, இதரே பன பச்சயா தேன தேன விஸேஸேன வேதி³தப்³பா³.

ஸசாயம் பச்சயபா⁴வோ ந ஏகஸ்மிம் ந ஸம்ப⁴வதீதி ஏகம்பி சக்கு² சக்கு²விஞ்ஞாணஸ்ஸ பச்சயோ ஹோதீதி த³ஸ்ஸேதும் பாளியம் ‘‘சக்கு²ஞ்சாவுஸோ, படிச்சா’’தி ஏகவசனவஸேன வுத்தம். ரூபம் பன யதி³பி சக்கு² விய புரேஜாதஅத்தி²-அவிக³தபச்சயேஹி பச்சயோ ஹோதி புரேதரம் உப்பன்னம் ஹுத்வா விஜ்ஜமானக்க²ணே ஏவ உபகாரகத்தா ததா²பி அனேகமேவ ஸம்ஹதம் ஹுத்வா பச்சயோ ஹோதி ஆரம்மணபா⁴வதோ. யஞ்ஹி பச்சயத⁴ம்மம் ஸபா⁴வபூ⁴தம், பரிகப்பிதாகாரமத்தம் வா விஞ்ஞாணம் விபா⁴வேந்தம் பவத்ததி, தத³ஞ்ஞேஸஞ்ச ஸதிபி பச்சயபா⁴வே ஸோ தஸ்ஸ ஸாரம்மணஸபா⁴வதாய யம் கிஞ்சி அனாலம்பி⁴த்வா பவத்திதும் அஸமத்த²ஸ்ஸ ஓலுப்³ப⁴பவத்திகாரணபா⁴வேன ஆலம்ப³னீயதோ ஆரம்மணம் நாம, தஸ்ஸ யஸ்மா யதா² ததா² ஸபா⁴வூபலத்³தி⁴ விஞ்ஞாணஸ்ஸ ஆரம்மணபச்சயலாபோ⁴, தஸ்மா சக்கு²விஞ்ஞாணம் ரூபம் ஆரப்³ப⁴ பவத்தமானம் தஸ்ஸ ஸபா⁴வம் விபா⁴வேந்தமேவ பவத்ததி. ஸா சஸ்ஸ இந்த்³ரியாதீ⁴னவுத்திகஸ்ஸ ஆரம்மணஸபா⁴வூபலத்³தி⁴ ந ஏகத்³விகலாபக³தவண்ணவஸேன ஹோதி, நாபி கதிபயகலாபக³தவண்ணவஸேன, அத² கோ² ஆபோ⁴கா³னுரூபம் ஆபாத²க³தவண்ணவஸேனாதி அனேகமேவ ரூபம் ஸம்ஹச்சகாரிதாய விஞ்ஞாணஸ்ஸ பச்சயோ ஹோதீதி த³ஸ்ஸேந்தோ ‘‘ரூபே ச உப்பஜ்ஜதி சக்கு²விஞ்ஞாண’’ந்தி ப³ஹுவசனவஸேனாஹ.

யம் பன பட்டா²னே (பட்டா². 1.1.2 பச்சயனித்³தே³ஸ) ‘‘ரூபாயதனம் சக்கு²விஞ்ஞாணதா⁴துயா தம்ஸம்பயுத்தகானஞ்ச த⁴ம்மானம் ஆரம்மணபச்சயேன பச்சயோ’’தி வுத்தம், தம் யாதி³ஸம் ரூபாயதனம் சக்கு²விஞ்ஞாணஸ்ஸ ஆரம்மணபச்சயோ, தாதி³ஸம் ஸந்தா⁴ய வுத்தம். கீதி³ஸம் பன தந்தி? ஸமுதி³தந்தி பாகடோயமத்தோ². ஏவஞ்ச கத்வா யதே³கே வத³ந்தி ‘‘ஆயதனஸல்லக்க²ணவஸேன சக்கு²விஞ்ஞாணாத³யோ ஸல்லக்க²ணவிஸயா, ந த்³ரப்³யஸல்லக்க²ணவஸேனா’’தி, தம்பி ஸுவுத்தமேவ ஹோதி. ந சேத்த² ஸமுதா³யாரம்மணதா ஆஸங்கிதப்³பா³ ஸமுதா³யாபோ⁴க³ஸ்ஸேவ அபா⁴வதோ, ஸமுதி³தா பன வண்ணத⁴ம்மா ஆரம்மணபச்சயா ஹோந்தி. கத²ம் பன பச்சேகம் அஸமத்தா² ஸமுதி³தா ஆரம்மணபச்சயா ஹோந்தி. ந ஹி பச்சேகம் த³ட்டு²ம் அஸக்கோந்தா அந்தா⁴ ஸமுதி³தா பஸ்ஸந்தீதி? நயித³மேகந்திகம் விஸும் விஸும் அஸமத்தா²னம்பி ஸிவிகாவஹனாதீ³ஸு ஸமத்த²தாய த³ஸ்ஸனதோ. கேஸாதீ³னஞ்ச யஸ்மிம் டா²னே டி²தானம் பச்சேகம் வண்ணம் க³ஹேதும் ந ஸக்கா, தஸ்மிம்யேவ டா²னே ஸமுதி³தானம் தம் க³ஹேதும் ஸக்காதி பி⁴ய்யோபி தேஸம் ஸம்ஹச்சகாரிதா பரிப்³யத்தா. ஏதேன கிம் சக்கு²விஞ்ஞாணஸ்ஸ பரமாணுரூபம் ஆரம்மணம், உதா³ஹு தம்ஸமுதா³யோதிஆதி³கா சோத³னா படிக்கி²த்தாதி வேதி³தப்³பா³. ‘‘ஸோதஞ்ச, ஆவுஸோ, படிச்சா’’திஆதீ³ஸுபி இமினா நயேன அத்தோ² வேதி³தப்³போ³. சக்கு²விஞ்ஞாணம் நாமாதி சக்கு²னிஸ்ஸிதரூபவிஜானனலக்க²ணம் சக்கு²விஞ்ஞாணம் நாம உப்பஜ்ஜதி.

திண்ணம் ஸங்க³தியாதி சக்கு², ரூபம், சக்கு²விஞ்ஞாணந்தி இமேஸம் திண்ணம் ஸங்க³தியா ஸமோதா⁴னேன. ப²ஸ்ஸோ நாமாதி அரூபத⁴ம்மோபி ஸமானோ ஆரம்மணே பு²ஸனாகாரேனேவ பவத்தனதோ பு²ஸனலக்க²ணோ ப²ஸ்ஸோ நாம த⁴ம்மோ உப்பஜ்ஜதி. ஸஹஜாதாதி³வஸேனாதி சக்கு²விஞ்ஞாணஸம்பயுத்தாய ஸஹஜாதஅஞ்ஞமஞ்ஞாதி³வஸேன, அனந்தராய அனந்தராதி³வஸேன, இதராய உபனிஸ்ஸயவஸேன பச்சயபா⁴வதோ ப²ஸ்ஸபச்சயா ப²ஸ்ஸகாரணா வேத³னா உப்பஜ்ஜதி. அனுப⁴வனஸமகாலமேவ ஆரம்மணஸ்ஸ ஸஞ்ஜானனம் ஹோதீதி ‘‘தாய வேத³னாய யம் ஆரம்மணம் வேதே³தி, ததே³வ ஸஞ்ஞா ஸஞ்ஜானாதீ’’தி வுத்தம். சக்கு²த்³வாரிகா த⁴ம்மா இதா⁴தி⁴ப்பேதாதி தத³னுஸாரேன பன அபராபருப்பன்னானம் வேத³னாதீ³னம் க³ஹணே ஸதி, யந்தி வா காரணவசனம், யஸ்மா ஆரம்மணம் வேதே³தி, தஸ்மா தம் ஸஞ்ஜானாதீதி அத்தோ². ந ஹி அஸதி வேத³யிதே கதா³சி ஸஞ்ஞுப்பத்தி அத்தி². ஸேஸபதே³ஸுபி ஏஸேவ நயோ. ஸஞ்ஞாய ஹி யதா²ஸஞ்ஞாதம் விஜ்ஜமானம், அவிஜ்ஜமானம் வா ஆரம்மணம் விதக்கவஸேன பரிகப்பேதி, யதா²பரிகப்பிதஞ்ச தம் தி³ட்டி²தண்ஹாமானமஞ்ஞனாஹி மஞ்ஞமானோ பபஞ்சேதீதி வுத்தோ. தேனேவாஹ ‘‘பத²விம் பத²விதோ ஸஞ்ஜானா’’தி, ‘‘பத²விம் பத²விதோ ஸஞ்ஞத்வா பத²விம் மஞ்ஞதீ’’திஆதி³ (ம. நி. 1.2), ‘‘தக்கஞ்ச தி³ட்டீ²ஸு பகப்பயித்வா, ஸச்சம் முஸாதி த்³வயத⁴ம்மமாஹூ’’தி (ஸு. நி. 892; மஹானி. 121) ச. ப³லப்பத்தபபஞ்சவஸேனேவாயமத்த²வண்ணனா கதா, அட்ட²கதா²யம் பன பரிது³ப்³ப³லவஸேன.

சக்கு²ரூபாதீ³ஹி காரணேஹீதி சக்கு²விஞ்ஞாணப²ஸ்ஸவேத³னாஸஞ்ஞாவிதக்கேஹி காரணபூ⁴தேஹி. அகாரணபூ⁴தானம்பி தேஸம் அத்தி²தாய காரணக்³க³ஹணம். பரிஞ்ஞாதா ஹி தே அகாரணம். தேனாஹ ‘‘அபரிஞ்ஞாதகாரண’’ந்தி. தீஹிபி பரிஞ்ஞாஹி அபரிஞ்ஞாதவத்து²கம். அபி⁴ப⁴வந்தீதி அஜ்ஜோ²த்த²ரந்தி. ஸஹஜாதா ஹோந்தீதி ஏத்த² ‘‘சக்கு²ஸம்ப²ஸ்ஸபச்சயா வேத³னாக்க²ந்தோ⁴ அத்தி² குஸலோ’திஆதி³வசனதோ வேத³னாஸஞ்ஞா அஸஹஜாதாபி க³ஹேதப்³பா³. யதி³ ஏவந்தி ‘‘பபஞ்சேதீ’’தி ஏத்த² யதி³ பஞ்சத்³வாரஜவனஸஹஜாதா பபஞ்சஸங்கா² அதி⁴ப்பேதா தாஸம் பச்சுப்பன்னவிஸயத்தா, கஸ்மா அதீதானாக³தக்³க³ஹணம் கதந்தி சோதே³தி. இதரோ ‘‘ததா² உப்பஜ்ஜனதோ’’திஆதி³னா பரிஹரதி. தத்த² ததா² உப்பஜ்ஜனதோதி யதா² வத்தமானகாலே, ஏவம் அதீதகாலே அனாக³தகாலே ச சக்கு²த்³வாரே பபஞ்சஸங்கா²னம் உப்பஜ்ஜனதோ அதீதானாக³தக்³க³ஹணம் கதம், ந அதீதேஸு, அனாக³தேஸு வா சக்கு²ரூபேஸு சக்கு²த்³வாரிகானம் தாஸம் உப்பஜ்ஜனதோ.

மனஞ்ஜாவுஸோ, படிச்சாதி ஏத்த² து³வித⁴ம் மனம் கேவலம் ப⁴வங்க³ம், ஸாவஜ்ஜனம் வா. து³விதா⁴ ஹி கதா². உப்பத்தித்³வாரகதா²யம் த்³விக்க²த்தும் சலிதம் ப⁴வங்க³ம் மனோத்³வாரம் நாம, சக்கா²தி³ விய ரூபாதி³னா யேன தம் க⁴ட்டிதம் தத்த² உபரி விஞ்ஞாணுப்பத்தியா த்³வாரபா⁴வதோ. பச்சயகதா²யம் ஸாவஜ்ஜனப⁴வங்க³ம், ‘‘மனோஸம்ப²ஸ்ஸபச்சயா அத்தி² குஸலோ’’திஆதீ³ஸு ஹி ஸாவஜ்ஜனமனோஸம்ப²ஸ்ஸோ இச்சி²தோ, ந ப⁴வங்க³மனோஸம்ப²ஸ்ஸோ அஸம்ப⁴வதோ. தத்த² பட²மனயம் ஸந்தா⁴யாஹ ‘‘மனந்தி ப⁴வங்க³சித்த’’ந்தி. த⁴ம்மேதி தேபூ⁴மகத⁴ம்மாரம்மணந்தி இமினா ஸபா⁴வத⁴ம்மேஸு ஏவ கிலேஸுப்பத்தீதி கேசி, தத³யுத்தம் தது³பாதா³னாயபி பஞ்ஞத்தியா த⁴ம்மாரம்மணதாய வுத்தத்தா. இத⁴ பன தேபூ⁴மகாபி த⁴ம்மா லப்³ப⁴ந்தீதி த³ஸ்ஸனத்த²ம் ‘‘தேபூ⁴மகத⁴ம்மாரம்மண’’ந்தி வுத்தம், ந பஞ்ஞத்தியா அனாரம்மணத்தா. ஏவஞ்சேதம் ஸம்படிச்சி²தப்³ப³ம், அஞ்ஞதா² அகுஸலசித்துப்பாதா³ அனாரம்மணா நாம ஸியும். உப்பத்தித்³வாரகதா²யம் சக்கு²விஞ்ஞாணாதி³ விய ஆவஜ்ஜனம்பி த்³வாரபக்கி²கமேவாதி வுத்தம் ‘‘மனோவிஞ்ஞாணந்தி ஆவஜ்ஜனம் வா’’தி. பச்சயகதா²யம் பன ஆவஜ்ஜனம் க³ஹிதந்தி ‘‘ஜவனம் வா’’தி வுத்தம். நயத்³வயே த⁴ம்மானம் ஸஹஜாதவிபா⁴க³ம் த³ஸ்ஸேதும் ‘‘ஆவஜ்ஜனே க³ஹிதே’’திஆதி³ வுத்தம். யுத்தமேவாதி நிப்பரியாயதோ யுத்தமேவ.

ஸோ யாவ ந பச்சயபடிவேதோ⁴ ஸம்ப⁴வதி, தாவ பஞ்ஞத்திமுகே²னேவ ஸபா⁴வத⁴ம்மா பஞ்ஞாயந்தி பச்சேகம் அபஞ்ஞாபனேதி ஆஹ ‘‘ப²ஸ்ஸோ நாம ஏகோ த⁴ம்மோ உப்பஜ்ஜதீ’’தி. ஏவம் ப²ஸ்ஸபஞ்ஞத்திம் பஞ்ஞபேஸ்ஸதீதி பஞ்ஞபேத்வா தப்³பி³ஸயத³ஸ்ஸனம் ஞாணம் உப்பாதே³ஸ்ஸதி. இமஸ்மிம் ஸதி இத³ம் ஹோதீதி இமஸ்மிம் சக்கு²ஆதி³கே பச்சயே ஸதி இத³ம் ப²ஸ்ஸாதி³கம் பச்சயுப்பன்னம் ஹோதி. த்³வாத³ஸாயதனவஸேனாதி த்³வாத³ஸன்னம் ஆயதனானம் வஸேன ஆக³தேன படிச்சஸமுப்பாத³னயவஸேன. த்³வாத³ஸாயதனபடிக்கே²பவஸேனாதி ‘‘இமஸ்மிம் அஸதி இத³ம் ந ஹோதீ’’தி பச்சயாபா⁴வபச்சயுப்பன்னாபா⁴வத³ஸ்ஸனக்கமே த்³வாத³ஸன்னம் ஆயதனானம் படிக்கே²பவஸேன.

ஸாவகேன பஞ்ஹோ கதி²தோதி அயம் பஞ்ஹோ ஸாவகேன கதி²தோ, இதி இமினா காரணேன மா நிக்கங்கா² அஹுவத்த². அத² வா ஸம்கி²த்தேன வுத்தமத்த²ம் வித்தா²ரேன விப⁴ஜந்தேன ஏதத³க்³கே³ ட²பிதேன மஹாஸாவகேன பஞ்ஹோ கதி²தோதி இமினா காரணேன ஏதஸ்மிம் பஞ்ஹே மா நிக்கங்கா² அஹுவத்த², ஹேரஞ்ஞிகே ஸதி கஹாபணம் ஸயம் நிச்சி²னந்தா விய அஹுத்வா ப⁴க³வதோ ஏவ ஸந்திகே நிக்கங்கா² ஹோத².

205. ஆகரோந்தி ப²லம் தாய தாய மரியாதா³ய நிப்³ப³த்தேந்தீதி ஆகாரா, காரணானி. பாடியேக்ககாரணேஹீதி ச²ன்னம் த்³வாரானம் வஸேன விஸும் விஸும் பபஞ்சகாரணஸ்ஸ நித்³தி³ட்ட²த்தா வுத்தம். அத² வா யதி³பி யத்தகேஹி த⁴ம்மேஹி யம் ப²லம் நிப்³ப³த்ததி, தேஸம் ஸமுதி³தானம்யேவ காரணபா⁴வோ ஸாமக்³கி³யாவ ப²லுப்பத்திதோ, ததா²பி பச்சேகம் தஸ்ஸ காரணமேவாதி கத்வா வுத்தம் ‘‘பாடியேக்ககாரணேஹீ’’தி. பதே³ஹீதி நாமாதி³பதே³ஹி சேவ தம்ஸமுதா³யபூ⁴தேஹி வாக்யேஹி ச. தேனாஹ ‘‘அக்க²ரஸம்பிண்ட³னேஹீ’’தி. அக்க²ரானியேவ ஹி அத்தே²ஸு யதா²வச்சம் பத³வாக்யபா⁴வேன பரிச்சி²ஜ்ஜந்தி. ப்³யஞ்ஜனேஹீதி அத்த²ஸ்ஸ அபி⁴ப்³யஞ்ஜனதோ ப்³யஞ்ஜனஸஞ்ஞிதேஹி வண்ணேஹி. தானி பன யஸ்மா பரியாயஸ்ஸ அக்க²ரணதோ ‘‘அக்க²ரானீ’’தி வுச்சந்தி, தஸ்மா ஆஹ ‘‘அக்க²ரேஹீ’’தி. ஏத்த² ச இமேஹி ஆகாரேஹி இமேஹி பத³ப்³யஞ்ஜனேஹி பபஞ்சஸமுதா³சாரஸ்ஸ வட்டஸ்ஸ ச விவட்டஸ்ஸ ச த³ஸ்ஸனஅத்தோ² விப⁴த்தோதி யோஜனா. பண்டி³ச்சேனாதி பஞ்ஞாய. ‘‘கித்தாவதா நு கோ², ப⁴ந்தே, பண்டி³தோ ஹோதி? யதோ கோ² பி⁴க்கு² தா⁴துகுஸலோ ச ஹோதீ’’தி (ம. நி. 3.124) ஆதி³ஸுத்தபத³வஸேன பண்டி³தலக்க²ணம் த³ஸ்ஸேந்தோ ‘‘சதூஹி வா காரணேஹீ’’திஆதி³மாஹ. ஸச்சபடிவேத⁴வஸேன பண்டி³ச்சம் த³ஸ்ஸிதந்தி படிஸம்பி⁴தா³வஸேன மஹாபஞ்ஞதம் த³ஸ்ஸேதும் ‘‘மஹந்தே அத்தே²’’திஆதி³ வுத்தம்.

கு³ளபூவந்தி கு³ளே மிஸ்ஸித்வா கதபூவம். ப³த்³த⁴ஸத்துகு³ளகந்தி மது⁴ஸக்க²ராஹி பிண்டீ³கதம் ஸத்துபிண்ட³ம். அஸேசிதப்³ப³கம் மது⁴ஆதி³னா பகே³வ தேஹி ஸமயோஜிதப்³ப³த்தா. சிந்தகஜாதிகோதி த⁴ம்மசிந்தாய சிந்தகஸபா⁴வோ. ஸப்³ப³ஞ்ஞுதஞ்ஞாணேனேவஸ்ஸாதி ஸப்³ப³ஞ்ஞுதஞ்ஞாணேனேவ அஸ்ஸ ஸுத்தஸ்ஸ கு³ணம் பரிச்சி²ந்தா³பேத்வா நாமம் க³ண்ஹாபேஸ்ஸாமி.

மது⁴பிண்டி³கஸுத்தவண்ணனாய லீனத்த²ப்பகாஸனா ஸமத்தா.