5. பத்தனித்³தே³ஸவண்ணனா

60. அயோபத்தோ நாம அயஸா காளலோஹேன நிப்³ப³த்தோ பத்தோ. ஜாதியா உக்கட்டா²தீ³னம் ஸாமஞ்ஞவஸேன. பமாணதோதி பரிச்சே²த³தோ. தயோ பத்தாதி பாட²ஸேஸோ.

61. ‘‘மக³தே⁴ஸூ’’தி வத்தப்³பே³ மக³தே⁴தி வசனவிபல்லாஸேன வா ‘‘பச்சாஸா ஸதீ’’திஆதீ³ஸு விய ஸு-ஸத்³த³லோபேன வா வுத்தம். நாளித்³வயதண்டு³லஸாதி⁴தந்தி ஏத்த² மக³தா⁴பேக்கோ²பி நாளி-ஸத்³தோ³ த்³வய-ஸத்³தே³ன ஸமாஸோ ஹோதி க³ம்மகத்தாதி நாளியா த்³வயம் நாளித்³வயம். தத்த² மக³த⁴னாளி நாம அட்³ட⁴தேரஸபலா ஹோதி. ஏத்த² ச அட்³ட⁴தேரஸபலானி மாஸானந்தி வத³ந்தி. நாளித்³வயேன பமிதா தண்டு³லா ஸுகோட்டிதபரிஸுத்³தா⁴ அனுபஹதபுராணஸாலிதண்டு³லா நாளித்³வயதண்டு³லா, தேஹி ஸாதி⁴தம் பசிதந்தி அத்தோ². ஓத³னந்தி ஸம்மா ஸம்பாதி³தம் அவஸ்ஸாவிதோத³னம். ஸூபந்தி ஓத³னஸ்ஸ சதுத்த²பா⁴க³ப்பமாணம் நாதிக⁴னம் நாதிதனுகம் ஹத்த²ஹாரியம் ஸப்³ப³ஸம்பா⁴ரஸங்க²தம் முக்³க³ஸுபம். ப்³யஞ்ஜனஞ்ச ததூ³பியந்தி தஸ்ஸ ஓத³னஸ்ஸ உபியம் அனுரூபம் யாவ சரிமாலோபப்பஹோனகம் மச்ச²மம்ஸாதி³ப்³யஞ்ஜனஞ்ச உக்கட்டோ² க³ண்ஹாதீதி ஸம்ப³ந்தோ⁴.

62. தஸ்ஸாதி யதா²வுத்தஓத³னாதி³னோ. உபட்³டோ⁴தி உபட்³ட⁴ம் நாளிகோத³னாதி³ அஸ்ஸ அத்தீ²தி உபட்³டோ⁴. ஏவ-காரேன அதிரேகம் நிவத்தேதி. ததோதி யதா²வுத்தனாளிகோத³னாதி³தோ. உக்கட்ட²தோ உக்கட்டோ² ச ஓமகோமகோ ச அபத்தோதி யோஜனா. ஓமகதோ ஓமகோ ஓமகோமகோ. இமினா புன பத்தத்³வயத³ஸ்ஸனேன பமாணதோ தயோபி பத்தா விபா⁴க³தோ நவ ஹோந்தீதி தீ³பேதி. தத்த² யஸ்மிம் மக³த⁴னாளித்³வயதண்டு³லோத³னாதி³கம் ஸப்³ப³ம்பி வட்³ட⁴னபக்கே² டி²தம் பக்கி²த்தம் ஸசே பத்தஸ்ஸ முக²வட்டியா ஹேட்டி²மராஜிஸமம் திட்ட²தி, ஸுத்தேன வா ஹீரேன வா சி²ந்த³ந்தஸ்ஸ ஸுத்தஸ்ஸ வா ஹீரஸ்ஸ வா ஹேட்டி²மந்தம் பு²ஸதி, அயம் உக்கட்டோ² நாம பத்தோ. ஸசே தம் ராஜிம் அதிக்கம்ம தூ²பீகதம் திட்ட²தி, அயம் உக்கட்டோ²மகோ நாம பத்தோ. ஸசே தம் ராஜிம் ந ஸம்பாபுணாதி அந்தோக³தமேவ, அயம் உக்கட்டு²க்கட்டோ² நாம பத்தோ. ‘‘ஏகம் நாளிகோத³னாதி³ ஸப்³ப³ம்பி பக்கி²த்தம் வுத்தனயேனேவ ஹேட்டி²மராஜிஸமம் திட்ட²தி, அயம் மஜ்ஜி²மோ நாம பத்தோ’’திஆதி³னா மஜ்ஜி²மமஜ்ஜி²மோமகமஜ்ஜி²முக்கட்டா² ச ‘‘யத்த² உபட்³ட⁴னாளிகோத³னாதி³ ஸப்³ப³ம்பி பக்கி²த்தம் ஹேட்டி²மராஜிஸமம் திட்ட²தி, அயம் ஓமகோ நாம பத்தோ’’திஆதி³னா ஓமகஓமகோமகஓமகுக்கட்டா² ச பத்தா உக்கட்டே² வுத்தனயேனேவ வேதி³தப்³பா³. தேஸு த்³வே அபத்தா பா⁴ஜனபரிபோ⁴கே³ன பரிபு⁴ஞ்ஜிதப்³பா³, நாதி⁴ட்டா²னூபகா³, ந விகப்பனூபகா³.

63. கப்போ ஸகோ அதிரேகபத்தோ த³ஸாஹபரமம் தா⁴ரேய்யாதி யோஜனா. தத்த² கப்போதி கப்பியோ. ஸகோதி அத்தனோ ஸந்தகோ. கப்பியத்தா பன அத்தஸந்தகத்தா ச ஸத்தன்னம்பி அதி⁴ட்டா²னவிகப்பனூபக³தா வேதி³தப்³பா³. தத்த² அயோபத்தோ பஞ்சஹி பாகேஹி, மத்திகாபத்தோ த்³வீஹி பாகேஹி பக்கோ அதி⁴ட்டா²னூபகோ³ ச விகப்பனூபகோ³ ச, ததா² உபோ⁴பி காகணிகமத்தஸ்ஸாபி மூலஸ்ஸ அனவஸேஸேத்வா தி³ன்னே, ஸப்³ப³ஸோ அத்தஸந்தகத்தே விஞ்ஞாதே ச அதி⁴ட்டா²னவிகப்பனூபகா³தி த³ட்ட²ப்³ப³ம். அதிரேகபத்தோதி அனதி⁴ட்டி²தாவிகப்பிததாய அதிரேகபத்தோ. அதி⁴ட்டா²னபச்சுத்³தா⁴ரா பனேத்த² சீவரே வுத்தாவ. விகப்பேந்தேன பன பத்தானம் ஏகப³ஹுபா⁴வம், ஸன்னிஹிதாஸன்னிஹிதபா⁴வஞ்ச ஞத்வா ‘‘இமம் பத்த’’ந்தி வா ‘‘இமே பத்தே’’தி வா ‘‘ஏதம் பத்த’’ந்தி வா ‘‘ஏதே பத்தே’’தி வா வத்வா ‘‘துய்ஹம் விகப்பேமீ’’தி வத்தப்³ப³ம். ஸம்முகா²தி³பே⁴தோ³ பனேத்த² சீவரே வக்க²மானனயேன வேதி³தப்³போ³. த³ஸாஹபரமந்தி த³ஸ அஹானி பரமோ பரிச்சே²தோ³ அஸ்ஸாதி த³ஹாஹபரமோ, காலோ, தம். அச்சந்தஸம்யோகே³ உபயோக³வசனம். தா⁴ரேய்யோதி பரிபோ⁴க³வஸேன தா⁴ரேதப்³போ³. தஸ்மிம்காலே அதினாமிதே பத்தோ நிஸ்ஸக்³கி³யோ ஹோதீதி யோஜனா. அதினாமிதேதி அதிக்காமிதே நிஸ்ஸக்³கி³யோ ஹோதி, ஏகாத³ஸே அருணுக்³க³மனே ஸங்க⁴ஸ்ஸ வா க³ணஸ்ஸ வா புக்³க³லஸ்ஸ வா பத³பா⁴ஜனீயே (பாரா. 602) வுத்தனயேன பத்தோ நிஸ்ஸஜ்ஜிதப்³போ³ ஹோதி, ததா² ஸதி பாசித்தியாபத்தி சஸ்ஸ ஹோதீதி அதி⁴ப்பாயோ.

64. ‘‘அச்சே²தா³’’திஆதி³ சீவரே வுத்தனயத்தா உத்தானமேவ. அயம் பன விஸேஸோ – மரணுத்³த⁴டாதி உத்³த⁴ரணம் உத்³த⁴ளம், பச்சுத்³தா⁴ரோ. மரணஞ்ச உத்³த⁴டஞ்ச மரணுத்³த⁴டா, தஸ்மா. சி²த்³தே³னாதி யேன கங்கு³ஸித்த²ம் நிக்க²மதி சேவ பவிஸதி ச, தேன முக²வட்டிதோ ஹேட்டா² த்³வங்கு³லசி²த்³தே³ன. பத்தாதி⁴ட்டா²னமுஜ்ஜ²தீதி பத்தோ அதி⁴ட்டா²னம் உஜ்ஜ²தி விஸ்ஸஜ்ஜதி.

65. இதா³னி ‘‘பத்த’’ந்திஆதி³னா அஞ்ஞதா² பரிஹரணே து³க்கடம் த³ஸ்ஸேதி. தத்த² ஸோத³கம் பத்தம் ந படிஸாமேய்யாதி யோஜனா. ந படிஸாமேய்யாதி கு³த்தட்டா²னே ந நிக்கி²பேய்ய, ‘‘ஸோத³கம் பத்தம் உண்ஹே ந ச ஓதபே’’திஆதி³னா ச யோஜனீயம். ந ச ஓதபேதி நேவ ஈஸகம் தாபேய்ய. ந நித³ஹேதி நிருத³கம் கத்வாபி பு⁴ஸம் ந நித³ஹேய்ய, வோத³கம் கத்வா ஈஸகம் தாபேய்யாதிபி ப்³யதிரேகத்தோ². பூ⁴ம்யா ந ட²பேதி க²ராய பூ⁴மியா ந ட²பேய்ய. யத்த² பன வண்ணோ ந து³ஸ்ஸதி, ஏவரூபாய மத்திகாய பரிப⁴ண்ட³கதாய பூ⁴மியா வா ததா²ரூபாய ஏவ வாலிகாய வா நிக்குஜ்ஜித்வா உக்குஜ்ஜித்வா ட²பேதும் வட்டதி. நோ ச லக்³க³யேதி பி⁴த்திகி²லாதீ³ஸு ந ஓலம்பே³ய்ய.

66. ‘‘மிட்³ட⁴ந்தே வா’’திஆதி³னா வத்வா பத்தம் ட²பேதும் ந ச கப்பதீதி யோஜேதப்³ப³ம். மிட்³ட⁴ந்தேதி ஆளிந்த³கமிட்³டி⁴காதீ³னம் மிட்³டீ⁴னம் அந்தே. ஸசே பன பரிவத்தேத்வா தத்தே²வ பதிட்டா²தி, ஏவரூபாய வித்தி²ண்ணாய மிட்³டி⁴யா ட²பேதும் வட்டதி. பரிப⁴ண்ட³ந்தே வாதி பா³ஹிரபஸ்ஸே கதாய தனுகாய மிட்³டி⁴காய அந்தே வா. ஏத்த² வா-ஸத்³தோ³ ஸமுச்சயே, ஸோ ச பச்சேகம் யோஜேதப்³போ³. அங்கே பன அம்ஸப³த்³த⁴கேன அம்ஸகூடே லக்³கே³த்வா ட²பேதுஞ்ச வட்டதி. ச²த்தேபி ப⁴ண்ட³கேன ஸத்³தி⁴ம் ப³ந்தி⁴த்வா வா அட்டம் கத்வா வா ட²பேதும் வட்டதி. மஞ்சேபி அஞ்ஞேன ஸத்³தி⁴ம் ப³ந்தி⁴த்வா ட²பேதும், அடனியம் ப³ந்தி⁴த்வா ஓலம்பே³தும் வட்டதி.

67. பத்தேன உச்சி²ட்டோ²த³கஞ்ச சலகட்டி²கஞ்ச ந நீஹரேய்யாதி ஸம்ப³ந்தோ⁴. உச்சி²ட்டோ²த³கந்தி முக²விக்கா²லனோத³கம். சலகானி ச சப்³பே³த்வா அபவித்³தா⁴மிஸானி அட்டி²கானி மச்ச²மம்ஸஅட்டி²கானி ச சலகட்டி²கம். பத்தம் படிக்³க³ஹம் கத்வா ஹத்த²ம் தோ⁴விதும்பி ஹத்த²தோ⁴தாதி³ உத³கம்பி பத்தே ஆகிரித்வா நீஹரிதும்பி அனுச்சி²ட்ட²ம் ஸுத்³த⁴பத்தம் உச்சி²ட்ட²ஹத்தே²ன க³ண்ஹிதும்பி ந வட்டதி. மச்ச²மம்ஸப²லாப²லாதீ³னி கா²த³ந்தோ யம் தத்த² அட்டி²ம் வா சலகம் வா ச²ட்³டே³துகாமோ ஹோதி, தம் பத்தே ட²பேதும் ந லப⁴தி. முக²தோ நீஹடம் பன யம் கிஞ்சி புன அகா²தி³துகாமோ பத்தே ட²பேதும் ந லப⁴தி. ஸிங்கி³வேராதீ³னி ட³ம்ஸித்வா புன ட²பேதும் லப⁴தி. பத்தஹத்தோ²தி பத்தோ ஹத்தே² யஸ்ஸாதி விக்³க³ஹோ. ‘‘பத்தஹத்தோ², கவாட’’ந்தி ச உபலக்க²ணமேதம். யத்த² கத்த²சி ஸரீராவயவே பன பத்தஸ்மிம் ஸதி யேன கேனசி ஸரீராவயவேன கவாடம் பணாமேதும், க⁴டிகம் வா உக்கி²பிதும், ஸூசிம் வா குஞ்சிகாய அவாபுரிதும் ந லப⁴தி. அம்ஸகூடே பன பத்தம் லக்³கே³த்வா யதா²ஸுக²ம் அவாபுரிதும் லப⁴தி.

68. பூ⁴மியா பூ⁴மிஸம்ப³ந்தீ⁴ ஆதா⁴ரகோ, தஸ்மிம் த³ந்தவல்லிவேத்தாதீ³ஹி கதே வலயாதா⁴ரகே ச ஏகதா³ருனா கதே தா³ருஆதா⁴ரகே ச ப³ஹூஹி த³ண்டே³ஹி கதே த³ண்டா³தா⁴ரகே ச யத்த² ட²பிதோ பத்தோ யதா² பரிவத்தித்வா ந பரிபததி, ததா² ஸுட்டு² ஸஜ்ஜிதே தஸ்மிம் பத்தஸ்ஸுபரி பத்தோதி ஏவரூபே து³வே பத்தே ட²பேய்யாதி பத³த்த²யோஜனா. ப⁴மகோடிஸதி³ஸோ பன தா³ருஆதா⁴ரகோ தீஹி த³ண்ட³கேஹி ப³த்³தோ⁴ த³ண்டா³தா⁴ரகோ ச ஏகஸ்ஸபி பத்தஸ்ஸ அனோகாஸோ, தத்த² ட²பேத்வாபி ஹத்தே²ன க³ஹேத்வா நிஸீதி³தப்³ப³ம். பூ⁴மியந்தி கடஸாரகாதி³னா அத்த²தாய பூ⁴மியா பன நிக்குஜ்ஜித்வா வா படிகுஜ்ஜித்வா வா ஏகம் பத்தம் ட²பேய்யாதி யோஜனா.

69. இதா³னி அகப்பியபத்தே த³ஸ்ஸேதி ‘‘தா³ரூ’’திஆதி³னா. தத்த² ஸுவண்ணமேவ ஸோவண்ணம். தா³ரு ச ரூபியஞ்ச ஸோவண்ணஞ்ச மணி ச வேளுரியஞ்ச தா³ரு…பே… வேளுரியானி, தேஹி நிப்³ப³த்தா தா³ரு…பே… மயா. தீ³கோ⁴ பன ‘‘வேளுரியாமயா’’தி கா³தா²ப³ந்த⁴ஸுக²த்த²ம் கதோ. ஏவமுபரிபி தாதி³ஸம் விஞ்ஞேய்யம். தத்த² இந்த³னீலாதி³ மணி நாம. கம்ஸோ ச காசோ ச திபு ச ஸீஸஞ்ச ப²லிகா ச தம்ப³லோஹோ சாதி த்³வந்தோ³, தேஹி ஜாதா கம்ஸ…பே… ஜா. தத்த² கம்ஸ-ஸத்³தே³ன வட்டலோஹோபி ஸங்க³ஹிதோ. ஸேதம் திபு, கண்ஹம் ஸீஸம்.

70. ச²வஸீஸமயோதி ச²வஸ்ஸ மதமனுஸ்ஸஸ்ஸ ஸீஸம் ஸீஸகபாலம், தேன நிப்³ப³த்தோ ச²வஸீஸமயோ. க⁴டி ச தும்ப³ஞ்ச, தேஸம் கடாஹோ, தேஹி ஜாதாதி க⁴டிதும்ப³கடாஹஜா. தத்த² க⁴டீதி க⁴டோயேவ. தும்ப³ம் அலாபு³. இதி இமே ஸப்³பே³ பத்தா அகப்பியா வுத்தா, து³க்கடவத்து²கா ச வுத்தாதி யோஜனா. தத்த² ரூபியாதீ³ஸு சதூஸு ஸசே கி³ஹீ ப⁴த்தக்³கே³ஸு ஸுவண்ணதட்டகாதீ³ஸு ப்³யஞ்ஜனம் கத்வா உபனாமேந்தி, ஆமஸிதும் ந வட்டதி. கம்ஸகாசப²லிகஜானி பன தட்டகாதீ³னி பா⁴ஜனானி புக்³க³லிகபரிபோ⁴கே³னேவ ந வட்டந்தி, ஸங்கி⁴கபரிபோ⁴கே³ன வா கி³ஹிவிகடானி வா வட்டந்தி. க⁴டிதும்ப³கடாஹஜா பன லபி⁴த்வா பரிஹரிதும் ந வட்டந்தி, தாவகாலிகம் பரிபு⁴ஞ்ஜிதும் வட்டந்தி.

பத்தனித்³தே³ஸவண்ணனா நிட்டி²தா.