1. நந்தி³யாவட்டனயவண்ணனா

‘‘ஸப்³ப³த⁴ம்மமூலபரியாய’’ந்திஆதீ³ஸு ஸப்³ப³த⁴ம்மமூலக்³க³ஹணேன மஞ்ஞனாக³ஹணேன ச தண்ஹாமானதி³ட்டி²யோ க³ஹிதா. மஞ்ஞனானம்பி ஹி மஞ்ஞனா காரணந்தி த³ஸ்ஸிதோயமத்தோ². ‘‘அஸ்ஸுதவா’’திஆதி³னா அவிஜ்ஜாமானதி³ட்டி²யோ க³ஹிதா, ஸப்³பே³பி வா ஸம்கிலேஸத⁴ம்மா, ததா² ஸஞ்ஞாஅபரிஞ்ஞாதக்³க³ஹணேன. ‘‘கீ²ணாஸவோ பரிக்கீ²ணப⁴வஸஞ்ஞோஜனோ’’தி ஏத்த² பன ஆஸவா ஸஞ்ஞோஜனானி ச ஸரூபதோ க³ஹிதானி, ததா² நந்தி³க்³க³ஹணேன தண்ஹாக³ஹணேன ச தண்ஹா, ஏவம்பேத்த² ஸரூபதோ பரியாயதோ ச தண்ஹா அவிஜ்ஜா தப்பக்கி²யத⁴ம்மா ச க³ஹிதா. தத்த² தண்ஹாய விஸேஸதோ ரூபத⁴ம்மா அதி⁴ட்டா²னம், அவிஜ்ஜாய அரூபத⁴ம்மா, தே பன ஸப்³ப³த⁴ம்மக்³க³ஹணேன பத²வீஆதி³க்³க³ஹணேன ச த³ஸ்ஸிதா ஏவ. தாஸம் ஸமதோ² விபஸ்ஸனா ச படிபக்கோ², தேஸமேத்த² க³ஹேதப்³பா³காரோ ஹேட்டா² த³ஸ்ஸிதோ ஏவ. ஸமத²ஸ்ஸ சேதோவிமுத்தி ப²லம், விபஸ்ஸனாய பஞ்ஞாவிமுத்தி. ததா² ஹி தா ‘‘ராக³விராகா³’’திஆதி³னா விஸேஸேத்வா வுச்சந்தி, இமாஸமேத்த² க³ஹணம் ஸம்மத³ஞ்ஞாவிமுத்தவீதராகா³தி³வசனேஹி வேதி³தப்³ப³ம். தத்த² தண்ஹாவிஜ்ஜா ஸமுத³யஸச்சம், தப்பக்கி²யத⁴ம்மா பன தக்³க³ஹணேனேவ க³ஹிதாதி வேதி³தப்³பா³. தேஸம் அதி⁴ட்டா²னபூ⁴தா வுத்தப்பபே⁴தா³ ரூபாரூபத⁴ம்மா து³க்க²ஸச்சம், தேஸம் அப்பவத்தி நிரோத⁴ஸச்சம், நிரோத⁴பஜானனா படிபதா³ மக்³க³ஸச்சம். தண்ஹாக³ஹணேன சேத்த² மாயா-ஸாடே²ய்ய-மானாதிமான-மத³ப்பமாத³-பாபிச்ச²தா-பாபமித்ததா-அஹிரிகானோத்தப்பாதி³வஸேன அகுஸலபக்கோ² நேதப்³போ³, அவிஜ்ஜாக³ஹணேன விபரீதமனஸிகார-கோதூ⁴பனாஹ-மக்க²-பளாஸ-இஸ்ஸா-மச்ச²ரிய- ஸாரம்ப⁴தோ³வசஸ்ஸதா-ப⁴வதி³ட்டி²-விப⁴வதி³ட்டி²ஆதி³வஸேன அகுஸலபக்கோ² நேதப்³போ³, வுத்தவிபரியாயேன அமாயாஅஸாடே²ய்யாதி³அவிபரீதமனஸிகாராதி³வஸேன, ததா² ஸமத²பக்கி²யானம் ஸத்³தி⁴ந்த்³ரியாதீ³னம் விபஸ்ஸனாபக்கி²யானம் அனிச்சஸஞ்ஞாதீ³னஞ்ச வஸேன வோதா³னபக்கோ² நேதப்³போ³தி. அயம் நந்தி³யாவட்டஸ்ஸ ந யஸ்ஸ பூ⁴மி.